൨൦. അജ്ഝത്തത്തികം

൧. പടിച്ചവാരോ

൧. പച്ചയാനുലോമം

൧. വിഭങ്ഗവാരോ

ഹേതുപച്ചയോ

൧. അജ്ഝത്തം ധമ്മം പടിച്ച അജ്ഝത്തോ ധമ്മോ ഉപ്പജ്ജതി ഹേതുപച്ചയാ – അജ്ഝത്തം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… പടിസന്ധിക്ഖണേ അജ്ഝത്തം ഏകം ഖന്ധം പടിച്ച തയോ ഖന്ധാ കടത്താ ച രൂപം…പേ… ദ്വേ ഖന്ധേ…പേ… ഖന്ധേ പടിച്ച വത്ഥു, വത്ഥും പടിച്ച ഖന്ധാ. ഏകം മഹാഭൂതം പടിച്ച തയോ മഹാഭൂതാ…പേ… മഹാഭൂതേ പടിച്ച ചിത്തസമുട്ഠാനം രൂപം കടത്താരൂപം ഉപാദാരൂപം. (൧)

ബഹിദ്ധാ ധമ്മം പടിച്ച ബഹിദ്ധാ ധമ്മോ ഉപ്പജ്ജതി ഹേതുപച്ചയാ – ബഹിദ്ധാ ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… പടിസന്ധിക്ഖണേ ബഹിദ്ധാ ഏകം ഖന്ധം പടിച്ച തയോ ഖന്ധാ കടത്താ ച രൂപം…പേ… ദ്വേ ഖന്ധേ പടിച്ച ദ്വേ ഖന്ധാ…പേ… ഖന്ധേ പടിച്ച വത്ഥു, വത്ഥും പടിച്ച ഖന്ധാ. ഏകം മഹാഭൂതം പടിച്ച തയോ മഹാഭൂതാ…പേ… മഹാഭൂതേ പടിച്ച ചിത്തസമുട്ഠാനം രൂപം കടത്താരൂപം ഉപാദാരൂപം. (൧)

ആരമ്മണപച്ചയോ

൨. അജ്ഝത്തം ധമ്മം പടിച്ച അജ്ഝത്തോ ധമ്മോ ഉപ്പജ്ജതി ആരമ്മണപച്ചയാ – അജ്ഝത്തം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ പടിച്ച…പേ… പടിസന്ധിക്ഖണേ അജ്ഝത്തം ഏകം ഖന്ധം പടിച്ച തയോ ഖന്ധാ…പേ… വത്ഥും പടിച്ച ഖന്ധാ. (൧)

ബഹിദ്ധാ ധമ്മം പടിച്ച ബഹിദ്ധാ ധമ്മോ ഉപ്പജ്ജതി ആരമ്മണപച്ചയാ – ബഹിദ്ധാ ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ… പടിസന്ധിക്ഖണേ…പേ… വത്ഥും പടിച്ച ഖന്ധാ. (൧)

അധിപതിപച്ചയോ

൩. അജ്ഝത്തം ധമ്മം പടിച്ച അജ്ഝത്തോ ധമ്മോ ഉപ്പജ്ജതി അധിപതിപച്ചയാ – അജ്ഝത്തം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… ഏകം മഹാഭൂതം പടിച്ച…പേ… മഹാഭൂതേ പടിച്ച ചിത്തസമുട്ഠാനം രൂപം ഉപാദാരൂപം. (൧)

ബഹിദ്ധാ ധമ്മം പടിച്ച ബഹിദ്ധാ ധമ്മോ ഉപ്പജ്ജതി അധിപതിപച്ചയാ – ബഹിദ്ധാ ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… ഏകം മഹാഭൂതം പടിച്ച…പേ… മഹാഭൂതേ പടിച്ച ചിത്തസമുട്ഠാനം രൂപം ഉപാദാരൂപം. (൧)

അനന്തരപച്ചയാദി

൪. അജ്ഝത്തം ധമ്മം പടിച്ച അജ്ഝത്തോ ധമ്മോ ഉപ്പജ്ജതി അനന്തരപച്ചയാ, സമനന്തരപച്ചയാ, സഹജാതപച്ചയാ – അജ്ഝത്തം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… പടിസന്ധിക്ഖണേ അജ്ഝത്തം ഏകം ഖന്ധം പടിച്ച തയോ ഖന്ധാ കടത്താ ച രൂപം…പേ… ദ്വേ ഖന്ധേ…പേ… ഖന്ധേ പടിച്ച വത്ഥു, വത്ഥും പടിച്ച ഖന്ധാ. ഏകം മഹാഭൂതം പടിച്ച തയോ മഹാഭൂതാ…പേ… മഹാഭൂതേ പടിച്ച ചിത്തസമുട്ഠാനം രൂപം കടത്താരൂപം ഉപാദാരൂപം. ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം ഏകം മഹാഭൂതം പടിച്ച…പേ… മഹാഭൂതേ പടിച്ച കടത്താരൂപം ഉപാദാരൂപം. (൧)

ബഹിദ്ധാ ധമ്മം പടിച്ച ബഹിദ്ധാ ധമ്മോ ഉപ്പജ്ജതി സഹജാതപച്ചയാ – ബഹിദ്ധാ ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… പടിസന്ധിക്ഖണേ ബഹിദ്ധാ ഏകം ഖന്ധം പടിച്ച തയോ ഖന്ധാ കടത്താ ച രൂപം…പേ… ദ്വേ ഖന്ധേ…പേ… ഖന്ധേ പടിച്ച വത്ഥു, വത്ഥും പടിച്ച ഖന്ധാ. ഏകം മഹാഭൂതം പടിച്ച…പേ… മഹാഭൂതേ പടിച്ച ചിത്തസമുട്ഠാനം രൂപം കടത്താരൂപം ഉപാദാരൂപം. ബാഹിരം… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം ഏകം മഹാഭൂതം പടിച്ച…പേ… മഹാഭൂതേ പടിച്ച കടത്താരൂപം ഉപാദാരൂപം. (൧)

അഞ്ഞമഞ്ഞപച്ചയാദി

൫. അജ്ഝത്തം ധമ്മം പടിച്ച അജ്ഝത്തോ ധമ്മോ ഉപ്പജ്ജതി അഞ്ഞമഞ്ഞപച്ചയാ… നിസ്സയപച്ചയാ… ഉപനിസ്സയപച്ചയാ… പുരേജാതപച്ചയാ… ആസേവനപച്ചയാ (പുരേജാതേപി ആസേവനേപി പടിസന്ധി നത്ഥി)… കമ്മപച്ചയാ… വിപാകപച്ചയാ… ആഹാരപച്ചയാ… ഇന്ദ്രിയപച്ചയാ… ഝാനപച്ചയാ… മഗ്ഗപച്ചയാ… സമ്പയുത്തപച്ചയാ… വിപ്പയുത്തപച്ചയാ… അത്ഥിപച്ചയാ… നത്ഥിപച്ചയാ… വിഗതപച്ചയാ… അവിഗതപച്ചയാ.

൧. പച്ചയാനുലോമം

൨. സങ്ഖ്യാവാരോ

൬. ഹേതുയാ ദ്വേ, ആരമ്മണേ ദ്വേ…പേ… അവിഗതേ ദ്വേ.

അനുലോമം.

൨. പച്ചയപച്ചനീയം

൧. വിഭങ്ഗവാരോ

നഹേതുപച്ചയോ

൭. അജ്ഝത്തം ധമ്മം പടിച്ച അജ്ഝത്തോ ധമ്മോ ഉപ്പജ്ജതി നഹേതുപച്ചയാ – അഹേതുകം അജ്ഝത്തം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… അഹേതുകപടിസന്ധിക്ഖണേ…പേ… ഖന്ധേ പടിച്ച വത്ഥു, വത്ഥും പടിച്ച ഖന്ധാ. ഏകം മഹാഭൂതം…പേ… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം ഏകം മഹാഭൂതം…പേ… മഹാഭൂതേ പടിച്ച കടത്താരൂപം ഉപാദാരൂപം. വിചികിച്ഛാസഹഗതേ ഉദ്ധച്ചസഹഗതേ ഖന്ധേ പടിച്ച വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

ബഹിദ്ധാ ധമ്മം പടിച്ച ബഹിദ്ധാ ധമ്മോ ഉപ്പജ്ജതി നഹേതുപച്ചയാ – അഹേതുകം ബഹിദ്ധാ ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… അഹേതുകപടിസന്ധിക്ഖണേ…പേ… ഖന്ധേ പടിച്ച വത്ഥു, വത്ഥും പടിച്ച ഖന്ധാ. ഏകം മഹാഭൂതം പടിച്ച…പേ… ബാഹിരം… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം ഏകം മഹാഭൂതം പടിച്ച…പേ… വിചികിച്ഛാസഹഗതേ ഉദ്ധച്ചസഹഗതേ ഖന്ധേ പടിച്ച വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

നആരമ്മണപച്ചയോ

൮. അജ്ഝത്തം ധമ്മം പടിച്ച അജ്ഝത്തോ ധമ്മോ ഉപ്പജ്ജതി നആരമ്മണപച്ചയാ – അജ്ഝത്തേ ഖന്ധേ പടിച്ച ചിത്തസമുട്ഠാനം രൂപം. പടിസന്ധിക്ഖണേ അജ്ഝത്തേ ഖന്ധേ പടിച്ച കടത്താരൂപം. ഖന്ധേ പടിച്ച വത്ഥു…പേ… ഏകം മഹാഭൂതം പടിച്ച…പേ… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം ഏകം മഹാഭൂതം പടിച്ച…പേ…. (൧)

ബഹിദ്ധാ ധമ്മം പടിച്ച ബഹിദ്ധാ ധമ്മോ ഉപ്പജ്ജതി നആരമ്മണപച്ചയാ – ബഹിദ്ധാ ഖന്ധേ പടിച്ച ചിത്തസമുട്ഠാനം രൂപം. പടിസന്ധിക്ഖണേ ബഹിദ്ധാ ഖന്ധേ പടിച്ച കടത്താരൂപം. ഖന്ധേ പടിച്ച വത്ഥു…പേ… ഏകം മഹാഭൂതം…പേ… ബാഹിരം… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം…പേ…. (൧)

നഅധിപതിപച്ചയാദി

൯. അജ്ഝത്തം ധമ്മം പടിച്ച അജ്ഝത്തോ ധമ്മോ ഉപ്പജ്ജതി നഅധിപതിപച്ചയാ…പേ… (അനുലോമസഹജാതസദിസം, നിന്നാനാകരണം) നഅനന്തരപച്ചയാ… നസമനന്തരപച്ചയാ … നഅഞ്ഞമഞ്ഞപച്ചയാ … നഉപനിസ്സയപച്ചയാ, നപുരേജാതപച്ചയാ – അരൂപേ അജ്ഝത്തം ഏകം ഖന്ധം പടിച്ച…പേ… അജ്ഝത്തേ ഖന്ധേ പടിച്ച ചിത്തസമുട്ഠാനം രൂപം. പടിസന്ധിക്ഖണേ അജ്ഝത്തം ഏകം ഖന്ധം പടിച്ച തയോ ഖന്ധാ കടത്താ ച രൂപം…പേ… ദ്വേ ഖന്ധേ…പേ… ഖന്ധേ പടിച്ച വത്ഥു, വത്ഥും പടിച്ച ഖന്ധാ. ഏകം മഹാഭൂതം പടിച്ച…പേ… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം…പേ….

൧൦. ബഹിദ്ധാ ധമ്മം പടിച്ച ബഹിദ്ധാ ധമ്മോ ഉപ്പജ്ജതി നപുരേജാതപച്ചയാ – അരൂപേ ബഹിദ്ധാ ഏകം ഖന്ധം പടിച്ച…പേ… ദ്വേ ഖന്ധേ…പേ… ബഹിദ്ധാ ഖന്ധേ പടിച്ച ചിത്തസമുട്ഠാനം രൂപം. പടിസന്ധിക്ഖണേ (പരിപുണ്ണം) ഏകം മഹാഭൂതം…പേ… ബാഹിരം… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം…പേ….

നപച്ഛാജാതപച്ചയാദി

൧൧. അജ്ഝത്തം ധമ്മം പടിച്ച അജ്ഝത്തോ ധമ്മോ ഉപ്പജ്ജതി നപച്ഛാജാതപച്ചയാ, നആസേവനപച്ചയാ, നകമ്മപച്ചയാ – അജ്ഝത്തേ ഖന്ധേ പടിച്ച അജ്ഝത്താ ചേതനാ. ആഹാരസമുട്ഠാനം… ഉതുസമുട്ഠാനം…പേ…. (൧)

ബഹിദ്ധാ ധമ്മം പടിച്ച ബഹിദ്ധാ ധമ്മോ ഉപ്പജ്ജതി നകമ്മപച്ചയാ – ബഹിദ്ധാ ഖന്ധേ പടിച്ച ബഹിദ്ധാ ചേതനാ. ബാഹിരം… ആഹാരസമുട്ഠാനം… ഉതുസമുട്ഠാനം…. (൧)

നവിപാകപച്ചയാദി

൧൨. അജ്ഝത്തം ധമ്മം പടിച്ച അജ്ഝത്തോ ധമ്മോ ഉപ്പജ്ജതി നവിപാകപച്ചയാ (പടിസന്ധി നത്ഥി), നആഹാരപച്ചയാ – ഉതുസമുട്ഠാനം… അസഞ്ഞസത്താനം…പേ…. (൧)

ബഹിദ്ധാ ധമ്മം പടിച്ച ബഹിദ്ധാ ധമ്മോ ഉപ്പജ്ജതി നആഹാരപച്ചയാ – ബാഹിരം… ഉതുസമുട്ഠാനം… അസഞ്ഞസത്താനം…പേ…. (൧)

അജ്ഝത്തം ധമ്മം പടിച്ച അജ്ഝത്തോ ധമ്മോ ഉപ്പജ്ജതി നഇന്ദ്രിയപച്ചയാ – ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം… മഹാഭൂതേ പടിച്ച രൂപജീവിതിന്ദ്രിയം. (൧)

ബഹിദ്ധാ ധമ്മം പടിച്ച ബഹിദ്ധാ ധമ്മോ ഉപ്പജ്ജതി നഇന്ദ്രിയപച്ചയാ – ബാഹിരം… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം… മഹാഭൂതേ പടിച്ച രൂപജീവിതിന്ദ്രിയം. (൧)

നഝാനപച്ചയോ

൧൩. അജ്ഝത്തം ധമ്മം പടിച്ച അജ്ഝത്തോ ധമ്മോ ഉപ്പജ്ജതി നഝാനപച്ചയാ – പഞ്ചവിഞ്ഞാണസഹഗതം…പേ… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം…പേ…. (൧)

ബഹിദ്ധാ ധമ്മം പടിച്ച ബഹിദ്ധാ ധമ്മോ ഉപ്പജ്ജതി നഝാനപച്ചയാ – പഞ്ചവിഞ്ഞാണസഹഗതം…പേ… ബാഹിരം… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം…പേ…. (൧)

നമഗ്ഗപച്ചയാദി

൧൪. അജ്ഝത്തം ധമ്മം പടിച്ച അജ്ഝത്തോ ധമ്മോ ഉപ്പജ്ജതി നമഗ്ഗപച്ചയാ… (നഹേതുസദിസം. മോഹോ നത്ഥി) നസമ്പയുത്തപച്ചയാ… നവിപ്പയുത്തപച്ചയാ – അരൂപേ…പേ… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം…പേ…. (൧)

ബഹിദ്ധാ ധമ്മം പടിച്ച ബഹിദ്ധാ ധമ്മോ ഉപ്പജ്ജതി നവിപ്പയുത്തപച്ചയാ – അരൂപേ…പേ… ബാഹിരം… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം…പേ… നോനത്ഥിപച്ചയാ, നോവിഗതപച്ചയാ.

൨. പച്ചയപച്ചനീയം

൨. സങ്ഖ്യാവാരോ

൧൫. നഹേതുയാ ദ്വേ, നആരമ്മണേ ദ്വേ, നഅധിപതിയാ ദ്വേ, നഅനന്തരേ ദ്വേ, നസമനന്തരേ ദ്വേ (സംഖിത്തം, സബ്ബത്ഥ ദ്വേ), നോവിഗതേ ദ്വേ (ഏവം ഗണേതബ്ബം).

പച്ചനീയം.

൩. പച്ചയാനുലോമപച്ചനീയം

൧൬. ഹേതുപച്ചയാ നആരമ്മണേ ദ്വേ…പേ… നവിപാകേ നസമ്പയുത്തേ നവിപ്പയുത്തേ നോനത്ഥിയാ നോവിഗതേ ദ്വേ (ഏവം ഗണേതബ്ബം).

അനുലോമപച്ചനീയം.

൪. പച്ചയപച്ചനീയാനുലോമം

൧൭. നഹേതുപച്ചയാ ആരമ്മണേ ദ്വേ, അനന്തരേ ദ്വേ…പേ… മഗ്ഗേ ദ്വേ…പേ… അവിഗതേ ദ്വേ (ഏവം ഗണേതബ്ബം).

പച്ചനീയാനുലോമം.

പടിച്ചവാരോ.

൨. സഹജാതവാരോ

(സഹജാതവാരോ പടിച്ചവാരസദിസോ.)

൩. പച്ചയവാരോ

൧. പച്ചയാനുലോമം

൧. വിഭങ്ഗവാരോ

ഹേതുപച്ചയോ

൧൮. അജ്ഝത്തം ധമ്മം പച്ചയാ അജ്ഝത്തോ ധമ്മോ ഉപ്പജ്ജതി ഹേതുപച്ചയാ – അജ്ഝത്തം ഏകം ഖന്ധം പച്ചയാ തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… പടിസന്ധിക്ഖണേ (പരിപുണ്ണം). ഏകം മഹാഭൂതം…പേ… വത്ഥും പച്ചയാ അജ്ഝത്താ ഖന്ധാ. (൧)

ബഹിദ്ധാ ധമ്മം പച്ചയാ ബഹിദ്ധാ ധമ്മോ ഉപ്പജ്ജതി ഹേതുപച്ചയാ – ബഹിദ്ധാ ഏകം ഖന്ധം പച്ചയാ തയോ ഖന്ധാ…പേ… പടിസന്ധിക്ഖണേ…പേ… ഏകം മഹാഭൂതം…പേ… വത്ഥും പച്ചയാ ബഹിദ്ധാ ഖന്ധാ. (൧)

ആരമ്മണപച്ചയോ

൧൯. അജ്ഝത്തം ധമ്മം പച്ചയാ അജ്ഝത്തോ ധമ്മോ ഉപ്പജ്ജതി ആരമ്മണപച്ചയാ (പടിച്ചവാരസദിസം), ചക്ഖായതനം പച്ചയാ ചക്ഖുവിഞ്ഞാണം…പേ… കായായതനം പച്ചയാ കായവിഞ്ഞാണം…പേ… വത്ഥും പച്ചയാ അജ്ഝത്താ ഖന്ധാ. (൧)

ബഹിദ്ധാ ധമ്മം പച്ചയാ ബഹിദ്ധാ ധമ്മോ ഉപ്പജ്ജതി ആരമ്മണപച്ചയാ (പടിച്ചവാരസദിസം), ചക്ഖായതനം…പേ… കായായതനം…പേ… വത്ഥും പച്ചയാ ബഹിദ്ധാ ഖന്ധാ. (൧)

അധിപതിപച്ചയാദി

൨൦. അജ്ഝത്തം ധമ്മം പച്ചയാ അജ്ഝത്തോ ധമ്മോ ഉപ്പജ്ജതി അധിപതിപച്ചയാ… (വത്ഥും അതിരേകം, പടിച്ചവാരസദിസം) അനന്തരപച്ചയാ… സമനന്തരപച്ചയാ… സഹജാതപച്ചയാ… (സഹജാതവാരേ പരിപുണ്ണാ) മഹാഭൂതേ പച്ചയാ…പേ… (മഹാഭൂതാനം ഖന്ധാനഞ്ച പച്ഛാ പഞ്ചായതനാനി ച വത്ഥു ച കാതബ്ബാ) അഞ്ഞമഞ്ഞപച്ചയാ… നിസ്സയപച്ചയാ…പേ… അവിഗതപച്ചയാ.

൧. പച്ചയാനുലോമം

൨. സങ്ഖ്യാവാരോ

൨൧. ഹേതുയാ ദ്വേ, ആരമ്മണേ…പേ… അവിഗതേ ദ്വേ.

അനുലോമം.

൨. പച്ചയപച്ചനീയം

൧. വിഭങ്ഗവാരോ

നഹേതുപച്ചയോ

൨൨. അജ്ഝത്തം ധമ്മം പച്ചയാ അജ്ഝത്തോ ധമ്മോ ഉപ്പജ്ജതി നഹേതുപച്ചയാ – അഹേതുകം അജ്ഝത്തം ഏകം ഖന്ധം പച്ചയാ തയോ ഖന്ധാ…പേ… അഹേതുകപടിസന്ധിക്ഖണേ…പേ… ഖന്ധേ പച്ചയാ വത്ഥു, വത്ഥും പച്ചയാ ഖന്ധാ. ഏകം മഹാഭൂതം…പേ… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം…പേ… ചക്ഖായതനം…പേ… കായായതനം…പേ… വത്ഥും പച്ചയാ അഹേതുകാ അജ്ഝത്താ ഖന്ധാ. വിചികിച്ഛാസഹഗതേ ഉദ്ധച്ചസഹഗതേ ഖന്ധേ ച വത്ഥുഞ്ച പച്ചയാ വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

ബഹിദ്ധാ ധമ്മം പച്ചയാ ബഹിദ്ധാ ധമ്മോ ഉപ്പജ്ജതി നഹേതുപച്ചയാ (പവത്തിപടിസന്ധിപി മഹാഭൂതാപി കാതബ്ബാ) – ചക്ഖായതനം…പേ… കായായതനം…പേ… വത്ഥും പച്ചയാ അഹേതുകാ ബഹിദ്ധാ ഖന്ധാ. വിചികിച്ഛാസഹഗതേ ഉദ്ധച്ചസഹഗതേ ഖന്ധേ ച വത്ഥുഞ്ച പച്ചയാ വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

നആരമ്മണപച്ചയാദി

൨൩. നആരമ്മണപച്ചയാ… നഅധിപതിപച്ചയാ (സഹജാതസദിസം)… നഅനന്തരപച്ചയാ… നസമനന്തരപച്ചയാ… നഅഞ്ഞമഞ്ഞപച്ചയാ… നഉപനിസ്സയപച്ചയാ… നപുരേജാതപച്ചയാ (പടിച്ചവാരസദിസം)… നപച്ഛാജാതപച്ചയാ… നആസേവനപച്ചയാ… നകമ്മപച്ചയാ…പേ… നവിപ്പയുത്തപച്ചയാ (പടിച്ചവാരപച്ചനീയേ വിപ്പയുത്തസദിസം)… നോനത്ഥിപച്ചയാ… നോവിഗതപച്ചയാ….

൨. പച്ചയപച്ചനീയം

൨. സങ്ഖ്യാവാരോ

൨൪. നഹേതുയാ ദ്വേ, നആരമ്മണേ ദ്വേ…പേ… നോവിഗതേ ദ്വേ.

പച്ചനീയം.

൩. പച്ചയാനുലോമപച്ചനീയം

൨൫. ഹേതുപച്ചയാ നആരമ്മണേ ദ്വേ, നഅധിപതിയാ ദ്വേ…പേ… നവിപാകേ നസമ്പയുത്തേ നവിപ്പയുത്തേ നോനത്ഥിയാ നോവിഗതേ ദ്വേ.

അനുലോമപച്ചനീയം.

൪. പച്ചയപച്ചനീയാനുലോമം

൨൬. നഹേതുപച്ചയാ ആരമ്മണേ ദ്വേ…പേ… അവിഗതേ ദ്വേ.

പച്ചനീയാനുലോമം.

പച്ചയവാരോ

൪-൬. നിസ്സയ-സംസട്ഠ-സമ്പയുത്തവാരോ

(നിസ്സയവാരോ പച്ചയവാരസദിസോ. സംസട്ഠവാരോപി സമ്പയുത്തവാരോപി വിത്ഥാരേതബ്ബോ.)

൭. പഞ്ഹാവാരോ

൧. പച്ചയാനുലോമം

൧. വിഭങ്ഗവാരോ

ഹേതുപച്ചയോ

൨൭. അജ്ഝത്തോ ധമ്മോ അജ്ഝത്തസ്സ ധമ്മസ്സ ഹേതുപച്ചയേന പച്ചയോ – അജ്ഝത്താ ഹേതൂ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ. പടിസന്ധിക്ഖണേ…പേ…. (൧)

ബഹിദ്ധാ ധമ്മോ ബഹിദ്ധാ ധമ്മസ്സ ഹേതുപച്ചയേന പച്ചയോ – ബഹിദ്ധാ ഹേതൂ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ. പടിസന്ധിക്ഖണേ…പേ…. (൧)

ആരമ്മണപച്ചയോ

൨൮. അജ്ഝത്തോ ധമ്മോ അജ്ഝത്തസ്സ ധമ്മസ്സ ആരമ്മണപച്ചയേന പച്ചയോ – ദാനം ദത്വാ സീലം സമാദിയിത്വാ ഉപോസഥകമ്മം കത്വാ തം പച്ചവേക്ഖതി, പുബ്ബേ സുചിണ്ണാനി…പേ… ഝാനാ വുട്ഠഹിത്വാ…പേ… അരിയാ മഗ്ഗാ വുട്ഠഹിത്വാ മഗ്ഗം പച്ചവേക്ഖന്തി, ഫലം പച്ചവേക്ഖന്തി, പഹീനേ കിലേസേ പച്ചവേക്ഖന്തി, വിക്ഖമ്ഭിതേ കിലേസേ പച്ചവേക്ഖന്തി, പുബ്ബേ സമുദാചിണ്ണേ കിലേസേ ജാനന്തി. അജ്ഝത്തം ചക്ഖും…പേ… കായം… രൂപേ…പേ… ഫോട്ഠബ്ബേ… വത്ഥും… അജ്ഝത്തേ ഖന്ധേ അനിച്ചതോ ദുക്ഖതോ അനത്തതോ വിപസ്സതി, അസ്സാദേതി അഭിനന്ദതി, തം ആരബ്ഭ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. ദിബ്ബേന ചക്ഖുനാ രൂപം പസ്സതി, ദിബ്ബായ സോതുധാതുയാ സദ്ദം സുണാതി, ആകാസാനഞ്ചായതനം വിഞ്ഞാണഞ്ചായതനസ്സ ആരമ്മണപച്ചയേന പച്ചയോ. ആകിഞ്ചഞ്ഞായതനം നേവസഞ്ഞാനാസഞ്ഞായതനസ്സ ആരമ്മണപച്ചയേന പച്ചയോ. രൂപായതനം…പേ… ഫോട്ഠബ്ബായതനം കായവിഞ്ഞാണസ്സ ആരമ്മണപച്ചയേന പച്ചയോ. അജ്ഝത്താ ഖന്ധാ ഇദ്ധിവിധഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൧)

അജ്ഝത്തോ ധമ്മോ ബഹിദ്ധാ ധമ്മസ്സ ആരമ്മണപച്ചയേന പച്ചയോ – പരോ അജ്ഝത്തം ചക്ഖും…പേ… വത്ഥും… അജ്ഝത്തേ ഖന്ധേ അനിച്ചതോ ദുക്ഖതോ അനത്തതോ വിപസ്സതി, അസ്സാദേതി അഭിനന്ദതി, തം ആരബ്ഭ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി. ചേതോപരിയഞാണേന അജ്ഝത്തചിത്തസമങ്ഗിസ്സ ചിത്തം ജാനാതി. അജ്ഝത്തം രൂപായതനം ബഹിദ്ധാ ചക്ഖുവിഞ്ഞാണസ്സ…പേ… അജ്ഝത്തം ഫോട്ഠബ്ബായതനം ബഹിദ്ധാ കായവിഞ്ഞാണസ്സ ആരമ്മണപച്ചയേന പച്ചയോ. അജ്ഝത്താ ഖന്ധാ ഇദ്ധിവിധഞാണസ്സ, ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൨)

൨൯. ബഹിദ്ധാ ധമ്മോ ബഹിദ്ധാ ധമ്മസ്സ ആരമ്മണപച്ചയേന പച്ചയോ – പരോ ദാനം ദത്വാ സീലം സമാദിയിത്വാ ഉപോസഥകമ്മം കത്വാ തം പച്ചവേക്ഖതി, പുബ്ബേ സുചിണ്ണാനി പച്ചവേക്ഖതി, ഝാനാ വുട്ഠഹിത്വാ…പേ… അരിയാ മഗ്ഗാ വുട്ഠഹിത്വാ മഗ്ഗം പച്ചവേക്ഖന്തി, ഫലം പച്ചവേക്ഖന്തി… നിബ്ബാനം പച്ചവേക്ഖന്തി. നിബ്ബാനം ഗോത്രഭുസ്സ, വോദാനസ്സ, മഗ്ഗസ്സ, ഫലസ്സ, ആവജ്ജനായ ആരമ്മണപച്ചയേന പച്ചയോ. അരിയാ പഹീനേ കിലേസേ പച്ചവേക്ഖന്തി, വിക്ഖമ്ഭിതേ കിലേസേ പച്ചവേക്ഖന്തി, പുബ്ബേ സമുദാചിണ്ണേ…പേ… പരോ ബഹിദ്ധാ ചക്ഖും…പേ… വത്ഥും… ബഹിദ്ധാ ഖന്ധേ അനിച്ചതോ…പേ… ദോമനസ്സം ഉപ്പജ്ജതി. ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി. ചേതോപരിയഞാണേന ബഹിദ്ധാ ചിത്തസമങ്ഗിസ്സ…പേ… ആകാസാനഞ്ചായതനം വിഞ്ഞാണഞ്ചായതനസ്സ ആരമ്മണപച്ചയേന പച്ചയോ. ആകിഞ്ചഞ്ഞായതനം നേവസഞ്ഞാനാസഞ്ഞായതനസ്സ ആരമ്മണപച്ചയേന പച്ചയോ. ബഹിദ്ധാ രൂപായതനം ബഹിദ്ധാ ചക്ഖുവിഞ്ഞാണസ്സ…പേ… ബഹിദ്ധാ ഫോട്ഠബ്ബായതനം ബഹിദ്ധാ കായവിഞ്ഞാണസ്സ…പേ… ബഹിദ്ധാ ഖന്ധാ ഇദ്ധിവിധഞാണസ്സ, ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൧)

ബഹിദ്ധാ ധമ്മോ അജ്ഝത്തസ്സ ധമ്മസ്സ ആരമ്മണപച്ചയേന പച്ചയോ – അരിയാ നിബ്ബാനം പച്ചവേക്ഖന്തി. നിബ്ബാനം ഗോത്രഭുസ്സ, വോദാനസ്സ, മഗ്ഗസ്സ, ഫലസ്സ, ആവജ്ജനായ ആരമ്മണപച്ചയേന പച്ചയോ. ബഹിദ്ധാ ചക്ഖും…പേ… വത്ഥും… ബഹിദ്ധാ ഖന്ധേ അനിച്ചതോ…പേ… ദോമനസ്സം ഉപ്പജ്ജതി. ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി. ചേതോപരിയഞാണേന ബഹിദ്ധാ ചിത്തസമങ്ഗിസ്സ ചിത്തം ജാനാതി. ബഹിദ്ധാ രൂപായതനം അജ്ഝത്തം ചക്ഖുവിഞ്ഞാണസ്സ…പേ… ബഹിദ്ധാ ഫോട്ഠബ്ബായതനം അജ്ഝത്തം കായവിഞ്ഞാണസ്സ…പേ… ബഹിദ്ധാ ഖന്ധാ ഇദ്ധിവിധഞാണസ്സ, ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൨)

അധിപതിപച്ചയോ

൩൦. അജ്ഝത്തോ ധമ്മോ അജ്ഝത്തസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ദാനം ദത്വാ സീലം സമാദിയിത്വാ ഉപോസഥകമ്മം കത്വാ, തം ഗരും കത്വാ പച്ചവേക്ഖതി, പുബ്ബേ സുചിണ്ണാനി ഗരും കത്വാ…പേ… ഝാനാ വുട്ഠഹിത്വാ ഝാനം ഗരും കത്വാ…പേ… അരിയാ മഗ്ഗാ വുട്ഠഹിത്വാ മഗ്ഗം ഗരും കത്വാ…പേ… ഫലം ഗരും കത്വാ പച്ചവേക്ഖന്തി. അജ്ഝത്തം ചക്ഖും…പേ… വത്ഥും… അജ്ഝത്തേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. സഹജാതാധിപതി – അജ്ഝത്താധിപതി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (൧)

അജ്ഝത്തോ ധമ്മോ ബഹിദ്ധാ ധമ്മസ്സ അധിപതിപച്ചയേന പച്ചയോ. ആരമ്മണാധിപതി – പരോ അജ്ഝത്തം ചക്ഖും…പേ… വത്ഥും… അജ്ഝത്തേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. (൨)

൩൧. ബഹിദ്ധാ ധമ്മോ ബഹിദ്ധാ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – പരോ ദാനം ദത്വാ സീലം സമാദിയിത്വാ ഉപോസഥകമ്മം കത്വാ, തം ഗരും കത്വാ പച്ചവേക്ഖതി, പുബ്ബേ സുചിണ്ണാനി ഗരും കത്വാ…പേ… ഝാനാ വുട്ഠഹിത്വാ…പേ… അരിയാ മഗ്ഗാ വുട്ഠഹിത്വാ മഗ്ഗം ഗരും കത്വാ…പേ… ഫലം ഗരും കത്വാ…പേ… നിബ്ബാനം ഗരും കത്വാ പച്ചവേക്ഖന്തി. നിബ്ബാനം ഗോത്രഭുസ്സ, വോദാനസ്സ, മഗ്ഗസ്സ, ഫലസ്സ അധിപതിപച്ചയേന പച്ചയോ. ബഹിദ്ധാ ചക്ഖും…പേ… വത്ഥും… ബഹിദ്ധാ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. സഹജാതാധിപതി – ബഹിദ്ധാധിപതി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (൧)

ബഹിദ്ധാ ധമ്മോ അജ്ഝത്തസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി – അരിയാ നിബ്ബാനം ഗരും കത്വാ പച്ചവേക്ഖന്തി. നിബ്ബാനം ഗോത്രഭുസ്സ, വോദാനസ്സ, മഗ്ഗസ്സ, ഫലസ്സ, അധിപതിപച്ചയേന പച്ചയോ. ബഹിദ്ധാ ചക്ഖും…പേ… വത്ഥും… ബഹിദ്ധാ ഖന്ധേ ഗരും കത്വാ അസ്സാദേതി, അഭിനന്ദതി, തം ഗരും കത്വാ രാഗോ…പേ… ദിട്ഠി ഉപ്പജ്ജതി. (൨)

അനന്തരപച്ചയോ

൩൨. അജ്ഝത്തോ ധമ്മോ അജ്ഝത്തസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ അജ്ഝത്താ ഖന്ധാ പച്ഛിമാനം പച്ഛിമാനം അജ്ഝത്താനം ഖന്ധാനം അനന്തരപച്ചയേന പച്ചയോ. അനുലോമം ഗോത്രഭുസ്സ, അനുലോമം വോദാനസ്സ, ഗോത്രഭു മഗ്ഗസ്സ, വോദാനം മഗ്ഗസ്സ, മഗ്ഗോ ഫലസ്സ, ഫലം ഫലസ്സ, അനുലോമം ഫലസമാപത്തിയാ, നിരോധാ വുട്ഠഹന്തസ്സ നേവസഞ്ഞാനാസഞ്ഞായതനം ഫലസമാപത്തിയാ അനന്തരപച്ചയേന പച്ചയോ. (൧)

ബഹിദ്ധാ ധമ്മോ ബഹിദ്ധാ ധമ്മസ്സ അനന്തരപച്ചയേന പച്ചയോ (പുരിമാ പുരിമാ ബഹിദ്ധാതി നാനാകരണം, തംയേവ ഗമനം). (൧)

സമനന്തരപച്ചയാദി

൩൩. അജ്ഝത്തോ ധമ്മോ അജ്ഝത്തസ്സ ധമ്മസ്സ സമനന്തരപച്ചയേന പച്ചയോ…പേ… (അനന്തരസദിസം)… സഹജാതപച്ചയേന പച്ചയോ… അഞ്ഞമഞ്ഞപച്ചയേന പച്ചയോ… നിസ്സയപച്ചയേന പച്ചയോ.

ഉപനിസ്സയപച്ചയോ

൩൪. അജ്ഝത്തോ ധമ്മോ അജ്ഝത്തസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – അജ്ഝത്തം സദ്ധം ഉപനിസ്സായ ദാനം ദേതി, സീലം സമാദിയതി, ഉപോസഥകമ്മം…പേ… ഝാനം…പേ… വിപസ്സനം…പേ… മഗ്ഗം…പേ… അഭിഞ്ഞം…പേ… സമാപത്തിം ഉപ്പാദേതി, മാനം ജപ്പേതി, ദിട്ഠിം ഗണ്ഹാതി. അജ്ഝത്തം സീലം…പേ… പഞ്ഞം… രാഗം…പേ… പത്ഥനം… കായികം സുഖം… കായികം ദുക്ഖം… ഉതും… ഭോജനം… സേനാസനം ഉപനിസ്സായ ദാനം ദേതി…പേ… സമാപത്തിം ഉപ്പാദേതി, പാണം ഹനതി…പേ… സങ്ഘം ഭിന്ദതി. അജ്ഝത്താ സദ്ധാ…പേ… പഞ്ഞാ, രാഗോ…പേ… പത്ഥനാ, കായികം സുഖം… കായികം ദുക്ഖം… സേനാസനം അജ്ഝത്തായ സദ്ധായ…പേ… പഞ്ഞായ, രാഗസ്സ…പേ… പത്ഥനായ, കായികസ്സ സുഖസ്സ, കായികസ്സ ദുക്ഖസ്സ, മഗ്ഗസ്സ ഫലസമാപത്തിയാ ഉപനിസ്സയപച്ചയേന പച്ചയോ. (൧)

അജ്ഝത്തോ ധമ്മോ ബഹിദ്ധാ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – പരോ അജ്ഝത്തം സദ്ധം ഉപനിസ്സായ ദാനം ദേതി…പേ… മാനം ജപ്പേതി, ദിട്ഠിം ഗണ്ഹാതി. പരോ അജ്ഝത്തം സീലം…പേ… സേനാസനം ഉപനിസ്സായ ദാനം ദേതി, പാണം ഹനതി…പേ… സങ്ഘം ഭിന്ദതി. അജ്ഝത്താ സദ്ധാ…പേ… സേനാസനം ബഹിദ്ധാ സദ്ധായ…പേ… മഗ്ഗസ്സ ഫലസമാപത്തിയാ ഉപനിസ്സയപച്ചയേന പച്ചയോ. (൨)

൩൫. ബഹിദ്ധാ ധമ്മോ ബഹിദ്ധാ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – പരോ ബഹിദ്ധാ സദ്ധം…പേ… പത്ഥനം, കായികം സുഖം…പേ… സേനാസനം ഉപനിസ്സായ ദാനം ദേതി…പേ… സങ്ഘം ഭിന്ദതി ബഹിദ്ധാ സദ്ധാ…പേ… സേനാസനം ബഹിദ്ധാ സദ്ധായ…പേ… ഫലസമാപത്തിയാ ഉപനിസ്സയപച്ചയേന പച്ചയോ. (൧)

ബഹിദ്ധാ ധമ്മോ അജ്ഝത്തസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – ബഹിദ്ധാ സദ്ധം…പേ… സേനാസനം ഉപനിസ്സായ ദാനം ദേതി…പേ… സങ്ഘം ഭിന്ദതി. ബഹിദ്ധാ സദ്ധാ…പേ… സേനാസനം അജ്ഝത്തായ സദ്ധായ…പേ… ഫലസമാപത്തിയാ ഉപനിസ്സയപച്ചയേന പച്ചയോ. (൨)

പുരേജാതപച്ചയോ

൩൬. അജ്ഝത്തോ ധമ്മോ അജ്ഝത്തസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – അജ്ഝത്തം ചക്ഖും…പേ… വത്ഥും അനിച്ചതോ ദുക്ഖതോ അനത്തതോ വിപസ്സതി…പേ… ദോമനസ്സം ഉപ്പജ്ജതി, ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി, രൂപായതനം ചക്ഖുവിഞ്ഞാണസ്സ…പേ… ഫോട്ഠബ്ബായതനം കായവിഞ്ഞാണസ്സ പുരേജാതപച്ചയേന പച്ചയോ. വത്ഥുപുരേജാതം – ചക്ഖായതനം ചക്ഖുവിഞ്ഞാണസ്സ…പേ… കായായതനം കായവിഞ്ഞാണസ്സ…പേ… വത്ഥു അജ്ഝത്താനം ഖന്ധാനം പുരേജാതപച്ചയേന പച്ചയോ. (൧)

അജ്ഝത്തോ ധമ്മോ ബഹിദ്ധാ ധമ്മസ്സ പുരേജാതപച്ചയേന പച്ചയോ. ആരമ്മണപുരേജാതം – പരോ അജ്ഝത്തം ചക്ഖും…പേ… വത്ഥും അനിച്ചതോ…പേ… ദോമനസ്സം ഉപ്പജ്ജതി, ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി. അജ്ഝത്തം രൂപായതനം ബഹിദ്ധാ ചക്ഖുവിഞ്ഞാണസ്സ…പേ… അജ്ഝത്തം ഫോട്ഠബ്ബായതനം ബഹിദ്ധാ കായവിഞ്ഞാണസ്സ പുരേജാതപച്ചയേന പച്ചയോ. (൨)

൩൭. ബഹിദ്ധാ ധമ്മോ ബഹിദ്ധാ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – പരോ ബഹിദ്ധാ ചക്ഖും…പേ… വത്ഥും അനിച്ചതോ…പേ… ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി. ബഹിദ്ധാ രൂപായതനം ബഹിദ്ധാ ചക്ഖുവിഞ്ഞാണസ്സ…പേ… ബഹിദ്ധാ ഫോട്ഠബ്ബായതനം ബഹിദ്ധാ കായവിഞ്ഞാണസ്സ…പേ…. വത്ഥുപുരേജാതം – ബഹിദ്ധാ ചക്ഖായതനം…പേ… കായായതനം…പേ… വത്ഥു ബഹിദ്ധാ ഖന്ധാനം പുരേജാതപച്ചയേന പച്ചയോ. (൧)

ബഹിദ്ധാ ധമ്മോ അജ്ഝത്തസ്സ ധമ്മസ്സ പുരേജാതപച്ചയേന പച്ചയോ. ആരമ്മണപുരേജാതം – ബഹിദ്ധാ ചക്ഖും…പേ… വത്ഥും അനിച്ചതോ…പേ… ദോമനസ്സം ഉപ്പജ്ജതി, ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി. ബഹിദ്ധാ രൂപായതനം അജ്ഝത്തസ്സ ചക്ഖുവിഞ്ഞാണസ്സ…പേ… ബഹിദ്ധാ ഫോട്ഠബ്ബായതനം അജ്ഝത്തസ്സ കായവിഞ്ഞാണസ്സ പുരേജാതപച്ചയേന പച്ചയോ. (൨)

൩൮. അജ്ഝത്തോ ച ബഹിദ്ധാ ച ധമ്മാ അജ്ഝത്തസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ബഹിദ്ധാ രൂപായതനഞ്ച അജ്ഝത്തം ചക്ഖായതനഞ്ച അജ്ഝത്തസ്സ ചക്ഖുവിഞ്ഞാണസ്സ പുരേജാതപച്ചയേന പച്ചയോ…പേ… ബഹിദ്ധാ ഫോട്ഠബ്ബായതനഞ്ച അജ്ഝത്തം കായായതനഞ്ച അജ്ഝത്തസ്സ കായവിഞ്ഞാണസ്സ…പേ… ബഹിദ്ധാ രൂപായതനഞ്ച അജ്ഝത്തം വത്ഥു ച…പേ… ബഹിദ്ധാ ഫോട്ഠബ്ബായതനഞ്ച അജ്ഝത്തം വത്ഥു ച അജ്ഝത്താനം ഖന്ധാനം പുരേജാതപച്ചയേന പച്ചയോ. (൧)

അജ്ഝത്തോ ച ബഹിദ്ധാ ച ധമ്മാ ബഹിദ്ധാ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. അജ്ഝത്തം രൂപായതനഞ്ച ബഹിദ്ധാ ചക്ഖായതനഞ്ച ബഹിദ്ധാ ചക്ഖുവിഞ്ഞാണസ്സ പുരേജാതപച്ചയേന പച്ചയോ…പേ… അജ്ഝത്തം ഫോട്ഠബ്ബായതനഞ്ച ബഹിദ്ധാ കായായതനഞ്ച ബഹിദ്ധാ കായവിഞ്ഞാണസ്സ പുരേജാതപച്ചയേന പച്ചയോ. അജ്ഝത്തം രൂപായതനഞ്ച ബഹിദ്ധാ വത്ഥു ച…പേ… അജ്ഝത്തം ഫോട്ഠബ്ബായതനഞ്ച ബഹിദ്ധാ വത്ഥു ച ബഹിദ്ധാ ഖന്ധാനം പുരേജാതപച്ചയേന പച്ചയോ. (൨)

പച്ഛാജാതപച്ചയോ

൩൯. അജ്ഝത്തോ ധമ്മോ അജ്ഝത്തസ്സ ധമ്മസ്സ പച്ഛാജാതപച്ചയേന പച്ചയോ – പച്ഛാജാതാ അജ്ഝത്താ ഖന്ധാ പുരേജാതസ്സ ഇമസ്സ കായസ്സ പച്ഛാജാതപച്ചയേന പച്ചയോ. (൧)

ബഹിദ്ധാ ധമ്മോ ബഹിദ്ധാ ധമ്മസ്സ പച്ഛാജാതപച്ചയേന പച്ചയോ – പച്ഛാജാതാ ബഹിദ്ധാ ഖന്ധാ പുരേജാതസ്സ ഇമസ്സ കായസ്സ പച്ഛാജാതപച്ചയേന പച്ചയോ. (൧)

ആസേവനപച്ചയോ

൪൦. അജ്ഝത്തോ ധമ്മോ അജ്ഝത്തസ്സ ധമ്മസ്സ ആസേവനപച്ചയേന പച്ചയോ – പുരിമാ പുരിമാ അജ്ഝത്താ ഖന്ധാ പച്ഛിമാനം പച്ഛിമാനം അജ്ഝത്താനം ഖന്ധാനം ആസേവനപച്ചയേന പച്ചയോ. അനുലോമം ഗോത്രഭുസ്സ… അനുലോമം വോദാനസ്സ… ഗോത്രഭു മഗ്ഗസ്സ… വോദാനം മഗ്ഗസ്സ ആസേവനപച്ചയേന പച്ചയോ. (൧)

ബഹിദ്ധാ ധമ്മോ ബഹിദ്ധാ ധമ്മസ്സ ആസേവനപച്ചയേന പച്ചയോ – പുരിമാ പുരിമാ…പേ… (അജ്ഝത്തസദിസംയേവ).

കമ്മപച്ചയോ

൪൧. അജ്ഝത്തോ ധമ്മോ അജ്ഝത്തസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – അജ്ഝത്താ ചേതനാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം കമ്മപച്ചയേന പച്ചയോ. നാനാക്ഖണികാ – അജ്ഝത്താ ചേതനാ വിപാകാനം അജ്ഝത്താനം ഖന്ധാനം കടത്താ ച രൂപാനം കമ്മപച്ചയേന പച്ചയോ. (൧)

ബഹിദ്ധാ ധമ്മോ ബഹിദ്ധാ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – ബഹിദ്ധാ ചേതനാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം കമ്മപച്ചയേന പച്ചയോ. നാനാക്ഖണികാ – ബഹിദ്ധാ ചേതനാ വിപാകാനം ബഹിദ്ധാ ഖന്ധാനം കടത്താ ച രൂപാനം കമ്മപച്ചയേന പച്ചയോ. (൧)

വിപാകപച്ചയോ

൪൨. അജ്ഝത്തോ ധമ്മോ അജ്ഝത്തസ്സ ധമ്മസ്സ വിപാകപച്ചയേന പച്ചയോ…പേ… (പരിപുണ്ണം, പടിച്ചവാരസദിസം).

ആഹാരപച്ചയോ

൪൩. അജ്ഝത്തോ ധമ്മോ അജ്ഝത്തസ്സ ധമ്മസ്സ ആഹാരപച്ചയേന പച്ചയോ – അജ്ഝത്താ ആഹാരാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ആഹാരപച്ചയേന പച്ചയോ. പടിസന്ധിക്ഖണേ…പേ… അജ്ഝത്തോ കബളീകാരോ ആഹാരോ അജ്ഝത്തസ്സ കായസ്സ ആഹാരപച്ചയേന പച്ചയോ. (൧)

അജ്ഝത്തോ ധമ്മോ ബഹിദ്ധാ ധമ്മസ്സ ആഹാരപച്ചയേന പച്ചയോ – അജ്ഝത്തോ കബളീകാരോ ആഹാരോ ബഹിദ്ധാ കായസ്സ ആഹാരപച്ചയേന പച്ചയോ. (൨)

ബഹിദ്ധാ ധമ്മോ ബഹിദ്ധാ ധമ്മസ്സ ആഹാരപച്ചയേന പച്ചയോ (പവത്തിപടിസന്ധി) ബഹിദ്ധാ കബളീകാരോ ആഹാരോ ബഹിദ്ധാ കായസ്സ ആഹാരപച്ചയേന പച്ചയോ. (൧)

ബഹിദ്ധാ ധമ്മോ അജ്ഝത്തസ്സ ധമ്മസ്സ ആഹാരപച്ചയേന പച്ചയോ – ബഹിദ്ധാ കബളീകാരോ ആഹാരോ അജ്ഝത്തസ്സ കായസ്സ ആഹാരപച്ചയേന പച്ചയോ. (൨)

൪൪. അജ്ഝത്തോ ധമ്മോ ച ബഹിദ്ധാ ധമ്മോ ച അജ്ഝത്തസ്സ ധമ്മസ്സ ആഹാരപച്ചയേന പച്ചയോ – അജ്ഝത്തോ കബളീകാരോ ആഹാരോ ച ബഹിദ്ധാ കബളീകാരോ ആഹാരോ ച അജ്ഝത്തസ്സ കായസ്സ ആഹാരപച്ചയേന പച്ചയോ. (൧)

അജ്ഝത്തോ ധമ്മോ ച ബഹിദ്ധാ ധമ്മോ ച ബഹിദ്ധാ ധമ്മസ്സ ആഹാരപച്ചയേന പച്ചയോ – അജ്ഝത്തോ കബളീകാരോ ആഹാരോ ച ബഹിദ്ധാ കബളീകാരോ ആഹാരോ ച ബഹിദ്ധാ കായസ്സ ആഹാരപച്ചയേന പച്ചയോ. (൨)

ഇന്ദ്രിയപച്ചയാദി

൪൫. അജ്ഝത്തോ ധമ്മോ അജ്ഝത്തസ്സ ധമ്മസ്സ ഇന്ദ്രിയപച്ചയേന പച്ചയോ, അജ്ഝത്തികാ ഇന്ദ്രിയാ (രൂപജീവിതിന്ദ്രിയമ്പി വിത്ഥാരേതബ്ബം)… ഝാനപച്ചയേന പച്ചയോ… മഗ്ഗപച്ചയേന പച്ചയോ… സമ്പയുത്തപച്ചയേന പച്ചയോ… വിപ്പയുത്തപച്ചയേന പച്ചയോ – സഹജാതം, പുരേജാതം, പച്ഛാജാതം (മാതികാപദാനി അനുമജ്ജന്തേന വിത്ഥാരേതബ്ബാനി).

ബഹിദ്ധാ ധമ്മോ ബഹിദ്ധാ ധമ്മസ്സ വിപ്പയുത്തപച്ചയേന പച്ചയോ – സഹജാതം, പുരേജാതം, പച്ഛാജാതം (സംഖിത്തം).

അത്ഥിപച്ചയോ