൬. ഛട്ഠവഗ്ഗോ

(൬൦) ൮. പഥവീധാതു സനിദസ്സനാതിആദികഥാ

൪൬൫. പഥവീധാതു സനിദസ്സനാതി? ആമന്താ. രൂപം രൂപായതനം രൂപധാതു നീലം പീതകം ലോഹിതകം ഓദാതം ചക്ഖുവിഞ്ഞേയ്യം ചക്ഖുസ്മിം പടിഹഞ്ഞതി ചക്ഖുസ്സ ആപാഥം ആഗച്ഛതീതി? ന ഹേവം വത്തബ്ബേ…പേ….

പഥവീധാതു സനിദസ്സനാതി? ആമന്താ. ചക്ഖുഞ്ച പടിച്ച പഥവീധാതുഞ്ച ഉപ്പജ്ജതി ചക്ഖുവിഞ്ഞാണന്തി? ന ഹേവം വത്തബ്ബേ…പേ….

ചക്ഖുഞ്ച പടിച്ച പഥവീധാതുഞ്ച ഉപ്പജ്ജതി ചക്ഖുവിഞ്ഞാണന്തി? ആമന്താ. ‘‘ചക്ഖുഞ്ച പടിച്ച പഥവീധാതുഞ്ച ഉപ്പജ്ജതി ചക്ഖുവിഞ്ഞാണ’’ന്തി – അത്ഥേവ സുത്തന്തോതി? നത്ഥി. ‘‘ചക്ഖുഞ്ച പടിച്ച രൂപേ ച ഉപ്പജ്ജതി ചക്ഖുവിഞ്ഞാണ’’ന്തി – അത്ഥേവ സുത്തന്തോതി? ആമന്താ. ഹഞ്ചി ‘‘ചക്ഖുഞ്ച പടിച്ച രൂപേ ച ഉപ്പജ്ജതി ചക്ഖുവിഞ്ഞാണ’’ന്തി – അത്ഥേവ സുത്തന്തോ, നോ ച വത രേ വത്തബ്ബേ – ‘‘ചക്ഖുഞ്ച പടിച്ച പഥവീധാതുഞ്ച ഉപ്പജ്ജതി ചക്ഖുവിഞ്ഞാണ’’ന്തി.

൪൬൬. ന വത്തബ്ബം – ‘‘പഥവീധാതു സനിദസ്സനാ’’തി? ആമന്താ. നനു പസ്സതി ഭൂമിം പാസാണം പബ്ബതന്തി? ആമന്താ. ഹഞ്ചി പസ്സതി [പസ്സസി (സീ. സ്യാ. ക.) ഏവമുപരിപി] ഭൂമിം പാസാണം പബ്ബതം, തേന വത രേ വത്തബ്ബേ – ‘‘പഥവീധാതു സനിദസ്സനാ’’തി…പേ….

ന വത്തബ്ബം – ‘‘ആപോധാതു സനിദസ്സനാ’’തി? ആമന്താ. നനു പസ്സതി ഉദകന്തി? ആമന്താ. ഹഞ്ചി പസ്സതി ഉദകം, തേന വത രേ വത്തബ്ബേ – ‘‘ആപോധാതു സനിദസ്സനാതി…പേ….

ന വത്തബ്ബം – തേജോധാതു സനിദസ്സനാതി? ആമന്താ. നനു പസ്സതി അഗ്ഗിം ജലന്തന്തി? ആമന്താ. ഹഞ്ചി പസ്സതി അഗ്ഗിം ജലന്തം, തേന വത രേ വത്തബ്ബേ – ‘‘തേജോധാതു സനിദസ്സനാ’’തി…പേ….

ന വത്തബ്ബം – ‘‘വായോധാതു സനിദസ്സനാ’’തി? ആമന്താ. നനു പസ്സതി വാതേന രുക്ഖേ സഞ്ചാലിയമാനേതി? ആമന്താ. ഹഞ്ചി പസ്സതി വാതേന രുക്ഖേ സഞ്ചാലിയമാനേ, തേന വത രേ വത്തബ്ബേ – ‘‘വായോധാതു സനിദസ്സനാ’’തി…പേ….

പഥവീധാതു സനിദസ്സനാതിആദികഥാ നിട്ഠിതാ.