൨. പച്ചയപച്ചനീയം

൪൨. സിയാ കുസലം ധമ്മം പടിച്ച കുസലോ ധമ്മോ ഉപ്പജ്ജേയ്യ നഹേതുപച്ചയാ.

(യഥാ അനുലോമേ ഹേതുപച്ചയോ വിത്ഥാരിതോ, ഏവം പച്ചനീയേപി നഹേതുപച്ചയോ വിത്ഥാരേതബ്ബോ.)

൪൩. സിയാ കുസലം ധമ്മം പടിച്ച കുസലോ ധമ്മോ ഉപ്പജ്ജേയ്യ നആരമ്മണപച്ചയാ… നഅധിപതിപച്ചയാ… നഅനന്തരപച്ചയാ… നസമനന്തരപച്ചയാ… നസഹജാതപച്ചയാ… നഅഞ്ഞമഞ്ഞപച്ചയാ… നനിസ്സയപച്ചയാ… നഉപനിസ്സയപച്ചയാ… നപുരേജാതപച്ചയാ… നപച്ഛാജാതപച്ചയാ … നആസേവനപച്ചയാ… നകമ്മപച്ചയാ… നവിപാകപച്ചയാ… നആഹാരപച്ചയാ… നഇന്ദ്രിയപച്ചയാ… നഝാനപച്ചയാ… നമഗ്ഗപച്ചയാ… നസമ്പയുത്തപച്ചയാ… നവിപ്പയുത്തപച്ചയാ… നോഅത്ഥിപച്ചയാ… നോനത്ഥിപച്ചയാ… നോവിഗതപച്ചയാ… നോഅവിഗതപച്ചയാ.

൪൪. സിയാ കുസലം ധമ്മം പടിച്ച കുസലോ ധമ്മോ ഉപ്പജ്ജേയ്യ നഹേതുപച്ചയാ നആരമ്മണപച്ചയാ….

(യഥാ അനുലോമേ ഏകേകസ്സ പദസ്സ ഏകമൂലകം, ദുമൂലകം, തിമൂലകം, ചതുമൂലകം, യാവ തേവീസതിമൂലകം ഏവം പച്ചനീയേപി വിത്ഥാരേതബ്ബം. )

(ഖ) തികഞ്ച പട്ഠാനവരം ദുകുത്തമം,

ദുകം തികഞ്ചേവ തികം ദുകഞ്ച;

തികം തികഞ്ചേവ ദുകം ദുകഞ്ച,

ഛ പച്ചനീയമ്ഹി നയാ സുഗമ്ഭീരാതി.