൯. ഹേവത്ഥികഥാ

൩൦൪. അതീതം അത്ഥീതി? ഹേവത്ഥി, ഹേവ നത്ഥീതി. സേവത്ഥി, സേവ നത്ഥീതി? ന ഹേവം വത്തബ്ബേ…പേ… സേവത്ഥി, സേവ നത്ഥീതി? ആമന്താ. അത്ഥട്ഠോ നത്ഥട്ഠോ, നത്ഥട്ഠോ അത്ഥട്ഠോ, അത്ഥിഭാവോ നത്ഥിഭാവോ, നത്ഥിഭാവോ അത്ഥിഭാവോ, അത്ഥീതി വാ നത്ഥീതി വാ, നത്ഥീതി വാ അത്ഥീതി വാ ഏസേസേ ഏകട്ഠേ സമേ സമഭാഗേ തജ്ജാതേതി? ന ഹേവം വത്തബ്ബേ…പേ….

അനാഗതം അത്ഥീതി? ഹേവത്ഥി, ഹേവ നത്ഥീതി. സേവത്ഥി, സേവ നത്ഥീതി? ന ഹേവം വത്തബ്ബേ…പേ… സേവത്ഥി, സേവ നത്ഥീതി? ആമന്താ. അത്ഥട്ഠോ നത്ഥട്ഠോ, നത്ഥട്ഠോ അത്ഥട്ഠോ, അത്ഥിഭാവോ നത്ഥിഭാവോ, നത്ഥിഭാവോ അത്ഥിഭാവോ, അത്ഥീതി വാ നത്ഥീതി വാ, നത്ഥീതി വാ അത്ഥീതി വാ ഏസേസേ ഏകട്ഠേ സമേ സമഭാഗേ തജ്ജാതേതി? ന ഹേവം വത്തബ്ബേ…പേ….

പച്ചുപ്പന്നം അത്ഥീതി? ഹേവത്ഥി, ഹേവ നത്ഥീതി. സേവത്ഥി, സേവ നത്ഥീതി? ന ഹേവം വത്തബ്ബേ…പേ… സേവത്ഥി, സേവ നത്ഥീതി? ആമന്താ. അത്ഥട്ഠോ നത്ഥട്ഠോ…പേ… സമേ സമഭാഗേ തജ്ജാതേതി? ന ഹേവം വത്തബ്ബേ…പേ….

൩൦൫. അതീതം ഹേവത്ഥി, ഹേവ നത്ഥീതി? ആമന്താ. കിന്തത്ഥി, കിന്തി നത്ഥീതി? അതീതം അതീതന്തി ഹേവത്ഥി, അതീതം അനാഗതന്തി ഹേവ നത്ഥി, അതീതം പച്ചുപ്പന്നന്തി ഹേവ നത്ഥീതി. സേവത്ഥി, സേവ നത്ഥീതി? ന ഹേവം വത്തബ്ബേ…പേ… സേവത്ഥി, സേവ നത്ഥീതി? ആമന്താ. അത്ഥട്ഠോ നത്ഥട്ഠോ, നത്ഥട്ഠോ അത്ഥട്ഠോ, അത്ഥിഭാവോ നത്ഥിഭാവോ, നത്ഥിഭാവോ അത്ഥിഭാവോ, അത്ഥീതി വാ നത്ഥീതി വാ, നത്ഥീതി വാ അത്ഥീതി വാ ഏസേസേ ഏകട്ഠേ സമേ സമഭാഗേ തജ്ജാതേതി? ന ഹേവം വത്തബ്ബേ…പേ….

അനാഗതം ഹേവത്ഥി, ഹേവ നത്ഥീതി? ആമന്താ. കിന്തത്ഥി, കിന്തി നത്ഥീതി? അനാഗതം അനാഗതന്തി ഹേവത്ഥി, അനാഗതം അതീതന്തി ഹേവ നത്ഥി, അനാഗതം പച്ചുപ്പന്നന്തി ഹേവ നത്ഥീതി. സേവത്ഥി, സേവ നത്ഥീതി? ന ഹേവം വത്തബ്ബേ…പേ… സേവത്ഥി, സേവ നത്ഥീതി? ആമന്താ. അത്ഥട്ഠോ നത്ഥട്ഠോ, നത്ഥട്ഠോ അത്ഥട്ഠോ…പേ… സമേ സമഭാഗേ തജ്ജാതേതി? ന ഹേവം വത്തബ്ബേ…പേ….

പച്ചുപ്പന്നം ഹേവത്ഥി, ഹേവ നത്ഥീതി? ആമന്താ. കിന്തത്ഥി, കിന്തി നത്ഥീതി? പച്ചുപ്പന്നം പച്ചുപ്പന്നന്തി ഹേവത്ഥി, പച്ചുപ്പന്നം അതീതന്തി ഹേവ നത്ഥി, പച്ചുപ്പന്നം അനാഗതന്തി ഹേവ നത്ഥീതി. സേവത്ഥി, സേവ നത്ഥീതി? ന ഹേവം വത്തബ്ബേ…പേ… സേവത്ഥി, സേവ നത്ഥീതി? ആമന്താ. അത്ഥട്ഠോ നത്ഥട്ഠോ…പേ… സമേ സമഭാഗേ തജ്ജാതേതി? ന ഹേവം വത്തബ്ബേ…പേ….

ന വത്തബ്ബം – ‘‘അതീതം ഹേവത്ഥി, ഹേവ നത്ഥി; അനാഗതം ഹേവത്ഥി, ഹേവ നത്ഥി; പച്ചുപ്പന്നം ഹേവത്ഥി, ഹേവ നത്ഥീ’’തി? ആമന്താ. അതീതം അനാഗതന്തി ഹേവത്ഥി, അതീതം പച്ചുപ്പന്നന്തി ഹേവത്ഥി, അനാഗതം അതീതന്തി ഹേവത്ഥി, അനാഗതം പച്ചുപ്പന്നന്തി ഹേവത്ഥി, പച്ചുപ്പന്നം അതീതന്തി ഹേവത്ഥി, പച്ചുപ്പന്നം അനാഗതന്തി ഹേവത്ഥീതി? ന ഹേവം വത്തബ്ബേ.…പേ…. തേന ഹി അതീതം ഹേവത്ഥി ഹേവ നത്ഥി, അനാഗതം ഹേവത്ഥി ഹേവ നത്ഥി, പച്ചുപ്പന്നം ഹേവത്ഥി, ഹേവ നത്ഥീതി.

൩൦൬. രൂപം അത്ഥീതി? ഹേവത്ഥി, ഹേവ നത്ഥീതി. സേവത്ഥി, സേവ നത്ഥീതി? ന ഹേവം വത്തബ്ബേ…പേ… സേവത്ഥി, സേവ നത്ഥീതി? ആമന്താ. അത്ഥട്ഠോ നത്ഥട്ഠോ, നത്ഥട്ഠോ അത്ഥട്ഠോ, അത്ഥിഭാവോ നത്ഥിഭാവോ, നത്ഥിഭാവോ അത്ഥിഭാവോ, അത്ഥീതി വാ നത്ഥീതി വാ, നത്ഥീതി വാ അത്ഥീതി വാ ഏസേസേ ഏകട്ഠേ സമേ സമഭാഗേ തജ്ജാതേതി? ന ഹേവം വത്തബ്ബേ…പേ….

വേദനാ… സഞ്ഞാ… സങ്ഖാരാ… വിഞ്ഞാണം അത്ഥീതി? ഹേവത്ഥി, ഹേവ നത്ഥീതി. സേവത്ഥി, സേവ നത്ഥീതി? ന ഹേവം വത്തബ്ബേ…പേ… സേവത്ഥി, സേവ നത്ഥീതി? ആമന്താ. അത്ഥട്ഠോ നത്ഥട്ഠോ…പേ… സമേ സമഭാഗേ തജ്ജാതേതി? ന ഹേവം വത്തബ്ബേ…പേ….

രൂപം ഹേവത്ഥി, ഹേവ നത്ഥീതി? ആമന്താ. കിന്തത്ഥി, കിന്തി നത്ഥീതി? രൂപം രൂപന്തി ഹേവത്ഥി, രൂപം വേദനാതി ഹേവം നത്ഥി…പേ… രൂപം സഞ്ഞാതി ഹേവ നത്ഥി…പേ… രൂപം സങ്ഖാരാതി ഹേവ നത്ഥി…പേ… രൂപം വിഞ്ഞാണന്തി ഹേവ നത്ഥീതി. സേവത്ഥി, സേവ നത്ഥീതി? ന ഹേവം വത്തബ്ബേ…പേ… സേവത്ഥി, സേവ നത്ഥീതി? ആമന്താ. അത്ഥട്ഠോ നത്ഥട്ഠോ…പേ… സമേ സമഭാഗേ തജ്ജാതേതി? ന ഹേവം വത്തബ്ബേ…പേ….

വേദനാ… സഞ്ഞാ… സങ്ഖാരാ… വിഞ്ഞാണം ഹേവത്ഥി, ഹേവ നത്ഥീതി? ആമന്താ. കിന്തത്ഥി, കിന്തി നത്ഥീതി? വിഞ്ഞാണം വിഞ്ഞാണന്തി ഹേവത്ഥി. വിഞ്ഞാണം രൂപന്തി ഹേവ നത്ഥി…പേ… വിഞ്ഞാണം വേദനാതി ഹേവ നത്ഥി…പേ… വിഞ്ഞാണം സഞ്ഞാതി ഹേവ നത്ഥി…പേ… വിഞ്ഞാണം സങ്ഖാരാതി ഹേവ നത്ഥീതി. സേവത്ഥി, സേവ നത്ഥീതി? ന ഹേവം വത്തബ്ബേ…പേ… സേവത്ഥി, സേവ നത്ഥീതി? ആമന്താ. അത്ഥട്ഠോ നത്ഥട്ഠോ…പേ… സമേ സമഭാഗേ തജ്ജാതേതി? ന ഹേവം വത്തബ്ബേ…പേ….

ന വത്തബ്ബം – ‘‘രൂപം ഹേവത്ഥി, ഹേവ നത്ഥീതി; വേദനാ… സഞ്ഞാ… സങ്ഖാരാ… വിഞ്ഞാണം ഹേവത്ഥി, ഹേവ നത്ഥീതി? ആമന്താ. രൂപം വേദനാതി ഹേവത്ഥി…പേ… രൂപം സഞ്ഞാതി ഹേവത്ഥി…പേ… രൂപം സങ്ഖാരാതി ഹേവത്ഥി…പേ… രൂപം വിഞ്ഞാണന്തി ഹേവത്ഥി… വേദനാ… സഞ്ഞാ … സങ്ഖാരാ… വിഞ്ഞാണം രൂപന്തി ഹേവത്ഥി… വിഞ്ഞാണം വേദനാതി ഹേവത്ഥി… വിഞ്ഞാണം സഞ്ഞാതി ഹേവത്ഥി… വിഞ്ഞാണം സങ്ഖാരാതി ഹേവത്ഥീതി? ന ഹേവം വത്തബ്ബേ…പേ… തേന ഹി രൂപം ഹേവത്ഥി, ഹേവ നത്ഥി; വേദനാ… സഞ്ഞാ… സങ്ഖാരാ… വിഞ്ഞാണം ഹേവത്ഥി, ഹേവ നത്ഥീതി.

ഹേവത്ഥികഥാ നിട്ഠിതാ.

തസ്സുദ്ദാനം –

ഉപലബ്ഭോ പരിഹാനി, ബ്രഹ്മചരിയവാസോ ഓധിസോ;

പരിഞ്ഞാ കാമരാഗപ്പഹാനം, സബ്ബത്ഥിവാദോ ആയതനം;

അതീതാനാഗതോ സുഭങ്ഗോ [അതീതാനാഗതേസു ഭാഗോ (സ്യാ.)], സബ്ബേ ധമ്മാ സതിപട്ഠാനാ.

ഹേവത്ഥി ഹേവ നത്ഥീതി.

പഠമവഗ്ഗോ

മഹാവഗ്ഗോ.