൧. വിഭങ്ഗവാരോ

നഹേതുപച്ചയോ

൩൫൧. അകുസലം ധമ്മം സംസട്ഠോ അകുസലോ ധമ്മോ ഉപ്പജ്ജതി നഹേതുപച്ചയാ – വിചികിച്ഛാസഹഗതേ ഉദ്ധച്ചസഹഗതേ ഖന്ധേ സംസട്ഠോ വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

അബ്യാകതം ധമ്മം സംസട്ഠോ അബ്യാകതോ ധമ്മോ ഉപ്പജ്ജതി നഹേതുപച്ചയാ – അഹേതുകം വിപാകാബ്യാകതം കിരിയാബ്യാകതം ഏകം ഖന്ധം സംസട്ഠാ തയോ ഖന്ധാ, തയോ ഖന്ധേ സംസട്ഠോ ഏകോ ഖന്ധോ, ദ്വേ ഖന്ധേ സംസട്ഠാ ദ്വേ ഖന്ധാ; അഹേതുകപടിസന്ധിക്ഖണേ വിപാകാബ്യാകതം ഏകം ഖന്ധം സംസട്ഠാ തയോ ഖന്ധാ, തയോ ഖന്ധേ സംസട്ഠോ ഏകോ ഖന്ധോ, ദ്വേ ഖന്ധേ സംസട്ഠാ ദ്വേ ഖന്ധാ. (൧)

നഅധിപതിആദിപച്ചയാ

൩൫൨. കുസലം ധമ്മം സംസട്ഠോ കുസലോ ധമ്മോ ഉപ്പജ്ജതി നഅധിപതിപച്ചയാ… നപുരേജാതപച്ചയാ – അരൂപേ [ആരുപ്പേ (സബ്ബത്ഥ)] കുസലം ഏകം ഖന്ധം സംസട്ഠാ തയോ ഖന്ധാ…പേ… ദ്വേ ഖന്ധേ സംസട്ഠാ ദ്വേ ഖന്ധാ. അകുസലം ധമ്മം…പേ… അബ്യാകതം ധമ്മം…പേ….

നപച്ഛാജാത-നആസേവനപച്ചയാ

൩൫൩. കുസലം ധമ്മം സംസട്ഠോ കുസലോ ധമ്മോ ഉപ്പജ്ജതി നപച്ഛാജാതപച്ചയാ… തീണി. നആസേവനപച്ചയാ… തീണി.

നകമ്മപച്ചയോ

൩൫൪. കുസലം ധമ്മം സംസട്ഠോ കുസലോ ധമ്മോ ഉപ്പജ്ജതി നകമ്മപച്ചയാ. കുസലേ ഖന്ധേ സംസട്ഠാ കുസലാ ചേതനാ. (൧)

അകുസലം ധമ്മം സംസട്ഠോ അകുസലോ ധമ്മോ ഉപ്പജ്ജതി നകമ്മപച്ചയാ. അകുസലേ ഖന്ധേ സംസട്ഠാ അകുസലാ ചേതനാ. (൧)

അബ്യാകതം ധമ്മം സംസട്ഠോ അബ്യാകതോ ധമ്മോ ഉപ്പജ്ജതി നകമ്മപച്ചയാ. കിരിയാബ്യാകതേ ഖന്ധേ സംസട്ഠാ കിരിയാബ്യാകതാ ചേതനാ. (൧)

നവിപാകപച്ചയോ

൩൫൫. കുസലം ധമ്മം സംസട്ഠോ…പേ… അകുസലം ധമ്മം…പേ… അബ്യാകതം ധമ്മം സംസട്ഠോ അബ്യാകതോ ധമ്മോ ഉപ്പജ്ജതി നവിപാകപച്ചയാ – കിരിയാബ്യാകതം ഏകം ഖന്ധം.

(സംസട്ഠവാരേ പച്ചനീയവിഭങ്ഗേ നകമ്മേ ച നവിപാകേ ച പടിസന്ധി നത്ഥി; അവസേസേസു സബ്ബത്ഥ അത്ഥി.)

നഝാനപച്ചയോ

൩൫൬. അബ്യാകതം ധമ്മം സംസട്ഠോ അബ്യാകതോ ധമ്മോ ഉപ്പജ്ജതി നഝാനപച്ചയാ – പഞ്ചവിഞ്ഞാണസഹഗതം ഏകം ഖന്ധം സംസട്ഠാ തയോ ഖന്ധാ…പേ… ദ്വേ ഖന്ധേ സംസട്ഠാ ദ്വേ ഖന്ധാ. (൧)

നമഗ്ഗപച്ചയോ

൩൫൭. അബ്യാകതം ധമ്മം സംസട്ഠോ അബ്യാകതോ ധമ്മോ ഉപ്പജ്ജതി നമഗ്ഗപച്ചയാ – അഹേതുകം വിപാകാബ്യാകതം കിരിയാബ്യാകതം ഏകം ഖന്ധം സംസട്ഠാ തയോ ഖന്ധാ…പേ… ദ്വേ ഖന്ധേ സംസട്ഠാ ദ്വേ ഖന്ധാ; അഹേതുകപടിസന്ധിക്ഖണേ…പേ…. (൧)

നവിപ്പയുത്തപച്ചയോ

൩൫൮. കുസലം ധമ്മം സംസട്ഠോ കുസലോ ധമ്മോ ഉപ്പജ്ജതി നവിപ്പയുത്തപച്ചയാ – അരൂപേ കുസലം ഏകം ഖന്ധം സംസട്ഠാ തയോ ഖന്ധാ…പേ… ദ്വേ ഖന്ധേ സംസട്ഠാ ദ്വേ ഖന്ധാ. (൧)

അകുസലം ധമ്മം സംസട്ഠോ അകുസലോ ധമ്മോ ഉപ്പജ്ജതി നവിപ്പയുത്തപച്ചയാ – അരൂപേ അകുസലം ഏകം ഖന്ധം സംസട്ഠാ തയോ ഖന്ധാ…പേ… ദ്വേ ഖന്ധേ സംസട്ഠാ ദ്വേ ഖന്ധാ. (൧)

അബ്യാകതം ധമ്മം സംസട്ഠോ അബ്യാകതോ ധമ്മോ ഉപ്പജ്ജതി നവിപ്പയുത്തപച്ചയാ – അരൂപേ വിപാകാബ്യാകതം കിരിയാബ്യാകതം ഏകം ഖന്ധം സംസട്ഠാ തയോ ഖന്ധാ…പേ… ദ്വേ ഖന്ധേ സംസട്ഠാ ദ്വേ ഖന്ധാ. (നവിപ്പയുത്തേ പടിസന്ധി നത്ഥി.) (൧)