൨൧. അജ്ഝത്താരമ്മണത്തികം

൧. പടിച്ചവാരോ

൧. പച്ചയാനുലോമം

൧. വിഭങ്ഗവാരോ

ഹേതുപച്ചയോ

൧. അജ്ഝത്താരമ്മണം ധമ്മം പടിച്ച അജ്ഝത്താരമ്മണോ ധമ്മോ ഉപ്പജ്ജതി ഹേതുപച്ചയാ – അജ്ഝത്താരമ്മണം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ… പടിസന്ധിക്ഖണേ അജ്ഝത്താരമ്മണം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ…. (൧)

ബഹിദ്ധാരമ്മണം ധമ്മം പടിച്ച ബഹിദ്ധാരമ്മണോ ധമ്മോ ഉപ്പജ്ജതി ഹേതുപച്ചയാ – ബഹിദ്ധാരമ്മണം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ… പടിസന്ധിക്ഖണേ ബഹിദ്ധാരമ്മണം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ…. (൧)

ആരമ്മണപച്ചയാദി

൨. അജ്ഝത്താരമ്മണം ധമ്മം പടിച്ച അജ്ഝത്താരമ്മണോ ധമ്മോ ഉപ്പജ്ജതി ആരമ്മണപച്ചയാ…പേ… അവിഗതപച്ചയാ (സംഖിത്തം).

൧. പച്ചയാനുലോമം

൨. സങ്ഖ്യാവാരോ

൩. ഹേതുപച്ചയാ ആരമ്മണേ ദ്വേ (സംഖിത്തം, സബ്ബത്ഥ ദ്വേ), അവിഗതേ ദ്വേ (ഏവം ഗണേതബ്ബം).

അനുലോമം.

൨. പച്ചയപച്ചനീയം

൧. വിഭങ്ഗവാരോ

നഹേതുപച്ചയോ

൪. അജ്ഝത്താരമ്മണം ധമ്മം പടിച്ച അജ്ഝത്താരമ്മണോ ധമ്മോ ഉപ്പജ്ജതി നഹേതുപച്ചയാ – അഹേതുകം അജ്ഝത്താരമ്മണം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ… അഹേതുകപടിസന്ധിക്ഖണേ അജ്ഝത്താരമ്മണം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ… വിചികിച്ഛാസഹഗതേ ഉദ്ധച്ചസഹഗതേ ഖന്ധേ പടിച്ച വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

ബഹിദ്ധാരമ്മണം ധമ്മം പടിച്ച ബഹിദ്ധാരമ്മണോ ധമ്മോ ഉപ്പജ്ജതി നഹേതുപച്ചയാ – അഹേതുകം ബഹിദ്ധാരമ്മണം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ… അഹേതുകപടിസന്ധിക്ഖണേ…പേ… വിചികിച്ഛാസഹഗതേ ഉദ്ധച്ചസഹഗതേ ഖന്ധേ പടിച്ച വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

നഅധിപതിപച്ചയാദി

൫. അജ്ഝത്താരമ്മണം ധമ്മം പടിച്ച അജ്ഝത്താരമ്മണോ ധമ്മോ ഉപ്പജ്ജതി നഅധിപതിപച്ചയാ … (അനുലോമസഹജാതസദിസം, നിന്നാനാകരണം) നപുരേജാതപച്ചയാ – അരൂപേ അജ്ഝത്താരമ്മണം ഏകം ഖന്ധം പടിച്ച…പേ… പടിസന്ധിക്ഖണേ…പേ…. (൧)

൬. ബഹിദ്ധാരമ്മണം ധമ്മം പടിച്ച ബഹിദ്ധാരമ്മണോ ധമ്മോ ഉപ്പജ്ജതി നപുരേജാതപച്ചയാ – അരൂപേ ബഹിദ്ധാരമ്മണം ഏകം ഖന്ധം പടിച്ച തയോ ഖന്ധാ…പേ…. പടിസന്ധിക്ഖണേ…പേ… നപച്ഛാജാതപച്ചയാ… നആസേവനപച്ചയാ… (സഹജാതസദിസം) നകമ്മപച്ചയാ – അജ്ഝത്താരമ്മണേ ഖന്ധേ പടിച്ച അജ്ഝത്താരമ്മണാ ചേതനാ.

ബഹിദ്ധാരമ്മണം ധമ്മം പടിച്ച ബഹിദ്ധാരമ്മണോ ധമ്മോ ഉപ്പജ്ജതി നകമ്മപച്ചയാ – ബഹിദ്ധാരമ്മണേ ഖന്ധേ പടിച്ച ബഹിദ്ധാരമ്മണാ ചേതനാ.

നവിപാകപച്ചയാദി

൭. അജ്ഝത്താരമ്മണം ധമ്മം പടിച്ച അജ്ഝത്താരമ്മണോ ധമ്മോ ഉപ്പജ്ജതി നവിപാകപച്ചയാ (പടിസന്ധി നത്ഥി)… നഝാനപച്ചയാ…പേ… പഞ്ചവിഞ്ഞാണസഹഗതം അജ്ഝത്താരമ്മണം ഏകം…പേ…. (൧)

ബഹിദ്ധാരമ്മണം ധമ്മം പടിച്ച ബഹിദ്ധാരമ്മണോ ധമ്മോ ഉപ്പജ്ജതി നഝാനപച്ചയാ – പഞ്ചവിഞ്ഞാണസഹഗതം ബഹിദ്ധാരമ്മണം ഏകം ഖന്ധം പടിച്ച തയോ ഖന്ധാ…പേ… നമഗ്ഗപച്ചയാ (നഹേതുസദിസോ. മോഹോ നത്ഥി)… നവിപ്പയുത്തപച്ചയാ – അരൂപേ അജ്ഝത്താരമ്മണം ഏകം ഖന്ധം പടിച്ച തയോ ഖന്ധാ…പേ…. (൧)

ബഹിദ്ധാരമ്മണം ധമ്മം പടിച്ച ബഹിദ്ധാരമ്മണോ ധമ്മോ ഉപ്പജ്ജതി നവിപ്പയുത്തപച്ചയാ – അരൂപേ ബഹിദ്ധാരമ്മണം ഏകം ഖന്ധം പടിച്ച തയോ ഖന്ധാ…പേ…. (൧)

൨. പച്ചയപച്ചനീയം

൨. സങ്ഖ്യാവാരോ

൮. നഹേതുയാ ദ്വേ, നഅധിപതിയാ ദ്വേ, നപുരേജാതേ ദ്വേ, നപച്ഛാജാതേ ദ്വേ, നആസേവനേ നകമ്മേ നവിപാകേ നഝാനേ നമഗ്ഗേ നവിപ്പയുത്തേ ദ്വേ (ഏവം ഗണേതബ്ബം).

പച്ചനീയം.

൩. പച്ചയാനുലോമപച്ചനീയം

൯. ഹേതുപച്ചയാ നഅധിപതിയാ ദ്വേ…പേ… നവിപാകേ ദ്വേ, നവിപ്പയുത്തേ ദ്വേ (ഏവം ഗണേതബ്ബം).

അനുലോമപച്ചനീയം.

൪. പച്ചയപച്ചനീയാനുലോമം

൧൦. നഹേതുപച്ചയാ ആരമ്മണേ ദ്വേ, അനന്തരേ ദ്വേ, സമനന്തരേ ദ്വേ…പേ… മഗ്ഗേ ദ്വേ…പേ… അവിഗതേ ദ്വേ (ഏവം ഗണേതബ്ബം).

പച്ചനീയാനുലോമം.

പടിച്ചവാരോ.

൨-൬. സഹജാത-പച്ചയ-നിസ്സയ-സംസട്ഠ-സമ്പയുത്തവാരോ

(സഹജാതവാരോപി പച്ചയവാരോപി നിസ്സയവാരോപി സംസട്ഠവാരോപി സമ്പയുത്തവാരോപി പടിച്ചവാരസദിസാ.)

൭. പഞ്ഹാവാരോ

൧. പച്ചയാനുലോമം

൧. വിഭങ്ഗവാരോ

ഹേതുപച്ചയോ

൧൧. അജ്ഝത്താരമ്മണോ ധമ്മോ അജ്ഝത്താരമ്മണസ്സ ധമ്മസ്സ ഹേതുപച്ചയേന പച്ചയോ – അജ്ഝത്താരമ്മണാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. പടിസന്ധിക്ഖണേ അജ്ഝത്താരമ്മണാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. (൧)

ബഹിദ്ധാരമ്മണോ ധമ്മോ ബഹിദ്ധാരമ്മണസ്സ ധമ്മസ്സ ഹേതുപച്ചയേന പച്ചയോ – ബഹിദ്ധാരമ്മണാ ഹേതൂ സമ്പയുത്തകാനം ഖന്ധാനം…പേ… പടിസന്ധിക്ഖണേ…പേ…. (൧)

ആരമ്മണപച്ചയോ

൧൨. അജ്ഝത്താരമ്മണോ ധമ്മോ അജ്ഝത്താരമ്മണസ്സ ധമ്മസ്സ ആരമ്മണപച്ചയേന പച്ചയോ – അജ്ഝത്തം വിഞ്ഞാണഞ്ചായതനം പച്ചവേക്ഖതി, നേവസഞ്ഞാനാസഞ്ഞായതനം പച്ചവേക്ഖതി, അജ്ഝത്താരമ്മണം അജ്ഝത്തം ദിബ്ബം ചക്ഖും പച്ചവേക്ഖതി, ദിബ്ബം സോതധാതും…പേ… ഇദ്ധിവിധഞാണം…പേ… പുബ്ബേനിവാസാനുസ്സതിഞാണം…പേ… യഥാകമ്മൂപഗഞാണം…പേ… അനാഗതംസഞാണം പച്ചവേക്ഖതി. അരിയാ അജ്ഝത്താരമ്മണേ പഹീനേ കിലേസേ പച്ചവേക്ഖന്തി, വിക്ഖമ്ഭിതേ കിലേസേ പച്ചവേക്ഖന്തി, പുബ്ബേ സമുദാചിണ്ണേ കിലേസേ ജാനന്തി. അജ്ഝത്താരമ്മണേ അജ്ഝത്തേ ഖന്ധേ അനിച്ചതോ…പേ… വിപസ്സതി, അസ്സാദേതി അഭിനന്ദതി, തം ആരബ്ഭ അജ്ഝത്താരമ്മണോ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. അജ്ഝത്താരമ്മണാ അജ്ഝത്താ ഖന്ധാ പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൧)

അജ്ഝത്താരമ്മണോ ധമ്മോ ബഹിദ്ധാരമ്മണസ്സ ധമ്മസ്സ ആരമ്മണപച്ചയേന പച്ചയോ – ബഹിദ്ധാ വിഞ്ഞാണഞ്ചായതനം പച്ചവേക്ഖതി, നേവസഞ്ഞാനാസഞ്ഞായതനം പച്ചവേക്ഖതി. അജ്ഝത്താരമ്മണം ബഹിദ്ധാ ദിബ്ബം ചക്ഖും പച്ചവേക്ഖതി, ദിബ്ബം സോതധാതും…പേ… ഇദ്ധിവിധഞാണം…പേ… പുബ്ബേനിവാസാനുസ്സതിഞാണം…പേ… യഥാകമ്മൂപഗഞാണം…പേ… അനാഗതംസഞാണം പച്ചവേക്ഖതി, അജ്ഝത്താരമ്മണേ ബഹിദ്ധാ ഖന്ധേ അനിച്ചതോ ദുക്ഖതോ അനത്തതോ വിപസ്സതി…പേ… ചേതോപരിയഞാണേന അജ്ഝത്താരമ്മണബഹിദ്ധാചിത്തസമങ്ഗിസ്സ ചിത്തം ജാനാതി, അജ്ഝത്താരമ്മണാ ബഹിദ്ധാ ഖന്ധാ ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൨)

൧൩. ബഹിദ്ധാരമ്മണോ ധമ്മോ ബഹിദ്ധാരമ്മണസ്സ ധമ്മസ്സ ആരമ്മണപച്ചയേന പച്ചയോ – ബഹിദ്ധാരമ്മണം ബഹിദ്ധാ ദിബ്ബം ചക്ഖും പച്ചവേക്ഖതി, ദിബ്ബം സോതധാതും പച്ചവേക്ഖതി. ഇദ്ധിവിധഞാണം…പേ… ചേതോപരിയഞാണം…പേ… പുബ്ബേനിവാസാനുസ്സതിഞാണം…പേ… യഥാകമ്മൂപഗഞാണം…പേ… അനാഗതംസഞാണം പച്ചവേക്ഖതി. ബഹിദ്ധാരമ്മണേ ബഹിദ്ധാ ഖന്ധേ അനിച്ചതോ ദുക്ഖതോ അനത്തതോ വിപസ്സതി…പേ… ചേതോപരിയഞാണേന ബഹിദ്ധാരമ്മണബഹിദ്ധാചിത്തസമങ്ഗിസ്സ ചിത്തം ജാനാതി. ബഹിദ്ധാരമ്മണാ ബഹിദ്ധാ ഖന്ധാ ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൧)

ബഹിദ്ധാരമ്മണോ ധമ്മോ അജ്ഝത്താരമ്മണസ്സ ധമ്മസ്സ ആരമ്മണപച്ചയേന പച്ചയോ – ദാനം ദത്വാ സീലം സമാദിയിത്വാ ഉപോസഥകമ്മം കത്വാ തം പച്ചവേക്ഖതി, പുബ്ബേ സുചിണ്ണാനി പച്ചവേക്ഖതി, ഝാനാ വുട്ഠഹിത്വാ ഝാനം പച്ചവേക്ഖതി. അരിയാ മഗ്ഗാ വുട്ഠഹിത്വാ മഗ്ഗം പച്ചവേക്ഖന്തി, ഫലം പച്ചവേക്ഖന്തി, ബഹിദ്ധാരമ്മണേ പഹീനേ കിലേസേ പച്ചവേക്ഖന്തി, വിക്ഖമ്ഭിതേ കിലേസേ പച്ചവേക്ഖന്തി, പുബ്ബേ സമുദാചിണ്ണേ കിലേസേ ജാനന്തി. ബഹിദ്ധാരമ്മണം അജ്ഝത്തം ദിബ്ബം ചക്ഖും പച്ചവേക്ഖതി, ദിബ്ബം സോതധാതും… ഇദ്ധിവിധഞാണം… ചേതോപരിയഞാണം… പുബ്ബേനിവാസാനുസ്സതിഞാണം… യഥാകമ്മൂപഗഞാണം… അനാഗതംസഞാണം… ബഹിദ്ധാരമ്മണേ അജ്ഝത്തേ ഖന്ധേ അനിച്ചതോ…പേ… വിപസ്സതി, അസ്സാദേതി അഭിനന്ദതി, തം ആരബ്ഭ അജ്ഝത്താരമ്മണോ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. ബഹിദ്ധാരമ്മണാ അജ്ഝത്താ ഖന്ധാ ഇദ്ധിവിധഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൨)

അധിപതിപച്ചയോ

൧൪. അജ്ഝത്താരമ്മണോ ധമ്മോ അജ്ഝത്താരമ്മണസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – അജ്ഝത്തം വിഞ്ഞാണഞ്ചായതനം ഗരും കത്വാ പച്ചവേക്ഖതി, നേവസഞ്ഞാനാസഞ്ഞായതനം ഗരും കത്വാ പച്ചവേക്ഖതി. അജ്ഝത്താരമ്മണം അജ്ഝത്തം ദിബ്ബം ചക്ഖും ഗരും കത്വാ…പേ… ദിബ്ബം സോതധാതും…പേ… ഇദ്ധിവിധഞാണം… പുബ്ബേനിവാസാനുസ്സതിഞാണം… യഥാകമ്മൂപഗഞാണം… അനാഗതംസഞാണം ഗരും കത്വാ…പേ… അജ്ഝത്താരമ്മണേ അജ്ഝത്തേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ അജ്ഝത്താരമ്മണോ രാഗോ ഉപ്പജ്ജതി, ദിട്ഠി ഉപ്പജ്ജതി. സഹജാതാധിപതി – അജ്ഝത്താരമ്മണാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (൧)

൧൫. ബഹിദ്ധാരമ്മണോ ധമ്മോ ബഹിദ്ധാരമ്മണസ്സ ധമ്മസ്സ അധിപതിപച്ചയേന പച്ചയോ. സഹജാതാധിപതി – ബഹിദ്ധാരമ്മണാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (൧)

ബഹിദ്ധാരമ്മണോ ധമ്മോ അജ്ഝത്താരമ്മണസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി – ദാനം ദത്വാ സീലം സമാദിയിത്വാ ഉപോസഥകമ്മം കത്വാ തം ഗരും കത്വാ പച്ചവേക്ഖതി, പുബ്ബേ സുചിണ്ണാനി…പേ… ഝാനാ വുട്ഠഹിത്വാ…പേ… അരിയാ മഗ്ഗാ വുട്ഠഹിത്വാ മഗ്ഗം… ഫലം ഗരും കത്വാ പച്ചവേക്ഖന്തി. ബഹിദ്ധാരമ്മണം അജ്ഝത്തം ദിബ്ബം ചക്ഖും ഗരും കത്വാ…പേ… ദിബ്ബം സോതധാതും… ഇദ്ധിവിധഞാണം… ചേതോപരിയഞാണം… പുബ്ബേനിവാസാനുസ്സതിഞാണം… യഥാകമ്മൂപഗഞാണം… അനാഗതംസഞാണം ഗരും കത്വാ പച്ചവേക്ഖതി, ബഹിദ്ധാരമ്മണേ അജ്ഝത്തേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ അജ്ഝത്താരമ്മണോ രാഗോ ഉപ്പജ്ജതി, ദിട്ഠി ഉപ്പജ്ജതി. (൨)

അനന്തരപച്ചയോ

൧൬. അജ്ഝത്താരമ്മണോ ധമ്മോ അജ്ഝത്താരമ്മണസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ അജ്ഝത്താരമ്മണാ ഖന്ധാ പച്ഛിമാനം പച്ഛിമാനം അജ്ഝത്താരമ്മണാനം ഖന്ധാനം അനന്തരപച്ചയേന പച്ചയോ. (൧)

അജ്ഝത്താരമ്മണോ ധമ്മോ ബഹിദ്ധാരമ്മണസ്സ ധമ്മസ്സ അനന്തരപച്ചയേന പച്ചയോ – അജ്ഝത്താരമ്മണം ചുതിചിത്തം ബഹിദ്ധാരമ്മണസ്സ ഉപപത്തിചിത്തസ്സ അനന്തരപച്ചയേന പച്ചയോ. അജ്ഝത്താരമ്മണം ഭവങ്ഗം ബഹിദ്ധാരമ്മണായ ആവജ്ജനായ അനന്തരപച്ചയേന പച്ചയോ. അജ്ഝത്താരമ്മണാ ഖന്ധാ ബഹിദ്ധാരമ്മണസ്സ വുട്ഠാനസ്സ അനന്തരപച്ചയേന പച്ചയോ. അജ്ഝത്താരമ്മണം അനുലോമം ഗോത്രഭുസ്സ… അനുലോമം വോദാനസ്സ… അനുലോമം ഫലസമാപത്തിയാ… നിരോധാ വുട്ഠഹന്തസ്സ… നേവസഞ്ഞാനാസഞ്ഞായതനം ഫലസമാപത്തിയാ അനന്തരപച്ചയേന പച്ചയോ. (൨)

൧൭. ബഹിദ്ധാരമ്മണോ ധമ്മോ ബഹിദ്ധാരമ്മണസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ ബഹിദ്ധാരമ്മണാ ഖന്ധാ പച്ഛിമാനം പച്ഛിമാനം ബഹിദ്ധാരമ്മണാനം ഖന്ധാനം അനന്തരപച്ചയേന പച്ചയോ. ബഹിദ്ധാരമ്മണം അനുലോമം ഗോത്രഭുസ്സ… അനുലോമം വോദാനസ്സ… ഗോത്രഭു മഗ്ഗസ്സ… വോദാനം മഗ്ഗസ്സ… മഗ്ഗോ ഫലസ്സ… ഫലം ഫലസ്സ… അനുലോമം ഫലസമാപത്തിയാ അനന്തരപച്ചയേന പച്ചയോ. (൧)

ബഹിദ്ധാരമ്മണോ ധമ്മോ അജ്ഝത്താരമ്മണസ്സ ധമ്മസ്സ അനന്തരപച്ചയേന പച്ചയോ – ബഹിദ്ധാരമ്മണം ചുതിചിത്തം അജ്ഝത്താരമ്മണസ്സ ഉപപത്തിചിത്തസ്സ അനന്തരപച്ചയേന പച്ചയോ. ബഹിദ്ധാരമ്മണം ഭവങ്ഗം അജ്ഝത്താരമ്മണായ ആവജ്ജനായ അനന്തരപച്ചയേന പച്ചയോ. ബഹിദ്ധാരമ്മണാ ഖന്ധാ അജ്ഝത്താരമ്മണസ്സ വുട്ഠാനസ്സ അനന്തരപച്ചയേന പച്ചയോ. (൨)

സമനന്തരപച്ചയാദി

൧൮. അജ്ഝത്താരമ്മണോ ധമ്മോ അജ്ഝത്താരമ്മണസ്സ ധമ്മസ്സ സമനന്തരപച്ചയേന പച്ചയോ…പേ… സഹജാതപച്ചയേന പച്ചയോ… അഞ്ഞമഞ്ഞപച്ചയേന പച്ചയോ… നിസ്സയപച്ചയേന പച്ചയോ.

ഉപനിസ്സയപച്ചയോ

൧൯. അജ്ഝത്താരമ്മണോ ധമ്മോ അജ്ഝത്താരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – അജ്ഝത്താരമ്മണാ അനിച്ചാനുപസ്സനാ, ദുക്ഖാനുപസ്സനാ, അനത്താനുപസ്സനാ, അജ്ഝത്താരമ്മണായ അനിച്ചാനുപസ്സനായ, ദുക്ഖാനുപസ്സനായ, അനത്താനുപസ്സനായ ഉപനിസ്സയപച്ചയേന പച്ചയോ. (൧)

അജ്ഝത്താരമ്മണോ ധമ്മോ ബഹിദ്ധാരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – അജ്ഝത്താരമ്മണാ അനിച്ചാനുപസ്സനാ, ദുക്ഖാനുപസ്സനാ, അനത്താനുപസ്സനാ ബഹിദ്ധാരമ്മണായ അനിച്ചാനുപസ്സനായ, ദുക്ഖാനുപസ്സനായ, അനത്താനുപസ്സനായ ഉപനിസ്സയപച്ചയേന പച്ചയോ. (൨)

൨൦. ബഹിദ്ധാരമ്മണോ ധമ്മോ ബഹിദ്ധാരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – ബഹിദ്ധാരമ്മണാ അനിച്ചാനുപസ്സനാ, ദുക്ഖാനുപസ്സനാ, അനത്താനുപസ്സനാ ബഹിദ്ധാരമ്മണായ അനിച്ചാനുപസ്സനായ, ദുക്ഖാനുപസ്സനായ, അനത്താനുപസ്സനായ ഉപനിസ്സയപച്ചയേന പച്ചയോ. (൧)

ബഹിദ്ധാരമ്മണോ ധമ്മോ അജ്ഝത്താരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – ബഹിദ്ധാരമ്മണാ അനിച്ചാനുപസ്സനാ, ദുക്ഖാനുപസ്സനാ, അനത്താനുപസ്സനാ അജ്ഝത്താരമ്മണായ അനിച്ചാനുപസ്സനായ, ദുക്ഖാനുപസ്സനായ, അനത്താനുപസ്സനായ ഉപനിസ്സയപച്ചയേന പച്ചയോ. (൨)

ആസേവനപച്ചയോ

൨൧. അജ്ഝത്താരമ്മണോ ധമ്മോ അജ്ഝത്താരമ്മണസ്സ ധമ്മസ്സ ആസേവനപച്ചയേന പച്ചയോ – പുരിമാ പുരിമാ അജ്ഝത്താരമ്മണാ ഖന്ധാ പച്ഛിമാനം പച്ഛിമാനം അജ്ഝത്താരമ്മണാനം ഖന്ധാനം ആസേവനപച്ചയേന പച്ചയോ. (൧)

അജ്ഝത്താരമ്മണോ ധമ്മോ ബഹിദ്ധാരമ്മണസ്സ ധമ്മസ്സ ആസേവനപച്ചയേന പച്ചയോ – അജ്ഝത്താരമ്മണം അനുലോമം ഗോത്രഭുസ്സ, അനുലോമം വോദാനസ്സ ആസേവനപച്ചയേന പച്ചയോ. (൨)

ബഹിദ്ധാരമ്മണോ ധമ്മോ ബഹിദ്ധാരമ്മണസ്സ ധമ്മസ്സ ആസേവനപച്ചയേന പച്ചയോ – പുരിമാ പുരിമാ ബഹിദ്ധാരമ്മണാ ഖന്ധാ പച്ഛിമാനം പച്ഛിമാനം ബഹിദ്ധാരമ്മണാനം ഖന്ധാനം ആസേവനപച്ചയേന പച്ചയോ. ബഹിദ്ധാരമ്മണം അനുലോമം ഗോത്രഭുസ്സ… അനുലോമം വോദാനസ്സ… ഗോത്രഭു മഗ്ഗസ്സ… വോദാനം മഗ്ഗസ്സ ആസേവനപച്ചയേന പച്ചയോ. (൧)

കമ്മപച്ചയോ

൨൨. അജ്ഝത്താരമ്മണോ ധമ്മോ അജ്ഝത്താരമ്മണസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – അജ്ഝത്താരമ്മണാ ചേതനാ സമ്പയുത്തകാനം ഖന്ധാനം കമ്മപച്ചയേന പച്ചയോ. പടിസന്ധിക്ഖണേ…പേ…. നാനാക്ഖണികാ – അജ്ഝത്താരമ്മണാ ചേതനാ വിപാകാനം അജ്ഝത്താരമ്മണാനം ഖന്ധാനം കമ്മപച്ചയേന പച്ചയോ. (൧)

അജ്ഝത്താരമ്മണോ ധമ്മോ ബഹിദ്ധാരമ്മണസ്സ ധമ്മസ്സ കമ്മപച്ചയേന പച്ചയോ. നാനാക്ഖണികാ – അജ്ഝത്താരമ്മണാ ചേതനാ വിപാകാനം ബഹിദ്ധാരമ്മണാനം ഖന്ധാനം കമ്മപച്ചയേന പച്ചയോ. (൨)

ബഹിദ്ധാരമ്മണോ ധമ്മോ ബഹിദ്ധാരമ്മണസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – ബഹിദ്ധാരമ്മണാ ചേതനാ സമ്പയുത്തകാനം ഖന്ധാനം കമ്മപച്ചയേന പച്ചയോ. പടിസന്ധിക്ഖണേ…പേ…. നാനാക്ഖണികാ – ബഹിദ്ധാരമ്മണാ ചേതനാ വിപാകാനം ബഹിദ്ധാരമ്മണാനം ഖന്ധാനം കമ്മപച്ചയേന പച്ചയോ. (൧)

ബഹിദ്ധാരമ്മണോ ധമ്മോ അജ്ഝത്താരമ്മണസ്സ ധമ്മസ്സ കമ്മപച്ചയേന പച്ചയോ. നാനാക്ഖണികാ – ബഹിദ്ധാരമ്മണാ ചേതനാ വിപാകാനം അജ്ഝത്താരമ്മണാനം ഖന്ധാനം കമ്മപച്ചയേന പച്ചയോ. (൨)

വിപാകപച്ചയാദി

൨൩. അജ്ഝത്താരമ്മണോ ധമ്മോ അജ്ഝത്താരമ്മണസ്സ ധമ്മസ്സ വിപാകപച്ചയേന പച്ചയോ…പേ… ആഹാരപച്ചയേന പച്ചയോ… ഇന്ദ്രിയപച്ചയേന പച്ചയോ… ഝാനപച്ചയേന പച്ചയോ … മഗ്ഗപച്ചയേന പച്ചയോ… സമ്പയുത്തപച്ചയേന പച്ചയോ… അത്ഥിപച്ചയേന പച്ചയോ… നത്ഥിപച്ചയേന പച്ചയോ…വിഗതപച്ചയേന പച്ചയോ… അവിഗതപച്ചയേന പച്ചയോ.

൧. പച്ചയാനുലോമം

൨. സങ്ഖ്യാവാരോ

സുദ്ധം

൨൪. ഹേതുയാ ദ്വേ, ആരമ്മണേ ചത്താരി, അധിപതിയാ തീണി, അനന്തരേ ചത്താരി, സമനന്തരേ ചത്താരി, സഹജാതേ ദ്വേ, അഞ്ഞമഞ്ഞേ ദ്വേ, നിസ്സയേ ദ്വേ, ഉപനിസ്സയേ ചത്താരി, ആസേവനേ തീണി, കമ്മേ ചത്താരി, വിപാകേ ദ്വേ …പേ… (സബ്ബത്ഥ ദ്വേ ), സമ്പയുത്തേ ദ്വേ, അത്ഥിയാ ദ്വേ, നത്ഥിയാ ചത്താരി, വിഗതേ ചത്താരി, അവിഗതേ ദ്വേ (ഏവം ഗണേതബ്ബം).

അനുലോമം.

പച്ചനീയുദ്ധാരോ

൨൫. അജ്ഝത്താരമ്മണോ ധമ്മോ അജ്ഝത്താരമ്മണസ്സ ധമ്മസ്സ ആരമ്മണപച്ചയേന പച്ചയോ… സഹജാതപച്ചയേന പച്ചയോ… ഉപനിസ്സയപച്ചയേന പച്ചയോ… കമ്മപച്ചയേന പച്ചയോ. (൧)

അജ്ഝത്താരമ്മണോ ധമ്മോ ബഹിദ്ധാരമ്മണസ്സ ധമ്മസ്സ ആരമ്മണപച്ചയേന പച്ചയോ… ഉപനിസ്സയപച്ചയേന പച്ചയോ… കമ്മപച്ചയേന പച്ചയോ. (൨)

ബഹിദ്ധാരമ്മണോ ധമ്മോ ബഹിദ്ധാരമ്മണസ്സ ധമ്മസ്സ ആരമ്മണപച്ചയേന പച്ചയോ… സഹജാതപച്ചയേന പച്ചയോ… ഉപനിസ്സയപച്ചയേന പച്ചയോ… കമ്മപച്ചയേന പച്ചയോ. (൧)

ബഹിദ്ധാരമ്മണോ ധമ്മോ അജ്ഝത്താരമ്മണസ്സ ധമ്മസ്സ ആരമ്മണപച്ചയേന പച്ചയോ… ഉപനിസ്സയപച്ചയേന പച്ചയോ… കമ്മപച്ചയേന പച്ചയോ. (൨)

൨. പച്ചയപച്ചനീയം

൨. സങ്ഖ്യാവാരോ

൨൬. നഹേതുയാ ചത്താരി, നആരമ്മണേ ചത്താരി, നഅധിപതിയാ ചത്താരി, നഅനന്തരേ ചത്താരി (സംഖിത്തം, സബ്ബത്ഥ ചത്താരി), നപുരേജാതേ നപച്ഛാജാതേ നആസേവനേ…പേ… നവിപ്പയുത്തേ ചത്താരി…പേ… നോഅവിഗതേ ചത്താരി (ഏവം ഗണേതബ്ബം).

പച്ചനീയം.

൩. പച്ചയാനുലോമപച്ചനീയം

൨൭. ഹേതുപച്ചയാ നആരമ്മണേ ദ്വേ, നഅധിപതിയാ ദ്വേ, നഅനന്തരേ നസമനന്തരേ നഉപനിസ്സയേ നആസേവനേ നകമ്മേ…പേ… നോനത്ഥിയാ നോവിഗതേ ദ്വേ (സബ്ബത്ഥ ദ്വേ. ഏവം ഗണേതബ്ബം).

അനുലോമപച്ചനീയം.

൪. പച്ചയപച്ചനീയാനുലോമം

൨൮. നഹേതുപച്ചയാ ആരമ്മണേ ചത്താരി, അധിപതിയാ തീണി, അനന്തരേ ചത്താരി, സമനന്തരേ ചത്താരി, സഹജാതേ അഞ്ഞമഞ്ഞേ നിസ്സയേ ദ്വേ, ഉപനിസ്സയേ ചത്താരി, ആസേവനേ തീണി, കമ്മേ ചത്താരി, വിപാകേ ദ്വേ…പേ… സമ്പയുത്തേ ദ്വേ, അത്ഥിയാ ദ്വേ, നത്ഥിയാ ചത്താരി, വിഗതേ ചത്താരി, അവിഗതേ ദ്വേ (ഏവം ഗണേതബ്ബം).

പച്ചനീയാനുലോമം.

പഞ്ഹാവാരോ.

അജ്ഝത്താരമ്മണത്തികം നിട്ഠിതം.