(൮൪) ൧. ആനിസംസദസ്സാവീകഥാ

൫൪൭. ആനിസംസദസ്സാവിസ്സ സംയോജനാനം പഹാനന്തി? ആമന്താ. നനു സങ്ഖാരേ അനിച്ചതോ മനസികരോതോ സംയോജനാ പഹീയന്തീതി? ആമന്താ. ഹഞ്ചി സങ്ഖാരേ അനിച്ചതോ മനസികരോതോ സംയോജനാ പഹീയന്തി, നോ ച വത രേ വത്തബ്ബേ – ‘‘ആനിസംസദസ്സാവിസ്സ സംയോജനാനം പഹാന’’ന്തി.

നനു സങ്ഖാരേ ദുക്ഖതോ…പേ… രോഗതോ… ഗണ്ഡതോ… സല്ലതോ… അഘതോ… ആബാധതോ… പരതോ… പലോകതോ… ഈതിതോ… ഉപദ്ദവതോ… ഭയതോ… ഉപസഗ്ഗതോ… ചലതോ… പഭങ്ഗുതോ… അദ്ധുവതോ… അതാണതോ… അലേണതോ… അസരണതോ… അസരണീഭൂതതോ… രിത്തതോ… തുച്ഛതോ… സുഞ്ഞതോ… അനത്തതോ… ആദീനവതോ…പേ… വിപരിണാമധമ്മതോ മനസികരോതോ സംയോജനാ പഹീയന്തീതി? ആമന്താ. ഹഞ്ചി സങ്ഖാരേ വിപരിണാമധമ്മതോ മനസികരോതോ സംയോജനാ പഹീയന്തി, നോ ച വത രേ വത്തബ്ബേ – ‘‘ആനിസംസദസ്സാവിസ്സ സംയോജനാനം പഹാന’’ന്തി.

സങ്ഖാരേ ച അനിച്ചതോ മനസി കരോതി നിബ്ബാനേ ച ആനിസംസദസ്സാവീ ഹോതീതി? ന ഹേവം വത്തബ്ബേ…പേ… സങ്ഖാരേ ച അനിച്ചതോ മനസി കരോതി നിബ്ബാനേ ച ആനിസംസദസ്സാവീ ഹോതീതി? ആമന്താ. ദ്വിന്നം ഫസ്സാനം…പേ… ദ്വിന്നം ചിത്താനം സമോധാനം ഹോതീതി? ന ഹേവം വത്തബ്ബേ…പേ… സങ്ഖാരേ ച ദുക്ഖതോ…പേ… വിപരിണാമധമ്മതോ മനസി കരോതി നിബ്ബാനേ ച ആനിസംസദസ്സാവീ ഹോതീതി? ന ഹേവം വത്തബ്ബേ…പേ… സങ്ഖാരേ ച വിപരിണാമധമ്മതോ മനസി കരോതി നിബ്ബാനേ ച ആനിസംസദസ്സാവീ ഹോതീതി? ആമന്താ. ദ്വിന്നം ഫസ്സാനം…പേ… ദ്വിന്നം ചിത്താനം സമോധാനം ഹോതീതി? ന ഹേവം വത്തബ്ബേ…പേ….

൫൪൮. ന വത്തബ്ബം – ‘‘ആനിസംസദസ്സാവിസ്സ സംയോജനാനം പഹാന’’ന്തി? ആമന്താ. നനു വുത്തം ഭഗവതാ – ‘‘ഇധ, ഭിക്ഖവേ, ഭിക്ഖു നിബ്ബാനേ സുഖാനുപസ്സീ വിഹരതി സുഖസഞ്ഞീ സുഖപടിസംവേദീ, സതതം സമിതം അബ്ബോകിണ്ണം ചേതസാ അധിമുച്ചമാനോ പഞ്ഞായ പരിയോഗാഹമാനോ’’തി [അ. നി. ൭.൧൯]! അത്ഥേവ സുത്തന്തോതി? ആമന്താ. തേന ഹി ആനിസംസദസ്സാവിസ്സ സംയോജനാനം പഹാനന്തി.

ആനിസംസദസ്സാവീകഥാ നിട്ഠിതാ.