൧. പച്ചയാനുലോമം

൧. വിഭങ്ഗവാരോ

ഹേതുപച്ചയോ

൩൩൮. കുസലം ധമ്മം സംസട്ഠോ കുസലോ ധമ്മോ ഉപ്പജ്ജതി ഹേതുപച്ചയാ – കുസലം ഏകം ഖന്ധം സംസട്ഠാ തയോ ഖന്ധാ, തയോ ഖന്ധേ സംസട്ഠോ ഏകോ ഖന്ധോ, ദ്വേ ഖന്ധേ സംസട്ഠാ ദ്വേ ഖന്ധാ. (൧)

അകുസലം ധമ്മം സംസട്ഠോ അകുസലോ ധമ്മോ ഉപ്പജ്ജതി ഹേതുപച്ചയാ – അകുസലം ഏകം ഖന്ധം സംസട്ഠാ തയോ ഖന്ധാ, തയോ ഖന്ധേ സംസട്ഠോ ഏകോ ഖന്ധോ, ദ്വേ ഖന്ധേ സംസട്ഠാ ദ്വേ ഖന്ധാ. (൧)

അബ്യാകതം ധമ്മം സംസട്ഠോ അബ്യാകതോ ധമ്മോ ഉപ്പജ്ജതി ഹേതുപച്ചയാ – വിപാകാബ്യാകതം കിരിയാബ്യാകതം ഏകം ഖന്ധം സംസട്ഠാ തയോ ഖന്ധാ, തയോ ഖന്ധേ സംസട്ഠോ ഏകോ ഖന്ധോ, ദ്വേ ഖന്ധേ സംസട്ഠാ ദ്വേ ഖന്ധാ; പടിസന്ധിക്ഖണേ വിപാകാബ്യാകതം ഏകം ഖന്ധം സംസട്ഠാ തയോ ഖന്ധാ, തയോ ഖന്ധേ സംസട്ഠോ ഏകോ ഖന്ധോ, ദ്വേ ഖന്ധേ സംസട്ഠാ ദ്വേ ഖന്ധാ. (൧)

ആരമ്മണാദിപച്ചയാ

൩൩൯. കുസലം ധമ്മം സംസട്ഠോ കുസലോ ധമ്മോ ഉപ്പജ്ജതി ആരമ്മണപച്ചയാ… അധിപതിപച്ചയാ… (അധിപതി പടിസന്ധിക്ഖണേ നത്ഥി.) അനന്തരപച്ചയാ… സമനന്തരപച്ചയാ… സഹജാതപച്ചയാ… അഞ്ഞമഞ്ഞപച്ചയാ… നിസ്സയപച്ചയാ… ഉപനിസ്സയപച്ചയാ. (സബ്ബാനി പദാനി ഹേതുമൂലകസദിസാനി).

പുരേജാതപച്ചയോ

൩൪൦. കുസലം ധമ്മം സംസട്ഠോ കുസലോ ധമ്മോ ഉപ്പജ്ജതി പുരേജാതപച്ചയാ – കുസലം ഏകം ഖന്ധം സംസട്ഠാ തയോ ഖന്ധാ, തയോ ഖന്ധേ സംസട്ഠോ ഏകോ ഖന്ധോ, ദ്വേ ഖന്ധേ സംസട്ഠാ ദ്വേ ഖന്ധാ, വത്ഥും പുരേജാതപച്ചയാ. (൧)

അകുസലം ധമ്മം സംസട്ഠോ അകുസലോ ധമ്മോ ഉപ്പജ്ജതി പുരേജാതപച്ചയാ – അകുസലം ഏകം ഖന്ധം സംസട്ഠാ തയോ ഖന്ധാ, തയോ ഖന്ധേ സംസട്ഠോ ഏകോ ഖന്ധോ, ദ്വേ ഖന്ധേ സംസട്ഠാ ദ്വേ ഖന്ധാ; വത്ഥും പുരേജാതപച്ചയാ. (൧)

അബ്യാകതം ധമ്മം സംസട്ഠോ അബ്യാകതോ ധമ്മോ ഉപ്പജ്ജതി പുരേജാതപച്ചയാ – വിപാകാബ്യാകതം കിരിയാബ്യാകതം ഏകം ഖന്ധം സംസട്ഠാ തയോ ഖന്ധാ, തയോ ഖന്ധേ സംസട്ഠോ ഏകോ ഖന്ധോ, ദ്വേ ഖന്ധേ സംസട്ഠാ ദ്വേ ഖന്ധാ; വത്ഥും പുരേജാതപച്ചയാ. (൧)

ആസേവനപച്ചയോ

൩൪൧. കുസലം ധമ്മം സംസട്ഠോ…പേ… അകുസലം ധമ്മം…പേ… അബ്യാകതം ധമ്മം സംസട്ഠോ അബ്യാകതോ ധമ്മോ ഉപ്പജ്ജതി ആസേവനപച്ചയാ – കിരിയാബ്യാകതം ഏകം ഖന്ധം സംസട്ഠാ…പേ….

കമ്മപച്ചയോ

൩൪൨. കുസലം ധമ്മം സംസട്ഠോ കുസലോ ധമ്മോ ഉപ്പജ്ജതി കമ്മപച്ചയാ…പേ… അകുസലം ധമ്മം സംസട്ഠോ…പേ… അബ്യാകതം ധമ്മം സംസട്ഠോ…പേ….

വിപാകപച്ചയോ

൩൪൩. അബ്യാകതം ധമ്മം സംസട്ഠോ അബ്യാകതോ ധമ്മോ ഉപ്പജ്ജതി വിപാകപച്ചയാ – വിപാകാബ്യാകതം…പേ….

ആഹാരാദിപച്ചയാ

൩൪൪. കുസലം ധമ്മം സംസട്ഠോ കുസലോ ധമ്മോ ഉപ്പജ്ജതി ആഹാരപച്ചയാ… ഇന്ദ്രിയപച്ചയാ … ഝാനപച്ചയാ… മഗ്ഗപച്ചയാ… സമ്പയുത്തപച്ചയാ. (ഇമാനി പദാനി ഹേതുപച്ചയസദിസാനി.)

വിപ്പയുത്തപച്ചയോ

൩൪൫. കുസലം ധമ്മം സംസട്ഠോ കുസലോ ധമ്മോ ഉപ്പജ്ജതി വിപ്പയുത്തപച്ചയാ – കുസലം ഏകം ഖന്ധം സംസട്ഠാ തയോ ഖന്ധാ…പേ… ദ്വേ ഖന്ധേ സംസട്ഠാ ദ്വേ ഖന്ധാ; വത്ഥും വിപ്പയുത്തപച്ചയാ.

അകുസലം ധമ്മം…പേ… വത്ഥും വിപ്പയുത്തപച്ചയാ.

അബ്യാകതം ധമ്മം…പേ… വത്ഥും വിപ്പയുത്തപച്ചയാ.

അത്ഥിആദിപച്ചയാ

൩൪൬. കുസലം ധമ്മം സംസട്ഠോ കുസലോ ധമ്മോ ഉപ്പജ്ജതി അത്ഥിപച്ചയാ… നത്ഥിപച്ചയാ… വിഗതപച്ചയാ… അവിഗതപച്ചയാ (ഹേതുപച്ചയസദിസം).