൧൧. ഏകാദസമവഗ്ഗോ

(൧൧൩) ൮. സമാധികഥാ

൬൨൫. ചിത്തസന്തതി സമാധീതി? ആമന്താ. അതീതാ ചിത്തസന്തതി സമാധീതി? ന ഹേവം വത്തബ്ബേ …പേ… ചിത്തസന്തതി സമാധീതി? ആമന്താ. അനാഗതാ ചിത്തസന്തതി സമാധീതി? ന ഹേവം വത്തബ്ബേ…പേ… ചിത്തസന്തതി സമാധീതി? ആമന്താ. നനു അതീതം നിരുദ്ധം അനാഗതം അജാതന്തി? ആമന്താ. ഹഞ്ചി അതീതം നിരുദ്ധം അനാഗതം അജാതം, നോ ച വത രേ വത്തബ്ബേ – ‘‘ചിത്തസന്തതി സമാധീ’’തി.

൬൨൬. ഏകചിത്തക്ഖണികോ സമാധീതി? ആമന്താ. ചക്ഖുവിഞ്ഞാണസമങ്ഗീ സമാപന്നോതി? ന ഹേവം വത്തബ്ബേ…പേ… സോതവിഞ്ഞാണസമങ്ഗീ…പേ… ഘാനവിഞ്ഞാണസമങ്ഗീ… ജിവ്ഹാവിഞ്ഞാണസമങ്ഗീ… കായവിഞ്ഞാണസമങ്ഗീ…പേ… അകുസലചിത്തസമങ്ഗീ …പേ… രാഗസഹഗതചിത്തസമങ്ഗീ…പേ… ദോസസഹഗതചിത്തസമങ്ഗീ…പേ… മോഹസഹഗതചിത്തസമങ്ഗീ…പേ… അനോത്തപ്പസഹഗതചിത്തസമങ്ഗീ സമാപന്നോതി? ന ഹേവം വത്തബ്ബേ…പേ….

ചിത്തസന്തതി സമാധീതി? ആമന്താ. അകുസലചിത്തസന്തതി സമാധീതി? ന ഹേവം വത്തബ്ബേ…പേ… രാഗസഹഗതാ…പേ… ദോസസഹഗതാ…പേ… മോഹസഹഗതാ…പേ… അനോത്തപ്പസഹഗതാ ചിത്തസന്തതി സമാധീതി? ന ഹേവം വത്തബ്ബേ…പേ….

ന വത്തബ്ബം – ‘‘ചിത്തസന്തതി സമാധീ’’തി? ആമന്താ. നനു വുത്തം ഭഗവതാ – ‘‘അഹം ഖോ, ആവുസോ നിഗണ്ഠാ, പഹോമി അനിഞ്ജമാനോ കായേന, അഭാസമാനോ വാചം, സത്ത രത്തിന്ദിവാനി [രത്തിദിവാനി (ക.)] ഏകന്തസുഖം പടിസംവേദീ വിഹരിതു’’ന്തി [മ. നി. ൧.൧൮൦]! അത്ഥേവ സുത്തന്തോതി? ആമന്താ. തേന ഹി ചിത്തസന്തതി സമാധീതി.

സമാധികഥാ നിട്ഠിതാ.