൭. പീതിത്തികം

൧. പടിച്ചവാരോ

൧. പച്ചയാനുലോമം

൧. വിഭങ്ഗവാരോ

ഹേതുപച്ചയോ

൧. പീതിസഹഗതം ധമ്മം പടിച്ച പീതിസഹഗതോ ധമ്മോ ഉപ്പജ്ജതി ഹേതുപച്ചയാ – പീതിസഹഗതം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ. പടിസന്ധിക്ഖണേ പീതിസഹഗതം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ. (൧)

പീതിസഹഗതം ധമ്മം പടിച്ച സുഖസഹഗതോ ധമ്മോ ഉപ്പജ്ജതി ഹേതുപച്ചയാ – പീതിസഹഗതം ഏകം ഖന്ധം പടിച്ച സുഖസഹഗതാ തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ. പടിസന്ധിക്ഖണേ പീതിസഹഗതം ഏകം ഖന്ധം പടിച്ച സുഖസഹഗതാ തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ. (൨)

പീതിസഹഗതം ധമ്മം പടിച്ച പീതിസഹഗതോ ച സുഖസഹഗതോ ച ധമ്മാ ഉപ്പജ്ജന്തി ഹേതുപച്ചയാ – പീതിസഹഗതം ഏകം ഖന്ധം പടിച്ച പീതിസഹഗതാ ച സുഖസഹഗതാ ച തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ. പടിസന്ധിക്ഖണേ പീതിസഹഗതം ഏകം ഖന്ധം പടിച്ച പീതിസഹഗതാ ച സുഖസഹഗതാ ച തയോ ഖന്ധാ …പേ… ദ്വേ ഖന്ധേ പടിച്ച ദ്വേ ഖന്ധാ. (൩)

൨. സുഖസഹഗതം ധമ്മം പടിച്ച സുഖസഹഗതോ ധമ്മോ ഉപ്പജ്ജതി ഹേതുപച്ചയാ – സുഖസഹഗതം ഏകം ഖന്ധം പടിച്ച ദ്വേ ഖന്ധാ, ദ്വേ ഖന്ധേ പടിച്ച ഏകോ ഖന്ധോ. പടിസന്ധിക്ഖണേ സുഖസഹഗതം ഏകം ഖന്ധം പടിച്ച ദ്വേ ഖന്ധാ, ദ്വേ ഖന്ധേ പടിച്ച ഏകോ ഖന്ധോ. (൧)

സുഖസഹഗതം ധമ്മം പടിച്ച പീതിസഹഗതോ ധമ്മോ ഉപ്പജ്ജതി ഹേതുപച്ചയാ – സുഖസഹഗതം ഏകം ഖന്ധം പടിച്ച പീതിസഹഗതാ തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ. പടിസന്ധിക്ഖണേ സുഖസഹഗതം ഏകം ഖന്ധം പടിച്ച പീതിസഹഗതാ തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ. (൨)

സുഖസഹഗതം ധമ്മം പടിച്ച പീതിസഹഗതോ ച സുഖസഹഗതോ ച ധമ്മാ ഉപ്പജ്ജന്തി ഹേതുപച്ചയാ – സുഖസഹഗതം ഏകം ഖന്ധം പടിച്ച പീതിസഹഗതാ ച സുഖസഹഗതാ ച ദ്വേ ഖന്ധാ, ദ്വേ ഖന്ധേ പടിച്ച ഏകോ ഖന്ധോ. പടിസന്ധിക്ഖണേ സുഖസഹഗതം ഏകം ഖന്ധം പടിച്ച പീതിസഹഗതാ ച സുഖസഹഗതാ ച ദ്വേ ഖന്ധാ, ദ്വേ ഖന്ധേ പടിച്ച ഏകോ ഖന്ധോ. (൩)

൩. ഉപേക്ഖാസഹഗതം ധമ്മം പടിച്ച ഉപേക്ഖാസഹഗതോ ധമ്മോ ഉപ്പജ്ജതി ഹേതുപച്ചയാ – ഉപേക്ഖാസഹഗതം ഏകം ഖന്ധം പടിച്ച ദ്വേ ഖന്ധാ, ദ്വേ ഖന്ധേ പടിച്ച ഏകോ ഖന്ധോ. പടിസന്ധിക്ഖണേ…പേ…. (൧)

പീതിസഹഗതഞ്ച സുഖസഹഗതഞ്ച ധമ്മം പടിച്ച പീതിസഹഗതോ ധമ്മോ ഉപ്പജ്ജതി ഹേതുപച്ചയാ – പീതിസഹഗതഞ്ച സുഖസഹഗതഞ്ച ഏകം ഖന്ധം പടിച്ച പീതിസഹഗതാ തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ. പടിസന്ധിക്ഖണേ പീതിസഹഗതഞ്ച സുഖസഹഗതഞ്ച ഏകം ഖന്ധം പടിച്ച പീതിസഹഗതാ തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ. (൧)

പീതിസഹഗതഞ്ച സുഖസഹഗതഞ്ച ധമ്മം പടിച്ച സുഖസഹഗതോ ധമ്മോ ഉപ്പജ്ജതി ഹേതുപച്ചയാ – പീതിസഹഗതഞ്ച സുഖസഹഗതഞ്ച ഏകം ഖന്ധം പടിച്ച സുഖസഹഗതാ ദ്വേ ഖന്ധാ, ദ്വേ ഖന്ധേ പടിച്ച ഏകോ ഖന്ധോ. പടിസന്ധിക്ഖണേ പീതിസഹഗതഞ്ച സുഖസഹഗതഞ്ച ഏകം ഖന്ധം പടിച്ച സുഖസഹഗതാ ദ്വേ ഖന്ധാ, ദ്വേ ഖന്ധേ പടിച്ച ഏകോ ഖന്ധോ. (൨)

പീതിസഹഗതഞ്ച സുഖസഹഗതഞ്ച ധമ്മം പടിച്ച പീതിസഹഗതോ ച സുഖസഹഗതോ ച ധമ്മാ ഉപ്പജ്ജന്തി ഹേതുപച്ചയാ – പീതിസഹഗതഞ്ച സുഖസഹഗതഞ്ച ഏകം ഖന്ധം പടിച്ച പീതിസഹഗതാ ച സുഖസഹഗതാ ച ദ്വേ ഖന്ധാ, ദ്വേ ഖന്ധേ പടിച്ച ഏകോ ഖന്ധോ. പടിസന്ധിക്ഖണേ പീതിസഹഗതഞ്ച സുഖസഹഗതഞ്ച ഏകം ഖന്ധം പടിച്ച പീതിസഹഗതാ ച സുഖസഹഗതാ ച ദ്വേ ഖന്ധാ, ദ്വേ ഖന്ധേ പടിച്ച ഏകോ ഖന്ധോ. (൩)

ആരമ്മണപച്ചയാദി

൪. പീതിസഹഗതം ധമ്മം പടിച്ച പീതിസഹഗതോ ധമ്മോ ഉപ്പജ്ജതി ആരമ്മണപച്ചയാ… അധിപതിപച്ചയാ… (പടിസന്ധിക്ഖണേ നത്ഥി) അനന്തരപച്ചയാ… സമനന്തരപച്ചയാ… സഹജാതപച്ചയാ… അഞ്ഞമഞ്ഞപച്ചയാ… നിസ്സയപച്ചയാ… ഉപനിസ്സയപച്ചയാ… പുരേജാതപച്ചയാ… (പുരേജാതേ പടിസന്ധിക്ഖണേ നത്ഥി) ആസേവനപച്ചയാ… (ആസേവനേ വിപാകം നത്ഥി) കമ്മപച്ചയാ… വിപാകപച്ചയാ… ആഹാര…പേ… ഇന്ദ്രിയ… ഝാന… മഗ്ഗ… സമ്പയുത്ത… വിപ്പയുത്ത… അത്ഥി… നത്ഥി… വിഗത… അവിഗതപച്ചയാ.

൧. പച്ചയാനുലോമം

൨. സങ്ഖ്യാവാരോ

സുദ്ധം

൫. ഹേതുയാ ദസ, ആരമ്മണേ ദസ, അധിപതിയാ ദസ, അനന്തരേ സമനന്തരേ സഹജാതേ അഞ്ഞമഞ്ഞേ നിസ്സയേ ഉപനിസ്സയേ പുരേജാതേ ആസേവനേ കമ്മേ വിപാകേ ആഹാരേ ഇന്ദ്രിയേ ഝാനേ മഗ്ഗേ സമ്പയുത്തേ വിപ്പയുത്തേ അത്ഥിയാ നത്ഥിയാ വിഗതേ അവിഗതേ സബ്ബത്ഥ ദസ.

(ഏവം അനുലോമഗണനാ ഗണേതബ്ബാ.)

അനുലോമം.

൨. പച്ചയപച്ചനീയം

൧. വിഭങ്ഗവാരോ

നഹേതുപച്ചയോ

൬. പീതിസഹഗതം ധമ്മം പടിച്ച പീതിസഹഗതോ ധമ്മോ ഉപ്പജ്ജതി നഹേതുപച്ചയാ – അഹേതുകം പീതിസഹഗതം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ. (൧)

പീതിസഹഗതം ധമ്മം പടിച്ച സുഖസഹഗതോ ധമ്മോ ഉപ്പജ്ജതി നഹേതുപച്ചയാ – അഹേതുകം പീതിസഹഗതം ഏകം ഖന്ധം പടിച്ച സുഖസഹഗതാ തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ. (൨)

പീതിസഹഗതം ധമ്മം പടിച്ച പീതിസഹഗതോ ച സുഖസഹഗതോ ച ധമ്മാ ഉപ്പജ്ജന്തി നഹേതുപച്ചയാ – അഹേതുകം പീതിസഹഗതം ഏകം ഖന്ധം പടിച്ച പീതിസഹഗതാ ച സുഖസഹഗതാ ച തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ. (൩)

൭. സുഖസഹഗതം ധമ്മം പടിച്ച സുഖസഹഗതോ ധമ്മോ ഉപ്പജ്ജതി നഹേതുപച്ചയാ – അഹേതുകം സുഖസഹഗതം ഏകം ഖന്ധം പടിച്ച ദ്വേ ഖന്ധാ, ദ്വേ ഖന്ധേ പടിച്ച ഏകോ ഖന്ധോ. (൧)

സുഖസഹഗതം ധമ്മം പടിച്ച പീതിസഹഗതോ ധമ്മോ ഉപ്പജ്ജതി നഹേതുപച്ചയാ – അഹേതുകം സുഖസഹഗതം ഏകം ഖന്ധം പടിച്ച പീതിസഹഗതാ തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ. (൨)

സുഖസഹഗതം ധമ്മം പടിച്ച പീതിസഹഗതോ ച സുഖസഹഗതോ ച ധമ്മാ ഉപ്പജ്ജന്തി നഹേതുപച്ചയാ – അഹേതുകം സുഖസഹഗതം ഏകം ഖന്ധം പടിച്ച പീതിസഹഗതാ ച സുഖസഹഗതാ ച ദ്വേ ഖന്ധാ, ദ്വേ ഖന്ധേ പടിച്ച ഏകോ ഖന്ധോ. (൩)

൮. ഉപേക്ഖാസഹഗതം ധമ്മം പടിച്ച ഉപേക്ഖാസഹഗതോ ധമ്മോ ഉപ്പജ്ജതി നഹേതുപച്ചയാ – അഹേതുകം ഉപേക്ഖാസഹഗതം ഏകം ഖന്ധം പടിച്ച ദ്വേ ഖന്ധാ, ദ്വേ ഖന്ധേ പടിച്ച ഏകോ ഖന്ധോ. അഹേതുകപടിസന്ധിക്ഖണേ ഉപേക്ഖാസഹഗതം ഏകം ഖന്ധം പടിച്ച ദ്വേ ഖന്ധാ, ദ്വേ ഖന്ധേ പടിച്ച ഏകോ ഖന്ധോ. വിചികിച്ഛാസഹഗതേ ഉദ്ധച്ചസഹഗതേ ഖന്ധേ പടിച്ച വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

൯. പീതിസഹഗതഞ്ച സുഖസഹഗതഞ്ച ധമ്മം പടിച്ച പീതിസഹഗതോ ധമ്മോ ഉപ്പജ്ജതി നഹേതുപച്ചയാ – അഹേതുകം പീതിസഹഗതഞ്ച സുഖസഹഗതഞ്ച ഏകം ഖന്ധം പടിച്ച പീതിസഹഗതാ തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ. (൧)

പീതിസഹഗതഞ്ച സുഖസഹഗതഞ്ച ധമ്മം പടിച്ച സുഖസഹഗതോ ധമ്മോ ഉപ്പജ്ജതി നഹേതുപച്ചയാ – അഹേതുകം പീതിസഹഗതഞ്ച സുഖസഹഗതഞ്ച ഏകം ഖന്ധം പടിച്ച സുഖസഹഗതാ ദ്വേ ഖന്ധാ, ദ്വേ ഖന്ധേ പടിച്ച ഏകോ ഖന്ധോ. (൨)

പീതിസഹഗതഞ്ച സുഖസഹഗതഞ്ച ധമ്മം പടിച്ച പീതിസഹഗതോ ച സുഖസഹഗതോ ച ധമ്മാ ഉപ്പജ്ജന്തി നഹേതുപച്ചയാ – അഹേതുകം പീതിസഹഗതഞ്ച സുഖസഹഗതഞ്ച ഏകം ഖന്ധം പടിച്ച പീതിസഹഗതാ ച സുഖസഹഗതാ ച ദ്വേ ഖന്ധാ, ദ്വേ ഖന്ധേ പടിച്ച ഏകോ ഖന്ധോ. (൩)

നഅധിപതി-നആസേവനപച്ചയാ

൧൦. പീതിസഹഗതം ധമ്മം പടിച്ച പീതിസഹഗതോ ധമ്മോ ഉപ്പജ്ജതി നഅധിപതിപച്ചയാ (നഅധിപതിപടിസന്ധിക്ഖണേ പരിപുണ്ണം)… നപുരേജാതപച്ചയാ… (‘‘അരൂപേ’’തി നിയാമേതബ്ബം ‘‘പടിസന്ധിക്ഖണേ’’തി ച) നപച്ഛാജാതപച്ചയാ… നആസേവനപച്ചയാ.

നകമ്മപച്ചയോ

൧൧. പീതിസഹഗതം ധമ്മം പടിച്ച പീതിസഹഗതോ ധമ്മോ ഉപ്പജ്ജതി നകമ്മപച്ചയാ – പീതിസഹഗതേ ഖന്ധേ പടിച്ച പീതിസഹഗതാ ചേതനാ.

പീതിസഹഗതം ധമ്മം പടിച്ച സുഖസഹഗതോ ധമ്മോ ഉപ്പജ്ജതി നകമ്മപച്ചയാ – പീതിസഹഗതേ ഖന്ധേ പടിച്ച സുഖസഹഗതാ ചേതനാ.

(ഇമിനാ കാരണേന ദസ പഞ്ഹാ വിത്ഥാരേതബ്ബാ.)

നവിപാകപച്ചയോ

൧൨. പീതിസഹഗതം ധമ്മം പടിച്ച പീതിസഹഗതോ ധമ്മോ ഉപ്പജ്ജതി നവിപാകപച്ചയാ…പേ… (പരിപുണ്ണം, പടിസന്ധി നത്ഥി).

നഝാനപച്ചയാദി

൧൩. സുഖസഹഗതം ധമ്മം പടിച്ച സുഖസഹഗതോ ധമ്മോ ഉപ്പജ്ജതി നഝാനപച്ചയാ – സുഖസഹഗതം കായവിഞ്ഞാണസഹഗതം ഏകം ഖന്ധം പടിച്ച ദ്വേ ഖന്ധാ, ദ്വേ ഖന്ധേ പടിച്ച ഏകോ ഖന്ധോ. (൧)

ഉപേക്ഖാസഹഗതം ധമ്മം പടിച്ച ഉപേക്ഖാസഹഗതോ ധമ്മോ ഉപ്പജ്ജതി നഝാനപച്ചയാ – ചതുവിഞ്ഞാണസഹഗതം ഏകം ഖന്ധം പടിച്ച ദ്വേ ഖന്ധാ, ദ്വേ ഖന്ധേ പടിച്ച ഏകോ ഖന്ധോ. (൧)

(നമഗ്ഗപച്ചയാ നഹേതുപച്ചയസദിസം. മോഹോ നത്ഥി. നവിപ്പയുത്തപച്ചയാ പരിപുണ്ണം അരൂപപഞ്ഹമേവ.)

൨. പച്ചയപച്ചനീയം

൨. സങ്ഖ്യാവാരോ

സുദ്ധം

൧൪. നഹേതുയാ ദസ, നഅധിപതിയാ ദസ, നപുരേജാതേ നപച്ഛാജാതേ നആസേവനേ നകമ്മേ നവിപാകേ ദസ, നഝാനേ ദ്വേ, നമഗ്ഗേ ദസ, നവിപ്പയുത്തേ ദസ (പച്ചനീയം പരിപുണ്ണം കാതബ്ബം).

പച്ചനീയം.

൩. പച്ചയാനുലോമപച്ചനീയം

ദുകം

൧൫. ഹേതുപച്ചയാ നഅധിപതിയാ ദസ, നപുരേജാതേ ദസ, നപച്ഛാജാതേ നആസേവനേ നകമ്മേ നവിപാകേ നവിപ്പയുത്തേ ദസ.

(അനുലോമപച്ചനീയം വിത്ഥാരേന ഗണേതബ്ബം.)

അനുലോമപച്ചനീയം.

൪. പച്ചയപച്ചനീയാനുലോമം

ദുകം

൧൬. നഹേതുപച്ചയാ ആരമ്മണേ ദസ, അനന്തരേ ദസ, സമനന്തരേ ദസ, സഹജാതേ അഞ്ഞമഞ്ഞേ നിസ്സയേ ഉപനിസ്സയേ പുരേജാതേ ആസേവനേ കമ്മേ വിപാകേ ആഹാരേ ഇന്ദ്രിയേ ഝാനേ സബ്ബേ ദസ, മഗ്ഗേ ഏകം, സമ്പയുത്തേ ദസ, വിപ്പയുത്തേ അത്ഥിയാ നത്ഥിയാ വിഗതേ അവിഗതേ സബ്ബേ ദസ.

പച്ചനീയാനുലോമം.

പടിച്ചവാരോ.

൨-൬. സഹജാത-പച്ചയ-നിസ്സയ-സംസട്ഠ-സമ്പയുത്തവാരോ

(സഹജാതവാരോപി പച്ചയവാരോപി നിസ്സയവാരോപി സംസട്ഠവാരോപി സമ്പയുത്തവാരോപി പടിച്ചവാരസദിസാ.)

൭. പഞ്ഹാവാരോ

൧. പച്ചയാനുലോമം

൧. വിഭങ്ഗവാരോ

ഹേതുപച്ചയോ

൧൭. പീതിസഹഗതോ ധമ്മോ പീതിസഹഗതസ്സ ധമ്മസ്സ ഹേതുപച്ചയേന പച്ചയോ – പീതിസഹഗതാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. പടിസന്ധിക്ഖണേ പീതിസഹഗതാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. (൧)

പീതിസഹഗതോ ധമ്മോ സുഖസഹഗതസ്സ ധമ്മസ്സ ഹേതുപച്ചയേന പച്ചയോ – പീതിസഹഗതാ ഹേതൂ സമ്പയുത്തകാനം സുഖസഹഗതാനം ഖന്ധാനം ഹേതുപച്ചയേന പച്ചയോ. പടിസന്ധിക്ഖണേ…പേ…. (൨)

പീതിസഹഗതോ ധമ്മോ പീതിസഹഗതസ്സ ച സുഖസഹഗതസ്സ ച ധമ്മസ്സ ഹേതുപച്ചയേന പച്ചയോ – പീതിസഹഗതാ ഹേതൂ സമ്പയുത്തകാനം പീതിസഹഗതാനഞ്ച സുഖസഹഗതാനഞ്ച ഖന്ധാനം ഹേതുപച്ചയേന പച്ചയോ. പടിസന്ധിക്ഖണേ…പേ…. (൩)

൧൮. സുഖസഹഗതോ ധമ്മോ സുഖസഹഗതസ്സ ധമ്മസ്സ…പേ… പീതിസഹഗതസ്സ ധമ്മസ്സ…പേ… പീതിസഹഗതസ്സ ച സുഖസഹഗതസ്സ ച ധമ്മസ്സ…പേ… (സുഖമൂലേ തീണി).

ഉപേക്ഖാസഹഗതോ ധമ്മോ ഉപേക്ഖാസഹഗതസ്സ ധമ്മസ്സ ഹേതുപച്ചയേന പച്ചയോ – ഉപേക്ഖാസഹഗതാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. പടിസന്ധിക്ഖണേ…പേ…. (൧)

പീതിസഹഗതോ ച സുഖസഹഗതോ ച ധമ്മാ പീതിസഹഗതസ്സ ധമ്മസ്സ…പേ… സുഖസഹഗതസ്സ ധമ്മസ്സ…പേ… പീതിസഹഗതസ്സ ച സുഖസഹഗതസ്സ ച ധമ്മസ്സ ഹേതുപച്ചയേന പച്ചയോ – പീതിസഹഗതാ ച സുഖസഹഗതാ ച ഹേതൂ സമ്പയുത്തകാനം പീതിസഹഗതാനഞ്ച സുഖസഹഗതാനഞ്ച ഖന്ധാനം ഹേതുപച്ചയേന പച്ചയോ. പടിസന്ധിക്ഖണേ…പേ…. (൨)

ആരമ്മണപച്ചയോ

൧൯. പീതിസഹഗതോ ധമ്മോ പീതിസഹഗതസ്സ ധമ്മസ്സ ആരമ്മണപച്ചയേന പച്ചയോ – പീതിസഹഗതേന ചിത്തേന ദാനം ദത്വാ സീലം സമാദിയിത്വാ ഉപോസഥകമ്മം കത്വാ തം പീതിസഹഗതേന ചിത്തേന പച്ചവേക്ഖതി, പീതിസഹഗതാ ഝാനാ വുട്ഠഹിത്വാ, മഗ്ഗാ വുട്ഠഹിത്വാ, ഫലാ വുട്ഠഹിത്വാ തം പീതിസഹഗതേന ചിത്തേന പച്ചവേക്ഖതി. അരിയാ പീതിസഹഗതേന ചിത്തേന പീതിസഹഗതേ പഹീനേ കിലേസേ പച്ചവേക്ഖന്തി, വിക്ഖമ്ഭിതേ കിലേസേ പച്ചവേക്ഖന്തി, പുബ്ബേ സമുദാചിണ്ണേ കിലേസേ ജാനന്തി. പീതിസഹഗതേ ഖന്ധേ പീതിസഹഗതേന ചിത്തേന അനിച്ചതോ ദുക്ഖതോ അനത്തതോ വിപസ്സന്തി അസ്സാദേന്തി അഭിനന്ദന്തി; തം ആരബ്ഭ പീതിസഹഗതോ രാഗോ ഉപ്പജ്ജതി, ദിട്ഠി ഉപ്പജ്ജതി. പീതിസഹഗതേ ഖന്ധേ ആരബ്ഭ പീതിസഹഗതാ ഖന്ധാ ഉപ്പജ്ജന്തി. (൧)

പീതിസഹഗതോ ധമ്മോ സുഖസഹഗതസ്സ ധമ്മസ്സ ആരമ്മണപച്ചയേന പച്ചയോ – പീതിസഹഗതേന ചിത്തേന ദാനം ദത്വാ സീലം സമാദിയിത്വാ ഉപോസഥകമ്മം കത്വാ തം സുഖസഹഗതേന ചിത്തേന പച്ചവേക്ഖതി, പീതിസഹഗതാ ഝാനാ വുട്ഠഹിത്വാ, മഗ്ഗാ വുട്ഠഹിത്വാ, ഫലാ വുട്ഠഹിത്വാ തം സുഖസഹഗതേന ചിത്തേന പച്ചവേക്ഖതി. അരിയാ സുഖസഹഗതേന ചിത്തേന പീതിസഹഗതേ പഹീനേ കിലേസേ പച്ചവേക്ഖന്തി, വിക്ഖമ്ഭിതേ കിലേസേ പച്ചവേക്ഖന്തി, പുബ്ബേ സമുദാചിണ്ണേ കിലേസേ ജാനന്തി. പീതിസഹഗതേ ഖന്ധേ സുഖസഹഗതേന ചിത്തേന അനിച്ചതോ ദുക്ഖതോ അനത്തതോ വിപസ്സന്തി അസ്സാദേന്തി അഭിനന്ദന്തി; തം ആരബ്ഭ സുഖസഹഗതോ രാഗോ ഉപ്പജ്ജതി, ദിട്ഠി ഉപ്പജ്ജതി. പീതിസഹഗതേ ഖന്ധേ ആരബ്ഭ സുഖസഹഗതാ ഖന്ധാ ഉപ്പജ്ജന്തി. (൨)

പീതിസഹഗതോ ധമ്മോ ഉപേക്ഖാസഹഗതസ്സ ധമ്മസ്സ ആരമ്മണപച്ചയേന പച്ചയോ – പീതിസഹഗതേന ചിത്തേന ദാനം ദത്വാ സീലം സമാദിയിത്വാ ഉപോസഥകമ്മം കത്വാ തം ഉപേക്ഖാസഹഗതേന ചിത്തേന പച്ചവേക്ഖതി, പീതിസഹഗതാ ഝാനാ വുട്ഠഹിത്വാ, മഗ്ഗാ വുട്ഠഹിത്വാ, ഫലാ വുട്ഠഹിത്വാ തം ഉപേക്ഖാസഹഗതേന ചിത്തേന പച്ചവേക്ഖതി. അരിയാ ഉപേക്ഖാസഹഗതേന ചിത്തേന പീതിസഹഗതേ പഹീനേ കിലേസേ പച്ചവേക്ഖന്തി, വിക്ഖമ്ഭിതേ കിലേസേ പച്ചവേക്ഖന്തി, പുബ്ബേ സമുദാചിണ്ണേ കിലേസേ ജാനന്തി. പീതിസഹഗതേ ഖന്ധേ ഉപേക്ഖാസഹഗതേന ചിത്തേന അനിച്ചതോ ദുക്ഖതോ അനത്തതോ വിപസ്സന്തി അസ്സാദേന്തി അഭിനന്ദന്തി; തം ആരബ്ഭ ഉപേക്ഖാസഹഗതോ രാഗോ ഉപ്പജ്ജതി, ദിട്ഠി ഉപ്പജ്ജതി, വിചികിച്ഛാ ഉപ്പജ്ജതി, ഉദ്ധച്ചം ഉപ്പജ്ജതി. ചേതോപരിയഞാണേന പീതിസഹഗതചിത്തസമങ്ഗിസ്സ ചിത്തം ജാനന്തി, പീതിസഹഗതാ ഖന്ധാ ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. പീതിസഹഗതേ ഖന്ധേ ആരബ്ഭ ഉപേക്ഖാസഹഗതാ ഖന്ധാ ഉപ്പജ്ജന്തി. (൩)

പീതിസഹഗതോ ധമ്മോ പീതിസഹഗതസ്സ ച സുഖസഹഗതസ്സ ച ധമ്മസ്സ ആരമ്മണപച്ചയേന പച്ചയോ – പീതിസഹഗതേന ചിത്തേന ദാനം ദത്വാ സീലം സമാദിയിത്വാ ഉപോസഥകമ്മം കത്വാ തം പീതിസഹഗതേന ച സുഖസഹഗതേന ച ചിത്തേന പച്ചവേക്ഖതി, പീതിസഹഗതാ ഝാനാ വുട്ഠഹിത്വാ, മഗ്ഗാ വുട്ഠഹിത്വാ, ഫലാ വുട്ഠഹിത്വാ തം പീതിസഹഗതേന ച സുഖസഹഗതേന ച ചിത്തേന പച്ചവേക്ഖതി. അരിയാ പീതിസഹഗതേന ച സുഖസഹഗതേന ച ചിത്തേന പീതിസഹഗതേ പഹീനേ കിലേസേ പച്ചവേക്ഖന്തി, വിക്ഖമ്ഭിതേ കിലേസേ പച്ചവേക്ഖന്തി, പുബ്ബേ സമുദാചിണ്ണേ കിലേസേ ജാനന്തി. പീതിസഹഗതേ ഖന്ധേ പീതിസഹഗതേന ച സുഖസഹഗതേന ച ചിത്തേന അനിച്ചതോ ദുക്ഖതോ അനത്തതോ വിപസ്സന്തി അസ്സാദേന്തി അഭിനന്ദന്തി; തം ആരബ്ഭ പീതിസഹഗതോ ച സുഖസഹഗതോ ച രാഗോ ഉപ്പജ്ജതി, ദിട്ഠി ഉപ്പജ്ജതി. പീതിസഹഗതേ ഖന്ധേ ആരബ്ഭ പീതിസഹഗതാ ച സുഖസഹഗതാ ച ഖന്ധാ ഉപ്പജ്ജന്തി. (൪)

൨൦. സുഖസഹഗതോ ധമ്മോ സുഖസഹഗതസ്സ ധമ്മസ്സ ആരമ്മണപച്ചയേന പച്ചയോ… സുഖസഹഗതോ ധമ്മോ പീതിസഹഗതസ്സ ധമ്മസ്സ…പേ… ഉപേക്ഖാസഹഗതസ്സ ധമ്മസ്സ…പേ… പീതിസഹഗതസ്സ ച സുഖസഹഗതസ്സ ച ധമ്മസ്സ ആരമ്മണപച്ചയേന പച്ചയോ – സുഖസഹഗതേ ഖന്ധേ ആരബ്ഭ പീതിസഹഗതാ ച സുഖസഹഗതാ ച ഖന്ധാ ഉപ്പജ്ജന്തി. (൪)

ഉപേക്ഖാസഹഗതോ ധമ്മോ ഉപേക്ഖാസഹഗതസ്സ ധമ്മസ്സ ആരമ്മണപച്ചയേന പച്ചയോ – ഉപേക്ഖാസഹഗതേന ചിത്തേന ദാനം ദത്വാ സീലം സമാദിയിത്വാ ഉപോസഥകമ്മം കത്വാ തം ഉപേക്ഖാസഹഗതേന ചിത്തേന പച്ചവേക്ഖതി, ഉപേക്ഖാസഹഗതാ ഝാനാ വുട്ഠഹിത്വാ, മഗ്ഗാ വുട്ഠഹിത്വാ, ഫലാ വുട്ഠഹിത്വാ തം ഉപേക്ഖാസഹഗതേന ചിത്തേന പച്ചവേക്ഖതി. അരിയാ ഉപേക്ഖാസഹഗതേന ചിത്തേന ഉപേക്ഖാസഹഗതേ പഹീനേ കിലേസേ പച്ചവേക്ഖന്തി, വിക്ഖമ്ഭിതേ കിലേസേ പച്ചവേക്ഖന്തി, പുബ്ബേ സമുദാചിണ്ണേ കിലേസേ ജാനന്തി. ഉപേക്ഖാസഹഗതേ ഖന്ധേ ഉപേക്ഖാസഹഗതേന ചിത്തേന അനിച്ചതോ ദുക്ഖതോ അനത്തതോ വിപസ്സന്തി അസ്സാദേന്തി അഭിനന്ദന്തി; തം ആരബ്ഭ ഉപേക്ഖാസഹഗതോ രാഗോ ഉപ്പജ്ജതി, ദിട്ഠി ഉപ്പജ്ജതി, വിചികിച്ഛാ ഉപ്പജ്ജതി, ഉദ്ധച്ചം ഉപ്പജ്ജതി. ചേതോപരിയഞാണേന ഉപേക്ഖാസഹഗതചിത്തസമങ്ഗിസ്സ ചിത്തം ജാനാതി. ആകാസാനഞ്ചായതനം വിഞ്ഞാണഞ്ചായതനസ്സ ആരമ്മണപച്ചയേന പച്ചയോ…പേ… ആകിഞ്ചഞ്ഞായതനം നേവസഞ്ഞാനാസഞ്ഞായതനസ്സ ആരമ്മണപച്ചയേന പച്ചയോ. ഉപേക്ഖാസഹഗതാ ഖന്ധാ ഇദ്ധിവിധഞാണസ്സ, ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ ആവജ്ജനായ ആരമ്മണപച്ചയേന പച്ചയോ. ഉപേക്ഖാസഹഗതേ ഖന്ധേ ആരബ്ഭ ഉപേക്ഖാസഹഗതാ ഖന്ധാ ഉപ്പജ്ജന്തി. (൧)

ഉപേക്ഖാസഹഗതോ ധമ്മോ പീതിസഹഗതസ്സ ധമ്മസ്സ…പേ… സുഖസഹഗതസ്സ ധമ്മസ്സ…പേ… പീതിസഹഗതസ്സ ച സുഖസഹഗതസ്സ ച ധമ്മസ്സ ആരമ്മണപച്ചയേന പച്ചയോ – ഉപേക്ഖാസഹഗതേന ചിത്തേന ദാനം ദത്വാ സീലം സമാദിയിത്വാ ഉപോസഥകമ്മം കത്വാ തം പീതിസഹഗതേന ച സുഖസഹഗതേന ച ചിത്തേന പച്ചവേക്ഖതി, ഉപേക്ഖാസഹഗതാ ഝാനാ വുട്ഠഹിത്വാ, മഗ്ഗാ വുട്ഠഹിത്വാ ഫലാ വുട്ഠഹിത്വാ, തം പീതിസഹഗതേന ച സുഖസഹഗതേന ച ചിത്തേന പച്ചവേക്ഖതി. അരിയാ പീതിസഹഗതേന ച സുഖസഹഗതേന ച ചിത്തേന ഉപേക്ഖാസഹഗതേ പഹീനേ കിലേസേ പച്ചവേക്ഖന്തി, വിക്ഖമ്ഭിതേ കിലേസേ പച്ചവേക്ഖന്തി, പുബ്ബേ സമുദാചിണ്ണേ കിലേസേ ജാനന്തി. ഉപേക്ഖാസഹഗതേ ഖന്ധേ പീതിസഹഗതേന ച സുഖസഹഗതേന ച ചിത്തേന അനിച്ചതോ ദുക്ഖതോ അനത്തതോ വിപസ്സന്തി അസ്സാദേന്തി അഭിനന്ദന്തി; തം ആരബ്ഭ പീതിസഹഗതോ ച സുഖസഹഗതോ ച രാഗോ ഉപ്പജ്ജതി, ദിട്ഠി ഉപ്പജ്ജതി. ഉപേക്ഖാസഹഗതേ ഖന്ധേ ആരബ്ഭ പീതിസഹഗതാ ച സുഖസഹഗതാ ച ഖന്ധാ ഉപ്പജ്ജന്തി. (൩)

൨൧. പീതിസഹഗതോ ച സുഖസഹഗതോ ച ധമ്മാ പീതിസഹഗതസ്സ ധമ്മസ്സ…പേ… സുഖസഹഗതസ്സ ധമ്മസ്സ…പേ… ഉപേക്ഖാസഹഗതസ്സ ധമ്മസ്സ ആരമ്മണപച്ചയേന പച്ചയോ – പീതിസഹഗതേന ച സുഖസഹഗതേന ച ചിത്തേന ദാനം ദത്വാ സീലം സമാദിയിത്വാ ഉപോസഥകമ്മം കത്വാ…പേ… പീതിസഹഗതേ ച സുഖസഹഗതേ ച ഖന്ധേ ഉപേക്ഖാസഹഗതേന ചിത്തേന അനിച്ചതോ ദുക്ഖതോ അനത്തതോ വിപസ്സതി അസ്സാദേതി അഭിനന്ദതി; തം ആരബ്ഭ ഉപേക്ഖാസഹഗതോ രാഗോ ഉപ്പജ്ജതി, ദിട്ഠി ഉപ്പജ്ജതി, വിചികിച്ഛാ ഉപ്പജ്ജതി, ഉദ്ധച്ചം ഉപ്പജ്ജതി. ചേതോപരിയഞാണേന പീതിസഹഗതസുഖസഹഗതചിത്തസമങ്ഗിസ്സ ചിത്തം ജാനാതി. പീതിസഹഗതാ ച സുഖസഹഗതാ ച ഖന്ധാ ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. പീതിസഹഗതേ ച സുഖസഹഗതേ ച ഖന്ധേ ആരബ്ഭ ഉപേക്ഖാസഹഗതാ ഖന്ധാ ഉപ്പജ്ജന്തി. (൩)

പീതിസഹഗതോ ച സുഖസഹഗതോ ച ധമ്മാ പീതിസഹഗതസ്സ ച സുഖസഹഗതസ്സ ച ധമ്മസ്സ ആരമ്മണപച്ചയേന പച്ചയോ (സംഖിത്തം). (൪)

അധിപതിപച്ചയോ

൨൨. പീതിസഹഗതോ ധമ്മോ പീതിസഹഗതസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – പീതിസഹഗതേന ചിത്തേന ദാനം ദത്വാ സീലം സമാദിയിത്വാ ഉപോസഥകമ്മം കത്വാ പീതിസഹഗതേന ചിത്തേന തം ഗരും കത്വാ പച്ചവേക്ഖതി, പീതിസഹഗതാ ഝാനാ വുട്ഠഹിത്വാ, മഗ്ഗാ വുട്ഠഹിത്വാ, ഫലാ വുട്ഠഹിത്വാ പീതിസഹഗതേന ചിത്തേന തം ഗരും കത്വാ പച്ചവേക്ഖതി. പീതിസഹഗതേ ഖന്ധേ പീതിസഹഗതേന ചിത്തേന ഗരും കത്വാ അസ്സാദേതി അഭിനന്ദതി; തം ഗരും കത്വാ പീതിസഹഗതോ രാഗോ ഉപ്പജ്ജതി, ദിട്ഠി ഉപ്പജ്ജതി. സഹജാതാധിപതി – പീതിസഹഗതാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (൧)

പീതിസഹഗതോ ധമ്മോ സുഖസഹഗതസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – പീതിസഹഗതേന ചിത്തേന ദാനം ദത്വാ…പേ…. സഹജാതാധിപതി – പീതിസഹഗതാധിപതി സമ്പയുത്തകാനം സുഖസഹഗതാനം ഖന്ധാനം അധിപതിപച്ചയേന പച്ചയോ. (൨)

പീതിസഹഗതോ ധമ്മോ ഉപേക്ഖാസഹഗതസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി – പീതിസഹഗതേന ചിത്തേന ദാനം ദത്വാ…പേ… ഉപേക്ഖാസഹഗതേന ചിത്തേന (സംഖിത്തം). (൩)

പീതിസഹഗതോ ധമ്മോ പീതിസഹഗതസ്സ ച സുഖസഹഗതസ്സ ച ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – പീതിസഹഗതേന ചിത്തേന ദാനം ദത്വാ…പേ…. സഹജാതാധിപതി – പീതിസഹഗതാധിപതി സമ്പയുത്തകാനം പീതിസഹഗതാനഞ്ച സുഖസഹഗതാനഞ്ച ഖന്ധാനം അധിപതിപച്ചയേന പച്ചയോ. (൪)

൨൩. സുഖസഹഗതോ ധമ്മോ സുഖസഹഗതസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – സുഖസഹഗതേന ചിത്തേന ദാനം ദത്വാ…പേ…. സഹജാതാധിപതി – സുഖസഹഗതാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (൧)

സുഖസഹഗതോ ധമ്മോ പീതിസഹഗതസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി…പേ…. സഹജാതാധിപതി – സുഖസഹഗതാധിപതി സമ്പയുത്തകാനം പീതിസഹഗതാനം ഖന്ധാനം അധിപതിപച്ചയേന പച്ചയോ. (൨)

സുഖസഹഗതോ ധമ്മോ ഉപേക്ഖാസഹഗതസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി (സംഖിത്തം). (൩)

സുഖസഹഗതോ ധമ്മോ പീതിസഹഗതസ്സ ച സുഖസഹഗതസ്സ ച ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി…പേ…. സഹജാതാധിപതി – സുഖസഹഗതാധിപതി സമ്പയുത്തകാനം പീതിസഹഗതാനഞ്ച സുഖസഹഗതാനഞ്ച ഖന്ധാനം അധിപതിപച്ചയേന പച്ചയോ. (൪)

൨൪. ഉപേക്ഖാസഹഗതോ ധമ്മോ ഉപേക്ഖാസഹഗതസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി…പേ…. സഹജാതാധിപതി – ഉപേക്ഖാസഹഗതാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (൧)

ഉപേക്ഖാസഹഗതോ ധമ്മോ പീതിസഹഗതസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി (സംഖിത്തം). (൨)

ഉപേക്ഖാസഹഗതോ ധമ്മോ സുഖസഹഗതസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി (സംഖിത്തം). (൩)

ഉപേക്ഖാസഹഗതോ ധമ്മോ പീതിസഹഗതസ്സ ച സുഖസഹഗതസ്സ ച ധമ്മസ്സ അധിപതിപച്ചയേന പച്ചയോ – ആരമ്മണാധിപതി (സംഖിത്തം). (൪)

൨൫. പീതിസഹഗതോ ച സുഖസഹഗതോ ച ധമ്മാ പീതിസഹഗതസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി…പേ…. സഹജാതാധിപതി – പീതിസഹഗതാ ച സുഖസഹഗതാ ച അധിപതി സമ്പയുത്തകാനം പീതിസഹഗതാനം ഖന്ധാനം അധിപതിപച്ചയേന പച്ചയോ. (൧)

പീതിസഹഗതോ ച സുഖസഹഗതോ ച ധമ്മാ സുഖസഹഗതസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി…പേ…. സഹജാതാധിപതി – പീതിസഹഗതാ ച സുഖസഹഗതാ ച അധിപതി സമ്പയുത്തകാനം സുഖസഹഗതാനം ഖന്ധാനം അധിപതിപച്ചയേന പച്ചയോ. (൨)

പീതിസഹഗതോ ച സുഖസഹഗതോ ച ധമ്മാ ഉപേക്ഖാസഹഗതസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി (സംഖിത്തം). (൩)

പീതിസഹഗതോ ച സുഖസഹഗതോ ച ധമ്മാ പീതിസഹഗതസ്സ ച സുഖസഹഗതസ്സ ച ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി …പേ…. സഹജാതാധിപതി – പീതിസഹഗതാ ച സുഖസഹഗതാ ച അധിപതി സമ്പയുത്തകാനം പീതിസഹഗതാനഞ്ച സുഖസഹഗതാനഞ്ച ഖന്ധാനം അധിപതിപച്ചയേന പച്ചയോ. (൪)

അനന്തരപച്ചയോ

൨൬. പീതിസഹഗതോ ധമ്മോ പീതിസഹഗതസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ പീതിസഹഗതാ ഖന്ധാ പച്ഛിമാനം പച്ഛിമാനം പീതിസഹഗതാനം ഖന്ധാനം അനന്തരപച്ചയേന പച്ചയോ. പീതിസഹഗതം അനുലോമം ഗോത്രഭുസ്സ അനന്തരപച്ചയേന പച്ചയോ. (ഇമിനാ കാരണേന സബ്ബേസം പദാനം പച്ചയോതി ദീപേതബ്ബോ). അനുലോമം വോദാനസ്സ… ഗോത്രഭു മഗ്ഗസ്സ… വോദാനം മഗ്ഗസ്സ… മഗ്ഗോ ഫലസ്സ… ഫലം ഫലസ്സ… അനുലോമം പീതിസഹഗതായ ഫലസമാപത്തിയാ അനന്തരപച്ചയേന പച്ചയോ. (൧)

പീതിസഹഗതോ ധമ്മോ സുഖസഹഗതസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ പീതിസഹഗതാ ഖന്ധാ പച്ഛിമാനം പച്ഛിമാനം സുഖസഹഗതാനം ഖന്ധാനം അനന്തരപച്ചയേന പച്ചയോ. പീതിസഹഗതം അനുലോമം സുഖസഹഗതസ്സ ഗോത്രഭുസ്സ അനന്തരപച്ചയേന പച്ചയോ. പീതിസഹഗതം അനുലോമം സുഖസഹഗതസ്സ വോദാനസ്സ അനന്തരപച്ചയേന പച്ചയോ. പീതിസഹഗതം അനുലോമം സുഖസഹഗതായ ഫലസമാപത്തിയാ അനന്തരപച്ചയേന പച്ചയോ. (൨)

പീതിസഹഗതോ ധമ്മോ ഉപേക്ഖാസഹഗതസ്സ ധമ്മസ്സ അനന്തരപച്ചയേന പച്ചയോ – പീതിസഹഗതം ചുതിചിത്തം ഉപേക്ഖാസഹഗതസ്സ ഉപപത്തിചിത്തസ്സ അനന്തരപച്ചയേന പച്ചയോ. പീതിസഹഗതം ഭവങ്ഗം ആവജ്ജനായ അനന്തരപച്ചയേന പച്ചയോ. പീതിസഹഗതാ വിപാകമനോവിഞ്ഞാണധാതു കിരിയമനോവിഞ്ഞാണധാതുയാ അനന്തരപച്ചയേന പച്ചയോ. പീതിസഹഗതം ഭവങ്ഗം ഉപേക്ഖാസഹഗതസ്സ ഭവങ്ഗസ്സ അനന്തരപച്ചയേന പച്ചയോ. പീതിസഹഗതം കുസലാകുസലം ഉപേക്ഖാസഹഗതസ്സ വുട്ഠാനസ്സ… കിരിയം വുട്ഠാനസ്സ… ഫലം വുട്ഠാനസ്സ അനന്തരപച്ചയേന പച്ചയോ. (൩)

പീതിസഹഗതോ ധമ്മോ പീതിസഹഗതസ്സ ച സുഖസഹഗതസ്സ ച ധമ്മസ്സ അനന്തരപച്ചയേന പച്ചയോ – പുരിമാ പുരിമാ പീതിസഹഗതാ ഖന്ധാ പച്ഛിമാനം പച്ഛിമാനം പീതിസഹഗതാനഞ്ച സുഖസഹഗതാനഞ്ച ഖന്ധാനം അനന്തരപച്ചയേന പച്ചയോ. പീതിസഹഗതം അനുലോമം പീതിസഹഗതസ്സ ച സുഖസഹഗതസ്സ ച ഗോത്രഭുസ്സ അനന്തരപച്ചയേന പച്ചയോ…പേ… പീതിസഹഗതം അനുലോമം പീതിസഹഗതായ ച സുഖസഹഗതായ ച ഫലസമാപത്തിയാ അനന്തരപച്ചയേന പച്ചയോ. (൪)

൨൭. സുഖസഹഗതോ ധമ്മോ സുഖസഹഗതസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ സുഖസഹഗതാ ഖന്ധാ പച്ഛിമാനം പച്ഛിമാനം സുഖസഹഗതാനം ഖന്ധാനം അനന്തരപച്ചയേന പച്ചയോ. സുഖസഹഗതം അനുലോമം സുഖസഹഗതസ്സ ഗോത്രഭുസ്സ അനന്തരപച്ചയേന പച്ചയോ…പേ… സുഖസഹഗതം അനുലോമം സുഖസഹഗതായ ഫലസമാപത്തിയാ അനന്തരപച്ചയേന പച്ചയോ. (൧)

സുഖസഹഗതോ ധമ്മോ പീതിസഹഗതസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ സുഖസഹഗതാ ഖന്ധാ പച്ഛിമാനം പച്ഛിമാനം പീതിസഹഗതാനം ഖന്ധാനം അനന്തരപച്ചയേന പച്ചയോ…പേ… സുഖസഹഗതം അനുലോമം പീതിസഹഗതായ ഫലസമാപത്തിയാ അനന്തരപച്ചയേന പച്ചയോ. (൨)

സുഖസഹഗതോ ധമ്മോ ഉപേക്ഖാസഹഗതസ്സ ധമ്മസ്സ അനന്തരപച്ചയേന പച്ചയോ – സുഖസഹഗതം ചുതിചിത്തം ഉപേക്ഖാസഹഗതസ്സ ഉപപത്തിചിത്തസ്സ അനന്തരപച്ചയേന പച്ചയോ. സുഖസഹഗതം ഭവങ്ഗം ആവജ്ജനായ അനന്തരപച്ചയേന പച്ചയോ. സുഖസഹഗതം കായവിഞ്ഞാണം വിപാകമനോധാതുയാ അനന്തരപച്ചയേന പച്ചയോ. സുഖസഹഗതാ വിപാകമനോവിഞ്ഞാണധാതു കിരിയമനോവിഞ്ഞാണധാതുയാ അനന്തരപച്ചയേന പച്ചയോ സുഖസഹഗതം ഭവങ്ഗം ഉപേക്ഖാസഹഗതസ്സ ഭവങ്ഗസ്സ അനന്തരപച്ചയേന പച്ചയോ. സുഖസഹഗതം കുസലാകുസലം ഉപേക്ഖാസഹഗതസ്സ വുട്ഠാനസ്സ… കിരിയം വുട്ഠാനസ്സ… ഫലം വുട്ഠാനസ്സ അനന്തരപച്ചയേന പച്ചയോ. (൩)

സുഖസഹഗതോ ധമ്മോ പീതിസഹഗതസ്സ ച സുഖസഹഗതസ്സ ച ധമ്മസ്സ അനന്തരപച്ചയേന പച്ചയോ – പുരിമാ പുരിമാ സുഖസഹഗതാ ഖന്ധാ പച്ഛിമാനം പച്ഛിമാനം പീതിസഹഗതാനഞ്ച സുഖസഹഗതാനഞ്ച ഖന്ധാനം അനന്തരപച്ചയേന പച്ചയോ…പേ… സുഖസഹഗതം അനുലോമം പീതിസഹഗതായ ച സുഖസഹഗതായ ച ഫലസമാപത്തിയാ അനന്തരപച്ചയേന പച്ചയോ. (൪)

൨൮. ഉപേക്ഖാസഹഗതോ ധമ്മോ ഉപേക്ഖാസഹഗതസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ ഉപേക്ഖാസഹഗതാ ഖന്ധാ പച്ഛിമാനം പച്ഛിമാനം ഉപേക്ഖാസഹഗതാനം ഖന്ധാനം…പേ… ആവജ്ജനാ പഞ്ചന്നം വിഞ്ഞാണാനം അനന്തരപച്ചയേന പച്ചയോ. ഉപേക്ഖാസഹഗതം അനുലോമം ഉപേക്ഖാസഹഗതായ ഫലസമാപത്തിയാ… നിരോധാ വുട്ഠഹന്തസ്സ നേവസഞ്ഞാനാസഞ്ഞായതനം ഉപേക്ഖാസഹഗതായ ഫലസമാപത്തിയാ അനന്തരപച്ചയേന പച്ചയോ. (൧)

ഉപേക്ഖാസഹഗതോ ധമ്മോ പീതിസഹഗതസ്സ ധമ്മസ്സ അനന്തരപച്ചയേന പച്ചയോ – ഉപേക്ഖാസഹഗതം ചുതിചിത്തം പീതിസഹഗതസ്സ ഉപപത്തിചിത്തസ്സ…പേ… ആവജ്ജനാ പീതിസഹഗതാനം ഖന്ധാനം…പേ… വിപാകമനോധാതു പീതിസഹഗതായ വിപാകമനോവിഞ്ഞാണധാതുയാ…പേ… ഉപേക്ഖാസഹഗതം ഭവങ്ഗം പീതിസഹഗതസ്സ ഭവങ്ഗസ്സ…പേ… ഉപേക്ഖാസഹഗതം കുസലാകുസലം പീതിസഹഗതസ്സ വുട്ഠാനസ്സ… കിരിയം വുട്ഠാനസ്സ… ഫലം വുട്ഠാനസ്സ… നിരോധാ വുട്ഠഹന്തസ്സ നേവസഞ്ഞാനാസഞ്ഞായതനം പീതിസഹഗതായ ഫലസമാപത്തിയാ അനന്തരപച്ചയേന പച്ചയോ. (൨)

ഉപേക്ഖാസഹഗതോ ധമ്മോ സുഖസഹഗതസ്സ ധമ്മസ്സ…പേ… പീതിസഹഗതസ്സ ച സുഖസഹഗതസ്സ ച ധമ്മസ്സ അനന്തരപച്ചയേന പച്ചയോ. (൪)

(താനിയേവ ച ഗമനാനി നിയാമേതബ്ബാനി.)

൨൯. പീതിസഹഗതോ ച സുഖസഹഗതോ ച ധമ്മാ പീതിസഹഗതസ്സ ധമ്മസ്സ…പേ… സുഖസഹഗതസ്സ ധമ്മസ്സ…പേ… ഉപേക്ഖാസഹഗതസ്സ ധമ്മസ്സ അനന്തരപച്ചയേന പച്ചയോ – പീതിസഹഗതഞ്ച സുഖസഹഗതഞ്ച ചുതിചിത്തം ഉപേക്ഖാസഹഗതസ്സ ഉപപത്തിചിത്തസ്സ…പേ… പീതിസഹഗതഞ്ച സുഖസഹഗതഞ്ച ഭവങ്ഗം ആവജ്ജനായ…പേ… പീതിസഹഗതാ ച സുഖസഹഗതാ ച വിപാകമനോവിഞ്ഞാണധാതു കിരിയമനോവിഞ്ഞാണധാതുയാ…പേ… പീതിസഹഗതഞ്ച സുഖസഹഗതഞ്ച ഭവങ്ഗം ഉപേക്ഖാസഹഗതസ്സ ഭവങ്ഗസ്സ…പേ… പീതിസഹഗതഞ്ച സുഖസഹഗതഞ്ച കുസലാകുസലം ഉപേക്ഖാസഹഗതസ്സ വുട്ഠാനസ്സ… കിരിയം വുട്ഠാനസ്സ… ഫലം വുട്ഠാനസ്സ അനന്തരപച്ചയേന പച്ചയോ. (൩)

പീതിസഹഗതോ ച സുഖസഹഗതോ ച ധമ്മാ പീതിസഹഗതസ്സ ച സുഖസഹഗതസ്സ ച ധമ്മസ്സ അനന്തരപച്ചയേന പച്ചയോ – പുരിമാ പുരിമാ പീതിസഹഗതാ ച സുഖസഹഗതാ ച ഖന്ധാ പച്ഛിമാനം പച്ഛിമാനം പീതിസഹഗതാനഞ്ച സുഖസഹഗതാനഞ്ച ഖന്ധാനം…പേ… പീതിസഹഗതഞ്ച സുഖസഹഗതഞ്ച അനുലോമം പീതിസഹഗതായ ച സുഖസഹഗതായ ച ഫലസമാപത്തിയാ അനന്തരപച്ചയേന പച്ചയോ. (൪)

സമനന്തരപച്ചയോ

൩൦. പീതിസഹഗതോ ധമ്മോ പീതിസഹഗതസ്സ ധമ്മസ്സ സമനന്തരപച്ചയേന പച്ചയോ (അനന്തരപച്ചയസദിസം).

സഹജാതപച്ചയോ

൩൧. പീതിസഹഗതോ ധമ്മോ പീതിസഹഗതസ്സ ധമ്മസ്സ സഹജാതപച്ചയേന പച്ചയോ – പീതിസഹഗതോ ഏകോ ഖന്ധോ തിണ്ണന്നം ഖന്ധാനം സഹജാതപച്ചയേന പച്ചയോ…പേ… ദ്വേ ഖന്ധാ ദ്വിന്നം ഖന്ധാനം സഹജാതപച്ചയേന പച്ചയോ…പേ… (പടിച്ചസദിസം സഹജാതേ ദസ പഞ്ഹാ).

അഞ്ഞമഞ്ഞ-നിസ്സയപച്ചയാ

൩൨. പീതിസഹഗതോ ധമ്മോ പീതിസഹഗതസ്സ ധമ്മസ്സ അഞ്ഞമഞ്ഞപച്ചയേന പച്ചയോ… നിസ്സയപച്ചയേന പച്ചയോ (ദസ പഞ്ഹാ കാതബ്ബാ).

ഉപനിസ്സയപച്ചയോ

൩൩. പീതിസഹഗതോ ധമ്മോ പീതിസഹഗതസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – പീതിസഹഗതം സദ്ധം ഉപനിസ്സായ പീതിസഹഗതേന ചിത്തേന ദാനം ദേതി, സീലം സമാദിയതി, ഉപോസഥകമ്മം കരോതി, പീതിസഹഗതം ഝാനം ഉപ്പാദേതി, വിപസ്സനം ഉപ്പാദേതി, മഗ്ഗം ഉപ്പാദേതി, സമാപത്തിം ഉപ്പാദേതി, മാനം ജപ്പേതി, ദിട്ഠിം ഗണ്ഹാതി. പീതിസഹഗതം സീലം… സുതം… ചാഗം… പഞ്ഞം ഉപനിസ്സായ പീതിസഹഗതേന ചിത്തേന ദാനം ദേതി, സീലം സമാദിയതി…പേ… മാനം ജപ്പേതി, ദിട്ഠിം ഗണ്ഹാതി. പീതിസഹഗതം രാഗം… മോഹം… മാനം… ദിട്ഠിം… പത്ഥനം ഉപനിസ്സായ പീതിസഹഗതേന ചിത്തേന ദാനം ദേതി, സീലം സമാദിയതി, ഉപോസഥകമ്മം കരോതി, പീതിസഹഗതം ഝാനം ഉപ്പാദേതി…പേ… സമാപത്തിം ഉപ്പാദേതി. പീതിസഹഗതേന ചിത്തേന അദിന്നം ആദിയതി, മുസാ ഭണതി, പിസുണം ഭണതി, സമ്ഫം പലപതി, സന്ധിം ഛിന്ദതി, നില്ലോപം ഹരതി, ഏകാഗാരികം കരോതി, പരിപന്ഥേ തിട്ഠതി, പരദാരം ഗച്ഛതി, ഗാമഘാതം കരോതി, നിഗമഘാതം കരോതി. പീതിസഹഗതാ സദ്ധാ… സീലം… സുതം… ചാഗോ… പഞ്ഞാ… രാഗോ… മോഹോ… മാനോ… ദിട്ഠി… പത്ഥനാ പീതിസഹഗതായ സദ്ധായ… സീലസ്സ… സുതസ്സ… ചാഗസ്സ… പഞ്ഞായ… രാഗസ്സ… മോഹസ്സ… മാനസ്സ… ദിട്ഠിയാ… പത്ഥനായ ഉപനിസ്സയപച്ചയേന പച്ചയോ. (൧)

പീതിസഹഗതോ ധമ്മോ സുഖസഹഗതസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – പീതിസഹഗതം സദ്ധം ഉപനിസ്സായ സുഖസഹഗതേന ചിത്തേന ദാനം ദേതി…പേ… സമാപത്തിം ഉപ്പാദേതി, മാനം ജപ്പേതി, ദിട്ഠിം ഗണ്ഹാതി. പീതിസഹഗതം സീലം… സുതം… ചാഗം… പഞ്ഞം… രാഗം… മോഹം… മാനം… ദിട്ഠിം… പത്ഥനം ഉപനിസ്സായ സുഖസഹഗതേന ചിത്തേന ദാനം ദേതി…പേ… സമാപത്തിം ഉപ്പാദേതി. സുഖസഹഗതേന ചിത്തേന അദിന്നം ആദിയതി…പേ… നിഗമഘാതം കരോതി. പീതിസഹഗതാ സദ്ധാ…പേ… പത്ഥനാ സുഖസഹഗതായ സദ്ധായ…പേ… പത്ഥനായ സുഖസഹഗതസ്സ കായവിഞ്ഞാണസ്സ ഉപനിസ്സയപച്ചയേന പച്ചയോ. (൨)

പീതിസഹഗതോ ധമ്മോ ഉപേക്ഖാസഹഗതസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – പീതിസഹഗതം സദ്ധം ഉപനിസ്സായ ഉപേക്ഖാസഹഗതേന ചിത്തേന ദാനം ദേതി…പേ… അഭിഞ്ഞം ഉപ്പാദേതി, സമാപത്തിം ഉപ്പാദേതി, മാനം ജപ്പേതി, ദിട്ഠിം ഗണ്ഹാതി. പീതിസഹഗതം സീലം…പേ… പത്ഥനം ഉപനിസ്സായ ഉപേക്ഖാസഹഗതേന ചിത്തേന ദാനം ദേതി…പേ… നിഗമഘാതം കരോതി. പീതിസഹഗതാ സദ്ധാ…പേ… പത്ഥനാ ഉപേക്ഖാസഹഗതായ സദ്ധായ…പേ… പത്ഥനായ ഉപനിസ്സയപച്ചയേന പച്ചയോ. (൩)

പീതിസഹഗതോ ധമ്മോ പീതിസഹഗതസ്സ ച സുഖസഹഗതസ്സ ച ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – പീതിസഹഗതം സദ്ധം ഉപനിസ്സായ പീതിസഹഗതേന ച സുഖസഹഗതേന ച ചിത്തേന ദാനം ദേതി…പേ… ദിട്ഠിം ഗണ്ഹാതി. പീതിസഹഗതം സീലം…പേ… പത്ഥനം ഉപനിസ്സായ പീതിസഹഗതേന ച സുഖസഹഗതേന ച ചിത്തേന ദാനം ദേതി…പേ… നിഗമഘാതം കരോതി. പീതിസഹഗതാ സദ്ധാ…പേ… പത്ഥനാ പീതിസഹഗതായ ച സുഖസഹഗതായ ച സദ്ധായ…പേ… പത്ഥനായ ഉപനിസ്സയപച്ചയേന പച്ചയോ. (൪)

൩൪. സുഖസഹഗതോ ധമ്മോ സുഖസഹഗതസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – സുഖസഹഗതം സദ്ധം ഉപനിസ്സായ സുഖസഹഗതേന ചിത്തേന ദാനം ദേതി…പേ… ദിട്ഠിം ഗണ്ഹാതി. സുഖസഹഗതം സീലം…പേ… പത്ഥനം സുഖസഹഗതം കായവിഞ്ഞാണം ഉപനിസ്സായ സുഖസഹഗതേന ചിത്തേന ദാനം ദേതി…പേ… നിഗമഘാതം കരോതി. സുഖസഹഗതാ സദ്ധാ…പേ… പത്ഥനാ സുഖസഹഗതം കായവിഞ്ഞാണം സുഖസഹഗതായ സദ്ധായ…പേ… പത്ഥനായ സുഖസഹഗതസ്സ കായവിഞ്ഞാണസ്സ ഉപനിസ്സയപച്ചയേന പച്ചയോ. (൧)

സുഖസഹഗതോ ധമ്മോ പീതിസഹഗതസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – സുഖസഹഗതം സദ്ധം ഉപനിസ്സായ പീതിസഹഗതേന ചിത്തേന ദാനം ദേതി…പേ… ദിട്ഠിം ഗണ്ഹാതി. സുഖസഹഗതം സീലം…പേ… പത്ഥനം സുഖസഹഗതം കായവിഞ്ഞാണം ഉപനിസ്സായ പീതിസഹഗതേന ചിത്തേന ദാനം ദേതി…പേ… നിഗമഘാതം കരോതി. സുഖസഹഗതാ സദ്ധാ…പേ… പത്ഥനാ സുഖസഹഗതം കായവിഞ്ഞാണം പീതിസഹഗതായ സദ്ധായ…പേ… പത്ഥനായ ഉപനിസ്സയപച്ചയേന പച്ചയോ. (൨)

സുഖസഹഗതോ ധമ്മോ ഉപേക്ഖാസഹഗതസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – സുഖസഹഗതം സദ്ധം ഉപനിസ്സായ ഉപേക്ഖാസഹഗതേന ചിത്തേന ദാനം ദേതി…പേ… അഭിഞ്ഞം ഉപ്പാദേതി…പേ… ദിട്ഠിം ഗണ്ഹാതി. സുഖസഹഗതം സീലം…പേ… പത്ഥനം സുഖസഹഗതം കായവിഞ്ഞാണം ഉപനിസ്സായ ഉപേക്ഖാസഹഗതേന ചിത്തേന ദാനം ദേതി…പേ… നിഗമഘാതം കരോതി. സുഖസഹഗതാ സദ്ധാ…പേ… പത്ഥനാ സുഖസഹഗതം കായവിഞ്ഞാണം ഉപേക്ഖാസഹഗതായ സദ്ധായ…പേ… പത്ഥനായ ഉപനിസ്സയപച്ചയേന പച്ചയോ. (൩)

സുഖസഹഗതോ ധമ്മോ പീതിസഹഗതസ്സ ച സുഖസഹഗതസ്സ ച ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ …പേ…. പകതൂപനിസ്സയോ – സുഖസഹഗതം സദ്ധം ഉപനിസ്സായ പീതിസഹഗതേന ച സുഖസഹഗതേന ച ചിത്തേന ദാനം ദേതി…പേ… ദിട്ഠിം ഗണ്ഹാതി. സുഖസഹഗതം സീലം…പേ… പത്ഥനം സുഖസഹഗതം കായവിഞ്ഞാണം ഉപനിസ്സായ പീതിസഹഗതേന ച സുഖസഹഗതേന ച ചിത്തേന ദാനം ദേതി…പേ… നിഗമഘാതം കരോതി. സുഖസഹഗതാ സദ്ധാ…പേ… പത്ഥനാ സുഖസഹഗതം കായവിഞ്ഞാണം പീതിസഹഗതായ ച സുഖസഹഗതായ ച സദ്ധായ…പേ… പത്ഥനായ ഉപനിസ്സയപച്ചയേന പച്ചയോ. (൪)

൩൫. ഉപേക്ഖാസഹഗതോ ധമ്മോ ഉപേക്ഖാസഹഗതസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – ഉപേക്ഖാസഹഗതം സദ്ധം ഉപനിസ്സായ ഉപേക്ഖാസഹഗതേന ചിത്തേന ദാനം ദേതി…പേ… അഭിഞ്ഞം ഉപ്പാദേതി…പേ… ദിട്ഠിം ഗണ്ഹാതി. ഉപേക്ഖാസഹഗതം സീലം…പേ… പത്ഥനം ഉപനിസ്സായ ഉപേക്ഖാസഹഗതേന ചിത്തേന ദാനം ദേതി…പേ… നിഗമഘാതം കരോതി. ഉപേക്ഖാസഹഗതാ സദ്ധാ…പേ… പത്ഥനാ ഉപേക്ഖാസഹഗതായ സദ്ധായ…പേ… പത്ഥനായ ഉപനിസ്സയപച്ചയേന പച്ചയോ. (൧)

ഉപേക്ഖാസഹഗതോ ധമ്മോ പീതിസഹഗതസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – ഉപേക്ഖാസഹഗതം സദ്ധം ഉപനിസ്സായ പീതിസഹഗതേന ചിത്തേന ദാനം ദേതി…പേ… ദിട്ഠിം ഗണ്ഹാതി. ഉപേക്ഖാസഹഗതം സീലം…പേ… പത്ഥനം ഉപനിസ്സായ പീതിസഹഗതേന ചിത്തേന ദാനം ദേതി…പേ… നിഗമഘാതം കരോതി. ഉപേക്ഖാസഹഗതാ സദ്ധാ…പേ… പത്ഥനാ പീതിസഹഗതായ സദ്ധായ…പേ… പത്ഥനായ ഉപനിസ്സയപച്ചയേന പച്ചയോ. (൨)

ഉപേക്ഖാസഹഗതോ ധമ്മോ സുഖസഹഗതസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – ഉപേക്ഖാസഹഗതം സദ്ധം ഉപനിസ്സായ സുഖസഹഗതേന ചിത്തേന ദാനം ദേതി…പേ… ദിട്ഠിം ഗണ്ഹാതി. ഉപേക്ഖാസഹഗതം സീലം…പേ… പത്ഥനം ഉപനിസ്സായ സുഖസഹഗതേന ചിത്തേന ദാനം ദേതി…പേ… നിഗമഘാതം കരോതി. ഉപേക്ഖാസഹഗതാ സദ്ധാ…പേ… പത്ഥനാ സുഖസഹഗതായ സദ്ധായ…പേ… പത്ഥനായ സുഖസഹഗതസ്സ കായവിഞ്ഞാണസ്സ ഉപനിസ്സയപച്ചയേന പച്ചയോ. (൩)

ഉപേക്ഖാസഹഗതോ ധമ്മോ പീതിസഹഗതസ്സ ച സുഖസഹഗതസ്സ ച ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – ഉപേക്ഖാസഹഗതം സദ്ധം ഉപനിസ്സായ പീതിസഹഗതേന ച സുഖസഹഗതേന ച ചിത്തേന ദാനം ദേതി…പേ… ദിട്ഠിം ഗണ്ഹാതി. ഉപേക്ഖാസഹഗതം സീലം…പേ… പത്ഥനം ഉപനിസ്സായ പീതിസഹഗതേന ച സുഖസഹഗതേന ച ചിത്തേന ദാനം ദേതി…പേ… നിഗമഘാതം കരോതി. ഉപേക്ഖാസഹഗതാ സദ്ധാ…പേ… പത്ഥനാ പീതിസഹഗതായ ച സുഖസഹഗതായ ച സദ്ധായ…പേ… പത്ഥനായ ഉപനിസ്സയപച്ചയേന പച്ചയോ. (൪)

൩൬. പീതിസഹഗതോ ച സുഖസഹഗതോ ച ധമ്മാ പീതിസഹഗതസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – പീതിസഹഗതഞ്ച സുഖസഹഗതഞ്ച സദ്ധം ഉപനിസ്സായ പീതിസഹഗതേന ചിത്തേന ദാനം ദേതി…പേ… ദിട്ഠിം ഗണ്ഹാതി. പീതിസഹഗതഞ്ച സുഖസഹഗതഞ്ച സീലം…പേ… പത്ഥനം ഉപനിസ്സായ പീതിസഹഗതേന ചിത്തേന ദാനം ദേതി…പേ… നിഗമഘാതം കരോതി. പീതിസഹഗതാ ച സുഖസഹഗതാ ച സദ്ധാ…പേ… പത്ഥനാ പീതിസഹഗതായ സദ്ധായ…പേ… പത്ഥനായ ഉപനിസ്സയപച്ചയേന പച്ചയോ. (൧)

പീതിസഹഗതോ ച സുഖസഹഗതോ ച ധമ്മാ സുഖസഹഗതസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – പീതിസഹഗതഞ്ച സുഖസഹഗതഞ്ച സദ്ധം ഉപനിസ്സായ സുഖസഹഗതേന ചിത്തേന ദാനം ദേതി…പേ… ദിട്ഠിം ഗണ്ഹാതി. പീതിസഹഗതഞ്ച സുഖസഹഗതഞ്ച സീലം…പേ… പത്ഥനം ഉപനിസ്സായ സുഖസഹഗതേന ചിത്തേന ദാനം ദേതി…പേ… നിഗമഘാതം കരോതി. പീതിസഹഗതാ ച സുഖസഹഗതാ ച സദ്ധാ…പേ… പത്ഥനാ സുഖസഹഗതായ സദ്ധായ…പേ… പത്ഥനായ സുഖസഹഗതസ്സ കായവിഞ്ഞാണസ്സ ഉപനിസ്സയപച്ചയേന പച്ചയോ. (൨)

പീതിസഹഗതോ ച സുഖസഹഗതോ ച ധമ്മാ ഉപേക്ഖാസഹഗതസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – പീതിസഹഗതഞ്ച സുഖസഹഗതഞ്ച സദ്ധം ഉപനിസ്സായ ഉപേക്ഖാസഹഗതേന ചിത്തേന ദാനം ദേതി …പേ… അഭിഞ്ഞം ഉപ്പാദേതി…പേ… ദിട്ഠിം ഗണ്ഹാതി. പീതിസഹഗതഞ്ച സുഖസഹഗതഞ്ച സീലം…പേ… പത്ഥനം ഉപനിസ്സായ ഉപേക്ഖാസഹഗതേന ചിത്തേന ദാനം ദേതി…പേ… നിഗമഘാതം കരോതി. പീതിസഹഗതാ ച സുഖസഹഗതാ ച സദ്ധാ…പേ… പത്ഥനാ ഉപേക്ഖാസഹഗതായ സദ്ധായ…പേ… പത്ഥനായ ഉപനിസ്സയപച്ചയേന പച്ചയോ. (൩)

പീതിസഹഗതോ ച സുഖസഹഗതോ ച ധമ്മാ പീതിസഹഗതസ്സ ച സുഖസഹഗതസ്സ ച ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – പീതിസഹഗതഞ്ച സുഖസഹഗതഞ്ച സദ്ധം ഉപനിസ്സായ പീതിസഹഗതേന ച സുഖസഹഗതേന ച ചിത്തേന ദാനം ദേതി, സീലം സമാദിയതി, ഉപോസഥകമ്മം കരോതി. പീതിസഹഗതഞ്ച സുഖസഹഗതഞ്ച ഝാനം ഉപ്പാദേതി, വിപസ്സനം ഉപ്പാദേതി, മഗ്ഗം ഉപ്പാദേതി, സമാപത്തിം ഉപ്പാദേതി, മാനം ജപ്പേതി, ദിട്ഠിം ഗണ്ഹാതി. പീതിസഹഗതഞ്ച സുഖസഹഗതഞ്ച സീലം… സുതം… ചാഗം… പഞ്ഞം… രാഗം… മോഹം… മാനം… ദിട്ഠിം… പത്ഥനം ഉപനിസ്സായ പീതിസഹഗതേന ച സുഖസഹഗതേന ച ചിത്തേന ദാനം ദേതി, സീലം സമാദിയതി, ഉപോസഥകമ്മം കരോതി. പീതിസഹഗതഞ്ച സുഖസഹഗതഞ്ച ഝാനം ഉപ്പാദേതി…പേ… സമാപത്തിം ഉപ്പാദേതി. പീതിസഹഗതേന ച സുഖസഹഗതേന ച ചിത്തേന അദിന്നം ആദിയതി, മുസാ ഭണതി, പിസുണം ഭണതി, സമ്ഫം പലപതി, സന്ധിം ഛിന്ദതി, നില്ലോപം ഹരതി, ഏകാഗാരികം കരോതി, പരിപന്ഥേ തിട്ഠതി, പരദാരം ഗച്ഛതി, ഗാമഘാതം കരോതി, നിഗമഘാതം കരോതി. പീതിസഹഗതാ ച സുഖസഹഗതാ ച സദ്ധാ…പേ… പത്ഥനാ പീതിസഹഗതായ ച സുഖസഹഗതായ ച സദ്ധായ…പേ… പത്ഥനായ ഉപനിസ്സയപച്ചയേന പച്ചയോ. (൪)

ആസേവനപച്ചയോ

൩൭. പീതിസഹഗതോ ധമ്മോ പീതിസഹഗതസ്സ ധമ്മസ്സ ആസേവനപച്ചയേന പച്ചയോ – പുരിമാ പുരിമാ പീതിസഹഗതാ ഖന്ധാ പച്ഛിമാനം പച്ഛിമാനം പീതിസഹഗതാനം ഖന്ധാനം ആസേവനപച്ചയേന പച്ചയോ. പീതിസഹഗതം അനുലോമം പീതിസഹഗതസ്സ ഗോത്രഭുസ്സ… അനുലോമം വോദാനസ്സ… ഗോത്രഭു മഗ്ഗസ്സ… വോദാനം മഗ്ഗസ്സ ആസേവനപച്ചയേന പച്ചയോ. (൧)

പീതിസഹഗതോ ധമ്മോ സുഖസഹഗതസ്സ ധമ്മസ്സ ആസേവനപച്ചയേന പച്ചയോ – പുരിമാ പുരിമാ പീതിസഹഗതാ ഖന്ധാ പച്ഛിമാനം പച്ഛിമാനം സുഖസഹഗതാനം ഖന്ധാനം ആസേവനപച്ചയേന പച്ചയോ. പീതിസഹഗതം അനുലോമം സുഖസഹഗതസ്സ ഗോത്രഭുസ്സ ആസേവനപച്ചയേന പച്ചയോ. പീതിസഹഗതം അനുലോമം സുഖസഹഗതസ്സ വോദാനസ്സ ആസേവനപച്ചയേന പച്ചയോ. പീതിസഹഗതം ഗോത്രഭു സുഖസഹഗതസ്സ മഗ്ഗസ്സ… പീതിസഹഗതം വോദാനം സുഖസഹഗതസ്സ മഗ്ഗസ്സ ആസേവനപച്ചയേന പച്ചയോ. (൨)

പീതിസഹഗതോ ധമ്മോ പീതിസഹഗതസ്സ ച സുഖസഹഗതസ്സ ച ധമ്മസ്സ ആസേവനപച്ചയേന പച്ചയോ – പുരിമാ പുരിമാ പീതിസഹഗതാ ഖന്ധാ പച്ഛിമാനം പച്ഛിമാനം പീതിസഹഗതാനഞ്ച സുഖസഹഗതാനഞ്ച ആസേവനപച്ചയേന പച്ചയോ…പേ… പീതിസഹഗതം വോദാനം പീതിസഹഗതസ്സ ച സുഖസഹഗതസ്സ ച മഗ്ഗസ്സ ആസേവനപച്ചയേന പച്ചയോ. (൩)

൩൮. സുഖസഹഗതോ ധമ്മോ സുഖസഹഗതസ്സ ധമ്മസ്സ…പേ… പീതിസഹഗതസ്സ ധമ്മസ്സ…പേ… പീതിസഹഗതസ്സ ച സുഖസഹഗതസ്സ ച ധമ്മസ്സ ആസേവനപച്ചയേന പച്ചയോ (സംഖിത്തം. പീതിനയം പസ്സിത്വാ കാതബ്ബം).

ഉപേക്ഖാസഹഗതോ ധമ്മോ ഉപേക്ഖാസഹഗതസ്സ ധമ്മസ്സ ആസേവനപച്ചയേന പച്ചയോ – പുരിമാ പുരിമാ ഉപേക്ഖാസഹഗതാ ഖന്ധാ പച്ഛിമാനം പച്ഛിമാനം ഉപേക്ഖാസഹഗതാനം ഖന്ധാനം…പേ… ഉപേക്ഖാസഹഗതം വോദാനം ഉപേക്ഖാസഹഗതസ്സ മഗ്ഗസ്സ ആസേവനപച്ചയേന പച്ചയോ. (൧)

൩൯. പീതിസഹഗതോ ച സുഖസഹഗതോ ച ധമ്മാ പീതിസഹഗതസ്സ ധമ്മസ്സ…പേ… സുഖസഹഗതസ്സ ധമ്മസ്സ…പേ… പീതിസഹഗതസ്സ ച സുഖസഹഗതസ്സ ച ധമ്മസ്സ ആസേവനപച്ചയേന പച്ചയോ – പുരിമാ പുരിമാ പീതിസഹഗതാ ച സുഖസഹഗതാ ച ഖന്ധാ പച്ഛിമാനം പച്ഛിമാനം പീതിസഹഗതാനഞ്ച സുഖസഹഗതാനഞ്ച ഖന്ധാനം ആസേവനപച്ചയേന പച്ചയോ…പേ… പീതിസഹഗതഞ്ച സുഖസഹഗതഞ്ച വോദാനം പീതിസഹഗതസ്സ ച സുഖസഹഗതസ്സ ച മഗ്ഗസ്സ ആസേവനപച്ചയേന പച്ചയോ. (൩)

കമ്മപച്ചയോ

൪൦. പീതിസഹഗതോ ധമ്മോ പീതിസഹഗതസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ [നാനാഖണികാ (സ്യാ. ക.)]. സഹജാതാ – പീതിസഹഗതാ ചേതനാ സമ്പയുത്തകാനം ഖന്ധാനം കമ്മപച്ചയേന പച്ചയോ. പടിസന്ധിക്ഖണേ പീതിസഹഗതാ ചേതനാ സമ്പയുത്തകാനം ഖന്ധാനം കമ്മപച്ചയേന പച്ചയോ. നാനാക്ഖണികാ – പീതിസഹഗതാ ചേതനാ വിപാകാനം പീതിസഹഗതാനം ഖന്ധാനം കമ്മപച്ചയേന പച്ചയോ. (൧)

പീതിസഹഗതോ ധമ്മോ സുഖസഹഗതസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – പീതിസഹഗതാ ചേതനാ സമ്പയുത്തകാനം സുഖസഹഗതാനം ഖന്ധാനം കമ്മപച്ചയേന പച്ചയോ. പടിസന്ധിക്ഖണേ പീതിസഹഗതാ ചേതനാ സമ്പയുത്തകാനം സുഖസഹഗതാനം ഖന്ധാനം കമ്മപച്ചയേന പച്ചയോ. നാനാക്ഖണികാ – പീതിസഹഗതാ ചേതനാ വിപാകാനം സുഖസഹഗതാനം ഖന്ധാനം കമ്മപച്ചയേന പച്ചയോ. (൨)