൧൮. അട്ഠാരസമവഗ്ഗോ

(൧൭൯) ൩. കരുണാകഥാ

൮൦൭. നത്ഥി ബുദ്ധസ്സ ഭഗവതോ കരുണാതി? ആമന്താ. നത്ഥി ബുദ്ധസ്സ ഭഗവതോ മേത്താതി? ന ഹേവം വത്തബ്ബേ…പേ… നത്ഥി ബുദ്ധസ്സ ഭഗവതോ കരുണാതി? ആമന്താ. നത്ഥി ബുദ്ധസ്സ ഭഗവതോ മുദിതാ…പേ… ഉപേക്ഖാതി? ന ഹേവം വത്തബ്ബേ…പേ….

അത്ഥി ബുദ്ധസ്സ ഭഗവതോ മേത്താതി? ആമന്താ. അത്ഥി ബുദ്ധസ്സ ഭഗവതോ കരുണാതി? ന ഹേവം വത്തബ്ബേ…പേ… അത്ഥി ബുദ്ധസ്സ ഭഗവതോ മുദിതാ…പേ… ഉപേക്ഖാതി? ആമന്താ. അത്ഥി ബുദ്ധസ്സ ഭഗവതോ കരുണാതി? ന ഹേവം വത്തബ്ബേ…പേ….

നത്ഥി ബുദ്ധസ്സ ഭഗവതോ കരുണാതി? ആമന്താ. ഭഗവാ അകാരുണികോതി? ന ഹേവം വത്തബ്ബേ…പേ… നനു ഭഗവാ കാരുണികോ ലോകഹിതോ ലോകാനുകമ്പകോ ലോകത്ഥചരോതി? ആമന്താ. ഹഞ്ചി ഭഗവാ കാരുണികോ ലോകഹിതോ ലോകാനുകമ്പകോ ലോകത്ഥചരോ, നോ ച വത രേ വത്തബ്ബേ – ‘‘നത്ഥി ബുദ്ധസ്സ ഭഗവതോ കരുണാ’’തി…പേ….

നത്ഥി ബുദ്ധസ്സ ഭഗവതോ കരുണാതി? ആമന്താ. നനു ഭഗവാ മഹാകരുണാസമാപത്തിം സമാപജ്ജീതി? ആമന്താ. ഹഞ്ചി ഭഗവാ മഹാകരുണാസമാപത്തിം സമാപജ്ജി, നോ ച വത രേ വത്തബ്ബേ – ‘‘നത്ഥി ബുദ്ധസ്സ ഭഗവതോ കരുണാ’’തി.

൮൦൮. അത്ഥി ബുദ്ധസ്സ ഭഗവതോ കരുണാതി? ആമന്താ. ഭഗവാ സരാഗോതി? ന ഹേവം വത്തബ്ബേ. തേന ഹി നത്ഥി ബുദ്ധസ്സ ഭഗവതോ കരുണാതി.

കരുണാകഥാ നിട്ഠിതാ.