(൩൧) ൧൧. അസഞ്ഞകഥാ

൩൮൧. അസഞ്ഞസത്തേസു സഞ്ഞാ അത്ഥീതി? ആമന്താ. സഞ്ഞാഭവോ സഞ്ഞാഗതി സഞ്ഞാസത്താവാസോ സഞ്ഞാസംസാരോ സഞ്ഞായോനി സഞ്ഞത്തഭാവപടിലാഭോതി? ന ഹേവം വത്തബ്ബേ…പേ….

നനു അസഞ്ഞഭവോ അസഞ്ഞഗതി അസഞ്ഞസത്താവാസോ അസഞ്ഞസംസാരോ അസഞ്ഞയോനി അസഞ്ഞത്തഭാവപടിലാഭോതി? ആമന്താ. ഹഞ്ചി അസഞ്ഞഭവോ അസഞ്ഞഗതി അസഞ്ഞസത്താവാസോ അസഞ്ഞസംസാരോ അസഞ്ഞയോനി അസഞ്ഞത്തഭാവപടിലാഭോ, നോ ച വത രേ വത്തബ്ബേ – ‘‘അസഞ്ഞസത്തേസു സഞ്ഞാ അത്ഥീ’’തി.

അസഞ്ഞസത്തേസു സഞ്ഞാ അത്ഥീതി? ആമന്താ. പഞ്ചവോകാരഭവോ ഗതി സത്താവാസോ സംസാരോ യോനി അത്തഭാവപടിലാഭോതി? ന ഹേവം വത്തബ്ബേ…പേ….

നനു ഏകവോകാരഭവോ ഗതി സത്താവാസോ സംസാരോ യോനി അത്തഭാവപടിലാഭോതി? ആമന്താ. ഹഞ്ചി ഏകവോകാരഭവോ ഗതി സത്താവാസോ സംസാരോ യോനി അത്തഭാവപടിലാഭോ, നോ ച വത രേ വത്തബ്ബേ – ‘‘അസഞ്ഞസത്തേസു സഞ്ഞാ അത്ഥീ’’തി.

അസഞ്ഞസത്തേസു സഞ്ഞാ അത്ഥീതി? ആമന്താ. തായ സഞ്ഞായ സഞ്ഞാകരണീയം കരോതീതി? ന ഹേവം വത്തബ്ബേ…പേ….

൩൮൨. മനുസ്സേസു സഞ്ഞാ അത്ഥി, സോ ച സഞ്ഞാഭവോ സഞ്ഞാഗതി സഞ്ഞാസത്താവാസോ സഞ്ഞാസംസാരോ സഞ്ഞായോനി സഞ്ഞത്തഭാവപടിലാഭോതി? ആമന്താ. അസഞ്ഞസത്തേസു സഞ്ഞാ അത്ഥി, സോ ച സഞ്ഞാഭവോ സഞ്ഞാഗതി സത്താവാസോ സംസാരോ യോനി അത്തഭാവപടിലാഭോതി? ന ഹേവം വത്തബ്ബേ…പേ….

മനുസ്സേസു സഞ്ഞാ അത്ഥി, സോ ച പഞ്ചവോകാരഭവോ ഗതി സത്താവാസോ സംസാരോ യോനി അത്തഭാവപടിലാഭോതി? ആമന്താ. അസഞ്ഞസത്തേസു സഞ്ഞാ അത്ഥി, സോ ച പഞ്ചവോകാരഭവോ ഗതി സത്താവാസോ സംസാരോ യോനി അത്തഭാവപടിലാഭോതി? ന ഹേവം വത്തബ്ബേ…പേ….

മനുസ്സേസു സഞ്ഞാ അത്ഥി, തായ സഞ്ഞായ സഞ്ഞാകരണീയം കരോതീതി? ആമന്താ. അസഞ്ഞസത്തേസു സഞ്ഞാ അത്ഥി, തായ സഞ്ഞായ സഞ്ഞാകരണീയം കരോതീതി? ന ഹേവം വത്തബ്ബേ…പേ….

അസഞ്ഞസത്തേസു സഞ്ഞാ അത്ഥി, സോ ച അസഞ്ഞഭവോ അസഞ്ഞഗതി അസഞ്ഞസത്താവാസോ അസഞ്ഞസംസാരോ അസഞ്ഞയോനി അസഞ്ഞത്തഭാവപടിലാഭോതി? ആമന്താ. മനുസ്സേസു സഞ്ഞാ അത്ഥി, സോ ച അസഞ്ഞഭവോ അസഞ്ഞഗതി…പേ… അസഞ്ഞത്തഭാവപടിലാഭോതി? ന ഹേവം വത്തബ്ബേ…പേ….

അസഞ്ഞസത്തേസു സഞ്ഞാ അത്ഥി, സോ ച ഏകവോകാരഭവോ ഗതി സത്താവാസോ സംസാരോ യോനി അത്തഭാവപടിലാഭോതി? ആമന്താ. മനുസ്സേസു സഞ്ഞാ അത്ഥി, സോ ച ഏകവോകാരഭവോ ഗതി…പേ… അത്തഭാവപടിലാഭോതി? ന ഹേവം വത്തബ്ബേ…പേ….

അസഞ്ഞസത്തേസു സഞ്ഞാ അത്ഥി, ന ച തായ സഞ്ഞായ സഞ്ഞാകരണീയം കരോതീതി? ആമന്താ. മനുസ്സേസു സഞ്ഞാ അത്ഥി, ന ച തായ സഞ്ഞായ സഞ്ഞാകരണീയം കരോതീതി? ന ഹേവം വത്തബ്ബേ…പേ….

൩൮൩. ന വത്തബ്ബം – ‘‘അസഞ്ഞസത്തേസു സഞ്ഞാ അത്ഥീ’’തി? ആമന്താ. നനു വുത്തം ഭഗവതാ – ‘‘സന്തി, ഭിക്ഖവേ, അസഞ്ഞസത്താ നാമ ദേവാ; സഞ്ഞുപ്പാദാ ച പന തേ ദേവാ തമ്ഹാ കായാ ചവന്തീ’’തി [ദീ. നി. ൧.൬൮]! അത്ഥേവ സുത്തന്തോതി? ആമന്താ. തേന ഹി അസഞ്ഞസത്തേസു സഞ്ഞാ അത്ഥീതി.

അസഞ്ഞസത്തേസു സഞ്ഞാ അത്ഥീതി? കിഞ്ചി [കഞ്ചി (സ്യാ.)] കാലേ അത്ഥി, കിഞ്ചി കാലേ നത്ഥീതി. കിഞ്ചി കാലേ സഞ്ഞസത്താ കിഞ്ചി കാലേ അസഞ്ഞസത്താ, കിഞ്ചി കാലേ സഞ്ഞഭവോ കിഞ്ചി കാലേ അസഞ്ഞഭവോ, കിഞ്ചി കാലേ പഞ്ചവോകാരഭവോ കിഞ്ചി കാലേ ഏകവോകാരഭവോതി? ന ഹേവം വത്തബ്ബേ…പേ….

അസഞ്ഞസത്തേസു സഞ്ഞാ കിഞ്ചി കാലേ അത്ഥി, കിഞ്ചി കാലേ നത്ഥീതി? ആമന്താ. കം കാലം അത്ഥി, കം കാലം നത്ഥീതി? ചുതികാലേ ഉപപത്തികാലേ അത്ഥി, ഠിതികാലേ നത്ഥീതി. ചുതികാലേ ഉപപത്തികാലേ സഞ്ഞസത്താ, ഠിതികാലേ അസഞ്ഞസത്താ; ചുതികാലേ ഉപപത്തികാലേ സഞ്ഞഭവോ, ഠിതികാലേ അസഞ്ഞഭവോ; ചുതികാലേ ഉപപത്തികാലേ പഞ്ചവോകാരഭവോ, ഠിതികാലേ ഏകവോകാരഭവോതി? ന ഹേവം വത്തബ്ബേ…പേ….

അസഞ്ഞകഥാ നിട്ഠിതാ.