(൧൨൩) ൮. ജീവിതാ വോരോപനകഥാ

൬൪൮. ദിട്ഠിസമ്പന്നോ പുഗ്ഗലോ സഞ്ചിച്ച പാണം ജീവിതാ വോരോപേയ്യാതി? ആമന്താ. ദിട്ഠിസമ്പന്നോ പുഗ്ഗലോ സഞ്ചിച്ച മാതരം ജീവിതാ വോരോപേയ്യ…പേ… പിതരം ജീവിതാ വോരോപേയ്യ …പേ… അരഹന്തം ജീവിതാ വോരോപേയ്യ…പേ… ദുട്ഠേന ചിത്തേന തഥാഗതസ്സ ലോഹിതം ഉപ്പാദേയ്യ…പേ… സങ്ഘം ഭിന്ദേയ്യാതി? ന ഹേവം വത്തബ്ബേ…പേ….

ദിട്ഠിസമ്പന്നോ പുഗ്ഗലോ സഞ്ചിച്ച പാണം ജീവിതാ വോരോപേയ്യാതി? ആമന്താ. ദിട്ഠിസമ്പന്നോ പുഗ്ഗലോ സത്ഥരി അഗാരവോതി? ന ഹേവം വത്തബ്ബേ…പേ… ധമ്മേ…പേ… സങ്ഘേ…പേ… സിക്ഖായ അഗാരവോതി? ന ഹേവം വത്തബ്ബേ…പേ….

നനു ദിട്ഠിസമ്പന്നോ പുഗ്ഗലോ സത്ഥരി സഗാരവോതി? ആമന്താ. ഹഞ്ചി ദിട്ഠിസമ്പന്നോ പുഗ്ഗലോ സത്ഥരി സഗാരവോ, നോ ച വത രേ വത്തബ്ബേ – ‘‘ദിട്ഠിസമ്പന്നോ പുഗ്ഗലോ സഞ്ചിച്ച പാണം ജീവിതാ വോരോപേയ്യാ’’തി. നനു ദിട്ഠിസമ്പന്നോ പുഗ്ഗലോ ധമ്മേ…പേ… സങ്ഘേ…പേ… സിക്ഖായ സഗാരവോതി? ആമന്താ. ഹഞ്ചി ദിട്ഠിസമ്പന്നോ പുഗ്ഗലോ സിക്ഖായ സഗാരവോ, നോ ച വത രേ വത്തബ്ബേ – ‘‘ദിട്ഠിസമ്പന്നോ പുഗ്ഗലോ സഞ്ചിച്ച പാണം ജീവിതാ വോരോപേയ്യാ’’തി.

൬൪൯. ദിട്ഠിസമ്പന്നോ പുഗ്ഗലോ സത്ഥരി അഗാരവോതി? ആമന്താ. ദിട്ഠിസമ്പന്നോ പുഗ്ഗലോ ബുദ്ധഥൂപേ ഓഹദേയ്യ ഓമുത്തേയ്യ നിട്ഠുഭേയ്യ ബുദ്ധഥൂപേ അപബ്യാമതോ [അസബ്യാകതോ (സീ. ക.)] കരേയ്യാതി? ന ഹേവം വത്തബ്ബേ…പേ….

ദിട്ഠിസമ്പന്നോ പുഗ്ഗലോ സഞ്ചിച്ച പാണം ജീവിതാ വോരോപേയ്യാതി? ആമന്താ. നനു വുത്തം ഭഗവതാ – ‘‘സേയ്യഥാപി, ഭിക്ഖവേ, മഹാസമുദ്ദോ ഠിതധമ്മോ വേലം നാതിവത്തതി; ഏവമേവ ഖോ, ഭിക്ഖവേ, യം മയാ സാവകാനം സിക്ഖാപദം പഞ്ഞത്തം തം മമ സാവകാ ജീവിതഹേതുപി നാതിക്കമന്തീ’’തി [ചൂളവ. ൩൮൫; അ. നി. ൮.൨൦; ഉദാ. ൪൫]! അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘ദിട്ഠിസമ്പന്നോ പുഗ്ഗലോ സഞ്ചിച്ച പാണം ജീവിതാ വോരോപേയ്യാ’’തി.

ജീവിതാ വോരോപനകഥാ നിട്ഠിതാ.