(൧൮൦) ൪. ഗന്ധജാതികഥാ

൮൦൯. ബുദ്ധസ്സ ഭഗവതോ ഉച്ചാരപസ്സാവോ അതിവിയ അഞ്ഞേ ഗന്ധജാതേ അധിഗ്ഗണ്ഹാതീതി? ആമന്താ. ഭഗവാ ഗന്ധഭോജീതി? ന ഹേവം വത്തബ്ബേ…പേ… നനു ഭഗവാ ഓദനകുമ്മാസം ഭുഞ്ജതീതി? ആമന്താ. ഹഞ്ചി ഭഗവാ ഓദനകുമ്മാസം ഭുഞ്ജതി, നോ ച വത രേ വത്തബ്ബേ – ‘‘ബുദ്ധസ്സ ഭഗവതോ ഉച്ചാരപസ്സാവോ അതിവിയ അഞ്ഞേ ഗന്ധജാതേ അധിഗ്ഗണ്ഹാതീ’’തി.

ബുദ്ധസ്സ ഭഗവതോ ഉച്ചാരപസ്സാവോ അതിവിയ അഞ്ഞേ ഗന്ധജാതേ അധിഗ്ഗണ്ഹാതീതി? ആമന്താ. അത്ഥി കേചി ബുദ്ധസ്സ ഭഗവതോ ഉച്ചാരപസ്സാവം ന്ഹായന്തി വിലിമ്പന്തി ഉച്ഛാദേന്തി [ഉച്ചാരേന്തി (സീ. പീ. ക.)] പേളായ പടിസാമേന്തി കരണ്ഡായ നിക്ഖിപന്തി ആപണേ പസാരേന്തി, തേന ച ഗന്ധേന ഗന്ധകരണീയം കരോന്തീതി? ന ഹേവം വത്തബ്ബേ…പേ….

ഗന്ധജാതികഥാ നിട്ഠിതാ.