൨. ദുതിയവഗ്ഗോ

(൧൮) ൯. അനുപുബ്ബാഭിസമയകഥാ

൩൩൯. അനുപുബ്ബാഭിസമയോതി? ആമന്താ. അനുപുബ്ബേന സോതാപത്തിമഗ്ഗം ഭാവേതീതി? ന ഹേവം വത്തബ്ബേ. അനുപുബ്ബേന സോതാപത്തിമഗ്ഗം ഭാവേതീതി? ആമന്താ. അനുപുബ്ബേന സോതാപത്തിഫലം സച്ഛികരോതീതി? ന ഹേവം വത്തബ്ബേ.

അനുപുബ്ബാഭിസമയോതി? ആമന്താ. അനുപുബ്ബേന സകദാഗാമിമഗ്ഗം ഭാവേതീതി? ന ഹേവം വത്തബ്ബേ. അനുപുബ്ബേന സകദാഗാമിമഗ്ഗം ഭാവേതീതി? ആമന്താ. അനുപുബ്ബേന സകദാഗാമിഫലം സച്ഛികരോതീതി? ന ഹേവം വത്തബ്ബേ.

അനുപുബ്ബാഭിസമയോതി? ആമന്താ. അനുപുബ്ബേന അനാഗാമിമഗ്ഗം ഭാവേതീതി? ന ഹേവം വത്തബ്ബേ. അനുപുബ്ബേന അനാഗാമിമഗ്ഗം ഭാവേതീതി? ആമന്താ. അനുപുബ്ബേന അനാഗാമിഫലം സച്ഛികരോതീതി? ന ഹേവം വത്തബ്ബേ.

അനുപുബ്ബാഭിസമയോതി? ആമന്താ. അനുപുബ്ബേന അരഹത്തമഗ്ഗം ഭാവേതീതി? ന ഹേവം വത്തബ്ബേ. അനുപുബ്ബേന അരഹത്തമഗ്ഗം ഭാവേതീതി? ആമന്താ. അനുപുബ്ബേന അരഹത്തഫലം സച്ഛികരോതീതി? ന ഹേവം വത്തബ്ബേ.

൩൪൦. സോതാപത്തിഫലസച്ഛികിരിയായ പടിപന്നോ പുഗ്ഗലോ ദുക്ഖദസ്സനേന കിം ജഹതീതി? സക്കായദിട്ഠിം, വിചികിച്ഛം, സീലബ്ബതപരാമാസം, തദേകട്ഠേ ച കിലേസേ ചതുഭാഗം ജഹതീതി. ചതുഭാഗം സോതാപന്നോ, ചതുഭാഗം ന സോതാപന്നോ, ചതുഭാഗം സോതാപത്തിഫലപ്പത്തോ പടിലദ്ധോ അധിഗതോ സച്ഛികതോ ഉപസമ്പജ്ജ വിഹരതി, കായേന ഫുസിത്വാ വിഹരതി, ചതുഭാഗം ന കായേന ഫുസിത്വാ വിഹരതി, ചതുഭാഗം സത്തക്ഖത്തുപരമോ കോലങ്കോലോ ഏകബീജീ ബുദ്ധേ അവേച്ചപ്പസാദേന സമന്നാഗതോ, ധമ്മേ…പേ… സങ്ഘേ…പേ… അരിയകന്തേഹി സീലേഹി സമന്നാഗതോ ചതുഭാഗം ന അരിയകന്തേഹി സീലേഹി സമന്നാഗതോതി? ന ഹേവം വത്തബ്ബേ.

സമുദയദസ്സനേന…പേ… നിരോധദസ്സനേന…പേ… മഗ്ഗദസ്സനേന കിം ജഹതീതി? സക്കായദിട്ഠിം, വിചികിച്ഛം, സീലബ്ബതപരാമാസം, തദേകട്ഠേ ച കിലേസേ ചതുഭാഗം ജഹതീതി. ചതുഭാഗം സോതാപന്നോ, ചതുഭാഗം ന സോതാപന്നോ, ചതുഭാഗം സോതാപത്തിഫലപ്പത്തോ പടിലദ്ധോ അധിഗതോ സച്ഛികതോ ഉപസമ്പജ്ജ വിഹരതി, കായേന ഫുസിത്വാ വിഹരതി, ചതുഭാഗം ന കായേന ഫുസിത്വാ വിഹരതി, ചതുഭാഗം സത്തക്ഖത്തുപരമോ കോലങ്കോലോ ഏകബീജീ ബുദ്ധേ അവേച്ചപ്പസാദേന സമന്നാഗതോ, ധമ്മേ…പേ… സങ്ഘേ…പേ… അരിയകന്തേഹി സീലേഹി സമന്നാഗതോ, ചതുഭാഗം ന അരിയകന്തേഹി സീലേഹി സമന്നാഗതോതി? ന ഹേവം വത്തബ്ബേ…പേ….

൩൪൧. സകദാഗാമിഫലസച്ഛികിരിയായ പടിപന്നോ പുഗ്ഗലോ ദുക്ഖദസ്സനേന കിം ജഹതീതി? ഓളാരികം കാമരാഗം, ഓളാരികം ബ്യാപാദം, തദേകട്ഠേ ച കിലേസേ ചതുഭാഗം ജഹതീതി. ചതുഭാഗം സകദാഗാമീ, ചതുഭാഗം ന സകദാഗാമീ, ചതുഭാഗം സകദാഗാമിഫലപ്പത്തോ പടിലദ്ധോ അധിഗതോ സച്ഛികതോ ഉപസമ്പജ്ജ വിഹരതി, കായേന ഫുസിത്വാ വിഹരതി, ചതുഭാഗം ന കായേന ഫുസിത്വാ വിഹരതീതി? ന ഹേവം വത്തബ്ബേ…പേ… സമുദയദസ്സനേന…പേ… നിരോധദസ്സനേന…പേ… മഗ്ഗദസ്സനേന കിം ജഹതീതി? ഓളാരികം കാമരാഗം, ഓളാരികം ബ്യാപാദം, തദേകട്ഠേ ച കിലേസേ ചതുഭാഗം ജഹതീതി. ചതുഭാഗം സകദാഗാമീ, ചതുഭാഗം ന സകദാഗാമീ, ചതുഭാഗം സകദാഗാമിഫലപ്പത്തോ പടിലദ്ധോ അധിഗതോ സച്ഛികതോ ഉപസമ്പജ്ജ വിഹരതി, കായേന ഫുസിത്വാ വിഹരതി, ചതുഭാഗം ന കായേന ഫുസിത്വാ വിഹരതീതി? ന ഹേവം വത്തബ്ബേ…പേ….

൩൪൨. അനാഗാമിഫലസച്ഛികിരിയായ പടിപന്നോ പുഗ്ഗലോ ദുക്ഖദസ്സനേന കിം ജഹതീതി? അണുസഹഗതം കാമരാഗം, അണുസഹഗതം ബ്യാപാദം, തദേകട്ഠേ ച കിലേസേ ചതുഭാഗം ജഹതീതി. ചതുഭാഗം അനാഗാമീ, ചതുഭാഗം ന അനാഗാമീ, ചതുഭാഗം അനാഗാമിഫലപ്പത്തോ പടിലദ്ധോ അധിഗതോ സച്ഛികതോ ഉപസമ്പജ്ജ വിഹരതി, കായേന ഫുസിത്വാ വിഹരതി, ചതുഭാഗം ന കായേന ഫുസിത്വാ വിഹരതി, ചതുഭാഗം അന്തരാപരിനിബ്ബായീ…പേ… ഉപഹച്ചപരിനിബ്ബായീ… അസങ്ഖാരപരിനിബ്ബായീ… സസങ്ഖാരപരിനിബ്ബായീ… ഉദ്ധംസോതോ അകനിട്ഠഗാമീ, ചതുഭാഗം ന ഉദ്ധംസോതോ ന അകനിട്ഠഗാമീതി? ന ഹേവം വത്തബ്ബേ…പേ….

സമുദയദസ്സനേന…പേ… നിരോധദസ്സനേന…പേ… മഗ്ഗദസ്സനേന കിം ജഹതീതി? അണുസഹഗതം കാമരാഗം, അണുസഹഗതം ബ്യാപാദം, തദേകട്ഠേ ച കിലേസേ ചതുഭാഗം ജഹതീതി. ചതുഭാഗം അനാഗാമീ, ചതുഭാഗം ന അനാഗാമീ, ചതുഭാഗം അനാഗാമിഫലപ്പത്തോ പടിലദ്ധോ അധിഗതോ സച്ഛികതോ ഉപസമ്പജ്ജ വിഹരതി, കായേന ഫുസിത്വാ വിഹരതി, ചതുഭാഗം ന കായേന ഫുസിത്വാ വിഹരതി, ചതുഭാഗം അന്തരാപരിനിബ്ബായീ…പേ… ഉപഹച്ചപരിനിബ്ബായീ… അസങ്ഖാരപരിനിബ്ബായീ… സസങ്ഖാരപരിനിബ്ബായീ… ഉദ്ധംസോതോ അകനിട്ഠഗാമീ, ചതുഭാഗം ന ഉദ്ധംസോതോ അകനിട്ഠഗാമീതി? ന ഹേവം വത്തബ്ബേ…പേ….

൩൪൩. അരഹത്തസച്ഛികിരിയായ പടിപന്നോ പുഗ്ഗലോ ദുക്ഖദസ്സനേന കിം ജഹതീതി? രൂപരാഗം, അരൂപരാഗം, മാനം, ഉദ്ധച്ചം, അവിജ്ജം, തദേകട്ഠേ ച കിലേസേ ചതുഭാഗം ജഹതീതി. ചതുഭാഗം അരഹാ, ചതുഭാഗം ന അരഹാ, ചതുഭാഗം അരഹത്തപ്പത്തോ പടിലദ്ധോ അധിഗതോ സച്ഛികതോ ഉപസമ്പജ്ജ വിഹരതി, കായേന ഫുസിത്വാ വിഹരതി, ചതുഭാഗം ന കായേന ഫുസിത്വാ വിഹരതി, ചതുഭാഗം വീതരാഗോ…പേ… വീതദോസോ… വീതമോഹോ…പേ… കതകരണീയോ ഓഹിതഭാരോ അനുപ്പത്തസദത്ഥോ പരിക്ഖീണഭവസംയോജനോ സമ്മദഞ്ഞാവിമുത്തോ ഉക്ഖിത്തപലിഘോ സങ്കിണ്ണപരിഖോ അബ്ബൂള്ഹേസികോ നിരഗ്ഗളോ അരിയോ പന്നദ്ധജോ പന്നഭാരോ വിസഞ്ഞുത്തോ സുവിജിതവിജയോ, ദുക്ഖം തസ്സ പരിഞ്ഞാതം, സമുദയോ പഹീനോ, നിരോധോ സച്ഛികതോ, മഗ്ഗോ ഭാവിതോ, അഭിഞ്ഞേയ്യം അഭിഞ്ഞാതം, പരിഞ്ഞേയ്യം പരിഞ്ഞാതം, പഹാതബ്ബം പഹീനം, ഭാവേതബ്ബം ഭാവിതം…പേ… സച്ഛികാതബ്ബം സച്ഛികതം, ചതുഭാഗം സച്ഛികാതബ്ബം ന സച്ഛികതന്തി? ന ഹേവം വത്തബ്ബേ…പേ….

സമുദയദസ്സനേന … നിരോധദസ്സനേന… മഗ്ഗദസ്സനേന കിം ജഹതീതി? രൂപരാഗം, അരൂപരാഗം, മാനം, ഉദ്ധച്ചം, അവിജ്ജം, തദേകട്ഠേ ച കിലേസേ ചതുഭാഗം ജഹതീതി. ചതുഭാഗം അരഹാ, ചതുഭാഗം ന അരഹാ, ചതുഭാഗം അരഹത്തപ്പത്തോ പടിലദ്ധോ അധിഗതോ സച്ഛികതോ ഉപസമ്പജ്ജ വിഹരതി, കായേന ഫുസിത്വാ വിഹരതി, ചതുഭാഗം ന കായേന ഫുസിത്വാ വിഹരതി, ചതുഭാഗം വീതരാഗോ… വീതദോസോ… വീതമോഹോ… കതകരണീയോ ഓഹിതഭാരോ അനുപ്പത്തസദത്ഥോ പരിക്ഖീണഭവസംയോജനോ സമ്മദഞ്ഞാവിമുത്തോ ഉക്ഖിത്തപലിഘോ സങ്കിണ്ണപരിഖോ അബ്ബൂള്ഹേസികോ നിരഗ്ഗളോ അരിയോ പന്നദ്ധജോ പന്നഭാരോ വിസഞ്ഞുത്തോ സുവിജിതവിജയോ, ദുക്ഖം തസ്സ പരിഞ്ഞാതം, സമുദയോ പഹീനോ, നിരോധോ സച്ഛികതോ, മഗ്ഗോ ഭാവിതോ, അഭിഞ്ഞേയ്യം അഭിഞ്ഞാതം, പരിഞ്ഞേയ്യം പരിഞ്ഞാതം, പഹാതബ്ബം പഹീനം, ഭാവേതബ്ബം ഭാവിതം…പേ… സച്ഛികാതബ്ബം സച്ഛികതം, ചതുഭാഗം സച്ഛികാതബ്ബം ന സച്ഛികതന്തി? ന ഹേവം വത്തബ്ബേ…പേ….

൩൪൪. സോതാപത്തിഫലസച്ഛികിരിയായ പടിപന്നോ പുഗ്ഗലോ ദുക്ഖം ദക്ഖന്തോ പടിപന്നകോതി വത്തബ്ബോതി? ആമന്താ. ദുക്ഖേ ദിട്ഠേ ഫലേ ഠിതോതി വത്തബ്ബോതി? ന ഹേവം വത്തബ്ബേ. സമുദയം ദക്ഖന്തോ…പേ… നിരോധം ദക്ഖന്തോ പടിപന്നകോതി വത്തബ്ബോതി? ആമന്താ. നിരോധേ ദിട്ഠേ ഫലേ ഠിതോതി വത്തബ്ബോതി? ന ഹേവം വത്തബ്ബേ.

സോതാപത്തിഫലസച്ഛികിരിയായ പടിപന്നോ പുഗ്ഗലോ മഗ്ഗം ദക്ഖന്തോ പടിപന്നകോതി വത്തബ്ബോ, മഗ്ഗേ ദിട്ഠേ ഫലേ ഠിതോതി വത്തബ്ബോതി? ആമന്താ. ദുക്ഖം ദക്ഖന്തോ പടിപന്നകോതി വത്തബ്ബോ, ദുക്ഖേ ദിട്ഠേ ഫലേ ഠിതോതി വത്തബ്ബോതി? ന ഹേവം വത്തബ്ബേ…പേ… മഗ്ഗം ദക്ഖന്തോ പടിപന്നകോതി വത്തബ്ബോ, മഗ്ഗേ ദിട്ഠേ ഫലേ ഠിതോതി വത്തബ്ബോതി? ആമന്താ. സമുദയം ദക്ഖന്തോ…പേ… നിരോധം ദക്ഖന്തോ പടിപന്നകോതി വത്തബ്ബോ, നിരോധേ ദിട്ഠേ ഫലേ ഠിതോതി വത്തബ്ബോതി? ന ഹേവം വത്തബ്ബേ…പേ….

സോതാപത്തിഫലസച്ഛികിരിയായ പടിപന്നോ പുഗ്ഗലോ ദുക്ഖം ദക്ഖന്തോ പടിപന്നകോതി വത്തബ്ബോ, ദുക്ഖേ ദിട്ഠേ ന വത്തബ്ബം – ‘‘ഫലേ ഠിതോതി വത്തബ്ബോ’’തി? ആമന്താ. മഗ്ഗം ദക്ഖന്തോ പടിപന്നകോതി വത്തബ്ബോ, മഗ്ഗേ ദിട്ഠേ ന വത്തബ്ബം – ‘‘ഫലേ ഠിതോതി വത്തബ്ബോ’’തി? ന ഹേവം വത്തബ്ബേ…പേ… സമുദയം ദക്ഖന്തോ… നിരോധം ദക്ഖന്തോ പടിപന്നകോതി വത്തബ്ബോ, നിരോധേ ദിട്ഠേ ന വത്തബ്ബം – ‘‘ഫലേ ഠിതോതി വത്തബ്ബോ’’തി? ആമന്താ. മഗ്ഗം ദക്ഖന്തോ ‘‘പടിപന്നകോ’’തി വത്തബ്ബോ, മഗ്ഗേ ദിട്ഠേ ന വത്തബ്ബം – ‘‘ഫലേ ഠിതോതി വത്തബ്ബോ’’തി? ന ഹേവം വത്തബ്ബേ…പേ….

[സകവാദീപുച്ഛാലക്ഖണം] സോതാപത്തിഫലസച്ഛികിരിയായ പടിപന്നോ പുഗ്ഗലോ ദുക്ഖം ദക്ഖന്തോ പടിപന്നകോതി വത്തബ്ബോ, ദുക്ഖേ ദിട്ഠേ ന വത്തബ്ബം – ‘‘ഫലേ ഠിതോതി വത്തബ്ബോ’’തി? ആമന്താ. നിരത്ഥിയം ദുക്ഖദസ്സനന്തി? ന ഹേവം വത്തബ്ബേ…പേ… സമുദയം ദക്ഖന്തോ…പേ… നിരോധം ദക്ഖന്തോ പടിപന്നകോതി വത്തബ്ബോ, നിരോധേ ദിട്ഠേ ന വത്തബ്ബം – ‘‘ഫലേ ഠിതോതി വത്തബ്ബോ’’തി? ആമന്താ. നിരത്ഥിയം നിരോധദസ്സനന്തി? ന ഹേവം വത്തബ്ബേ…പേ….

൩൪൫. [പരവാദീപുച്ഛാലക്ഖണം] ദുക്ഖേ ദിട്ഠേ ചത്താരി സച്ചാനി ദിട്ഠാനി ഹോന്തീതി? ആമന്താ. ദുക്ഖസച്ചം ചത്താരി സച്ചാനീതി? ന ഹേവം വത്തബ്ബേ…പേ….

[സകവാദീപുച്ഛാലക്ഖണം] രൂപക്ഖന്ധേ അനിച്ചതോ ദിട്ഠേ പഞ്ചക്ഖന്ധാ അനിച്ചതോ ദിട്ഠാ ഹോന്തീതി? ആമന്താ. രൂപക്ഖന്ധോ പഞ്ചക്ഖന്ധാതി? ന ഹേവം വത്തബ്ബേ…പേ….

[സകവാദീപുച്ഛാലക്ഖണം] ചക്ഖായതനേ അനിച്ചതോ ദിട്ഠേ ദ്വാദസായതനാനി അനിച്ചതോ ദിട്ഠാനി ഹോന്തീതി? ആമന്താ. ചക്ഖായതനം ദ്വാദസായതനാനീതി? ന ഹേവം വത്തബ്ബേ…പേ….

[സകവാദീപുച്ഛാലക്ഖണം] ചക്ഖുധാതുയാ അനിച്ചതോ ദിട്ഠായ അട്ഠാരസ ധാതുയോ അനിച്ചതോ ദിട്ഠാ ഹോന്തീതി? ആമന്താ. ചക്ഖുധാതു അട്ഠാരസ ധാതുയോതി? ന ഹേവം വത്തബ്ബേ…പേ….

[സകവാദീപുച്ഛാലക്ഖണം] ചക്ഖുന്ദ്രിയേ അനിച്ചതോ ദിട്ഠേ ബാവീസതിന്ദ്രിയാനി അനിച്ചതോ ദിട്ഠാനി ഹോന്തീതി? ആമന്താ. ചക്ഖുന്ദ്രിയം ബാവീസതിന്ദ്രിയാനീതി? ന ഹേവം വത്തബ്ബേ…പേ….

[സകവാദീപുച്ഛാലക്ഖണം] ചതൂഹി ഞാണേഹി സോതാപത്തിഫലം സച്ഛികരോതീതി? ആമന്താ. ചത്താരി സോതാപത്തിഫലാനീതി? ന ഹേവം വത്തബ്ബേ…പേ… അട്ഠഹി ഞാണേഹി സോതാപത്തിഫലം സച്ഛികരോതീതി? ആമന്താ. അട്ഠ സോതാപത്തിഫലാനീതി? ന ഹേവം വത്തബ്ബേ…പേ… ദ്വാദസഹി ഞാണേഹി സോതാപത്തിഫലം സച്ഛികരോതീതി? ആമന്താ. ദ്വാദസ സോതാപത്തിഫലാനീതി? ന ഹേവം വത്തബ്ബേ…പേ… ചതുചത്താരീസായ ഞാണേഹി സോതാപത്തിഫലം സച്ഛികരോതീതി? ആമന്താ. ചതുചത്താരീസം സോതാപത്തിഫലാനീതി? ന ഹേവം വത്തബ്ബേ…പേ… സത്തസത്തതിയാ ഞാണേഹി സോതാപത്തിഫലം സച്ഛികരോതീതി? ആമന്താ. സത്തസത്തതി സോതാപത്തിഫലാനീതി? ന ഹേവം വത്തബ്ബേ…പേ….

൩൪൬. ന വത്തബ്ബം – ‘‘അനുപുബ്ബാഭിസമയോ’’തി? ആമന്താ. നനു വുത്തം ഭഗവതാ – ‘‘സേയ്യഥാപി, ഭിക്ഖവേ, മഹാസമുദ്ദോ അനുപുബ്ബനിന്നോ അനുപുബ്ബപോണോ അനുപുബ്ബപബ്ഭാരോ, ന ആയതകേനേവ പപാതോ; ഏവമേവ ഖോ, ഭിക്ഖവേ, ഇമസ്മിം ധമ്മവിനയേ അനുപുബ്ബസിക്ഖാ അനുപുബ്ബകിരിയാ അനുപുബ്ബപടിപദാ, ന ആയതകേനേവ അഞ്ഞാപടിവേധോ’’തി [ചൂളവ. ൩൮൫; അ. നി. ൮.൨൦; ഉദാ. ൪൫ ഉദാനേ ച]. അത്ഥേവ സുത്തന്തോതി? ആമന്താ. തേന ഹി അനുപുബ്ബാഭിസമയോതി.

ന വത്തബ്ബം – ‘‘അനുപുബ്ബാഭിസമയോ’’തി? ആമന്താ. നനു വുത്തം ഭഗവതാ –

‘‘അനുപുബ്ബേന മേധാവീ, ഥോകം ഥോകം ഖണേ ഖണേ;

കമ്മാരോ രജതസ്സേവ, നിദ്ധമേ മലമത്തനോ’’തി [ധ. പ. ൨൩൯ ധമ്മപദേ].

അത്ഥേവ സുത്തന്തോതി? ആമന്താ. തേന ഹി അനുപുബ്ബാഭിസമയോതി.

അനുപുബ്ബാഭിസമയോതി? ആമന്താ. നന്വായസ്മാ ഗവമ്പതി ഥേരോ ഭിക്ഖൂ ഏതദവോച – ‘‘സമ്മുഖാ മേതം, ആവുസോ, ഭഗവതോ സുതം സമ്മുഖാ പടിഗ്ഗഹിതം – ‘യോ, ഭിക്ഖവേ, ദുക്ഖം പസ്സതി ദുക്ഖസമുദയമ്പി സോ പസ്സതി, ദുക്ഖനിരോധമ്പി പസ്സതി, ദുക്ഖനിരോധഗാമിനിം പടിപദമ്പി പസ്സതി; യോ ദുക്ഖസമുദയം പസ്സതി ദുക്ഖമ്പി സോ പസ്സതി, ദുക്ഖനിരോധമ്പി പസ്സതി, ദുക്ഖനിരോധഗാമിനിം പടിപദമ്പി പസ്സതി; യോ ദുക്ഖനിരോധം പസ്സതി ദുക്ഖമ്പി സോ പസ്സതി, ദുക്ഖസമുദയമ്പി പസ്സതി, ദുക്ഖനിരോധഗാമിനിം പടിപദമ്പി പസ്സതി; യോ ദുക്ഖനിരോധഗാമിനിം പടിപദം പസ്സതി ദുക്ഖമ്പി സോ പസ്സതി, ദുക്ഖസമുദയമ്പി പസ്സതി, ദുക്ഖനിരോധമ്പി പസ്സതീ’’’തി [സം. നി. ൫.൧൧൦൦]! അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അനുപുബ്ബാഭിസമയോ’’തി.

അനുപുബ്ബാഭിസമയോതി? ആമന്താ. നനു വുത്തം ഭഗവതാ –

‘‘സഹാവസ്സ ദസ്സനസമ്പദായ,

തയസ്സു ധമ്മാ ജഹിതാ ഭവന്തി;

സക്കായദിട്ഠീ വിചികിച്ഛിതഞ്ച,

സീലബ്ബതം വാപി യദത്ഥി കിഞ്ചി;

ചതൂഹപായേഹി ച വിപ്പമുത്തോ,

ഛച്ചാഭിഠാനാനി അഭബ്ബ കാതു’’ന്തി.

അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അനുപുബ്ബാഭിസമയോ’’തി.

അനുപുബ്ബാഭിസമയോതി? ആമന്താ. നനു വുത്തം ഭഗവതാ – ‘‘യസ്മിം, ഭിക്ഖവേ, സമയേ അരിയസാവകസ്സ വിരജം വീതമലം ധമ്മചക്ഖും ഉദപാദി – ‘യം കിഞ്ചി സമുദയധമ്മം സബ്ബം തം നിരോധധമ്മ’ന്തി, സഹ ദസ്സനുപ്പാദാ, ഭിക്ഖവേ, അരിയസാവകസ്സ തീണി സംയോജനാനി പഹീയന്തി – സക്കായദിട്ഠി, വിചികിച്ഛാ, സീലബ്ബതപരാമാസോ’’തി! അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘അനുപുബ്ബാഭിസമയോ’’തി.

അനുപുബ്ബാഭിസമയകഥാ നിട്ഠിതാ.