൪. ചതുത്ഥവഗ്ഗോ

(൪൧) ൯. അപരാപി സമന്നാഗതകഥാ

൪൦൬. അരഹത്തസച്ഛികിരിയായ പടിപന്നോ പുഗ്ഗലോ തീഹി ഫലേഹി സമന്നാഗതോതി? ആമന്താ. അരഹത്തസച്ഛികിരിയായ പടിപന്നോ പുഗ്ഗലോ ചതൂഹി ഫസ്സേഹി ചതൂഹി വേദനാഹി ചതൂഹി സഞ്ഞാഹി ചതൂഹി ചേതനാഹി ചതൂഹി ചിത്തേഹി ചതൂഹി സദ്ധാഹി ചതൂഹി വീരിയേഹി ചതൂഹി സതീഹി ചതൂഹി സമാധീഹി ചതൂഹി പഞ്ഞാഹി സമന്നാഗതോതി? ന ഹേവം വത്തബ്ബേ…പേ….

അനാഗാമിഫലസച്ഛികിരിയായ പടിപന്നോ പുഗ്ഗലോ ദ്വീഹി ഫലേഹി സമന്നാഗതോതി? ആമന്താ. അനാഗാമിഫലസച്ഛികിരിയായ പടിപന്നോ പുഗ്ഗലോ തീഹി ഫസ്സേഹി തീഹി വേദനാഹി…പേ… തീഹി പഞ്ഞാഹി സമന്നാഗതോതി? ന ഹേവം വത്തബ്ബേ…പേ….

സകദാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിഫലേന സമന്നാഗതോതി? ആമന്താ. സകദാഗാമിഫലസച്ഛികിരിയായ പടിപന്നോ പുഗ്ഗലോ ദ്വീഹി ഫസ്സേഹി ദ്വീഹി വേദനാഹി…പേ… ദ്വീഹി പഞ്ഞാഹി സമന്നാഗതോതി? ന ഹേവം വത്തബ്ബേ…പേ….

അരഹത്തസച്ഛികിരിയായ പടിപന്നോ പുഗ്ഗലോ സോതാപത്തിഫലേന സമന്നാഗതോതി? ആമന്താ. അരഹത്തസച്ഛികിരിയായ പടിപന്നോ പുഗ്ഗലോ സോതാപന്നോ സത്തക്ഖത്തുപരമോ, കോലങ്കോലോ, ഏകബീജീതി? ന ഹേവം വത്തബ്ബേ…പേ….

അരഹത്തസച്ഛികിരിയായ പടിപന്നോ പുഗ്ഗലോ സകദാഗാമിഫലേന സമന്നാഗതോതി? ആമന്താ. അരഹത്തസച്ഛികിരിയായ പടിപന്നോ പുഗ്ഗലോ സകദാഗാമീതി? ന ഹേവം വത്തബ്ബേ…പേ….

അരഹത്തസച്ഛികിരിയായ പടിപന്നോ പുഗ്ഗലോ അനാഗാമിഫലേന സമന്നാഗതോതി? ആമന്താ. അരഹത്തസച്ഛികിരിയായ പടിപന്നോ പുഗ്ഗലോ അനാഗാമീ അന്തരാപരിനിബ്ബായീ, ഉപഹച്ചപരിനിബ്ബായീ, അസങ്ഖാരപരിനിബ്ബായീ, സസങ്ഖാരപരിനിബ്ബായീ, ഉദ്ധംസോതോ അകനിട്ഠഗാമീതി? ന ഹേവം വത്തബ്ബേ…പേ….

അനാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിഫലേന സമന്നാഗതോതി? ആമന്താ. അനാഗാമിഫലസച്ഛികിരിയായ പടിപന്നോ പുഗ്ഗലോ സോതാപന്നോ സത്തക്ഖത്തുപരമോ, കോലങ്കോലോ, ഏകബീജീതി? ന ഹേവം വത്തബ്ബേ…പേ….

അനാഗാമിഫലസച്ഛികിരിയായ പടിപന്നോ പുഗ്ഗലോ സകദാഗാമിഫലേന സമന്നാഗതോതി? ആമന്താ. അനാഗാമിഫലസച്ഛികിരിയായ പടിപന്നോ പുഗ്ഗലോ സകദാഗാമീതി? ന ഹേവം വത്തബ്ബേ…പേ….

സകദാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിഫലേന സമന്നാഗതോതി? ആമന്താ. സകദാഗാമിഫലസച്ഛികിരിയായ പടിപന്നോ പുഗ്ഗലോ സോതാപന്നോ സത്തക്ഖത്തുപരമോ, കോലങ്കോലോ, ഏകബീജീതി? ന ഹേവം വത്തബ്ബേ…പേ….

൪൦൭. സോതാപത്തിഫലേന സമന്നാഗതോ സോതാപന്നോതി വത്തബ്ബോതി? ആമന്താ. അരഹത്തസച്ഛികിരിയായ പടിപന്നോ പുഗ്ഗലോ സോതാപത്തിഫലേന സമന്നാഗതോതി? ആമന്താ. സ്വേവ അരഹത്തസച്ഛികിരിയായ പടിപന്നോ പുഗ്ഗലോ, സോ സോതാപന്നോതി? ന ഹേവം വത്തബ്ബേ…പേ….

സകദാഗാമിഫലേന സമന്നാഗതോ സകദാഗാമീതി വത്തബ്ബോതി? ആമന്താ. അരഹത്തസച്ഛികിരിയായ പടിപന്നോ പുഗ്ഗലോ സകദാഗാമിഫലേന സമന്നാഗതോതി? ആമന്താ. സ്വേവ അരഹത്തസച്ഛികിരിയായ പടിപന്നോ പുഗ്ഗലോ, സോ സകദാഗാമീതി? ന ഹേവം വത്തബ്ബേ…പേ….

അനാഗാമിഫലേന സമന്നാഗതോ അനാഗാമീതി വത്തബ്ബോതി? ആമന്താ. അരഹത്തസച്ഛികിരിയായ പടിപന്നോ പുഗ്ഗലോ അനാഗാമിഫലേന സമന്നാഗതോതി? ആമന്താ. സ്വേവ അരഹത്തസച്ഛികിരിയായ പടിപന്നോ പുഗ്ഗലോ, സോ അനാഗാമീതി? ന ഹേവം വത്തബ്ബേ…പേ….

സോതാപത്തിഫലേന സമന്നാഗതോ സോതാപന്നോതി വത്തബ്ബോതി? ആമന്താ. അനാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിഫലേന സമന്നാഗതോതി? ആമന്താ. സ്വേവ അനാഗാമിഫലസച്ഛികിരിയായ പടിപന്നോ പുഗ്ഗലോ, സോ സോതാപന്നോതി? ന ഹേവം വത്തബ്ബേ…പേ….

സകദാഗാമിഫലേന സമന്നാഗതോ സകദാഗാമീതി വത്തബ്ബോതി? ആമന്താ. അനാഗാമിഫലസച്ഛികിരിയായ പടിപന്നോ പുഗ്ഗലോ സകദാഗാമിഫലേന സമന്നാഗതോതി? ആമന്താ. സ്വേവ അനാഗാമിഫലസച്ഛികിരിയായ പടിപന്നോ പുഗ്ഗലോ, സോ സകദാഗാമീതി? ന ഹേവം വത്തബ്ബേ…പേ….

സോതാപത്തിഫലേന സമന്നാഗതോ സോതാപന്നോതി വത്തബ്ബോതി? ആമന്താ. സകദാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിഫലേന സമന്നാഗതോതി? ആമന്താ. സ്വേവ സകദാഗാമിഫലസച്ഛികിരിയായ പടിപന്നോ പുഗ്ഗലോ, സോ സോതാപന്നോതി? ന ഹേവം വത്തബ്ബേ…പേ….

൪൦൮. അരഹത്തസച്ഛികിരിയായ പടിപന്നോ പുഗ്ഗലോ സോതാപത്തിഫലേന സമന്നാഗതോതി? ആമന്താ. നനു അരഹത്തസച്ഛികിരിയായ പടിപന്നോ പുഗ്ഗലോ സോതാപത്തിഫലം വീതിവത്തോതി? ആമന്താ. ഹഞ്ചി അരഹത്തസച്ഛികിരിയായ പടിപന്നോ പുഗ്ഗലോ സോതാപത്തിഫലം വീതിവത്തോ, നോ ച വത രേ വത്തബ്ബേ – ‘‘അരഹത്തസച്ഛികിരിയായ പടിപന്നോ പുഗ്ഗലോ സോതാപത്തിഫലേന സമന്നാഗതോ’’തി.

അരഹത്തസച്ഛികിരിയായ പടിപന്നോ പുഗ്ഗലോ സോതാപത്തിഫലം വീതിവത്തോ, തേന സമന്നാഗതോതി? ആമന്താ. അരഹത്തസച്ഛികിരിയായ പടിപന്നോ പുഗ്ഗലോ സോതാപത്തിമഗ്ഗം വീതിവത്തോ, സക്കായദിട്ഠിം വിചികിച്ഛം സീലബ്ബതപരാമാസം അപായഗമനീയം രാഗം അപായഗമനീയം ദോസം അപായഗമനീയം മോഹം വീതിവത്തോ, തേന സമന്നാഗതോതി? ന ഹേവം വത്തബ്ബേ…പേ….

അരഹത്തസച്ഛികിരിയായ പടിപന്നോ പുഗ്ഗലോ സകദാഗാമിഫലേന സമന്നാഗതോതി? ആമന്താ. നനു അരഹത്തസച്ഛികിരിയായ പടിപന്നോ പുഗ്ഗലോ സകദാഗാമിഫലം വീതിവത്തോതി? ആമന്താ. ഹഞ്ചി അരഹത്തസച്ഛികിരിയായ പടിപന്നോ പുഗ്ഗലോ സകദാഗാമിഫലം വീതിവത്തോ, നോ ച വത രേ വത്തബ്ബേ – ‘‘അരഹത്തസച്ഛികിരിയായ പടിപന്നോ പുഗ്ഗലോ സകദാഗാമിഫലേന സമന്നാഗതോ’’തി.

അരഹത്തസച്ഛികിരിയായ പടിപന്നോ പുഗ്ഗലോ സകദാഗാമിഫലം വീതിവത്തോ, തേന സമന്നാഗതോതി? ആമന്താ. അരഹത്തസച്ഛികിരിയായ പടിപന്നോ പുഗ്ഗലോ സകദാഗാമിമഗ്ഗം വീതിവത്തോ, ഓളാരികം കാമരാഗം ഓളാരികം ബ്യാപാദം വീതിവത്തോ, തേന സമന്നാഗതോതി? ന ഹേവം വത്തബ്ബേ…പേ….

അരഹത്തസച്ഛികിരിയായ പടിപന്നോ പുഗ്ഗലോ അനാഗാമിഫലേന സമന്നാഗതോതി? ആമന്താ. നനു അരഹത്തസച്ഛികിരിയായ പടിപന്നോ പുഗ്ഗലോ അനാഗാമിഫലം വീതിവത്തോതി? ആമന്താ. ഹഞ്ചി അരഹത്തസച്ഛികിരിയായ പടിപന്നോ പുഗ്ഗലോ അനാഗാമിഫലം വീതിവത്തോ, നോ ച വത രേ വത്തബ്ബേ – ‘‘അരഹത്തസച്ഛികിരിയായ പടിപന്നോ പുഗ്ഗലോ അനാഗാമിഫലേന സമന്നാഗതോ’’തി.

അരഹത്തസച്ഛികിരിയായ പടിപന്നോ പുഗ്ഗലോ അനാഗാമിഫലം വീതിവത്തോ, തേന സമന്നാഗതോതി? ആമന്താ. അരഹത്തസച്ഛികിരിയായ പടിപന്നോ പുഗ്ഗലോ അനാഗാമിമഗ്ഗം വീതിവത്തോ, അണുസഹഗതം കാമരാഗം അണുസഹഗതം ബ്യാപാദം വീതിവത്തോ, തേന സമന്നാഗതോതി? ന ഹേവം വത്തബ്ബേ…പേ….

൪൦൯. അനാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിഫലേന സമന്നാഗതോതി? ആമന്താ. നനു അനാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിഫലം വീതിവത്തോതി? ആമന്താ. ഹഞ്ചി അനാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിഫലം വീതിവത്തോ, നോ ച വത രേ വത്തബ്ബേ – ‘‘അനാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിഫലേന സമന്നാഗതോ’’തി.

അനാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിഫലം വീതിവത്തോ, തേന സമന്നാഗതോതി? ആമന്താ. അനാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിമഗ്ഗം വീതിവത്തോ, സക്കായദിട്ഠിം…പേ… അപായഗമനീയം മോഹം വീതിവത്തോ, തേന സമന്നാഗതോതി? ന ഹേവം വത്തബ്ബേ…പേ….

അനാഗാമിഫലസച്ഛികിരിയായ പടിപന്നോ പുഗ്ഗലോ സകദാഗാമിഫലേന സമന്നാഗതോതി? ആമന്താ. നനു അനാഗാമിഫലസച്ഛികിരിയായ പടിപന്നോ പുഗ്ഗലോ സകദാഗാമിഫലം വീതിവത്തോതി? ആമന്താ. ഹഞ്ചി അനാഗാമിഫലസച്ഛികിരിയായ പടിപന്നോ പുഗ്ഗലോ സകദാഗാമിഫലം വീതിവത്തോ, നോ ച വത രേ വത്തബ്ബേ – ‘‘അനാഗാമിഫലസച്ഛികിരിയായ പടിപന്നോ പുഗ്ഗലോ സകദാഗാമിഫലേന സമന്നാഗതോ’’തി.

അനാഗാമിഫലസച്ഛികിരിയായ പടിപന്നോ പുഗ്ഗലോ സകദാഗാമിഫലം വീതിവത്തോ, തേന സമന്നാഗതോതി? ആമന്താ. അനാഗാമിഫലസച്ഛികിരിയായ പടിപന്നോ പുഗ്ഗലോ സകദാഗാമിമഗ്ഗം വീതിവത്തോ, ഓളാരികം കാമരാഗം ഓളാരികം ബ്യാപാദം വീതിവത്തോ, തേന സമന്നാഗതോതി? ന ഹേവം വത്തബ്ബേ…പേ….

൪൧൦. സകദാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിഫലേന സമന്നാഗതോതി? ആമന്താ. നനു സകദാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിഫലം വീതിവത്തോതി? ആമന്താ. ഹഞ്ചി സകദാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിഫലം വീതിവത്തോ, നോ ച വത രേ വത്തബ്ബേ – ‘‘സകദാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിഫലേന സമന്നാഗതോ’’തി.

സകദാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിഫലം വീതിവത്തോ, തേന സമന്നാഗതോതി? ആമന്താ. സകദാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിമഗ്ഗം വീതിവത്തോ, സക്കായദിട്ഠിം…പേ… അപായഗമനീയം മോഹം വീതിവത്തോ, തേന സമന്നാഗതോതി? ന ഹേവം വത്തബ്ബേ…പേ….

൪൧൧. ന വത്തബ്ബം – ‘‘അരഹത്തസച്ഛികിരിയായ പടിപന്നോ പുഗ്ഗലോ തീഹി ഫലേഹി സമന്നാഗതോ’’തി? ആമന്താ. നനു അരഹത്തസച്ഛികിരിയായ പടിപന്നേന പുഗ്ഗലേന തീണി ഫലാനി പടിലദ്ധാനി, തേഹി ച അപരിഹീനോതി? ആമന്താ. ഹഞ്ചി അരഹത്തസച്ഛികിരിയായ പടിപന്നേന പുഗ്ഗലേന തീണി ഫലാനി പടിലദ്ധാനി തേഹി ച അപരിഹീനോ, തേന വത രേ വത്തബ്ബേ – ‘‘അരഹത്തസച്ഛികിരിയായ പടിപന്നോ പുഗ്ഗലോ തീഹി ഫലേഹി സമന്നാഗതോ’’തി.

ന വത്തബ്ബം – ‘‘അനാഗാമിഫലസച്ഛികിരിയായ പടിപന്നോ പുഗ്ഗലോ ദ്വീഹി ഫലേഹി സമന്നാഗതോ’’തി? ആമന്താ. നനു അനാഗാമിഫലസച്ഛികിരിയായ പടിപന്നേന പുഗ്ഗലേന ദ്വേ ഫലാനി പടിലദ്ധാനി, തേഹി ച അപരിഹീനോതി? ആമന്താ. ഹഞ്ചി അനാഗാമിഫലസച്ഛികിരിയായ പടിപന്നേന പുഗ്ഗലേന ദ്വേ ഫലാനി പടിലദ്ധാനി തേഹി ച അപരിഹീനോ, തേന വത രേ വത്തബ്ബേ – ‘‘അനാഗാമിഫലസച്ഛികിരിയായ പടിപന്നോ പുഗ്ഗലോ ദ്വീഹി ഫലേഹി സമന്നാഗതോ’’തി.

ന വത്തബ്ബം – ‘‘സകദാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിഫലേന സമന്നാഗതോ’’തി? ആമന്താ. നനു സകദാഗാമിഫലസച്ഛികിരിയായ പടിപന്നേന പുഗ്ഗലേന സോതാപത്തിഫലം പടിലദ്ധം, തേന ച അപരിഹീനോതി? ആമന്താ. ഹഞ്ചി സകദാഗാമിഫലസച്ഛികിരിയായ പടിപന്നേന പുഗ്ഗലേന സോതാപത്തിഫലം പടിലദ്ധം തേന ച അപരിഹീനോ, തേന വത രേ വത്തബ്ബേ – ‘‘സകദാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിഫലേന സമന്നാഗതോ’’തി.

൪൧൨. അരഹത്തസച്ഛികിരിയായ പടിപന്നേന പുഗ്ഗലേന തീണി ഫലാനി പടിലദ്ധാനി തേഹി ച അപരിഹീനോതി, അരഹത്തസച്ഛികിരിയായ പടിപന്നോ പുഗ്ഗലോ തീഹി ഫലേഹി സമന്നാഗതോതി? ആമന്താ. അരഹത്തസച്ഛികിരിയായ പടിപന്നേന പുഗ്ഗലേന ചത്താരോ മഗ്ഗാ പടിലദ്ധാ തേഹി ച അപരിഹീനോതി, അരഹത്തസച്ഛികിരിയായ പടിപന്നോ പുഗ്ഗലോ ചതൂഹി മഗ്ഗേഹി സമന്നാഗതോതി? ന ഹേവം വത്തബ്ബേ…പേ….

അനാഗാമിഫലസച്ഛികിരിയായ പടിപന്നേന പുഗ്ഗലേന ദ്വേ ഫലാനി പടിലദ്ധാനി തേഹി ച അപരിഹീനോതി, അനാഗാമിഫലസച്ഛികിരിയായ പടിപന്നോ പുഗ്ഗലോ ദ്വീഹി ഫലേഹി സമന്നാഗതോതി? ആമന്താ. അനാഗാമിഫലസച്ഛികിരിയായ പടിപന്നേന പുഗ്ഗലേന തയോ മഗ്ഗാ പടിലദ്ധാ തേഹി ച അപരിഹീനോതി, അനാഗാമിഫലസച്ഛികിരിയായ പടിപന്നോ പുഗ്ഗലോ തീഹി മഗ്ഗേഹി സമന്നാഗതോതി? ന ഹേവം വത്തബ്ബേ…പേ….

സകദാഗാമിഫലസച്ഛികിരിയായ പടിപന്നേന പുഗ്ഗലേന സോതാപത്തിഫലം പടിലദ്ധം തേന ച അപരിഹീനോതി, സകദാഗാമിഫലസച്ഛികിരിയായ പടിപന്നോ പുഗ്ഗലോ സോതാപത്തിഫലേന സമന്നാഗതോതി? ആമന്താ. സകദാഗാമിഫലസച്ഛികിരിയായ പടിപന്നേന പുഗ്ഗലേന ദ്വേ മഗ്ഗാ പടിലദ്ധാ തേഹി ച അപരിഹീനോതി, സകദാഗാമിഫലസച്ഛികിരിയായ പടിപന്നോ പുഗ്ഗലോ ദ്വീഹി മഗ്ഗേഹി സമന്നാഗതോതി? ന ഹേവം വത്തബ്ബേ…പേ….

അപരാപി സമന്നാഗതകഥാ നിട്ഠിതാ.