(൧൬൪) ൯. രൂപം രൂപാവചരാരൂപാവചരന്തികഥാ

൭൬൮. അത്ഥി രൂപം രൂപാവചരന്തി? ആമന്താ. സമാപത്തേസിയം ഉപപത്തേസിയം ദിട്ഠധമ്മസുഖവിഹാരം, സമാപത്തേസിയേന ചിത്തേന ഉപപത്തേസിയേന ചിത്തേന ദിട്ഠധമ്മസുഖവിഹാരേന ചിത്തേന സഹഗതം സഹജാതം സംസട്ഠം സമ്പയുത്തം ഏകുപ്പാദം ഏകനിരോധം ഏകവത്ഥുകം ഏകാരമ്മണന്തി? ന ഹേവം വത്തബ്ബേ…പേ… നനു ന സമാപത്തേസിയം ന ഉപപത്തേസിയം ന ദിട്ഠധമ്മസുഖവിഹാരം, ന സമാപത്തേസിയേന ചിത്തേന ന ഉപപത്തേസിയേന ചിത്തേന ന ദിട്ഠധമ്മസുഖവിഹാരേന ചിത്തേന സഹഗതം സഹജാതം സംസട്ഠം സമ്പയുത്തം ഏകുപ്പാദം ഏകനിരോധം ഏകവത്ഥുകം ഏകാരമ്മണന്തി? ആമന്താ. ഹഞ്ചി ന സമാപത്തേസിയം ന ഉപപത്തേസിയം ന ദിട്ഠധമ്മസുഖവിഹാരം, ന സമാപത്തേസിയേന ചിത്തേന…പേ… ഏകാരമ്മണം, നോ ച വത രേ വത്തബ്ബേ – ‘‘അത്ഥി രൂപം രൂപാവചര’’ന്തി.

൭൬൯. അത്ഥി രൂപം അരൂപാവചരന്തി? ആമന്താ. സമാപത്തേസിയം ഉപപത്തേസിയം ദിട്ഠധമ്മസുഖവിഹാരം, സമാപത്തേസിയേന ചിത്തേന ഉപപത്തേസിയേന ചിത്തേന ദിട്ഠധമ്മസുഖവിഹാരേന ചിത്തേന സഹഗതം സഹജാതം സംസട്ഠം സമ്പയുത്തം ഏകുപ്പാദം ഏകനിരോധം ഏകവത്ഥുകം ഏകാരമ്മണന്തി? ന ഹേവം വത്തബ്ബേ…പേ… നനു ന സമാപത്തേസിയം ന ഉപപത്തേസിയം ന ദിട്ഠധമ്മസുഖവിഹാരം, ന സമാപത്തേസിയേന ചിത്തേന …പേ… ഏകാരമ്മണന്തി? ആമന്താ. ഹഞ്ചി ന സമാപത്തേസിയം ന ഉപപത്തേസിയം…പേ… ഏകവത്ഥുകം ഏകാരമ്മണം, നോ ച വത രേ വത്തബ്ബേ – ‘‘അത്ഥി രൂപം അരൂപാവചര’’ന്തി.

൭൭൦. ന വത്തബ്ബം – ‘‘അത്ഥി രൂപം രൂപാവചരം, അത്ഥി രൂപം അരൂപാവചര’’ന്തി? ആമന്താ. നനു കാമാവചരകമ്മസ്സ കതത്താ രൂപം കാമാവചരന്തി? ആമന്താ. ഹഞ്ചി കാമാവചരകമ്മസ്സ കതത്താ രൂപം കാമാവചരം, തേന വത രേ വത്തബ്ബേ – ‘‘രൂപാവചരകമ്മസ്സ കതത്താ രൂപം രൂപാവചരം, അരൂപാവചരകമ്മസ്സ കതത്താ രൂപം അരൂപാവചര’’ന്തി.

രൂപം രൂപാവചരാരൂപാവചരന്തികഥാ നിട്ഠിതാ.