(൯൧) ൮. വിതക്കവിപ്ഫാരസദ്ദകഥാ

൫൬൩. സബ്ബസോ വിതക്കയതോ വിചാരയതോ വിതക്കവിപ്ഫാരോ സദ്ദോതി? ആമന്താ. സബ്ബസോ ഫുസയതോ ഫസ്സവിപ്ഫാരോ സദ്ദോ, സബ്ബസോ വേദയതോ വേദനാവിപ്ഫാരോ സദ്ദോ, സബ്ബസോ സഞ്ജാനതോ സഞ്ഞാവിപ്ഫാരോ സദ്ദോ, സബ്ബസോ ചേതയതോ ചേതനാവിപ്ഫാരോ സദ്ദോ, സബ്ബസോ ചിന്തയതോ ചിത്തവിപ്ഫാരോ സദ്ദോ, സബ്ബസോ സരതോ സതിവിപ്ഫാരോ സദ്ദോ, സബ്ബസോ പജാനതോ പഞ്ഞാവിപ്ഫാരോ സദ്ദോതി? ന ഹേവം വത്തബ്ബേ…പേ….

സബ്ബസോ വിതക്കയതോ വിചാരയതോ വിതക്കവിപ്ഫാരോ സദ്ദോതി? ആമന്താ. വിതക്കവിപ്ഫാരോ സദ്ദോ സോതവിഞ്ഞേയ്യോ സോതസ്മിം പടിഹഞ്ഞതി സോതസ്സ ആപാഥം ആഗച്ഛതീതി? ന ഹേവം വത്തബ്ബേ…പേ…. നനു വിതക്കവിപ്ഫാരോ സദ്ദോ ന സോതവിഞ്ഞേയ്യോ ന സോതസ്മിം പടിഹഞ്ഞതി ന സോതസ്സ ആപാഥം ആഗച്ഛതീതി? ആമന്താ. ഹഞ്ചി വിതക്കവിപ്ഫാരോ സദ്ദോ ന സോതവിഞ്ഞേയ്യോ ന സോതസ്മിം പടിഹഞ്ഞതി ന സോതസ്സ ആപാഥം ആഗച്ഛതി, നോ ച വത രേ വത്തബ്ബേ – ‘‘സബ്ബസോ വിതക്കയതോ വിചാരയതോ വിതക്കവിപ്ഫാരോ സദ്ദോ’’തി.

വിതക്കവിപ്ഫാരസദ്ദകഥാ നിട്ഠിതാ.