൫. അഹിതുണ്ഡികസ്സ വത്ഥുമ്ഹി അയമാനുപുബ്ബീകഥാ

ഇമസ്മിം കിര ഭദ്ദകപ്പമ്ഹി അമ്ഹാകം കിര ഭഗവതോ പുബ്ബേ കസ്സപോനാമ സത്ഥാ ലോകേ ഉപ്പജ്ജിത്വാ സദേവകം ലോകം സംസാരസാഗരാ താരേത്വാ സബ്ബബുദ്ധകിച്ചാനി നിട്ഠപേത്വാ അത്ഥം ഗതോ ദിവസകരോവിയ സേതബ്യമ്ഹി അനുപാദിസേസായ നിബ്ബാണധാതുയാ പരിനിബ്ബായി, തദാ സകലജമ്ബുദീപവാസിനോ മനുസ്സാ സന്നിപതിത്വാ ഏകേകം സുവണ്ണിട്ഠകം കോടിഅഗ്ഘനകം രതനവിചിത്തം ബഹിചിനനത്ഥായ ഏകേകം അഡ്ഢകോടിഅഗ്ഘനകം അബ്ഭന്തരൂപപൂരണത്ഥം മനോസിലായ മത്തികാകിച്ചം കരോന്താ യോജനബ്ബേധം ഥൂപം കത്വാ മഹന്തം സക്കാരം കരോന്തി. തദാ ഏകോ അഹിതുണ്ഡികോ ഗാമനിഗമരാജധാനീസു സപ്പേ കീളാപേത്വാ ജീവികം കപ്പേന്തോ ഏകം ഗാമകം പത്വാ തത്ഥ സപ്പേ കീളാപേത്വാ സന്തുട്ഠേഹി ഗാമവാസീഹി ദിന്നവിവിധോപായനോ ഖാദനീയഭോജനീയം ഖാ ദി ത്വാ ഭുഞ്ജിത്വാ തത്ഥേവ നിവാസം ഗഹേത്വാ നിസീദി. തസ്മിം കിര ഗാമകേ മനുസ്സാ യേഭുയ്യേന രതനത്തയമാമകാ. തസ്മാ തേ രത്തിഭാഗേ സയന്താ ‘‘നമോ ബുദ്ധായാതി’’ ഏവമാദിം വദന്തി. സോ പന അഹിതുണ്ഡികോ മിച്ഛാദിട്ഠികോ തിണ്ണം രതനാനം ഗുണം ന ജാനാതി. തസ്മാ തേസം തം വചനം സുത്വാ സയമ്പി കേ ളിം കുരുമാനോ പരിഹാസവസേന ‘‘നമോ ബുദ്ധായാതി’’ വദതി, അഥേകദിവസം സോ അത്തനോ കീളാപനസമത്ഥം ഏകം സപ്പം ഭത്ഥ തത്ഥ പരിയേസമാനോ ആഹിണ്ഡതി. തദാ ഏകോ നാഗരാജാ കസ്സപദസബലസ്സ ഥൂ പം ഗ ന്ത്വാ വന്ദിത്വാ ഏകം വമ്മികം പവിസതി. തം ദി സ്വാ അഹിതുണ്ഡികോ വേഗേനാ ഗന്ത്വാ നാഗരാജം ഗണ്ഹിതും മന്തം പരിജപി, സോ മന്തം സുത്വാ കുജ്ഝിത്വാ തം മാരേതുകാമോ അനുബന്ധി, തം ദി സ്വാ അഹിതുണ്ഡികോ വേ ഗേ ന പലായന്തോ ഏകസ്മിം പാസാണേ പക്ഖലിത്വാ പതമാനോ പുബ്ബേവുത്തപരിഹാസ വചനപരിചയേന ‘‘നമോ ബുദ്ധായാതി’’ വദന്തോ പതി. തസ്സ തം വചനം അനുബന്ധന്തസ്സ നാഗരഞ്ഞോ സോതപഥേ അമതംവിയ പതി. അഥ സോ രതനത്തയഗാരവേന തസ്മിം കോധം നിബ്ബാപേത്വാ സമ്മ മാ ഭായി. അഹം രതനത്തയമന്താനുഭാവപാസേന ബദ്ധോ. തസ്മാ തു വം ഡസിതും മയ്ഹം അനനുരൂപം. അജ്ജ ത യി പസന്നോമ്ഹി, പണ്ണാകാരം തേദമ്മി, ഗണ്ഹാതി തീണി സുവണ്ണപുപ്ഫാനി അദാസി. ഏവം രതനത്തയം നാമ ഘോരാസിവിസാനമ്പി സപ്പാനം മനം പീണേതി. ഹോന്തി ചേത്ഥ.

൧. ബുദ്ധോതി വചനം സേട്ഠം, ബുദ്ധോതി പദ മുത്തമം;

നത്ഥി തേന സമം ലോകേ, അഞ്ഞം സോതരസായനം.

൨. ധമ്മോതിവചനം സേട്ഠം, ധമ്മോതി പദമുത്തമം;

നത്ഥി തേന സമം ലോകേ, അഞ്ഞം സോതരസായനം.

൩. സങ്ഘോതി വചനം സേട്ഠം, സങ്ഘോതി പദമുത്തമം;

നത്ഥി തേന സമം ലോകേ, അഞ്ഞം സോതരസായനം.

൪. തസ്സ മുഖം മുഖം നാമ, യം വത്തതി മുഖേ സദാ;

ദുല്ലഭം ബുദ്ധവചനം, സബ്ബസമ്പത്തിദായകം.

൫. തസ്സ മനോ മനോ നാമ, യം ചേ മനസി വത്തതി;

ദുല്ലഭം ബുദ്ധവചനം, സബ്ബസമ്പത്തിദായകം.

൬. തമേവ കവചം ദേഹേ, തമേവ മണി കാമദോ;

തമേവ സുരഭീ ധേനു, തമേവ സുരപാദപോ.

൭. തസ്സേവ സോതം സോതംവ, യം സുണാതി ജനോ അയം

ദുല്ലഭം ബുദ്ധവചനം, സബ്ബസമ്പത്തിദായകം.

൮. ഏവം വിധോ രഗോ ഘോരോ, ഹളാഹളവിസോ സദാ;

ബുദ്ധോതി വചനം സുത്വാ, സന്തുട്ഠോ ദാസി ജീവിതം.

൯. സോണ്ണപുപ്ഫത്തയംചാപി, മഹഗ്ഘം ബഹലം അദാ;

പസ്സ ബുദ്ധോതി വാചായ, ആനുഭാവമഹന്തതന്തി.

അഥ നാഗരാജാ തസ്സ താനി സുവണ്ണപുപ്ഫാനി ദത്വാ ഏവമാഹ. സമ്മ ഏതേസു ഏകം തവ പുഞ്ഞത്തായ ഏകം മമ പുഞ്ഞത്ഥായ പൂജേഹി. ഇതരേന യാവജീവം സുഖേന ജീവന്തോ പുത്തദാരേ പോസേന്തോ ദാനാദീസു അപ്പമജ്ജന്തോ ജീവികം കപ്പേഹി. മാ ഹീനകമ്മേ ബ്യവടോ ഹോഹി, മിച്ഛാദിട്ഠിഞ്ച പജഹാതി ഓവദിത്വാ പക്കാമി. അഹിതുണ്ഡികോപി സോമനസ്സപ്പത്തോ തേന വുത്തനയേനേവ ദ്വിഹി പുപ്ഫേഹി ചേതിയം പൂജേത്വാ ഏകേന സ ഹ സ്സം ലഭിത്വാ തേ ന പുത്തദാരേ പോസേന്തോ കപണദ്ധികവണിബ്ബകാദീനം ദാനം ദേന്തോ അഹിതുണ്ഡികകമ്മം പഹാഹ കുസലമേവ ഉപചിനന്തോ ആയുപരിയോസാനേ സഗ്ഗപരായനോ അഹോസി.

൧൦. ഇതി അവിദിതസത്തോ കിഞ്ചി ബുദ്ധാനുഭാവം,

ലഭതി ധനവിസേസം യസ്സ നാമപ്പകാസാ;

വിദിതജനനികായോ കിന്നു തസ്സാനുഭാവം,

ന ലപതി ജിനനാമം കിച്ച മഞ്ഞപ്പഹായാതി.

അഹിതുണ്ഡികസ്സ വത്ഥും പഞ്ചമം.