൩. തതിയവഗ്ഗോ

(൩൦) ൧൦. സംവരകഥാ

൩൭൯. അത്ഥി ദേവേസു സംവരോതി? ആമന്താ. അത്ഥി ദേവേസു അസംവരോതി? ന ഹേവം വത്തബ്ബേ…പേ….

നത്ഥി ദേവേസു അസംവരോതി? ആമന്താ. നത്ഥി ദേവേസു സംവരോതി? ന ഹേവം വത്തബ്ബേ…പേ….

നനു അസംവരാ സംവരോ സീലം, അത്ഥി ദേവേസു സംവരോതി? ആമന്താ. അത്ഥി ദേവേസു അസംവരോ, യമ്ഹാ അസംവരാ സംവരോ സീലന്തി? ന ഹേവം വത്തബ്ബേ…പേ….

ആജാനാഹി നിഗ്ഗഹം. ഹഞ്ചി അസംവരാ സംവരോ സീലം, അത്ഥി ദേവേസു സംവരോ, തേന വത രേ വത്തബ്ബേ – ‘‘അത്ഥി ദേവേസു അസംവരോ, യമ്ഹാ അസംവരാ സംവരോ സീല’’ന്തി. യം തത്ഥ വദേസി – ‘‘വത്തബ്ബേ ഖോ – ‘അസംവരാ സംവരോ സീലം, അത്ഥി ദേവേസു സംവരോ,’ നോ ച വത്തബ്ബേ – ‘അത്ഥി ദേവേസു അസംവരോ, യമ്ഹാ അസംവരാ സംവരോ സീല’’’ന്തി മിച്ഛാ.

നോ ചേ പന വത്തബ്ബേ – ‘‘അത്ഥി ദേവേസു അസംവരോ, യമ്ഹാ അസംവരാ സംവരോ സീല’’ന്തി, നോ ച വത രേ വത്തബ്ബേ – ‘‘അസംവരാ സംവരോ സീലം, അത്ഥി ദേവേസു സംവരോ’’തി. യം തത്ഥ വദേസി – ‘‘വത്തബ്ബേ ഖോ ‘അസംവരാ സംവരോ സീലം, അത്ഥി ദേവേസു സംവരോ,’ നോ ച വത്തബ്ബേ – ‘അത്ഥി ദേവേസു അസംവരോ, യമ്ഹാ അസംവരാ സംവരോ സീല’’’ന്തി മിച്ഛാ.

അത്ഥി മനുസ്സേസു സംവരോ, അത്ഥി തത്ഥ അസംവരോതി? ആമന്താ. അത്ഥി ദേവേസു സംവരോ, അത്ഥി തത്ഥ അസംവരോതി? ന ഹേവം വത്തബ്ബേ…പേ….

അത്ഥി ദേവേസു സംവരോ, നത്ഥി തത്ഥ അസംവരോതി? ആമന്താ. അത്ഥി മനുസ്സേസു സംവരോ, നത്ഥി തത്ഥ അസംവരോതി? ന ഹേവം വത്തബ്ബേ…പേ….

൩൮൦. അത്ഥി ദേവേസു പാണാതിപാതാ വേരമണീതി? ആമന്താ. അത്ഥി ദേവേസു പാണാതിപാതോതി? ന ഹേവം വത്തബ്ബേ…പേ….

അത്ഥി ദേവേസു സുരാമേരയമജ്ജപമാദട്ഠാനാ വേരമണീതി? ആമന്താ. അത്ഥി ദേവേസു സുരാമേരയമജ്ജപമാദട്ഠാനന്തി? ന ഹേവം വത്തബ്ബേ…പേ….

നത്ഥി ദേവേസു പാണാതിപാതോതി? ആമന്താ. നത്ഥി ദേവേസു പാണാതിപാതാ വേരമണീതി? ന ഹേവം വത്തബ്ബേ…പേ….

നത്ഥി ദേവേസു സുരാമേരയമജ്ജപമാദട്ഠാനന്തി? ആമന്താ. നത്ഥി ദേവേസു സുരാമേരയമജ്ജപമാദട്ഠാനാ വേരമണീതി? ന ഹേവം വത്തബ്ബേ…പേ….

അത്ഥി മനുസ്സേസു പാണാതിപാതാ വേരമണി, അത്ഥി തത്ഥ പാണാതിപാതോതി? ആമന്താ. അത്ഥി ദേവേസു പാണാതിപാതാ വേരമണി, അത്ഥി തത്ഥ പാണാതിപാതോതി? ന ഹേവം വത്തബ്ബേ…പേ….

അത്ഥി മനുസ്സേസു സുരാമേരയമജ്ജപമാദട്ഠാനാ വേരമണി, അത്ഥി തത്ഥ സുരാമേരയമജ്ജപമാദട്ഠാനന്തി? ആമന്താ. അത്ഥി ദേവേസു സുരാമേരയമജ്ജപമാദട്ഠാനാ വേരമണി, അത്ഥി തത്ഥ സുരാമേരയമജ്ജപമാദട്ഠാനന്തി? ന ഹേവം വത്തബ്ബേ…പേ….

അത്ഥി ദേവേസു പാണാതിപാതാ വേരമണി, നത്ഥി തത്ഥ പാണാതിപാതോതി? ആമന്താ. അത്ഥി മനുസ്സേസു പാണാതിപാതാ വേരമണി, നത്ഥി തത്ഥ പാണാതിപാതോതി? ന ഹേവം വത്തബ്ബേ…പേ….

അത്ഥി ദേവേസു സുരാമേരയമജ്ജപമാദട്ഠാനാ വേരമണി, നത്ഥി തത്ഥ സുരാമേരയമജ്ജപമാദട്ഠാനന്തി? ആമന്താ. അത്ഥി മനുസ്സേസു സുരാമേരയമജ്ജപമാദട്ഠാനാ വേരമണി, നത്ഥി തത്ഥ സുരാമേരയമജ്ജപമാദട്ഠാനന്തി? ന ഹേവം വത്തബ്ബേ…പേ….

നത്ഥി ദേവേസു സംവരോതി? ആമന്താ. സബ്ബേ ദേവാ പാണാതിപാതിനോ അദിന്നാദായിനോ കാമേസുമിച്ഛാചാരിനോ മുസാവാദിനോ സുരാമേരയമജ്ജപമാദട്ഠായിനോതി? ന ഹേവം വത്തബ്ബേ…പേ… തേന ഹി അത്ഥി ദേവേസു സംവരോതി.

സംവരകഥാ നിട്ഠിതാ.