(൮൫) ൨. അമതാരമ്മണകഥാ

൫൪൯. അമതാരമ്മണം സംയോജനന്തി? ആമന്താ. അമതം സംയോജനിയം ഗന്ഥനിയം ഓഘനിയം യോഗനിയം നീവരണിയം പരാമട്ഠം ഉപാദാനിയം സംകിലേസിയന്തി? ന ഹേവം വത്തബ്ബേ…പേ… നനു അമതം അസംയോജനിയം അഗന്ഥനിയം…പേ… അസംകിലേസിയന്തി? ആമന്താ. ഹഞ്ചി അമതം അസംയോജനിയം…പേ… അസംകിലേസിയം, നോ ച വത രേ വത്തബ്ബേ – ‘‘അമതാരമ്മണം സംയോജന’’ന്തി.

അമതം ആരബ്ഭ രാഗോ ഉപ്പജ്ജതീതി? ആമന്താ. അമതം രാഗട്ഠാനിയം രജനിയം കമനിയം മദനിയം ബന്ധനിയം മുച്ഛനിയന്തി? ന ഹേവം വത്തബ്ബേ…പേ… നനു അമതം ന രാഗട്ഠാനിയം ന രജനിയം ന കമനിയം ന മദനിയം ന ബന്ധനിയം ന മുച്ഛനിയന്തി? ആമന്താ. ഹഞ്ചി അമതം ന രാഗട്ഠാനിയം ന രജനിയം ന കമനിയം ന മദനിയം ന ബന്ധനിയം ന മുച്ഛനിയം, നോ ച വത രേ വത്തബ്ബേ – ‘‘അമതം ആരബ്ഭ രാഗോ ഉപ്പജ്ജതീ’’തി.

അമതം ആരബ്ഭ ദോസോ ഉപ്പജ്ജതീതി? ആമന്താ. അമതം ദോസട്ഠാനിയം കോപട്ഠാനിയം പടിഘട്ഠാനിയന്തി? ന ഹേവം വത്തബ്ബേ…പേ… നനു അമതം ന ദോസട്ഠാനിയം ന കോപട്ഠാനിയം ന പടിഘട്ഠാനിയന്തി? ആമന്താ. ഹഞ്ചി അമതം ന ദോസട്ഠാനിയം ന കോപട്ഠാനിയം ന പടിഘട്ഠാനിയം, നോ ച വത രേ വത്തബ്ബേ – ‘‘അമതം ആരബ്ഭ ദോസോ ഉപ്പജ്ജതീ’’തി.

അമതം ആരബ്ഭ മോഹോ ഉപ്പജ്ജതീതി? ആമന്താ. അമതം മോഹട്ഠാനിയം അഞ്ഞാണകരണം അചക്ഖുകരണം പഞ്ഞാനിരോധിയം വിഘാതപക്ഖിയം അനിബ്ബാനസംവത്തനിയന്തി? ന ഹേവം വത്തബ്ബേ…പേ… നനു അമതം ന മോഹട്ഠാനിയം ന അഞ്ഞാണകരണം ന അചക്ഖുകരണം പഞ്ഞാബുദ്ധിയം അവിഘാതപക്ഖിയം നിബ്ബാനസംവത്തനിയന്തി? ആമന്താ. ഹഞ്ചി അമതം ന മോഹട്ഠാനിയം ന അഞ്ഞാണകരണം…പേ… നിബ്ബാനസംവത്തനിയം, നോ ച വത രേ വത്തബ്ബേ – ‘‘അമതം ആരബ്ഭ മോഹോ ഉപ്പജ്ജതീ’’തി.

൫൫൦. രൂപം ആരബ്ഭ സംയോജനാ ഉപ്പജ്ജന്തി, രൂപം സംയോജനിയം ഗന്ഥനിയം…പേ… സംകിലേസിയന്തി? ആമന്താ. അമതം ആരബ്ഭ സംയോജനാ ഉപ്പജ്ജന്തി, അമതം സംയോജനിയം…പേ… സംകിലേസിയന്തി? ന ഹേവം വത്തബ്ബേ…പേ….

രൂപം ആരബ്ഭ രാഗോ ഉപ്പജ്ജതി, രൂപം രാഗട്ഠാനിയം രജനിയം കമനിയം മദനിയം ബന്ധനിയം മുച്ഛനിയന്തി? ആമന്താ. അമതം ആരബ്ഭ രാഗോ ഉപ്പജ്ജതി, അമതം രാഗട്ഠാനിയം…പേ… മുച്ഛനിയന്തി? ന ഹേവം വത്തബ്ബേ…പേ….

രൂപം ആരബ്ഭ ദോസോ ഉപ്പജ്ജതി, രൂപം ദോസട്ഠാനിയം കോപട്ഠാനിയം പടിഘട്ഠാനിയന്തി? ആമന്താ. അമതം ആരബ്ഭ ദോസോ ഉപ്പജ്ജതി, അമതം ദോസട്ഠാനിയം കോപട്ഠാനിയം പടിഘട്ഠാനിയന്തി? ന ഹേവം വത്തബ്ബേ…പേ….

രൂപം ആരബ്ഭ മോഹോ ഉപ്പജ്ജതി, രൂപം മോഹട്ഠാനിയം അഞ്ഞാണകരണം…പേ… അനിബ്ബാനസംവത്തനിയന്തി? ആമന്താ. അമതം ആരബ്ഭ മോഹോ ഉപ്പജ്ജതി, അമതം മോഹട്ഠാനിയം അഞ്ഞാണകരണം…പേ… അനിബ്ബാനസംവത്തനിയന്തി? ന ഹേവം വത്തബ്ബേ…പേ….

അമതം ആരബ്ഭ സംയോജനാ ഉപ്പജ്ജന്തി, അമതം അസംയോജനിയം അഗന്ഥനിയം അനോഘനിയം അയോഗനിയം അനീവരണിയം അപരാമട്ഠം അനുപാദാനിയം അസംകിലേസിയന്തി? ആമന്താ. രൂപം ആരബ്ഭ സംയോജനാ ഉപ്പജ്ജന്തി, രൂപം അസംയോജനിയം അഗന്ഥനിയം…പേ… അസംകിലേസിയന്തി? ന ഹേവം വത്തബ്ബേ…പേ….

അമതം ആരബ്ഭ രാഗോ ഉപ്പജ്ജതി, അമതം ന രാഗട്ഠാനിയം ന രജനിയം ന കമനിയം ന മദനിയം ന ബന്ധനിയം ന മുച്ഛനിയന്തി? ആമന്താ. രൂപം ആരബ്ഭ രാഗോ ഉപ്പജ്ജതി, രൂപം ന രാഗട്ഠാനിയം…പേ… ന മുച്ഛനിയന്തി? ന ഹേവം വത്തബ്ബേ…പേ….

അമതം ആരബ്ഭ ദോസോ ഉപ്പജ്ജതി, അമതം ന ദോസട്ഠാനിയം ന കോപട്ഠാനിയം ന പടിഘട്ഠാനിയന്തി? ആമന്താ. രൂപം ആരബ്ഭ ദോസോ ഉപ്പജ്ജതി, രൂപം ന ദോസട്ഠാനിയം ന കോപട്ഠാനിയം ന പടിഘട്ഠാനിയന്തി? ന ഹേവം വത്തബ്ബേ…പേ….

അമതം ആരബ്ഭ മോഹോ ഉപ്പജ്ജതി, അമതം ന മോഹട്ഠാനിയം ന അഞ്ഞാണകരണം…പേ… നിബ്ബാനസംവത്തനിയന്തി? ആമന്താ. രൂപം ആരബ്ഭ മോഹോ ഉപ്പജ്ജതി, രൂപം ന മോഹട്ഠാനിയം ന അഞ്ഞാണകരണം…പേ… നിബ്ബാനസംവത്തനിയന്തി? ന ഹേവം വത്തബ്ബേ…പേ….

൫൫൧. ന വത്തബ്ബം – ‘‘അമതാരമ്മണം സംയോജന’’ന്തി? ആമന്താ. നനു വുത്തം ഭഗവതാ – ‘‘നിബ്ബാനം നിബ്ബാനതോ സഞ്ജാനാതി, നിബ്ബാനം നിബ്ബാനതോ സഞ്ജാനിത്വാ നിബ്ബാനം മഞ്ഞതി, നിബ്ബാനസ്മിം മഞ്ഞതി, നിബ്ബാനതോ മഞ്ഞതി, നിബ്ബാനം മേതി മഞ്ഞതി, നിബ്ബാനം അഭിനന്ദതീ’’തി [മ. നി. ൧.൬]! അത്ഥേവ സുത്തന്തോതി? ആമന്താ. തേന ഹി അമതാരമ്മണം സംയോജനന്തി.

അമതാരമ്മണകഥാ നിട്ഠിതാ.