൧. പച്ചയാനുലോമം

ഹേതുപച്ചയോ

൪൭. സവിതക്കസവിചാരം ധമ്മം പച്ചയാ സവിതക്കസവിചാരോ ധമ്മോ ഉപ്പജ്ജതി ഹേതുപച്ചയാ – സവിതക്കസവിചാരം ഏകം ഖന്ധം പച്ചയാ തയോ ഖന്ധാ…പേ… ദ്വേ ഖന്ധാ… സത്ത.

അവിതക്കവിചാരമത്തം ധമ്മം പച്ചയാ… പഞ്ച (പടിച്ചവാരസദിസാ).

അവിതക്കഅവിചാരം ധമ്മം പച്ചയാ അവിതക്കഅവിചാരോ ധമ്മോ ഉപ്പജ്ജതി ഹേതുപച്ചയാ – അവിതക്കഅവിചാരം ഏകം ഖന്ധം പച്ചയാ തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ പച്ചയാ…പേ… വിചാരം പച്ചയാ ചിത്തസമുട്ഠാനം രൂപം. പടിസന്ധിക്ഖണേ…പേ… വത്ഥും പച്ചയാ അവിതക്കഅവിചാരാ ഖന്ധാ, വത്ഥും പച്ചയാ വിചാരോ. (൧)

അവിതക്കഅവിചാരം ധമ്മം പച്ചയാ സവിതക്കസവിചാരോ ധമ്മോ ഉപ്പജ്ജതി…പേ… വത്ഥും പച്ചയാ സവിതക്കസവിചാരാ ഖന്ധാ. പടിസന്ധിക്ഖണേ…പേ…. (൨)

അവിതക്കഅവിചാരം ധമ്മം പച്ചയാ അവിതക്കവിചാരമത്തോ ധമ്മോ…പേ… വിചാരം പച്ചയാ അവിതക്കവിചാരമത്താ ഖന്ധാ, വത്ഥും പച്ചയാ അവിതക്കവിചാരമത്താ ഖന്ധാ, വത്ഥും പച്ചയാ വിതക്കോ. പടിസന്ധിക്ഖണേ…പേ…. (൩)

അവിതക്കഅവിചാരം ധമ്മം പച്ചയാ സവിതക്കസവിചാരോ ച അവിതക്കഅവിചാരോ ച ധമ്മാ ഉപ്പജ്ജന്തി…പേ… വത്ഥും പച്ചയാ സവിതക്കസവിചാരാ ഖന്ധാ, മഹാഭൂതേ പച്ചയാ ചിത്തസമുട്ഠാനം രൂപം. പടിസന്ധിക്ഖണേ…പേ…. (൪)

അവിതക്കഅവിചാരം ധമ്മം പച്ചയാ അവിതക്കവിചാരമത്തോ ച അവിതക്കഅവിചാരോ ച ധമ്മാ…പേ… വിചാരം പച്ചയാ അവിതക്കവിചാരമത്താ ഖന്ധാ ചിത്തസമുട്ഠാനഞ്ച രൂപം, വത്ഥും പച്ചയാ അവിതക്കവിചാരമത്താ ഖന്ധാ, മഹാഭൂതേ പച്ചയാ ചിത്തസമുട്ഠാനം രൂപം, വത്ഥും പച്ചയാ വിതക്കോ, മഹാഭൂതേ പച്ചയാ ചിത്തസമുട്ഠാനം രൂപം, വത്ഥും പച്ചയാ അവിതക്കവിചാരമത്താ ഖന്ധാ ച വിചാരോ ച. പടിസന്ധിക്ഖണേ…പേ…. (൫)

അവിതക്കഅവിചാരം ധമ്മം പച്ചയാ സവിതക്കസവിചാരോ ച അവിതക്കവിചാരമത്തോ ച ധമ്മാ…പേ… വത്ഥും പച്ചയാ സവിതക്കസവിചാരാ ഖന്ധാ ച വിതക്കോ ച. പടിസന്ധിക്ഖണേ…പേ…. (൬)

അവിതക്കഅവിചാരം ധമ്മം പച്ചയാ സവിതക്കസവിചാരോ ച അവിതക്കവിചാരമത്തോ ച അവിതക്കഅവിചാരോ ച ധമ്മാ…പേ… വത്ഥും പച്ചയാ സവിതക്കസവിചാരാ ഖന്ധാ ച വിതക്കോ ച, മഹാഭൂതേ പച്ചയാ ചിത്തസമുട്ഠാനം രൂപം. പടിസന്ധിക്ഖണേ…പേ…. (൭)

൪൮. സവിതക്കസവിചാരഞ്ച അവിതക്കഅവിചാരഞ്ച ധമ്മം പച്ചയാ സവിതക്കസവിചാരോ ധമ്മോ…പേ… സവിതക്കസവിചാരം ഏകം ഖന്ധഞ്ച വത്ഥുഞ്ച പച്ചയാ തയോ ഖന്ധാ …പേ… ദ്വേ ഖന്ധേ…പേ… പടിസന്ധിക്ഖണേ…പേ… സവിതക്കസവിചാരഞ്ച അവിതക്കഅവിചാരഞ്ച ധമ്മം പച്ചയാ അവിതക്കവിചാരമത്തോ ധമ്മോ…പേ… (പഠമഉദാഹരണേ പവത്തേ പടിസന്ധിക്ഖണേ സത്ത പഞ്ഹാ കാതബ്ബാ).

അവിതക്കവിചാരമത്തഞ്ച അവിതക്കഅവിചാരഞ്ച ധമ്മം പച്ചയാ സവിതക്കസവിചാരോ ധമ്മോ …പേ… വിതക്കഞ്ച വത്ഥുഞ്ച പച്ചയാ സവിതക്കസവിചാരാ ഖന്ധാ. പടിസന്ധിക്ഖണേ…പേ…. (൧)

അവിതക്കവിചാരമത്തഞ്ച അവിതക്കഅവിചാരഞ്ച ധമ്മം പച്ചയാ അവിതക്കവിചാരമത്തോ ധമ്മോ…പേ… അവിതക്കവിചാരമത്തം ഏകം ഖന്ധഞ്ച വിചാരഞ്ച പച്ചയാ തയോ ഖന്ധാ…പേ… അവിതക്കവിചാരമത്തം ഏകം ഖന്ധഞ്ച വത്ഥുഞ്ച പച്ചയാ തയോ ഖന്ധാ…പേ… പടിസന്ധിക്ഖണേ അവിതക്കവിചാരമത്തം ഏകം ഖന്ധഞ്ച വിചാരഞ്ച പച്ചയാ തയോ ഖന്ധാ…പേ… പടിസന്ധിക്ഖണേ അവിതക്കവിചാരമത്തം ഏകം ഖന്ധഞ്ച വത്ഥുഞ്ച പച്ചയാ തയോ ഖന്ധാ…പേ…. (൨)

അവിതക്കവിചാരമത്തഞ്ച അവിതക്കഅവിചാരഞ്ച ധമ്മം പച്ചയാ അവിതക്കഅവിചാരോ ധമ്മോ ഉപ്പജ്ജതി…പേ… അവിതക്കവിചാരമത്തേ ഖന്ധേ ച വിചാരഞ്ച പച്ചയാ ചിത്തസമുട്ഠാനം രൂപം, അവിതക്കവിചാരമത്തേ ഖന്ധേ ച മഹാഭൂതേ ച പച്ചയാ ചിത്തസമുട്ഠാനം രൂപം, വിതക്കഞ്ച മഹാഭൂതേ ച പച്ചയാ ചിത്തസമുട്ഠാനം രൂപം, അവിതക്കവിചാരമത്തേ ഖന്ധേ ച വത്ഥുഞ്ച പച്ചയാ വിചാരോ (ഏവം പടിസന്ധിക്ഖണേ ചത്താരോ). (൩)

അവിതക്കവിചാരമത്തഞ്ച അവിതക്കഅവിചാരഞ്ച ധമ്മം പച്ചയാ സവിതക്കസവിചാരോ ച അവിതക്കഅവിചാരോ ച ധമ്മാ ഉപ്പജ്ജന്തി…പേ… വിതക്കഞ്ച വത്ഥുഞ്ച പച്ചയാ സവിതക്കസവിചാരാ ഖന്ധാ, വിതക്കഞ്ച മഹാഭൂതേ ച പച്ചയാ ചിത്തസമുട്ഠാനം രൂപം. പടിസന്ധിക്ഖണേ…പേ…. (൪)

അവിതക്കവിചാരമത്തഞ്ച അവിതക്കഅവിചാരഞ്ച ധമ്മം പച്ചയാ അവിതക്കവിചാരമത്തോ ച അവിതക്കഅവിചാരോ ച ധമ്മാ ഉപ്പജ്ജന്തി…പേ… അവിതക്കവിചാരമത്തം ഏകം ഖന്ധഞ്ച വിചാരഞ്ച പച്ചയാ തയോ ഖന്ധാ ചിത്തസമുട്ഠാനഞ്ച രൂപം…പേ… അവിതക്കവിചാരമത്തം ഏകം ഖന്ധഞ്ച വത്ഥുഞ്ച പച്ചയാ തയോ ഖന്ധാ…പേ… അവിതക്കവിചാരമത്തേ ഖന്ധേ ച മഹാഭൂതേ ച പച്ചയാ ചിത്തസമുട്ഠാനം രൂപം, അവിതക്കവിചാരമത്തം ഏകം ഖന്ധഞ്ച വത്ഥുഞ്ച പച്ചയാ തയോ ഖന്ധാ വിചാരോ ച…പേ… പടിസന്ധിക്ഖണേ തയോ ഖന്ധാ…പേ…. (൫)

(അവസേസേസു ദ്വീസു ഘടനേസു പവത്തി പടിസന്ധി വിത്ഥാരേതബ്ബാ.)

ഹേതുപച്ചയോ.

(ഹേതുപച്ചയം അനുമജ്ജന്തേന പച്ചയവാരോ വിത്ഥാരേതബ്ബോ. യഥാ പടിച്ചഗണനാ ഏവം ഗണേതബ്ബാ. അധിപതിയാ സത്തതിംസ, പുരേജാതേ ച ആസേവനേ ച ഏകവീസ, അയം ഏത്ഥ വിസേസോ.)