൫. പഞ്ചമവഗ്ഗോ

(൫൧) ൯. പടുപ്പന്നകഥാ

൪൪൧. പടുപ്പന്നേ [പച്ചുപ്പന്നേ (സീ. സ്യാ.)] ഞാണം അത്ഥീതി? ആമന്താ. തേന ഞാണേന തം ഞാണം ജാനാതീതി? ന ഹേവം വത്തബ്ബേ…പേ… തേന ഞാണേന തം ഞാണം ജാനാതീതി? ആമന്താ. തേന ഞാണേന തം ഞാണം ‘‘ഞാണ’’ന്തി ജാനാതീതി? ന ഹേവം വത്തബ്ബേ…പേ… തേന ഞാണേന തം ഞാണം ‘‘ഞാണ’’ന്തി ജാനാതീതി? ആമന്താ. തം ഞാണം തസ്സ ഞാണസ്സ ആരമ്മണന്തി? ന ഹേവം വത്തബ്ബേ…പേ….

തം ഞാണം തസ്സ ഞാണസ്സ ആരമ്മണന്തി? ആമന്താ. തേന ഫസ്സേന തം ഫസ്സം ഫുസതി, തായ വേദനായ തം വേദനം വേദേതി, തായ സഞ്ഞായ തം സഞ്ഞം സഞ്ജാനാതി, തായ ചേതനായ തം ചേതനം ചേതേതി, തേന ചിത്തേന തം ചിത്തം ചിന്തേതി, തേന വിതക്കേന തം വിതക്കം വിതക്കേതി, തേന വിചാരേന തം വിചാരം വിചാരേതി, തായ പീതിയാ തം പീതിം പിയായതി, തായ സതിയാ തം സതിം സരതി, തായ പഞ്ഞായ തം പഞ്ഞം പജാനാതി, തേന ഖഗ്ഗേന തം ഖഗ്ഗം ഛിന്ദതി, തേന ഫരസുനാ തം ഫരസും തച്ഛതി, തായ കുധാരിയാ തം കുധാരിം തച്ഛതി, തായ വാസിയാ തം വാസിം തച്ഛതി, തായ സൂചിയാ തം സൂചിം സിബ്ബേതി, തേന അങ്ഗുലഗ്ഗേന തം അങ്ഗുലഗ്ഗം പരാമസതി, തേന നാസികഗ്ഗേന തം നാസികഗ്ഗം പരാമസതി, തേന മത്ഥകേന തം മത്ഥകം പരാമസതി, തേന ഗൂഥേന തം ഗൂഥം ധോവതി, തേന മുത്തേന തം മുത്തം ധോവതി, തേന ഖേളേന തം ഖേളം ധോവതി, തേന പുബ്ബേന തം പുബ്ബം ധോവതി, തേന ലോഹിതേന തം ലോഹിതം ധോവതീതി? ന ഹേവം വത്തബ്ബേ …പേ….

൪൪൨. ന വത്തബ്ബം – ‘‘പടുപ്പന്നേ ഞാണം അത്ഥീ’’തി? ആമന്താ. നനു സബ്ബസങ്ഖാരേ അനിച്ചതോ ദിട്ഠേ തമ്പി ഞാണം അനിച്ചതോ ദിട്ഠം ഹോതീതി? ആമന്താ. ഹഞ്ചി സബ്ബസങ്ഖാരേ അനിച്ചതോ ദിട്ഠേ തമ്പി ഞാണം അനിച്ചതോ ദിട്ഠം ഹോതി, തേന വത രേ വത്തബ്ബേ – ‘‘പടുപ്പന്നേ ഞാണം അത്ഥീ’’തി.

പടുപ്പന്നഞാണകഥാ [പച്ചുപ്പന്നകഥാ (സീ.)] നിട്ഠിതാ.