൧. വിഭങ്ഗവാരോ

ഹേതുപച്ചയോ

൧. ഹേതും ധമ്മം പടിച്ച ഹേതു ധമ്മോ ഉപ്പജ്ജതി ഹേതുപച്ചയാ – അലോഭം പടിച്ച അദോസോ അമോഹോ, അദോസം പടിച്ച അലോഭോ അമോഹോ, അമോഹം പടിച്ച അലോഭോ അദോസോ, ലോഭം പടിച്ച മോഹോ, മോഹം പടിച്ച ലോഭോ, ദോസം പടിച്ച മോഹോ, മോഹം പടിച്ച ദോസോ; പടിസന്ധിക്ഖണേ…പേ…. (൧)

ഹേതും ധമ്മം പടിച്ച നഹേതു ധമ്മോ ഉപ്പജ്ജതി ഹേതുപച്ചയാ – ഹേതും ധമ്മം പടിച്ച സമ്പയുത്തകാ ഖന്ധാ ചിത്തസമുട്ഠാനഞ്ച രൂപം; പടിസന്ധിക്ഖണേ…പേ…. (൨)

ഹേതും ധമ്മം പടിച്ച ഹേതു ച നഹേതു ച ധമ്മാ ഉപ്പജ്ജന്തി ഹേതുപച്ചയാ – അലോഭം പടിച്ച അദോസോ അമോഹോ സമ്പയുത്തകാ ച ഖന്ധാ ചിത്തസമുട്ഠാനഞ്ച രൂപം (ചക്കം). ലോഭം പടിച്ച മോഹോ സമ്പയുത്തകാ ച ഖന്ധാ ചിത്തസമുട്ഠാനഞ്ച രൂപം…പേ… പടിസന്ധിക്ഖണേ…പേ…. (൩)

൨. നഹേതും ധമ്മം പടിച്ച നഹേതു ധമ്മോ ഉപ്പജ്ജതി ഹേതുപച്ചയാ – നഹേതും ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം; പടിസന്ധിക്ഖണേ…പേ… ഖന്ധേ പടിച്ച വത്ഥു, വത്ഥും പടിച്ച ഖന്ധാ; ഏകം മഹാഭൂതം…പേ…. (൧)

നഹേതും ധമ്മം പടിച്ച ഹേതു ധമ്മോ ഉപ്പജ്ജതി ഹേതുപച്ചയാ – നഹേതൂ ഖന്ധേ പടിച്ച ഹേതൂ; പടിസന്ധിക്ഖണേ…പേ… വത്ഥും പടിച്ച ഹേതൂ. (൨)

നഹേതും ധമ്മം പടിച്ച ഹേതു ച നഹേതു ച ധമ്മാ ഉപ്പജ്ജന്തി ഹേതുപച്ചയാ – നഹേതും ഏകം ഖന്ധം പടിച്ച തയോ ഖന്ധാ ഹേതു ച ചിത്തസമുട്ഠാനഞ്ച രൂപം…പേ… ദ്വേ ഖന്ധേ പടിച്ച ദ്വേ ഖന്ധാ ഹേതു ച ചിത്തസമുട്ഠാനഞ്ച രൂപം; പടിസന്ധിക്ഖണേ…പേ… പടിസന്ധിക്ഖണേ വത്ഥും പടിച്ച ഹേതൂ സമ്പയുത്തകാ ച ഖന്ധാ. (൩)

൩. ഹേതുഞ്ച നഹേതുഞ്ച ധമ്മം പടിച്ച ഹേതു ധമ്മോ ഉപ്പജ്ജതി ഹേതുപച്ചയാ – അലോഭഞ്ച സമ്പയുത്തകേ ച ഖന്ധേ പടിച്ച അദോസോ അമോഹോ (ചക്കം). ലോഭഞ്ച സമ്പയുത്തകേ ച ഖന്ധേ പടിച്ച മോഹോ, ദോസഞ്ച സമ്പയുത്തകേ ച ഖന്ധേ പടിച്ച മോഹോ…പേ… പടിസന്ധിക്ഖണേ…പേ… അലോഭഞ്ച വത്ഥുഞ്ച പടിച്ച അദോസോ അമോഹോ…പേ…. (൧)

ഹേതുഞ്ച നഹേതുഞ്ച ധമ്മം പടിച്ച നഹേതു ധമ്മോ ഉപ്പജ്ജതി ഹേതുപച്ചയാ – നഹേതും ഏകം ഖന്ധഞ്ച ഹേതുഞ്ച പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ ച ഹേതുഞ്ച പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം; പടിസന്ധിക്ഖണേ…പേ… പടിസന്ധിക്ഖണേ വത്ഥുഞ്ച ഹേതുഞ്ച പടിച്ച സമ്പയുത്തകാ ഖന്ധാ. (൨)

ഹേതുഞ്ച നഹേതുഞ്ച ധമ്മം പടിച്ച ഹേതു ച നഹേതു ച ധമ്മാ ഉപ്പജ്ജന്തി ഹേതുപച്ചയാ – നഹേതും ഏകം ഖന്ധഞ്ച അലോഭഞ്ച പടിച്ച തയോ ഖന്ധാ അദോസോ അമോഹോ ച ചിത്തസമുട്ഠാനഞ്ച രൂപം…പേ… ദ്വേ ഖന്ധേ ച അലോഭഞ്ച പടിച്ച ദ്വേ ഖന്ധാ അദോസോ അമോഹോ ച ചിത്തസമുട്ഠാനഞ്ച രൂപം (ചക്കം). നഹേതും ഏകം ഖന്ധഞ്ച ലോഭഞ്ച പടിച്ച തയോ ഖന്ധാ മോഹോ ച ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… പടിസന്ധിക്ഖണേ…പേ… വത്ഥുഞ്ച അലോഭഞ്ച പടിച്ച അദോസോ അമോഹോ സമ്പയുത്തകാ ച ഖന്ധാ. (൩)

ആരമ്മണപച്ചയാദി

൪. ഹേതും ധമ്മം പടിച്ച ഹേതു ധമ്മോ ഉപ്പജ്ജതി ആരമ്മണപച്ചയാ (രൂപം ഛഡ്ഡേത്വാ അരൂപേയേവ നവ പഞ്ഹാ)… അധിപതിപച്ചയാ (പടിസന്ധി നത്ഥി, പരിപുണ്ണം) ഏകം മഹാഭൂതം പടിച്ച…പേ… മഹാഭൂതേ പടിച്ച ചിത്തസമുട്ഠാനം രൂപം ഉപാദാരൂപം… (ഇമം നാനം) അനന്തരപച്ചയാ… സമനന്തരപച്ചയാ… സഹജാതപച്ചയാ (സബ്ബേ മഹാഭൂതാ യാവ അസഞ്ഞസത്താ)… അഞ്ഞമഞ്ഞപച്ചയാ… നിസ്സയപച്ചയാ… ഉപനിസ്സയപച്ചയാ… പുരേജാതപച്ചയാ… ആസേവനപച്ചയാ (ദ്വീസുപി പടിസന്ധി നത്ഥി)… കമ്മപച്ചയാ… വിപാകപച്ചയാ (സംഖിത്തം)… അവിഗതപച്ചയാ.