൧. വിഭങ്ഗവാരോ

അനുലോമം – ഹേതുപച്ചയോ

൫൩. കുസലം ധമ്മം പടിച്ച കുസലോ ധമ്മോ ഉപ്പജ്ജതി ഹേതുപച്ചയാ – കുസലം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ. കുസലം ധമ്മം പടിച്ച അബ്യാകതോ ധമ്മോ ഉപ്പജ്ജതി ഹേതുപച്ചയാ – കുസലേ ഖന്ധേ പടിച്ച ചിത്തസമുട്ഠാനം രൂപം. കുസലം ധമ്മം പടിച്ച കുസലോ ച അബ്യാകതോ ച ധമ്മാ ഉപ്പജ്ജന്തി ഹേതുപച്ചയാ – കുസലം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം, തയോ ഖന്ധേ പടിച്ച ഏകോ ഖന്ധോ ചിത്തസമുട്ഠാനഞ്ച രൂപം, ദ്വേ ഖന്ധേ പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം. (൩)

അകുസലം ധമ്മം പടിച്ച അകുസലോ ധമ്മോ ഉപ്പജ്ജതി ഹേതുപച്ചയാ – അകുസലം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ. അകുസലം ധമ്മം പടിച്ച അബ്യാകതോ ധമ്മോ ഉപ്പജ്ജതി ഹേതുപച്ചയാ – അകുസലേ ഖന്ധേ പടിച്ച ചിത്തസമുട്ഠാനം രൂപം. അകുസലം ധമ്മം പടിച്ച അകുസലോ ച അബ്യാകതോ ച ധമ്മാ ഉപ്പജ്ജന്തി ഹേതുപച്ചയാ – അകുസലം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം, തയോ ഖന്ധേ പടിച്ച ഏകോ ഖന്ധോ ചിത്തസമുട്ഠാനഞ്ച രൂപം, ദ്വേ ഖന്ധേ പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം. (൩)

അബ്യാകതം ധമ്മം പടിച്ച അബ്യാകതോ ധമ്മോ ഉപ്പജ്ജതി ഹേതുപച്ചയാ – വിപാകാബ്യാകതം കിരിയാബ്യാകതം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം, തയോ ഖന്ധേ പടിച്ച ഏകോ ഖന്ധോ ചിത്തസമുട്ഠാനഞ്ച രൂപം, ദ്വേ ഖന്ധേ പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം; പടിസന്ധിക്ഖണേ വിപാകാബ്യാകതം ഏകം ഖന്ധം പടിച്ച തയോ ഖന്ധാ കടത്താ ച രൂപം, തയോ ഖന്ധേ പടിച്ച ഏകോ ഖന്ധോ കടത്താ ച രൂപം, ദ്വേ ഖന്ധേ പടിച്ച ദ്വേ ഖന്ധാ കടത്താ ച രൂപം; ഖന്ധേ പടിച്ച വത്ഥു, വത്ഥും പടിച്ച ഖന്ധാ; ഏകം മഹാഭൂതം പടിച്ച തയോ മഹാഭൂതാ, തയോ മഹാഭൂതേ പടിച്ച ഏകം മഹാഭൂതം, ദ്വേ മഹാഭൂതേ പടിച്ച ദ്വേ മഹാഭൂതാ, മഹാഭൂതേ പടിച്ച ചിത്തസമുട്ഠാനം രൂപം കടത്താരൂപം ഉപാദാരൂപം. (൧)

കുസലഞ്ച അബ്യാകതഞ്ച ധമ്മം പടിച്ച അബ്യാകതോ ധമ്മോ ഉപ്പജ്ജതി ഹേതുപച്ചയാ – കുസലേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം. (൧)

അകുസലഞ്ച അബ്യാകതഞ്ച ധമ്മം പടിച്ച അബ്യാകതോ ധമ്മോ ഉപ്പജ്ജതി ഹേതുപച്ചയാ – അകുസലേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം. (൧)

ആരമ്മണപച്ചയോ

൫൪. കുസലം ധമ്മം പടിച്ച കുസലോ ധമ്മോ ഉപ്പജ്ജതി ആരമ്മണപച്ചയാ – കുസലം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ. (൧)

അകുസലം ധമ്മം പടിച്ച അകുസലോ ധമ്മോ ഉപ്പജ്ജതി ആരമ്മണപച്ചയാ – അകുസലം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ. (൧)

അബ്യാകതം ധമ്മം പടിച്ച അബ്യാകതോ ധമ്മോ ഉപ്പജ്ജതി ആരമ്മണപച്ചയാ – വിപാകാബ്യാകതം കിരിയാബ്യാകതം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ; പടിസന്ധിക്ഖണേ വിപാകാബ്യാകതം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ, വത്ഥും പടിച്ച ഖന്ധാ. (൧)

അധിപതിപച്ചയോ

൫൫. കുസലം ധമ്മം പടിച്ച കുസലോ ധമ്മോ ഉപ്പജ്ജതി അധിപതിപച്ചയാ – കുസലം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ. കുസലം ധമ്മം പടിച്ച അബ്യാകതോ ധമ്മോ ഉപ്പജ്ജതി അധിപതിപച്ചയാ – കുസലേ ഖന്ധേ പടിച്ച ചിത്തസമുട്ഠാനം രൂപം. കുസലം ധമ്മം പടിച്ച കുസലോ ച അബ്യാകതോ ച ധമ്മാ ഉപ്പജ്ജന്തി അധിപതിപച്ചയാ – കുസലം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം, തയോ ഖന്ധേ പടിച്ച ഏകോ ഖന്ധോ ചിത്തസമുട്ഠാനഞ്ച രൂപം, ദ്വേ ഖന്ധേ പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം. (൩)

അകുസലം ധമ്മം പടിച്ച അകുസലോ ധമ്മോ ഉപ്പജ്ജതി അധിപതിപച്ചയാ – അകുസലം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ. അകുസലം ധമ്മം പടിച്ച അബ്യാകതോ ധമ്മോ ഉപ്പജ്ജതി അധിപതിപച്ചയാ – അകുസലേ ഖന്ധേ പടിച്ച ചിത്തസമുട്ഠാനം രൂപം. അകുസലം ധമ്മം പടിച്ച അകുസലോ ച അബ്യാകതോ ച ധമ്മാ ഉപ്പജ്ജന്തി അധിപതിപച്ചയാ – അകുസലം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം, തയോ ഖന്ധേ പടിച്ച ഏകോ ഖന്ധോ ചിത്തസമുട്ഠാനഞ്ച രൂപം, ദ്വേ ഖന്ധേ പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം. (൩)

അബ്യാകതം ധമ്മം പടിച്ച അബ്യാകതോ ധമ്മോ ഉപ്പജ്ജതി അധിപതിപച്ചയാ – വിപാകാബ്യാകതം കിരിയാബ്യാകതം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം, തയോ ഖന്ധേ പടിച്ച ഏകോ ഖന്ധോ ചിത്തസമുട്ഠാനഞ്ച രൂപം, ദ്വേ ഖന്ധേ പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം; ഏകം മഹാഭൂതം പടിച്ച തയോ മഹാഭൂതാ, തയോ മഹാഭൂതേ പടിച്ച ഏകം മഹാഭൂതം, ദ്വേ മഹാഭൂതേ പടിച്ച ദ്വേ മഹാഭൂതാ, മഹാഭൂതേ പടിച്ച ചിത്തസമുട്ഠാനം രൂപം ഉപാദാരൂപം. (൧)

കുസലഞ്ച അബ്യാകതഞ്ച ധമ്മം പടിച്ച അബ്യാകതോ ധമ്മോ ഉപ്പജ്ജതി അധിപതിപച്ചയാ – കുസലേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം. (൧)

അകുസലഞ്ച അബ്യാകതഞ്ച ധമ്മം പടിച്ച അബ്യാകതോ ധമ്മോ ഉപ്പജ്ജതി അധിപതിപച്ചയാ – അകുസലേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം. (൧)

അനന്തര-സമനന്തരപച്ചയാ

൫൬. കുസലം ധമ്മം പടിച്ച കുസലോ ധമ്മോ ഉപ്പജ്ജതി അനന്തരപച്ചയാ… സമനന്തരപച്ചയാ – കുസലം ഏകം ഖന്ധം പടിച്ച തയോ ഖന്ധാ. (അനന്തരമ്പി സമനന്തരമ്പി ആരമ്മണപച്ചയസദിസം.)

സഹജാതപച്ചയോ

൫൭. കുസലം ധമ്മം പടിച്ച കുസലോ ധമ്മോ ഉപ്പജ്ജതി സഹജാതപച്ചയാ – കുസലം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ. കുസലം ധമ്മം പടിച്ച അബ്യാകതോ ധമ്മോ ഉപ്പജ്ജതി സഹജാതപച്ചയാ – കുസലേ ഖന്ധേ പടിച്ച ചിത്തസമുട്ഠാനം രൂപം. കുസലം ധമ്മം പടിച്ച കുസലോ ച അബ്യാകതോ ച ധമ്മാ ഉപ്പജ്ജന്തി സഹജാതപച്ചയാ – കുസലം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം, തയോ ഖന്ധേ പടിച്ച ഏകോ ഖന്ധോ ചിത്തസമുട്ഠാനഞ്ച രൂപം, ദ്വേ ഖന്ധേ പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം. (൩)

അകുസലം ധമ്മം പടിച്ച അകുസലോ ധമ്മോ ഉപ്പജ്ജതി സഹജാതപച്ചയാ – അകുസലം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ. അകുസലം ധമ്മം പടിച്ച അബ്യാകതോ ധമ്മോ ഉപ്പജ്ജതി സഹജാതപച്ചയാ – അകുസലേ ഖന്ധേ പടിച്ച ചിത്തസമുട്ഠാനം രൂപം. അകുസലം ധമ്മം പടിച്ച അകുസലോ ച അബ്യാകതോ ച ധമ്മാ ഉപ്പജ്ജന്തി സഹജാതപച്ചയാ – അകുസലം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം, തയോ ഖന്ധേ പടിച്ച ഏകോ ഖന്ധോ ചിത്തസമുട്ഠാനഞ്ച രൂപം, ദ്വേ ഖന്ധേ പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം. (൩)

അബ്യാകതം ധമ്മം പടിച്ച അബ്യാകതോ ധമ്മോ ഉപ്പജ്ജതി സഹജാതപച്ചയാ – വിപാകാബ്യാകതം കിരിയാബ്യാകതം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം, തയോ ഖന്ധേ പടിച്ച ഏകോ ഖന്ധോ ചിത്തസമുട്ഠാനഞ്ച രൂപം, ദ്വേ ഖന്ധേ പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം; പടിസന്ധിക്ഖണേ വിപാകാബ്യാകതം ഏകം ഖന്ധം പടിച്ച തയോ ഖന്ധാ കടത്താ ച രൂപം, തയോ ഖന്ധേ പടിച്ച ഏകോ ഖന്ധോ കടത്താ ച രൂപം, ദ്വേ ഖന്ധേ പടിച്ച ദ്വേ ഖന്ധാ കടത്താ ച രൂപം; ഖന്ധേ പടിച്ച വത്ഥു, വത്ഥും പടിച്ച ഖന്ധാ; ഏകം മഹാഭൂതം പടിച്ച തയോ മഹാഭൂതാ, തയോ മഹാഭൂതേ പടിച്ച ഏകം മഹാഭൂതം, ദ്വേ മഹാഭൂതേ പടിച്ച ദ്വേ മഹാഭൂതാ, മഹാഭൂതേ പടിച്ച ചിത്തസമുട്ഠാനം രൂപം കടത്താരൂപം ഉപാദാരൂപം; ബാഹിരം ഏകം മഹാഭൂതം പടിച്ച തയോ മഹാഭൂതാ, തയോ മഹാഭൂതേ പടിച്ച ഏകം മഹാഭൂതം, ദ്വേ മഹാഭൂതേ പടിച്ച ദ്വേ മഹാഭൂതാ, മഹാഭൂതേ പടിച്ച ഉപാദാരൂപം; ആഹാരസമുട്ഠാനം ഏകം മഹാഭൂതം പടിച്ച തയോ മഹാഭൂതാ, തയോ മഹാഭൂതേ പടിച്ച ഏകം മഹാഭൂതം, ദ്വേ മഹാഭൂതേ പടിച്ച ദ്വേ മഹാഭൂതാ, മഹാഭൂതേ പടിച്ച ഉപാദാരൂപം; ഉതുസമുട്ഠാനം ഏകം മഹാഭൂതം പടിച്ച തയോ മഹാഭൂതാ, തയോ മഹാഭൂതേ പടിച്ച ഏകം മഹാഭൂതം, ദ്വേ മഹാഭൂതേ പടിച്ച ദ്വേ മഹാഭൂതാ, മഹാഭൂതേ പടിച്ച ഉപാദാരൂപം; അസഞ്ഞസത്താനം ഏകം മഹാഭൂതം പടിച്ച തയോ മഹാഭൂതാ, തയോ മഹാഭൂതേ പടിച്ച ഏകം മഹാഭൂതം, ദ്വേ മഹാഭൂതേ പടിച്ച ദ്വേ മഹാഭൂതാ, മഹാഭൂതേ പടിച്ച കടത്താരൂപം ഉപാദാരൂപം. (൧)

കുസലഞ്ച അബ്യാകതഞ്ച ധമ്മം പടിച്ച അബ്യാകതോ ധമ്മോ ഉപ്പജ്ജതി സഹജാതപച്ചയാ – കുസലേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം. (൧)

അകുസലഞ്ച അബ്യാകതഞ്ച ധമ്മം പടിച്ച അബ്യാകതോ ധമ്മോ ഉപ്പജ്ജതി സഹജാതപച്ചയാ – അകുസലേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം. (൧)

അഞ്ഞമഞ്ഞപച്ചയോ

൫൮. കുസലം ധമ്മം പടിച്ച കുസലോ ധമ്മോ ഉപ്പജ്ജതി അഞ്ഞമഞ്ഞപച്ചയാ – കുസലം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ. (൧)

അകുസലം ധമ്മം പടിച്ച അകുസലോ ധമ്മോ ഉപ്പജ്ജതി അഞ്ഞമഞ്ഞപച്ചയാ – അകുസലം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ. (൧)

അബ്യാകതം ധമ്മം പടിച്ച അബ്യാകതോ ധമ്മോ ഉപ്പജ്ജതി അഞ്ഞമഞ്ഞപച്ചയാ – വിപാകാബ്യാകതം കിരിയാബ്യാകതം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ; പടിസന്ധിക്ഖണേ വിപാകാബ്യാകതം ഏകം ഖന്ധം പടിച്ച തയോ ഖന്ധാ വത്ഥു ച, തയോ ഖന്ധേ പടിച്ച ഏകോ ഖന്ധോ വത്ഥു ച, ദ്വേ ഖന്ധേ പടിച്ച ദ്വേ ഖന്ധാ വത്ഥു ച; ഖന്ധേ പടിച്ച വത്ഥു, വത്ഥും പടിച്ച ഖന്ധാ; ഏകം മഹാഭൂതം പടിച്ച തയോ മഹാഭൂതാ, തയോ മഹാഭൂതേ പടിച്ച ഏകം മഹാഭൂതം, ദ്വേ മഹാഭൂതേ പടിച്ച ദ്വേ മഹാഭൂതാ; ബാഹിരം… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം ഏകം മഹാഭൂതം പടിച്ച തയോ മഹാഭൂതാ, തയോ മഹാഭൂതേ പടിച്ച ഏകം മഹാഭൂതം, ദ്വേ മഹാഭൂതേ പടിച്ച ദ്വേ മഹാഭൂതാ. (൧)

നിസ്സയപച്ചയോ

൫൯. കുസലം ധമ്മം പടിച്ച കുസലോ ധമ്മോ ഉപ്പജ്ജതി നിസ്സയപച്ചയാ – കുസലം ഏകം ഖന്ധം പടിച്ച…. (നിസ്സയപച്ചയം സഹജാതപച്ചയസദിസം.)

ഉപനിസ്സയപച്ചയോ

൬൦. കുസലം ധമ്മം പടിച്ച കുസലോ ധമ്മോ ഉപ്പജ്ജതി ഉപനിസ്സയപച്ചയാ – കുസലം ഏകം ഖന്ധം പടിച്ച…. (ഉപനിസ്സയപച്ചയം ആരമ്മണപച്ചയസദിസം.)

പുരേജാതപച്ചയോ

൬൧. കുസലം ധമ്മം പടിച്ച കുസലോ ധമ്മോ ഉപ്പജ്ജതി പുരേജാതപച്ചയാ – കുസലം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ. വത്ഥും പുരേജാതപച്ചയാ. (൧)

അകുസലം ധമ്മം പടിച്ച അകുസലോ ധമ്മോ ഉപ്പജ്ജതി പുരേജാതപച്ചയാ – അകുസലം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ. വത്ഥും പുരേജാതപച്ചയാ. (൧)

അബ്യാകതം ധമ്മം പടിച്ച അബ്യാകതോ ധമ്മോ ഉപ്പജ്ജതി പുരേജാതപച്ചയാ – വിപാകാബ്യാകതം കിരിയാബ്യാകതം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ. വത്ഥും പുരേജാതപച്ചയാ. (൧)

ആസേവനപച്ചയോ

൬൨. കുസലം ധമ്മം പടിച്ച കുസലോ ധമ്മോ ഉപ്പജ്ജതി ആസേവനപച്ചയാ – കുസലം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ. (൧)

അകുസലം ധമ്മം പടിച്ച അകുസലോ ധമ്മോ ഉപ്പജ്ജതി ആസേവനപച്ചയാ – അകുസലം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ. (൧)

അബ്യാകതം ധമ്മം പടിച്ച അബ്യാകതോ ധമ്മോ ഉപ്പജ്ജതി ആസേവനപച്ചയാ – കിരിയാബ്യാകതം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ. (൧)

കമ്മപച്ചയോ

൬൩. കുസലം ധമ്മം പടിച്ച കുസലോ ധമ്മോ ഉപ്പജ്ജതി കമ്മപച്ചയാ – കുസലം ഏകം ഖന്ധം പടിച്ച… തീണി.

അകുസലം ധമ്മം പടിച്ച… തീണി.

അബ്യാകതം ധമ്മം പടിച്ച അബ്യാകതോ ധമ്മോ ഉപ്പജ്ജതി കമ്മപച്ചയാ – വിപാകാബ്യാകതം കിരിയാബ്യാകതം ഏകം ഖന്ധം പടിച്ച…പേ… പടിസന്ധിക്ഖണേ…പേ… ഏകം മഹാഭൂതം പടിച്ച തയോ മഹാഭൂതാ…പേ… മഹാഭൂതേ പടിച്ച ചിത്തസമുട്ഠാനം രൂപം കടത്താരൂപം ഉപാദാരൂപം; അസഞ്ഞസത്താനം ഏകം മഹാഭൂതം പടിച്ച തയോ മഹാഭൂതാ…പേ… മഹാഭൂതേ പടിച്ച കടത്താരൂപം ഉപാദാരൂപം. (൧)

കുസലഞ്ച അബ്യാകതഞ്ച ധമ്മം പടിച്ച അബ്യാകതോ ധമ്മോ ഉപ്പജ്ജതി കമ്മപച്ചയാ – കുസലേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം. (൧)

അകുസലഞ്ച അബ്യാകതഞ്ച ധമ്മം പടിച്ച അബ്യാകതോ ധമ്മോ ഉപ്പജ്ജതി കമ്മപച്ചയാ – അകുസലേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം. (൧)

വിപാകപച്ചയോ

൬൪. അബ്യാകതം ധമ്മം പടിച്ച അബ്യാകതോ ധമ്മോ ഉപ്പജ്ജതി വിപാകപച്ചയാ – വിപാകാബ്യാകതം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം, തയോ ഖന്ധേ പടിച്ച ഏകോ ഖന്ധോ ചിത്തസമുട്ഠാനഞ്ച രൂപം, ദ്വേ ഖന്ധേ പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം; പടിസന്ധിക്ഖണേ വിപാകാബ്യാകതം ഏകം ഖന്ധം പടിച്ച തയോ ഖന്ധാ കടത്താ ച രൂപം, തയോ ഖന്ധേ പടിച്ച ഏകോ ഖന്ധോ കടത്താ ച രൂപം, ദ്വേ ഖന്ധേ പടിച്ച ദ്വേ ഖന്ധാ കടത്താ ച രൂപം; ഖന്ധേ പടിച്ച വത്ഥു, വത്ഥും പടിച്ച ഖന്ധാ; ഏകം മഹാഭൂതം പടിച്ച തയോ മഹാഭൂതാ; തയോ മഹാഭൂതേ പടിച്ച ഏകം മഹാഭൂതം, ദ്വേ മഹാഭൂതേ പടിച്ച ദ്വേ മഹാഭൂതാ, മഹാഭൂതേ പടിച്ച ചിത്തസമുട്ഠാനം രൂപം കടത്താരൂപം ഉപാദാരൂപം. (൧)

ആഹാരപച്ചയോ

൬൫. കുസലം ധമ്മം പടിച്ച കുസലോ ധമ്മോ ഉപ്പജ്ജതി ആഹാരപച്ചയാ – കുസലം ഏകം ഖന്ധം പടിച്ച… തീണി.

അകുസലം ധമ്മം പടിച്ച അകുസലോ ധമ്മോ ഉപ്പജ്ജതി ആഹാരപച്ചയാ – അകുസലം ഏകം ഖന്ധം പടിച്ച… തീണി.

അബ്യാകതം ധമ്മം പടിച്ച അബ്യാകതോ ധമ്മോ ഉപ്പജ്ജതി ആഹാരപച്ചയാ – വിപാകാബ്യാകതം കിരിയാബ്യാകതം ഏകം ഖന്ധം പടിച്ച…പേ… പടിസന്ധിക്ഖണേ…പേ… ഏകം മഹാഭൂതം പടിച്ച തയോ മഹാഭൂതാ…പേ… മഹാഭൂതേ പടിച്ച ചിത്തസമുട്ഠാനം രൂപം കടത്താരൂപം ഉപാദാരൂപം; ആഹാരസമുട്ഠാനം ഏകം മഹാഭൂതം പടിച്ച…പേ… മഹാഭൂതേ പടിച്ച ഉപാദാരൂപം.

കുസലഞ്ച അബ്യാകതഞ്ച ധമ്മം പടിച്ച…പേ….

അകുസലഞ്ച അബ്യാകതഞ്ച ധമ്മം പടിച്ച അബ്യാകതോ ധമ്മോ ഉപ്പജ്ജതി ആഹാരപച്ചയാ – അകുസലേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം.

ഇന്ദ്രിയപച്ചയോ

൬൬. കുസലം ധമ്മം പടിച്ച കുസലോ ധമ്മോ ഉപ്പജ്ജതി ഇന്ദ്രിയപച്ചയാ – കുസലം ഏകം ഖന്ധം പടിച്ച… തീണി.

അകുസലം ധമ്മം പടിച്ച… തീണി.

അബ്യാകതം ധമ്മം പടിച്ച…പേ… അസഞ്ഞസത്താനം ഏകം മഹാഭൂതം പടിച്ച…പേ…. (ഇന്ദ്രിയപച്ചയം കമ്മപച്ചയസദിസം.)

ഝാന-മഗ്ഗപച്ചയാ

൬൭. കുസലം ധമ്മം പടിച്ച കുസലോ ധമ്മോ ഉപ്പജ്ജതി ഝാനപച്ചയാ… മഗ്ഗപച്ചയാ. (ഝാനപച്ചയമ്പി മഗ്ഗപച്ചയമ്പി ഹേതുപച്ചയസദിസം.)

സമ്പയുത്തപച്ചയോ

൬൮. കുസലം ധമ്മം പടിച്ച കുസലോ ധമ്മോ ഉപ്പജ്ജതി സമ്പയുത്തപച്ചയാ – കുസലം ഏകം ഖന്ധം പടിച്ച…. (സമ്പയുത്തപച്ചയം ആരമ്മണപച്ചയസദിസം.)

വിപ്പയുത്തപച്ചയോ

൬൯. കുസലം ധമ്മം പടിച്ച കുസലോ ധമ്മോ ഉപ്പജ്ജതി വിപ്പയുത്തപച്ചയാ – കുസലം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ; വത്ഥും വിപ്പയുത്തപച്ചയാ. കുസലം ധമ്മം പടിച്ച അബ്യാകതോ ധമ്മോ ഉപ്പജ്ജതി വിപ്പയുത്തപച്ചയാ – കുസലേ ഖന്ധേ പടിച്ച ചിത്തസമുട്ഠാനം രൂപം. ഖന്ധേ വിപ്പയുത്തപച്ചയാ. കുസലം ധമ്മം പടിച്ച കുസലോ ച അബ്യാകതോ ച ധമ്മാ ഉപ്പജ്ജന്തി വിപ്പയുത്തപച്ചയാ – കുസലം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം; തയോ ഖന്ധേ പടിച്ച ഏകോ ഖന്ധോ ചിത്തസമുട്ഠാനഞ്ച രൂപം, ദ്വേ ഖന്ധേ പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം. ഖന്ധാ വത്ഥും വിപ്പയുത്തപച്ചയാ. ചിത്തസമുട്ഠാനം രൂപം ഖന്ധേ വിപ്പയുത്തപച്ചയാ. (൩)

അകുസലം ധമ്മം പടിച്ച അകുസലോ ധമ്മോ ഉപ്പജ്ജതി വിപ്പയുത്തപച്ചയാ – അകുസലം ഏകം ഖന്ധം പടിച്ച തയോ ഖന്ധാ, തയോ ഖന്ധേ പടിച്ച ഏകോ ഖന്ധോ, ദ്വേ ഖന്ധേ പടിച്ച ദ്വേ ഖന്ധാ. വത്ഥും വിപ്പയുത്തപച്ചയാ. അകുസലം ധമ്മം പടിച്ച അബ്യാകതോ ധമ്മോ ഉപ്പജ്ജതി വിപ്പയുത്തപച്ചയാ – അകുസലേ ഖന്ധേ പടിച്ച ചിത്തസമുട്ഠാനം രൂപം. ഖന്ധേ വിപ്പയുത്തപച്ചയാ. അകുസലം ധമ്മം പടിച്ച അകുസലോ ച അബ്യാകതോ ച ധമ്മാ ഉപ്പജ്ജന്തി വിപ്പയുത്തപച്ചയാ – അകുസലം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം, തയോ ഖന്ധേ പടിച്ച ഏകോ ഖന്ധോ ചിത്തസമുട്ഠാനഞ്ച രൂപം, ദ്വേ ഖന്ധേ പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം. ഖന്ധാ വത്ഥും വിപ്പയുത്തപച്ചയാ. ചിത്തസമുട്ഠാനം രൂപം ഖന്ധേ വിപ്പയുത്തപച്ചയാ. (൩)

അബ്യാകതം ധമ്മം പടിച്ച അബ്യാകതോ ധമ്മോ ഉപ്പജ്ജതി വിപ്പയുത്തപച്ചയാ – വിപാകാബ്യാകതം കിരിയാബ്യാകതം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം, തയോ ഖന്ധേ പടിച്ച ഏകോ ഖന്ധോ ചിത്തസമുട്ഠാനഞ്ച രൂപം, ദ്വേ ഖന്ധേ പടിച്ച ദ്വേ ഖന്ധാ ചിത്തസമുട്ഠാനഞ്ച രൂപം. ഖന്ധാ വത്ഥും വിപ്പയുത്തപച്ചയാ. ചിത്തസമുട്ഠാനം രൂപം ഖന്ധേ വിപ്പയുത്തപച്ചയാ. പടിസന്ധിക്ഖണേ വിപാകാബ്യാകതം ഏകം ഖന്ധം പടിച്ച തയോ ഖന്ധാ കടത്താ ച രൂപം, തയോ ഖന്ധേ പടിച്ച ഏകോ ഖന്ധോ കടത്താ ച രൂപം, ദ്വേ ഖന്ധേ പടിച്ച ദ്വേ ഖന്ധാ കടത്താ ച രൂപം. ഖന്ധാ വത്ഥും വിപ്പയുത്തപച്ചയാ. കടത്താരൂപം ഖന്ധേ വിപ്പയുത്തപച്ചയാ. ഖന്ധേ പടിച്ച വത്ഥു, വത്ഥും പടിച്ച ഖന്ധാ. ഖന്ധാ വത്ഥും വിപ്പയുത്തപച്ചയാ. വത്ഥു ഖന്ധേ വിപ്പയുത്തപച്ചയാ. ഏകം മഹാഭൂതം പടിച്ച തയോ മഹാഭൂതാ, തയോ മഹാഭൂതേ പടിച്ച ഏകം മഹാഭൂതം, ദ്വേ മഹാഭൂതേ പടിച്ച ദ്വേ മഹാഭൂതാ, മഹാഭൂതേ പടിച്ച ചിത്തസമുട്ഠാനം രൂപം കടത്താരൂപം ഉപാദാരൂപം. ഖന്ധേ വിപ്പയുത്തപച്ചയാ. (൧)

കുസലഞ്ച അബ്യാകതഞ്ച ധമ്മം പടിച്ച അബ്യാകതോ ധമ്മോ ഉപ്പജ്ജതി വിപ്പയുത്തപച്ചയാ – കുസലേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം. ഖന്ധേ വിപ്പയുത്തപച്ചയാ. (൧)

അകുസലഞ്ച അബ്യാകതഞ്ച ധമ്മം പടിച്ച അബ്യാകതോ ധമ്മോ ഉപ്പജ്ജതി വിപ്പയുത്തപച്ചയാ – അകുസലേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം. ഖന്ധേ വിപ്പയുത്തപച്ചയാ. (൧)

അത്ഥിപച്ചയോ

൭൦. കുസലം ധമ്മം പടിച്ച കുസലോ ധമ്മോ ഉപ്പജ്ജതി അത്ഥിപച്ചയാ – കുസലം ഏകം ഖന്ധം പടിച്ച തയോ ഖന്ധാ.

(സങ്ഖിതം. അത്ഥിപച്ചയം സഹജാതപച്ചയസദിസം.)

നത്ഥി-വിഗതപച്ചയാ

൭൧. കുസലം ധമ്മം പടിച്ച കുസലോ ധമ്മോ ഉപ്പജ്ജതി നത്ഥിപച്ചയാ… വിഗതപച്ചയാ. (നത്ഥിപച്ചയമ്പി വിഗതപച്ചയമ്പി ആരമ്മണപച്ചയസദിസം.)

അവിഗതപച്ചയോ

൭൨. കുസലം ധമ്മം പടിച്ച കുസലോ ധമ്മോ ഉപ്പജ്ജതി അവിഗതപച്ചയാ – കുസലം ഏകം ഖന്ധം പടിച്ച തയോ ഖന്ധാ. (അവിഗതപച്ചയം സഹജാതപച്ചയസദിസം).

(ഇമേ തേവീസതിപച്ചയാ സജ്ഝായന്തേന വിത്ഥാരേതബ്ബാ.)