൧. വിഭങ്ഗവാരോ

ഹേതുപച്ചയോ

൪൦൧. കുസലോ ധമ്മോ കുസലസ്സ ധമ്മസ്സ ഹേതുപച്ചയേന പച്ചയോ – കുസലാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. കുസലോ ധമ്മോ അബ്യാകതസ്സ ധമ്മസ്സ ഹേതുപച്ചയേന പച്ചയോ – കുസലാ ഹേതൂ ചിത്തസമുട്ഠാനാനം രൂപാനം ഹേതുപച്ചയേന പച്ചയോ. കുസലോ ധമ്മോ കുസലസ്സ ച അബ്യാകതസ്സ ച ധമ്മസ്സ ഹേതുപച്ചയേന പച്ചയോ – കുസലാ ഹേതൂ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ. (൩)

൪൦൨. അകുസലോ ധമ്മോ അകുസലസ്സ ധമ്മസ്സ ഹേതുപച്ചയേന പച്ചയോ – അകുസലാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. അകുസലോ ധമ്മോ അബ്യാകതസ്സ ധമ്മസ്സ ഹേതുപച്ചയേന പച്ചയോ – അകുസലാ ഹേതൂ ചിത്തസമുട്ഠാനാനം രൂപാനം ഹേതുപച്ചയേന പച്ചയോ. അകുസലോ ധമ്മോ അകുസലസ്സ ച അബ്യാകതസ്സ ച ധമ്മസ്സ ഹേതുപച്ചയേന പച്ചയോ – അകുസലാ ഹേതൂ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ. (൩)

൪൦൩. അബ്യാകതോ ധമ്മോ അബ്യാകതസ്സ ധമ്മസ്സ ഹേതുപച്ചയേന പച്ചയോ – വിപാകാബ്യാകതാ കിരിയാബ്യാകതാ ഹേതൂ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ; പടിസന്ധിക്ഖണേ വിപാകാബ്യാകതാ ഹേതൂ സമ്പയുത്തകാനം ഖന്ധാനം കടത്താ ച രൂപാനം ഹേതുപച്ചയേന പച്ചയോ. (൧)

ആരമ്മണപച്ചയോ

൪൦൪. കുസലോ ധമ്മോ കുസലസ്സ ധമ്മസ്സ ആരമ്മണപച്ചയേന പച്ചയോ – ദാനം ദത്വാ സീലം സമാദിയിത്വാ ഉപോസഥകമ്മം കത്വാ തം പച്ചവേക്ഖതി, പുബ്ബേ സുചിണ്ണാനി പച്ചവേക്ഖതി, ഝാനാ വുട്ഠഹിത്വാ ഝാനം പച്ചവേക്ഖതി, സേക്ഖാ ഗോത്രഭും പച്ചവേക്ഖന്തി, വോദാനം പച്ചവേക്ഖന്തി, സേക്ഖാ മഗ്ഗാ വുട്ഠഹിത്വാ മഗ്ഗം പച്ചവേക്ഖന്തി, സേക്ഖാ വാ പുഥുജ്ജനാ വാ കുസലം അനിച്ചതോ ദുക്ഖതോ അനത്തതോ വിപസ്സന്തി, ചേതോപരിയഞാണേന കുസലചിത്തസമങ്ഗിസ്സ ചിത്തം ജാനന്തി. ആകാസാനഞ്ചായതനകുസലം വിഞ്ഞാണഞ്ചായതനകുസലസ്സ ആരമ്മണപച്ചയേന പച്ചയോ. ആകിഞ്ചഞ്ഞായതനകുസലം നേവസഞ്ഞാനാസഞ്ഞായതനകുസലസ്സ ആരമ്മണപച്ചയേന പച്ചയോ. കുസലാ ഖന്ധാ ഇദ്ധിവിധഞാണസ്സ ചേതോപരിയഞാണസ്സ പുബ്ബേനിവാസാനുസ്സതിഞാണസ്സ യഥാകമ്മൂപഗഞാണസ്സ അനാഗതംസഞാണസ്സ ആരമ്മണപച്ചയേന പച്ചയോ. (൧)

൪൦൫. കുസലോ ധമ്മോ അകുസലസ്സ ധമ്മസ്സ ആരമ്മണപച്ചയേന പച്ചയോ – ദാനം ദത്വാ സീലം സമാദിയിത്വാ ഉപോസഥകമ്മം കത്വാ തം അസ്സാദേതി അഭിനന്ദതി; തം ആരബ്ഭ രാഗോ ഉപ്പജ്ജതി, ദിട്ഠി ഉപ്പജ്ജതി, വിചികിച്ഛാ ഉപ്പജ്ജതി, ഉദ്ധച്ചം ഉപ്പജ്ജതി, ദോമനസ്സം ഉപ്പജ്ജതി. പുബ്ബേ സുചിണ്ണാനി അസ്സാദേതി അഭിനന്ദതി; തം ആരബ്ഭ രാഗോ ഉപ്പജ്ജതി, ദിട്ഠി ഉപ്പജ്ജതി, വിചികിച്ഛാ ഉപ്പജ്ജതി, ഉദ്ധച്ചം ഉപ്പജ്ജതി, ദോമനസ്സം ഉപ്പജ്ജതി. ഝാനാ വുട്ഠഹിത്വാ ഝാനം അസ്സാദേതി അഭിനന്ദതി; തം ആരബ്ഭ രാഗോ ഉപ്പജ്ജതി, ദിട്ഠി ഉപ്പജ്ജതി, വിചികിച്ഛാ ഉപ്പജ്ജതി, ഉദ്ധച്ചം ഉപ്പജ്ജതി. ഝാനേ പരിഹീനേ വിപ്പടിസാരിസ്സ ദോമനസ്സം ഉപ്പജ്ജതി. (൨)

൪൦൬. കുസലോ ധമ്മോ അബ്യാകതസ്സ ധമ്മസ്സ ആരമ്മണപച്ചയേന പച്ചയോ – അരഹാ മഗ്ഗാ വുട്ഠഹിത്വാ മഗ്ഗം പച്ചവേക്ഖതി; പുബ്ബേ സുചിണ്ണാനി പച്ചവേക്ഖതി; കുസലം അനിച്ചതോ ദുക്ഖതോ അനത്തതോ വിപ്പസ്സതി; ചേതോപരിയഞാണേന കുസലചിത്തസമങ്ഗിസ്സ ചിത്തം ജാനാതി. സേക്ഖാ വാ പുഥുജ്ജനാ വാ കുസലം അനിച്ചതോ ദുക്ഖതോ അനത്തതോ വിപസ്സന്തി, കുസലേ നിരുദ്ധേ വിപാകോ തദാരമ്മണതാ ഉപ്പജ്ജതി. കുസലം അസ്സാദേതി അഭിനന്ദതി; തം ആരബ്ഭ രാഗോ ഉപ്പജ്ജതി, ദിട്ഠി ഉപ്പജ്ജതി, വിചികിച്ഛാ ഉപ്പജ്ജതി, ഉദ്ധച്ചം ഉപ്പജ്ജതി, ദോമനസ്സം ഉപ്പജ്ജതി, അകുസലേ നിരുദ്ധേ വിപാകോ തദാരമ്മണതാ ഉപ്പജ്ജതി. ആകാസാനഞ്ചായതനകുസലം വിഞ്ഞാണഞ്ചായതനവിപാകസ്സ ച, കിരിയസ്സ ച ആരമ്മണപച്ചയേന പച്ചയോ. ആകിഞ്ചഞ്ഞായതനകുസലം നേവസഞ്ഞാനാസഞ്ഞായതനവിപാകസ്സ ച, കിരിയസ്സ ച ആരമ്മണപച്ചയേന പച്ചയോ. കുസലാ ഖന്ധാ ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൩)

൪൦൭. അകുസലോ ധമ്മോ അകുസലസ്സ ധമ്മസ്സ ആരമ്മണപച്ചയേന പച്ചയോ – രാഗം അസ്സാദേതി അഭിനന്ദതി; തം ആരബ്ഭ രാഗോ ഉപ്പജ്ജതി, ദിട്ഠി ഉപ്പജ്ജതി, വിചികിച്ഛാ ഉപ്പജ്ജതി, ഉദ്ധച്ചം ഉപ്പജ്ജതി, ദോമനസ്സം ഉപ്പജ്ജതി. ദിട്ഠിം അസ്സാദേതി അഭിനന്ദതി; തം ആരബ്ഭ രാഗോ ഉപ്പജ്ജതി, ദിട്ഠി ഉപ്പജ്ജതി, വിചികിച്ഛാ ഉപ്പജ്ജതി, ഉദ്ധച്ചം ഉപ്പജ്ജതി, ദോമനസ്സം ഉപ്പജ്ജതി. വിചികിച്ഛം ആരബ്ഭ വിചികിച്ഛാ ഉപ്പജ്ജതി, ദിട്ഠി ഉപ്പജ്ജതി, ഉദ്ധച്ചം ഉപ്പജ്ജതി, ദോമനസ്സം ഉപ്പജ്ജതി. ഉദ്ധച്ചം ആരബ്ഭ ഉദ്ധച്ചം ഉപ്പജ്ജതി, ദിട്ഠി ഉപ്പജ്ജതി, വിചികിച്ഛാ ഉപ്പജ്ജതി, ദോമനസ്സം ഉപ്പജ്ജതി. ദോമനസ്സം ആരബ്ഭ ദോമനസ്സം ഉപ്പജ്ജതി, ദിട്ഠി ഉപ്പജ്ജതി, വിചികിച്ഛാ ഉപ്പജ്ജതി, ഉദ്ധച്ചം ഉപ്പജ്ജതി. (൧)

൪൦൮. അകുസലോ ധമ്മോ കുസലസ്സ ധമ്മസ്സ ആരമ്മണപച്ചയേന പച്ചയോ – സേക്ഖാ പഹീനേ കിലേസേ [പഹീനകിലേസേ (സ്യാ.)] പച്ചവേക്ഖന്തി, വിക്ഖമ്ഭിതേ കിലേസേ [വിക്ഖമ്ഭിതകിലേസേ (സ്യാ.)] പച്ചവേക്ഖന്തി, പുബ്ബേ സമുദാചിണ്ണേ കിലേസേ ജാനന്തി, സേക്ഖാ വാ പുഥുജ്ജനാ വാ അകുസലം അനിച്ചതോ ദുക്ഖതോ അനത്തതോ വിപസ്സന്തി, ചേതോപരിയഞാണേന അകുസലചിത്തസമങ്ഗിസ്സ ചിത്തം ജാനന്തി. അകുസലാ ഖന്ധാ ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ അനാഗതംസഞാണസ്സ ആരമ്മണപച്ചയേന പച്ചയോ. (൨)

൪൦൯. അകുസലോ ധമ്മോ അബ്യാകതസ്സ ധമ്മസ്സ ആരമ്മണപച്ചയേന പച്ചയോ – അരഹാ പഹീനേ കിലേസേ പച്ചവേക്ഖതി, പുബ്ബേ സമുദാചിണ്ണേ കിലേസേ ജാനാതി, അകുസലം അനിച്ചതോ ദുക്ഖതോ അനത്തതോ വിപസ്സതി, ചേതോപരിയഞാണേന അകുസലചിത്തസമങ്ഗിസ്സ ചിത്തം ജാനാതി, സേക്ഖാ വാ പുഥുജ്ജനാ വാ അകുസലം അനിച്ചതോ ദുക്ഖതോ അനത്തതോ വിപസ്സന്തി, കുസലേ നിരുദ്ധേ വിപാകോ തദാരമ്മണതാ ഉപ്പജ്ജതി. അകുസലം അസ്സാദേതി അഭിനന്ദതി; തം ആരബ്ഭ രാഗോ ഉപ്പജ്ജതി, ദിട്ഠി ഉപ്പജ്ജതി, വിചികിച്ഛാ ഉപ്പജ്ജതി, ഉദ്ധച്ചം ഉപ്പജ്ജതി, ദോമനസ്സം ഉപ്പജ്ജതി. അകുസലേ നിരുദ്ധേ വിപാകോ തദാരമ്മണതാ ഉപ്പജ്ജതി. അകുസലാ ഖന്ധാ ചേതോപരിയഞാണസ്സ പുബ്ബേനിവാസാനുസ്സതിഞാണസ്സ യഥാകമ്മൂപഗഞാണസ്സ അനാഗതംസഞാണസ്സ ആവജ്ജനായ ആരമ്മണപച്ചയേന പച്ചയോ. (൩)

൪൧൦. അബ്യാകതോ ധമ്മോ അബ്യാകതസ്സ ധമ്മസ്സ ആരമ്മണപച്ചയേന പച്ചയോ – അരഹാ ഫലം പച്ചവേക്ഖതി, നിബ്ബാനം പച്ചവേക്ഖതി. നിബ്ബാനം ഫലസ്സ ആവജ്ജനായ ആരമ്മണപച്ചയേന പച്ചയോ. അരഹാ ചക്ഖും അനിച്ചതോ ദുക്ഖതോ അനത്തതോ വിപസ്സതി. സോതം… ഘാനം… ജിവ്ഹം… കായം… രൂപേ… സദ്ദേ… ഗന്ധേ… രസേ… ഫോട്ഠബ്ബേ… വത്ഥും… വിപാകാബ്യാകതേ കിരിയാബ്യാകതേ ഖന്ധേ അനിച്ചതോ ദുക്ഖതോ അനത്തതോ വിപസ്സതി, ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി, ചേതോപരിയഞാണേന വിപാകാബ്യാകതകിരിയാബ്യാകതചിത്തസമങ്ഗിസ്സ ചിത്തം ജാനാതി. ആകാസാനഞ്ചായതനകിരിയം വിഞ്ഞാണഞ്ചായതനകിരിയസ്സ ആരമ്മണപച്ചയേന പച്ചയോ. ആകിഞ്ചഞ്ഞായതനകിരിയം നേവസഞ്ഞാനാസഞ്ഞായതനകിരിയസ്സ ആരമ്മണപച്ചയേന പച്ചയോ. രൂപായതനം ചക്ഖുവിഞ്ഞാണസ്സ ആരമ്മണപച്ചയേന പച്ചയോ. സദ്ദായതനം സോതവിഞ്ഞാണസ്സ… ഗന്ധായതനം ഘാനവിഞ്ഞാണസ്സ… രസായതനം ജിവ്ഹാവിഞ്ഞാണസ്സ … ഫോട്ഠബ്ബായതനം കായവിഞ്ഞാണസ്സ ആരമ്മണപച്ചയേന പച്ചയോ. അബ്യാകതാ ഖന്ധാ ഇദ്ധിവിധഞാണസ്സ, ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, അനാഗതംസഞാണസ്സ, ആവജ്ജനായ ആരമ്മണപച്ചയേന പച്ചയോ. (൧)

൪൧൧. അബ്യാകതോ ധമ്മോ കുസലസ്സ ധമ്മസ്സ ആരമ്മണപച്ചയേന പച്ചയോ – സേക്ഖാ ഫലം പച്ചവേക്ഖന്തി, നിബ്ബാനം പച്ചവേക്ഖന്തി. നിബ്ബാനം ഗോത്രഭുസ്സ വോദാനസ്സ മഗ്ഗസ്സ ആരമ്മണപച്ചയേന പച്ചയോ. സേക്ഖാ വാ പുഥുജ്ജനാ വാ ചക്ഖും അനിച്ചതോ ദുക്ഖതോ അനത്തതോ വിപ്പസ്സന്തി. സോതം… ഘാനം… ജിവ്ഹം… കായം… രൂപേ… സദ്ദേ… ഗന്ധേ… രസേ… ഫോട്ഠബ്ബേ… വത്ഥും… വിപാകാബ്യാകതേ കിരിയാബ്യാകതേ ഖന്ധേ അനിച്ചതോ ദുക്ഖതോ അനത്തതോ വിപസ്സന്തി, ദിബ്ബേന ചക്ഖുനാ രൂപം പസ്സന്തി, ദിബ്ബായ സോതധാതുയാ സദ്ദം സുണന്തി, ചേതോപരിയഞാണേന വിപാകാബ്യാകതകിരിയാബ്യാകതചിത്തസമങ്ഗിസ്സ ചിത്തം ജാനന്തി. അബ്യാകതാ ഖന്ധാ ഇദ്ധിവിധഞാണസ്സ ചേതോപരിയഞാണസ്സ പുബ്ബേനിവാസാനുസ്സതിഞാണസ്സ അനാഗതംസഞാണസ്സ ആരമ്മണപച്ചയേന പച്ചയോ.

൪൧൨. അബ്യാകതോ ധമ്മോ അകുസലസ്സ ധമ്മസ്സ ആരമ്മണപച്ചയേന പച്ചയോ – ചക്ഖും അസ്സാദേതി അഭിനന്ദതി; തം ആരബ്ഭ രാഗോ ഉപ്പജ്ജതി, ദിട്ഠി ഉപ്പജ്ജതി, വിചികിച്ഛാ ഉപ്പജ്ജതി, ഉദ്ധച്ചം ഉപ്പജ്ജതി, ദോമനസ്സം ഉപ്പജ്ജതി. സോതം… ഘാനം… ജിവ്ഹം… കായം… രൂപേ… സദ്ദേ… ഗന്ധേ… രസേ… ഫോട്ഠബ്ബേ… വത്ഥും… വിപാകാബ്യാകതേ കിരിയാബ്യാകതേ ഖന്ധേ അസ്സാദേതി അഭിനന്ദതി; തം ആരബ്ഭ രാഗോ ഉപ്പജ്ജതി, ദിട്ഠി ഉപ്പജ്ജതി, വിചികിച്ഛാ ഉപ്പജ്ജതി, ഉദ്ധച്ചം ഉപ്പജ്ജതി, ദോമനസ്സം ഉപ്പജ്ജതി. (൩)

അധിപതിപച്ചയോ

൪൧൩. കുസലോ ധമ്മോ കുസലസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി, സഹജാതാധിപതി. ആരമ്മണാധിപതി – ദാനം ദത്വാ സീലം സമാദിയിത്വാ ഉപോസഥകമ്മം കത്വാ, തം ഗരും കത്വാ പച്ചവേക്ഖതി, പുബ്ബേ സുചിണ്ണാനി ഗരും കത്വാ പച്ചവേക്ഖതി, ഝാനാ വുട്ഠഹിത്വാ ഝാനം ഗരും കത്വാ പച്ചവേക്ഖതി. സേക്ഖാ ഗോത്രഭും ഗരും കത്വാ പച്ചവേക്ഖന്തി, വോദാനം ഗരും കത്വാ പച്ചവേക്ഖന്തി. സേക്ഖാ മഗ്ഗാ വുട്ഠഹിത്വാ മഗ്ഗം ഗരും കത്വാ പച്ചവേക്ഖന്തി. സഹജാതാധിപതി – കുസലാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (൧)

൪൧൪. കുസലോ ധമ്മോ അകുസലസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി – ദാനം ദത്വാ സീലം സമാദിയിത്വാ ഉപോസഥകമ്മം കത്വാ, തം ഗരും കത്വാ അസ്സാദേതി അഭിനന്ദതി; തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി, പുബ്ബേ സുചിണ്ണാനി ഗരും കത്വാ അസ്സാദേതി അഭിനന്ദതി; തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. ഝാനാ വുട്ഠഹിത്വാ ഝാനം ഗരും കത്വാ അസ്സാദേതി അഭിനന്ദതി; തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി.

കുസലോ ധമ്മോ അബ്യാകതസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി, സഹജാതാധിപതി. ആരമ്മണാധിപതി – അരഹാ മഗ്ഗാ വുട്ഠഹിത്വാ മഗ്ഗം ഗരും കത്വാ പച്ചവേക്ഖതി. സഹജാതാധിപതി – കുസലാധിപതി ചിത്തസമുട്ഠാനാനം രൂപാനം അധിപതിപച്ചയേന പച്ചയോ. (൩)

കുസലോ ധമ്മോ കുസലസ്സ ച അബ്യാകതസ്സ ച ധമ്മസ്സ അധിപതിപച്ചയേന പച്ചയോ. സഹജാതാധിപതി – കുസലാധിപതി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (൪)

൪൧൫. അകുസലോ ധമ്മോ അകുസലസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി, സഹജാതാധിപതി. ആരമ്മണാധിപതി – രാഗം ഗരും കത്വാ അസ്സാദേതി അഭിനന്ദതി; തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. ദിട്ഠിം ഗരും കത്വാ അസ്സാദേതി അഭിനന്ദതി; തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. സഹജാതാധിപതി – അകുസലാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (൧)

അകുസലോ ധമ്മോ അബ്യാകതസ്സ ധമ്മസ്സ അധിപതിപച്ചയേന പച്ചയോ. സഹജാതാധിപതി – അകുസലാധിപതി ചിത്തസമുട്ഠാനാനം രൂപാനം അധിപതിപച്ചയേന പച്ചയോ. (൨)

അകുസലോ ധമ്മോ അകുസലസ്സ ച അബ്യാകതസ്സ ച ധമ്മസ്സ അധിപതി പച്ചയേന പച്ചയോ. സഹജാതാധിപതി – അകുസലാധിപതി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (൩)

൪൧൬. അബ്യാകതോ ധമ്മോ അബ്യാകതസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി, സഹജാതാധിപതി. ആരമ്മണാധിപതി – അരഹാ ഫലം ഗരും കത്വാ പച്ചവേക്ഖതി, നിബ്ബാനം ഗരും കത്വാ പച്ചവേക്ഖതി. നിബ്ബാനം ഫലസ്സ അധിപതിപച്ചയേന പച്ചയോ. സഹജാതാധിപതി – വിപാകാബ്യാകതകിരിയാബ്യാകതാധിപതി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (൧)

അബ്യാകതോ ധമ്മോ കുസലസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി – സേക്ഖാ ഫലം ഗരും കത്വാ പച്ചവേക്ഖന്തി, നിബ്ബാനം ഗരും കത്വാ പച്ചവേക്ഖന്തി. നിബ്ബാനം ഗോത്രഭുസ്സ, വോദാനസ്സ, മഗ്ഗസ്സ അധിപതിപച്ചയേന പച്ചയോ. (൨)

അബ്യാകതോ ധമ്മോ അകുസലസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി – ചക്ഖും ഗരും കത്വാ അസ്സാദേതി അഭിനന്ദതി; തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. സോതം… ഘാനം… ജിവ്ഹം… കായം… രൂപേ… സദ്ദേ… ഗന്ധേ… രസേ… ഫോട്ഠബ്ബേ… വത്ഥും… വിപാകാബ്യാകതേ കിരിയാബ്യാകതേ ഖന്ധേ ഗരും കത്വാ അസ്സാദേതി അഭിനന്ദതി; തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. (൩)

അനന്തരപച്ചയോ

൪൧൭. കുസലോ ധമ്മോ കുസലസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ കുസലാ ഖന്ധാ പച്ഛിമാനം പച്ഛിമാനം കുസലാനം ഖന്ധാനം അനന്തരപച്ചയേന പച്ചയോ. അനുലോമം ഗോത്രഭുസ്സ… അനുലോമം വോദാനസ്സ… ഗോത്രഭു മഗ്ഗസ്സ… വോദാനം മഗ്ഗസ്സ അനന്തരപച്ചയേന പച്ചയോ. (൧)

കുസലോ ധമ്മോ അബ്യാകതസ്സ ധമ്മസ്സ അനന്തരപച്ചയേന പച്ചയോ. കുസലം വുട്ഠാനസ്സ… മഗ്ഗോ ഫലസ്സ… അനുലോമം സേക്ഖായ ഫലസമാപത്തിയാ… നിരോധാ വുട്ഠഹന്തസ്സ നേവസഞ്ഞാനാസഞ്ഞായതനകുസലം ഫലസമാപത്തിയാ അനന്തരപച്ചയേന പച്ചയോ. (൨)

അകുസലോ ധമ്മോ അകുസലസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ അകുസലാ ഖന്ധാ പച്ഛിമാനം പച്ഛിമാനം അകുസലാനം ഖന്ധാനം അനന്തരപച്ചയേന പച്ചയോ. (൧)

അകുസലോ ധമ്മോ അബ്യാകതസ്സ ധമ്മസ്സ അനന്തരപച്ചയേന പച്ചയോ. അകുസലം വുട്ഠാനസ്സ അനന്തരപച്ചയേന പച്ചയോ. (൨)

അബ്യാകതോ ധമ്മോ അബ്യാകതസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ വിപാകാബ്യാകതാ കിരിയാബ്യാകതാ ഖന്ധാ പച്ഛിമാനം പച്ഛിമാനം വിപാകാബ്യാകതാനം കിരിയാബ്യാകതാനം ഖന്ധാനം അനന്തരപച്ചയേന പച്ചയോ. ഭവങ്ഗം ആവജ്ജനായ… കിരിയം വുട്ഠാനസ്സ… അരഹതോ അനുലോമം ഫലസമാപത്തിയാ… നിരോധാ വുട്ഠഹന്തസ്സ നേവസഞ്ഞാനാസഞ്ഞായതനകിരിയം ഫലസമാപത്തിയാ അനന്തരപച്ചയേന പച്ചയോ. (൧)

അബ്യാകതോ ധമ്മോ കുസലസ്സ ധമ്മസ്സ അനന്തരപച്ചയേന പച്ചയോ – ആവജ്ജനാ കുസലാനം ഖന്ധാനം അനന്തരപച്ചയേന പച്ചയോ. (൨)

അബ്യാകതോ ധമ്മോ അകുസലസ്സ ധമ്മസ്സ അനന്തരപച്ചയേന പച്ചയോ – ആവജ്ജനാ അകുസലാനം ഖന്ധാനം അനന്തരപച്ചയേന പച്ചയോ. (൩)

സമനന്തരപച്ചയോ

൪൧൮. കുസലോ ധമ്മോ കുസലസ്സ ധമ്മസ്സ സമനന്തരപച്ചയേന പച്ചയോ – പുരിമാ പുരിമാ കുസലാ ഖന്ധാ പച്ഛിമാനം പച്ഛിമാനം കുസലാനം ഖന്ധാനം സമനന്തരപച്ചയേന പച്ചയോ. അനുലോമം ഗോത്രഭുസ്സ… അനുലോമം വോദാനസ്സ… ഗോത്രഭു മഗ്ഗസ്സ… വോദാനം മഗ്ഗസ്സ സമനന്തരപച്ചയേന പച്ചയോ.

കുസലോ ധമ്മോ അബ്യാകതസ്സ ധമ്മസ്സ സമനന്തരപച്ചയേന പച്ചയോ. കുസലം വുട്ഠാനസ്സ… മഗ്ഗോ ഫലസ്സ… അനുലോമം സേക്ഖായ ഫലസമാപത്തിയാ… നിരോധാ വുട്ഠഹന്തസ്സ നേവസഞ്ഞാനാസഞ്ഞായതനകുസലം ഫലസമാപത്തിയാ സമനന്തരപച്ചയേന പച്ചയോ. (൨)

അകുസലോ ധമ്മോ അകുസലസ്സ ധമ്മസ്സ സമനന്തരപച്ചയേന പച്ചയോ – പുരിമാ പുരിമാ അകുസലാ ഖന്ധാ പച്ഛിമാനം പച്ഛിമാനം അകുസലാനം ഖന്ധാനം സമനന്തരപച്ചയേന പച്ചയോ. (൧)

അകുസലോ ധമ്മോ അബ്യാകതസ്സ ധമ്മസ്സ സമനന്തരപച്ചയേന പച്ചയോ – അകുസലം വുട്ഠാനസ്സ സമനന്തരപച്ചയേന പച്ചയോ. (൨)

അബ്യാകതോ ധമ്മോ അബ്യാകതസ്സ ധമ്മസ്സ സമനന്തരപച്ചയേന പച്ചയോ – പുരിമാ പുരിമാ വിപാകാബ്യാകതാ കിരിയാബ്യാകതാ ഖന്ധാ പച്ഛിമാനം പച്ഛിമാനം വിപാകാബ്യാകതാനം കിരിയാബ്യാകതാനം ഖന്ധാനം സമനന്തരപച്ചയേന പച്ചയോ. ഭവങ്ഗം ആവജ്ജനായ… കിരിയം വുട്ഠാനസ്സ… അരഹതോ അനുലോമം ഫലസമാപത്തിയാ… നിരോധാ വുട്ഠഹന്തസ്സ നേവസഞ്ഞാനാസഞ്ഞായതനകിരിയം ഫലസമാപത്തിയാ സമനന്തരപച്ചയേന പച്ചയോ. (൧)

അബ്യാകതോ ധമ്മോ കുസലസ്സ ധമ്മസ്സ സമനന്തരപച്ചയേന പച്ചയോ – ആവജ്ജനാ കുസലാനം ഖന്ധാനം സമനന്തരപച്ചയേന പച്ചയോ. (൨)

അബ്യാകതോ ധമ്മോ അകുസലസ്സ ധമ്മസ്സ സമനന്തരപച്ചയേന പച്ചയോ – ആവജ്ജനാ അകുസലാനം ഖന്ധാനം സമനന്തരപച്ചയേന പച്ചയോ. (൩)

സഹജാതപച്ചയോ

൪൧൯. കുസലോ ധമ്മോ കുസലസ്സ ധമ്മസ്സ സഹജാതപച്ചയേന പച്ചയോ – കുസലോ ഏകോ ഖന്ധോ തിണ്ണന്നം ഖന്ധാനം സഹജാതപച്ചയേന പച്ചയോ. തയോ ഖന്ധാ ഏകസ്സ ഖന്ധസ്സ സഹജാതപച്ചയേന പച്ചയോ. ദ്വേ ഖന്ധാ ദ്വിന്നം ഖന്ധാനം സഹജാതപച്ചയേന പച്ചയോ. (൧)

കുസലോ ധമ്മോ അബ്യാകതസ്സ ധമ്മസ്സ സഹജാതപച്ചയേന പച്ചയോ – കുസലാ ഖന്ധാ ചിത്തസമുട്ഠാനാനം രൂപാനം സഹജാതപച്ചയേന പച്ചയോ. (൨)

കുസലോ ധമ്മോ കുസലസ്സ ച അബ്യാകതസ്സ ച ധമ്മസ്സ സഹജാതപച്ചയേന പച്ചയോ – കുസലോ ഏകോ ഖന്ധോ തിണ്ണന്നം ഖന്ധാനം ചിത്തസമുട്ഠാനാനഞ്ച രൂപാനം സഹജാതപച്ചയേന പച്ചയോ. തയോ ഖന്ധാ ഏകസ്സ ഖന്ധസ്സ ചിത്തസമുട്ഠാനാനഞ്ച രൂപാനം സഹജാതപച്ചയേന പച്ചയോ. ദ്വേ ഖന്ധാ ദ്വിന്നം ഖന്ധാനം ചിത്തസമുട്ഠാനാനഞ്ച രൂപാനം സഹജാതപച്ചയേന പച്ചയോ. (൩)

അകുസലോ ധമ്മോ അകുസലസ്സ ധമ്മസ്സ സഹജാതപച്ചയേന പച്ചയോ – അകുസലോ ഏകോ ഖന്ധോ തിണ്ണന്നം ഖന്ധാനം സഹജാതപച്ചയേന പച്ചയോ. തയോ ഖന്ധാ ഏകസ്സ ഖന്ധസ്സ സഹജാതപച്ചയേന പച്ചയോ. ദ്വേ ഖന്ധാ ദ്വിന്നം ഖന്ധാനം സഹജാതപച്ചയേന പച്ചയോ. (൧)

അകുസലോ ധമ്മോ അബ്യാകതസ്സ ധമ്മസ്സ സഹജാതപച്ചയേന പച്ചയോ – അകുസലാ ഖന്ധാ ചിത്തസമുട്ഠാനാനം രൂപാനം സഹജാതപച്ചയേന പച്ചയോ. (൨)

അകുസലോ ധമ്മോ അകുസലസ്സ ച അബ്യാകതസ്സ ച ധമ്മസ്സ സഹജാതപച്ചയേന പച്ചയോ – അകുസലോ ഏകോ ഖന്ധോ തിണ്ണന്നം ഖന്ധാനം ചിത്തസമുട്ഠാനാനഞ്ച രൂപാനം സഹജാതപച്ചയേന പച്ചയോ. തയോ ഖന്ധാ ഏകസ്സ ഖന്ധസ്സ ചിത്തസമുട്ഠാനാനഞ്ച രൂപാനം സഹജാതപച്ചയേന പച്ചയോ. ദ്വേ ഖന്ധാ ദ്വിന്നം ഖന്ധാനം ചിത്തസമുട്ഠാനാനഞ്ച രൂപാനം സഹജാതപച്ചയേന പച്ചയോ. (൩)

അബ്യാകതോ ധമ്മോ അബ്യാകതസ്സ ധമ്മസ്സ സഹജാതപച്ചയേന പച്ചയോ – വിപാകാബ്യാകതോ കിരിയാബ്യാകതോ ഏകോ ഖന്ധോ തിണ്ണന്നം ഖന്ധാനം ചിത്തസമുട്ഠാനാനഞ്ച രൂപാനം സഹജാതപച്ചയേന പച്ചയോ. തയോ ഖന്ധാ ഏകസ്സ ഖന്ധസ്സ ചിത്തസമുട്ഠാനാനഞ്ച രൂപാനം സഹജാതപച്ചയേന പച്ചയോ. ദ്വേ ഖന്ധാ ദ്വിന്നം ഖന്ധാനം ചിത്തസമുട്ഠാനാനഞ്ച രൂപാനം സഹജാതപച്ചയേന പച്ചയോ. പടിസന്ധിക്ഖണേ വിപാകാബ്യാകതോ ഏകോ ഖന്ധോ തിണ്ണന്നം ഖന്ധാനം കടത്താ ച രൂപാനം സഹജാതപച്ചയേന പച്ചയോ. തയോ ഖന്ധാ ഏകസ്സ ഖന്ധസ്സ കടത്താ ച രൂപാനം സഹജാതപച്ചയേന പച്ചയോ. ദ്വേ ഖന്ധാ ദ്വിന്നം ഖന്ധാനം കടത്താ ച രൂപാനം സഹജാതപച്ചയേന പച്ചയോ. ഖന്ധാ വത്ഥുസ്സ സഹജാതപച്ചയേന പച്ചയോ. വത്ഥു ഖന്ധാനം സഹജാതപച്ചയേന പച്ചയോ. ഏകം മഹാഭൂതം തിണ്ണന്നം മഹാഭൂതാനം സഹജാതപച്ചയേന പച്ചയോ. തയോ മഹാഭൂതാ ഏകസ്സ മഹാഭൂതസ്സ സഹജാതപച്ചയേന പച്ചയോ. ദ്വേ മഹാഭൂതാ ദ്വിന്നം മഹാഭൂതാനം സഹജാതപച്ചയേന പച്ചയോ. മഹാഭൂതാ ചിത്തസമുട്ഠാനാനം രൂപാനം കടത്താരൂപാനം ഉപാദാരൂപാനം സഹജാതപച്ചയേന പച്ചയോ. ബാഹിരം ഏകം മഹാഭൂതം തിണ്ണന്നം മഹാഭൂതാനം സഹജാതപച്ചയേന പച്ചയോ. തയോ മഹാഭൂതാ ഏകസ്സ മഹാഭൂതസ്സ സഹജാതപച്ചയേന പച്ചയോ. ദ്വേ മഹാഭൂതാ ദ്വിന്നം മഹാഭൂതാനം സഹജാതപച്ചയേന പച്ചയോ. മഹാഭൂതാ ഉപാദാരൂപാനം സഹജാതപച്ചയേന പച്ചയോ. ആഹാരസമുട്ഠാനം ഏകം മഹാഭൂതം തിണ്ണന്നം മഹാഭൂതാനം സഹജാതപച്ചയേന പച്ചയോ. തയോ മഹാഭൂതാ ഏകസ്സ മഹാഭൂതസ്സ സഹജാതപച്ചയേന പച്ചയോ. ദ്വേ മഹാഭൂതാ ദ്വിന്നം മഹാഭൂതാനം സഹജാതപച്ചയേന പച്ചയോ. മഹാഭൂതാ ഉപാദാരൂപാനം സഹജാതപച്ചയേന പച്ചയോ. ഉതുസമുട്ഠാനം ഏകം മഹാഭൂതം തിണ്ണന്നം മഹാഭൂതാനം സഹജാതപച്ചയേന പച്ചയോ. തയോ മഹാഭൂതാ ഏകസ്സ മഹാഭൂതസ്സ സഹജാതപച്ചയേന പച്ചയോ. ദ്വേ മഹാഭൂതാ ദ്വിന്നം മഹാഭൂതാനം സഹജാതപച്ചയേന പച്ചയോ. മഹാഭൂതാ ഉപാദാരൂപാനം സഹജാതപച്ചയേന പച്ചയോ. അസഞ്ഞസത്താനം ഏകം മഹാഭൂതം തിണ്ണന്നം മഹാഭൂതാനം സഹജാതപച്ചയേന പച്ചയോ. തയോ മഹാഭൂതാ ഏകസ്സ മഹാഭൂതസ്സ സഹജാതപച്ചയേന പച്ചയോ. ദ്വേ മഹാഭൂതാ ദ്വിന്നം മഹാഭൂതാനം സഹജാതപച്ചയേന പച്ചയോ. മഹാഭൂതാ കടത്താരൂപാനം ഉപാദാരൂപാനം സഹജാതപച്ചയേന പച്ചയോ. (൧)

കുസലോ ച അബ്യാകതോ ച ധമ്മാ അബ്യാകതസ്സ ധമ്മസ്സ സഹജാതപച്ചയേന പച്ചയോ – കുസലാ ഖന്ധാ ച മഹാഭൂതാ ച ചിത്തസമുട്ഠാനാനം രൂപാനം സഹജാതപച്ചയേന പച്ചയോ. (൧)

അകുസലോ ച അബ്യാകതോ ച ധമ്മാ അബ്യാകതസ്സ ധമ്മസ്സ സഹജാതപച്ചയേന പച്ചയോ – അകുസലാ ഖന്ധാ ച മഹാഭൂതാ ച ചിത്തസമുട്ഠാനാനം രൂപാനം സഹജാതപച്ചയേന പച്ചയോ. (൧)

അഞ്ഞമഞ്ഞപച്ചയോ

൪൨൦. കുസലോ ധമ്മോ കുസലസ്സ ധമ്മസ്സ അഞ്ഞമഞ്ഞപച്ചയേന പച്ചയോ – കുസലോ ഏകോ ഖന്ധോ തിണ്ണന്നം ഖന്ധാനം അഞ്ഞമഞ്ഞപച്ചയേന പച്ചയോ. തയോ ഖന്ധാ ഏകസ്സ ഖന്ധസ്സ അഞ്ഞമഞ്ഞപച്ചയേന പച്ചയോ. ദ്വേ ഖന്ധാ ദ്വിന്നം ഖന്ധാനം അഞ്ഞമഞ്ഞപച്ചയേന പച്ചയോ. (൧)

അകുസലോ ധമ്മോ അകുസലസ്സ ധമ്മസ്സ അഞ്ഞമഞ്ഞപച്ചയേന പച്ചയോ – അകുസലോ ഏകോ ഖന്ധോ തിണ്ണന്നം ഖന്ധാനം അഞ്ഞമഞ്ഞപച്ചയേന പച്ചയോ. തയോ ഖന്ധാ ഏകസ്സ ഖന്ധസ്സ അഞ്ഞമഞ്ഞപച്ചയേന പച്ചയോ. ദ്വേ ഖന്ധാ ദ്വിന്നം ഖന്ധാനം അഞ്ഞമഞ്ഞപച്ചയേന പച്ചയോ. (൧)

അബ്യാകതോ ധമ്മോ അബ്യാകതസ്സ ധമ്മസ്സ അഞ്ഞമഞ്ഞപച്ചയേന പച്ചയോ – വിപാകാബ്യാകതോ കിരിയാബ്യാകതോ ഏകോ ഖന്ധോ തിണ്ണന്നം ഖന്ധാനം അഞ്ഞമഞ്ഞപച്ചയേന പച്ചയോ. തയോ ഖന്ധാ ഏകസ്സ ഖന്ധസ്സ അഞ്ഞമഞ്ഞപച്ചയേന പച്ചയോ. ദ്വേ ഖന്ധാ ദ്വിന്നം ഖന്ധാനം അഞ്ഞമഞ്ഞപച്ചയേന പച്ചയോ. പടിസന്ധിക്ഖണേ വിപാകാബ്യാകതോ ഏകോ ഖന്ധോ തിണ്ണന്നം ഖന്ധാനം വത്ഥുസ്സ ച അഞ്ഞമഞ്ഞപച്ചയേന പച്ചയോ. തയോ ഖന്ധാ ഏകസ്സ ഖന്ധസ്സ വത്ഥുസ്സ ച അഞ്ഞമഞ്ഞപച്ചയേന പച്ചയോ. ദ്വേ ഖന്ധാ ദ്വിന്നം ഖന്ധാനം വത്ഥുസ്സ ച അഞ്ഞമഞ്ഞപച്ചയേന പച്ചയോ. ഖന്ധാ വത്ഥുസ്സ അഞ്ഞമഞ്ഞപച്ചയേന പച്ചയോ. വത്ഥു ഖന്ധാനം അഞ്ഞമഞ്ഞപച്ചയേന പച്ചയോ. ഏകം മഹാഭൂതം തിണ്ണന്നം മഹാഭൂതാനം അഞ്ഞമഞ്ഞപച്ചയേന പച്ചയോ. തയോ മഹാഭൂതാ ഏകസ്സ മഹാഭൂതസ്സ അഞ്ഞമഞ്ഞപച്ചയേന പച്ചയോ. ദ്വേ മഹാഭൂതാ ദ്വിന്നം മഹാഭൂതാനം അഞ്ഞമഞ്ഞപച്ചയേന പച്ചയോ; ബാഹിരം… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം ഏകം മഹാഭൂതം തിണ്ണന്നം മഹാഭൂതാനം അഞ്ഞമഞ്ഞപച്ചയേന പച്ചയോ…പേ… ദ്വേ മഹാഭൂതാ ദ്വിന്നം മഹാഭൂതാനം അഞ്ഞമഞ്ഞപച്ചയേന പച്ചയോ. (൧)

നിസ്സയപച്ചയോ

൪൨൧. കുസലോ ധമ്മോ കുസലസ്സ ധമ്മസ്സ നിസ്സയപച്ചയേന പച്ചയോ – കുസലോ ഏകോ ഖന്ധോ തിണ്ണന്നം ഖന്ധാനം നിസ്സയപച്ചയേന പച്ചയോ. തയോ ഖന്ധാ ഏകസ്സ ഖന്ധസ്സ നിസ്സയപച്ചയേന പച്ചയോ. ദ്വേ ഖന്ധാ ദ്വിന്നം ഖന്ധാനം നിസ്സയപച്ചയേന പച്ചയോ. (൧)

കുസലോ ധമ്മോ അബ്യാകതസ്സ ധമ്മസ്സ നിസ്സയപച്ചയേന പച്ചയോ – കുസലാ ഖന്ധാ ചിത്തസമുട്ഠാനാനം രൂപാനം നിസ്സയപച്ചയേന പച്ചയോ. (൨)

കുസലോ ധമ്മോ കുസലസ്സ ച അബ്യാകതസ്സ ച ധമ്മസ്സ നിസ്സയപച്ചയേന പച്ചയോ – കുസലോ ഏകോ ഖന്ധോ തിണ്ണന്നം ഖന്ധാനം ചിത്തസമുട്ഠാനാനഞ്ച രൂപാനം നിസ്സയപച്ചയേന പച്ചയോ. തയോ ഖന്ധാ ഏകസ്സ ഖന്ധസ്സ ചിത്തസമുട്ഠാനാനഞ്ച രൂപാനം നിസ്സയപച്ചയേന പച്ചയോ. ദ്വേ ഖന്ധാ ദ്വിന്നം ഖന്ധാനം ചിത്തസമുട്ഠാനാനഞ്ച രൂപാനം നിസ്സയപച്ചയേന പച്ചയോ. (൩)

അകുസലോ ധമ്മോ അകുസലസ്സ ധമ്മസ്സ നിസ്സയപച്ചയേന പച്ചയോ – അകുസലോ ഏകോ ഖന്ധോ തിണ്ണന്നം ഖന്ധാനം നിസ്സയപച്ചയേന പച്ചയോ. തയോ ഖന്ധാ ഏകസ്സ ഖന്ധസ്സ നിസ്സയപച്ചയേന പച്ചയോ. ദ്വേ ഖന്ധാ ദ്വിന്നം ഖന്ധാനം നിസ്സയപച്ചയേന പച്ചയോ. (൧)

അകുസലോ ധമ്മോ അബ്യാകതസ്സ ധമ്മസ്സ നിസ്സയപച്ചയേന പച്ചയോ – അകുസലാ ഖന്ധാ ചിത്തസമുട്ഠാനാനം രൂപാനം നിസ്സയപച്ചയേന പച്ചയോ. (൨)

അകുസലോ ധമ്മോ അകുസലസ്സ ച അബ്യാകതസ്സ ച ധമ്മസ്സ നിസ്സയപച്ചയേന പച്ചയോ – അകുസലോ ഏകോ ഖന്ധോ തിണ്ണന്നം ഖന്ധാനം ചിത്തസമുട്ഠാനാനഞ്ച രൂപാനം നിസ്സയപച്ചയേന പച്ചയോ. തയോ ഖന്ധാ ഏകസ്സ ഖന്ധസ്സ ചിത്തസമുട്ഠാനാനഞ്ച രൂപാനം നിസ്സയപച്ചയേന പച്ചയോ. ദ്വേ ഖന്ധാ ദ്വിന്നം ഖന്ധാനം ചിത്തസമുട്ഠാനാനഞ്ച രൂപാനം നിസ്സയപച്ചയേന പച്ചയോ. (൩)

അബ്യാകതോ ധമ്മോ അബ്യാകതസ്സ ധമ്മസ്സ നിസ്സയപച്ചയേന പച്ചയോ – വിപാകാബ്യാകതോ കിരിയാബ്യാകതോ ഏകോ ഖന്ധോ തിണ്ണന്നം ഖന്ധാനം ചിത്തസമുട്ഠാനാനഞ്ച രൂപാനം നിസ്സയപച്ചയേന പച്ചയോ. തയോ ഖന്ധാ ഏകസ്സ ഖന്ധസ്സ ചിത്തസമുട്ഠാനാനഞ്ച രൂപാനം നിസ്സയപച്ചയേന പച്ചയോ. ദ്വേ ഖന്ധാ ദ്വിന്നം ഖന്ധാനം ചിത്തസമുട്ഠാനാനഞ്ച രൂപാനം നിസ്സയപച്ചയേന പച്ചയോ. പടിസന്ധിക്ഖണേ വിപാകാബ്യാകതോ ഏകോ ഖന്ധോ തിണ്ണന്നം ഖന്ധാനം കടത്താ ച രൂപാനം നിസ്സയപച്ചയേന പച്ചയോ. തയോ ഖന്ധാ ഏകസ്സ ഖന്ധസ്സ കടത്താ ച രൂപാനം നിസ്സയപച്ചയേന പച്ചയോ. ദ്വേ ഖന്ധാ ദ്വിന്നം ഖന്ധാനം കടത്താ ച രൂപാനം നിസ്സയപച്ചയേന പച്ചയോ. ഖന്ധാ വത്ഥുസ്സ നിസ്സയപച്ചയേന പച്ചയോ. വത്ഥു ഖന്ധാനം നിസ്സയപച്ചയേന പച്ചയോ. ഏകം മഹാഭൂതം തിണ്ണന്നം മഹാഭൂതാനം നിസ്സയപച്ചയേന പച്ചയോ. തയോ മഹാഭൂതാ ഏകസ്സ മഹാഭൂതസ്സ നിസ്സയപച്ചയേന പച്ചയോ. ദ്വേ മഹാഭൂതാ ദ്വിന്നം മഹാഭൂതാനം നിസ്സയപച്ചയേന പച്ചയോ. മഹാഭൂതാ ചിത്തസമുട്ഠാനാനം രൂപാനം, കടത്താരൂപാനം, ഉപാദാരൂപാനം നിസ്സയപച്ചയേന പച്ചയോ; ബാഹിരം… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം ഏകം മഹാഭൂതം തിണ്ണന്നം മഹാഭൂതാനം നിസ്സയപച്ചയേന പച്ചയോ. തയോ മഹാഭൂതാ ഏകസ്സ മഹാഭൂതസ്സ നിസ്സയപച്ചയേന പച്ചയോ. ദ്വേ മഹാഭൂതാ ദ്വിന്നം മഹാഭൂതാനം നിസ്സയപച്ചയേന പച്ചയോ. മഹാഭൂതാ കടത്താരൂപാനം, ഉപാദാരൂപാനം നിസ്സയപച്ചയേന പച്ചയോ. ചക്ഖായതനം ചക്ഖുവിഞ്ഞാണസ്സ നിസ്സയപച്ചയേന പച്ചയോ. സോതായതനം…പേ… ഘാനായതനം…പേ… ജിവ്ഹായതനം …പേ… കായായതനം കായവിഞ്ഞാണസ്സ നിസ്സയപച്ചയേന പച്ചയോ. വത്ഥു വിപാകാബ്യാകതാനം കിരിയാബ്യാകതാനം ഖന്ധാനം നിസ്സയപച്ചയേന പച്ചയോ.

അബ്യാകതോ ധമ്മോ കുസലസ്സ ധമ്മസ്സ നിസ്സയപച്ചയേന പച്ചയോ – വത്ഥു കുസലാനം ഖന്ധാനം നിസ്സയപച്ചയേന പച്ചയോ. (൨)

അബ്യാകതോ ധമ്മോ അകുസലസ്സ ധമ്മസ്സ നിസ്സയപച്ചയേന പച്ചയോ – വത്ഥു അകുസലാനം ഖന്ധാനം നിസ്സയപച്ചയേന പച്ചയോ. (൩)

൪൨൨. കുസലോ ച അബ്യാകതോ ച ധമ്മാ കുസലസ്സ ധമ്മസ്സ നിസ്സയപച്ചയേന പച്ചയോ – കുസലോ ഏകോ ഖന്ധോ ച വത്ഥു ച തിണ്ണന്നം ഖന്ധാനം നിസ്സയപച്ചയേന പച്ചയോ. തയോ ഖന്ധാ ച വത്ഥു ച ഏകസ്സ ഖന്ധസ്സ നിസ്സയപച്ചയേന പച്ചയോ. ദ്വേ ഖന്ധാ ച വത്ഥു ച ദ്വിന്നം ഖന്ധാനം നിസ്സയപച്ചയേന പച്ചയോ. (൧)

കുസലോ ച അബ്യാകതോ ച ധമ്മാ അബ്യാകതസ്സ ധമ്മസ്സ നിസ്സയപച്ചയേന പച്ചയോ – കുസലാ ഖന്ധാ ച മഹാഭൂതാ ച ചിത്തസമുട്ഠാനാനം രൂപാനം നിസ്സയപച്ചയേന പച്ചയോ. (൨)

അകുസലോ ച അബ്യാകതോ ച ധമ്മാ അകുസലസ്സ ധമ്മസ്സ നിസ്സയപച്ചയേന പച്ചയോ – അകുസലോ ഏകോ ഖന്ധോ ച വത്ഥു ച തിണ്ണന്നം ഖന്ധാനം നിസ്സയപച്ചയേന പച്ചയോ. തയോ ഖന്ധാ ച വത്ഥു ച ഏകസ്സ ഖന്ധസ്സ നിസ്സയപച്ചയേന പച്ചയോ. ദ്വേ ഖന്ധാ ച വത്ഥു ച ദ്വിന്നം ഖന്ധാനം നിസ്സയപച്ചയേന പച്ചയോ. (൧)

അകുസലോ ച അബ്യാകതോ ച ധമ്മാ അബ്യാകതസ്സ ധമ്മസ്സ നിസ്സയപച്ചയേന പച്ചയോ – അകുസലാ ഖന്ധാ ച മഹാഭൂതാ ച ചിത്തസമുട്ഠാനാനം രൂപാനം നിസ്സയപച്ചയേന പച്ചയോ. (൨)

ഉപനിസ്സയപച്ചയോ

൪൨൩. കുസലോ ധമ്മോ കുസലസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ.

ആരമ്മണൂപനിസ്സയോ – ദാനം ദത്വാ സീലം സമാദിയിത്വാ ഉപോസഥകമ്മം കത്വാ, തം ഗരും കത്വാ പച്ചവേക്ഖതി, പുബ്ബേ സുചിണ്ണാനി ഗരും കത്വാ പച്ചവേക്ഖതി, ഝാനാ വുട്ഠഹിത്വാ ഝാനം ഗരും കത്വാ പച്ചവേക്ഖതി, സേക്ഖാ ഗോത്രഭും ഗരും കത്വാ പച്ചവേക്ഖന്തി, വോദാനം ഗരും കത്വാ പച്ചവേക്ഖന്തി, സേക്ഖാ മഗ്ഗാ വുട്ഠഹിത്വാ മഗ്ഗം ഗരും കത്വാ പച്ചവേക്ഖന്തി.

അനന്തരൂപനിസ്സയോ – പുരിമാ പുരിമാ കുസലാ ഖന്ധാ പച്ഛിമാനം പച്ഛിമാനം കുസലാനം ഖന്ധാനം ഉപനിസ്സയപച്ചയേന പച്ചയോ. അനുലോമം ഗോത്രഭുസ്സ… അനുലോമം വോദാനസ്സ… ഗോത്രഭു മഗ്ഗസ്സ… വോദാനം മഗ്ഗസ്സ ഉപനിസ്സയപച്ചയേന പച്ചയോ.

പകതൂപനിസ്സയോ – സദ്ധം ഉപനിസ്സായ ദാനം ദേതി, സീലം സമാദിയതി, ഉപോസഥകമ്മം കരോതി, ഝാനം ഉപ്പാദേതി, വിപസ്സനം ഉപ്പാദേതി, മഗ്ഗം ഉപ്പാദേതി, അഭിഞ്ഞം ഉപ്പാദേതി, സമാപത്തിം ഉപ്പാദേതി. സീലം…പേ… സുതം…പേ… ചാഗം…പേ… പഞ്ഞം ഉപനിസ്സയ ദാനം ദേതി, സീലം സമാദിയതി, ഉപോസഥകമ്മം കരോതി, ഝാനം ഉപ്പാദേതി, വിപസ്സനം ഉപ്പാദേതി, മഗ്ഗം ഉപ്പാദേതി, അഭിഞ്ഞം ഉപ്പാദേതി, സമാപത്തിം ഉപ്പാദേതി. സദ്ധാ… സീലം… സുതം… ചാഗോ… പഞ്ഞാ … സദ്ധായ… സീലസ്സ… സുതസ്സ… ചാഗസ്സ… പഞ്ഞായ ഉപനിസ്സയപച്ചയേന പച്ചയോ.

പഠമസ്സ ഝാനസ്സ പരികമ്മം പഠമസ്സ ഝാനസ്സ ഉപനിസ്സയപച്ചയേന പച്ചയോ. ദുതിയസ്സ ഝാനസ്സ പരികമ്മം ദുതിയസ്സ ഝാനസ്സ ഉപനിസ്സയപച്ചയേന പച്ചയോ. തതിയസ്സ ഝാനസ്സ പരികമ്മം തതിയസ്സ ഝാനസ്സ ഉപനിസ്സയപച്ചയേന പച്ചയോ. ചതുത്ഥസ്സ ഝാനസ്സ പരികമ്മം ചതുത്ഥസ്സ ഝാനസ്സ ഉപനിസ്സയപച്ചയേന പച്ചയോ. ആകാസാനഞ്ചായതനസ്സ പരികമ്മം ആകാസാനഞ്ചായതനസ്സ ഉപനിസ്സയപച്ചയേന പച്ചയോ. വിഞ്ഞാണഞ്ചായതനസ്സ പരികമ്മം വിഞ്ഞാണഞ്ചായതനസ്സ ഉപനിസ്സയപച്ചയേന പച്ചയോ. ആകിഞ്ചഞ്ഞായതനസ്സ പരികമ്മം ആകിഞ്ചഞ്ഞായതനസ്സ ഉപനിസ്സയപച്ചയേന പച്ചയോ. നേവസഞ്ഞാനാസഞ്ഞായതനസ്സ പരികമ്മം നേവസഞ്ഞാനാസഞ്ഞായതനസ്സ ഉപനിസ്സയപച്ചയേന പച്ചയോ. പഠമം ഝാനം ദുതിയസ്സ ഝാനസ്സ ഉപനിസ്സയപച്ചയേന പച്ചയോ. ദുതിയം ഝാനം തതിയസ്സ ഝാനസ്സ ഉപനിസ്സയപച്ചയേന പച്ചയോ. തതിയം ഝാനം ചതുത്ഥസ്സ ഝാനസ്സ ഉപനിസ്സയപച്ചയേന പച്ചയോ. ചതുത്ഥം ഝാനം ആകാസാനഞ്ചായതനസ്സ ഉപനിസ്സയപച്ചയേന പച്ചയോ. ആകാസാനഞ്ചായതനം വിഞ്ഞാണഞ്ചായതനസ്സ ഉപനിസ്സയപച്ചയേന പച്ചയോ. വിഞ്ഞാണഞ്ചായതനം ആകിഞ്ചഞ്ഞായതനസ്സ ഉപനിസ്സയപച്ചയേന പച്ചയോ. ആകിഞ്ചഞ്ഞായതനം നേവസഞ്ഞാനാസഞ്ഞായതനസ്സ ഉപനിസ്സയപച്ചയേന പച്ചയോ. ദിബ്ബസ്സ ചക്ഖുസ്സ പരികമ്മം ദിബ്ബസ്സ ചക്ഖുസ്സ ഉപനിസ്സയപച്ചയേന പച്ചയോ. ദിബ്ബായ സോതധാതുയാ പരികമ്മം ദിബ്ബായ സോതധാതുയാ ഉപനിസ്സയപച്ചയേന പച്ചയോ. ഇദ്ധിവിധഞാണസ്സ പരികമ്മം ഇദ്ധിവിധഞാണസ്സ ഉപനിസ്സയപച്ചയേന പച്ചയോ. ചേതോപരിയഞാണസ്സ പരികമ്മം ചേതോപരിയഞാണസ്സ ഉപനിസ്സയപച്ചയേന പച്ചയോ. പുബ്ബേനിവാസാനുസ്സതിഞാണസ്സ പരികമ്മം പുബ്ബേനിവാസാനുസ്സതിഞാണസ്സ ഉപനിസ്സയപച്ചയേന പച്ചയോ. യഥാകമ്മൂപഗഞാണസ്സ പരികമ്മം യഥാകമ്മൂപഗഞാണസ്സ ഉപനിസ്സയപച്ചയേന പച്ചയോ. അനാഗതംസഞാണസ്സ പരികമ്മം അനാഗതംസഞാണസ്സ ഉപനിസ്സയപച്ചയേന പച്ചയോ. ദിബ്ബചക്ഖു ദിബ്ബായ സോതധാതുയാ ഉപനിസ്സയപച്ചയേന പച്ചയോ. ദിബ്ബസോതധാതു ഇദ്ധിവിധഞാണസ്സ ഉപനിസ്സയപച്ചയേന പച്ചയോ. ഇദ്ധിവിധഞാണം ചേതോപരിയഞാണസ്സ ഉപനിസ്സയപച്ചയേന പച്ചയോ. ചേതോപരിയഞാണം പുബ്ബേനിവാസാനുസ്സതിഞാണസ്സ ഉപനിസ്സയപച്ചയേന പച്ചയോ. പുബ്ബേനിവാസാനുസ്സതിഞാണം യഥാകമ്മൂപഗഞാണസ്സ ഉപനിസ്സയപച്ചയേന പച്ചയോ. യഥാകമ്മൂപഗഞാണം അനാഗതംസഞാണസ്സ ഉപനിസ്സയപച്ചയേന പച്ചയോ. പഠമസ്സ മഗ്ഗസ്സ പരികമ്മം പഠമസ്സ മഗ്ഗസ്സ ഉപനിസ്സയപച്ചയേന പച്ചയോ. ദുതിയസ്സ മഗ്ഗസ്സ പരികമ്മം ദുതിയസ്സ മഗ്ഗസ്സ ഉപനിസ്സയപച്ചയേന പച്ചയോ. തതിയസ്സ മഗ്ഗസ്സ പരികമ്മം തതിയസ്സ മഗ്ഗസ്സ ഉപനിസ്സയപച്ചയേന പച്ചയോ. ചതുത്ഥസ്സ മഗ്ഗസ്സ പരികമ്മം ചതുത്ഥസ്സ മഗ്ഗസ്സ ഉപനിസ്സയപച്ചയേന പച്ചയോ. പഠമോ മഗ്ഗോ ദുതിയസ്സ മഗ്ഗസ്സ ഉപനിസ്സയപച്ചയേന പച്ചയോ. ദുതിയോ മഗ്ഗോ തതിയസ്സ മഗ്ഗസ്സ ഉപനിസ്സയപച്ചയേന പച്ചയോ. തതിയോ മഗ്ഗോ ചതുത്ഥസ്സ മഗ്ഗസ്സ ഉപനിസ്സയപച്ചയേന പച്ചയോ. സേക്ഖാ മഗ്ഗം ഉപനിസ്സായ അനുപ്പന്നം സമാപത്തിം ഉപ്പാദേന്തി, ഉപ്പന്നം സമാപജ്ജന്തി, സങ്ഖാരേ അനിച്ചതോ ദുക്ഖതോ അനത്തതോ വിപസ്സന്തി. മഗ്ഗോ സേക്ഖാനം അത്ഥപ്പടിസമ്ഭിദായ, ധമ്മപ്പടിസമ്ഭിദായ, നിരുത്തിപ്പടിസമ്ഭിദായ, പടിഭാനപ്പടിസമ്ഭിദായ, ഠാനാഠാനകോസല്ലസ്സ ഉപനിസ്സയപച്ചയേന പച്ചയോ. (൧)

കുസലോ ധമ്മോ അകുസലസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, പകതൂപനിസ്സയോ.

ആരമ്മണൂപനിസ്സയോ – ദാനം ദത്വാ സീലം സമാദിയിത്വാ ഉപോസഥകമ്മം കത്വാ തം ഗരും കത്വാ അസ്സാദേതി അഭിനന്ദതി, തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. പുബ്ബേ സുചിണ്ണാനി ഗരും കത്വാ അസ്സാദേതി അഭിനന്ദതി, തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. ഝാനാ വുട്ഠഹിത്വാ ഝാനം ഗരും കത്വാ അസ്സാദേതി അഭിനന്ദതി, തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി.

പകതൂപനിസ്സയോ – സദ്ധം ഉപനിസ്സായ മാനം ജപ്പേതി, ദിട്ഠിം ഗണ്ഹാതി. സീലം…പേ… സുതം…പേ… ചാഗം…പേ… പഞ്ഞം ഉപനിസ്സായ മാനം ജപ്പേതി, ദിട്ഠിം ഗണ്ഹാതി. സദ്ധാ… സീലം… സുതം… ചാഗോ… പഞ്ഞാ രാഗസ്സ… ദോസസ്സ… മോഹസ്സ… മാനസ്സ… ദിട്ഠിയാ… പത്ഥനായ ഉപനിസ്സയപച്ചയേന പച്ചയോ. (൨)

കുസലോ ധമ്മോ അബ്യാകതസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ.

ആരമ്മണൂപനിസ്സയോ – അരഹാ മഗ്ഗാ വുട്ഠഹിത്വാ മഗ്ഗം ഗരും കത്വാ പച്ചവേക്ഖതി.

അനന്തരൂപനിസ്സയോ – കുസലം വുട്ഠാനസ്സ… മഗ്ഗോ ഫലസ്സ… അനുലോമം സേക്ഖായ ഫലസമാപത്തിയാ… നിരോധാ വുട്ഠഹന്തസ്സ നേവസഞ്ഞാനാസഞ്ഞായതനകുസലം ഫലസമാപത്തിയാ ഉപനിസ്സയപച്ചയേന പച്ചയോ.

പകതൂപനിസ്സയോ – സദ്ധം ഉപനിസ്സായ അത്താനം ആതാപേതി പരിതാപേതി, പരിയിട്ഠിമൂലകം ദുക്ഖം പച്ചനുഭോതി. സീലം…പേ… സുതം…പേ… ചാഗം…പേ… പഞ്ഞം ഉപനിസ്സായ അത്താനം ആതാപേതി പരിതാപേതി, പരിയിട്ഠിമൂലകം ദുക്ഖം പച്ചനുഭോതി. സദ്ധാ… സീലം… സുതം… ചാഗോ… പഞ്ഞാ കായികസ്സ സുഖസ്സ… കായികസ്സ ദുക്ഖസ്സ… ഫലസമാപത്തിയാ ഉപനിസ്സയപച്ചയേന പച്ചയോ. കുസലം കമ്മം വിപാകസ്സ ഉപനിസ്സയപച്ചയേന പച്ചയോ. അരഹാ മഗ്ഗം ഉപനിസ്സായ അനുപ്പന്നം കിരിയസമാപത്തിം ഉപ്പാദേതി, ഉപ്പന്നം സമാപജ്ജതി, സങ്ഖാരേ അനിച്ചതോ ദുക്ഖതോ അനത്തതോ വിപസ്സതി. മഗ്ഗോ അരഹതോ അത്ഥപ്പടിസമ്ഭിദായ, ധമ്മപ്പടിസമ്ഭിദായ, നിരുത്തിപ്പടിസമ്ഭിദായ, പടിഭാനപ്പടിസമ്ഭിദായ, ഠാനാഠാനകോസല്ലസ്സ ഉപനിസ്സയപച്ചയേന പച്ചയോ. മഗ്ഗോ ഫലസമാപത്തിയാ ഉപനിസ്സയപച്ചയേന പച്ചയോ. (൩)

അകുസലോ ധമ്മോ അകുസലസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ.

ആരമ്മണൂപനിസ്സയോ – രാഗം ഗരും കത്വാ അസ്സാദേതി അഭിനന്ദതി, തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. ദിട്ഠിം ഗരും കത്വാ അസ്സാദേതി അഭിനന്ദതി, തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി.

അനന്തരൂപനിസ്സയോ – പുരിമാ പുരിമാ അകുസലാ ഖന്ധാ പച്ഛിമാനം പച്ഛിമാനം അകുസലാനം ഖന്ധാനം ഉപനിസ്സയപച്ചയേന പച്ചയോ.

പകതൂപനിസ്സയോ – രാഗം ഉപനിസ്സായ പാണം ഹനതി, അദിന്നം ആദിയതി, മുസാ ഭണതി, പിസുണം ഭണതി, ഫരുസം ഭണതി, സമ്ഫം പലപതി, സന്ധിം ഛിന്ദതി, നില്ലോപം ഹരതി, ഏകാഗാരികം കരോതി, പരിപന്ഥേ തിട്ഠതി, പരദാരം ഗച്ഛതി, ഗാമഘാതം കരോതി, നിഗമഘാതം കരോതി, മാതരം ജീവിതാ വോരോപേതി, പിതരം ജീവിതാ വോരോപേതി, അരഹന്തം ജീവിതാ വോരോപേതി, ദുട്ഠേന ചിത്തേന തഥാഗതസ്സ ലോഹിതം ഉപ്പാദേതി, സങ്ഘം ഭിന്ദതി. ദോസം ഉപനിസ്സായ…പേ… മോഹം ഉപനിസ്സായ…പേ… മാനം ഉപനിസ്സായ…പേ… ദിട്ഠിം ഉപനിസ്സായ…പേ… പത്ഥനം ഉപനിസ്സായ പാണം ഹനതി…പേ… സങ്ഘം ഭിന്ദതി. രാഗോ… ദോസോ… മോഹോ… മാനോ… ദിട്ഠി… പത്ഥനാ രാഗസ്സ… ദോസസ്സ… മോഹസ്സ… മാനസ്സ… ദിട്ഠിയാ… പത്ഥനായ ഉപനിസ്സയപച്ചയേന പച്ചയോ. പാണാതിപാതോ പാണാതിപാതസ്സ ഉപനിസ്സയപച്ചയേന പച്ചയോ. പാണാതിപാതോ അദിന്നാദാനസ്സ…പേ… കാമേസുമിച്ഛാചാരസ്സ…പേ… മുസാവാദസ്സ…പേ… പിസുണായ വാചായ…പേ… ഫരുസായ വാചായ…പേ… സമ്ഫപ്പലാപസ്സ…പേ… അഭിജ്ഝായ…പേ… ബ്യാപാദസ്സ…പേ… മിച്ഛാദിട്ഠിയാ ഉപനിസ്സയപച്ചയേന പച്ചയോ. അദിന്നാദാനം അദിന്നാദാനസ്സ… കാമേസുമിച്ഛാചാരസ്സ… മുസാവാദസ്സ… (സംഖിത്തം) മിച്ഛാദിട്ഠിയാ… പാണാതിപാതസ്സ ഉപനിസ്സയപച്ചയേന പച്ചയോ. (ചക്കം ബന്ധിതബ്ബം.) കാമേസുമിച്ഛാചാരോ…പേ… മുസാവാദോ…പേ… പിസുണവാചാ…പേ… ഫരുസവാചാ…പേ… സമ്ഫപ്പലാപോ…പേ… അഭിജ്ഝാ…പേ… ബ്യാപാദോ…പേ… മിച്ഛാദിട്ഠി മിച്ഛാദിട്ഠിയാ ഉപനിസ്സയപച്ചയേന പച്ചയോ. മിച്ഛാദിട്ഠി പാണാതിപാതസ്സ… അദിന്നാദാനസ്സ… കാമേസുമിച്ഛാചാരസ്സ… മുസാവാദസ്സ… പിസുണായ വാചായ… ഫരുസായ വാചായ… സമ്ഫപ്പലാപസ്സ… അഭിജ്ഝായ… ബ്യാപാദസ്സ ഉപനിസ്സയപച്ചയേന പച്ചയോ. മാതുഘാതികമ്മം മാതുഘാതികമ്മസ്സ ഉപനിസ്സയപച്ചയേന പച്ചയോ. മാതുഘാതികമ്മം പിതുഘാതികമ്മസ്സ ഉപനിസ്സയ…പേ… അരഹന്തഘാതികമ്മസ്സ… രുഹിരുപ്പാദകമ്മസ്സ… സങ്ഘഭേദകമ്മസ്സ… നിയതമിച്ഛാദിട്ഠിയാ ഉപനിസ്സയപച്ചയേന പച്ചയോ. പിതുഘാതികമ്മം പിതുഘാതികമ്മസ്സ… അരഹന്തഘാതികമ്മസ്സ… രുഹിരുപ്പാദകമ്മസ്സ… സങ്ഘഭേദകമ്മസ്സ… നിയതമിച്ഛാദിട്ഠിയാ… മാതുഘാതികമ്മസ്സ ഉപനിസ്സയപച്ചയേന പച്ചയോ. അരഹന്തഘാതികമ്മം അരഹന്തഘാതികമ്മസ്സ… രുഹിരുപ്പാദകമ്മസ്സ…പേ… രുഹിരുപ്പാദകമ്മം രുഹിരുപ്പാദകമ്മസ്സ…പേ… സങ്ഘഭേദകമ്മം സങ്ഘഭേദകമ്മസ്സ…പേ… നിയതമിച്ഛാദിട്ഠി നിയതമിച്ഛാദിട്ഠിയാ ഉപനിസ്സയപച്ചയേന പച്ചയോ. നിയതമിച്ഛാദിട്ഠി മാതുഘാതികമ്മസ്സ ഉപനിസ്സയ…പേ… അരഹന്തഘാതികമ്മസ്സ… രുഹിരുപ്പാദകമ്മസ്സ… സങ്ഘഭേദകമ്മസ്സ ഉപനിസ്സയപച്ചയേന പച്ചയോ. (ചക്കം കാതബ്ബം.) (൧)

അകുസലോ ധമ്മോ കുസലസ്സ ധമ്മസ്സ ഉപനിസ്സയപച്ചയേന പച്ചയോ. പകതൂപനിസ്സയോ – രാഗം ഉപനിസ്സായ ദാനം ദേതി, സീലം സമാദിയതി, ഉപോസഥകമ്മം കരോതി, ഝാനം ഉപ്പാദേതി, വിപസ്സനം ഉപ്പാദേതി, മഗ്ഗം ഉപ്പാദേതി, അഭിഞ്ഞം ഉപ്പാദേതി, സമാപത്തിം ഉപ്പാദേതി. ദോസം…പേ… മോഹം…പേ… മാനം…പേ… ദിട്ഠിം…പേ… പത്ഥനം ഉപനിസ്സായ ദാനം ദേതി, സീലം സമാദിയതി, ഉപോസഥകമ്മം കരോതി, ഝാനം ഉപ്പാദേതി, വിപസ്സനം ഉപ്പാദേതി, മഗ്ഗം ഉപ്പാദേതി, അഭിഞ്ഞം ഉപ്പാദേതി, സമാപത്തിം ഉപ്പാദേതി. രാഗോ… ദോസോ… മോഹോ… മാനോ… ദിട്ഠി… പത്ഥനാ സദ്ധായ… സീലസ്സ… സുതസ്സ… ചാഗസ്സ … പഞ്ഞായ ഉപനിസ്സയപച്ചയേന പച്ചയോ. പാണം ഹന്ത്വാ തസ്സ പടിഘാതത്ഥായ ദാനം ദേതി, സീലം സമാദിയതി, ഉപോസഥകമ്മം കരോതി, ഝാനം ഉപ്പാദേതി, വിപസ്സനം ഉപ്പാദേതി, മഗ്ഗം ഉപ്പാദേതി, അഭിഞ്ഞം ഉപ്പാദേതി, സമാപത്തിം ഉപ്പാദേതി. അദിന്നം ആദിയിത്വാ…പേ… മുസാ ഭണിത്വാ…പേ… പിസുണം ഭണിത്വാ…പേ… ഫരുസം ഭണിത്വാ…പേ… സമ്ഫം പലപിത്വാ…പേ… സന്ധിം ഛിന്ദിത്വാ…പേ… നില്ലോപം ഹരിത്വാ…പേ… ഏകാഗാരികം കരിത്വാ…പേ… പരിപന്ഥേ ഠത്വാ…പേ… പരദാരം ഗന്ത്വാ…പേ… ഗാമഘാതം കരിത്വാ…പേ… നിഗമഘാതം കരിത്വാ തസ്സ പടിഘാതത്ഥായ ദാനം ദേതി, സീലം സമാദിയതി, ഉപോസഥകമ്മം കരോതി, ഝാനം ഉപ്പാദേതി, വിപസ്സനം ഉപ്പാദേതി, മഗ്ഗം ഉപ്പാദേതി, അഭിഞ്ഞം ഉപ്പാദേതി, സമാപത്തിം ഉപ്പാദേതി. മാതരം ജീവിതാ വോരോപേത്വാ തസ്സ പടിഘാതത്ഥായ ദാനം ദേതി, സീലം സമാദിയതി, ഉപോസഥകമ്മം കരോതി. പിതരം ജീവിതാ വോരോപേത്വാ…പേ… അരഹന്തം ജീവിതാ വോരോപേത്വാ…പേ… ദുട്ഠേന ചിത്തേന തഥാഗതസ്സ ലോഹിതം ഉപ്പാദേത്വാ…പേ… സങ്ഘം ഭിന്ദിത്വാ തസ്സ പടിഘാതത്ഥായ ദാനം ദേതി, സീലം സമാദിയതി, ഉപോസഥകമ്മം കരോതി. (൨)

അകുസലോ ധമ്മോ അബ്യാകതസ്സ ധമ്മസ്സ ഉപനിസ്സയപച്ചയേന പച്ചയോ – അനന്തരൂപനിസ്സയോ, പകതൂപനിസ്സയോ.

അനന്തരൂപനിസ്സയോ – അകുസലം വുട്ഠാനസ്സ ഉപനിസ്സയപച്ചയേന പച്ചയോ.

പകതൂപനിസ്സയോ – രാഗം ഉപനിസ്സായ അത്താനം ആതാപേതി പരിതാപേതി, പരിയിട്ഠിമൂലകം ദുക്ഖം പച്ചനുഭോതി. ദോസം…പേ… മോഹം…പേ… മാനം …പേ… ദിട്ഠിം…പേ… പത്ഥനം ഉപനിസ്സായ അത്താനം ആതാപേതി പരിതാപേതി, പരിയിട്ഠിമൂലകം ദുക്ഖം പച്ചനുഭോതി. രാഗോ… ദോസോ … മോഹോ… മാനോ… ദിട്ഠി… പത്ഥനാ കായികസ്സ സുഖസ്സ… കായികസ്സ ദുക്ഖസ്സ… ഫലസമാപത്തിയാ ഉപനിസ്സയപച്ചയേന പച്ചയോ. അകുസലം കമ്മം വിപാകസ്സ ഉപനിസ്സയപച്ചയേന പച്ചയോ. (൩)

അബ്യാകതോ ധമ്മോ അബ്യാകതസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ.

ആരമ്മണൂപനിസ്സയോ – അരഹാ ഫലം ഗരും കത്വാ പച്ചവേക്ഖതി, നിബ്ബാനം ഗരും കത്വാ പച്ചവേക്ഖതി, നിബ്ബാനം ഫലസ്സ ഉപനിസ്സയപച്ചയേന പച്ചയോ.

അനന്തരൂപനിസ്സയോ – പുരിമാ പുരിമാ വിപാകാബ്യാകതാ, കിരിയാബ്യാകതാ ഖന്ധാ പച്ഛിമാനം പച്ഛിമാനം വിപാകാബ്യാകതാനം കിരിയാബ്യാകതാനം ഖന്ധാനം ഉപനിസ്സയപച്ചയേന പച്ചയോ. ഭവങ്ഗം ആവജ്ജനായ… കിരിയം വുട്ഠാനസ്സ… അരഹതോ അനുലോമം ഫലസമാപത്തിയാ… നിരോധാ വുട്ഠഹന്തസ്സ നേവസഞ്ഞാനാസഞ്ഞായതനകിരിയം ഫലസമാപത്തിയാ ഉപനിസ്സയപച്ചയേന പച്ചയോ.

പകതൂപനിസ്സയോ – കായികം സുഖം കായികസ്സ സുഖസ്സ, കായികസ്സ ദുക്ഖസ്സ, ഫലസമാപത്തിയാ ഉപനിസ്സയപച്ചയേന പച്ചയോ. കായികം ദുക്ഖം കായികസ്സ സുഖസ്സ, കായികസ്സ ദുക്ഖസ്സ, ഫലസമാപത്തിയാ ഉപനിസ്സയപച്ചയേന പച്ചയോ. ഉതു കായികസ്സ സുഖസ്സ, കായികസ്സ ദുക്ഖസ്സ, ഫലസമാപത്തിയാ ഉപനിസ്സയപച്ചയേന പച്ചയോ. ഭോജനം കായികസ്സ സുഖസ്സ, കായികസ്സ ദുക്ഖസ്സ, ഫലസമാപത്തിയാ ഉപനിസ്സയപച്ചയേന പച്ചയോ. സേനാസനം കായികസ്സ സുഖസ്സ, കായികസ്സ ദുക്ഖസ്സ, ഫലസമാപത്തിയാ ഉപനിസ്സയപച്ചയേന പച്ചയോ. കായികം സുഖം… കായികം ദുക്ഖം… ഉതു… ഭോജനം… സേനാസനം കായികസ്സ സുഖസ്സ, കായികസ്സ ദുക്ഖസ്സ, ഫലസമാപത്തിയാ ഉപനിസ്സയപച്ചയേന പച്ചയോ. ഫലസമാപത്തി കായികസ്സ സുഖസ്സ ഉപനിസ്സയപച്ചയേന പച്ചയോ.

അരഹാ കായികം സുഖം ഉപനിസ്സായ അനുപ്പന്നം കിരിയസമാപത്തിം ഉപ്പാദേതി, ഉപ്പന്നം സമാപജ്ജതി, സങ്ഖാരേ അനിച്ചതോ ദുക്ഖതോ അനത്തതോ വിപസ്സതി. കായികം ദുക്ഖം… ഉതും… ഭോജനം … സേനാസനം ഉപനിസ്സായ അനുപ്പന്നം കിരിയസമാപത്തിം ഉപ്പാദേതി, ഉപ്പന്നം സമാപജ്ജതി, സങ്ഖാരേ അനിച്ചതോ ദുക്ഖതോ അനത്തതോ വിപസ്സതി. (൧)

അബ്യാകതോ ധമ്മോ കുസലസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ.

ആരമ്മണൂപനിസ്സയോ – സേക്ഖാ ഫലം ഗരും കത്വാ പച്ചവേക്ഖന്തി, നിബ്ബാനം ഗരും കത്വാ പച്ചവേക്ഖന്തി. നിബ്ബാനം ഗോത്രഭുസ്സ… വോദാനസ്സ… മഗ്ഗസ്സ ഉപനിസ്സയപച്ചയേന പച്ചയോ.

അനന്തരൂപനിസ്സയോ – ആവജ്ജനാ കുസലാനം ഖന്ധാനം ഉപനിസ്സയപച്ചയേന പച്ചയോ.

പകതൂപനിസ്സയോ – കായികം സുഖം ഉപനിസ്സായ ദാനം ദേതി, സീലം സമാദിയതി, ഉപോസഥകമ്മം കരോതി, ഝാനം ഉപ്പാദേതി, വിപസ്സനം ഉപ്പാദേതി, മഗ്ഗം ഉപ്പാദേതി, അഭിഞ്ഞം ഉപ്പാദേതി, സമാപത്തിം ഉപ്പാദേതി. കായികം ദുക്ഖം… ഉതും… ഭോജനം… സേനാസനം ഉപനിസ്സായ ദാനം ദേതി, സീലം സമാദിയതി, ഉപോസഥകമ്മം കരോതി, ഝാനം ഉപ്പാദേതി, വിപസ്സനം ഉപ്പാദേതി, മഗ്ഗം ഉപ്പാദേതി, അഭിഞ്ഞം ഉപ്പാദേതി, സമാപത്തിം ഉപ്പാദേതി. കായികം സുഖം… കായികം ദുക്ഖം… ഉതു… ഭോജനം… സേനാസനം സദ്ധായ… സീലസ്സ… സുതസ്സ… ചാഗസ്സ… പഞ്ഞായ ഉപനിസ്സയപച്ചയേന പച്ചയോ. (൨)

അബ്യാകതോ ധമ്മോ അകുസലസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ.

ആരമ്മണൂപനിസ്സയോ – ചക്ഖും ഗരും കത്വാ അസ്സാദേതി അഭിനന്ദതി, തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. സോതം…പേ… ഘാനം…പേ… ജിവ്ഹം…പേ… കായം…പേ… രൂപേ…പേ… സദ്ദേ…പേ… ഗന്ധേ…പേ… രസേ…പേ… ഫോട്ഠബ്ബേ…പേ… വത്ഥും…പേ… വിപാകാബ്യാകതേ കിരിയാബ്യാകതേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി.

അനന്തരൂപനിസ്സയോ – ആവജ്ജനാ അകുസലാനം ഖന്ധാനം ഉപനിസ്സയപച്ചയേന പച്ചയോ.

പകതൂപനിസ്സയോ – കായികം സുഖം ഉപനിസ്സായ പാണം ഹനതി, അദിന്നം ആദിയതി, മുസാ ഭണതി, പിസുണം ഭണതി, ഫരുസം ഭണതി, സമ്ഫം പലപതി, സന്ധിം ഛിന്ദതി, നില്ലോപം ഹരതി, ഏകാഗാരികം കരോതി, പരിപന്ഥേ തിട്ഠതി, പരദാരം ഗച്ഛതി, ഗാമഘാതം കരോതി, നിഗമഘാതം കരോതി, മാതരം ജീവിതാ വോരോപേതി, പിതരം ജീവിതാ വോരോപേതി, അരഹന്തം ജീവിതാ വോരോപേതി, ദുട്ഠേന ചിത്തേന തഥാഗതസ്സ ലോഹിതം ഉപ്പാദേതി, സങ്ഘം ഭിന്ദതി.

കായികം ദുക്ഖം…പേ… ഉതും…പേ… ഭോജനം…പേ… സേനാസനം ഉപനിസ്സായ പാണം ഹനതി… (സംഖിത്തം.) സങ്ഘം ഭിന്ദതി.

കായികം സുഖം… കായികം ദുക്ഖം… ഉതു… ഭോജനം… സേനാസനം രാഗസ്സ… ദോസസ്സ… മോഹസ്സ… മാനസ്സ… ദിട്ഠിയാ… പത്ഥനായ ഉപനിസ്സയപച്ചയേന പച്ചയോ. (൩)

പുരേജാതപച്ചയോ

൪൨൪. അബ്യാകതോ ധമ്മോ അബ്യാകതസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം.

ആരമ്മണപുരേജാതം – അരഹാ ചക്ഖും അനിച്ചതോ ദുക്ഖതോ അനത്തതോ വിപസ്സതി. സോതം…പേ… ഘാനം…പേ… ജിവ്ഹം…പേ… കായം…പേ… രൂപേ…പേ… സദ്ദേ…പേ… ഗന്ധേ…പേ… രസേ…പേ… ഫോട്ഠബ്ബേ…പേ… വത്ഥും അനിച്ചതോ ദുക്ഖതോ അനത്തതോ വിപസ്സതി, ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി. രൂപായതനം ചക്ഖുവിഞ്ഞാണസ്സ പുരേജാതപച്ചയേന പച്ചയോ. സദ്ദായതനം സോതവിഞ്ഞാണസ്സ…പേ… ഗന്ധായതനം ഘാനവിഞ്ഞാണസ്സ…പേ… രസായതനം ജിവ്ഹാവിഞ്ഞാണസ്സ…പേ… ഫോട്ഠബ്ബായതനം കായവിഞ്ഞാണസ്സ പുരേജാതപച്ചയേന പച്ചയോ.

വത്ഥുപുരേജാതം – ചക്ഖായതനം ചക്ഖുവിഞ്ഞാണസ്സ പുരേജാതപച്ചയേന പച്ചയോ. സോതായതനം സോതവിഞ്ഞാണസ്സ …പേ… ഘാനായതനം ഘാനവിഞ്ഞാണസ്സ…പേ… ജിവ്ഹായതനം ജിവ്ഹാവിഞ്ഞാണസ്സ…പേ… കായായതനം കായവിഞ്ഞാണസ്സ പുരേജാതപച്ചയേന പച്ചയോ. വത്ഥു വിപാകാബ്യാകതാനം കിരിയാബ്യാകതാനം ഖന്ധാനം പുരേജാതപച്ചയേന പച്ചയോ. (൧)

അബ്യാകതോ ധമ്മോ കുസലസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം.

ആരമ്മണപുരേജാതം – സേക്ഖാ വാ പുഥുജ്ജനാ വാ ചക്ഖും അനിച്ചതോ ദുക്ഖതോ അനത്തതോ വിപസ്സന്തി. സോതം…പേ… ഘാനം…പേ… ജിവ്ഹം…പേ… കായം…പേ… രൂപേ…പേ… സദ്ദേ…പേ… ഗന്ധേ…പേ… രസേ…പേ… ഫോട്ഠബ്ബേ…പേ… വത്ഥും അനിച്ചതോ ദുക്ഖതോ അനത്തതോ വിപസ്സന്തി. ദിബ്ബേന ചക്ഖുനാ രൂപം പസ്സന്തി. ദിബ്ബായ സോതധാതുയാ സദ്ദം സുണന്തി.

വത്ഥുപുരേജാതം – വത്ഥു കുസലാനം ഖന്ധാനം പുരേജാതപച്ചയേന പച്ചയോ. (൨)

അബ്യാകതോ ധമ്മോ അകുസലസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – ചക്ഖും അസ്സാദേതി അഭിനന്ദതി, തം ആരബ്ഭ രാഗോ ഉപ്പജ്ജതി, ദിട്ഠി ഉപ്പജ്ജതി, വിചികിച്ഛാ ഉപ്പജ്ജതി, ഉദ്ധച്ചം ഉപ്പജ്ജതി, ദോമനസ്സം ഉപ്പജ്ജതി. സോതം…പേ… ഘാനം…പേ… ജിവ്ഹം…പേ… കായം…പേ… രൂപേ…പേ… സദ്ദേ…പേ… ഗന്ധേ…പേ… രസേ…പേ… ഫോട്ഠബ്ബേ…പേ… വത്ഥും അസ്സാദേതി അഭിനന്ദതി, തം ആരബ്ഭ രാഗോ ഉപ്പജ്ജതി…പേ… ദോമനസ്സം ഉപ്പജ്ജതി.

വത്ഥുപുരേജാതം – വത്ഥു അകുസലാനം ഖന്ധാനം പുരേജാതപച്ചയേന പച്ചയോ. (൩)

പച്ഛാജാതപച്ചയോ

൪൨൫. കുസലോ ധമ്മോ അബ്യാകതസ്സ ധമ്മസ്സ പച്ഛാജാതപച്ചയേന പച്ചയോ – പച്ഛാജാതാ കുസലാ ഖന്ധാ പുരേജാതസ്സ ഇമസ്സ കായസ്സ പച്ഛാജാതപച്ചയേന പച്ചയോ. (൧)

അകുസലോ ധമ്മോ അബ്യാകതസ്സ ധമ്മസ്സ പച്ഛാജാതപച്ചയേന പച്ചയോ – പച്ഛാജാതാ അകുസലാ ഖന്ധാ പുരേജാതസ്സ ഇമസ്സ കായസ്സ പച്ഛാജാതപച്ചയേന പച്ചയോ. (൧)

അബ്യാകതോ ധമ്മോ അബ്യാകതസ്സ ധമ്മസ്സ പച്ഛാജാതപച്ചയേന പച്ചയോ – പച്ഛാജാതാ വിപാകാബ്യാകതാ കിരിയാബ്യാകതാ ഖന്ധാ പുരേജാതസ്സ ഇമസ്സ കായസ്സ പച്ഛാജാതപച്ചയേന പച്ചയോ. (൧)

ആസേവനപച്ചയോ

൪൨൬. കുസലോ ധമ്മോ കുസലസ്സ ധമ്മസ്സ ആസേവനപച്ചയേന പച്ചയോ – പുരിമാ പുരിമാ കുസലാ ഖന്ധാ പച്ഛിമാനം പച്ഛിമാനം കുസലാനം ഖന്ധാനം ആസേവനപച്ചയേന പച്ചയോ. അനുലോമം ഗോത്രഭുസ്സ… അനുലോമം വോദാനസ്സ… ഗോത്രഭു മഗ്ഗസ്സ… വോദാനം മഗ്ഗസ്സ ആസേവനപച്ചയേന പച്ചയോ. (൧)

അകുസലോ ധമ്മോ അകുസലസ്സ ധമ്മസ്സ ആസേവനപച്ചയേന പച്ചയോ – പുരിമാ പുരിമാ അകുസലാ ഖന്ധാ പച്ഛിമാനം പച്ഛിമാനം അകുസലാനം ഖന്ധാനം ആസേവനപച്ചയേന പച്ചയോ. (൧)

അബ്യാകതോ ധമ്മോ അബ്യാകതസ്സ ധമ്മസ്സ ആസേവനപച്ചയേന പച്ചയോ – പുരിമാ പുരിമാ കിരിയാബ്യാകതാ ഖന്ധാ പച്ഛിമാനം പച്ഛിമാനം കിരിയാബ്യാകതാനം ഖന്ധാനം ആസേവനപച്ചയേന പച്ചയോ. (൧)

കമ്മപച്ചയോ

൪൨൭. കുസലോ ധമ്മോ കുസലസ്സ ധമ്മസ്സ കമ്മപച്ചയേന പച്ചയോ – കുസലാ ചേതനാ സമ്പയുത്തകാനം ഖന്ധാനം കമ്മപച്ചയേന പച്ചയോ. (൧)

കുസലോ ധമ്മോ അബ്യാകതസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ [നാനാഖണികാ (ക.)]. സഹജാതാ – കുസലാ ചേതനാ ചിത്തസമുട്ഠാനാനം രൂപാനം കമ്മപച്ചയേന പച്ചയോ.

നാനാക്ഖണികാ – കുസലാ ചേതനാ വിപാകാനം ഖന്ധാനം കടത്താ ച രൂപാനം കമ്മപച്ചയേന പച്ചയോ. (൨)

കുസലോ ധമ്മോ കുസലസ്സ ച അബ്യാകതസ്സ ച ധമ്മസ്സ കമ്മപച്ചയേന പച്ചയോ – കുസലാ ചേതനാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം കമ്മപച്ചയേന പച്ചയോ. (൩)

അകുസലോ ധമ്മോ അകുസലസ്സ ധമ്മസ്സ കമ്മപച്ചയേന പച്ചയോ – അകുസലാ ചേതനാ സമ്പയുത്തകാനം ഖന്ധാനം കമ്മപച്ചയേന പച്ചയോ. (൧)

അകുസലോ ധമ്മോ അബ്യാകതസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – അകുസലാ ചേതനാ ചിത്തസമുട്ഠാനാനം രൂപാനം കമ്മപച്ചയേന പച്ചയോ. നാനാക്ഖണികാ – അകുസലാ ചേതനാ വിപാകാനം ഖന്ധാനം കടത്താ ച രൂപാനം കമ്മപച്ചയേന പച്ചയോ. (൨)

അകുസലോ ധമ്മോ അകുസലസ്സ ച അബ്യാകതസ്സ ച ധമ്മസ്സ കമ്മപച്ചയേന പച്ചയോ – അകുസലാ ചേതനാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം കമ്മപച്ചയേന പച്ചയോ. (൩)

അബ്യാകതോ ധമ്മോ അബ്യാകതസ്സ ധമ്മസ്സ കമ്മപച്ചയേന പച്ചയോ – വിപാകാബ്യാകതാ കിരിയാബ്യാകതാ ചേതനാ സമ്പയുത്തകാനം ഖന്ധാനം, ചിത്തസമുട്ഠാനാനഞ്ച രൂപാനം കമ്മപച്ചയേന പച്ചയോ. പടിസന്ധിക്ഖണേ വിപാകാബ്യാകതാ ചേതനാ സമ്പയുത്തകാനം ഖന്ധാനം കടത്താ ച രൂപാനം കമ്മപച്ചയേന പച്ചയോ. ചേതനാ വത്ഥുസ്സ കമ്മപച്ചയേന പച്ചയോ. (൧)

വിപാകപച്ചയോ

൪൨൮. അബ്യാകതോ ധമ്മോ അബ്യാകതസ്സ ധമ്മസ്സ വിപാകപച്ചയേന പച്ചയോ – വിപാകാബ്യാകതോ ഏകോ ഖന്ധോ തിണ്ണന്നം ഖന്ധാനം ചിത്തസമുട്ഠാനാനഞ്ച രൂപാനം വിപാകപച്ചയേന പച്ചയോ. തയോ ഖന്ധാ ഏകസ്സ ഖന്ധസ്സ ചിത്തസമുട്ഠാനാനഞ്ച രൂപാനം വിപാകപച്ചയേന പച്ചയോ. ദ്വേ ഖന്ധാ ദ്വിന്നം ഖന്ധാനം ചിത്തസമുട്ഠാനാനഞ്ച രൂപാനം വിപാകപച്ചയേന പച്ചയോ. പടിസന്ധിക്ഖണേ വിപാകാബ്യാകതോ ഏകോ ഖന്ധോ തിണ്ണന്നം ഖന്ധാനം കടത്താ ച രൂപാനം വിപാകപച്ചയേന പച്ചയോ. തയോ ഖന്ധാ ഏകസ്സ ഖന്ധസ്സ കടത്താ ച രൂപാനം വിപാകപച്ചയേന പച്ചയോ. ദ്വേ ഖന്ധാ ദ്വിന്നം ഖന്ധാനം കടത്താ ച രൂപാനം വിപാകപച്ചയേന പച്ചയോ. ഖന്ധാ വത്ഥുസ്സ വിപാകപച്ചയേന പച്ചയോ. (൧)

ആഹാരപച്ചയോ

൪൨൯. കുസലോ ധമ്മോ കുസലസ്സ ധമ്മസ്സ ആഹാരപച്ചയേന പച്ചയോ – കുസലാ ആഹാരാ സമ്പയുത്തകാനം ഖന്ധാനം ആഹാരപച്ചയേന പച്ചയോ. (൧)

കുസലോ ധമ്മോ അബ്യാകതസ്സ ധമ്മസ്സ ആഹാരപച്ചയേന പച്ചയോ – കുസലാ ആഹാരാ ചിത്തസമുട്ഠാനാനം രൂപാനം ആഹാരപച്ചയേന പച്ചയോ. (൨)

കുസലോ ധമ്മോ കുസലസ്സ ച അബ്യാകതസ്സ ച ധമ്മസ്സ ആഹാരപച്ചയേന പച്ചയോ – കുസലാ ആഹാരാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ആഹാരപച്ചയേന പച്ചയോ. (൩)

അകുസലോ ധമ്മോ അകുസലസ്സ ധമ്മസ്സ ആഹാരപച്ചയേന പച്ചയോ – അകുസലാ ആഹാരാ സമ്പയുത്തകാനം ഖന്ധാനം ആഹാരപച്ചയേന പച്ചയോ.

അകുസലോ ധമ്മോ അബ്യാകതസ്സ ധമ്മസ്സ ആഹാരപച്ചയേന പച്ചയോ – അകുസലാ ആഹാരാ ചിത്തസമുട്ഠാനാനം രൂപാനം ആഹാരപച്ചയേന പച്ചയോ. (൨)

അകുസലോ ധമ്മോ അകുസലസ്സ ച അബ്യാകതസ്സ ച ധമ്മസ്സ ആഹാരപച്ചയേന പച്ചയോ – അകുസലാ ആഹാരാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ആഹാരപച്ചയേന പച്ചയോ. (൩)

അബ്യാകതോ ധമ്മോ അബ്യാകതസ്സ ധമ്മസ്സ ആഹാരപച്ചയേന പച്ചയോ – വിപാകാബ്യാകതാ കിരിയാബ്യാകതാ ആഹാരാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ആഹാരപച്ചയേന പച്ചയോ. പടിസന്ധിക്ഖണേ വിപാകാബ്യാകതാ ആഹാരാ സമ്പയുത്തകാനം ഖന്ധാനം കടത്താ ച രൂപാനം ആഹാരപച്ചയേന പച്ചയോ. കബളീകാരോ ആഹാരോ ഇമസ്സ കായസ്സ ആഹാരപച്ചയേന പച്ചയോ. (൧)

ഇന്ദ്രിയപച്ചയോ

൪൩൦. കുസലോ ധമ്മോ കുസലസ്സ ധമ്മസ്സ ഇന്ദ്രിയപച്ചയേന പച്ചയോ – കുസലാ ഇന്ദ്രിയാ സമ്പയുത്തകാനം ഖന്ധാനം ഇന്ദ്രിയപച്ചയേന പച്ചയോ. (൧)

കുസലോ ധമ്മോ അബ്യാകതസ്സ ധമ്മസ്സ ഇന്ദ്രിയപച്ചയേന പച്ചയോ – കുസലാ ഇന്ദ്രിയാ ചിത്തസമുട്ഠാനാനം രൂപാനം ഇന്ദ്രിയപച്ചയേന പച്ചയോ. (൨)

കുസലോ ധമ്മോ കുസലസ്സ ച അബ്യാകതസ്സ ച ധമ്മസ്സ ഇന്ദ്രിയപച്ചയേന പച്ചയോ – കുസലാ ഇന്ദ്രിയാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഇന്ദ്രിയപച്ചയേന പച്ചയോ. (൩)

അകുസലോ ധമ്മോ അകുസലസ്സ ധമ്മസ്സ ഇന്ദ്രിയപച്ചയേന പച്ചയോ – അകുസലാ ഇന്ദ്രിയാ സമ്പയുത്തകാനം ഖന്ധാനം ഇന്ദ്രിയപച്ചയേന പച്ചയോ. (൧)

അകുസലോ ധമ്മോ അബ്യാകതസ്സ ധമ്മസ്സ ഇന്ദ്രിയപച്ചയേന പച്ചയോ – അകുസലാ ഇന്ദ്രിയാ ചിത്തസമുട്ഠാനാനം രൂപാനം ഇന്ദ്രിയപച്ചയേന പച്ചയോ. (൨)

അകുസലോ ധമ്മോ അകുസലസ്സ ച അബ്യാകതസ്സ ച ധമ്മസ്സ ഇന്ദ്രിയപച്ചയേന പച്ചയോ – അകുസലാ ഇന്ദ്രിയാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഇന്ദ്രിയപച്ചയേന പച്ചയോ. (൩)

അബ്യാകതോ ധമ്മോ അബ്യാകതസ്സ ധമ്മസ്സ ഇന്ദ്രിയപച്ചയേന പച്ചയോ – വിപാകാബ്യാകതാ കിരിയാബ്യാകതാ ഇന്ദ്രിയാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഇന്ദ്രിയപച്ചയേന പച്ചയോ. പടിസന്ധിക്ഖണേ വിപാകാബ്യാകതാ ഇന്ദ്രിയാ സമ്പയുത്തകാനം ഖന്ധാനം കടത്താ ച രൂപാനം ഇന്ദ്രിയപച്ചയേന പച്ചയോ. ചക്ഖുന്ദ്രിയം ചക്ഖുവിഞ്ഞാണസ്സ ഇന്ദ്രിയപച്ചയേന പച്ചയോ. സോതിന്ദ്രിയം സോതവിഞ്ഞാണസ്സ …പേ… ഘാനിന്ദ്രിയം ഘാനവിഞ്ഞാണസ്സ…പേ… ജിവ്ഹിന്ദ്രിയം ജിവ്ഹാവിഞ്ഞാണസ്സ…പേ… കായിന്ദ്രിയം കായവിഞ്ഞാണസ്സ ഇന്ദ്രിയപച്ചയേന പച്ചയോ. രൂപജീവിതിന്ദ്രിയം കടത്താരൂപാനം ഇന്ദ്രിയപച്ചയേന പച്ചയോ. (൧)