൧. വിഭങ്ഗവാരോ

ഹേതുപച്ചയോ

൧൯. അതീതാരമ്മണോ ധമ്മോ അതീതാരമ്മണസ്സ ധമ്മസ്സ ഹേതുപച്ചയേന പച്ചയോ – അതീതാരമ്മണാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. പടിസന്ധിക്ഖണേ അതീതാരമ്മണാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. (൧)

അനാഗതാരമ്മണോ ധമ്മോ അനാഗതാരമ്മണസ്സ ധമ്മസ്സ ഹേതുപച്ചയേന പച്ചയോ – അനാഗതാരമ്മണാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. (൧)

പച്ചുപ്പന്നാരമ്മണോ ധമ്മോ പച്ചുപ്പന്നാരമ്മണസ്സ ധമ്മസ്സ ഹേതുപച്ചയേന പച്ചയോ – പച്ചുപ്പന്നാരമ്മണാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. പടിസന്ധിക്ഖണേ പച്ചുപ്പന്നാരമ്മണാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. (൧)

ആരമ്മണപച്ചയോ

൨൦. അതീതാരമ്മണോ ധമ്മോ അതീതാരമ്മണസ്സ ധമ്മസ്സ ആരമ്മണപച്ചയേന പച്ചയോ – അതീതം വിഞ്ഞാണഞ്ചായതനം പച്ചവേക്ഖതി, നേവസഞ്ഞാനാസഞ്ഞായതനം പച്ചവേക്ഖതി. അതീതാരമ്മണം അതീതം ഇദ്ധിവിധഞാണം പച്ചവേക്ഖതി, ചേതോപരിയഞാണം… പുബ്ബേനിവാസാനുസ്സതിഞാണം… യഥാകമ്മൂപഗഞാണം പച്ചവേക്ഖതി. അരിയാ അതീതാരമ്മണേ പഹീനേ കിലേസേ പച്ചവേക്ഖന്തി, വിക്ഖമ്ഭിതേ കിലേസേ പച്ചവേക്ഖന്തി, പുബ്ബേ സമുദാചിണ്ണേ കിലേസേ ജാനന്തി. അതീതാരമ്മണേ അതീതേ ഖന്ധേ അനിച്ചതോ ദുക്ഖതോ അനത്തതോ വിപസ്സതി, അസ്സാദേതി അഭിനന്ദതി; തം ആരബ്ഭ അതീതാരമ്മണോ രാഗോ ഉപ്പജ്ജതി, ദിട്ഠി…പേ… വിചികിച്ഛാ…പേ… ഉദ്ധച്ചം…പേ… ദോമനസ്സം ഉപ്പജ്ജതി. അതീതാരമ്മണാ അതീതാ ഖന്ധാ ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, ആവജ്ജനായ ആരമ്മണപച്ചയേന പച്ചയോ. (൧)

അതീതാരമ്മണോ ധമ്മോ അനാഗതാരമ്മണസ്സ ധമ്മസ്സ ആരമ്മണപച്ചയേന പച്ചയോ – അനാഗതം വിഞ്ഞാണഞ്ചായതനം പച്ചവേക്ഖതി, നേവസഞ്ഞാനാസഞ്ഞായതനം പച്ചവേക്ഖതി. അതീതാരമ്മണം അനാഗതം ഇദ്ധിവിധഞാണം പച്ചവേക്ഖതി, ചേതോപരിയഞാണം…പേ… പുബ്ബേനിവാസാനുസ്സതിഞാണം…പേ… യഥാകമ്മൂപഗഞാണം പച്ചവേക്ഖതി. അതീതാരമ്മണേ അനാഗതേ ഖന്ധേ അനിച്ചതോ…പേ… വിപസ്സതി, അസ്സാദേതി അഭിനന്ദതി; തം ആരബ്ഭ അനാഗതാരമ്മണോ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. അതീതാരമ്മണാ അനാഗതാ ഖന്ധാ ചേതോപരിയഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൨)

അതീതാരമ്മണോ ധമ്മോ പച്ചുപ്പന്നാരമ്മണസ്സ ധമ്മസ്സ ആരമ്മണപച്ചയേന പച്ചയോ – ചേതോപരിയഞാണേന അതീതാരമ്മണപച്ചുപ്പന്നചിത്തസമങ്ഗിസ്സ ചിത്തം ജാനാതി. അതീതാരമ്മണാ പച്ചുപ്പന്നാ ഖന്ധാ ചേതോപരിയഞാണസ്സ, ആവജ്ജനായ ആരമ്മണപച്ചയേന പച്ചയോ. (൩)

൨൧. അനാഗതാരമ്മണോ ധമ്മോ അനാഗതാരമ്മണസ്സ ധമ്മസ്സ ആരമ്മണപച്ചയേന പച്ചയോ – അനാഗതാരമ്മണം അനാഗതം ഇദ്ധിവിധഞാണം പച്ചവേക്ഖതി, ചേതോപരിയഞാണം…പേ… അനാഗതംസഞാണം…പേ… അനാഗതാരമ്മണേ അനാഗതേ ഖന്ധേ അനിച്ചതോ…പേ… വിപസ്സതി, അസ്സാദേതി അഭിനന്ദതി; തം ആരബ്ഭ അനാഗതാരമ്മണോ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. അനാഗതാരമ്മണാ അനാഗതാ ഖന്ധാ ചേതോപരിയഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൧)

അനാഗതാരമ്മണോ ധമ്മോ അതീതാരമ്മണസ്സ ധമ്മസ്സ ആരമ്മണപച്ചയേന പച്ചയോ – അനാഗതാരമ്മണം അതീതം ഇദ്ധിവിധഞാണം പച്ചവേക്ഖതി, ചേതോപരിയഞാണം… അനാഗതംസഞാണം…പേ… അരിയാ അനാഗതാരമ്മണേ പഹീനേ കിലേസേ പച്ചവേക്ഖന്തി, വിക്ഖമ്ഭിതേ കിലേസേ പച്ചവേക്ഖന്തി. പുബ്ബേ സമുദാചിണ്ണേ കിലേസേ ജാനന്തി. അനാഗതാരമ്മണേ അതീതേ ഖന്ധേ അനിച്ചതോ…പേ… വിപസ്സതി, അസ്സാദേതി അഭിനന്ദതി; തം ആരബ്ഭ അതീതാരമ്മണോ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. അനാഗതാരമ്മണാ അതീതാ ഖന്ധാ ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, ആവജ്ജനായ ആരമ്മണപച്ചയേന പച്ചയോ. (൨)

അനാഗതാരമ്മണോ ധമ്മോ പച്ചുപ്പന്നാരമ്മണസ്സ ധമ്മസ്സ ആരമ്മണപച്ചയേന പച്ചയോ – ചേതോപരിയഞാണേന അനാഗതാരമ്മണപച്ചുപ്പന്നചിത്തസമങ്ഗിസ്സ ചിത്തം ജാനാതി. അനാഗതാരമ്മണാ പച്ചുപ്പന്നാ ഖന്ധാ ചേതോപരിയഞാണസ്സ, ആവജ്ജനായ ആരമ്മണപച്ചയേന പച്ചയോ. (൩)

൨൨. പച്ചുപ്പന്നാരമ്മണോ ധമ്മോ പച്ചുപ്പന്നാരമ്മണസ്സ ധമ്മസ്സ ആരമ്മണപച്ചയേന പച്ചയോ – ചേതോപരിയഞാണേന പച്ചുപ്പന്നാരമ്മണപച്ചുപ്പന്നചിത്തസമങ്ഗിസ്സ ചിത്തം ജാനാതി. പച്ചുപ്പന്നാരമ്മണാ പച്ചുപ്പന്നാ ഖന്ധാ ചേതോപരിയഞാണസ്സ, ആവജ്ജനായ ആരമ്മണപച്ചയേന പച്ചയോ. (൧)

പച്ചുപ്പന്നാരമ്മണോ ധമ്മോ അതീതാരമ്മണസ്സ ധമ്മസ്സ ആരമ്മണപച്ചയേന പച്ചയോ – അതീതം ദിബ്ബം ചക്ഖും പച്ചവേക്ഖതി, ദിബ്ബം സോതധാതും പച്ചവേക്ഖതി, പച്ചുപ്പന്നാരമ്മണം അതീതം ഇദ്ധിവിധഞാണം പച്ചവേക്ഖതി, ചേതോപരിയഞാണം പച്ചവേക്ഖതി. അരിയാ പച്ചുപ്പന്നാരമ്മണേ പഹീനേ കിലേസേ പച്ചവേക്ഖന്തി, വിക്ഖമ്ഭിതേ കിലേസേ പച്ചവേക്ഖന്തി, പുബ്ബേ സമുദാചിണ്ണേ കിലേസേ ജാനന്തി. പച്ചുപ്പന്നാരമ്മണേ അതീതേ ഖന്ധേ അനിച്ചതോ…പേ… വിപസ്സതി, അസ്സാദേതി അഭിനന്ദതി; തം ആരബ്ഭ അതീതാരമ്മണോ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. പച്ചുപ്പന്നാരമ്മണാ അതീതാ ഖന്ധാ ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, ആവജ്ജനായ ആരമ്മണപച്ചയേന പച്ചയോ. (൨)

പച്ചുപ്പന്നാരമ്മണോ ധമ്മോ അനാഗതാരമ്മണസ്സ ധമ്മസ്സ ആരമ്മണപച്ചയേന പച്ചയോ – അനാഗതം ദിബ്ബം ചക്ഖും പച്ചവേക്ഖതി, ദിബ്ബം സോതധാതും പച്ചവേക്ഖതി, പച്ചുപ്പന്നാരമ്മണം അനാഗതം ഇദ്ധിവിധഞാണം പച്ചവേക്ഖതി, ചേതോപരിയഞാണം…പേ… പച്ചുപ്പന്നാരമ്മണേ അനാഗതേ ഖന്ധേ അനിച്ചതോ…പേ… വിപസ്സതി…പേ… തം ആരബ്ഭ അനാഗതാരമ്മണോ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. പച്ചുപ്പന്നാരമ്മണാ അനാഗതാ ഖന്ധാ ചേതോപരിയഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൩)

അധിപതിപച്ചയോ

൨൩. അതീതാരമ്മണോ ധമ്മോ അതീതാരമ്മണസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – അതീതം വിഞ്ഞാണഞ്ചായതനം ഗരും കത്വാ പച്ചവേക്ഖതി, നേവസഞ്ഞാനാസഞ്ഞായതനം ഗരും കത്വാ പച്ചവേക്ഖതി. അതീതാരമ്മണം അതീതം ഇദ്ധിവിധഞാണം ഗരും കത്വാ പച്ചവേക്ഖതി, ചേതോപരിയഞാണം…പേ… പുബ്ബേനിവാസാനുസ്സതിഞാണം…പേ… യഥാകമ്മൂപഗഞാണം ഗരും കത്വാ പച്ചവേക്ഖതി. അതീതാരമ്മണേ അതീതേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ അതീതാരമ്മണോ രാഗോ ഉപ്പജ്ജതി, ദിട്ഠി ഉപ്പജ്ജതി. സഹജാതാധിപതി – അതീതാരമ്മണാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (൧)

അതീതാരമ്മണോ ധമ്മോ അനാഗതാരമ്മണസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി – അനാഗതം വിഞ്ഞാണഞ്ചായതനം ഗരും കത്വാ…പേ… നേവസഞ്ഞാനാസഞ്ഞായതനം …പേ… അതീതാരമ്മണം അനാഗതം ഇദ്ധിവിധഞാണം ഗരും കത്വാ…പേ… ചേതോപരിയഞാണം…പേ… പുബ്ബേനിവാസാനുസ്സതിഞാണം…പേ… യഥാകമ്മൂപഗഞാണം…പേ… അതീതാരമ്മണേ അനാഗതേ ഖന്ധേ ഗരും കത്വാ അസ്സാദേതി അഭിനന്ദതി; തം ഗരും കത്വാ അനാഗതാരമ്മണോ രാഗോ ഉപ്പജ്ജതി, ദിട്ഠി ഉപ്പജ്ജതി. (൨)

൨൪. അനാഗതാരമ്മണോ ധമ്മോ അനാഗതാരമ്മണസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – അനാഗതാരമ്മണം അനാഗതം ഇദ്ധിവിധഞാണം ഗരും കത്വാ…പേ… ചേതോപരിയഞാണം…പേ… അനാഗതംസഞാണം ഗരും കത്വാ പച്ചവേക്ഖതി. അനാഗതാരമ്മണേ അനാഗതേ ഖന്ധേ ഗരും കത്വാ അസ്സാദേതി അഭിനന്ദതി; തം ഗരും കത്വാ അനാഗതാരമ്മണോ രാഗോ ഉപ്പജ്ജതി, ദിട്ഠി ഉപ്പജ്ജതി. സഹജാതാധിപതി – അനാഗതാരമ്മണാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (൧)

അനാഗതാരമ്മണോ ധമ്മോ അതീതാരമ്മണസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി – അനാഗതാരമ്മണം അതീതം ഇദ്ധിവിധഞാണം ഗരും കത്വാ…പേ… ചേതോപരിയഞാണം…പേ… അനാഗതംസഞാണം ഗരും കത്വാ…പേ… അനാഗതാരമ്മണേ അതീതേ ഖന്ധേ ഗരും കത്വാ അസ്സാദേതി അഭിനന്ദതി; തം ഗരും കത്വാ അതീതാരമ്മണോ രാഗോ ഉപ്പജ്ജതി, ദിട്ഠി ഉപ്പജ്ജതി. (൨)

൨൫. പച്ചുപ്പന്നാരമ്മണോ ധമ്മോ പച്ചുപ്പന്നാരമ്മണസ്സ ധമ്മസ്സ അധിപതിപച്ചയേന പച്ചയോ. സഹജാതാധിപതി – പച്ചുപ്പന്നാരമ്മണാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (൧)

പച്ചുപ്പന്നാരമ്മണോ ധമ്മോ അതീതാരമ്മണസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി – അതീതം ദിബ്ബം ചക്ഖും ഗരും കത്വാ പച്ചവേക്ഖതി, ദിബ്ബം സോതധാതും ഗരും കത്വാ പച്ചവേക്ഖതി, പച്ചുപ്പന്നാരമ്മണം അതീതം ഇദ്ധിവിധഞാണം ഗരും കത്വാ…പേ… ചേതോപരിയഞാണം ഗരും കത്വാ…പേ… പച്ചുപ്പന്നാരമ്മണേ അതീതേ ഖന്ധേ ഗരും കത്വാ അസ്സാദേതി അഭിനന്ദതി; തം ഗരും കത്വാ അതീതാരമ്മണോ രാഗോ ഉപ്പജ്ജതി, ദിട്ഠി ഉപ്പജ്ജതി. (൨)

പച്ചുപ്പന്നാരമ്മണോ ധമ്മോ അനാഗതാരമ്മണസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി – അനാഗതം ദിബ്ബം ചക്ഖും ഗരും കത്വാ പച്ചവേക്ഖതി, ദിബ്ബം സോതധാതും ഗരും കത്വാ …പേ… പച്ചുപ്പന്നാരമ്മണം അനാഗതം ഇദ്ധിവിധഞാണം ഗരും കത്വാ…പേ… ചേതോപരിയഞാണം ഗരും കത്വാ…പേ… പച്ചുപ്പന്നാരമ്മണേ അനാഗതേ ഖന്ധേ ഗരും കത്വാ അസ്സാദേതി അഭിനന്ദതി; തം ഗരും കത്വാ അനാഗതാരമ്മണോ രാഗോ ഉപ്പജ്ജതി, ദിട്ഠി ഉപ്പജ്ജതി. (൩)

അനന്തരപച്ചയോ

൨൬. അതീതാരമ്മണോ ധമ്മോ അതീതാരമ്മണസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ അതീതാരമ്മണാ ഖന്ധാ പച്ഛിമാനം പച്ഛിമാനം അതീതാരമ്മണാനം ഖന്ധാനം അനന്തരപച്ചയേന പച്ചയോ. (൧)

അതീതാരമ്മണോ ധമ്മോ അനാഗതാരമ്മണസ്സ ധമ്മസ്സ അനന്തരപച്ചയേന പച്ചയോ – അതീതാരമ്മണം ഭവങ്ഗം അനാഗതാരമ്മണായ ആവജ്ജനായ അനന്തരപച്ചയേന പച്ചയോ. (൨)

അതീതാരമ്മണോ ധമ്മോ പച്ചുപ്പന്നാരമ്മണസ്സ ധമ്മസ്സ അനന്തരപച്ചയേന പച്ചയോ – അതീതാരമ്മണം ചുതിചിത്തം പച്ചുപ്പന്നാരമ്മണസ്സ പടിസന്ധിചിത്തസ്സ അനന്തരപച്ചയേന പച്ചയോ. അതീതാരമ്മണം ഭവങ്ഗം പച്ചുപ്പന്നാരമ്മണായ ആവജ്ജനായ അനന്തരപച്ചയേന പച്ചയോ. (൩)

൨൭. അനാഗതാരമ്മണോ ധമ്മോ അനാഗതാരമ്മണസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ അനാഗതാരമ്മണാ ഖന്ധാ പച്ഛിമാനം പച്ഛിമാനം അനാഗതാരമ്മണാനം ഖന്ധാനം അനന്തരപച്ചയേന പച്ചയോ. (൧)

അനാഗതാരമ്മണോ ധമ്മോ അതീതാരമ്മണസ്സ ധമ്മസ്സ അനന്തരപച്ചയേന പച്ചയോ – അനാഗതാരമ്മണം ഇദ്ധിവിധഞാണം അതീതാരമ്മണസ്സ വുട്ഠാനസ്സ…പേ… ചേതോപരിയഞാണം അതീതാരമ്മണസ്സ വുട്ഠാനസ്സ…പേ… അനാഗതംസഞാണം അതീതാരമ്മണസ്സ വുട്ഠാനസ്സ…പേ… അനാഗതാരമ്മണാ ഖന്ധാ അതീതാരമ്മണസ്സ വുട്ഠാനസ്സ അനന്തരപച്ചയേന പച്ചയോ. (൨)

൨൮. പച്ചുപ്പന്നാരമ്മണോ ധമ്മോ പച്ചുപ്പന്നാരമ്മണസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ പച്ചുപ്പന്നാരമ്മണാ ഖന്ധാ പച്ഛിമാനം പച്ഛിമാനം പച്ചുപ്പന്നാരമ്മണാനം ഖന്ധാനം അനന്തരപച്ചയേന പച്ചയോ. പച്ചുപ്പന്നാരമ്മണം പടിസന്ധിചിത്തം പച്ചുപ്പന്നാരമ്മണസ്സ ഭവങ്ഗസ്സ…പേ… പച്ചുപ്പന്നാരമ്മണം ഭവങ്ഗം പച്ചുപ്പന്നാരമ്മണസ്സ ഭവങ്ഗസ്സ അനന്തരപച്ചയേന പച്ചയോ. (൧)

പച്ചുപ്പന്നാരമ്മണോ ധമ്മോ അതീതാരമ്മണസ്സ ധമ്മസ്സ അനന്തരപച്ചയേന പച്ചയോ – പച്ചുപ്പന്നാരമ്മണം പടിസന്ധിചിത്തം അതീതാരമ്മണസ്സ ഭവങ്ഗസ്സ…പേ… പച്ചുപ്പന്നാരമ്മണം ഭവങ്ഗം അതീതാരമ്മണസ്സ ഭവങ്ഗസ്സ…പേ… പച്ചുപ്പന്നാരമ്മണാ ഖന്ധാ അതീതാരമ്മണസ്സ വുട്ഠാനസ്സ അനന്തരപച്ചയേന പച്ചയോ. (൨)

സമനന്തരപച്ചയോ

൨൯. അതീതാരമ്മണോ ധമ്മോ അതീതാരമ്മണസ്സ ധമ്മസ്സ സമനന്തരപച്ചയേന പച്ചയോ (അനന്തരസദിസം).

സഹജാതപച്ചയാദി

൩൦. അതീതാരമ്മണോ ധമ്മോ അതീതാരമ്മണസ്സ ധമ്മസ്സ സഹജാതപച്ചയേന പച്ചയോ… അഞ്ഞമഞ്ഞപച്ചയേന പച്ചയോ… നിസ്സയപച്ചയേന പച്ചയോ…(തയോപി പച്ചയാ പടിച്ചവാരസദിസാ).

ഉപനിസ്സയപച്ചയോ

൩൧. അതീതാരമ്മണോ ധമ്മോ അതീതാരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – അതീതാരമ്മണാ അനിച്ചാനുപസ്സനാ, ദുക്ഖാനുപസ്സനാ, അനത്താനുപസ്സനാ അതീതാരമ്മണായ അനിച്ചാനുപസ്സനായ, ദുക്ഖാനുപസ്സനായ, അനത്താനുപസ്സനായ ഉപനിസ്സയപച്ചയേന പച്ചയോ. (൧)

അതീതാരമ്മണോ ധമ്മോ അനാഗതാരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – അതീതാരമ്മണാ അനിച്ചാനുപസ്സനാ, ദുക്ഖാനുപസ്സനാ, അനത്താനുപസ്സനാ അനാഗതാരമ്മണായ അനിച്ചാനുപസ്സനായ, ദുക്ഖാനുപസ്സനായ, അനത്താനുപസ്സനായ ഉപനിസ്സയപച്ചയേന പച്ചയോ. (൨)

അതീതാരമ്മണോ ധമ്മോ പച്ചുപ്പന്നാരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – അതീതാരമ്മണാ അനിച്ചാനുപസ്സനാ, ദുക്ഖാനുപസ്സനാ, അനത്താനുപസ്സനാ പച്ചുപ്പന്നാരമ്മണായ അനിച്ചാനുപസ്സനായ, ദുക്ഖാനുപസ്സനായ, അനത്താനുപസ്സനായ ഉപനിസ്സയപച്ചയേന പച്ചയോ. (൩)

൩൨. അനാഗതാരമ്മണോ ധമ്മോ അനാഗതാരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – അനാഗതാരമ്മണാ അനിച്ചാനുപസ്സനാ, ദുക്ഖാനുപസ്സനാ, അനത്താനുപസ്സനാ അനാഗതാരമ്മണായ അനിച്ചാനുപസ്സനായ, ദുക്ഖാനുപസ്സനായ, അനത്താനുപസ്സനായ ഉപനിസ്സയപച്ചയേന പച്ചയോ. (൧)

അനാഗതാരമ്മണോ ധമ്മോ അതീതാരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – അനാഗതാരമ്മണാ അനിച്ചാനുപസ്സനാ, ദുക്ഖാനുപസ്സനാ, അനത്താനുപസ്സനാ അതീതാരമ്മണായ അനിച്ചാനുപസ്സനായ, ദുക്ഖാനുപസ്സനായ, അനത്താനുപസ്സനായ ഉപനിസ്സയപച്ചയേന പച്ചയോ. (൨)

അനാഗതാരമ്മണോ ധമ്മോ പച്ചുപ്പന്നാരമ്മണസ്സ ധമ്മസ്സ ഉപനിസ്സയപച്ചയേന പച്ചയോ. പകതൂപനിസ്സയോ – അനാഗതാരമ്മണാ അനിച്ചാനുപസ്സനാ, ദുക്ഖാനുപസ്സനാ, അനത്താനുപസ്സനാ പച്ചുപ്പന്നാരമ്മണായ അനിച്ചാനുപസ്സനായ, ദുക്ഖാനുപസ്സനായ, അനത്താനുപസ്സനായ ഉപനിസ്സയപച്ചയേന പച്ചയോ. (൩)

൩൩. പച്ചുപ്പന്നാരമ്മണോ ധമ്മോ പച്ചുപ്പന്നാരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – പച്ചുപ്പന്നാരമ്മണാ അനിച്ചാനുപസ്സനാ, ദുക്ഖാനുപസ്സനാ, അനത്താനുപസ്സനാ പച്ചുപ്പന്നാരമ്മണായ അനിച്ചാനുപസ്സനായ, ദുക്ഖാനുപസ്സനായ, അനത്താനുപസ്സനായ ഉപനിസ്സയപച്ചയേന പച്ചയോ. (൧)

പച്ചുപ്പന്നാരമ്മണോ ധമ്മോ അതീതാരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – പച്ചുപ്പന്നാരമ്മണാ അനിച്ചാനുപസ്സനാ, ദുക്ഖാനുപസ്സനാ, അനത്താനുപസ്സനാ അതീതാരമ്മണായ അനിച്ചാനുപസ്സനായ, ദുക്ഖാനുപസ്സനായ, അനത്താനുപസ്സനായ ഉപനിസ്സയപച്ചയേന പച്ചയോ. (൨)

പച്ചുപ്പന്നാരമ്മണോ ധമ്മോ അനാഗതാരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – പച്ചുപ്പന്നാരമ്മണാ അനിച്ചാനുപസ്സനാ, ദുക്ഖാനുപസ്സനാ, അനത്താനുപസ്സനാ അനാഗതാരമ്മണായ അനിച്ചാനുപസ്സനായ, ദുക്ഖാനുപസ്സനായ, അനത്താനുപസ്സനായ ഉപനിസ്സയപച്ചയേന പച്ചയോ. (൩)

ആസേവനപച്ചയോ

൩൪. അതീതാരമ്മണോ ധമ്മോ അതീതാരമ്മണസ്സ ധമ്മസ്സ ആസേവനപച്ചയേന പച്ചയോ – പുരിമാ പുരിമാ അതീതാരമ്മണാ ഖന്ധാ പച്ഛിമാനം പച്ഛിമാനം അതീതാരമ്മണാനം ഖന്ധാനം ആസേവനപച്ചയേന പച്ചയോ. (൧)

അനാഗതാരമ്മണോ ധമ്മോ അനാഗതാരമ്മണസ്സ ധമ്മസ്സ ആസേവനപച്ചയേന പച്ചയോ – പുരിമാ പുരിമാ അനാഗതാരമ്മണാ ഖന്ധാ പച്ഛിമാനം പച്ഛിമാനം അനാഗതാരമ്മണാനം ഖന്ധാനം ആസേവനപച്ചയേന പച്ചയോ. (൧)

പച്ചുപ്പന്നാരമ്മണോ ധമ്മോ പച്ചുപ്പന്നാരമ്മണസ്സ ധമ്മസ്സ ആസേവനപച്ചയേന പച്ചയോ – പുരിമാ പുരിമാ പച്ചുപ്പന്നാരമ്മണാ ഖന്ധാ പച്ഛിമാനം പച്ഛിമാനം പച്ചുപ്പന്നാരമ്മണാനം ഖന്ധാനം ആസേവനപച്ചയേന പച്ചയോ. (൧)

കമ്മപച്ചയോ

൩൫. അതീതാരമ്മണോ ധമ്മോ അതീതാരമ്മണസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – അതീതാരമ്മണാ ചേതനാ സമ്പയുത്തകാനം ഖന്ധാനം കമ്മപച്ചയേന പച്ചയോ. പടിസന്ധിക്ഖണേ…പേ…. നാനാക്ഖണികാ – അതീതാരമ്മണാ ചേതനാ വിപാകാനം അതീതാരമ്മണാനം ഖന്ധാനം കമ്മപച്ചയേന പച്ചയോ. (൧)

അതീതാരമ്മണോ ധമ്മോ അനാഗതാരമ്മണസ്സ ധമ്മസ്സ കമ്മപച്ചയേന പച്ചയോ. നാനാക്ഖണികാ – അതീതാരമ്മണാ ചേതനാ വിപാകാനം അനാഗതാരമ്മണാനം ഖന്ധാനം കമ്മപച്ചയേന പച്ചയോ. (൨)

അതീതാരമ്മണോ ധമ്മോ പച്ചുപ്പന്നാരമ്മണസ്സ ധമ്മസ്സ കമ്മപച്ചയേന പച്ചയോ. നാനാക്ഖണികാ – അതീതാരമ്മണാ ചേതനാ വിപാകാനം പച്ചുപ്പന്നാരമ്മണാനം ഖന്ധാനം കമ്മപച്ചയേന പച്ചയോ. (൩)

൩൬. അനാഗതാരമ്മണോ ധമ്മോ അനാഗതാരമ്മണസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – അനാഗതാരമ്മണാ ചേതനാ സമ്പയുത്തകാനം ഖന്ധാനം കമ്മപച്ചയേന പച്ചയോ. നാനാക്ഖണികാ – അനാഗതാരമ്മണാ ചേതനാ വിപാകാനം അനാഗതാരമ്മണാനം ഖന്ധാനം കമ്മപച്ചയേന പച്ചയോ. (൧)

അനാഗതാരമ്മണോ ധമ്മോ അതീതാരമ്മണസ്സ ധമ്മസ്സ കമ്മപച്ചയേന പച്ചയോ. നാനാക്ഖണികാ – അനാഗതാരമ്മണാ ചേതനാ വിപാകാനം അതീതാരമ്മണാനം ഖന്ധാനം കമ്മപച്ചയേന പച്ചയോ. (൨)

അനാഗതാരമ്മണോ ധമ്മോ പച്ചുപ്പന്നാരമ്മണസ്സ ധമ്മസ്സ കമ്മപച്ചയേന പച്ചയോ. നാനാക്ഖണികാ – അനാഗതാരമ്മണാ ചേതനാ വിപാകാനം പച്ചുപ്പന്നാരമ്മണാനം ഖന്ധാനം കമ്മപച്ചയേന പച്ചയോ. (൩)

൩൭. പച്ചുപ്പന്നാരമ്മണോ ധമ്മോ പച്ചുപ്പന്നാരമ്മണസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – പച്ചുപ്പന്നാരമ്മണാ ചേതനാ സമ്പയുത്തകാനം ഖന്ധാനം കമ്മപച്ചയേന പച്ചയോ. പടിസന്ധിക്ഖണേ…പേ… നാനാക്ഖണികാ – പച്ചുപ്പന്നാരമ്മണാ ചേതനാ വിപാകാനം പച്ചുപ്പന്നാരമ്മണാനം ഖന്ധാനം കമ്മപച്ചയേന പച്ചയോ. (൧)

പച്ചുപ്പന്നാരമ്മണോ ധമ്മോ അതീതാരമ്മണസ്സ ധമ്മസ്സ കമ്മപച്ചയേന പച്ചയോ. നാനാക്ഖണികാ – പച്ചുപ്പന്നാരമ്മണാ ചേതനാ വിപാകാനം അതീതാരമ്മണാനം ഖന്ധാനം കമ്മപച്ചയേന പച്ചയോ. (൨)

പച്ചുപ്പന്നാരമ്മണോ ധമ്മോ അനാഗതാരമ്മണസ്സ ധമ്മസ്സ കമ്മപച്ചയേന പച്ചയോ. നാനാക്ഖണികാ – പച്ചുപ്പന്നാരമ്മണാ ചേതനാ വിപാകാനം അനാഗതാരമ്മണാനം ഖന്ധാനം കമ്മപച്ചയേന പച്ചയോ. (൩)

വിപാകപച്ചയാദി

൩൮. അതീതാരമ്മണോ ധമ്മോ അതീതാരമ്മണസ്സ ധമ്മസ്സ വിപാകപച്ചയേന പച്ചയോ… ആഹാരപച്ചയേന പച്ചയോ… ഇന്ദ്രിയപച്ചയേന പച്ചയോ… ഝാനപച്ചയേന പച്ചയോ… മഗ്ഗപച്ചയേന പച്ചയോ… സമ്പയുത്തപച്ചയേന പച്ചയോ… അത്ഥിപച്ചയേന പച്ചയോ… നത്ഥിപച്ചയേന പച്ചയോ… വിഗതപച്ചയേന പച്ചയോ… അവിഗതപച്ചയേന പച്ചയോ.