൨. പച്ചയപച്ചനീയം

൧. വിഭങ്ഗവാരോ

നഹേതുപച്ചയോ

൨൩൯. അകുസലം ധമ്മം സഹജാതോ അകുസലോ ധമ്മോ ഉപ്പജ്ജതി നഹേതുപച്ചയാ – വിചികിച്ഛാസഹഗതേ ഉദ്ധച്ചസഹഗതേ ഖന്ധേ സഹജാതോ വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

അബ്യാകതം ധമ്മം സഹജാതോ അബ്യാകതോ ധമ്മോ ഉപ്പജ്ജതി നഹേതുപച്ചയാ – അഹേതുകം വിപാകാബ്യാകതം കിരിയാബ്യാകതം ഏകം ഖന്ധം സഹജാതാ തയോ ഖന്ധാ ചിത്തസമുട്ഠാനഞ്ച രൂപം, തയോ ഖന്ധേ സഹജാതോ ഏകോ ഖന്ധോ ചിത്തസമുട്ഠാനഞ്ച രൂപം, ദ്വേ ഖന്ധേ സഹജാതാ ദ്വേ ഖന്ധാ ചിത്തസമുട്ഠാനഞ്ച രൂപം; അഹേതുകപടിസന്ധിക്ഖണേ വിപാകാബ്യാകതം ഏകം ഖന്ധം സഹജാതാ തയോ ഖന്ധാ കടത്താ ച രൂപം, തയോ ഖന്ധേ സഹജാതോ ഏകോ ഖന്ധോ കടത്താ ച രൂപം, ദ്വേ ഖന്ധേ സഹജാതാ ദ്വേ ഖന്ധാ കടത്താ ച രൂപം, ഖന്ധേ സഹജാതം വത്ഥു, വത്ഥും സഹജാതാ ഖന്ധാ; ഏകം മഹാഭൂതം സഹജാതാ തയോ മഹാഭൂതാ, തയോ മഹാഭൂതേ സഹജാതം ഏകം മഹാഭൂതം, ദ്വേ മഹാഭൂതേ സഹജാതാ ദ്വേ മഹാഭൂതാ, മഹാഭൂതേ സഹജാതം ചിത്തസമുട്ഠാനം രൂപം കടത്താരൂപം ഉപാദാരൂപം; ബാഹിരം… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം ഏകം മഹാഭൂതം സഹജാതാ തയോ മഹാഭൂതാ…പേ… മഹാഭൂതേ സഹജാതം കടത്താരൂപം ഉപാദാരൂപം. (൧)

(യഥാ പടിച്ചവാരേ, ഏവം വിത്ഥാരേതബ്ബം.)