(൧൮൬) ൧. കിലേസജഹനകഥാ

൮൨൮. അതീതേ കിലേസേ ജഹതീതി? ആമന്താ. നിരുദ്ധം നിരോധേതി, വിഗതം വിഗമേതി, ഖീണം ഖേപേതി, അത്ഥങ്ഗതം അത്ഥങ്ഗമേതി, അബ്ഭത്ഥങ്ഗതം അബ്ഭത്ഥങ്ഗമേതീതി? ന ഹേവം വത്തബ്ബേ…പേ… അതീതേ കിലേസേ ജഹതീതി? ആമന്താ. നനു അതീതം നിരുദ്ധന്തി? ആമന്താ. ഹഞ്ചി അതീതം നിരുദ്ധം, നോ ച വത രേ വത്തബ്ബേ – ‘‘അതീതേ കിലേസേ ജഹതീ’’തി. അതീതേ കിലേസേ ജഹതീതി? ആമന്താ. നനു അതീതം നത്ഥീതി? ആമന്താ. ഹഞ്ചി അതീതം നത്ഥി, നോ ച വത രേ വത്തബ്ബേ – ‘‘അതീതേ കിലേസേ ജഹതീ’’തി.

൮൨൯. അനാഗതേ കിലേസേ ജഹതീതി? ആമന്താ. അജാതം അജനേതി, അസഞ്ജാതം അസഞ്ജനേതി, അനിബ്ബത്തം അനിബ്ബത്തേതി, അപാതുഭൂതം അപാതുഭാവേതീതി? ന ഹേവം വത്തബ്ബേ…പേ… അനാഗതേ കിലേസേ ജഹതീതി? ആമന്താ. നനു അനാഗതം അജാതന്തി? ആമന്താ. ഹഞ്ചി അനാഗതം അജാതം, നോ ച വത രേ വത്തബ്ബേ – ‘‘അനാഗതേ കിലേസേ ജഹതീ’’തി. അനാഗതേ കിലേസേ ജഹതീതി? ആമന്താ. നനു അനാഗതം നത്ഥീതി? ആമന്താ. ഹഞ്ചി അനാഗതം നത്ഥി, നോ ച വത രേ വത്തബ്ബേ – ‘‘അനാഗതേ കിലേസേ ജഹതീ’’തി.

൮൩൦. പച്ചുപ്പന്നേ കിലേസേ ജഹതീതി? ആമന്താ. രത്തോ രാഗം ജഹതി, ദുട്ഠോ ദോസം ജഹതി, മൂള്ഹോ മോഹം ജഹതി, കിലിട്ഠോ കിലേസേ ജഹതീതി? ന ഹേവം വത്തബ്ബേ…പേ… രാഗേന രാഗം ജഹതി, ദോസേന ദോസം ജഹതി, മോഹേന മോഹം ജഹതി, കിലേസേഹി കിലേസേ ജഹതീതി? ന ഹേവം വത്തബ്ബേ…പേ….

രാഗോ ചിത്തസമ്പയുത്തോ, മഗ്ഗോ ചിത്തസമ്പയുത്തോതി? ആമന്താ. ദ്വിന്നം ചിത്താനം സമോധാനം ഹോതീതി? ന ഹേവം വത്തബ്ബേ…പേ….

രാഗോ അകുസലോ, മഗ്ഗോ കുസലോതി? ആമന്താ. കുസലാകുസലാ സാവജ്ജാനവജ്ജാ ഹീനപണീതാ കണ്ഹസുക്കസപ്പടിഭാഗാ ധമ്മാ സമ്മുഖീഭാവം ആഗച്ഛന്തീതി? ന ഹേവം വത്തബ്ബേ…പേ….

കുസലാകുസലാ സാവജ്ജാനവജ്ജാ ഹീനപണീതാ കണ്ഹസുക്കസപ്പടിഭാഗാ ധമ്മാ സമ്മുഖീഭാവം ആഗച്ഛന്തീതി? ആമന്താ. നനു വുത്തം ഭഗവതാ – ‘‘ചത്താരിമാനി, ഭിക്ഖവേ, സുവിദൂരവിദൂരാനി! കതമാനി ചത്താരി? നഭഞ്ച, ഭിക്ഖവേ, പഥവീ ച – ഇദം പഠമം സുവിദൂരവിദൂരം…പേ… തസ്മാ സതം ധമ്മോ അസബ്ഭി ആരകാ’’തി. അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘കുസലാകുസലാ…പേ… സമ്മുഖീഭാവം ആഗച്ഛന്തീ’’തി.

൮൩൧. ന വത്തബ്ബം – ‘‘അതീതേ കിലേസേ ജഹതി, അനാഗതേ കിലേസേ ജഹതി, പച്ചുപ്പന്നേ കിലേസേ ജഹതീ’’തി? ആമന്താ. നത്ഥി കിലേസേ ജഹതീതി? ന ഹേവം വത്തബ്ബേ…പേ… തേന ഹി അതീതേ കിലേസേ ജഹതി, അനാഗതേ കിലേസേ ജഹതി, പച്ചുപ്പന്നേ കിലേസേ ജഹതീതി.

കിലേസജഹനകഥാ നിട്ഠിതാ.