൧. വിഭങ്ഗവാരോ

ഹേതുപച്ചയോ

൫൧. ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ ഹേതുപച്ചയേന പച്ചയോ – ഉപാദിന്നുപാദാനിയാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ; പടിസന്ധിക്ഖണേ ഉപാദിന്നുപാദാനിയാ ഹേതൂ സമ്പയുത്തകാനം ഖന്ധാനം കടത്താ ച രൂപാനം ഹേതുപച്ചയേന പച്ചയോ. (൧)

ഉപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ ഹേതുപച്ചയേന പച്ചയോ – ഉപാദിന്നുപാദാനിയാ ഹേതൂ ചിത്തസമുട്ഠാനാനം രൂപാനം ഹേതുപച്ചയേന പച്ചയോ. (൨)

ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച ധമ്മസ്സ ഹേതുപച്ചയേന പച്ചയോ – ഉപാദിന്നുപാദാനിയാ ഹേതൂ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ. (൩)

അനുപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ ഹേതുപച്ചയേന പച്ചയോ – അനുപാദിന്നുപാദാനിയാ ഹേതൂ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ. (൧)

അനുപാദിന്നഅനുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ ഹേതുപച്ചയേന പച്ചയോ – അനുപാദിന്നഅനുപാദാനിയാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. (൧)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ ഹേതുപച്ചയേന പച്ചയോ – അനുപാദിന്നഅനുപാദാനിയാ ഹേതൂ ചിത്തസമുട്ഠാനാനം രൂപാനം ഹേതുപച്ചയേന പച്ചയോ. (൨)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ച അനുപാദിന്നഅനുപാദാനിയസ്സ ച ധമ്മസ്സ ഹേതുപച്ചയേന പച്ചയോ – അനുപാദിന്നഅനുപാദാനിയാ ഹേതൂ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ. (൩)

ആരമ്മണപച്ചയോ

൫൨. ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ ആരമ്മണപച്ചയേന പച്ചയോ – സേക്ഖാ വാ പുഥുജ്ജനാ വാ ചക്ഖും അനിച്ചതോ ദുക്ഖതോ അനത്തതോ വിപസ്സന്തി, അസ്സാദേന്തി അഭിനന്ദന്തി; തം ആരബ്ഭ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി; കുസലാകുസലേ നിരുദ്ധേ വിപാകോ തദാരമ്മണതാ ഉപ്പജ്ജതി. സോതം… ഘാനം… ജിവ്ഹം… കായം… ഉപാദിന്നുപാദാനിയേ രൂപേ… ഗന്ധേ… രസേ… ഫോട്ഠബ്ബേ… വത്ഥും… ഉപാദിന്നുപാദാനിയേ ഖന്ധേ അനിച്ചതോ ദുക്ഖതോ അനത്തതോ വിപ്പസ്സന്തി, അസ്സാദേന്തി അഭിനന്ദതി; തം ആരബ്ഭ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. കുസലാകുസലേ നിരുദ്ധേ വിപാകോ തദാരമ്മണതാ ഉപ്പജ്ജതി. ഉപാദിന്നുപാദാനിയം രൂപായതനം ചക്ഖുവിഞ്ഞാണസ്സ…പേ… ഉപാദിന്നുപാദാനിയം ഗന്ധായതനം… രസായതനം… ഫോട്ഠബ്ബായതനം കായവിഞ്ഞാണസ്സ ആരമ്മണപച്ചയേന പച്ചയോ. (൧)

ഉപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ ആരമ്മണപച്ചയേന പച്ചയോ – ചക്ഖും അനിച്ചതോ ദുക്ഖതോ അനത്തതോ വിപസ്സതി, അസ്സാദേതി അഭിനന്ദതി; തം ആരബ്ഭ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. സോതം… ഘാനം… ജിവ്ഹം… കായം… ഉപാദിന്നുപാദാനിയേ രൂപേ… ഗന്ധേ… രസേ… ഫോട്ഠബ്ബേ… വത്ഥും… ഉപാദിന്നുപാദാനിയേ ഖന്ധേ അനിച്ചതോ ദുക്ഖതോ അനത്തതോ വിപസ്സതി, അസ്സാദേതി അഭിനന്ദതി; തം ആരബ്ഭ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. ദിബ്ബേന ചക്ഖുനാ ഉപാദിന്നുപാദാനിയം രൂപം പസ്സതി, ചേതോപരിയഞാണേന ഉപാദിന്നുപാദാനിയചിത്തസമങ്ഗിസ്സ ചിത്തം ജാനാതി. ഉപാദിന്നുപാദാനിയാ ഖന്ധാ ഇദ്ധിവിധഞാണസ്സ, ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൨)

൫൩. അനുപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ ആരമ്മണപച്ചയേന പച്ചയോ – ദാനം ദത്വാ, സീലം സമാദിയിത്വാ, ഉപോസഥകമ്മം കത്വാ തം പച്ചവേക്ഖതി, പുബ്ബേ സുചിണ്ണാനി പച്ചവേക്ഖതി, ഝാനാ വുട്ഠഹിത്വാ ഝാനം പച്ചവേക്ഖതി, അരിയാ ഗോത്രഭും പച്ചവേക്ഖന്തി, വോദാനം പച്ചവേക്ഖന്തി, അരിയാ പഹീനേ കിലേസേ പച്ചവേക്ഖന്തി, വിക്ഖമ്ഭിതേ കിലേസേ പച്ചവേക്ഖന്തി, പുബ്ബേ സമുദാചിണ്ണേ കിലേസേ ജാനന്തി; അനുപാദിന്നുപാദാനിയേ രൂപേ… സദ്ദേ… ഗന്ധേ… രസേ… ഫോട്ഠബ്ബേ… അനുപാദിന്നുപാദാനിയേ ഖന്ധേ അനിച്ചതോ ദുക്ഖതോ അനത്തതോ വിപസ്സന്തി, അസ്സാദേന്തി അഭിനന്ദന്തി; തം ആരബ്ഭ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. ദിബ്ബേന ചക്ഖുനാ അനുപാദിന്നുപാദാനിയം രൂപം പസ്സന്തി, ദിബ്ബായ സോതധാതുയാ സദ്ദം സുണന്തി, ചേതോപരിയഞാണേന അനുപാദിന്നുപാദാനിയചിത്തസമങ്ഗിസ്സ ചിത്തം ജാനന്തി. ആകാസാനഞ്ചായതനം വിഞ്ഞാണഞ്ചായതനസ്സ ആരമ്മണപച്ചയേന പച്ചയോ. ആകിഞ്ചഞ്ഞായതനം നേവസഞ്ഞാനാസഞ്ഞായതനസ്സ ആരമ്മണപച്ചയേന പച്ചയോ. അനുപാദിന്നുപാദാനിയാ ഖന്ധാ ഇദ്ധിവിധഞാണസ്സ, ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൧)

അനുപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ ആരമ്മണപച്ചയേന പച്ചയോ – സേക്ഖാ വാ പുഥുജ്ജനാ വാ അനുപാദിന്നുപാദാനിയേ രൂപേ… സദ്ദേ… ഗന്ധേ… രസേ… ഫോട്ഠബ്ബേ… അനുപാദിന്നുപാദാനിയേ ഖന്ധേ അനിച്ചതോ ദുക്ഖതോ അനത്തതോ വിപസ്സന്തി, അസ്സാദേന്തി അഭിനന്ദതി; തം ആരബ്ഭ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. കുസലാകുസലേ നിരുദ്ധേ വിപാകോ തദാരമ്മണതാ ഉപ്പജ്ജതി. ആകാസാനഞ്ചായതനകുസലം വിഞ്ഞാണഞ്ചായതനവിപാകസ്സ ആരമ്മണപച്ചയേന പച്ചയോ. ആകിഞ്ചഞ്ഞായതനകുസലം നേവസഞ്ഞാനാസഞ്ഞായതനവിപാകസ്സ ആരമ്മണപച്ചയേന പച്ചയോ. അനുപാദിന്നുപാദാനിയം രൂപായതനം ചക്ഖുവിഞ്ഞാണസ്സ…പേ… ഫോട്ഠബ്ബായതനം കായവിഞ്ഞാണസ്സ ആരമ്മണപച്ചയേന പച്ചയോ. (൨)

൫൪. അനുപാദിന്നഅനുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ ആരമ്മണപച്ചയേന പച്ചയോ – നിബ്ബാനം മഗ്ഗസ്സ, ഫലസ്സ ആരമ്മണപച്ചയേന പച്ചയോ. (൧)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ ആരമ്മണപച്ചയേന പച്ചയോ – അരിയാ മഗ്ഗാ വുട്ഠഹിത്വാ മഗ്ഗം പച്ചവേക്ഖന്തി, ഫലം പച്ചവേക്ഖന്തി, നിബ്ബാനം പച്ചവേക്ഖന്തി; നിബ്ബാനം ഗോത്രഭുസ്സ, വോദാനസ്സ, ആവജ്ജനായ ആരമ്മണപച്ചയേന പച്ചയോ. അരിയാ ചേതോപരിയഞാണേന അനുപാദിന്നഅനുപാദാനിയചിത്തസമങ്ഗിസ്സ ചിത്തം ജാനന്തി; അനുപാദിന്നഅനുപാദാനിയാ ഖന്ധാ ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൨)

അധിപതിപച്ചയോ

൫൫. ഉപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി – ചക്ഖും ഗരും കത്വാ അസ്സാദേതി അഭിനന്ദതി; തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. സോതം… ഘാനം… ജിവ്ഹം… കായം… ഉപാദിന്നുപാദാനിയേ രൂപേ… ഗന്ധേ… രസേ… ഫോട്ഠബ്ബേ… വത്ഥും… ഉപാദിന്നുപാദാനിയേ ഖന്ധേ ഗരും കത്വാ അസ്സാദേതി അഭിനന്ദതി; തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. (൧)

അനുപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ദാനം ദത്വാ, സീലം സമാദിയിത്വാ, ഉപോസഥകമ്മം കത്വാ തം ഗരും കത്വാ പച്ചവേക്ഖതി, പുബ്ബേ സുചിണ്ണാനി ഗരും കത്വാ പച്ചവേക്ഖതി; ഝാനാ വുട്ഠഹിത്വാ ഝാനം ഗരും കത്വാ പച്ചവേക്ഖതി; സേക്ഖാ ഗോത്രഭും ഗരും കത്വാ പച്ചവേക്ഖന്തി, വോദാനം ഗരും കത്വാ പച്ചവേക്ഖന്തി. അനുപാദിന്നുപാദാനിയേ രൂപേ… സദ്ദേ… ഗന്ധേ… രസേ… ഫോട്ഠബ്ബേ… അനുപാദിന്നുപാദാനിയേ ഖന്ധേ ഗരും കത്വാ അസ്സാദേന്തി അഭിനന്ദന്തി; തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. സഹജാതാധിപതി – അനുപാദിന്നുപാദാനിയാധിപതി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (൧)

അനുപാദിന്നഅനുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – നിബ്ബാനം മഗ്ഗസ്സ ഫലസ്സ അധിപതിപച്ചയേന പച്ചയോ. സഹജാതാധിപതി – അനുപാദിന്നഅനുപാദാനിയാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (൧)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – അരിയാ മഗ്ഗാ വുട്ഠഹിത്വാ മഗ്ഗം ഗരും കത്വാ പച്ചവേക്ഖന്തി, ഫലം ഗരും കത്വാ പച്ചവേക്ഖന്തി, നിബ്ബാനം ഗരും കത്വാ പച്ചവേക്ഖന്തി. നിബ്ബാനം ഗോത്രഭുസ്സ, വോദാനസ്സ അധിപതിപച്ചയേന പച്ചയോ. സഹജാതാധിപതി – അനുപാദിന്നഅനുപാദാനിയാധിപതി ചിത്തസമുട്ഠാനാനം രൂപാനം അധിപതിപച്ചയേന പച്ചയോ. (൨)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ച അനുപാദിന്നഅനുപാദാനിയസ്സ ച ധമ്മസ്സ അധിപതിപച്ചയേന പച്ചയോ. സഹജാതാധിപതി – അനുപാദിന്നഅനുപാദാനിയാധിപതി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (൩)

അനന്തരപച്ചയോ

൫൬. ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ ഉപാദിന്നുപാദാനിയാ ഖന്ധാ പച്ഛിമാനം പച്ഛിമാനം ഉപാദിന്നുപാദാനിയാനം ഖന്ധാനം അനന്തരപച്ചയേന പച്ചയോ; പഞ്ചവിഞ്ഞാണം വിപാകമനോധാതുയാ അനന്തരപച്ചയേന പച്ചയോ; വിപാകമനോധാതു വിപാകമനോവിഞ്ഞാണധാതുയാ അനന്തരപച്ചയേന പച്ചയോ. (൧)

ഉപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ അനന്തരപച്ചയേന പച്ചയോ – ഭവങ്ഗം ആവജ്ജനായ, വിപാകമനോവിഞ്ഞാണധാതു കിരിയമനോവിഞ്ഞാണധാതുയാ അനന്തരപച്ചയേന പച്ചയോ. (൨)

അനുപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ അനുപാദിന്നുപാദാനിയാ ഖന്ധാ പച്ഛിമാനം പച്ഛിമാനം അനുപാദിന്നുപാദാനിയാനം ഖന്ധാനം അനന്തരപച്ചയേന പച്ചയോ; അനുലോമം ഗോത്രഭുസ്സ… അനുലോമം വോദാനസ്സ… ആവജ്ജനാ അനുപാദിന്നുപാദാനിയാനം ഖന്ധാനം അനന്തരപച്ചയേന പച്ചയോ. (൧)

അനുപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ അനന്തരപച്ചയേന പച്ചയോ – ആവജ്ജനാ പഞ്ചന്നം വിഞ്ഞാണാനം അനന്തരപച്ചയേന പച്ചയോ; അനുപാദിന്നുപാദാനിയാ ഖന്ധാ വുട്ഠാനസ്സ അനന്തരപച്ചയേന പച്ചയോ. (൨)

അനുപാദിന്നുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ അനന്തരപച്ചയേന പച്ചയോ – ഗോത്രഭു മഗ്ഗസ്സ… വോദാനം മഗ്ഗസ്സ… അനുലോമം ഫലസമാപത്തിയാ… നിരോധാ വുട്ഠഹന്തസ്സ… നേവസഞ്ഞാനാസഞ്ഞായതനം ഫലസമാപത്തിയാ അനന്തരപച്ചയേന പച്ചയോ. (൩)

അനുപാദിന്നഅനുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ അനുപാദിന്നഅനുപാദാനിയാ ഖന്ധാ പച്ഛിമാനം പച്ഛിമാനം അനുപാദിന്നഅനുപാദാനിയാനം ഖന്ധാനം അനന്തരപച്ചയേന പച്ചയോ. മഗ്ഗോ ഫലസ്സ… ഫലം ഫലസ്സ അനന്തരപച്ചയേന പച്ചയോ. (൧)

അനുപാദിന്നഅനുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ അനന്തരപച്ചയേന പച്ചയോ – ഫലം വുട്ഠാനസ്സ അനന്തരപച്ചയേന പച്ചയോ. (൨)

സമനന്തരപച്ചയോ

൫൭. ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ സമനന്തരപച്ചയേന പച്ചയോ (അനന്തരപച്ചയസദിസം).

സഹജാതപച്ചയോ

൫൮. ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ സഹജാതപച്ചയേന പച്ചയോ – ഉപാദിന്നുപാദാനിയോ ഏകോ ഖന്ധോ തിണ്ണന്നം ഖന്ധാനം സഹജാതപച്ചയേന പച്ചയോ…പേ… ദ്വേ ഖന്ധാ ദ്വിന്നം ഖന്ധാനം…പേ… പടിസന്ധിക്ഖണേ ഉപാദിന്നുപാദാനിയോ ഏകോ ഖന്ധോ തിണ്ണന്നം ഖന്ധാനം കടത്താ ച രൂപാനം സഹജാതപച്ചയേന പച്ചയോ…പേ… ദ്വേ ഖന്ധാ ദ്വിന്നം ഖന്ധാനം കടത്താ ച രൂപാനം…പേ… ഖന്ധാ വത്ഥുസ്സ…പേ… വത്ഥു ഖന്ധാനം…പേ… ഏകം മഹാഭൂതം തിണ്ണന്നം മഹാഭൂതാനം…പേ… തയോ മഹാഭൂതാ ഏകസ്സ മഹാഭൂതസ്സ …പേ… ദ്വേ മഹാഭൂതാ ദ്വിന്നം മഹാഭൂതാനം…പേ… മഹാഭൂതാ കടത്താരൂപാനം ഉപാദാരൂപാനം സഹജാതപച്ചയേന പച്ചയോ. അസഞ്ഞസത്താനം ഏകം മഹാഭൂതം…പേ…. (൧)

ഉപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ സഹജാതപച്ചയേന പച്ചയോ – ഉപാദിന്നുപാദാനിയാ ഖന്ധാ ചിത്തസമുട്ഠാനാനം രൂപാനം സഹജാതപച്ചയേന പച്ചയോ. (൨)

ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച ധമ്മസ്സ സഹജാതപച്ചയേന പച്ചയോ – ഉപാദിന്നുപാദാനിയോ ഏകോ ഖന്ധോ തിണ്ണന്നം ഖന്ധാനം ചിത്തസമുട്ഠാനാനഞ്ച രൂപാനം സഹജാതപച്ചയേന പച്ചയോ…പേ… ദ്വേ ഖന്ധാ ദ്വിന്നം ഖന്ധാനം ചിത്തസമുട്ഠാനാനഞ്ച രൂപാനം സഹജാതപച്ചയേന പച്ചയോ. (൩)

അനുപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ സഹജാതപച്ചയേന പച്ചയോ – അനുപാദിന്നുപാദാനിയോ ഏകോ ഖന്ധോ തിണ്ണന്നം ഖന്ധാനം ചിത്തസമുട്ഠാനാനഞ്ച രൂപാനം സഹജാതപച്ചയേന പച്ചയോ…പേ… ദ്വേ ഖന്ധാ ദ്വിന്നം ഖന്ധാനം ചിത്തസമുട്ഠാനാനഞ്ച രൂപാനം സഹജാതപച്ചയേന പച്ചയോ. അനുപാദിന്നുപാദാനിയം ഏകം മഹാഭൂതം…പേ… മഹാഭൂതാ ചിത്തസമുട്ഠാനാനം രൂപാനം …പേ… ബാഹിരം… ആഹാരസമുട്ഠാനം… ഉതുസമുട്ഠാനം ഏകം മഹാഭൂതം…പേ… മഹാഭൂതാ ഉപാദാരൂപാനം സഹജാതപച്ചയേന പച്ചയോ. (൧)

അനുപാദിന്നഅനുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ സഹജാതപച്ചയേന പച്ചയോ – അനുപാദിന്നഅനുപാദാനിയോ ഏകോ ഖന്ധോ തിണ്ണന്നം ഖന്ധാനം…പേ… ദ്വേ ഖന്ധാ ദ്വിന്നം ഖന്ധാനം സഹജാതപച്ചയേന പച്ചയോ. (൧)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ സഹജാതപച്ചയേന പച്ചയോ – അനുപാദിന്നഅനുപാദാനിയാ ഖന്ധാ ചിത്തസമുട്ഠാനാനം രൂപാനം സഹജാതപച്ചയേന പച്ചയോ. (൨)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ച അനുപാദിന്നഅനുപാദാനിയസ്സ ച ധമ്മസ്സ സഹജാതപച്ചയേന പച്ചയോ; അനുപാദിന്നഅനുപാദാനിയോ ഏകോ ഖന്ധോ തിണ്ണന്നം ഖന്ധാനം ചിത്തസമുട്ഠാനാനഞ്ച രൂപാനം സഹജാതപച്ചയേന പച്ചയോ…പേ… ദ്വേ ഖന്ധാ ദ്വിന്നം ഖന്ധാനം ചിത്തസമുട്ഠാനാനഞ്ച രൂപാനം സഹജാതപച്ചയേന പച്ചയോ. (൩)

അനുപാദിന്നുപാദാനിയോ ച അനുപാദിന്നഅനുപാദാനിയോ ച ധമ്മാ അനുപാദിന്നുപാദാനിയസ്സ ധമ്മസ്സ സഹജാതപച്ചയേന പച്ചയോ – അനുപാദിന്നഅനുപാദാനിയാ ഖന്ധാ ച മഹാഭൂതാ ച ചിത്തസമുട്ഠാനാനം രൂപാനം സഹജാതപച്ചയേന പച്ചയോ. (൧)

ഉപാദിന്നുപാദാനിയോ ച അനുപാദിന്നുപാദാനിയോ ച ധമ്മാ അനുപാദിന്നുപാദാനിയസ്സ ധമ്മസ്സ സഹജാതപച്ചയേന പച്ചയോ – ഉപാദിന്നുപാദാനിയാ ഖന്ധാ ച മഹാഭൂതാ ച ചിത്തസമുട്ഠാനാനം രൂപാനം സഹജാതപച്ചയേന പച്ചയോ. (൧)

അഞ്ഞമഞ്ഞപച്ചയോ

൫൯. ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ അഞ്ഞമഞ്ഞപച്ചയേന പച്ചയോ – ഉപാദിന്നുപാദാനിയോ ഏകോ ഖന്ധോ തിണ്ണന്നം ഖന്ധാനം അഞ്ഞമഞ്ഞപച്ചയേന പച്ചയോ…പേ… ദ്വേ ഖന്ധാ ദ്വിന്നം ഖന്ധാനം…പേ… പടിസന്ധിക്ഖണേ ഉപാദിന്നുപാദാനിയോ ഏകോ ഖന്ധോ തിണ്ണന്നം ഖന്ധാനം വത്ഥുസ്സ ച…പേ… ഖന്ധാ വത്ഥുസ്സ…പേ… വത്ഥു ഖന്ധാനം…പേ… ഏകം മഹാഭൂതം തിണ്ണന്നം മഹാഭൂതാനം…പേ… ദ്വേ മഹാഭൂതാ ദ്വിന്നം മഹാഭൂതാനം…പേ… അസഞ്ഞസത്താനം ഏകം മഹാഭൂതം…പേ…. (൧)

അനുപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ അഞ്ഞമഞ്ഞപച്ചയേന പച്ചയോ – അനുപാദിന്നുപാദാനിയോ ഏകോ ഖന്ധോ തിണ്ണന്നം ഖന്ധാനം…പേ… ദ്വേ ഖന്ധാ ദ്വിന്നം ഖന്ധാനം അഞ്ഞമഞ്ഞപച്ചയേന പച്ചയോ. ഏകം മഹാഭൂതം…പേ… ബാഹിരം… ആഹാരസമുട്ഠാനം… ഉതുസമുട്ഠാനം ഏകം മഹാഭൂതം…പേ…. (൧)

അനുപാദിന്നഅനുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ അഞ്ഞമഞ്ഞപച്ചയേന പച്ചയോ – അനുപാദിന്നഅനുപാദാനിയോ ഏകോ ഖന്ധോ തിണ്ണന്നം ഖന്ധാനം…പേ… ദ്വേ ഖന്ധാ ദ്വിന്നം ഖന്ധാനം…പേ…. (൧)

നിസ്സയപച്ചയോ

൬൦. ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ നിസ്സയപച്ചയേന പച്ചയോ – ഉപാദിന്നുപാദാനിയോ ഏകോ ഖന്ധോ തിണ്ണന്നം ഖന്ധാനം നിസ്സയപച്ചയേന പച്ചയോ…പേ… പടിസന്ധിക്ഖണേ…പേ… ഏകം മഹാഭൂതം…പേ… അസഞ്ഞസത്താനം ഏകം മഹാഭൂതം…പേ… ചക്ഖായതനം ചക്ഖുവിഞ്ഞാണസ്സ…പേ… കായായതനം കായവിഞ്ഞാണസ്സ…പേ… വത്ഥു ഉപാദിന്നുപാദാനിയാനം ഖന്ധാനം നിസ്സയപച്ചയേന പച്ചയോ. (൧)

ഉപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ നിസ്സയപച്ചയേന പച്ചയോ – ഉപാദിന്നുപാദാനിയാ ഖന്ധാ ചിത്തസമുട്ഠാനാനം രൂപാനം നിസ്സയപച്ചയേന പച്ചയോ. വത്ഥു അനുപാദിന്നുപാദാനിയാനം ഖന്ധാനം നിസ്സയപച്ചയേന പച്ചയോ. (൨)

ഉപാദിന്നുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ നിസ്സയപച്ചയേന പച്ചയോ – വത്ഥു അനുപാദിന്നഅനുപാദാനിയാനം ഖന്ധാനം നിസ്സയപച്ചയേന പച്ചയോ. (൩)

ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച ധമ്മസ്സ നിസ്സയപച്ചയേന പച്ചയോ – ഉപാദിന്നുപാദാനിയോ ഏകോ ഖന്ധോ തിണ്ണന്നം ഖന്ധാനം ചിത്തസമുട്ഠാനാനഞ്ച രൂപാനം നിസ്സയപച്ചയേന പച്ചയോ…പേ… ദ്വേ ഖന്ധാ ദ്വിന്നം ഖന്ധാനം ചിത്തസമുട്ഠാനാനഞ്ച രൂപാനം നിസ്സയപച്ചയേന പച്ചയോ. (൪)

അനുപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ… ഏകാ.

അനുപാദിന്നഅനുപാദാനിയോ ധമ്മോ… തീണി.

ഉപാദിന്നുപാദാനിയോ ച അനുപാദിന്നഅനുപാദാനിയോ ച ധമ്മാ അനുപാദിന്നഅനുപാദാനിയസ്സ ധമ്മസ്സ നിസ്സയപച്ചയേന പച്ചയോ – അനുപാദിന്നഅനുപാദാനിയോ ഏകോ ഖന്ധോ ച വത്ഥു ച തിണ്ണന്നം ഖന്ധാനം നിസ്സയപച്ചയേന പച്ചയോ…പേ… ദ്വേ ഖന്ധാ ച വത്ഥു ച ദ്വിന്നം ഖന്ധാനം നിസ്സയപച്ചയേന പച്ചയോ. (൧)

അനുപാദിന്നുപാദാനിയോ ച അനുപാദിന്നഅനുപാദാനിയോ ച ധമ്മാ അനുപാദിന്നുപാദാനിയസ്സ ധമ്മസ്സ നിസ്സയപച്ചയേന പച്ചയോ – അനുപാദിന്നഅനുപാദാനിയാ ഖന്ധാ ച മഹാഭൂതാ ച ചിത്തസമുട്ഠാനാനം രൂപാനം നിസ്സയപച്ചയേന പച്ചയോ. (൧)

ഉപാദിന്നുപാദാനിയോ ച അനുപാദിന്നുപാദാനിയോ ച ധമ്മാ അനുപാദിന്നുപാദാനിയസ്സ ധമ്മസ്സ നിസ്സയപച്ചയേന പച്ചയോ – ഉപാദിന്നുപാദാനിയാ ഖന്ധാ ച മഹാഭൂതാ ച ചിത്തസമുട്ഠാനാനം രൂപാനം നിസ്സയപച്ചയേന പച്ചയോ. അനുപാദിന്നുപാദാനിയോ ഏകോ ഖന്ധോ ച വത്ഥു ച തിണ്ണന്നം ഖന്ധാനം നിസ്സയപച്ചയേന പച്ചയോ…പേ… ദ്വേ ഖന്ധാ ച വത്ഥു ച ദ്വിന്നം ഖന്ധാനം നിസ്സയപച്ചയേന പച്ചയോ. (൧)

ഉപനിസ്സയപച്ചയോ

൬൧. ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ ഉപനിസ്സയപച്ചയേന പച്ചയോ – അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – കായികം സുഖം കായികസ്സ സുഖസ്സ, കായികസ്സ ദുക്ഖസ്സ ഉപനിസ്സയപച്ചയേന പച്ചയോ. കായികം ദുക്ഖം കായികസ്സ സുഖസ്സ, കായികസ്സ ദുക്ഖസ്സ…പേ… ഉതു കായികസ്സ സുഖസ്സ, കായികസ്സ ദുക്ഖസ്സ…പേ… ഭോജനം കായികസ്സ സുഖസ്സ, കായികസ്സ ദുക്ഖസ്സ…പേ… കായികം സുഖം… കായികം ദുക്ഖം… ഉതു… ഭോജനം കായികസ്സ സുഖസ്സ, കായികസ്സ ദുക്ഖസ്സ ഉപനിസ്സയപച്ചയേന പച്ചയോ. (൧)

ഉപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – കായികം സുഖം ഉപനിസ്സായ ദാനം ദേതി, സീലം സമാദിയതി, ഉപോസഥകമ്മം കരോതി, ഝാനം ഉപ്പാദേതി, വിപസ്സനം ഉപ്പാദേതി, അഭിഞ്ഞം ഉപ്പാദേതി, സമാപത്തിം ഉപ്പാദേതി, പാണം ഹനതി…പേ… സങ്ഘം ഭിന്ദതി. കായികം ദുക്ഖം… ഉതും… ഭോജനം ഉപനിസ്സായ ദാനം ദേതി…പേ… സങ്ഘം ഭിന്ദതി. കായികം സുഖം… കായികം ദുക്ഖം… ഉതു… ഭോജനം അനുപാദിന്നുപാദാനിയായ സദ്ധായ… സീലസ്സ… സുതസ്സ… ചാഗസ്സ… പഞ്ഞായ… രാഗസ്സ… ദോസസ്സ… മോഹസ്സ… മാനസ്സ… ദിട്ഠിയാ… പത്ഥനായ ഉപനിസ്സയപച്ചയേന പച്ചയോ. (൨)

ഉപാദിന്നുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ ഉപനിസ്സയപച്ചയേന പച്ചയോ. പകതൂപനിസ്സയോ – കായികം സുഖം ഉപനിസ്സായ മഗ്ഗം ഉപ്പാദേതി, ഫലസമാപത്തിം സമാപജ്ജതി. കായികം ദുക്ഖം… ഉതും… ഭോജനം ഉപനിസ്സായ മഗ്ഗം ഉപ്പാദേതി, ഫലസമാപത്തിം സമാപജ്ജതി. കായികം സുഖം… കായികം ദുക്ഖം… ഉതു… ഭോജനം മഗ്ഗസ്സ… ഫലസമാപത്തിയാ ഉപനിസ്സയപച്ചയേന പച്ചയോ. (൩)

൬൨. അനുപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – അനുപാദിന്നുപാദാനിയം സദ്ധം ഉപനിസ്സായ ദാനം ദേതി, സീലം സമാദിയതി, ഉപോസഥകമ്മം കരോതി, ഝാനം ഉപ്പാദേതി, വിപസ്സനം ഉപ്പാദേതി, അഭിഞ്ഞം ഉപ്പാദേതി, സമാപത്തിം ഉപ്പാദേതി, മാനം ജപ്പേതി, ദിട്ഠിം ഗണ്ഹാതി. അനുപാദിന്നുപാദാനിയം സീലം… സുതം… ചാഗം… പഞ്ഞം… രാഗം… ദോസം… മോഹം… മാനം … ദിട്ഠിം… പത്ഥനം… ഉതും… ഭോജനം… സേനാസനം ഉപനിസ്സായ ദാനം ദേതി…പേ… സമാപത്തിം ഉപ്പാദേതി, മാനം ജപ്പേതി, ദിട്ഠിം ഗണ്ഹാതി, പാണം ഹനതി…പേ… സങ്ഘം ഭിന്ദതി. അനുപാദിന്നുപാദാനിയാ സദ്ധാ… സീലം… സുതം… ചാഗോ… പഞ്ഞാ… രാഗോ… ദോസോ… മോഹോ… മാനോ… ദിട്ഠി… പത്ഥനാ… ഉതു… ഭോജനം… സേനാസനം… അനുപാദിന്നുപാദാനിയായ സദ്ധായ… സീലസ്സ… സുതസ്സ… ചാഗസ്സ… പഞ്ഞായ… രാഗസ്സ… ദോസസ്സ… മോഹസ്സ… മാനസ്സ… ദിട്ഠിയാ… പത്ഥനായ ഉപനിസ്സയപച്ചയേന പച്ചയോ. പഠമസ്സ ഝാനസ്സ പരികമ്മം പഠമസ്സ ഝാനസ്സ…പേ… നേവസഞ്ഞാനാസഞ്ഞായതനസ്സ പരികമ്മം നേവസഞ്ഞാനാസഞ്ഞായതനസ്സ…പേ… പഠമം ഝാനം ദുതിയസ്സ…പേ… ആകിഞ്ചഞ്ഞായതനം നേവസഞ്ഞാനാസഞ്ഞായതനസ്സ…പേ… പാണാതിപാതോ പാണാതിപാതസ്സ…പേ… നിയതമിച്ഛാദിട്ഠി നിയതമിച്ഛാദിട്ഠിയാ…പേ…. (൧)

അനുപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ ഉപനിസ്സയപച്ചയേന പച്ചയോ – അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – അനുപാദിന്നുപാദാനിയം സദ്ധം ഉപനിസ്സായ അത്താനം ആതാപേതി പരിതാപേതി, പരിയിട്ഠിമൂലകം ദുക്ഖം പച്ചനുഭോതി. അനുപാദിന്നുപാദാനിയം സീലം …പേ… സേനാസനം ഉപനിസ്സായ അത്താനം ആതാപേതി പരിതാപേതി, പരിയിട്ഠിമൂലകം ദുക്ഖം പച്ചനുഭോതി. അനുപാദിന്നുപാദാനിയാ സദ്ധാ…പേ… സേനാസനം കായികസ്സ സുഖസ്സ, കായികസ്സ ദുക്ഖസ്സ ഉപനിസ്സയപച്ചയേന പച്ചയോ. കുസലാകുസലം കമ്മം വിപാകസ്സ ഉപനിസ്സയപച്ചയേന പച്ചയോ. (൨)

അനുപാദിന്നുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ ഉപനിസ്സയപച്ചയേന പച്ചയോ – അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – പഠമസ്സ മഗ്ഗസ്സ പരികമ്മം പഠമസ്സ മഗ്ഗസ്സ ഉപനിസ്സയപച്ചയേന പച്ചയോ. ദുതിയസ്സ മഗ്ഗസ്സ…പേ… തതിയസ്സ മഗ്ഗസ്സ…പേ… ചതുത്ഥസ്സ മഗ്ഗസ്സ പരികമ്മം ചതുത്ഥസ്സ മഗ്ഗസ്സ ഉപനിസ്സയപച്ചയേന പച്ചയോ. (൩)

൬൩. അനുപാദിന്നഅനുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – പഠമോ മഗ്ഗോ ദുതിയസ്സ മഗ്ഗസ്സ ഉപനിസ്സയപച്ചയേന പച്ചയോ. ദുതിയോ മഗ്ഗോ തതിയസ്സ മഗ്ഗസ്സ…പേ… തതിയോ മഗ്ഗോ ചതുത്ഥസ്സ മഗ്ഗസ്സ…പേ… മഗ്ഗോ ഫലസമാപത്തിയാ ഉപനിസ്സയപച്ചയേന പച്ചയോ. (൧)

അനുപാദിന്നഅനുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ ഉപനിസ്സയപച്ചയേന പച്ചയോ – അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – ഫലസമാപത്തി കായികസ്സ സുഖസ്സ ഉപനിസ്സയപച്ചയേന പച്ചയോ. (൨)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, പകതൂനിസ്സയോ…പേ…. പകതൂപനിസ്സയോ – അരിയാ മഗ്ഗം ഉപനിസ്സായ അനുപ്പന്നം സമാപത്തിം ഉപ്പാദേന്തി, ഉപ്പന്നം സമാപത്തിം സമാപജ്ജന്തി, സങ്ഖാരേ അനിച്ചതോ ദുക്ഖതോ അനത്തതോ വിപസ്സന്തി. മഗ്ഗോ അരിയാനം അത്ഥപ്പടിസമ്ഭിദായ ധമ്മപ്പടിസമ്ഭിദായ നിരുത്തിപ്പടിസമ്ഭിദായ പടിഭാനപ്പടിസമ്ഭിദായ ഠാനാഠാനകോസല്ലസ്സ ഉപനിസ്സയപച്ചയേന പച്ചയോ. (൩)

പുരേജാതപച്ചയോ

൬൪. ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – സേക്ഖാ വാ പുഥുജ്ജനാ വാ ചക്ഖും അനിച്ചതോ ദുക്ഖതോ അനത്തതോ വിപസ്സന്തി, അസ്സാദേന്തി അഭിനന്ദന്തി; തം ആരബ്ഭ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി; കുസലാകുസലേ നിരുദ്ധേ വിപാകോ തദാരമ്മണതാ ഉപ്പജ്ജതി. സോതം… ഘാനം… ജിവ്ഹം… കായം… ഉപാദിന്നുപാദാനിയേ രൂപേ… ഗന്ധേ… രസേ… ഫോട്ഠബ്ബേ… വത്ഥും അനിച്ചതോ ദുക്ഖതോ അനത്തതോ വിപസ്സന്തി, അസ്സാദേന്തി അഭിനന്ദന്തി; തം ആരബ്ഭ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. കുസലാകുസലേ നിരുദ്ധേ വിപാകോ തദാരമ്മണതാ ഉപ്പജ്ജതി. ഉപാദിന്നുപാദാനിയം രൂപായതനം ചക്ഖുവിഞ്ഞാണസ്സ…പേ… ഉപാദിന്നുപാദാനിയം ഗന്ധായതനം… രസായതനം… ഫോട്ഠബ്ബായതനം കായവിഞ്ഞാണസ്സ പുരേജാതപച്ചയേന പച്ചയോ. വത്ഥുപുരേജാതം – ചക്ഖായതനം ചക്ഖുവിഞ്ഞാണസ്സ…പേ… കായായതനം കായവിഞ്ഞാണസ്സ…പേ… വത്ഥു ഉപാദിന്നുപാദാനിയാനം ഖന്ധാനം പുരേജാതപച്ചയേന പച്ചയോ. (൧)

ഉപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – ചക്ഖും അനിച്ചതോ ദുക്ഖതോ അനത്തതോ വിപസ്സന്തി, അസ്സാദേന്തി അഭിനന്ദന്തി; തം ആരബ്ഭ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. സോതം…പേ… വത്ഥും അനിച്ചതോ ദുക്ഖതോ അനത്തതോ വിപസ്സതി, അസ്സാദേതി അഭിനന്ദതി; തം ആരബ്ഭ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. ദിബ്ബേന ചക്ഖുനാ ഉപാദിന്നുപാദാനിയം രൂപം പസ്സന്തി. വത്ഥുപുരേജാതം – വത്ഥു അനുപാദിന്നുപാദാനിയാനം ഖന്ധാനം പുരേജാതപച്ചയേന പച്ചയോ. (൨)

ഉപാദിന്നുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ പുരേജാതപച്ചയേന പച്ചയോ. വത്ഥുപുരേജാതം – വത്ഥു അനുപാദിന്നഅനുപാദാനിയാനം ഖന്ധാനം പുരേജാതപച്ചയേന പച്ചയോ. (൩)

൬൫. അനുപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ പുരേജാതപച്ചയേന പച്ചയോ. ആരമ്മണപുരേജാതം – അനുപാദിന്നുപാദാനിയേ രൂപേ… സദ്ദേ… ഗന്ധേ… രസേ… ഫോട്ഠബ്ബേ അനിച്ചതോ ദുക്ഖതോ അനത്തതോ വിപസ്സതി, അസ്സാദേതി അഭിനന്ദതി; തം ആരബ്ഭ രാഗോ ഉപ്പജ്ജതി …പേ… ദോമനസ്സം ഉപ്പജ്ജതി. ദിബ്ബേന ചക്ഖുനാ അനുപാദിന്നുപാദാനിയം രൂപം പസ്സതി, ദിബ്ബായ സോതധാതുയാ സദ്ദം സുണാതി. (൧)

അനുപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ പുരേജാതപച്ചയേന പച്ചയോ. ആരമ്മണപുരേജാതം – അനുപാദിന്നുപാദാനിയേ രൂപേ… സദ്ദേ… ഗന്ധേ… രസേ… ഫോട്ഠബ്ബേ അനിച്ചതോ ദുക്ഖതോ അനത്തതോ വിപസ്സതി, അസ്സാദേതി അഭിനന്ദതി; തം ആരബ്ഭ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി. കുസലാകുസലേ നിരുദ്ധേ വിപാകോ തദാരമ്മണതാ ഉപ്പജ്ജതി. അനുപാദിന്നുപാദാനിയം രൂപായതനം ചക്ഖുവിഞ്ഞാണസ്സ…പേ… ഫോട്ഠബ്ബായതനം കായവിഞ്ഞാണസ്സ പുരേജാതപച്ചയേന പച്ചയോ. (൨)

ഉപാദിന്നുപാദാനിയോ ച അനുപാദിന്നുപാദാനിയോ ച ധമ്മാ ഉപാദിന്നുപാദാനിയസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. അനുപാദിന്നുപാദാനിയം രൂപായതനഞ്ച ചക്ഖായതനഞ്ച ചക്ഖുവിഞ്ഞാണസ്സ പുരേജാതപച്ചയേന പച്ചയോ…പേ… അനുപാദിന്നുപാദാനിയം ഫോട്ഠബ്ബായതനഞ്ച കായായതനഞ്ച കായവിഞ്ഞാണസ്സ പുരേജാതപച്ചയേന പച്ചയോ. അനുപാദിന്നുപാദാനിയം രൂപായതനഞ്ച വത്ഥു ച ഉപാദിന്നുപാദാനിയാനം ഖന്ധാനം പുരേജാതപച്ചയേന പച്ചയോ…പേ… അനുപാദിന്നുപാദാനിയം ഫോട്ഠബ്ബായതനഞ്ച വത്ഥു ച ഉപാദിന്നുപാദാനിയാനം ഖന്ധാനം പുരേജാതപച്ചയേന പച്ചയോ. (൧)

ഉപാദിന്നുപാദാനിയോ ച അനുപാദിന്നുപാദാനിയോ ച ധമ്മാ അനുപാദിന്നുപാദാനിയസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. അനുപാദിന്നുപാദാനിയം രൂപായതനഞ്ച വത്ഥു ച അനുപാദിന്നുപാദാനിയാനം ഖന്ധാനം പുരേജാതപച്ചയേന പച്ചയോ…പേ… അനുപാദിന്നുപാദാനിയം ഫോട്ഠബ്ബായതനഞ്ച വത്ഥു ച അനുപാദിന്നുപാദാനിയാനം ഖന്ധാനം പുരേജാതപച്ചയേന പച്ചയോ. (൨)

പച്ഛാജാതപച്ചയോ

൬൬. ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ പച്ഛാജാതപച്ചയേന പച്ചയോ – പച്ഛാജാതാ ഉപാദിന്നുപാദാനിയാ ഖന്ധാ പുരേജാതസ്സ ഇമസ്സ ഉപാദിന്നുപാദാനിയസ്സ കായസ്സ പച്ഛാജാതപച്ചയേന പച്ചയോ. (൧)

ഉപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ പച്ഛാജാതപച്ചയേന പച്ചയോ – പച്ഛാജാതാ ഉപാദിന്നുപാദാനിയാ ഖന്ധാ പുരേജാതസ്സ ഇമസ്സ അനുപാദിന്നുപാദാനിയസ്സ കായസ്സ പച്ഛാജാതപച്ചയേന പച്ചയോ. (൨)

ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച ധമ്മസ്സ പച്ഛാജാതപച്ചയേന പച്ചയോ – പച്ഛാജാതാ ഉപാദിന്നുപാദാനിയാ ഖന്ധാ പുരേജാതസ്സ ഇമസ്സ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച കായസ്സ പച്ഛാജാതപച്ചയേന പച്ചയോ. (൩)

അനുപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ പച്ഛാജാതപച്ചയേന പച്ചയോ – പച്ഛാജാതാ അനുപാദിന്നുപാദാനിയാ ഖന്ധാ പുരേജാതസ്സ ഇമസ്സ അനുപാദിന്നുപാദാനിയസ്സ കായസ്സ പച്ഛാജാതപച്ചയേന പച്ചയോ. (൧)

അനുപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ പച്ഛാജാതപച്ചയേന പച്ചയോ – പച്ഛാജാതാ അനുപാദിന്നുപാദാനിയാ ഖന്ധാ പുരേജാതസ്സ ഇമസ്സ ഉപാദിന്നുപാദാനിയസ്സ കായസ്സ പച്ഛാജാതപച്ചയേന പച്ചയോ. (൨)

അനുപാദിന്നുപാദാനിയോ ധമ്മോ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച ധമ്മസ്സ പച്ഛാജാതപച്ചയേന പച്ചയോ – പച്ഛാജാതാ അനുപാദിന്നുപാദാനിയാ ഖന്ധാ പുരേജാതസ്സ ഇമസ്സ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച കായസ്സ പച്ഛാജാതപച്ചയേന പച്ചയോ. (൩)

൬൭. അനുപാദിന്നഅനുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ പച്ഛാജാതപച്ചയേന പച്ചയോ – പച്ഛാജാതാ അനുപാദിന്നഅനുപാദാനിയാ ഖന്ധാ പുരേജാതസ്സ ഇമസ്സ ഉപാദിന്നുപാദാനിയസ്സ കായസ്സ പച്ഛാജാതപച്ചയേന പച്ചയോ. (൧)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ പച്ഛാജാതപച്ചയേന പച്ചയോ – പച്ഛാജാതാ അനുപാദിന്നഅനുപാദാനിയാ ഖന്ധാ പുരേജാതസ്സ ഇമസ്സ അനുപാദിന്നുപാദാനിയസ്സ കായസ്സ പച്ഛാജാതപച്ചയേന പച്ചയോ. (൨)

അനുപാദിന്നഅനുപാദാനിയോ ധമ്മോ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച ധമ്മസ്സ പച്ഛാജാതപച്ചയേന പച്ചയോ – പച്ഛാജാതാ അനുപാദിന്നഅനുപാദാനിയാ ഖന്ധാ പുരേജാതസ്സ ഇമസ്സ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച കായസ്സ പച്ഛാജാതപച്ചയേന പച്ചയോ. (൩)

ആസേവനപച്ചയോ

൬൮. അനുപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ ആസേവനപച്ചയേന പച്ചയോ – പുരിമാ പുരിമാ അനുപാദിന്നുപാദാനിയാ ഖന്ധാ പച്ഛിമാനം പച്ഛിമാനം അനുപാദിന്നുപാദാനിയാനം ഖന്ധാനം ആസേവനപച്ചയേന പച്ചയോ. അനുലോമം ഗോത്രഭുസ്സ… അനുലോമം വോദാനസ്സ ആസേവനപച്ചയേന പച്ചയോ. (൧)

അനുപാദിന്നുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ ആസേവനപച്ചയേന പച്ചയോ – ഗോത്രഭു മഗ്ഗസ്സ… വോദാനം മഗ്ഗസ്സ ആസേവനപച്ചയേന പച്ചയോ. (൨)

കമ്മപച്ചയോ

൬൯. ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ കമ്മപച്ചയേന പച്ചയോ – ഉപാദിന്നുപാദാനിയാ ചേതനാ സമ്പയുത്തകാനം ഖന്ധാനം കമ്മപച്ചയേന പച്ചയോ; പടിസന്ധിക്ഖണേ ഉപാദിന്നുപാദാനിയാ ചേതനാ സമ്പയുത്തകാനം ഖന്ധാനം കടത്താ ച രൂപാനം കമ്മപച്ചയേന പച്ചയോ. ചേതനാ വത്ഥുസ്സ കമ്മപച്ചയേന പച്ചയോ. (൧)

ഉപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ കമ്മപച്ചയേന പച്ചയോ – ഉപാദിന്നുപാദാനിയാ ചേതനാ ചിത്തസമുട്ഠാനാനം രൂപാനം കമ്മപച്ചയേന പച്ചയോ. (൨)

ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച ധമ്മസ്സ കമ്മപച്ചയേന പച്ചയോ – ഉപാദിന്നുപാദാനിയാ ചേതനാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം കമ്മപച്ചയേന പച്ചയോ. (൩)

അനുപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ കമ്മപച്ചയേന പച്ചയോ – അനുപാദിന്നുപാദാനിയാ ചേതനാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം കമ്മപച്ചയേന പച്ചയോ. (൧)

അനുപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ കമ്മപച്ചയേന പച്ചയോ – നാനാക്ഖണികാ അനുപാദിന്നുപാദാനിയാ ചേതനാ വിപാകാനം ഉപാദിന്നുപാദാനിയാനം ഖന്ധാനം കടത്താ ച രൂപാനം കമ്മപച്ചയേന പച്ചയോ. (൨)

൭൦. അനുപാദിന്നഅനുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – അനുപാദിന്നഅനുപാദാനിയാ ചേതനാ സമ്പയുത്തകാനം ഖന്ധാനം കമ്മപച്ചയേന പച്ചയോ. നാനാക്ഖണികാ – അനുപാദിന്നഅനുപാദാനിയാ കുസലാ ചേതനാ വിപാകാനം അനുപാദിന്നഅനുപാദാനിയാനം ഖന്ധാനം കമ്മപച്ചയേന പച്ചയോ. (൧)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ കമ്മപച്ചയേന പച്ചയോ – അനുപാദിന്നഅനുപാദാനിയാ ചേതനാ ചിത്തസമുട്ഠാനാനം രൂപാനം കമ്മപച്ചയേന പച്ചയോ. (൨)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ച അനുപാദിന്നഅനുപാദാനിയസ്സ ച ധമ്മസ്സ കമ്മപച്ചയേന പച്ചയോ – അനുപാദിന്നഅനുപാദാനിയാ ചേതനാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം കമ്മപച്ചയേന പച്ചയോ. (൩)

വിപാകപച്ചയോ

൭൧. ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ വിപാകപച്ചയേന പച്ചയോ – വിപാകോ ഉപാദിന്നുപാദാനിയോ ഏകോ ഖന്ധോ തിണ്ണന്നം ഖന്ധാനം വിപാകപച്ചയേന പച്ചയോ…പേ… ദ്വേ ഖന്ധാ ദ്വിന്നം ഖന്ധാനം വിപാകപച്ചയേന പച്ചയോ; പടിസന്ധിക്ഖണേ വിപാകോ ഉപാദിന്നുപാദാനിയോ ഏകോ ഖന്ധോ തിണ്ണന്നം ഖന്ധാനം കടത്താ ച രൂപാനം വിപാകപച്ചയേന പച്ചയോ…പേ… ദ്വേ ഖന്ധാ ദ്വിന്നം ഖന്ധാനം കടത്താ ച രൂപാനം വിപാകപച്ചയേന പച്ചയോ. ഖന്ധാ വത്ഥുസ്സ വിപാകപച്ചയേന പച്ചയോ. (൧)

ഉപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ വിപാകപച്ചയേന പച്ചയോ – വിപാകാ ഉപാദിന്നുപാദാനിയാ ഖന്ധാ ചിത്തസമുട്ഠാനാനം രൂപാനം വിപാകപച്ചയേന പച്ചയോ. (൨)

ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച ധമ്മസ്സ വിപാകപച്ചയേന പച്ചയോ – വിപാകോ ഉപാദിന്നുപാദാനിയോ ഏകോ ഖന്ധോ തിണ്ണന്നം ഖന്ധാനം ചിത്തസമുട്ഠാനാനഞ്ച രൂപാനം വിപാകപച്ചയേന പച്ചയോ …പേ… ദ്വേ ഖന്ധാ ദ്വിന്നം ഖന്ധാനം ചിത്തസമുട്ഠാനാനഞ്ച രൂപാനം വിപാകപച്ചയേന പച്ചയോ. (൩)

അനുപാദിന്നഅനുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ വിപാകപച്ചയേന പച്ചയോ – വിപാകോ അനുപാദിന്നഅനുപാദാനിയോ ഏകോ ഖന്ധോ തിണ്ണന്നം ഖന്ധാനം വിപാകപച്ചയേന പച്ചയോ…പേ… ദ്വേ ഖന്ധാ ദ്വിന്നം ഖന്ധാനം വിപാകപച്ചയേന പച്ചയോ. (൧)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ വിപാകപച്ചയേന പച്ചയോ – വിപാകാ അനുപാദിന്നഅനുപാദാനിയാ ഖന്ധാ ചിത്തസമുട്ഠാനാനം രൂപാനം വിപാകപച്ചയേന പച്ചയോ. (൨)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ച അനുപാദിന്നഅനുപാദാനിയസ്സ ച ധമ്മസ്സ വിപാകപച്ചയേന പച്ചയോ – വിപാകോ അനുപാദിന്നഅനുപാദാനിയോ ഏകോ ഖന്ധോ തിണ്ണന്നം ഖന്ധാനം ചിത്തസമുട്ഠാനാനഞ്ച രൂപാനം വിപാകപച്ചയേന പച്ചയോ…പേ… ദ്വേ ഖന്ധാ ദ്വിന്നം ഖന്ധാനം ചിത്തസമുട്ഠാനാനഞ്ച രൂപാനം വിപാകപച്ചയേന പച്ചയോ. (൩)

ആഹാരപച്ചയോ

൭൨. ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ ആഹാരപച്ചയേന പച്ചയോ – ഉപാദിന്നുപാദാനിയാ ആഹാരാ സമ്പയുത്തകാനം ഖന്ധാനം ആഹാരപച്ചയേന പച്ചയോ; പടിസന്ധിക്ഖണേ ഉപാദിന്നുപാദാനിയാ ആഹാരാ സമ്പയുത്തകാനം ഖന്ധാനം കടത്താ ച രൂപാനം ആഹാരപച്ചയേന പച്ചയോ. ഉപാദിന്നുപാദാനിയോ കബളീകാരോ ആഹാരോ ഉപാദിന്നുപാദാനിയസ്സ കായസ്സ ആഹാരപച്ചയേന പച്ചയോ. (൧)

ഉപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ ആഹാരപച്ചയേന പച്ചയോ – ഉപാദിന്നുപാദാനിയാ ആഹാരാ ചിത്തസമുട്ഠാനാനം രൂപാനം ആഹാരപച്ചയേന പച്ചയോ; ഉപാദിന്നുപാദാനിയോ കബളീകാരോ ആഹാരോ അനുപാദിന്നുപാദാനിയസ്സ കായസ്സ ആഹാരപച്ചയേന പച്ചയോ. (൨)

ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച ധമ്മസ്സ ആഹാരപച്ചയേന പച്ചയോ – ഉപാദിന്നുപാദാനിയാ ആഹാരാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ആഹാരപച്ചയേന പച്ചയോ. ഉപാദിന്നുപാദാനിയോ കബളീകാരോ ആഹാരോ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച കായസ്സ ആഹാരപച്ചയേന പച്ചയോ. (൩)

൭൩. അനുപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ ആഹാരപച്ചയേന പച്ചയോ – അനുപാദിന്നുപാദാനിയാ ആഹാരാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ആഹാരപച്ചയേന പച്ചയോ. അനുപാദിന്നുപാദാനിയോ കബളീകാരോ ആഹാരോ അനുപാദിന്നുപാദാനിയസ്സ കായസ്സ ആഹാരപച്ചയേന പച്ചയോ. (൧)

അനുപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ ആഹാരപച്ചയേന പച്ചയോ – അനുപാദിന്നുപാദാനിയോ കബളീകാരോ ആഹാരോ ഉപാദിന്നുപാദാനിയസ്സ കായസ്സ ആഹാരപച്ചയേന പച്ചയോ. (൨)

അനുപാദിന്നുപാദാനിയോ ധമ്മോ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച ധമ്മസ്സ ആഹാരപച്ചയേന പച്ചയോ – അനുപാദിന്നുപാദാനിയോ കബളീകാരോ ആഹാരോ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച കായസ്സ ആഹാരപച്ചയേന പച്ചയോ. (൩)

അനുപാദിന്നഅനുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ ആഹാരപച്ചയേന പച്ചയോ – അനുപാദിന്നഅനുപാദാനിയാ ആഹാരാ സമ്പയുത്തകാനം ഖന്ധാനം ആഹാരപച്ചയേന പച്ചയോ. (൧)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ ആഹാരപച്ചയേന പച്ചയോ – അനുപാദിന്നഅനുപാദാനിയാ ആഹാരാ ചിത്തസമുട്ഠാനാനം രൂപാനം ആഹാരപച്ചയേന പച്ചയോ. (൨)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ച അനുപാദിന്നഅനുപാദാനിയസ്സ ച ധമ്മസ്സ ആഹാരപച്ചയേന പച്ചയോ – അനുപാദിന്നഅനുപാദാനിയാ ആഹാരാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ആഹാരപച്ചയേന പച്ചയോ. (൩)

൭൪. ഉപാദിന്നുപാദാനിയോ ച അനുപാദിന്നുപാദാനിയോ ച ധമ്മാ ഉപാദിന്നുപാദാനിയസ്സ ധമ്മസ്സ ആഹാരപച്ചയേന പച്ചയോ – ഉപാദിന്നുപാദാനിയോ ച അനുപാദിന്നുപാദാനിയോ ച കബളീകാരോ ആഹാരോ ഉപാദിന്നുപാദാനിയസ്സ കായസ്സ ആഹാരപച്ചയേന പച്ചയോ. (൧)

ഉപാദിന്നുപാദാനിയോ ച അനുപാദിന്നുപാദാനിയോ ച ധമ്മാ അനുപാദിന്നുപാദാനിയസ്സ ധമ്മസ്സ ആഹാരപച്ചയേന പച്ചയോ – ഉപാദിന്നുപാദാനിയോ ച അനുപാദിന്നുപാദാനിയോ ച കബളീകാരോ ആഹാരോ അനുപാദിന്നുപാദാനിയസ്സ കായസ്സ ആഹാരപച്ചയേന പച്ചയോ. (൨)

ഉപാദിന്നുപാദാനിയോ ച അനുപാദിന്നുപാദാനിയോ ച ധമ്മാ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച ധമ്മസ്സ ആഹാരപച്ചയേന പച്ചയോ – ഉപാദിന്നുപാദാനിയോ ച അനുപാദിന്നുപാദാനിയോ ച കബളീകാരോ ആഹാരോ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച കായസ്സ ആഹാരപച്ചയേന പച്ചയോ. (൩)

ഇന്ദ്രിയപച്ചയോ

൭൫. ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ ഇന്ദ്രിയപച്ചയേന പച്ചയോ – ഉപാദിന്നുപാദാനിയാ ഇന്ദ്രിയാ സമ്പയുത്തകാനം ഖന്ധാനം ഇന്ദ്രിയപച്ചയേന പച്ചയോ; പടിസന്ധിക്ഖണേ ഉപാദിന്നുപാദാനിയാ ഇന്ദ്രിയാ സമ്പയുത്തകാനം ഖന്ധാനം കടത്താ ച രൂപാനം ഇന്ദ്രിയപച്ചയേന പച്ചയോ. ചക്ഖുന്ദ്രിയം ചക്ഖുവിഞ്ഞാണസ്സ…പേ… കായിന്ദ്രിയം കായവിഞ്ഞാണസ്സ…പേ… രൂപജീവിതിന്ദ്രിയം കടത്താരൂപാനം ഇന്ദ്രിയപച്ചയേന പച്ചയോ. (൧)

ഉപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ ഇന്ദ്രിയപച്ചയേന പച്ചയോ – ഉപാദിന്നുപാദാനിയാ ഇന്ദ്രിയാ ചിത്തസമുട്ഠാനാനം രൂപാനം ഇന്ദ്രിയപച്ചയേന പച്ചയോ. (൨)

ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച ധമ്മസ്സ ഇന്ദ്രിയപച്ചയേന പച്ചയോ – ഉപാദിന്നുപാദാനിയാ ഇന്ദ്രിയാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഇന്ദ്രിയപച്ചയേന പച്ചയോ. (൩)

അനുപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ ഇന്ദ്രിയപച്ചയേന പച്ചയോ – അനുപാദിന്നുപാദാനിയാ ഇന്ദ്രിയാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഇന്ദ്രിയപച്ചയേന പച്ചയോ. (൧)

അനുപാദിന്നഅനുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ ഇന്ദ്രിയപച്ചയേന പച്ചയോ – അനുപാദിന്നഅനുപാദാനിയാ ഇന്ദ്രിയാ സമ്പയുത്തകാനം ഖന്ധാനം ഇന്ദ്രിയപച്ചയേന പച്ചയോ. (൧)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ ഇന്ദ്രിയപച്ചയേന പച്ചയോ – അനുപാദിന്നഅനുപാദാനിയാ ഇന്ദ്രിയാ ചിത്തസമുട്ഠാനാനം രൂപാനം ഇന്ദ്രിയപച്ചയേന പച്ചയോ. (൨)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ച അനുപാദിന്നഅനുപാദാനിയസ്സ ച ധമ്മസ്സ ഇന്ദ്രിയപച്ചയേന പച്ചയോ – അനുപാദിന്നഅനുപാദാനിയാ ഇന്ദ്രിയാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഇന്ദ്രിയപച്ചയേന പച്ചയോ. (൩)

ഝാനപച്ചയോ

൭൬. ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ ഝാനപച്ചയേന പച്ചയോ – ഉപാദിന്നുപാദാനിയാനി ഝാനങ്ഗാനി സമ്പയുത്തകാനം ഖന്ധാനം ഝാനപച്ചയേന പച്ചയോ; പടിസന്ധിക്ഖണേ ഉപാദിന്നുപാദാനിയാനി ഝാനങ്ഗാനി സമ്പയുത്തകാനം ഖന്ധാനം കടത്താ ച രൂപാനം ഝാനപച്ചയേന പച്ചയോ. (൧)

ഉപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ ഝാനപച്ചയേന പച്ചയോ – ഉപാദിന്നുപാദാനിയാനി ഝാനങ്ഗാനി ചിത്തസമുട്ഠാനാനം രൂപാനം ഝാനപച്ചയേന പച്ചയോ. (൨)

ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച ധമ്മസ്സ ഝാനപച്ചയേന പച്ചയോ – ഉപാദിന്നുപാദാനിയാനി ഝാനങ്ഗാനി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഝാനപച്ചയേന പച്ചയോ. (൩)

അനുപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ ഝാനപച്ചയേന പച്ചയോ – അനുപാദിന്നുപാദാനിയാനി ഝാനങ്ഗാനി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഝാനപച്ചയേന പച്ചയോ. (൧)

൭൭. അനുപാദിന്നഅനുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ ഝാനപച്ചയേന പച്ചയോ – അനുപാദിന്നഅനുപാദാനിയാനി ഝാനങ്ഗാനി സമ്പയുത്തകാനം ഖന്ധാനം ഝാനപച്ചയേന പച്ചയോ. (൧)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ ഝാനപച്ചയേന പച്ചയോ – അനുപാദിന്നഅനുപാദാനിയാനി ഝാനങ്ഗാനി ചിത്തസമുട്ഠാനാനം രൂപാനം ഝാനപച്ചയേന പച്ചയോ. (൨)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ച അനുപാദിന്നഅനുപാദാനിയസ്സ ച ധമ്മസ്സ ഝാനപച്ചയേന പച്ചയോ – അനുപാദിന്നഅനുപാദാനിയാനി ഝാനങ്ഗാനി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഝാനപച്ചയേന പച്ചയോ. (൩)

മഗ്ഗപച്ചയോ

൭൮. ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ മഗ്ഗപച്ചയേന പച്ചയോ – ഉപാദിന്നുപാദാനിയാനി മഗ്ഗങ്ഗാനി സമ്പയുത്തകാനം ഖന്ധാനം മഗ്ഗപച്ചയേന പച്ചയോ. പടിസന്ധിക്ഖണേ…പേ…. (൧)

ഉപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ മഗ്ഗപച്ചയേന പച്ചയോ – ഉപാദിന്നുപാദാനിയാനി മഗ്ഗങ്ഗാനി ചിത്തസമുട്ഠാനാനം രൂപാനം മഗ്ഗപച്ചയേന പച്ചയോ. (൨)

ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച ധമ്മസ്സ മഗ്ഗപച്ചയേന പച്ചയോ – ഉപാദിന്നുപാദാനിയാനി മഗ്ഗങ്ഗാനി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം മഗ്ഗപച്ചയേന പച്ചയോ. (൩)

അനുപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ മഗ്ഗപച്ചയേന പച്ചയോ – അനുപാദിന്നുപാദാനിയാനി മഗ്ഗങ്ഗാനി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം മഗ്ഗപച്ചയേന പച്ചയോ. (൧)

അനുപാദിന്നഅനുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ മഗ്ഗപച്ചയേന പച്ചയോ – അനുപാദിന്നഅനുപാദാനിയാനി മഗ്ഗങ്ഗാനി സമ്പയുത്തകാനം ഖന്ധാനം മഗ്ഗപച്ചയേന പച്ചയോ. (൧)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ മഗ്ഗപച്ചയേന പച്ചയോ – അനുപാദിന്നഅനുപാദാനിയാനി മഗ്ഗങ്ഗാനി ചിത്തസമുട്ഠാനാനം രൂപാനം മഗ്ഗപച്ചയേന പച്ചയോ. (൨)

അനുപാദിന്നഅനുപാദാനിയോ ധമ്മോ അനുപാദിന്നുപാദാനിയസ്സ ച അനുപാദിന്നഅനുപാദാനിയസ്സ ച ധമ്മസ്സ മഗ്ഗപച്ചയേന പച്ചയോ – അനുപാദിന്നഅനുപാദാനിയാനി മഗ്ഗങ്ഗാനി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം മഗ്ഗപച്ചയേന പച്ചയോ. (൩)

സമ്പയുത്തപച്ചയോ

൭൯. ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ സമ്പയുത്തപച്ചയേന പച്ചയോ – ഉപാദിന്നുപാദാനിയോ ഏകോ ഖന്ധോ തിണ്ണന്നം ഖന്ധാനം സമ്പയുത്തപച്ചയേന പച്ചയോ…പേ… ദ്വേ ഖന്ധാ ദ്വിന്നം ഖന്ധാനം…പേ… പടിസന്ധിക്ഖണേ…പേ…. (൧)

അനുപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ സമ്പയുത്തപച്ചയേന പച്ചയോ – അനുപാദിന്നുപാദാനിയോ ഏകോ ഖന്ധോ തിണ്ണന്നം ഖന്ധാനം സമ്പയുത്തപച്ചയേന പച്ചയോ…പേ… ദ്വേ ഖന്ധാ ദ്വിന്നം ഖന്ധാനം…പേ…. (൧)

അനുപാദിന്നഅനുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ സമ്പയുത്തപച്ചയേന പച്ചയോ – അനുപാദിന്നഅനുപാദാനിയോ ഏകോ ഖന്ധോ തിണ്ണന്നം ഖന്ധാനം സമ്പയുത്തപച്ചയേന പച്ചയോ…പേ… ദ്വേ ഖന്ധാ ദ്വിന്നം ഖന്ധാനം…പേ…. (൧)

വിപ്പയുത്തപച്ചയോ

൮൦. ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പുരേജാതം, പച്ഛാജാതം. സഹജാതാ – പടിസന്ധിക്ഖണേ ഉപാദിന്നുപാദാനിയാ ഖന്ധാ കടത്താരൂപാനം വിപ്പയുത്തപച്ചയേന പച്ചയോ. ഖന്ധാ വത്ഥുസ്സ വിപ്പയുത്തപച്ചയേന പച്ചയോ. വത്ഥു ഖന്ധാനം വിപ്പയുത്തപച്ചയേന പച്ചയോ. പുരേജാതം – ചക്ഖായതനം ചക്ഖുവിഞ്ഞാണസ്സ വിപ്പയുത്തപച്ചയേന പച്ചയോ…പേ… കായായതനം കായവിഞ്ഞാണസ്സ വിപ്പയുത്തപച്ചയേന പച്ചയോ. വത്ഥു ഉപാദിന്നുപാദാനിയാനം ഖന്ധാനം വിപ്പയുത്തപച്ചയേന പച്ചയോ. പച്ഛാജാതാ – ഉപാദിന്നുപാദാനിയാ ഖന്ധാ പുരേജാതസ്സ ഇമസ്സ ഉപാദിന്നുപാദാനിയസ്സ കായസ്സ വിപ്പയുത്തപച്ചയേന പച്ചയോ. (൧)

ഉപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പുരേജാതം, പച്ഛാജാതം. സഹജാതാ – ഉപാദിന്നുപാദാനിയാ ഖന്ധാ ചിത്തസമുട്ഠാനാനം രൂപാനം വിപ്പയുത്തപച്ചയേന പച്ചയോ. പുരേജാതം – വത്ഥു അനുപാദിന്നുപാദാനിയാനം ഖന്ധാനം വിപ്പയുത്തപച്ചയേന പച്ചയോ. പച്ഛാജാതാ – ഉപാദിന്നുപാദാനിയാ ഖന്ധാ പുരേജാതസ്സ ഇമസ്സ അനുപാദിന്നുപാദാനിയസ്സ കായസ്സ വിപ്പയുത്തപച്ചയേന പച്ചയോ. (൨)

ഉപാദിന്നുപാദാനിയോ ധമ്മോ അനുപാദിന്നഅനുപാദാനിയസ്സ ധമ്മസ്സ വിപ്പയുത്തപച്ചയേന പച്ചയോ. പുരേജാതം – വത്ഥു അനുപാദിന്നഅനുപാദാനിയാനം ഖന്ധാനം വിപ്പയുത്തപച്ചയേന പച്ചയോ. (൩)

ഉപാദിന്നുപാദാനിയോ ധമ്മോ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച ധമ്മസ്സ വിപ്പയുത്തപച്ചയേന പച്ചയോ. പച്ഛാജാതാ – ഉപാദിന്നുപാദാനിയാ ഖന്ധാ പുരേജാതസ്സ ഇമസ്സ ഉപാദിന്നുപാദാനിയസ്സ ച അനുപാദിന്നുപാദാനിയസ്സ ച കായസ്സ വിപ്പയുത്തപച്ചയേന പച്ചയോ. (൪)

൮൧. അനുപാദിന്നുപാദാനിയോ ധമ്മോ അനുപാദിന്നുപാദാനിയസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പച്ഛാജാതം. സഹജാതാ – അനുപാദിന്നുപാദാനിയാ ഖന്ധാ ചിത്തസമുട്ഠാനാനം രൂപാനം വിപ്പയുത്തപച്ചയേന പച്ചയോ. പച്ഛാജാതാ – അനുപാദിന്നുപാദാനിയാ ഖന്ധാ പുരേജാതസ്സ ഇമസ്സ അനുപാദിന്നുപാദാനിയസ്സ കായസ്സ വിപ്പയുത്തപച്ചയേന പച്ചയോ. (൧)