൫. നവവാസീരട്ഠസാസനവംസകഥാമഗ്ഗോ

൫. ഇദാനി വനവാസീരട്ഠേ സിരിഖേത്തനഗരസാസനവംസം വക്ഖാമി. ജിനചക്കേ ഹി ഏകാധികേ വസ്സസതേ സമ്പത്തേ ജടിലോ സക്കോ നാഗോ ഗരുളോ കുമ്ഭണ്ഡോ ചന്ദീ പരമീസ്വരോചാതി ഇമേ സത്ത സിരിഖേത്തം നാമ നഗരം മാപേസും. തത്ഥ ദ്വത്തപോങ്കോ നാമ രാജാ രജ്ജം കാരേസി. തസ്സ കിര തീണി അക്ഖീനി സന്തീതി. തദാ ഭഗവതോ സാവകാ അരഹന്താ തിസഹസ്സമത്താ തത്ഥ വസിംസു. സോ രാജാ തേസം അരഹന്താനം ദേവസികം ചതൂഹി പച്ചയേഹി ഉപത്ഥമ്ഭി. ഛ സരീരധാതുയോ ച ഏകേകം ഏകേകസ്മിം നിദഹിത്വാ ഛ ചേതിഇയാനി കാരാപേസി. ദക്ഖിണബാഹും പന നിദഹിത്വാ ഏകമ്പി ചേതിയം കാരാപേസി.

ഉണ്ഹീസധാതും പന കങ്ഗരന്നഗരതോ ആനേത്വാ ഏകമ്പി ചേതിയം കാരാപേസി. തം പന താവ ന നിട്ഠിതം. പച്ഛാ അനുരുദ്ധരാജാ ഗഹേത്വാ അരിമദ്ദനനഗരം ആനേത്വാ ചഞ്ഞിങ്ഖു നാമ ചേതിയേ നിധാനം അകാസി. തസ്മാ രക്ഖിതത്ഥേരസ്സ ആഗമനതോ പുബ്ബേപി സാസനം പതിട്ഠാസീതി ദട്ഠബ്ബം. തതോ പച്ഛാ സാസനം ദുബ്ബലം ഹുത്വാ അട്ഠാസി.

ഇദം വനവാസീരട്ഠേ പഠമം സാസനസ്സ പതിട്ഠാനം.

മഹാമോഗ്ഗലിപുത്തതിസ്സത്ഥേരേന പന പേസിതോ രക്ഖിതത്ഥേരോ വനവാസീരട്ഠം ഗന്ത്വാ ആകാസേ ഠത്വാ അനമതഗ്ഗപരിയായകഥായ വനവാസികേ പസാദേസി. കഥാപരിയോസാനേ പനസ്സ സട്ഠിസഹസ്സാനം ധമ്മാഭിസമയോ അഹോസി. സത്തതിസഹസ്സമത്താ പബ്ബജിംസു. പഞ്ചവിഹാരസതാനി പതിട്ഠാപേസും. ഏവം സോ തത്ഥ സാസനം പതിട്ഠാപേസി. തേനേവ അട്ഠ കഥായം –

ഗന്ത്വാന രക്ഖിതത്ഥേരോ,

വനവാസിം മഹിദ്ധികോ;

അന്തലിക്ഖേ ഠിതോ തത്ഥ,

ദേസേസി അനമതഗ്ഗിയന്തി വുത്തം.

ഏവം വനവാസീരട്ഠേ പുബ്ബേയേവ സാസനം ഓഗാഹേത്വാ പതിട്ഠഹി. ന പന താവ സകലം ബ്യാപേത്വാ പതിട്ഠഹി.

ഇദം താവ വനവാസീരട്ഠേ സിരിഖേത്തനഗരേ ദുതിയം

സാസനസ്സ പതിട്ഠാനം.

ജിനചക്കേ പന തേത്തിംസാധികേ ചതുവസ്സസതേ കുക്കുട സീസോ നാമ ഏകോ രാജാ രജ്ജം കാരേസി. തസ്സ രഞ്ഞോ കാലേ ഭഗവതോ സാവകാ അരഹന്താ പഞ്ചസതമത്താ അഹേസും. തേസമ്പി സോ രാജാ ദേവസികം ചതൂഹി പച്ചയേഹി ഉപത്ഥമ്ഭേസി. സോതാപന്നസകദാഗാമിഅനാഗാമിനോ പന ഗണനപഥം വീതിവത്താ അഹേസും.

ഇദം വനവാസീരട്ഠേ സിരിഖേത്തനഗരേ പരമ്പരാഭതവസേന

തതിയം സാസനസ്സ പതിട്ഠാനം.

ഇച്ചേവം വനവാസീരട്ഠേ അനേകസതേഹി അരഹന്തത്ഥേരേഹി സാസനം പുണ്ണിന്ദുസങ്കാസം ഹുത്വാ അതിവിയ വിജ്ജോതേസി. സാസനിക ഗന്ഥകാരാ പന മഹാഥേരാ തത്ഥ ന സന്ദിസ്സന്തി. അരഹന്തത്ഥേരാ പന രാജൂനം ആയാചനം ആരബ്ഭ ധമ്മസത്ഥം ഏകം വിരചയിംസൂതി പോരാണാ വദന്തീതി. ഇച്ചേവം–

തേച ഥേരാ മഹാപഞ്ഞാ,

പഗ്ഗഹേത്വാന സാസനം;

സൂരിയോ വിയ അത്ഥങ്ഗോ,

ഉപഗാ മച്ചുസന്തികം.

തസ്മാ ഹി പണ്ഡിതോ പോസോ,

യാവ മച്ചു നചാഗതോ;

താവ പുഞ്ഞം കരേ നിച്ചം,

മാ പമജ്ജേയ്യ സബ്ബദാതി.

ഇതി സാസനവംസേ വനവാസീരട്ഠസാസനവംസകഥാമഗ്ഗോ

നാമ പഞ്ചമോ പരിച്ഛേദോ.