൭. ഏകച്ചം അത്ഥീതികഥാ

൧. അതീതാദിഏകച്ചകഥാ

൨൯൯. അതീതം അത്ഥീതി? ഏകച്ചം അത്ഥി, ഏകച്ചം നത്ഥീതി. ഏകച്ചം നിരുദ്ധം, ഏകച്ചം ന നിരുദ്ധം; ഏകച്ചം വിഗതം, ഏകച്ചം അവിഗതം; ഏകച്ചം അത്ഥങ്ഗതം, ഏകച്ചം ന അത്ഥങ്ഗതം; ഏകച്ചം അബ്ഭത്ഥങ്ഗതം, ഏകച്ചം ന അബ്ഭത്ഥങ്ഗതന്തി? ന ഹേവം വത്തബ്ബേ…പേ….

അതീതം ഏകച്ചം അത്ഥി, ഏകച്ചം നത്ഥീതി? ആമന്താ. അതീതാ അവിപക്കവിപാകാ ധമ്മാ ഏകച്ചേ അത്ഥി, ഏകച്ചേ നത്ഥീതി? ന ഹേവം വത്തബ്ബേ…പേ… അതീതം ഏകച്ചം അത്ഥി, ഏകച്ചം നത്ഥീതി? ആമന്താ. അതീതാ വിപക്കവിപാകാ ധമ്മാ ഏകച്ചേ അത്ഥി, ഏകച്ചേ നത്ഥീതി? ന ഹേവം വത്തബ്ബേ…പേ… അതീതം ഏകച്ചം അത്ഥി, ഏകച്ചം നത്ഥീതി? ആമന്താ. അതീതാ അവിപാകാ ധമ്മാ ഏകച്ചേ അത്ഥി ഏകച്ചേ നത്ഥീതി? ന ഹേവം വത്തബ്ബേ…പേ….

അതീതം ഏകച്ചം അത്ഥി ഏകച്ചം നത്ഥീതി? ആമന്താ. കിം അത്ഥി കിം നത്ഥീതി? അതീതാ അവിപക്കവിപാകാ ധമ്മാ – തേ അത്ഥി; അതീതാ വിപക്കവിപാകാ ധമ്മാ – തേ നത്ഥീതി. അതീതാ അവിപക്കവിപാകാ ധമ്മാ – തേ അത്ഥീതി? ആമന്താ. അതീതാ വിപക്കവിപാകാ ധമ്മാ – തേ അത്ഥീതി? ന ഹേവം വത്തബ്ബേ…പേ… അതീതാ അവിപക്കവിപാകാ ധമ്മാ – തേ അത്ഥീതി? ആമന്താ. അതീതാ അവിപാകാ ധമ്മാ – തേ അത്ഥീതി [അതീതാ അവിപക്കവിപാകാ ധമ്മാ തേ നത്ഥീതി (ക.)]? ന ഹേവം വത്തബ്ബേ…പേ….

അതീതാ വിപക്കവിപാകാ ധമ്മാ – തേ നത്ഥീതി? ആമന്താ. അതീതാ അവിപക്കവിപാകാ ധമ്മാ – തേ നത്ഥീതി? ന ഹേവം വത്തബ്ബേ …പേ….

അതീതാ അവിപാകാ [വിപക്കവിപാകാ (സ്യാ.), അവിപക്കവിപാകാ (ക.)] ധമ്മാ – തേ നത്ഥീതി? ആമന്താ. അതീതാ അവിപക്കവിപാകാ [അവിപാകാ (സ്യാ.)] ധമ്മാ – തേ നത്ഥീതി? ന ഹേവം വത്തബ്ബേ…പേ….

അതീതാ അവിപക്കവിപാകാ ധമ്മാ – തേ അത്ഥീതി? ആമന്താ. നനു അതീതാ അവിപക്കവിപാകാ ധമ്മാ നിരുദ്ധാതി? ആമന്താ. ഹഞ്ചി അതീതാ അവിപക്കവിപാകാ ധമ്മാ നിരുദ്ധാ, നോ ച വത രേ വത്തബ്ബേ – ‘‘അതീതാ അവിപക്കവിപാകാ ധമ്മാ – തേ [ധമ്മാ നിരുദ്ധാ തേ (സ്യാ. ക.)] അത്ഥീ’’തി.

അതീതാ അവിപക്കവിപാകാ ധമ്മാ നിരുദ്ധാ – തേ അത്ഥീതി? ആമന്താ. അതീതാ വിപക്കവിപാകാ ധമ്മാ നിരുദ്ധാ – തേ അത്ഥീതി? ന ഹേവം വത്തബ്ബേ…പേ… അതീതാ അവിപക്കവിപാകാ ധമ്മാ നിരുദ്ധാ – തേ അത്ഥീതി? ആമന്താ. അതീതാ അവിപാകാ [അവിപക്കവിപാകാ (സീ. ക.)] ധമ്മാ നിരുദ്ധാ – തേ അത്ഥീതി? ന ഹേവം വത്തബ്ബേ…പേ….

അതീതാ വിപക്കവിപാകാ ധമ്മാ നിരുദ്ധാ – തേ നത്ഥീതി? ആമന്താ. അതീതാ അവിപക്കവിപാകാ ധമ്മാ നിരുദ്ധാ – തേ നത്ഥീതി? ന ഹേവം വത്തബ്ബേ…പേ….

അതീതാ അവിപാകാ [വിപക്കവിപാകാ (സ്യാ.), അവിപക്കവിപാകാ (ക.)] ധമ്മാ നിരുദ്ധാ – തേ നത്ഥീതി? ആമന്താ. അതീതാ അവിപക്കവിപാകാ [അവിപാകാ (സ്യാ.)] ധമ്മാ നിരുദ്ധാ – തേ നത്ഥീതി? ന ഹേവം വത്തബ്ബേ…പേ….

അതീതാ അവിപക്കവിപാകാ ധമ്മാ നിരുദ്ധാ – തേ അത്ഥീതി? ആമന്താ. അതീതാ വിപക്കവിപാകാ ധമ്മാ നിരുദ്ധാ – തേ നത്ഥീതി? ആമന്താ. അതീതാ ഏകദേസം വിപക്കവിപാകാ ധമ്മാ ഏകദേസം അവിപക്കവിപാകാ ധമ്മാ നിരുദ്ധാ – തേ ഏകച്ചേ അത്ഥി ഏകച്ചേ നത്ഥീതി? ന ഹേവം വത്തബ്ബേ…പേ….

ന വത്തബ്ബം – ‘‘അതീതാ അവിപക്കവിപാകാ ധമ്മാ – തേ അത്ഥീ’’തി? ആമന്താ. നനു അതീതാ അവിപക്കവിപാകാ ധമ്മാ വിപച്ചിസ്സന്തീതി? ആമന്താ. ഹഞ്ചി അതീതാ അവിപക്കവിപാകാ ധമ്മാ വിപച്ചിസ്സന്തി, തേന വത രേ വത്തബ്ബേ – ‘‘അതീതാ അവിപക്കവിപാകാ ധമ്മാ – തേ അത്ഥീ’’തി.

അതീതാ അവിപക്കവിപാകാ ധമ്മാ വിപച്ചിസ്സന്തീതി കത്വാ തേ അത്ഥീതി? ആമന്താ. വിപച്ചിസ്സന്തീതി കത്വാ പച്ചുപ്പന്നാതി? ന ഹേവം വത്തബ്ബേ…പേ… വിപച്ചിസ്സന്തീതി കത്വാ പച്ചുപ്പന്നാതി? ആമന്താ. പച്ചുപ്പന്നാ ധമ്മാ നിരുജ്ഝിസ്സന്തീതി കത്വാ തേ നത്ഥീതി? ന ഹേവം വത്തബ്ബേ…പേ….

൨. അനാഗതാദിഏകച്ചകഥാ

൩൦൦. അനാഗതം അത്ഥീതി? ഏകച്ചം അത്ഥി, ഏകച്ചം നത്ഥീതി. ഏകച്ചം ജാതം, ഏകച്ചം അജാതം; ഏകച്ചം സഞ്ജാതം, ഏകച്ചം അസഞ്ജാതം; ഏകച്ചം നിബ്ബത്തം, ഏകച്ചം അനിബ്ബത്തം; ഏകച്ചം പാതുഭൂതം, ഏകച്ചം അപാതുഭൂതന്തി? ന ഹേവം വത്തബ്ബേ…പേ….

അനാഗതം ഏകച്ചം അത്ഥി, ഏകച്ചം നത്ഥീതി? ആമന്താ. അനാഗതാ ഉപ്പാദിനോ ധമ്മാ ഏകച്ചേ അത്ഥി, ഏകച്ചേ നത്ഥീതി? ന ഹേവം വത്തബ്ബേ…പേ… അനാഗതം ഏകച്ചം അത്ഥി, ഏകച്ചം നത്ഥീതി? ആമന്താ. അനാഗതാ അനുപ്പാദിനോ ധമ്മാ ഏകച്ചേ അത്ഥി, ഏകച്ചേ നത്ഥീതി? ന ഹേവം വത്തബ്ബേ…പേ….

അനാഗതം ഏകച്ചം അത്ഥി, ഏകച്ചം നത്ഥീതി? ആമന്താ. കിം അത്ഥി, കിം നത്ഥീതി? അനാഗതാ ഉപ്പാദിനോ ധമ്മാ – തേ അത്ഥി; അനാഗതാ അനുപ്പാദിനോ ധമ്മാ – തേ നത്ഥീതി. അനാഗതാ ഉപ്പാദിനോ ധമ്മാ – തേ അത്ഥീതി? ആമന്താ. അനാഗതാ അനുപ്പാദിനോ ധമ്മാ – തേ അത്ഥീതി? ന ഹേവം വത്തബ്ബേ…പേ… അനാഗതാ അനുപ്പാദിനോ ധമ്മാ – തേ നത്ഥീതി? ആമന്താ. അനാഗതാ ഉപ്പാദിനോ ധമ്മാ – തേ നത്ഥീതി? ന ഹേവം വത്തബ്ബേ…പേ….

അനാഗതാ ഉപ്പാദിനോ ധമ്മാ – തേ അത്ഥീതി? ആമന്താ. നനു അനാഗതാ ഉപ്പാദിനോ ധമ്മാ അജാതാതി? ആമന്താ. ഹഞ്ചി അനാഗതാ ഉപ്പാദിനോ ധമ്മാ അജാതാ, നോ ച വത രേ വത്തബ്ബേ – ‘‘അനാഗതാ ഉപ്പാദിനോ ധമ്മാ – തേ അത്ഥീ’’തി.

അനാഗതാ ഉപ്പാദിനോ ധമ്മാ അജാതാ – തേ അത്ഥീതി? ആമന്താ. അനാഗതാ അനുപ്പാദിനോ ധമ്മാ അജാതാ – തേ അത്ഥീതി? ന ഹേവം വത്തബ്ബേ…പേ… അനാഗതാ അനുപ്പാദിനോ ധമ്മാ അജാതാ – തേ നത്ഥീതി? ആമന്താ. അനാഗതാ ഉപ്പാദിനോ ധമ്മാ അജാതാ – തേ നത്ഥീതി? ന ഹേവം വത്തബ്ബേ…പേ….

ന വത്തബ്ബം – ‘‘അനാഗതാ ഉപ്പാദിനോ ധമ്മാ – തേ അത്ഥീ’’തി? ആമന്താ. നനു അനാഗതാ ഉപ്പാദിനോ ധമ്മാ ഉപ്പജ്ജിസ്സന്തീതി? ആമന്താ. ഹഞ്ചി അനാഗതാ ഉപ്പാദിനോ ധമ്മാ ഉപ്പജ്ജിസ്സന്തി, തേന വത രേ വത്തബ്ബേ – ‘‘അനാഗതാ ഉപ്പാദിനോ ധമ്മാ – തേ അത്ഥീ’’തി.

അനാഗതാ ഉപ്പാദിനോ ധമ്മാ ഉപ്പജ്ജിസ്സന്തീതി കത്വാ തേ അത്ഥീതി? ആമന്താ. ഉപ്പജ്ജിസ്സന്തീതി കത്വാ പച്ചുപ്പന്നാതി? ന ഹേവം വത്തബ്ബേ…പേ… ഉപ്പജ്ജിസ്സന്തീതി കത്വാ പച്ചുപ്പന്നാതി? ആമന്താ. പച്ചുപ്പന്നാ ധമ്മാ നിരുജ്ഝിസ്സന്തീതി കത്വാ തേ നത്ഥീതി? ന ഹേവം വത്തബ്ബേ…പേ….

ഏകച്ചം അത്ഥീതികഥാ നിട്ഠിതാ.