രൂപവിഭത്തി
ഏകകനിദ്ദേസോ
൫൯൪. സബ്ബം രൂപം ന ഹേതുമേവ, അഹേതുകമേവ, ഹേതുവിപ്പയുത്തമേവ, സപ്പച്ചയമേവ, സങ്ഖതമേവ, രൂപമേവ, ലോകിയമേവ, സാസവമേവ, സംയോജനിയമേവ, ഗന്ഥനിയമേവ, ഓഘനിയമേവ, യോഗനിയമേവ, നീവരണിയമേവ, പരാമട്ഠമേവ, ഉപാദാനിയമേവ, സംകിലേസികമേവ, അബ്യാകതമേവ, അനാരമ്മണമേവ, അചേതസികമേവ, ചിത്തവിപ്പയുത്തമേവ, നേവവിപാകനവിപാകധമ്മധമ്മമേവ, അസംകിലിട്ഠസംകിലേസികമേവ, ന സവിതക്കസവിചാരമേവ, ന അവിതക്കവിചാരമത്തമേവ, അവിതക്കഅവിചാരമേവ, ന പീതിസഹഗതമേവ, ന സുഖസഹഗതമേവ, ന ഉപേക്ഖാസഹഗതമേവ, നേവ ദസ്സനേന ന ഭാവനായ പഹാതബ്ബമേവ, നേവ ദസ്സനേന ന ഭാവനായ പഹാതബ്ബഹേതുകമേവ, നേവ ആചയഗാമി ന അപചയഗാമിമേവ, നേവസേക്ഖനാസേക്ഖമേവ, പരിത്തമേവ, കാമാവചരമേവ, ന രൂപാവചരമേവ, ന അരൂപാവചരമേവ, പരിയാപന്നമേവ, നോ അപരിയാപന്നമേവ, അനിയതമേവ, അനിയ്യാനികമേവ, ഉപ്പന്നം ഛഹി വിഞ്ഞാണേഹി വിഞ്ഞേയ്യമേവ, അനിച്ചമേവ, ജരാഭിഭൂതമേവ.
ഏവം ഏകവിധേന രൂപസങ്ഗഹോ.
ഏകകനിദ്ദേസോ.
ദുകനിദ്ദേസോ
ഉപാദാഭാജനീയം
൫൯൫. കതമം തം രൂപം ഉപാദാ? ചക്ഖായതനം, സോതായതനം, ഘാനായതനം, ജിവ്ഹായതനം, കായായതനം, രൂപായതനം, സദ്ദായതനം, ഗന്ധായതനം, രസായതനം, ഇത്ഥിന്ദ്രിയം, പുരിസിന്ദ്രിയം, ജീവിതിന്ദ്രിയം, കായവിഞ്ഞത്തി, വചീവിഞ്ഞത്തി, ആകാസധാതു, രൂപസ്സ ലഹുതാ, രൂപസ്സ മുദുതാ, രൂപസ്സ കമ്മഞ്ഞതാ, രൂപസ്സ ഉപചയോ, രൂപസ്സ സന്തതി, രൂപസ്സ ജരതാ, രൂപസ്സ അനിച്ചതാ, കബളീകാരോ ആഹാരോ.
൫൯൬. കതമം തം രൂപം ചക്ഖായതനം? യം ചക്ഖു [ചക്ഖും (സീ. സ്യാ.)] ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യേന ചക്ഖുനാ അനിദസ്സനേന സപ്പടിഘേന രൂപം സനിദസ്സനം സപ്പടിഘം പസ്സി വാ പസ്സതി വാ പസ്സിസ്സതി വാ പസ്സേ വാ, ചക്ഖും പേതം ചക്ഖായതനം പേതം ചക്ഖുധാതു പേസാ ചക്ഖുന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം നേത്തം പേതം നയനം പേതം ഓരിമം തീരം പേതം സുഞ്ഞോ ഗാമോപേസോ – ഇദം തം രൂപം ചക്ഖായതനം.
൫൯൭. കതമം തം രൂപം ചക്ഖായതനം? യം ചക്ഖു ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യമ്ഹി ചക്ഖുമ്ഹി അനിദസ്സനമ്ഹി സപ്പടിഘമ്ഹി രൂപം സനിദസ്സനം സപ്പടിഘം പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, ചക്ഖും പേതം ചക്ഖായതനം പേതം ചക്ഖുധാതു പേസാ ചക്ഖുന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം നേത്തം പേതം നയനം പേതം ഓരിമം തീരം പേതം സുഞ്ഞോ ഗാമോ പേസോ – ഇദം തം രൂപം ചക്ഖായതനം.
൫൯൮. കതമം തം രൂപം ചക്ഖായതനം? യം ചക്ഖു ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യം ചക്ഖു അനിദസ്സനം സപ്പടിഘം രൂപമ്ഹി സനിദസ്സനമ്ഹി സപ്പടിഘമ്ഹി പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, ചക്ഖും പേതം ചക്ഖായതനം പേതം ചക്ഖുധാതു പേസാ ചക്ഖുന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം നേത്തം പേതം നയനം പേതം ഓരിമം തീരം പേതം സുഞ്ഞോ ഗാമോ പേസോ – ഇദം തം രൂപം ചക്ഖായതനം.
൫൯൯. കതമം തം രൂപം ചക്ഖായതനം? യം ചക്ഖു ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യം ചക്ഖും നിസ്സായ രൂപം ആരബ്ഭ ചക്ഖുസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം ചക്ഖും നിസ്സായ രൂപം ആരബ്ഭ ചക്ഖുസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… ചക്ഖുവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം ചക്ഖും നിസ്സായ രൂപാരമ്മണോ ചക്ഖുസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം ചക്ഖും നിസ്സായ രൂപാരമ്മണാ ചക്ഖുസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… ചക്ഖുവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ, ചക്ഖും പേതം ചക്ഖായതനം പേതം ചക്ഖുധാതു പേസാ ചക്ഖുന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം നേത്തം പേതം നയനം പേതം ഓരിമം തീരം പേതം സുഞ്ഞോ ഗാമോ പേസോ – ഇദം തം രൂപം ചക്ഖായതനം.
൬൦൦. കതമം തം രൂപം സോതായതനം? യം സോതം ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യേന സോതേന അനിദസ്സനേന സപ്പടിഘേന സദ്ദം അനിദസ്സനം സപ്പടിഘം സുണി വാ സുണാതി വാ സുണിസ്സതി വാ സുണേ വാ, സോതം പേതം സോതായതനം പേതം സോതധാതു പേസാ സോതിന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം ഓരിമം തീരം പേതം സുഞ്ഞോ ഗാമോ പേസോ – ഇദം തം രൂപം സോതായതനം.
൬൦൧. കതമം തം രൂപം സോതായതനം? യം സോതം ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യമ്ഹി സോതമ്ഹി അനിദസ്സനമ്ഹി സപ്പടിഘമ്ഹി സദ്ദോ അനിദസ്സനോ സപ്പടിഘോ പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, സോതം പേതം സോതായതനം പേതം സോതധാതു പേസാ സോതിന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം ഓരിമം തീരം പേതം സുഞ്ഞോ ഗാമോ പേസോ – ഇദം തം രൂപം സോതായതനം.
൬൦൨. കതമം തം രൂപം സോതായതനം? യം സോതം ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യം സോതം അനിദസ്സനം സപ്പടിഘം സദ്ദമ്ഹി അനിദസ്സനമ്ഹി സപ്പടിഘമ്ഹി പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, സോതം പേതം സോതായതനം പേതം സോതധാതു പേസാ സോതിന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം ഓരിമം തീരം പേതം സുഞ്ഞോ ഗാമോ പേസോ – ഇദം തം രൂപം സോതായതനം.
൬൦൩. കതമം തം രൂപം സോതായതനം? യം സോതം ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യം സോതം നിസ്സായ സദ്ദം ആരബ്ഭ സോതസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം സോതം നിസ്സായ സദ്ദം ആരബ്ഭ സോതസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… സോതവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം സോതം നിസ്സായ സദ്ദാരമ്മണോ സോതസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം സോതം നിസ്സായ സദ്ദാരമ്മണാ സോതസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… സോതവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ, സോതം പേതം സോതായതനം പേതം സോതധാതു പേസാ സോതിന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം ഓരിമം തീരം പേതം സുഞ്ഞോ ഗാമോ പേസോ – ഇദം തം രൂപം സോതായതനം.
൬൦൪. കതമം തം രൂപം ഘാനായതനം? യം ഘാനം ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യേന ഘാനേന അനിദസ്സനേന സപ്പടിഘേന ഗന്ധം അനിദസ്സനം സപ്പടിഘം ഘായി വാ ഘായതി വാ ഘായിസ്സതി വാ ഘായേ വാ, ഘാനം പേതം ഘാനായതനം പേതം ഘാനധാതു പേസാ ഘാനിന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം ഓരിമം തീരം പേതം സുഞ്ഞോ ഗാമോ പേസോ – ഇദം തം രൂപം ഘാനായതനം.
൬൦൫. കതമം തം രൂപം ഘാനായതനം? യം ഘാനം ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യമ്ഹി ഘാനമ്ഹി അനിദസ്സനമ്ഹി സപ്പടിഘമ്ഹി ഗന്ധോ അനിദസ്സനോ സപ്പടിഘോ പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, ഘാനം പേതം ഘാനായതനം പേതം ഘാനധാതു പേസാ ഘാനിന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം ഓരിമം തീരം പേതം സുഞ്ഞോ ഗാമോ പേസോ – ഇദം തം രൂപം ഘാനായതനം.
൬൦൬. കതമം തം രൂപം ഘാനായതനം? യം ഘാനം ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യം ഘാനം അനിദസ്സനം സപ്പടിഘം ഗന്ധമ്ഹി അനിദസ്സനമ്ഹി സപ്പടിഘമ്ഹി പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, ഘാനം പേതം ഘാനായതനം പേതം ഘാനധാതു പേസാ ഘാനിന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം ഓരിമം തീരം പേതം സുഞ്ഞോ ഗാമോപേസോ – ഇദം തം രൂപം ഘാനായതനം.
൬൦൭. കതമം തം രൂപം ഘാനായതനം? യം ഘാനം ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യം ഘാനം നിസ്സായ ഗന്ധം ആരബ്ഭ ഘാനസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം ഘാനം നിസ്സായ ഗന്ധം ആരബ്ഭ ഘാനസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… ഘാനവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം ഘാനം നിസ്സായ ഗന്ധാരമ്മണോ ഘാനസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം ഘാനം നിസ്സായ ഗന്ധാരമ്മണാ ഘാനസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… ഘാനവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ, ഘാനം പേതം ഘാനായതനം പേതം ഘാനധാതു പേസാ ഘാനിന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം ഓരിമം തീരം പേതം സുഞ്ഞോ ഗാമോ പേസോ – ഇദം തം രൂപം ഘാനായതനം.
൬൦൮. കതമം തം രൂപം ജിവ്ഹായതനം? യാ ജിവ്ഹാ ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യായ ജിവ്ഹായ അനിദസ്സനായ സപ്പടിഘായ രസം അനിദസ്സനം സപ്പടിഘം സായി വാ സായതി വാ സായിസ്സതി വാ സായേ വാ, ജിവ്ഹാ പേസാ ജിവ്ഹായതനം പേതം ജിവ്ഹാധാതു പേസാ ജിവ്ഹിന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം ഓരിമം തീരം പേതം സുഞ്ഞോ ഗാമോ പേസോ – ഇദം തം രൂപം ജിവ്ഹായതനം.
൬൦൯. കതമം തം രൂപം ജിവ്ഹായതനം? യാ ജിവ്ഹാ ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യായ ജിവ്ഹായ അനിദസ്സനായ സപ്പടിഘായ രസോ അനിദസ്സനോ സപ്പടിഘോ പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, ജിവ്ഹാ പേസാ ജിവ്ഹായതനം പേതം ജിവ്ഹാധാതു പേസാ ജിവ്ഹിന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം ഓരിമം തീരം പേതം സുഞ്ഞോ ഗാമോ പേസോ – ഇദം തം രൂപം ജിവ്ഹായതനം.
൬൧൦. കതമം തം രൂപം ജിവ്ഹായതനം? യാ ജിവ്ഹാ ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യാ ജിവ്ഹാ അനിദസ്സനാ സപ്പടിഘാ രസമ്ഹി അനിദസ്സനമ്ഹി സപ്പടിഘമ്ഹി പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, ജിവ്ഹാ പേസാ ജിവ്ഹായതനം പേതം ജിവ്ഹാധാതു പേസാ ജിവ്ഹിന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം ഓരിമം തീരം പേതം സുഞ്ഞോ ഗാമോ പേസോ – ഇദം തം രൂപം ജിവ്ഹായതനം.
൬൧൧. കതമം തം രൂപം ജിവ്ഹായതനം? യാ ജിവ്ഹാ ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യം ജിവ്ഹം നിസ്സായ രസം ആരബ്ഭ ജിവ്ഹാസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം ജിവ്ഹം നിസ്സായ രസം ആരബ്ഭ ജിവ്ഹാസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… ജിവ്ഹാവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം ജിവ്ഹം നിസ്സായ രസാരമ്മണോ ജിവ്ഹാസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം ജിവ്ഹം നിസ്സായ രസാരമ്മണാ ജിവ്ഹാസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… ജിവ്ഹാവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ, ജിവ്ഹാ പേസാ ജിവ്ഹായതനം പേതം ജിവ്ഹാധാതു പേസാ ജിവ്ഹിന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം ഓരിമം തീരം പേതം സുഞ്ഞോ ഗാമോ പേസോ – ഇദം തം രൂപം ജിവ്ഹായതനം.
൬൧൨. കതമം തം രൂപം കായായതനം? യോ കായോ ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യേന കായേന അനിദസ്സനേന സപ്പടിഘേന ഫോട്ഠബ്ബം അനിദസ്സനസപ്പടിഘം ഫുസി വാ ഫുസതി വാ ഫുസിസ്സതി വാ ഫുസേ വാ, കായോ പേസോ കായായതനം പേതം കായധാതു പേസാ കായിന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം ഓരിമം തീരം പേതം സുഞ്ഞോ ഗാമോ പേസോ – ഇദം തം രൂപം കായായതനം.
൬൧൩. കതമം തം രൂപം കായായതനം? യോ കായോ ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യമ്ഹി കായമ്ഹി അനിദസ്സനമ്ഹി സപ്പടിഘമ്ഹി ഫോട്ഠബ്ബോ അനിദസ്സനോ സപ്പടിഘോ പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, കായോ പേസോ കായായതനം പേതം കായധാതു പേസാ കായിന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം ഓരിമം തീരം പേതം സുഞ്ഞോ ഗാമോ പേസോ – ഇദം തം രൂപം കായായതനം.
൬൧൪. കതമം തം രൂപം കായായതനം? യോ കായോ ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യോ കായോ അനിദസ്സനോ സപ്പടിഘോ ഫോട്ഠബ്ബമ്ഹി അനിദസ്സനമ്ഹി സപ്പടിഘമ്ഹി പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, കായോ പേസോ കായായതനം പേതം കായധാതു പേസാ കായിന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം ഓരിമം തീരം പേതം സുഞ്ഞോ ഗാമോ പേസോ – ഇദം തം രൂപം കായായതനം.
൬൧൫. കതമം തം രൂപം കായായതനം? യോ കായോ ചതുന്നം മഹാഭൂതാനം ഉപാദായ പസാദോ അത്തഭാവപരിയാപന്നോ അനിദസ്സനോ സപ്പടിഘോ, യം കായം നിസ്സായ ഫോട്ഠബ്ബം ആരബ്ഭ കായസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം കായം നിസ്സായ ഫോട്ഠബ്ബം ആരബ്ഭ കായസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… കായവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം കായം നിസ്സായ ഫോട്ഠബ്ബാരമ്മണോ കായസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം കായം നിസ്സായ ഫോട്ഠബ്ബാരമ്മണാ കായസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… കായവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ, കായോ പേസോ കായായതനം പേതം കായധാതു പേസാ കായിന്ദ്രിയം പേതം ലോകോ പേസോ ദ്വാരാ പേസാ സമുദ്ദോ പേസോ പണ്ഡരം പേതം ഖേത്തം പേതം വത്ഥും പേതം ഓരിമം തീരം പേതം സുഞ്ഞോ ഗാമോ പേസോ – ഇദം തം രൂപം കായായതനം.
൬൧൬. കതമം തം രൂപം രൂപായതനം? യം രൂപം ചതുന്നം മഹാഭൂതാനം ഉപാദായ വണ്ണനിഭാ സനിദസ്സനം സപ്പടിഘം നീലം പീതകം ലോഹിതകം ഓദാതം കാളകം മഞ്ജിട്ഠകം [മഞ്ജേട്ഠകം (സീ. സ്യാ.)] ഹരി ഹരിവണ്ണം അമ്ബങ്കുരവണ്ണം ദീഘം രസ്സം അണും ഥൂലം വട്ടം പരിമണ്ഡലം ചതുരംസം [ചതുരസ്സം (സീ. ക.)] ഛളംസം അട്ഠംസം സോളസംസം നിന്നം ഥലം ഛായാ ആതപോ ആലോകോ അന്ധകാരോ അബ്ഭാ മഹികാ ധൂമോ രജോ ചന്ദമണ്ഡലസ്സ വണ്ണനിഭാ സൂരിയമണ്ഡലസ്സ [സുരിയമണ്ഡലസ്സ (സീ. സ്യാ.)] വണ്ണനിഭാ താരകരൂപാനം വണ്ണനിഭാ ആദാസമണ്ഡലസ്സ വണ്ണനിഭാ മണിസങ്ഖമുത്താവേളുരിയസ്സ വണ്ണനിഭാ ജാതരൂപരജതസ്സ വണ്ണനിഭാ, യം വാ പനഞ്ഞമ്പി അത്ഥി രൂപം ചതുന്നം മഹാഭൂതാനം ഉപാദായ വണ്ണനിഭാ സനിദസ്സനം സപ്പടിഘം, യം രൂപം സനിദസ്സനം സപ്പടിഘം ചക്ഖുനാ അനിദസ്സനേന സപ്പടിഘേന പസ്സി വാ പസ്സതി വാ പസ്സിസ്സതി വാ പസ്സേ വാ, രൂപം പേതം രൂപായതനം പേതം രൂപധാതു പേസാ – ഇദം തം രൂപം രൂപായതനം.
൬൧൭. കതമം തം രൂപം രൂപായതനം? യം രൂപം ചതുന്നം മഹാഭൂതാനം ഉപാദായ വണ്ണനിഭാ സനിദസ്സനം സപ്പടിഘം നീലം പീതകം ലോഹിതകം ഓദാതം കാളകം മഞ്ജിട്ഠകം ഹരി ഹരിവണ്ണം അമ്ബങ്കുരവണ്ണം ദീഘം രസ്സം അണും ഥൂലം വട്ടം പരിമണ്ഡലം ചതുരംസം ഛളംസം അട്ഠംസം സോളസംസം നിന്നം ഥലം ഛായാ ആതപോ ആലോകോ അന്ധകാരോ അബ്ഭാ മഹികാ ധൂമോ രജോ ചന്ദമണ്ഡലസ്സ വണ്ണനിഭാ സൂരിയമണ്ഡലസ്സ വണ്ണനിഭാ താരകരൂപാനം വണ്ണനിഭാ ആദാസമണ്ഡലസ്സ വണ്ണനിഭാ മണിസങ്ഖമുത്താവേളുരിയസ്സ വണ്ണനിഭാ ജാതരൂപരജതസ്സ വണ്ണനിഭാ, യം വാ പനഞ്ഞമ്പി അത്ഥി രൂപം ചതുന്നം മഹാഭൂതാനം ഉപാദായ വണ്ണനിഭാ സനിദസ്സനം സപ്പടിഘം, യമ്ഹി രൂപമ്ഹി സനിദസ്സനമ്ഹി സപ്പടിഘമ്ഹി ചക്ഖും അനിദസ്സനം സപ്പടിഘം പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, രൂപം പേതം രൂപായതനം പേതം രൂപധാതു പേസാ – ഇദം തം രൂപം രൂപായതനം.
൬൧൮. കതമം തം രൂപം രൂപായതനം? യം രൂപം ചതുന്നം മഹാഭൂതാനം ഉപാദായ വണ്ണനിഭാ സനിദസ്സനം സപ്പടിഘം നീലം പീതകം ലോഹിതകം ഓദാതം കാളകം മഞ്ജിട്ഠകം ഹരി ഹരിവണ്ണം അമ്ബങ്കുരവണ്ണം ദീഘം രസ്സം അണും ഥൂലം വട്ടം പരിമണ്ഡലം ചതുരംസം ഛളംസം അട്ഠംസം സോളസംസം നിന്നം ഥലം ഛായാ ആതപോ ആലോകോ അന്ധകാരോ അബ്ഭാ മഹികാ ധൂമോ രജോ ചന്ദമണ്ഡലസ്സ വണ്ണനിഭാ സൂരിയമണ്ഡലസ്സ വണ്ണനിഭാ താരകരൂപാനം വണ്ണനിഭാ ആദാസമണ്ഡലസ്സ വണ്ണനിഭാ മണിസങ്ഖമുത്താവേളുരിയസ്സ വണ്ണനിഭാ ജാതരൂപരജതസ്സ വണ്ണനിഭാ, യം വാ പനഞ്ഞമ്പി അത്ഥി രൂപം ചതുന്നം മഹാഭൂതാനം ഉപാദായ വണ്ണനിഭാ സനിദസ്സനം സപ്പടിഘം, യം രൂപം സനിദസ്സനം സപ്പടിഘം ചക്ഖുമ്ഹി അനിദസ്സനമ്ഹി സപ്പടിഘമ്ഹി പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, രൂപം പേതം രൂപായതനം പേതം രൂപധാതു പേസാ – ഇദം തം രൂപം രൂപായതനം.
൬൧൯. കതമം തം രൂപം രൂപായതനം? യം രൂപം ചതുന്നം മഹാഭൂതാനം ഉപാദായ വണ്ണനിഭാ സനിദസ്സനം സപ്പടിഘം നീലം പീതകം ലോഹിതകം ഓദാതം കാളകം മഞ്ജിട്ഠകം ഹരി ഹരിവണ്ണം അമ്ബങ്കുരവണ്ണം ദീഘം രസ്സം അണും ഥൂലം വട്ടം പരിമണ്ഡലം ചതുരംസം ഛളംസം അട്ഠംസം സോളസംസം നിന്നം ഥലം ഛായാ ആതപോ ആലോകോ അന്ധകാരോ അബ്ഭാ മഹികാ ധൂമോ രജോ ചന്ദമണ്ഡലസ്സ വണ്ണനിഭാ സൂരിയമണ്ഡലസ്സ വണ്ണനിഭാ താരകരൂപാനം വണ്ണനിഭാ ആദാസമണ്ഡലസ്സ വണ്ണനിഭാ മണിസങ്ഖമുത്താവേളുരിയസ്സ വണ്ണനിഭാ ജാതരൂപരജതസ്സ വണ്ണനിഭാ, യം വാ പനഞ്ഞമ്പി അത്ഥി രൂപം ചതുന്നം മഹാഭൂതാനം ഉപാദായ വണ്ണനിഭാ സനിദസ്സനം സപ്പടിഘം, യം രൂപം ആരബ്ഭ ചക്ഖും നിസ്സായ ചക്ഖുസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം രൂപം ആരബ്ഭ ചക്ഖും നിസ്സായ ചക്ഖുസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… ചക്ഖുവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം രൂപാരമ്മണോ ചക്ഖും നിസ്സായ ചക്ഖുസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം രൂപാരമ്മണാ ചക്ഖും നിസ്സായ ചക്ഖുസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… ചക്ഖുവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ, രൂപം പേതം രൂപായതനം പേതം രൂപധാതു പേസാ – ഇദം തം രൂപം രൂപായതനം.
൬൨൦. കതമം തം രൂപം സദ്ദായതനം? യോ സദ്ദോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ ഭേരിസദ്ദോ മുദിങ്ഗസദ്ദോ സങ്ഖസദ്ദോ പണവസദ്ദോ ഗീതസദ്ദോ വാദിതസദ്ദോ സമ്മസദ്ദോ പാണിസദ്ദോ സത്താനം നിഗ്ഘോസസദ്ദോ ധാതൂനം സന്നിഘാതസദ്ദോ വാതസദ്ദോ ഉദകസദ്ദോ മനുസ്സസദ്ദോ അമനുസ്സസദ്ദോ, യോ വാ പനഞ്ഞോപി അത്ഥി സദ്ദോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ, യം സദ്ദം അനിദസ്സനം സപ്പടിഘം സോതേന അനിദസ്സനേന സപ്പടിഘേന സുണി വാ സുണാതി വാ സുണിസ്സതി വാ സുണേ വാ, സദ്ദോ പേസോ സദ്ദായതനം പേതം സദ്ദധാതു പേസാ – ഇദം തം രൂപം സദ്ദായതനം.
൬൨൧. കതമം തം രൂപം സദ്ദായതനം? യോ സദ്ദോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ ഭേരിസദ്ദോ മുദിങ്ഗസദ്ദോ സങ്ഖസദ്ദോ പണവസദ്ദോ ഗീതസദ്ദോ വാദിതസദ്ദോ സമ്മസദ്ദോ പാണിസദ്ദോ സത്താനം നിഗ്ഘോസസദ്ദോ ധാതൂനം സന്നിഘാതസദ്ദോ വാതസദ്ദോ ഉദകസദ്ദോ മനുസ്സസദ്ദോ അമനുസ്സസദ്ദോ, യോ വാ പനഞ്ഞോപി അത്ഥി സദ്ദോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ, യമ്ഹി സദ്ദമ്ഹി അനിദസ്സനമ്ഹി സപ്പടിഘമ്ഹി സോതം അനിദസ്സനം സപ്പടിഘം പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, സദ്ദോ പേസോ സദ്ദായതനം പേതം സദ്ദധാതു പേസാ – ഇദം തം രൂപം സദ്ദായതനം.
൬൨൨. കതമം തം രൂപം സദ്ദായതനം? യോ സദ്ദോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ ഭേരിസദ്ദോ മുദിങ്ഗസദ്ദോ സങ്ഖസദ്ദോ പണവസദ്ദോ ഗീതസദ്ദോ വാദിതസദ്ദോ സമ്മസദ്ദോ പാണിസദ്ദോ സത്താനം നിഗ്ഘോസസദ്ദോ ധാതൂനം സന്നിഘാതസദ്ദോ വാതസദ്ദോ ഉദകസദ്ദോ മനുസ്സസദ്ദോ അമനുസ്സസദ്ദോ, യോ വാ പനഞ്ഞോപി അത്ഥി സദ്ദോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ, യോ സദ്ദോ അനിദസ്സനോ സപ്പടിഘോ സോതമ്ഹി അനിദസ്സനമ്ഹി സപ്പടിഘമ്ഹി പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, സദ്ദോ പേസോ സദ്ദായതനം പേതം സദ്ദധാതു പേസാ – ഇദം തം രൂപം സദ്ദായതനം.
൬൨൩. കതമം തം രൂപം സദ്ദായതനം? യോ സദ്ദോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ ഭേരിസദ്ദോ മുദിങ്ഗസദ്ദോ സങ്ഖസദ്ദോ പണവസദ്ദോ ഗീതസദ്ദോ വാദിതസദ്ദോ സമ്മസദ്ദോ പാണിസദ്ദോ സത്താനം നിഗ്ഘോസസദ്ദോ ധാതൂനം സന്നിഘാതസദ്ദോ വാതസദ്ദോ ഉദകസദ്ദോ മനുസ്സസദ്ദോ അമനുസ്സസദ്ദോ, യോ വാ പനഞ്ഞോപി അത്ഥി സദ്ദോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ, യം സദ്ദം ആരബ്ഭ സോതം നിസ്സായ സോതസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം സദ്ദം ആരബ്ഭ സോതം നിസ്സായ സോതസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… സോതവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം സദ്ദാരമ്മണോ സോതം നിസ്സായ സോതസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം സദ്ദാരമ്മണാ സോതം നിസ്സായ സോതസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… സോതവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ, സദ്ദോ പേസോ സദ്ദായതനം പേതം സദ്ദധാതു പേസാ – ഇദം തം രൂപം സദ്ദായതനം.
൬൨൪. കതമം തം രൂപം ഗന്ധായതനം? യോ ഗന്ധോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ മൂലഗന്ധോ സാരഗന്ധോ തചഗന്ധോ പത്തഗന്ധോ പുപ്ഫഗന്ധോ ഫലഗന്ധോ ആമകഗന്ധോ വിസ്സഗന്ധോ സുഗന്ധോ ദുഗ്ഗന്ധോ, യോ വാ പനഞ്ഞോപി അത്ഥി ഗന്ധോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ, യം ഗന്ധം അനിദസ്സനം സപ്പടിഘം ഘാനേന അനിദസ്സനേന സപ്പടിഘേന ഘായി വാ ഘായതി വാ ഘായിസ്സതി വാ ഘായേ വാ, ഗന്ധോ പേസോ ഗന്ധായതനം പേതം ഗന്ധധാതു പേസാ – ഇദം തം രൂപം ഗന്ധായതനം.
൬൨൫. കതമം തം രൂപം ഗന്ധായതനം? യോ ഗന്ധോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ മൂലഗന്ധോ സാരഗന്ധോ തചഗന്ധോ പത്തഗന്ധോ പുപ്ഫഗന്ധോ ഫലഗന്ധോ ആമകഗന്ധോ വിസ്സഗന്ധോ സുഗന്ധോ ദുഗ്ഗന്ധോ, യോ വാ പനഞ്ഞോപി അത്ഥി ഗന്ധോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ, യമ്ഹി ഗന്ധമ്ഹി അനിദസ്സനമ്ഹി സപ്പടിഘമ്ഹി ഘാനം അനിദസ്സനം സപ്പടിഘം പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, ഗന്ധോ പേസോ ഗന്ധായതനം പേതം ഗന്ധധാതു പേസാ – ഇദം തം രൂപം ഗന്ധായതനം.
൬൨൬. കതമം തം രൂപം ഗന്ധായതനം? യോ ഗന്ധോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ മൂലഗന്ധോ സാരഗന്ധോ തചഗന്ധോ പത്തഗന്ധോ പുപ്ഫഗന്ധോ ഫലഗന്ധോ ആമകഗന്ധോ വിസ്സഗന്ധോ സുഗന്ധോ ദുഗ്ഗന്ധോ, യോ വാ പനഞ്ഞോപി അത്ഥി ഗന്ധോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ, യോ ഗന്ധോ അനിദസ്സനോ സപ്പടിഘോ ഘാനമ്ഹി അനിദസ്സനമ്ഹി സപ്പടിഘമ്ഹി പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, ഗന്ധോ പേസോ ഗന്ധായതനം പേതം ഗന്ധധാതു പേസാ – ഇദം തം രൂപം ഗന്ധായതനം.
൬൨൭. കതമം തം രൂപം ഗന്ധായതനം? യോ ഗന്ധോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ മൂലഗന്ധോ സാരഗന്ധോ തചഗന്ധോ പത്തഗന്ധോ പുപ്ഫഗന്ധോ ഫലഗന്ധോ ആമകഗന്ധോ വിസ്സഗന്ധോ സുഗന്ധോ ദുഗ്ഗന്ധോ, യോ വാ പനഞ്ഞോപി അത്ഥി ഗന്ധോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ, യം ഗന്ധം ആരബ്ഭ ഘാനം നിസ്സായ ഘാനസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം ഗന്ധം ആരബ്ഭ ഘാനം നിസ്സായ ഘാനസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… ഘാനവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം ഗന്ധാരമ്മണോ ഘാനം നിസ്സായ ഘാനസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം ഗന്ധാരമ്മണാ ഘാനം നിസ്സായ ഘാനസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… ഘാനവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ, ഗന്ധോ പേസോ ഗന്ധായതനം പേതം ഗന്ധധാതു പേസാ – ഇദം തം രൂപം ഗന്ധായതനം.
൬൨൮. കതമം തം രൂപം രസായതനം? യോ രസോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ മൂലരസോ ഖന്ധരസോ തചരസോ പത്തരസോ പുപ്ഫരസോ ഫലരസോ അമ്ബിലം മധുരം തിത്തകം കടുകം ലോണികം ഖാരികം ലമ്ബിലം [ലപിലകം (സീ.)] കസാവോ സാദു അസാദു, യോ വാ പനഞ്ഞോപി അത്ഥി രസോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ, യം രസം അനിദസ്സനം സപ്പടിഘം ജിവ്ഹായ അനിദസ്സനായ സപ്പടിഘായ സായി വാ സായതി വാ സായിസ്സതി വാ സായേ വാ, രസോ പേസോ രസായതനം പേതം രസധാതു പേസാ – ഇദം തം രൂപം രസായതനം.
൬൨൯. കതമം തം രൂപം രസായതനം? യോ രസോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ മൂലരസോ ഖന്ധരസോ തചരസോ പത്തരസോ പുപ്ഫരസോ ഫലരസോ അമ്ബിലം മധുരം തിത്തകം കടുകം ലോണികം ഖാരികം ലമ്ബിലം കസാവോ സാദു അസാദു, യോ വാ പനഞ്ഞോപി അത്ഥി രസോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ, യമ്ഹി രസമ്ഹി അനിദസ്സനമ്ഹി സപ്പടിഘമ്ഹി ജിവ്ഹാ അനിദസ്സനാ സപ്പടിഘാ പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, രസോ പേസോ രസായതനം പേതം രസധാതു പേസാ – ഇദം തം രൂപം രസായതനം.
൬൩൦. കതമം തം രൂപം രസായതനം? യോ രസോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ മൂലരസോ ഖന്ധരസോ തചരസോ പത്തരസോ പുപ്ഫരസോ ഫലരസോ അമ്ബിലം മധുരം തിത്തകം കടുകം ലോണികം ഖാരികം ലമ്ബിലം കസാവോ സാദു അസാദു, യോ വാ പനഞ്ഞോപി അത്ഥി രസോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ, യോ രസോ അനിദസ്സനോ സപ്പടിഘോ ജിവ്ഹായ അനിദസ്സനായ സപ്പടിഘായ പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, രസോ പേസോ രസായതനം പേതം രസധാതു പേസാ – ഇദം തം രൂപം രസായതനം.
൬൩൧. കതമം തം രൂപം രസായതനം? യോ രസോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ മൂലരസോ ഖന്ധരസോ തചരസോ പത്തരസോ പുപ്ഫരസോ ഫലരസോ അമ്ബിലം മധുരം തിത്തകം കടുകം ലോണികം ഖാരികം ലമ്ബിലം കസാവോ സാദു അസാദു, യോ വാ പനഞ്ഞോപി അത്ഥി രസോ ചതുന്നം മഹാഭൂതാനം ഉപാദായ അനിദസ്സനോ സപ്പടിഘോ, യം രസം ആരബ്ഭ ജിവ്ഹം നിസ്സായ ജിവ്ഹാസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം രസം ആരബ്ഭ ജിവ്ഹം നിസ്സായ ജിവ്ഹാസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… ജിവ്ഹാവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം രസാരമ്മണോ ജിവ്ഹം നിസ്സായ ജിവ്ഹാസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം രസാരമ്മണാ ജിവ്ഹം നിസ്സായ ജിവ്ഹാസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… ജിവ്ഹാവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ, രസോ പേസോ രസായതനം പേതം രസധാതു പേസാ – ഇദം തം രൂപം രസായതനം.
൬൩൨. കതമം തം രൂപം ഇത്ഥിന്ദ്രിയം? യം ഇത്ഥിയാ ഇത്ഥിലിങ്ഗം ഇത്ഥിനിമിത്തം ഇത്ഥികുത്തം ഇത്ഥാകപ്പോ ഇത്ഥത്തം ഇത്ഥിഭാവോ [ഇത്ഥിത്തം ഇത്ഥീഭാവോ (സ്യാ.)] – ഇദം തം രൂപം ഇത്ഥിന്ദ്രിയം.
൬൩൩. കതമം തം രൂപം പുരിസിന്ദ്രിയം? യം പുരിസസ്സ പുരിസലിങ്ഗം പുരിസനിമിത്തം പുരിസകുത്തം പുരിസാകപ്പോ പുരിസത്തം പുരിസഭാവോ – ഇദം തം രൂപം പുരിസിന്ദ്രിയം.
൬൩൪. കതമം തം രൂപം ജീവിതിന്ദ്രിയം? യോ തേസം രൂപീനം ധമ്മാനം ആയു ഠിതി യപനാ യാപനാ ഇരിയനാ വത്തനാ പാലനാ ജീവിതം ജീവിതിന്ദ്രിയം – ഇദം തം രൂപം ജീവിതിന്ദ്രിയം.
൬൩൫. കതമം തം രൂപം കായവിഞ്ഞത്തി? യാ കുസലചിത്തസ്സ വാ അകുസലചിത്തസ്സ വാ അബ്യാകതചിത്തസ്സ വാ അഭിക്കമന്തസ്സ വാ പടിക്കമന്തസ്സ വാ ആലോകേന്തസ്സ വാ വിലോകേന്തസ്സ വാ സമിഞ്ജേന്തസ്സ വാ പസാരേന്തസ്സ വാ കായസ്സ ഥമ്ഭനാ സന്ഥമ്ഭനാ സന്ഥമ്ഭിതത്തം വിഞ്ഞത്തി വിഞ്ഞാപനാ വിഞ്ഞാപിതത്തം – ഇദം തം രൂപം കായവിഞ്ഞത്തി.
൬൩൬. കതമം തം രൂപം വചീവിഞ്ഞത്തി? യാ കുസലചിത്തസ്സ വാ അകുസലചിത്തസ്സ വാ അബ്യാകതചിത്തസ്സ വാ വാചാ ഗിരാ ബ്യപ്പഥോ ഉദീരണം ഘോസോ ഘോസകമ്മം വാചാ വചീഭേദോ – അയം വുച്ചതി വാചാ. യാ തായ വാചായ വിഞ്ഞത്തി വിഞ്ഞാപനാ വിഞ്ഞാപിതത്തം – ഇദം തം രൂപം വചീവിഞ്ഞത്തി.
൬൩൭. കതമം തം രൂപം ആകാസധാതു? യോ ആകാസോ ആകാസഗതം അഘം അഘഗതം വിവരോ വിവരഗതം അസമ്ഫുട്ഠം ചതൂഹി മഹാഭൂതേഹി – ഇദം തം രൂപം ആകാസധാതു.
൬൩൮. കതമം തം രൂപം രൂപസ്സ ലഹുതാ? യാ രൂപസ്സ ലഹുതാ ലഹുപരിണാമതാ അദന്ധനതാ അവിത്ഥനതാ – ഇദം തം രൂപം രൂപസ്സ ലഹുതാ.
൬൩൯. കതമം തം രൂപം രൂപസ്സ മുദുതാ? യാ രൂപസ്സ മുദുതാ മദ്ദവതാ അകക്ഖളതാ അകഥിനതാ – ഇദം തം രൂപം രൂപസ്സ മുദുതാ.
൬൪൦. കതമം തം രൂപം രൂപസ്സ കമ്മഞ്ഞതാ? യാ രൂപസ്സ കമ്മഞ്ഞതാ കമ്മഞ്ഞത്തം കമ്മഞ്ഞഭാവോ – ഇദം തം രൂപം രൂപസ്സ കമ്മഞ്ഞതാ.
൬൪൧. കതമം തം രൂപം രൂപസ്സ ഉപചയോ? യോ ആയതനാനം ആചയോ, സോ രൂപസ്സ ഉപചയോ – ഇദം തം രൂപം രൂപസ്സ ഉപചയോ.
൬൪൨. കതമം തം രൂപം രൂപസ്സ സന്തതി? യോ രൂപസ്സ ഉപചയോ, സാ രൂപസ്സ സന്തതി – ഇദം തം രൂപം രൂപസ്സ സന്തതി.
൬൪൩. കതമം തം രൂപം രൂപസ്സ ജരതാ? യാ രൂപസ്സ ജരാ ജീരണതാ ഖണ്ഡിച്ചം പാലിച്ചം വലിത്തചതാ ആയുനോ സംഹാനി ഇന്ദ്രിയാനം പരിപാകോ – ഇദം തം രൂപം രൂപസ്സ ജരതാ.
൬൪൪. കതമം തം രൂപം രൂപസ്സ അനിച്ചതാ? യോ രൂപസ്സ ഖയോ വയോ ഭേദോ പരിഭേദോ അനിച്ചതാ അന്തരധാനം – ഇദം തം രൂപം രൂപസ്സ അനിച്ചതാ.
൬൪൫. കതമം തം രൂപം കബളീകാരോ ആഹാരോ? ഓദനോ കുമ്മാസോ സത്തു മച്ഛോ മംസം ഖീരം ദധി സപ്പി നവനീതം തേലം മധു ഫാണിതം, യം വാ പനഞ്ഞമ്പി അത്ഥി രൂപം യമ്ഹി യമ്ഹി ജനപദേ തേസം തേസം സത്താനം മുഖാസിയം ദന്തവിഖാദനം ഗലജ്ഝോഹരണീയം കുച്ഛിവിത്ഥമ്ഭനം, യായ ഓജായ സത്താ യാപേന്തി – ഇദം തം രൂപം കബളീകാരോ ആഹാരോ.
ഇദം തം രൂപം ഉപാദാ.
ഉപാദാഭാജനീയം.
രൂപകണ്ഡേ പഠമഭാണവാരോ.
൬൪൬. കതമം തം രൂപം നോ ഉപാദാ? ഫോട്ഠബ്ബായതനം, ആപോധാതു.
൬൪൭. കതമം തം രൂപം ഫോട്ഠബ്ബായതനം? പഥവീധാതു തേജോധാതു വായോധാതു കക്ഖളം മുദുകം സണ്ഹം ഫരുസം സുഖസമ്ഫസ്സം ദുക്ഖസമ്ഫസ്സം ഗരുകം ലഹുകം, യം ഫോട്ഠബ്ബം അനിദസ്സനം സപ്പടിഘം കായേന അനിദസ്സനേന സപ്പടിഘേന ഫുസി വാ ഫുസതി വാ ഫുസിസ്സതി വാ ഫുസേ വാ ഫോട്ഠബ്ബോ പേസോ ഫോട്ഠബ്ബായതനം പേതം ഫോട്ഠബ്ബധാതു പേസാ – ഇദം തം രൂപം ഫോട്ഠബ്ബായതനം.
൬൪൮. കതമം തം രൂപം ഫോട്ഠബ്ബായതനം? പഥവീധാതു തേജോധാതു വായോധാതു കക്ഖളം മുദുകം സണ്ഹം ഫരുസം സുഖസമ്ഫസ്സം ദുക്ഖസമ്ഫസ്സം ഗരുകം ലഹുകം, യമ്ഹി ഫോട്ഠബ്ബമ്ഹി അനിദസ്സനമ്ഹി സപ്പടിഘമ്ഹി കായോ അനിദസ്സനോ സപ്പടിഘോ പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, ഫോട്ഠബ്ബോ പേസോ ഫോട്ഠബ്ബായതനം പേതം ഫോട്ഠബ്ബധാതു പേസാ – ഇദം തം രൂപം ഫോട്ഠബ്ബായതനം.
൬൪൯. കതമം തം രൂപം ഫോട്ഠബ്ബായതനം? പഥവീധാതു തേജോധാതു വായോധാതു കക്ഖളം മുദുകം സണ്ഹം ഫരുസം സുഖസമ്ഫസ്സം ദുക്ഖസമ്ഫസ്സം ഗരുകം ലഹുകം, യോ ഫോട്ഠബ്ബോ അനിദസ്സനോ സപ്പടിഘോ കായമ്ഹി അനിദസ്സനമ്ഹി സപ്പടിഘമ്ഹി പടിഹഞ്ഞി വാ പടിഹഞ്ഞതി വാ പടിഹഞ്ഞിസ്സതി വാ പടിഹഞ്ഞേ വാ, ഫോട്ഠബ്ബോ പേസോ ഫോട്ഠബ്ബായതനം പേതം ഫോട്ഠബ്ബധാതു പേസാ – ഇദം തം രൂപം ഫോട്ഠബ്ബായതനം.
൬൫൦. കതമം തം രൂപം ഫോട്ഠബ്ബായതനം? പഥവീധാതു തേജോധാതു വായോധാതു കക്ഖളം മുദുകം സണ്ഹം ഫരുസം സുഖസമ്ഫസ്സം ദുക്ഖസമ്ഫസ്സം ഗരുകം ലഹുകം, യം ഫോട്ഠബ്ബം ആരബ്ഭ കായം നിസ്സായ കായസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം ഫോട്ഠബ്ബം ആരബ്ഭ കായം നിസ്സായ കായസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… കായവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം ഫോട്ഠബ്ബാരമ്മണോ കായം നിസ്സായ കായസമ്ഫസ്സോ ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ…പേ… യം ഫോട്ഠബ്ബാരമ്മണാ കായം നിസ്സായ കായസമ്ഫസ്സജാ വേദനാ…പേ… സഞ്ഞാ…പേ… ചേതനാ…പേ… കായവിഞ്ഞാണം ഉപ്പജ്ജി വാ ഉപ്പജ്ജതി വാ ഉപ്പജ്ജിസ്സതി വാ ഉപ്പജ്ജേ വാ, ഫോട്ഠബ്ബോ പേസോ ഫോട്ഠബ്ബായതനം പേതം ഫോട്ഠബ്ബധാതു പേസാ – ഇദം തം രൂപം ഫോട്ഠബ്ബായതനം.
൬൫൧. കതമം തം രൂപം ആപോധാതു? യം ആപോ ആപോഗതം സിനേഹോ സിനേഹഗതം ബന്ധനത്തം രൂപസ്സ – ഇദം തം രൂപം ആപോധാതു.
ഇദം തം രൂപം നോ ഉപാദാ.
൬൫൨. കതമം തം രൂപം ഉപാദിണ്ണം? ചക്ഖായതനം സോതായതനം ഘാനായതനം ജിവ്ഹായതനം കായായതനം ഇത്ഥിന്ദ്രിയം പുരിസിന്ദ്രിയം ജീവിതിന്ദ്രിയം, യം വാ പനഞ്ഞമ്പി അത്ഥി രൂപം കമ്മസ്സ കതത്താ രൂപായതനം ഗന്ധായതനം രസായതനം ഫോട്ഠബ്ബായതനം ആകാസധാതു ആപോധാതു രൂപസ്സ ഉപചയോ രൂപസ്സ സന്തതി കബളീകാരോ ആഹാരോ – ഇദം തം രൂപം ഉപാദിണ്ണം.
൬൫൩. കതമം തം രൂപം അനുപാദിണ്ണം? സദ്ദായതനം കായവിഞ്ഞത്തി വചീവിഞ്ഞത്തി രൂപസ്സ ലഹുതാ രൂപസ്സ മുദുതാ രൂപസ്സ കമ്മഞ്ഞതാ രൂപസ്സ ജരതാ രൂപസ്സ അനിച്ചതാ, യം വാ പനഞ്ഞമ്പി അത്ഥി രൂപം ന കമ്മസ്സ കതത്താ രൂപായതനം ഗന്ധായതനം രസായതനം ഫോട്ഠബ്ബായതനം ആകാസധാതു ആപോധാതു രൂപസ്സ ഉപചയോ രൂപസ്സ സന്തതി കബളീകാരോ ആഹാരോ – ഇദം തം രൂപം അനുപാദിണ്ണം.
൬൫൪. കതമം തം രൂപം ഉപാദിണ്ണുപാദാനിയം? ചക്ഖായതനം…പേ… കായായതനം ഇത്ഥിന്ദ്രിയം പുരിസിന്ദ്രിയം ജീവിതിന്ദ്രിയം, യം വാ പനഞ്ഞമ്പി അത്ഥി രൂപം കമ്മസ്സ കതത്താ രൂപായതനം ഗന്ധായതനം രസായതനം ഫോട്ഠബ്ബായതനം ആകാസധാതു ആപോധാതു രൂപസ്സ ഉപചയോ രൂപസ്സ സന്തതി കബളീകാരോ ആഹാരോ – ഇദം തം രൂപം ഉപാദിണ്ണുപാദാനിയം.
൬൫൫. കതമം തം രൂപം അനുപാദിണ്ണുപാദാനിയം? സദ്ദായതനം കായവിഞ്ഞത്തി വചീവിഞ്ഞത്തി രൂപസ്സ ലഹുതാ രൂപസ്സ മുദുതാ രൂപസ്സ കമ്മഞ്ഞതാ രൂപസ്സ ജരതാ രൂപസ്സ അനിച്ചതാ, യം വാ പനഞ്ഞമ്പി അത്ഥി രൂപം ന കമ്മസ്സ കതത്താ, രൂപായതനം ഗന്ധായതനം രസായതനം ഫോട്ഠബ്ബായതനം ആകാസധാതു ആപോധാതു രൂപസ്സ ഉപചയോ രൂപസ്സ സന്തതി കബളീകാരോ ആഹാരോ – ഇദം തം രൂപം അനുപാദിണ്ണുപാദാനിയം.
൬൫൬. കതമം തം രൂപം സനിദസ്സനം? രൂപായതനം – ഇദം തം രൂപം സനിദസ്സനം.
൬൫൭. കതമം തം രൂപം അനിദസ്സനം? ചക്ഖായതനം…പേ… കബളീകാരോ ആഹാരോ – ഇദം തം രൂപം അനിദസ്സനം.
൬൫൮. കതമം തം രൂപം സപ്പടിഘം? ചക്ഖായതനം സോതായതനം ഘാനായതനം ജിവ്ഹായതനം കായായതനം രൂപായതനം സദ്ദായതനം ഗന്ധായതനം രസായതനം ഫോട്ഠബ്ബായതനം – ഇദം തം രൂപം സപ്പടിഘം.
൬൫൯. കതമം തം രൂപം അപ്പടിഘം? ഇത്ഥിന്ദ്രിയം…പേ… കബളീകാരോ ആഹാരോ – ഇദം തം രൂപം അപ്പടിഘം.
൬൬൦. കതമം തം രൂപം ഇന്ദ്രിയം? ചക്ഖുന്ദ്രിയം സോതിന്ദ്രിയം ഘാനിന്ദ്രിയം ജിവ്ഹിന്ദ്രിയം കായിന്ദ്രിയം ഇത്ഥിന്ദ്രിയം പുരിസിന്ദ്രിയം ജീവിതിന്ദ്രിയം – ഇദം തം രൂപം ഇന്ദ്രിയം.
൬൬൧. കതമം തം രൂപം ന ഇന്ദ്രിയം? രൂപായതനം…പേ… കബളീകാരോ ആഹാരോ – ഇദം തം രൂപം ന ഇന്ദ്രിയം.
൬൬൨. കതമം തം രൂപം മഹാഭൂതം? ഫോട്ഠബ്ബായതനം ആപോധാതു – ഇദം തം രൂപം മഹാഭൂതം.
൬൬൩. കതമം തം രൂപം ന മഹാഭൂതം? ചക്ഖായതനം…പേ… കബളീകാരോ ആഹാരോ – ഇദം തം രൂപം ന മഹാഭൂതം.
൬൬൪. കതമം തം രൂപം വിഞ്ഞത്തി? കായവിഞ്ഞത്തി വചീവിഞ്ഞത്തി – ഇദം തം രൂപം വിഞ്ഞത്തി.
൬൬൫. കതമം തം രൂപം ന വിഞ്ഞത്തി? ചക്ഖായതനം…പേ… കബളീകാരോ ആഹാരോ – ഇദം തം രൂപം ന വിഞ്ഞത്തി.
൬൬൬. കതമം തം രൂപം ചിത്തസമുട്ഠാനം? കായവിഞ്ഞത്തി വചീവിഞ്ഞത്തി യം വാ പനഞ്ഞമ്പി അത്ഥി രൂപം ചിത്തജം ചിത്തഹേതുകം ചിത്തസമുട്ഠാനം രൂപായതനം സദ്ദായതനം ഗന്ധായതനം രസായതനം ഫോട്ഠബ്ബായതനം ആകാസധാതു ആപോധാതു രൂപസ്സ ലഹുതാ രൂപസ്സ മുദുതാ രൂപസ്സ കമ്മഞ്ഞതാ രൂപസ്സ ഉപചയോ രൂപസ്സ സന്തതി കബളീകാരോ ആഹാരോ – ഇദം തം രൂപം ചിത്തസമുട്ഠാനം.
൬൬൭. കതമം തം രൂപം ന ചിത്തസമുട്ഠാനം? ചക്ഖായതനം…പേ… കായായതനം ഇത്ഥിന്ദ്രിയം പുരിസിന്ദ്രിയം ജീവിതിന്ദ്രിയം രൂപസ്സ ജരതാ രൂപസ്സ അനിച്ചതാ, യം വാ പനഞ്ഞമ്പി അത്ഥി രൂപം ന ചിത്തജം ന ചിത്തഹേതുകം ന ചിത്തസമുട്ഠാനം രൂപായതനം സദ്ദായതനം ഗന്ധായതനം രസായതനം ഫോട്ഠബ്ബായതനം ആകാസധാതു ആപോധാതു രൂപസ്സ ലഹുതാ രൂപസ്സ മുദുതാ രൂപസ്സ കമ്മഞ്ഞതാ രൂപസ്സ ഉപചയോ രൂപസ്സ സന്തതി കബളീകാരോ ആഹാരോ – ഇദം തം രൂപം ന ചിത്തസമുട്ഠാനം.
൬൬൮. കതമം തം രൂപം ചിത്തസഹഭു? കായവിഞ്ഞത്തി വചീവിഞ്ഞത്തി – ഇദം തം രൂപം ചിത്തസഹഭു.
൬൬൯. കതമം തം രൂപം ന ചിത്തസഹഭു? ചക്ഖായതനം…പേ… കബളീകാരോ ആഹാരോ – ഇദം തം രൂപം ന ചിത്തസഹഭു.
൬൭൦. കതമം തം രൂപം ചിത്താനുപരിവത്തി? കായവിഞ്ഞത്തി വചീവിഞ്ഞത്തി – ഇദം തം രൂപം ചിത്താനുപരിവത്തി.
൬൭൧. കതമം തം രൂപം ന ചിത്താനുപരിവത്തി? ചക്ഖായതനം…പേ… കബളീകാരോ ആഹാരോ – ഇദം തം രൂപം ന ചിത്താനുപരിവത്തി.
൬൭൨. കതമം തം രൂപം അജ്ഝത്തികം? ചക്ഖായതനം…പേ… കായായതനം – ഇദം തം രൂപം അജ്ഝത്തികം.
൬൭൩. കതമം തം രൂപം ബാഹിരം? രൂപായതനം…പേ… കബളീകാരോ ആഹാരോ – ഇദം തം രൂപം ബാഹിരം.
൬൭൪. കതമം തം രൂപം ഓളാരികം? ചക്ഖായതനം…പേ… ഫോട്ഠബ്ബായതനം – ഇദം തം രൂപം ഓളാരികം.
൬൭൫. കതമം തം രൂപം സുഖുമം? ഇത്ഥിന്ദ്രിയം…പേ… കബളീകാരോ ആഹാരോ – ഇദം തം രൂപം സുഖുമം.
൬൭൬. കതമം തം രൂപം ദൂരേ? ഇത്ഥിന്ദ്രിയം…പേ… കബളീകാരോ ആഹാരോ – ഇദം തം രൂപം ദൂരേ.
൬൭൭. കതമം തം രൂപം സന്തികേ? ചക്ഖായതനം…പേ… ഫോട്ഠബ്ബായതനം – ഇദം തം രൂപം സന്തികേ.
൬൭൮. കതമം തം രൂപം ചക്ഖുസമ്ഫസ്സസ്സ വത്ഥു? ചക്ഖായതനം – ഇദം തം രൂപം ചക്ഖുസമ്ഫസ്സസ്സ വത്ഥു.
൬൭൯. കതമം തം രൂപം ചക്ഖുസമ്ഫസ്സസ്സ ന വത്ഥു? സോതായതനം…പേ… കബളീകാരോ ആഹാരോ – ഇദം തം രൂപം ചക്ഖുസമ്ഫസ്സസ്സ ന വത്ഥു.
൬൮൦. കതമം തം രൂപം ചക്ഖുസമ്ഫസ്സജായ വേദനായ…പേ… സഞ്ഞായ…പേ… ചേതനായ …പേ… ചക്ഖുവിഞ്ഞാണസ്സ വത്ഥു? ചക്ഖായതനം – ഇദം തം രൂപം ചക്ഖുവിഞ്ഞാണസ്സ വത്ഥു.
൬൮൧. കതമം തം രൂപം ചക്ഖുവിഞ്ഞാണസ്സ ന വത്ഥു? സോതായതനം…പേ… കബളീകാരോ ആഹാരോ – ഇദം തം രൂപം ചക്ഖുവിഞ്ഞാണസ്സ ന വത്ഥു.
൬൮൨. കതമം തം രൂപം സോതസമ്ഫസ്സസ്സ…പേ… ഘാനസമ്ഫസ്സസ്സ…പേ… ജിവ്ഹാസമ്ഫസ്സസ്സ…പേ… കായസമ്ഫസ്സസ്സ വത്ഥു? കായായതനം – ഇദം തം രൂപം കായസമ്ഫസ്സസ്സ വത്ഥു.
൬൮൩. കതമം തം രൂപം കായസമ്ഫസ്സസ്സ ന വത്ഥു? ചക്ഖായതനം…പേ… കബളീകാരോ ആഹാരോ – ഇദം തം രൂപം കായസമ്ഫസ്സസ്സ ന വത്ഥു.
൬൮൪. കതമം തം രൂപം കായസമ്ഫസ്സജായ വേദനായ…പേ… സഞ്ഞായ…പേ… ചേതനായ…പേ… കായവിഞ്ഞാണസ്സ വത്ഥു? കായായതനം – ഇദം തം രൂപം കായവിഞ്ഞാണസ്സ വത്ഥു.
൬൮൫. കതമം തം രൂപം കായവിഞ്ഞാണസ്സ ന വത്ഥു? ചക്ഖായതനം…പേ… കബളീകാരോ ആഹാരോ – ഇദം തം രൂപം കായവിഞ്ഞാണസ്സ ന വത്ഥു.
൬൮൬. കതമം തം രൂപം ചക്ഖുസമ്ഫസ്സസ്സ ആരമ്മണം? രൂപായതനം – ഇദം തം രൂപം ചക്ഖുസമ്ഫസ്സസ്സ ആരമ്മണം.
൬൮൭. കതമം തം രൂപം ചക്ഖുസമ്ഫസ്സസ്സ ന ആരമ്മണം? ചക്ഖായതനം…പേ… കബളീകാരോ ആഹാരോ – ഇദം തം രൂപം ചക്ഖുസമ്ഫസ്സസ്സ ന ആരമ്മണം.
൬൮൮. കതമം തം രൂപം ചക്ഖുസമ്ഫസ്സജായ വേദനായ…പേ… സഞ്ഞായ…പേ… ചേതനായ…പേ… ചക്ഖുവിഞ്ഞാണസ്സ ആരമ്മണം? രൂപായതനം – ഇദം തം രൂപം ചക്ഖുവിഞ്ഞാണസ്സ ആരമ്മണം.
൬൮൯. കതമം തം രൂപം ചക്ഖുവിഞ്ഞാണസ്സ ന ആരമ്മണം? ചക്ഖായതനം…പേ… കബളീകാരോ ആഹാരോ – ഇദം തം രൂപം ചക്ഖുവിഞ്ഞാണസ്സ ന ആരമ്മണം.
൬൯൦. കതമം തം രൂപം സോതസമ്ഫസ്സസ്സ…പേ… ഘാനസമ്ഫസ്സസ്സ …പേ… ജിവ്ഹാസമ്ഫസ്സസ്സ…പേ… കായസമ്ഫസ്സസ്സ ആരമ്മണം? ഫോട്ഠബ്ബായതനം – ഇദം തം രൂപം കായസമ്ഫസ്സസ്സ ആരമ്മണം.
൬൯൧. കതമം തം രൂപം കായസമ്ഫസ്സസ്സ ന ആരമ്മണം? ചക്ഖായതനം…പേ… കബളീകാരോ ആഹാരോ – ഇദം തം രൂപം കായസമ്ഫസ്സസ്സ ന ആരമ്മണം.
൬൯൨. കതമം തം രൂപം കായസമ്ഫസ്സജായ വേദനായ…പേ… സഞ്ഞായ…പേ… ചേതനായ…പേ… കായവിഞ്ഞാണസ്സ ആരമ്മണം? ഫോട്ഠബ്ബായതനം – ഇദം തം രൂപം കായവിഞ്ഞാണസ്സ ആരമ്മണം.
൬൯൩. കതമം തം രൂപം കായവിഞ്ഞാണസ്സ ന ആരമ്മണം? ചക്ഖായതനം…പേ… കബളീകാരോ ആഹാരോ – ഇദം തം രൂപം കായവിഞ്ഞാണസ്സ ന ആരമ്മണം.
൬൯൪. കതമം തം രൂപം ചക്ഖായതനം? യം ചക്ഖു ചതുന്നം മഹാഭൂതാനം ഉപാദായ പസാദോ…പേ… സുഞ്ഞോ ഗാമോ പേസോ – ഇദം തം രൂപം ചക്ഖായതനം.
൬൯൫. കതമം തം രൂപം ന ചക്ഖായതനം? സോതായതനം…പേ… കബളീകാരോ ആഹാരോ – ഇദം തം രൂപം ന ചക്ഖായതനം.
൬൯൬. കതമം തം രൂപം സോതായതനം…പേ… ഘാനായതനം…പേ… ജിവ്ഹായതനം…പേ… കായായതനം? യോ കായോ ചതുന്നം മഹാഭൂതാനം ഉപാദായ പസാദോ…പേ… സുഞ്ഞോ ഗാമോ പേസോ – ഇദം തം രൂപം കായായതനം.
൬൯൭. കതമം തം രൂപം ന കായായതനം? ചക്ഖായതനം…പേ… കബളീകാരോ ആഹാരോ – ഇദം തം രൂപം ന കായായതനം.
൬൯൮. കതമം തം രൂപം രൂപായതനം? യം രൂപം ചതുന്നം മഹാഭൂതാനം ഉപാദായ വണ്ണനിഭാ…പേ… രൂപധാതു പേസാ – ഇദം തം രൂപം രൂപായതനം.
൬൯൯. കതമം തം രൂപം ന രൂപായതനം? ചക്ഖായതനം…പേ… കബളീകാരോ ആഹാരോ – ഇദം തം രൂപം ന രൂപായതനം.
൭൦൦. കതമം തം രൂപം സദ്ദായതനം…പേ… ഗന്ധായതനം …പേ… രസായതനം…പേ… ഫോട്ഠബ്ബായതനം? പഥവീധാതു…പേ… ഫോട്ഠബ്ബധാതു പേസാ – ഇദം തം രൂപം ഫോട്ഠബ്ബായതനം.
൭൦൧. കതമം തം രൂപം ന ഫോട്ഠബ്ബായതനം? ചക്ഖായതനം…പേ… കബളീകാരോ ആഹാരോ – ഇദം തം രൂപം ന ഫോട്ഠബ്ബായതനം.
൭൦൨. കതമം തം രൂപം ചക്ഖുധാതു? ചക്ഖായതനം – ഇദം തം രൂപം ചക്ഖുധാതു.
൭൦൩. കതമം തം രൂപം ന ചക്ഖുധാതു? സോതായതനം…പേ… കബളീകാരോ ആഹാരോ – ഇദം തം രൂപം ന ചക്ഖുധാതു.
൭൦൪. കതമം തം രൂപം സോതധാതു…പേ… ഘാനധാതു…പേ… ജിവ്ഹാധാതു…പേ… കായധാതു? കായായതനം – ഇദം തം രൂപം കായധാതു.
൭൦൫. കതമം തം രൂപം ന കായധാതു? ചക്ഖായതനം…പേ… കബളീകാരോ ആഹാരോ – ഇദം തം രൂപം ന കായധാതു.
൭൦൬. കതമം തം രൂപം രൂപധാതു? രൂപായതനം – ഇദം തം രൂപം രൂപധാതു.
൭൦൭. കതമം തം രൂപം ന രൂപധാതു? ചക്ഖായതനം…പേ… കബളീകാരോ ആഹാരോ – ഇദം തം രൂപം ന രൂപധാതു.
൭൦൮. കതമം തം രൂപം സദ്ദധാതു…പേ… ഗന്ധധാതു…പേ… രസധാതു…പേ… ഫോട്ഠബ്ബധാതു? ഫോട്ഠബ്ബായതനം – ഇദം തം രൂപം ഫോട്ഠബ്ബധാതു.
൭൦൯. കതമം തം രൂപം ന ഫോട്ഠബ്ബധാതു? ചക്ഖായതനം…പേ… കബളീകാരോ ആഹാരോ – ഇദം തം രൂപം ന ഫോട്ഠബ്ബധാതു.
൭൧൦. കതമം തം രൂപം ചക്ഖുന്ദ്രിയം? യം ചക്ഖു ചതുന്നം മഹാഭൂതാനം ഉപാദായ പസാദോ…പേ… സുഞ്ഞോ ഗാമോ പേസോ – ഇദം തം രൂപം ചക്ഖുന്ദ്രിയം.
൭൧൧. കതമം തം രൂപം ന ചക്ഖുന്ദ്രിയം? സോതായതനം…പേ… കബളീകാരോ ആഹാരോ – ഇദം തം രൂപം ന ചക്ഖുന്ദ്രിയം.
൭൧൨. കതമം തം രൂപം സോതിന്ദ്രിയം…പേ… ഘാനിന്ദ്രിയം…പേ… ജിവ്ഹിന്ദ്രിയം…പേ… കായിന്ദ്രിയം? യോ കായോ ചതുന്നം മഹാഭൂതാനം ഉപാദായ പസാദോ…പേ… സുഞ്ഞോ ഗാമോ പേസോ – ഇദം തം രൂപം കായിന്ദ്രിയം.
൭൧൩. കതമം തം രൂപം ന കായിന്ദ്രിയം? ചക്ഖായതനം…പേ… കബളീകാരോ ആഹാരോ – ഇദം തം രൂപം ന കായിന്ദ്രിയം.
൭൧൪. കതമം തം രൂപം ഇത്ഥിന്ദ്രിയം? യം ഇത്ഥിയാ ഇത്ഥിലിങ്ഗം ഇത്ഥിനിമിത്തം ഇത്ഥികുത്തം ഇത്ഥാകപ്പോ ഇത്ഥത്തം ഇത്ഥിഭാവോ – ഇദം തം രൂപം ഇത്ഥിന്ദ്രിയം.
൭൧൫. കതമം തം രൂപം ന ഇത്ഥിന്ദ്രിയം? ചക്ഖായതനം…പേ… കബളീകാരോ ആഹാരോ – ഇദം തം രൂപം ന ഇത്ഥിന്ദ്രിയം.
൭൧൬. കതമം തം രൂപം പുരിസിന്ദ്രിയം? യം പുരിസസ്സ പുരിസലിങ്ഗം പുരിസനിമിത്തം പുരിസകുത്തം പുരിസാകപ്പോ പുരിസത്തം പുരിസഭാവോ – ഇദം തം രൂപം പുരിസിന്ദ്രിയം.
൭൧൭. കതമം തം രൂപം ന പുരിസിന്ദ്രിയം? ചക്ഖായതനം…പേ… കബളീകാരോ ആഹാരോ – ഇദം തം രൂപം ന പുരിസിന്ദ്രിയം.
൭൧൮. കതമം തം രൂപം ജീവിതിന്ദ്രിയം? യോ തേസം രൂപീനം ധമ്മാനം ആയു ഠിതി യപനാ യാപനാ ഇരിയനാ വത്തനാ പാലനാ ജീവിതം ജീവിതിന്ദ്രിയം – ഇദം തം രൂപം ജീവിതിന്ദ്രിയം.
൭൧൯. കതമം തം രൂപം ന ജീവിതിന്ദ്രിയം? ചക്ഖായതനം…പേ… കബളീകാരോ ആഹാരോ – ഇദം തം രൂപം ന ജീവിതിന്ദ്രിയം.
൭൨൦. കതമം തം രൂപം കായവിഞ്ഞത്തി? യാ കുസലചിത്തസ്സ വാ അകുസലചിത്തസ്സ വാ അബ്യാകതചിത്തസ്സ വാ അഭിക്കമന്തസ്സ വാ പടിക്കമന്തസ്സ വാ ആലോകേന്തസ്സ വാ വിലോകേന്തസ്സ വാ സമിഞ്ജേന്തസ്സ വാ പസാരേന്തസ്സ വാ കായസ്സ ഥമ്ഭനാ സന്ഥമ്ഭനാ സന്ഥമ്ഭിതത്തം വിഞ്ഞത്തി വിഞ്ഞാപനാ വിഞ്ഞാപിതത്തം – ഇദം തം രൂപം കായവിഞ്ഞത്തി.
൭൨൧. കതമം തം രൂപം ന കായവിഞ്ഞത്തി? ചക്ഖായതനം…പേ… കബളീകാരോ ആഹാരോ – ഇദം തം രൂപം ന കായവിഞ്ഞത്തി.
൭൨൨. കതമം തം രൂപം വചീവിഞ്ഞത്തി? യാ കുസലചിത്തസ്സ വാ അകുസലചിത്തസ്സ വാ അബ്യാകതചിത്തസ്സ വാ വാചാ ഗിരാ ബ്യപ്പഥോ ഉദീരണം ഘോസോ ഘോസകമ്മം വാചാ വചീഭേദോ, അയം വുച്ചതി വാചാ. യാ തായ വാചായ വിഞ്ഞത്തി വിഞ്ഞാപനാ വിഞ്ഞാപിതത്തം – ഇദം തം രൂപം വചീവിഞ്ഞത്തി.
൭൨൩. കതമം തം രൂപം ന വചീവിഞ്ഞത്തി? ചക്ഖായതനം…പേ… കബളീകാരോ ആഹാരോ – ഇദം തം രൂപം ന വചീവിഞ്ഞത്തി.
൭൨൪. കതമം തം രൂപം ആകാസധാതു? യോ ആകാസോ ആകാസഗതം അഘം അഘഗതം വിവരോ വിവരഗതം അസമ്ഫുട്ഠം ചതൂഹി മഹാഭൂതേഹി – ഇദം തം രൂപം ആകാസധാതു.
൭൨൫. കതമം തം രൂപം ന ആകാസധാതു? ചക്ഖായതനം …പേ… കബളീകാരോ ആഹാരോ – ഇദം തം രൂപം ന ആകാസധാതു.
൭൨൬. കതമം തം രൂപം ആപോധാതു? യം ആപോ ആപോഗതം സിനേഹോ സിനേഹഗതം ബന്ധനത്തം രൂപസ്സ – ഇദം തം രൂപം ആപോധാതു.
൭൨൭. കതമം തം രൂപം ന ആപോധാതു? ചക്ഖായതനം…പേ… കബളീകാരോ ആഹാരോ – ഇദം തം രൂപം ന ആപോധാതു.
൭൨൮. കതമം തം രൂപം രൂപസ്സ ലഹുതാ? യാ രൂപസ്സ ലഹുതാ ലഹുപരിണാമതാ അദന്ധനതാ അവിത്ഥനതാ – ഇദം തം രൂപം രൂപസ്സ ലഹുതാ.
൭൨൯. കതമം തം രൂപം രൂപസ്സ ന ലഹുതാ? ചക്ഖായതനം…പേ… കബളീകാരോ ആഹാരോ – ഇദം തം രൂപം രൂപസ്സ ന ലഹുതാ.
൭൩൦. കതമം തം രൂപം രൂപസ്സ മുദുതാ? യാ രൂപസ്സ മുദുതാ മദ്ദവതാ അകക്ഖളതാ അകഥിനതാ – ഇദം തം രൂപം രൂപസ്സ മുദുതാ.
൭൩൧. കതമം തം രൂപം രൂപസ്സ ന മുദുതാ? ചക്ഖായതനം…പേ… കബളീകാരോ ആഹാരോ – ഇദം തം രൂപം രൂപസ്സ ന മുദുതാ.
൭൩൨. കതമം തം രൂപം രൂപസ്സ കമ്മഞ്ഞതാ? യാ രൂപസ്സ കമ്മഞ്ഞതാ കമ്മഞ്ഞത്തം കമ്മഞ്ഞഭാവോ – ഇദം തം രൂപം രൂപസ്സ കമ്മഞ്ഞതാ.
൭൩൩. കതമം തം രൂപം രൂപസ്സ ന കമ്മഞ്ഞതാ? ചക്ഖായതനം…പേ… കബളീകാരോ ആഹാരോ – ഇദം തം രൂപം രൂപസ്സ ന കമ്മഞ്ഞതാ.