൨. ആയതനം

൨൨. ചക്ഖായതനം കതിഹി ഖന്ധേഹി കതിഹായതനേഹി കതിഹി ധാതൂഹി സങ്ഗഹിതം? ചക്ഖായതനം ഏകേന ഖന്ധേന ഏകേനായതനേന ഏകായ ധാതുയാ സങ്ഗഹിതം. കതിഹി അസങ്ഗഹിതം? ചതൂഹി ഖന്ധേഹി ഏകാദസഹായതനേഹി സത്തരസഹി ധാതൂഹി അസങ്ഗഹിതം.

൨൩. സോതായതനം … ഘാനായതനം… ജിവ്ഹായതനം… കായായതനം… രൂപായതനം… സദ്ദായതനം… ഗന്ധായതനം… രസായതനം… ഫോട്ഠബ്ബായതനം…പേ… ഏകേന ഖന്ധേന ഏകേനായതനേന ഏകായ ധാതുയാ സങ്ഗഹിതം. കതിഹി അസങ്ഗഹിതം? ചതൂഹി ഖന്ധേഹി ഏകാദസഹായതനേഹി സത്തരസഹി ധാതൂഹി അസങ്ഗഹിതം.

൨൪. മനായതനം ഏകേന ഖന്ധേന ഏകേനായതനേന സത്തഹി ധാതൂഹി സങ്ഗഹിതം. കതിഹി അസങ്ഗഹിതം? ചതൂഹി ഖന്ധേഹി ഏകാദസഹായതനേഹി ഏകാദസഹി ധാതൂഹി അസങ്ഗഹിതം.

൨൫. ധമ്മായതനം അസങ്ഖതം ഖന്ധതോ ഠപേത്വാ ചതൂഹി ഖന്ധേഹി ഏകേനായതനേന ഏകായ ധാതുയാ സങ്ഗഹിതം. കതിഹി അസങ്ഗഹിതം? ഏകേന ഖന്ധേന ഏകാദസഹായതനേഹി സത്തരസഹി ധാതൂഹി അസങ്ഗഹിതം.

(ഏകമൂലകം.)

൨൬. ചക്ഖായതനഞ്ച സോതായതനഞ്ച ഏകേന ഖന്ധേന ദ്വീഹായതനേഹി ദ്വീഹി ധാതൂഹി സങ്ഗഹിതാ. കതിഹി അസങ്ഗഹിതാ? ചതൂഹി ഖന്ധേഹി ദസഹായതനേഹി സോളസഹി ധാതൂഹി അസങ്ഗഹിതാ.

൨൭. ചക്ഖായതനഞ്ച ഘാനായതനഞ്ച… ചക്ഖായതനഞ്ച ജിവ്ഹായതനഞ്ച… ചക്ഖായതനഞ്ച കായായതനഞ്ച… ചക്ഖായതനഞ്ച രൂപായതനഞ്ച… ചക്ഖായതനഞ്ച സദ്ദായതനഞ്ച… ചക്ഖായതനഞ്ച ഗന്ധായതനഞ്ച… ചക്ഖായതനഞ്ച രസായതനഞ്ച… ചക്ഖായതനഞ്ച ഫോട്ഠബ്ബായതനഞ്ച ഏകേന ഖന്ധേന ദ്വീഹായതനേഹി ദ്വീഹി ധാതൂഹി സങ്ഗഹിതാ. കതിഹി അസങ്ഗഹിതാ? ചതൂഹി ഖന്ധേഹി ദസഹായതനേഹി സോളസഹി ധാതൂഹി അസങ്ഗഹിതാ.

൨൮. ചക്ഖായതനഞ്ച മനായതനഞ്ച ദ്വീഹി ഖന്ധേഹി ദ്വീഹായതനേഹി അട്ഠഹി ധാതൂഹി സങ്ഗഹിതാ. കതിഹി അസങ്ഗഹിതാ? തീഹി ഖന്ധേഹി ദസഹായതനേഹി ദസഹി ധാതൂഹി അസങ്ഗഹിതാ.

൨൯. ചക്ഖായതനഞ്ച ധമ്മായതനഞ്ച അസങ്ഖതം ഖന്ധതോ ഠപേത്വാ ചതൂഹി ഖന്ധേഹി ദ്വീഹായതനേഹി ദ്വീഹി ധാതൂഹി സങ്ഗഹിതാ. കതിഹി അസങ്ഗഹിതാ? ഏകേന ഖന്ധേന ദസഹായതനേഹി സോളസഹി ധാതൂഹി അസങ്ഗഹിതാ.

(ദുകമൂലകം.)

൩൦. ദ്വാദസായതനാനി കതിഹി ഖന്ധേഹി കതിഹായതനേഹി കതിഹി ധാതൂഹി സങ്ഗഹിതാ? ദ്വാദസായതനാനി അസങ്ഖതം ഖന്ധതോ ഠപേത്വാ പഞ്ചഹി ഖന്ധേഹി ദ്വാദസഹായതനേഹി അട്ഠാരസഹി ധാതൂഹി സങ്ഗഹിതാ. കതിഹി അസങ്ഗഹിതാ? ന കേഹിചി ഖന്ധേഹി ന കേഹിചി ആയതനേഹി ന കാഹിചി ധാതൂഹി അസങ്ഗഹിതാ.

(ദ്വാദസകം.)