൧. വിഭങ്ഗവാരോ

ഹേതുപച്ചയോ

൧. അതീതാരമ്മണം ധമ്മം പടിച്ച അതീതാരമ്മണോ ധമ്മോ ഉപ്പജ്ജതി ഹേതുപച്ചയാ – അതീതാരമ്മണം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ. പടിസന്ധിക്ഖണേ അതീതാരമ്മണം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ പടിച്ച ദ്വേ ഖന്ധാ. (൧)

൨. അനാഗതാരമ്മണം ധമ്മം പടിച്ച അനാഗതാരമ്മണോ ധമ്മോ ഉപ്പജ്ജതി ഹേതുപച്ചയാ – അനാഗതാരമ്മണം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധാ. (൧)

൩. പച്ചുപ്പന്നാരമ്മണം ധമ്മം പടിച്ച പച്ചുപ്പന്നാരമ്മണോ ധമ്മോ ഉപ്പജ്ജതി ഹേതുപച്ചയാ – പച്ചുപ്പന്നാരമ്മണം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധാ. പടിസന്ധിക്ഖണേ പച്ചുപ്പന്നാരമ്മണം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധാ. (൧)

ആരമ്മണപച്ചയാദി

൪. അതീതാരമ്മണം ധമ്മം പടിച്ച അതീതാരമ്മണോ ധമ്മോ ഉപ്പജ്ജതി ആരമ്മണപച്ചയാ… അധിപതിപച്ചയാ (അധിപതിയാ പടിസന്ധി നത്ഥി)… അനന്തരപച്ചയാ… സമനന്തരപച്ചയാ… സഹജാതപച്ചയാ… അഞ്ഞമഞ്ഞപച്ചയാ… നിസ്സയപച്ചയാ… ഉപനിസ്സയപച്ചയാ… പുരേജാതപച്ചയാ… ആസേവനപച്ചയാ (പുരേജാതേപി ആസേവനേപി പടിസന്ധി നത്ഥി)… കമ്മപച്ചയാ… വിപാകപച്ചയാ (വിപാകം അതീതാരമ്മണം ഏകം ഖന്ധം, തിസ്സോപി പഞ്ഹാ പരിപുണ്ണാ. പവത്തിപടിസന്ധി കാതബ്ബാ)… ആഹാരപച്ചയാ… ഇന്ദ്രിയപച്ചയാ… ഝാനപച്ചയാ… മഗ്ഗപച്ചയാ… സമ്പയുത്തപച്ചയാ… വിപ്പയുത്തപച്ചയാ… അത്ഥിപച്ചയാ… നത്ഥിപച്ചയാ… വിഗതപച്ചയാ… അവിഗതപച്ചയാ.