ചാണക്യനീതിലാ ഗാഥാ

ലാലനേ ബഹവോ ദോസാ,

താളനേ ബഹവോ ഗുണാ;

തസ്മാ പുത്തഞ്ച സിസ്സഞ്ച,

താളയേ ന ച ലാലയേ.

൨൮. അതീതസ്സ ഹി മിത്തസ്സ,

യോ ചേ ദോസം പകാസയേ;

സോ ഹവേ പച്ചുപ്പന്നസ്സ,

ദോസം ഭാസേതി ഞായതി.

൨൯. ലതാവിയ സേവകാ തേ,

യേ നിസ്സയം പലമ്ബരേ;

നിസ്സയസ്സ വിനാസേന,

ഭൂമ്യം സേന്തി അനാഥകാ.

൩൦. ദോസസിങ്ഗേഹി വിജ്ഝന്തോ,

മാനഖൂരേഹി അക്കമം;

ഭയം കരോതി ലോകമ്ഹി,

ഗോവ ബാലോ വിഹിംസകോ.

൩൧. ആദോ ഉപരി ലോകോയം,

ഉജുലേഖായ തിട്ഠതി;

മുസാവാതേഹി തംലോകം,

നിപാതേസി അനജ്ജവം.

൩൨. സുഘടം കുമ്ഭകാരേന,

നാരഹോ പരിഭുഞ്ജിതും;

തഥൂപമായ വേക്ഖേയ്യ,

സകമ്മപരകമ്മനി.

൩൩. അനന്തരംസീ സൂരോപി,

നസക്കോതി ഘനം തമം;

വിജ്ഝിതും രംസിയാ ലോകേ,

തഥാ മദനമോഹിതാ;

നസക്കോന്തി മദം ഭേത്വാ,

പഞ്ഞാഭായ പഭാസിതും.

൩൪. ഖേദവേരം ദലിദ്ദമ്ഹി,

ഭോഗിമ്ഹി രോഗുപദ്ദവം;

ദേസ്സവേരഞ്ച ആണിമ്ഹി,

പസ്സേ ലോകസ്സ വേരിതം.

൩൫. സംലദ്ധേന സുഭോഗേന,

ജീവം സുദ്ധം കരേ നിജം;

സേട്ഠോ സോ തേന ജീവേന,

ജേഗുച്ഛോ മലജീവികോ.

൩൬. വജിര പുപ്ഫരാഗാനം,

വിസേസം യോ നബുജ്ഝതി;

കഥഞ്ഹി സോ വിക്കീണേയ്യ,

കീണേയ്യ വാ യഥാതഥം.

൩൭. കിപ്പീലി കോപി ചിന്തേത്വാ,

പബ്ബതം ഭേത്തു മുസ്സഹം;

അബലാ തനുമജ്ഝത്താ,

ചിന്താ ഹസ്യാവ സാ മുധാ.

൩൮. ജാതമത്തം ന യോ സത്തും,

രോഗഞ്ചൂപസമം നയേ;

മഹാബലോപി തേനേവ,

വുദ്ധിംപത്വാ സ ഹഞ്ഞതേ.

൩൯. സജീവമംസഭക്ഖേഹി,

സദാഠീഹി മുഖേഹി ഭോ;

ബിളാരബ്യഗ്ഘസീഹാനം,

നിഹീനാനി അനേകധാ;

തിക്ഖാനി ഖരവാദാനി,

മനുസ്സാനം മുഖാനി വേ.

൪൦. വിലുപ്പന്താ വിധാവന്തി,

സജീവവുത്തികമ്മുനാ;

ജനാ തേന വിഹഞ്ഞന്തി,

ചരന്തി ധമ്മവേമുഖാ.

൪൧. സുലഭം ലോകിയം ലോകേ,

സാസനീയംവ ദുല്ലഭം;

ദുല്ലഭം തം വമഞ്ഞന്തോ,

ഏസോ ബാലതമോ ഭവേ.

൪൨. യോ പതിത്ഥ അഗ്യാവാടം,

മോഹാ തം ഉപകാരിതും;

അഞ്ഞോരോഹി തദാ വാടം,

ദുതീയോ മുള്ഹമുള്ഹകോ.

൪൩. ബ്യഗ്ഘോ ആവുധവിദ്ധോ ഹി,

അകാ ദുട്ഠാനി നിന്നദം;

തഥേവ സാധുസത്ഥേന,

വിദ്ധോ ബാലോ പകുപ്പിതോ.

൪൪. പിവന്തി ലോഹിതം ഡംസാ,

അന്തോ തുണ്ഡേന മക്ഖികാ;

ബഹിദ്ധാ പരിവാരേന്തി,

ജനോ തേന ഡംസായയേ.

൪൫. അധനസ്സ ഖണോ അപ്പോ,

സദ്ധമ്മോ അപ്പകാലിനോ;

അപ്പകോ തേന യുഞ്ജേയ്യും,

ഖണം ബഹും ലഭേതവേ.