(൪൫) ൩. വിപരീതകഥാ

൪൨൪. പഥവീകസിണം സമാപത്തിം [പഥവീകസിണസമാപത്തിം (സീ. ക.)] സമാപന്നസ്സ വിപരീതേ ഞാണന്തി? ആമന്താ. അനിച്ചേ നിച്ചന്തി വിപരിയേസോതി? ന ഹേവം വത്തബ്ബേ…പേ… ദുക്ഖേ സുഖന്തി…പേ… അനത്തനി അത്താതി…പേ… അസുഭേ സുഭന്തി വിപരിയേസോതി? ന ഹേവം വത്തബ്ബേ…പേ….

പഥവീകസിണം സമാപത്തിം സമാപന്നസ്സ വിപരീതേ ഞാണന്തി? ആമന്താ. അകുസലന്തി? ന ഹേവം വത്തബ്ബേ…പേ… നനു കുസലന്തി? ആമന്താ. ഹഞ്ചി കുസലം, നോ ച വത രേ വത്തബ്ബേ – ‘‘പഥവീകസിണം സമാപത്തിം സമാപന്നസ്സ വിപരീതേ ഞാണ’’ന്തി.

അനിച്ചേ നിച്ചന്തി വിപരിയേസോ, സോ ച അകുസലോതി? ആമന്താ. പഥവീകസിണം സമാപത്തിം സമാപന്നസ്സ വിപരീതേ ഞാണം, തഞ്ച അകുസലന്തി? ന ഹേവം വത്തബ്ബേ…പേ… ദുക്ഖേ സുഖന്തി…പേ… അനത്തനി അത്താതി…പേ… അസുഭേ സുഭന്തി വിപരിയേസോ, സോ ച അകുസലോതി? ആമന്താ. പഥവീകസിണം സമാപത്തിം സമാപന്നസ്സ വിപരീതേ ഞാണം, തഞ്ച അകുസലന്തി? ന ഹേവം വത്തബ്ബേ…പേ….

൪൨൫. പഥവീകസിണം സമാപത്തിം സമാപന്നസ്സ വിപരീതേ ഞാണം, തഞ്ച അകുസലന്തി? ആമന്താ. അനിച്ചേ നിച്ചന്തി വിപരിയേസോ, സോ ച കുസലോതി? ന ഹേവം വത്തബ്ബേ…പേ… പഥവീകസിണം സമാപത്തിം സമാപന്നസ്സ വിപരീതേ ഞാണം, തഞ്ച അകുസലന്തി? ആമന്താ. ദുക്ഖേ സുഖന്തി…പേ… അനത്തനി അത്താതി…പേ… അസുഭേ സുഭന്തി വിപരിയേസോ, സോ ച കുസലോതി? ന ഹേവം വത്തബ്ബേ…പേ….

൪൨൬. പഥവീകസിണം സമാപത്തിം സമാപന്നസ്സ വിപരീതേ ഞാണന്തി? ആമന്താ. അരഹാ പഥവീകസിണം സമാപത്തിം സമാപജ്ജേയ്യാതി? ആമന്താ. ഹഞ്ചി അരഹാ പഥവീകസിണം സമാപത്തിം സമാപജ്ജേയ്യ, നോ ച വത രേ വത്തബ്ബേ – ‘‘പഥവീകസിണം സമാപത്തിം സമാപന്നസ്സ വിപരീതേ ഞാണ’’ന്തി.

പഥവീകസിണം സമാപത്തിം സമാപന്നസ്സ വിപരീതേ ഞാണം, അരഹാ പഥവീകസിണം സമാപത്തിം സമാപജ്ജേയ്യാതി? ആമന്താ. അത്ഥി അരഹതോ വിപരിയേസോതി? ന ഹേവം വത്തബ്ബേ…പേ….

അത്ഥി അരഹതോ വിപരിയേസോതി? ആമന്താ. അത്ഥി അരഹതോ സഞ്ഞാവിപരിയേസോ ചിത്തവിപരിയേസോ ദിട്ഠിവിപരിയേസോതി? ന ഹേവം വത്തബ്ബേ…പേ….

നത്ഥി അരഹതോ സഞ്ഞാവിപരിയേസോ ചിത്തവിപരിയേസോ ദിട്ഠിവിപരിയേസോതി? ആമന്താ. ഹഞ്ചി നത്ഥി അരഹതോ സഞ്ഞാവിപരിയേസോ ചിത്തവിപരിയേസോ ദിട്ഠിവിപരിയേസോ, നോ ച വത രേ വത്തബ്ബേ – ‘‘അത്ഥി അരഹതോ വിപരിയേസോ’’തി.

൪൨൭. ന വത്തബ്ബം – പഥവീകസിണം സമാപത്തിം സമാപന്നസ്സ വിപരീതേ ഞാണന്തി? ആമന്താ. പഥവീകസിണം സമാപത്തിം സമാപജ്ജന്തസ്സ സബ്ബേവ പഥവീതി? ന ഹേവം വത്തബ്ബേ. തേന ഹി പഥവീകസിണം സമാപത്തിം സമാപന്നസ്സ വിപരീതേ ഞാണന്തി.

പഥവീകസിണം സമാപത്തിം സമാപന്നസ്സ വിപരീതേ ഞാണന്തി? ആമന്താ. നനു പഥവീ അത്ഥി, അത്ഥി ച കോചി പഥവിം പഥവിതോ സമാപജ്ജതീതി? ആമന്താ. ഹഞ്ചി പഥവീ അത്ഥി, അത്ഥി ച കോചി പഥവിം പഥവിതോ സമാപജ്ജതി, നോ ച വത രേ വത്തബ്ബേ – ‘‘പഥവീകസിണം സമാപത്തിം സമാപന്നസ്സ വിപരീതേ ഞാണ’’ന്തി.

പഥവീ അത്ഥി, പഥവിം പഥവിതോ സമാപജ്ജന്തസ്സ വിപരീതം ഹോതീതി? ആമന്താ. നിബ്ബാനം അത്ഥി, നിബ്ബാനം നിബ്ബാനതോ സമാപജ്ജന്തസ്സ വിപരീതം ഹോതീതി? ന ഹേവം വത്തബ്ബേ…പേ… തേന ഹി ന വത്തബ്ബം – ‘‘പഥവീകസിണം സമാപത്തിം സമാപന്നസ്സ വിപരീതേ ഞാണ’’ന്തി.

വിപരീതകഥാ നിട്ഠിതാ.