൪. ജഹതികഥാ

൧. നസുത്താഹരണകഥാ

൨൭൯. ജഹതി പുഥുജ്ജനോ കാമരാഗബ്യാപാദന്തി? ആമന്താ. അച്ചന്തം ജഹതി, അനവസേസം ജഹതി, അപ്പടിസന്ധിയം ജഹതി, സമൂലം ജഹതി, സതണ്ഹം ജഹതി, സാനുസയം ജഹതി, അരിയേന ഞാണേന ജഹതി, അരിയേന മഗ്ഗേന ജഹതി, അകുപ്പം പടിവിജ്ഝന്തോ ജഹതി, അനാഗാമിഫലം സച്ഛികരോന്തോ ജഹതീതി? ന ഹേവം വത്തബ്ബേ…പേ….

വിക്ഖമ്ഭേതി പുഥുജ്ജനോ കാമരാഗബ്യാപാദന്തി? ആമന്താ. അച്ചന്തം വിക്ഖമ്ഭേതി, അനവസേസം വിക്ഖമ്ഭേതി, അപ്പടിസന്ധിയം വിക്ഖമ്ഭേതി, സമൂലം വിക്ഖമ്ഭേതി, സതണ്ഹം വിക്ഖമ്ഭേതി, സാനുസയം വിക്ഖമ്ഭേതി, അരിയേന ഞാണേന വിക്ഖമ്ഭേതി, അരിയേന മഗ്ഗേന വിക്ഖമ്ഭേതി, അകുപ്പം പടിവിജ്ഝന്തോ വിക്ഖമ്ഭേതി, അനാഗാമിഫലം സച്ഛികരോന്തോ വിക്ഖമ്ഭേതീതി? ന ഹേവം വത്തബ്ബേ…പേ….

ജഹതി അനാഗാമിഫലസച്ഛികിരിയായ പടിപന്നോ പുഗ്ഗലോ കാമരാഗബ്യാപാദം, സോ ച അച്ചന്തം ജഹതി, അനവസേസം ജഹതി…പേ… അനാഗാമിഫലം സച്ഛികരോന്തോ ജഹതീതി? ആമന്താ. ജഹതി പുഥുജ്ജനോ കാമരാഗബ്യാപാദം, സോ ച അച്ചന്തം ജഹതി, അനവസേസം ജഹതി…പേ… അനാഗാമിഫലം സച്ഛികരോന്തോ ജഹതീതി? ന ഹേവം വത്തബ്ബേ…പേ….

വിക്ഖമ്ഭേതി അനാഗാമിഫലസച്ഛികിരിയായ പടിപന്നോ പുഗ്ഗലോ കാമരാഗബ്യാപാദം, സോ ച അച്ചന്തം വിക്ഖമ്ഭേതി, അനവസേസം വിക്ഖമ്ഭേതി…പേ… അനാഗാമിഫലം സച്ഛികരോന്തോ വിക്ഖമ്ഭേതീതി? ആമന്താ. വിക്ഖമ്ഭേതി പുഥുജ്ജനോ കാമരാഗബ്യാപാദം, സോ ച അച്ചന്തം വിക്ഖമ്ഭേതി, അനവസേസം വിക്ഖമ്ഭേതി …പേ… അനാഗാമിഫലം സച്ഛികരോന്തോ വിക്ഖമ്ഭേതീതി? ന ഹേവം വത്തബ്ബേ…പേ….

ജഹതി പുഥുജ്ജനോ കാമരാഗബ്യാപാദം, സോ ച ന അച്ചന്തം ജഹതി, ന അനവസേസം ജഹതി…പേ… ന അനാഗാമിഫലം സച്ഛികരോന്തോ ജഹതീതി? ആമന്താ. ജഹതി അനാഗാമിഫലസച്ഛികിരിയായ പടിപന്നോ പുഗ്ഗലോ കാമരാഗബ്യാപാദം, സോ ച ന അച്ചന്തം ജഹതി…പേ… ന അനാഗാമിഫലം സച്ഛികരോന്തോ ജഹതീതി? ന ഹേവം വത്തബ്ബേ…പേ….

വിക്ഖമ്ഭേതി പുഥുജ്ജനോ കാമരാഗബ്യാപാദം, സോ ച ന അച്ചന്തം വിക്ഖമ്ഭേതി, ന അനവസേസം വിക്ഖമ്ഭേതി…പേ… ന അനാഗാമിഫലം സച്ഛികരോന്തോ വിക്ഖമ്ഭേതീതി? ആമന്താ. വിക്ഖമ്ഭേതി അനാഗാമിഫലസച്ഛികിരിയായ പടിപന്നോ പുഗ്ഗലോ കാമരാഗബ്യാപാദം, സോ ച ന അച്ചന്തം വിക്ഖമ്ഭേതി, ന അനവസേസം വിക്ഖമ്ഭേതി…പേ… ന അനാഗാമിഫലം സച്ഛികരോന്തോ വിക്ഖമ്ഭേതീതി? ന ഹേവം വത്തബ്ബേ…പേ….

ജഹതി പുഥുജ്ജനോ കാമരാഗബ്യാപാദന്തി? ആമന്താ. കതമേന മഗ്ഗേനാതി? രൂപാവചരേന മഗ്ഗേനാതി. രൂപാവചരോ മഗ്ഗോ നിയ്യാനികോ ഖയഗാമീ ബോധഗാമീ അപചയഗാമീ അനാസവോ അസംയോജനിയോ അഗന്ഥനിയോ അനോഘനിയോ അയോഗനിയോ അനീവരണിയോ അപരാമട്ഠോ അനുപാദാനിയോ അസംകിലേസിയോതി? ന ഹേവം വത്തബ്ബേ. നനു രൂപാവചരോ മഗ്ഗോ അനിയ്യാനികോ ന ഖയഗാമീ ന ബോധഗാമീ ന അപചയഗാമീ സാസവോ സംയോജനിയോ…പേ… സംകിലേസിയോതി? ആമന്താ. ഹഞ്ചി രൂപാവചരോ മഗ്ഗോ അനിയ്യാനികോ ന ഖയഗാമീ…പേ… സംകിലേസിയോ, നോ ച വത രേ വത്തബ്ബേ – ‘‘ജഹതി പുഥുജ്ജനോ രൂപാവചരേന മഗ്ഗേന കാമരാഗബ്യാപാദ’’ന്തി.

ജഹതി അനാഗാമിഫലസച്ഛികിരിയായ പടിപന്നോ പുഗ്ഗലോ അനാഗാമിമഗ്ഗേന കാമരാഗബ്യാപാദം, സോ ച മഗ്ഗോ നിയ്യാനികോ ഖയഗാമീ ബോധഗാമീ അപചയഗാമീ അനാസവോ…പേ… അസംകിലേസിയോതി? ആമന്താ. ജഹതി പുഥുജ്ജനോ രൂപാവചരേന മഗ്ഗേന കാമരാഗബ്യാപാദം, സോ ച മഗ്ഗോ നിയ്യാനികോ ഖയഗാമീ ബോധഗാമീ അപചയഗാമീ അനാസവോ…പേ… അസംകിലേസിയോതി? ന ഹേവം വത്തബ്ബേ…പേ….

ജഹതി പുഥുജ്ജനോ രൂപാവചരേന മഗ്ഗേന കാമരാഗബ്യാപാദം, സോ ച മഗ്ഗോ അനിയ്യാനികോ ന ഖയഗാമീ ന ബോധഗാമീ ന അപചയഗാമീ സാസവോ…പേ… സംകിലേസിയോതി? ആമന്താ. ജഹതി അനാഗാമിഫലസച്ഛികിരിയായ പടിപന്നോ പുഗ്ഗലോ അനാഗാമിമഗ്ഗേന കാമരാഗബ്യാപാദം, സോ ച മഗ്ഗോ അനിയ്യാനികോ ന ഖയഗാമീ ന ബോധഗാമീ ന അപചയഗാമീ സാസവോ…പേ… സംകിലേസിയോതി? ന ഹേവം വത്തബ്ബേ…പേ….

൨൮൦. പുഥുജ്ജനോ കാമേസു വീതരാഗോ സഹ ധമ്മാഭിസമയാ അനാഗാമിഫലേ സണ്ഠാതീതി? ആമന്താ. അരഹത്തേ സണ്ഠാതീതി? ന ഹേവം വത്തബ്ബേ…പേ….

പുഥുജ്ജനോ കാമേസു വീതരാഗോ സഹ ധമ്മാഭിസമയാ അനാഗാമിഫലേ സണ്ഠാതീതി? ആമന്താ. അപുബ്ബം അചരിമം തയോ മഗ്ഗേ ഭാവേതീതി? ന ഹേവം വത്തബ്ബേ…പേ….

അപുബ്ബം അചരിമം തയോ മഗ്ഗേ ഭാവേതീതി? ആമന്താ. അപുബ്ബം അചരിമം തീണി സാമഞ്ഞഫലാനി സച്ഛികരോതീതി? ന ഹേവം വത്തബ്ബേ…പേ….

അപുബ്ബം അചരിമം തീണി സാമഞ്ഞഫലാനി സച്ഛികരോതീതി? ആമന്താ. തിണ്ണം ഫസ്സാനം തിസ്സന്നം വേദനാനം തിസ്സന്നം സഞ്ഞാനം തിസ്സന്നം ചേതനാനം തിണ്ണം ചിത്താനം തിസ്സന്നം സദ്ധാനം തിണ്ണം വീരിയാനം തിസ്സന്നം സതീനം തിണ്ണം സമാധീനം തിസ്സന്നം പഞ്ഞാനം സമോധാനം ഹോതീതി? ന ഹേവം വത്തബ്ബേ…പേ….

പുഥുജ്ജനോ കാമേസു വീതരാഗോ സഹ ധമ്മാഭിസമയാ അനാഗാമിഫലേ സണ്ഠാതീതി? ആമന്താ. സോതാപത്തിമഗ്ഗേനാതി? ന ഹേവം വത്തബ്ബേ…പേ….

സകദാഗാമിമഗ്ഗേനാതി? ന ഹേവം വത്തബ്ബേ. കതമേന മഗ്ഗേനാതി? അനാഗാമിമഗ്ഗേനാതി. അനാഗാമിമഗ്ഗേന സക്കായദിട്ഠിം വിചികിച്ഛം സീലബ്ബതപരാമാസം ജഹതീതി? ന ഹേവം വത്തബ്ബേ…പേ….

൨. സുത്താഹരണകഥാ

൨൮൧. അനാഗാമിമഗ്ഗേന സക്കായദിട്ഠിം വിചികിച്ഛം സീലബ്ബതപരാമാസം ജഹതീതി? ആമന്താ. നനു തിണ്ണം സംയോജനാനം പഹാനാ സോതാപത്തിഫലം വുത്തം ഭഗവതാതി? ആമന്താ. ഹഞ്ചി തിണ്ണം സംയോജനാനം പഹാനാ സോതാപത്തിഫലം വുത്തം ഭഗവതാ, നോ ച വത രേ വത്തബ്ബേ – ‘‘അനാഗാമിമഗ്ഗേന സക്കായദിട്ഠിം വിചികിച്ഛം സീലബ്ബതപരാമാസം ജഹതീ’’തി. അനാഗാമിമഗ്ഗേന ഓളാരികം കാമരാഗം ഓളാരികം ബ്യാപാദം ജഹതീതി? ന ഹേവം വത്തബ്ബേ…പേ….

അനാഗാമിമഗ്ഗേന ഓളാരികം കാമരാഗം ഓളാരികം ബ്യാപാദം ജഹതീതി? ആമന്താ. നനു കാമരാഗബ്യാപാദാനം തനുഭാവാ സകദാഗാമിഫലം വുത്തം ഭഗവതാതി? ആമന്താ. ഹഞ്ചി കാമരാഗബ്യാപാദാനം തനുഭാവാ സകദാഗാമിഫലം വുത്തം ഭഗവതാ, നോ ച വത രേ വത്തബ്ബേ – ‘‘അനാഗാമിമഗ്ഗേന ഓളാരികം കാമരാഗം ഓളാരികം ബ്യാപാദം ജഹതീ’’തി.

പുഥുജ്ജനോ കാമേസു വീതരാഗോ സഹ ധമ്മാഭിസമയാ അനാഗാമിഫലേ സണ്ഠാതീതി? ആമന്താ. യേ കേചി ധമ്മം അഭിസമേന്തി, സബ്ബേ തേ സഹ ധമ്മാഭിസമയാ അനാഗാമിഫലേ സണ്ഠഹന്തീതി? ന ഹേവം വത്തബ്ബേ…പേ….

ന വത്തബ്ബം – ‘‘ജഹതി പുഥുജ്ജനോ കാമരാഗബ്യാപാദ’’ന്തി? ആമന്താ. നനു വുത്തം ഭഗവതാ –

‘‘അഹേസും തേ [അഹിംസകാ (അ. നി. ൬.൫൪)] അതീതംസേ, ഛ സത്ഥാരോ യസസ്സിനോ;

നിരാമഗന്ധാ കരുണേധിമുത്താ [കരുണാധിമുത്താ (സീ. ക.)], കാമസംയോജനാതിഗാ.

‘‘കാമരാഗം വിരാജേത്വാ, ബ്രഹ്മലോകൂപഗാ അഹു;

അഹേസും സാവകാ തേസം, അനേകാനി സതാനിപി.

‘‘നിരാമഗന്ധാ കരുണേധിമുത്താ, കാമസംയോജനാതിഗാ;

കാമരാഗം വിരാജേത്വാ, ബ്രഹ്മലോകൂപഗാ അഹൂ’’തി [അ. നി. ൬.൫൪].

അത്ഥേവ സുത്തന്തോതി? ആമന്താ. തേന ഹി ജഹതി പുഥുജ്ജനോ കാമരാഗബ്യാപാദന്തി.

ജഹതി പുഥുജ്ജനോ കാമരാഗബ്യാപാദന്തി? ആമന്താ. നനു വുത്തം ഭഗവതാ – ‘‘സോ ഹി നാമ, ഭിക്ഖവേ, സുനേത്തോ സത്ഥാ ഏവം ദീഘായുകോ സമാനോ ഏവം ചിരട്ഠിതികോ അപരിമുത്തോ അഹോസി ജാതിയാ ജരായ മരണേന സോകേഹി പരിദേവേഹി ദുക്ഖേഹി ദോമനസ്സേഹി ഉപായാസേഹി അപരിമുത്തോ ദുക്ഖസ്മാതി വദാമി. തം കിസ്സ ഹേതു? ചതുന്നം ധമ്മാനം അനനുബോധാ അപ്പടിവേധാ. കതമേസം ചതുന്നം? അരിയസ്സ സീലസ്സ അനനുബോധാ അപ്പടിവേധാ, അരിയസ്സ സമാധിസ്സ, അരിയായ പഞ്ഞായ, അരിയായ വിമുത്തിയാ അനനുബോധാ അപ്പടിവേധാ. തയിദം, ഭിക്ഖവേ, അരിയം സീലം അനുബുദ്ധം പടിവിദ്ധം, അരിയോ സമാധി അനുബുദ്ധോ പടിവിദ്ധോ, അരിയാ പഞ്ഞാ അനുബുദ്ധാ പടിവിദ്ധാ, അരിയാ വിമുത്തി അനുബുദ്ധാ പടിവിദ്ധാ, ഉച്ഛിന്നാ ഭവതണ്ഹാ, ഖീണാ ഭവനേത്തി, നത്ഥി ദാനി പുനബ്ഭവോതി.

‘‘സീലം സമാധി പഞ്ഞാ ച, വിമുത്തി ച അനുത്തരാ;

അനുബുദ്ധാ ഇമേ ധമ്മാ, ഗോതമേന യസസ്സിനാ.

‘‘ഇതി ബുദ്ധോ അഭിഞ്ഞായ, ധമ്മമക്ഖാസി ഭിക്ഖുനം;

ദുക്ഖസ്സന്തകരോ സത്ഥാ, ചക്ഖുമാ പരിനിബ്ബുതോ’’തി [അ. നി. ൭.൬൬].

അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘ജഹതി പുഥുജ്ജനോ കാമരാഗബ്യാപാദ’’ന്തി.

ജഹതികഥാ നിട്ഠിതാ.