(൧൩൬) ൧. കുസലാകുസലപടിസന്ദഹനകഥാ

൬൮൬. അകുസലമൂലം പടിസന്ദഹതി കുസലമൂലന്തി? ആമന്താ. യാ അകുസലസ്സ ഉപ്പാദായ ആവട്ടനാ…പേ… പണിധി, സാവ കുസലസ്സ ഉപ്പാദായ ആവട്ടനാ…പേ… പണിധീതി? ന ഹേവം വത്തബ്ബേ…പേ….

അകുസലമൂലം പടിസന്ദഹതി കുസലമൂലം, ന വത്തബ്ബം – ‘‘യാ അകുസലസ്സ ഉപ്പാദായ ആവട്ടനാ…പേ… പണിധി, സാവ കുസലസ്സ ഉപ്പാദായ ആവട്ടനാ…പേ… പണിധീ’’തി? ആമന്താ. കുസലം അനാവട്ടേന്തസ്സ [അനാവട്ടന്തസ്സ (സീ. പീ. ക.), അനാവജ്ജന്തസ്സ (സ്യാ. കം.)] ഉപ്പജ്ജതി …പേ… അപ്പണിദഹന്തസ്സ ഉപ്പജ്ജതീതി? ന ഹേവം വത്തബ്ബേ…പേ… നനു കുസലം ആവട്ടേന്തസ്സ ഉപ്പജ്ജതി…പേ… പണിദഹന്തസ്സ ഉപ്പജ്ജതീതി? ആമന്താ. ഹഞ്ചി കുസലം ആവട്ടേന്തസ്സ ഉപ്പജ്ജതി…പേ… പണിദഹന്തസ്സ ഉപ്പജ്ജതി, നോ ച വത രേ വത്തബ്ബേ – ‘‘അകുസലമൂലം പടിസന്ദഹതി കുസലമൂല’’ന്തി.

൬൮൭. അകുസലമൂലം പടിസന്ദഹതി കുസലമൂലന്തി? ആമന്താ. അകുസലമൂലം അയോനിസോ മനസികരോതോ ഉപ്പജ്ജതീതി? ആമന്താ. കുസലം അയോനിസോ മനസികരോതോ ഉപ്പജ്ജതീതി? ന ഹേവം വത്തബ്ബേ…പേ… നനു കുസലം യോനിസോ മനസികരോതോ ഉപ്പജ്ജതീതി? ആമന്താ. ഹഞ്ചി കുസലം യോനിസോ മനസികരോതോ ഉപ്പജ്ജതി, നോ ച വത രേ വത്തബ്ബേ – ‘‘അകുസലമൂലം പടിസന്ദഹതി കുസലമൂല’’ന്തി.

അകുസലമൂലം പടിസന്ദഹതി കുസലമൂലന്തി? ആമന്താ. കാമസഞ്ഞായ അനന്തരാ നേക്ഖമ്മസഞ്ഞാ ഉപ്പജ്ജതി, ബ്യാപാദസഞ്ഞായ അനന്തരാ അബ്യാപാദസഞ്ഞാ ഉപ്പജ്ജതി, വിഹിംസാസഞ്ഞായ അനന്തരാ അവിഹിംസാസഞ്ഞാ ഉപ്പജ്ജതി, ബ്യാപാദസ്സ അനന്തരാ മേത്താ ഉപ്പജ്ജതി, വിഹിംസായ അനന്തരാ കരുണാ ഉപ്പജ്ജതി, അരതിയാ അനന്തരാ മുദിതാ ഉപ്പജ്ജതി, പടിഘസ്സ അനന്തരാ ഉപേക്ഖാ ഉപ്പജ്ജതീതി? ന ഹേവം വത്തബ്ബേ…പേ….

൬൮൮. കുസലമൂലം പടിസന്ദഹതി അകുസലമൂലന്തി? ആമന്താ. യാ കുസലസ്സ ഉപ്പാദായ ആവട്ടനാ…പേ… പണിധി, സാവ അകുസലസ്സ ഉപ്പാദായ ആവട്ടനാ…പേ… പണിധീതി? ന ഹേവം വത്തബ്ബേ…പേ….

കുസലമൂലം പടിസന്ദഹതി അകുസലമൂലം, ന വത്തബ്ബം – ‘‘യാ കുസലസ്സ ഉപ്പാദായ ആവട്ടനാ…പേ… പണിധി, സാവ അകുസലസ്സ ഉപ്പാദായ ആവട്ടനാ…പേ… പണിധീ’’തി? ആമന്താ. അകുസലം അനാവട്ടേന്തസ്സ ഉപ്പജ്ജതി…പേ… അപ്പണിദഹന്തസ്സ ഉപ്പജ്ജതീതി? ന ഹേവം വത്തബ്ബേ…പേ… നനു അകുസലം ആവട്ടേന്തസ്സ ഉപ്പജ്ജതി…പേ… പണിദഹന്തസ്സ ഉപ്പജ്ജതീതി? ആമന്താ. ഹഞ്ചി അകുസലം ആവട്ടേന്തസ്സ ഉപ്പജ്ജതി…പേ… പണിദഹന്തസ്സ ഉപ്പജ്ജതി, നോ ച വത രേ വത്തബ്ബേ – ‘‘കുസലമൂലം പടിസന്ദഹതി അകുസലമൂല’’ന്തി.

൬൮൯. കുസലമൂലം പടിസന്ദഹതി അകുസലമൂലന്തി? ആമന്താ. കുസലം യോനിസോ മനസികരോതോ ഉപ്പജ്ജതീതി? ആമന്താ. അകുസലം യോനിസോ മനസികരോതോ ഉപ്പജ്ജതീതി? ന ഹേവം വത്തബ്ബേ…പേ… നനു അകുസലം അയോനിസോ മനസികരോതോ ഉപ്പജ്ജതീതി? ആമന്താ. ഹഞ്ചി അകുസലം അയോനിസോ മനസികരോതോ ഉപ്പജ്ജതി, നോ ച വത രേ വത്തബ്ബേ – ‘‘കുസലമൂലം പടിസന്ദഹതി അകുസലമൂല’’ന്തി.

കുസലമൂലം പടിസന്ദഹതി അകുസലമൂലന്തി? ആമന്താ. നേക്ഖമ്മസഞ്ഞായ അനന്തരാ കാമസഞ്ഞാ ഉപ്പജ്ജതി, അബ്യാപാദസഞ്ഞായ അനന്തരാ ബ്യാപാദസഞ്ഞാ ഉപ്പജ്ജതി, അവിഹിംസാസഞ്ഞായ അനന്തരാ വിഹിംസാസഞ്ഞാ ഉപ്പജ്ജതി, മേത്തായ അനന്തരാ ബ്യാപാദോ ഉപ്പജ്ജതി, കരുണായ അനന്തരാ വിഹിംസാ ഉപ്പജ്ജതി, മുദിതായ അനന്തരാ അരതി ഉപ്പജ്ജതി, ഉപേക്ഖായ അനന്തരാ പടിഘം ഉപ്പജ്ജതീതി? ന ഹേവം വത്തബ്ബേ…പേ….

൬൯൦. ന വത്തബ്ബം – ‘‘അകുസലമൂലം പടിസന്ദഹതി കുസലമൂലം, കുസലമൂലം പടിസന്ദഹതി അകുസലമൂല’’ന്തി? ആമന്താ. നനു യസ്മിംയേവ വത്ഥുസ്മിം രജ്ജതി തസ്മിഞ്ഞേവ വത്ഥുസ്മിം വിരജ്ജതി, യസ്മിംയേവ വത്ഥുസ്മിം വിരജ്ജതി തസ്മിഞ്ഞേവ വത്ഥുസ്മിം രജ്ജതീതി? ആമന്താ. ഹഞ്ചി യസ്മിഞ്ഞേവ വത്ഥുസ്മിം രജ്ജതി തസ്മിഞ്ഞേവ വത്ഥുസ്മിം വിരജ്ജതി, യസ്മിഞ്ഞേവ വത്ഥുസ്മിം വിരജ്ജതി തസ്മിഞ്ഞേവ വത്ഥുസ്മിം രജ്ജതി, തേന വത രേ വത്തബ്ബേ – ‘‘അകുസലമൂലം പടിസന്ദഹതി കുസലമൂലം, കുസലമൂലം പടിസന്ദഹതി അകുസലമൂല’’ന്തി.

കുസലാകുസലപടിസന്ദഹനകഥാ നിട്ഠിതാ.