൧. വിഭങ്ഗവാരോ

ഹേതുപച്ചയോ

൧൩. പരിത്താരമ്മണോ ധമ്മോ പരിത്താരമ്മണസ്സ ധമ്മസ്സ ഹേതുപച്ചയേന പച്ചയോ – പരിത്താരമ്മണാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. പടിസന്ധിക്ഖണേ പരിത്താരമ്മണാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. (൧)

മഹഗ്ഗതാരമ്മണോ ധമ്മോ മഹഗ്ഗതാരമ്മണസ്സ ധമ്മസ്സ ഹേതുപച്ചയേന പച്ചയോ – മഹഗ്ഗതാരമ്മണാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. പടിസന്ധിക്ഖണേ…പേ…. (൧)

അപ്പമാണാരമ്മണോ ധമ്മോ അപ്പമാണാരമ്മണസ്സ ധമ്മസ്സ ഹേതുപച്ചയേന പച്ചയോ – അപ്പമാണാരമ്മണാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. (൧)

ആരമ്മണപച്ചയോ

൧൪. പരിത്താരമ്മണോ ധമ്മോ പരിത്താരമ്മണസ്സ ധമ്മസ്സ ആരമ്മണപച്ചയേന പച്ചയോ – ദാനം ദത്വാ സീലം സമാദിയിത്വാ ഉപോസഥകമ്മം കത്വാ തം പച്ചവേക്ഖതി, പുബ്ബേ സുചിണ്ണാനി പച്ചവേക്ഖതി, അരിയാ പരിത്താരമ്മണേ പഹീനേ കിലേസേ പച്ചവേക്ഖന്തി, വിക്ഖമ്ഭിതേ കിലേസേ പച്ചവേക്ഖന്തി, പുബ്ബേ സമുദാചിണ്ണേ കിലേസേ ജാനന്തി. പരിത്താരമ്മണേ പരിത്തേ ഖന്ധേ അനിച്ചതോ ദുക്ഖതോ അനത്തതോ വിപസ്സതി, അസ്സാദേതി അഭിനന്ദതി, തം ആരബ്ഭ പരിത്താരമ്മണോ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. ചേതോപരിയഞാണേന പരിത്താരമ്മണപരിത്തചിത്തസമങ്ഗിസ്സ ചിത്തം ജാനാതി. പരിത്താരമ്മണാ പരിത്താ ഖന്ധാ ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൧)

പരിത്താരമ്മണോ ധമ്മോ മഹഗ്ഗതാരമ്മണസ്സ ധമ്മസ്സ ആരമ്മണപച്ചയേന പച്ചയോ – ദിബ്ബം ചക്ഖും പച്ചവേക്ഖതി, ദിബ്ബം സോതധാതും പച്ചവേക്ഖതി, പരിത്താരമ്മണം ഇദ്ധിവിധഞാണം പച്ചവേക്ഖതി, ചേതോപരിയഞാണം…പേ… പുബ്ബേനിവാസാനുസ്സതിഞാണം…പേ… യഥാകമ്മൂപഗഞാണം…പേ… അനാഗതംസഞാണം പച്ചവേക്ഖതി. പരിത്താരമ്മണേ മഹഗ്ഗതേ ഖന്ധേ അനിച്ചതോ…പേ… വിപസ്സതി, അസ്സാദേതി അഭിനന്ദതി, തം ആരബ്ഭ മഹഗ്ഗതാരമ്മണോ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. ചേതോപരിയഞാണേന പരിത്താരമ്മണമഹഗ്ഗതചിത്തസമങ്ഗിസ്സ ചിത്തം ജാനാതി. പരിത്താരമ്മണാ മഹഗ്ഗതാ ഖന്ധാ ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൨)

൧൫. മഹഗ്ഗതാരമ്മണോ ധമ്മോ മഹഗ്ഗതാരമ്മണസ്സ ധമ്മസ്സ ആരമ്മണപച്ചയേന പച്ചയോ – വിഞ്ഞാണഞ്ചായതനം പച്ചവേക്ഖതി, നേവസഞ്ഞാനാസഞ്ഞായതനം പച്ചവേക്ഖതി, മഹഗ്ഗതാരമ്മണം ഇദ്ധിവിധഞാണം പച്ചവേക്ഖതി, ചേതോപരിയഞാണം…പേ… പുബ്ബേനിവാസാനുസ്സതിഞാണം…പേ… യഥാകമ്മൂപഗഞാണം…പേ… അനാഗതംസഞാണം പച്ചവേക്ഖതി. മഹഗ്ഗതാരമ്മണേ മഹഗ്ഗതേ ഖന്ധേ അനിച്ചതോ…പേ… വിപസ്സതി, അസ്സാദേതി അഭിനന്ദതി, തം ആരബ്ഭ മഹഗ്ഗതാരമ്മണോ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. ചേതോപരിയഞാണേന മഹഗ്ഗതാരമ്മണമഹഗ്ഗതചിത്തസമങ്ഗിസ്സ ചിത്തം ജാനാതി. മഹഗ്ഗതാരമ്മണാ മഹഗ്ഗതാ ഖന്ധാ ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൧)

മഹഗ്ഗതാരമ്മണോ ധമ്മോ പരിത്താരമ്മണസ്സ ധമ്മസ്സ ആരമ്മണപച്ചയേന പച്ചയോ – പഠമജ്ഝാനപച്ചവേക്ഖണം പച്ചവേക്ഖതി…പേ… നേവസഞ്ഞാനാസഞ്ഞായതനപച്ചവേക്ഖണം പച്ചവേക്ഖതി, ദിബ്ബചക്ഖുപച്ചവേക്ഖണം പച്ചവേക്ഖതി, ദിബ്ബസോതധാതുപച്ചവേക്ഖണം പച്ചവേക്ഖതി, ഇദ്ധിവിധഞാണപച്ചവേക്ഖണം…പേ… ചേതോപരിയഞാണപച്ചവേക്ഖണം…പേ… പുബ്ബേനിവാസാനുസ്സതിഞാണപച്ചവേക്ഖണം…പേ… യഥാകമ്മൂപഗഞാണപച്ചവേക്ഖണം…പേ… അനാഗതംസഞാണപച്ചവേക്ഖണം പച്ചവേക്ഖതി, അരിയാ മഹഗ്ഗതാരമ്മണേ പഹീനേ കിലേസേ പച്ചവേക്ഖന്തി, വിക്ഖമ്ഭിതേ കിലേസേ പച്ചവേക്ഖന്തി, പുബ്ബേ സമുദാചിണ്ണേ കിലേസേ ജാനന്തി. മഹഗ്ഗതാരമ്മണേ പരിത്തേ ഖന്ധേ അനിച്ചതോ…പേ… വിപസ്സതി, അസ്സാദേതി അഭിനന്ദതി, തം ആരബ്ഭ പരിത്താരമ്മണോ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. ചേതോപരിയഞാണേന മഹഗ്ഗതാരമ്മണപരിത്തചിത്തസമങ്ഗിസ്സ ചിത്തം ജാനാതി. മഹഗ്ഗതാരമ്മണാ പരിത്താ ഖന്ധാ ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൨)

൧൬. അപ്പമാണാരമ്മണോ ധമ്മോ അപ്പമാണാരമ്മണസ്സ ധമ്മസ്സ ആരമ്മണപച്ചയേന പച്ചയോ – അരിയാ മഗ്ഗാ വുട്ഠഹിത്വാ മഗ്ഗം പച്ചവേക്ഖന്തി, ഫലം പച്ചവേക്ഖന്തി. ചേതോപരിയഞാണേന അപ്പമാണാരമ്മണഅപ്പമാണചിത്തസമങ്ഗിസ്സ ചിത്തം ജാനാതി. അപ്പമാണാരമ്മണാ അപ്പമാണാ ഖന്ധാ ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൧)

അപ്പമാണാരമ്മണോ ധമ്മോ പരിത്താരമ്മണസ്സ ധമ്മസ്സ ആരമ്മണപച്ചയേന പച്ചയോ – അരിയാ ഗോത്രഭും പച്ചവേക്ഖന്തി, വോദാനം പച്ചവേക്ഖന്തി, മഗ്ഗപച്ചവേക്ഖണം പച്ചവേക്ഖന്തി, ഫലപച്ചവേക്ഖണം പച്ചവേക്ഖന്തി, നിബ്ബാനപച്ചവേക്ഖണം പച്ചവേക്ഖന്തി. അപ്പമാണാരമ്മണേ പരിത്തേ ഖന്ധേ അനിച്ചതോ…പേ… വിപസ്സതി, ചേതോപരിയഞാണേന അപ്പമാണാരമ്മണപരിത്തചിത്തസമങ്ഗിസ്സ ചിത്തം ജാനാതി. അപ്പമാണാരമ്മണാ പരിത്താ ഖന്ധാ ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ ആവജ്ജനായ ആരമ്മണപച്ചയേന പച്ചയോ. (൨)

അപ്പമാണാരമ്മണോ ധമ്മോ മഹഗ്ഗതാരമ്മണസ്സ ധമ്മസ്സ ആരമ്മണപച്ചയേന പച്ചയോ – അരിയാ അപ്പമാണാരമ്മണം ചേതോപരിയഞാണം പച്ചവേക്ഖന്തി, പുബ്ബേനിവാസാനുസ്സതിഞാണം പച്ചവേക്ഖന്തി, അനാഗതംസഞാണം പച്ചവേക്ഖന്തി. ചേതോപരിയഞാണേന അപ്പമാണാരമ്മണമഹഗ്ഗതചിത്തസമങ്ഗിസ്സ ചിത്തം ജാനന്തി. അപ്പമാണാരമ്മണം മഹഗ്ഗതാ ഖന്ധാ ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൩)

അധിപതിപച്ചയോ

൧൭. പരിത്താരമ്മണോ ധമ്മോ പരിത്താരമ്മണസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ദാനം ദത്വാ സീലം സമാദിയിത്വാ ഉപോസഥകമ്മം കത്വാ തം ഗരും കത്വാ പച്ചവേക്ഖതി, പുബ്ബേ സുചിണ്ണാനി ഗരും കത്വാ പച്ചവേക്ഖതി, പരിത്താരമ്മണേ പരിത്തേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ പരിത്താരമ്മണോ രാഗോ ഉപ്പജ്ജതി, ദിട്ഠി ഉപ്പജ്ജതി. സഹജാതാധിപതി – പരിത്താരമ്മണാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (൧)

പരിത്താരമ്മണോ ധമ്മോ മഹഗ്ഗതാരമ്മണസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി – ദിബ്ബം ചക്ഖും ഗരും കത്വാ പച്ചവേക്ഖതി, ദിബ്ബം സോതധാതും…പേ… പരിത്താരമ്മണം ഇദ്ധിവിധഞാണം…പേ… ചേതോപരിയഞാണം…പേ… പുബ്ബേനിവാസാനുസ്സതിഞാണം…പേ… യഥാകമ്മൂപഗഞാണം…പേ… അനാഗതംസഞാണം ഗരും കത്വാ പച്ചവേക്ഖതി. പരിത്താരമ്മണേ മഹഗ്ഗതേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ മഹഗ്ഗതാരമ്മണോ രാഗോ ഉപ്പജ്ജതി, ദിട്ഠി ഉപ്പജ്ജതി. (൨)

൧൮. മഹഗ്ഗതാരമ്മണോ ധമ്മോ മഹഗ്ഗതാരമ്മണസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – വിഞ്ഞാണഞ്ചായതനം ഗരും കത്വാ പച്ചവേക്ഖതി, നേവസഞ്ഞാനാസഞ്ഞായതനം…പേ… മഹഗ്ഗതാരമ്മണം ഇദ്ധിവിധഞാണം…പേ… ചേതോപരിയഞാണം …പേ… പുബ്ബേനിവാസാനുസ്സതിഞാണം…പേ… യഥാകമ്മൂപഗഞാണം…പേ… അനാഗതംസഞാണം ഗരും കത്വാ പച്ചവേക്ഖതി. മഹഗ്ഗതാരമ്മണേ മഹഗ്ഗതേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ മഹഗ്ഗതാരമ്മണോ രാഗോ ഉപ്പജ്ജതി, ദിട്ഠി ഉപ്പജ്ജതി. സഹജാതാധിപതി – മഹഗ്ഗതാരമ്മണാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (൧)

മഹഗ്ഗതാരമ്മണോ ധമ്മോ പരിത്താരമ്മണസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി – പഠമജ്ഝാനപച്ചവേക്ഖണം ഗരും കത്വാ പച്ചവേക്ഖതി…പേ… അനാഗതംസഞാണപച്ചവേക്ഖണം ഗരും കത്വാ പച്ചവേക്ഖതി. മഹഗ്ഗതാരമ്മണേ പരിത്തേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ പരിത്താരമ്മണോ രാഗോ ഉപ്പജ്ജതി, ദിട്ഠി ഉപ്പജ്ജതി. (൨)

൧൯. അപ്പമാണാരമ്മണോ ധമ്മോ അപ്പമാണാരമ്മണസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – അരിയാ മഗ്ഗാ വുട്ഠഹിത്വാ മഗ്ഗം ഗരും കത്വാ പച്ചവേക്ഖന്തി, ഫലം ഗരും കത്വാ പച്ചവേക്ഖന്തി. സഹജാതാധിപതി – അപ്പമാണാരമ്മണാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (൧)

അപ്പമാണാരമ്മണോ ധമ്മോ പരിത്താരമ്മണസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി – സേക്ഖാ ഗോത്രഭും ഗരും കത്വാ പച്ചവേക്ഖന്തി, വോദാനം ഗരും കത്വാ പച്ചവേക്ഖന്തി, മഗ്ഗപച്ചവേക്ഖണം ഗരും കത്വാ പച്ചവേക്ഖന്തി, ഫലപച്ചവേക്ഖണം ഗരും കത്വാ പച്ചവേക്ഖന്തി, നിബ്ബാനപച്ചവേക്ഖണം ഗരും കത്വാ പച്ചവേക്ഖന്തി. (൨)

അപ്പമാണാരമ്മണോ ധമ്മോ മഹഗ്ഗതാരമ്മണസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി – സേക്ഖാ അപ്പമാണാരമ്മണം ചേതോപരിയഞാണം ഗരും കത്വാ പച്ചവേക്ഖന്തി. പുബ്ബേനിവാസാനുസ്സതിഞാണം…പേ… അനാഗതംസഞാണം ഗരും കത്വാ പച്ചവേക്ഖന്തി. (൩)

അനന്തരപച്ചയോ

൨൦. പരിത്താരമ്മണോ ധമ്മോ പരിത്താരമ്മണസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ പരിത്താരമ്മണാ ഖന്ധാ പച്ഛിമാനം പച്ഛിമാനം പരിത്താരമ്മണാനം ഖന്ധാനം അനന്തരപച്ചയേന പച്ചയോ. (൧)

പരിത്താരമ്മണോ ധമ്മോ മഹഗ്ഗതാരമ്മണസ്സ ധമ്മസ്സ അനന്തരപച്ചയേന പച്ചയോ – പരിത്താരമ്മണം ചുതിചിത്തം മഹഗ്ഗതാരമ്മണസ്സ ഉപപത്തിചിത്തസ്സ അനന്തരപച്ചയേന പച്ചയോ. പരിത്താരമ്മണം ഭവങ്ഗം മഹഗ്ഗതാരമ്മണായ ആവജ്ജനായ അനന്തരപച്ചയേന പച്ചയോ. പരിത്താരമ്മണാ ഖന്ധാ മഹഗ്ഗതാരമ്മണസ്സ വുട്ഠാനസ്സ അനന്തരപച്ചയേന പച്ചയോ. (൨)

പരിത്താരമ്മണോ ധമ്മോ അപ്പമാണാരമ്മണസ്സ ധമ്മസ്സ അനന്തരപച്ചയേന പച്ചയോ – പരിത്താരമ്മണം ഭവങ്ഗം അപ്പമാണാരമ്മണായ ആവജ്ജനായ അനന്തരപച്ചയേന പച്ചയോ. പരിത്താരമ്മണം അനുലോമം ഗോത്രഭുസ്സ… അനുലോമം വോദാനസ്സ… അനുലോമം ഫലസമാപത്തിയാ അനന്തരപച്ചയേന പച്ചയോ. (൩)

൨൧. മഹഗ്ഗതാരമ്മണോ ധമ്മോ മഹഗ്ഗതാരമ്മണസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ മഹഗ്ഗതാരമ്മണാ ഖന്ധാ പച്ഛിമാനം പച്ഛിമാനം മഹഗ്ഗതാരമ്മണാനം ഖന്ധാനം അനന്തരപച്ചയേന പച്ചയോ. (൧)

മഹഗ്ഗതാരമ്മണോ ധമ്മോ പരിത്താരമ്മണസ്സ ധമ്മസ്സ അനന്തരപച്ചയേന പച്ചയോ – മഹഗ്ഗതാരമ്മണം ചുതിചിത്തം പരിത്താരമ്മണസ്സ ഉപപത്തിചിത്തസ്സ അനന്തരപച്ചയേന പച്ചയോ. മഹഗ്ഗതാരമ്മണം ഭവങ്ഗം പരിത്താരമ്മണായ ആവജ്ജനായ അനന്തരപച്ചയേന പച്ചയോ. മഹഗ്ഗതാരമ്മണാ ഖന്ധാ പരിത്താരമ്മണസ്സ വുട്ഠാനസ്സ അനന്തരപച്ചയേന പച്ചയോ. (൨)

മഹഗ്ഗതാരമ്മണോ ധമ്മോ അപ്പമാണാരമ്മണസ്സ ധമ്മസ്സ അനന്തരപച്ചയേന പച്ചയോ – മഹഗ്ഗതാരമ്മണം ഭവങ്ഗം അപ്പമാണാരമ്മണായ ആവജ്ജനായ അനന്തരപച്ചയേന പച്ചയോ. മഹഗ്ഗതാരമ്മണം അനുലോമം ഗോത്രഭുസ്സ… അനുലോമം വോദാനസ്സ… അനുലോമം ഫലസമാപത്തിയാ… നിരോധാ വുട്ഠഹന്തസ്സ നേവസഞ്ഞാനാസഞ്ഞായതനം ഫലസമാപത്തിയാ അനന്തരപച്ചയേന പച്ചയോ. (൩)

൨൨. അപ്പമാണാരമ്മണോ ധമ്മോ അപ്പമാണാരമ്മണസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ അപ്പമാണാരമ്മണാ ഖന്ധാ പച്ഛിമാനം പച്ഛിമാനം അപ്പമാണാരമ്മണാനം ഖന്ധാനം അനന്തരപച്ചയേന പച്ചയോ. ഗോത്രഭു മഗ്ഗസ്സ… വോദാനം മഗ്ഗസ്സ… മഗ്ഗോ ഫലസ്സ… ഫലം ഫലസ്സ അനന്തരപച്ചയേന പച്ചയോ. (൧)

അപ്പമാണാരമ്മണോ ധമ്മോ പരിത്താരമ്മണസ്സ ധമ്മസ്സ അനന്തരപച്ചയേന പച്ചയോ – മഗ്ഗപച്ചവേക്ഖണം പരിത്താരമ്മണസ്സ വുട്ഠാനസ്സ… ഫലപച്ചവേക്ഖണം പരിത്താരമ്മണസ്സ വുട്ഠാനസ്സ… നിബ്ബാനപച്ചവേക്ഖണം പരിത്താരമ്മണസ്സ വുട്ഠാനസ്സ… അപ്പമാണാരമ്മണം ചേതോപരിയഞാണം പരിത്താരമ്മണസ്സ വുട്ഠാനസ്സ… പുബ്ബേനിവാസാനുസ്സതിഞാണം പരിത്താരമ്മണസ്സ വുട്ഠാനസ്സ… അനാഗതംസഞാണം പരിത്താരമ്മണസ്സ വുട്ഠാനസ്സ… ഫലം പരിത്താരമ്മണസ്സ വുട്ഠാനസ്സ അനന്തരപച്ചയേന പച്ചയോ. (൨)

അപ്പമാണാരമ്മണോ ധമ്മോ മഹഗ്ഗതാരമ്മണസ്സ ധമ്മസ്സ അനന്തരപച്ചയേന പച്ചയോ – മഗ്ഗപച്ചവേക്ഖണം മഹഗ്ഗതാരമ്മണസ്സ വുട്ഠാനസ്സ… ഫലപച്ചവേക്ഖണം മഹഗ്ഗതാരമ്മണസ്സ വുട്ഠാനസ്സ… നിബ്ബാനപച്ചവേക്ഖണം മഹഗ്ഗതാരമ്മണസ്സ വുട്ഠാനസ്സ… ഫലം മഹഗ്ഗതാരമ്മണസ്സ വുട്ഠാനസ്സ അനന്തരപച്ചയേന പച്ചയോ. (൩)

സമനന്തരപച്ചയോ

൨൩. പരിത്താരമ്മണോ ധമ്മോ പരിത്താരമ്മണസ്സ ധമ്മസ്സ സമനന്തരപച്ചയേന പച്ചയോ (അനന്തരസദിസം).

സഹജാതപച്ചയാദി

൨൪. പരിത്താരമ്മണോ ധമ്മോ പരിത്താരമ്മണസ്സ ധമ്മസ്സ സഹജാതപച്ചയേന പച്ചയോ… അഞ്ഞമഞ്ഞപച്ചയേന പച്ചയോ… നിസ്സയപച്ചയേന പച്ചയോ… തീണി (പടിച്ചവാരസദിസാ കാതബ്ബാ).

ഉപനിസ്സയപച്ചയോ

൨൫. പരിത്താരമ്മണോ ധമ്മോ പരിത്താരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – പരിത്താരമ്മണം സദ്ധം ഉപനിസ്സായ ദാനം ദേതി, സീലം…പേ… ഉപോസഥകമ്മം…പേ… പരിത്താരമ്മണം ഝാനം ഉപ്പാദേതി, വിപസ്സനം…പേ… അഭിഞ്ഞം…പേ… സമാപത്തിം ഉപ്പാദേതി, മാനം ജപ്പേതി, ദിട്ഠിം ഗണ്ഹാതി. പരിത്താരമ്മണം സീലം…പേ… പഞ്ഞം… രാഗം ദോസം… മോഹം… മാനം… ദിട്ഠിം… പത്ഥനം… കായികം സുഖം… കായികം ദുക്ഖം ഉപനിസ്സായ ദാനം ദേതി, സീലം…പേ… ഉപോസഥകമ്മം…പേ… പരിത്താരമ്മണം ഝാനം ഉപ്പാദേതി, വിപസ്സനം…പേ… അഭിഞ്ഞം…പേ… സമാപത്തിം ഉപ്പാദേതി, പാണം ഹനതി…പേ… സങ്ഘം ഭിന്ദതി. പരിത്താരമ്മണാ സദ്ധാ…പേ… പഞ്ഞാ, രാഗോ…പേ… പത്ഥനാ, കായികം സുഖം… കായികം ദുക്ഖം… പരിത്താരമ്മണായ സദ്ധായ…പേ… പഞ്ഞായ രാഗസ്സ…പേ… പത്ഥനായ, കായികസ്സ സുഖസ്സ, കായികസ്സ ദുക്ഖസ്സ ഉപനിസ്സയപച്ചയേന പച്ചയോ. (൧)

പരിത്താരമ്മണോ ധമ്മോ മഹഗ്ഗതാരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – പരിത്താരമ്മണം സദ്ധം ഉപനിസ്സായ മഹഗ്ഗതാരമ്മണം ഝാനം ഉപ്പാദേതി, വിപസ്സനം…പേ… അഭിഞ്ഞം…പേ… സമാപത്തിം ഉപ്പാദേതി, മാനം ജപ്പേതി, ദിട്ഠിം ഗണ്ഹാതി. പരിത്താരമ്മണം സീലം…പേ… പഞ്ഞം… രാഗം…പേ… പത്ഥനം… കായികം സുഖം, കായികം ദുക്ഖം ഉപനിസ്സായ മഹഗ്ഗതാരമ്മണം ഝാനം ഉപ്പാദേതി, വിപസ്സനം…പേ… അഭിഞ്ഞം…പേ… സമാപത്തിം ഉപ്പാദേതി, മാനം ജപ്പേതി, ദിട്ഠിം ഗണ്ഹാതി. പരിത്താരമ്മണാ സദ്ധാ…പേ… കായികം സുഖം, കായികം ദുക്ഖം, മഹഗ്ഗതാരമ്മണായ സദ്ധായ…പേ… പഞ്ഞായ രാഗസ്സ…പേ… പത്ഥനായ ഉപനിസ്സയപച്ചയേന പച്ചയോ. (൨)

പരിത്താരമ്മണോ ധമ്മോ അപ്പമാണാരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – പരിത്താരമ്മണം സദ്ധം ഉപനിസ്സായ അപ്പമാണാരമ്മണം ഝാനം ഉപ്പാദേതി, മഗ്ഗം…പേ… അഭിഞ്ഞം…പേ… സമാപത്തിം ഉപ്പാദേതി. പരിത്താരമ്മണം സീലം…പേ… പഞ്ഞം, രാഗം…പേ… കായികം സുഖം, കായികം ദുക്ഖം ഉപനിസ്സായ അപ്പമാണാരമ്മണം ഝാനം ഉപ്പാദേതി, മഗ്ഗം… അഭിഞ്ഞം… സമാപത്തിം ഉപ്പാദേതി. പരിത്താരമ്മണാ സദ്ധാ…പേ… കായികം സുഖം, കായികം ദുക്ഖം അപ്പമാണാരമ്മണായ സദ്ധായ…പേ… പഞ്ഞായ ഉപനിസ്സയപച്ചയേന പച്ചയോ. (൩)

൨൬. മഹഗ്ഗതാരമ്മണോ ധമ്മോ മഹഗ്ഗതാരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – മഹഗ്ഗതാരമ്മണം സദ്ധം ഉപനിസ്സായ മഹഗ്ഗതാരമ്മണം ഝാനം ഉപ്പാദേതി, വിപസ്സനം… അഭിഞ്ഞം… സമാപത്തിം ഉപ്പാദേതി, മാനം ജപ്പേതി, ദിട്ഠിം ഗണ്ഹാതി. മഹഗ്ഗതാരമ്മണം സീലം…പേ… പഞ്ഞം, രാഗം…പേ… പത്ഥനം ഉപനിസ്സായ മഹഗ്ഗതാരമ്മണം ഝാനം ഉപ്പാദേതി…പേ… ദിട്ഠിം ഗണ്ഹാതി. മഹഗ്ഗതാരമ്മണാ സദ്ധാ…പേ… പഞ്ഞാ, രാഗോ…പേ… പത്ഥനാ മഹഗ്ഗതാരമ്മണായ സദ്ധായ…പേ… പത്ഥനായ ഉപനിസ്സയപച്ചയേന പച്ചയോ. (൧)

മഹഗ്ഗതാരമ്മണോ ധമ്മോ പരിത്താരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – മഹഗ്ഗതാരമ്മണം സദ്ധം ഉപനിസ്സായ ദാനം ദേതി, സീലം സമാദിയതി, ഉപോസഥകമ്മം കരോതി, പരിത്താരമ്മണം ഝാനം ഉപ്പാദേതി, വിപസ്സനം… അഭിഞ്ഞം… സമാപത്തിം ഉപ്പാദേതി, മാനം ജപ്പേതി, ദിട്ഠിം ഗണ്ഹാതി. മഹഗ്ഗതാരമ്മണം സീലം…പേ… പത്ഥനം ഉപനിസ്സായ ദാനം ദേതി…പേ… ദിട്ഠിം ഗണ്ഹാതി. മഹഗ്ഗതാരമ്മണാ സദ്ധാ…പേ… പത്ഥനാ പരിത്താരമ്മണായ സദ്ധായ…പേ… പത്ഥനായ കായികസ്സ സുഖസ്സ, കായികസ്സ ദുക്ഖസ്സ ഉപനിസ്സയപച്ചയേന പച്ചയോ. (൨)

മഹഗ്ഗതാരമ്മണോ ധമ്മോ അപ്പമാണാരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – മഹഗ്ഗതാരമ്മണം സദ്ധം ഉപനിസ്സായ അപ്പമാണാരമ്മണം ഝാനം ഉപ്പാദേതി, മഗ്ഗം… അഭിഞ്ഞം… സമാപത്തിം ഉപ്പാദേതി. മഹഗ്ഗതാരമ്മണം സീലം…പേ… പത്ഥനം ഉപനിസ്സായ അപ്പമാണാരമ്മണം ഝാനം ഉപ്പാദേതി…പേ… സമാപത്തിം ഉപ്പാദേതി. മഹഗ്ഗതാരമ്മണാ സദ്ധാ…പേ… പത്ഥനാ അപ്പമാണാരമ്മണായ സദ്ധായ…പേ… പഞ്ഞായ ഉപനിസ്സയപച്ചയേന പച്ചയോ (൩)

൨൭. അപ്പമാണാരമ്മണോ ധമ്മോ അപ്പമാണാരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – അപ്പമാണാരമ്മണം സദ്ധം ഉപനിസ്സായ അപ്പമാണാരമ്മണം ഝാനം ഉപ്പാദേതി, മഗ്ഗം… അഭിഞ്ഞം… സമാപത്തിം ഉപ്പാദേതി. അപ്പമാണാരമ്മണം സീലം…പേ… പഞ്ഞം ഉപനിസ്സായ അപ്പമാണാരമ്മണം ഝാനം ഉപ്പാദേതി. മഗ്ഗം…പേ… അഭിഞ്ഞം…പേ… സമാപത്തിം ഉപ്പാദേതി അപ്പമാണാരമ്മണാ സദ്ധാ…പേ… പഞ്ഞാ അപ്പമാണാരമ്മണായ സദ്ധായ…പേ… പഞ്ഞായ മഗ്ഗസ്സ ഫലസമാപത്തിയാ ഉപനിസ്സയപച്ചയേന പച്ചയോ. (൧)

അപ്പമാണാരമ്മണോ ധമ്മോ പരിത്താരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – അപ്പമാണാരമ്മണം സദ്ധം ഉപനിസ്സായ ദാനം ദേതി, സീലം സമാദിയതി, ഉപോസഥകമ്മം കരോതി, പരിത്താരമ്മണം ഝാനം ഉപ്പാദേതി, വിപസ്സനം… അഭിഞ്ഞം… സമാപത്തിം ഉപ്പാദേതി. അപ്പമാണാരമ്മണം സീലം…പേ… പഞ്ഞം ഉപനിസ്സായ ദാനം ദേതി…പേ… സമാപത്തിം ഉപ്പാദേതി. അപ്പമാണാരമ്മണാ സദ്ധാ…പേ… പഞ്ഞാ പരിത്താരമ്മണായ സദ്ധായ…പേ… പഞ്ഞായ കായികസ്സ സുഖസ്സ, കായികസ്സ ദുക്ഖസ്സ ഉപനിസ്സയപച്ചയേന പച്ചയോ. (൨)

അപ്പമാണാരമ്മണോ ധമ്മോ മഹഗ്ഗതാരമ്മണസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – അപ്പമാണാരമ്മണം സദ്ധം ഉപനിസ്സായ മഹഗ്ഗതാരമ്മണം ഝാനം ഉപ്പാദേതി, വിപസ്സനം… അഭിഞ്ഞം… സമാപത്തിം ഉപ്പാദേതി. അപ്പമാണാരമ്മണം സീലം…പേ… പഞ്ഞം ഉപനിസ്സായ മഹഗ്ഗതാരമ്മണം ഝാനം ഉപ്പാദേതി, വിപസ്സനം… അഭിഞ്ഞം… സമാപത്തിം ഉപ്പാദേതി. അപ്പമാണാരമ്മണാ സദ്ധാ…പേ… പഞ്ഞാ മഹഗ്ഗതാരമ്മണായ സദ്ധായ…പേ… പഞ്ഞായ ഉപനിസ്സയപച്ചയേന പച്ചയോ. (൩)

ആസേവനപച്ചയോ

൨൮. പരിത്താരമ്മണോ ധമ്മോ പരിത്താരമ്മണസ്സ ധമ്മസ്സ ആസേവനപച്ചയേന പച്ചയോ – പുരിമാ പുരിമാ പരിത്താരമ്മണാ ഖന്ധാ പച്ഛിമാനം പച്ഛിമാനം പരിത്താരമ്മണാനം ഖന്ധാനം ആസേവനപച്ചയേന പച്ചയോ. (൧)

പരിത്താരമ്മണോ ധമ്മോ അപ്പമാണാരമ്മണസ്സ ധമ്മസ്സ ആസേവനപച്ചയേന പച്ചയോ – പരിത്താരമ്മണം അനുലോമം ഗോത്രഭുസ്സ… അനുലോമം വോദാനസ്സ ആസേവനപച്ചയേന പച്ചയോ. (൨)

൨൯. മഹഗ്ഗതാരമ്മണോ ധമ്മോ മഹഗ്ഗതാരമ്മണസ്സ ധമ്മസ്സ ആസേവനപച്ചയേന പച്ചയോ – പുരിമാ പുരിമാ മഹഗ്ഗതാരമ്മണാ ഖന്ധാ പച്ഛിമാനം പച്ഛിമാനം മഹഗ്ഗതാരമ്മണാനം ഖന്ധാനം ആസേവനപച്ചയേന പച്ചയോ. (൧)

മഹഗ്ഗതാരമ്മണോ ധമ്മോ അപ്പമാണാരമ്മണസ്സ ധമ്മസ്സ ആസേവനപച്ചയേന പച്ചയോ – മഹഗ്ഗതാരമ്മണം അനുലോമം ഗോത്രഭുസ്സ… അനുലോമം വോദാനസ്സ ആസേവനപച്ചയേന പച്ചയോ. (൨)

൩൦. അപ്പമാണാരമ്മണോ ധമ്മോ അപ്പമാണാരമ്മണസ്സ ധമ്മസ്സ ആസേവനപച്ചയേന പച്ചയോ – പുരിമാ പുരിമാ അപ്പമാണാരമ്മണാ ഖന്ധാ പച്ഛിമാനം പച്ഛിമാനം അപ്പമാണാരമ്മണാനം ഖന്ധാനം ആസേവനപച്ചയേന പച്ചയോ. ഗോത്രഭു മഗ്ഗസ്സ… വോദാനം മഗ്ഗസ്സ ആസേവനപച്ചയേന പച്ചയോ. (൧)

കമ്മപച്ചയോ

൩൧. പരിത്താരമ്മണോ ധമ്മോ പരിത്താരമ്മണസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – പരിത്താരമ്മണാ ചേതനാ സമ്പയുത്തകാനം ഖന്ധാനം കമ്മപച്ചയേന പച്ചയോ. പടിസന്ധിക്ഖണേ…പേ…. നാനാക്ഖണികാ – പരിത്താരമ്മണാ ചേതനാ വിപാകാനം പരിത്താരമ്മണാനം ഖന്ധാനം കമ്മപച്ചയേന പച്ചയോ. (൧)

മഹഗ്ഗതാരമ്മണോ ധമ്മോ മഹഗ്ഗതാരമ്മണസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – മഹഗ്ഗതാരമ്മണാ ചേതനാ സമ്പയുത്തകാനം ഖന്ധാനം കമ്മപച്ചയേന പച്ചയോ. പടിസന്ധിക്ഖണേ…പേ…. നാനാക്ഖണികാ – മഹഗ്ഗതാരമ്മണാ ചേതനാ വിപാകാനം മഹഗ്ഗതാരമ്മണാനം ഖന്ധാനം കമ്മപച്ചയേന പച്ചയോ. (൧)

മഹഗ്ഗതാരമ്മണോ ധമ്മോ പരിത്താരമ്മണസ്സ ധമ്മസ്സ കമ്മപച്ചയേന പച്ചയോ. നാനാക്ഖണികാ – മഹഗ്ഗതാരമ്മണാ ചേതനാ വിപാകാനം പരിത്താരമ്മണാനം ഖന്ധാനം കമ്മപച്ചയേന പച്ചയോ. (൨)

൩൨. അപ്പമാണാരമ്മണോ ധമ്മോ അപ്പമാണാരമ്മണസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – അപ്പമാണാരമ്മണാ ചേതനാ സമ്പയുത്തകാനം ഖന്ധാനം കമ്മപച്ചയേന പച്ചയോ. നാനാക്ഖണികാ – അപ്പമാണാരമ്മണാ ചേതനാ വിപാകാനം അപ്പമാണാരമ്മണാനം ഖന്ധാനം കമ്മപച്ചയേന പച്ചയോ. (൧)

അപ്പമാണാരമ്മണോ ധമ്മോ പരിത്താരമ്മണസ്സ ധമ്മസ്സ കമ്മപച്ചയേന പച്ചയോ. നാനാക്ഖണികാ – അപ്പമാണാരമ്മണാ ചേതനാ വിപാകാനം പരിത്താരമ്മണാനം ഖന്ധാനം കമ്മപച്ചയേന പച്ചയോ. (൨)

വിപാകപച്ചയാദി

൩൩. പരിത്താരമ്മണോ ധമ്മോ പരിത്താരമ്മണസ്സ ധമ്മസ്സ വിപാകപച്ചയേന പച്ചയോ… ആഹാരപച്ചയേന പച്ചയോ… ഇന്ദ്രിയപച്ചയേന പച്ചയോ… ഝാനപച്ചയേന പച്ചയോ… മഗ്ഗപച്ചയേന പച്ചയോ… സമ്പയുത്തപച്ചയേന പച്ചയ… അത്ഥിപച്ചയേന പച്ചയോ… നത്ഥിപച്ചയേന പച്ചയോ… വിഗതപച്ചയേന പച്ചയ… അവിഗതപച്ചയേന പച്ചയോ.