൨. മിഗലുദ്ദകസ്സ വത്ഥുമ്ഹി അയമാനുപുബ്ബികഥാ

ഇതോ കിര ഏക തിംസതിമേ കപ്പേ സിഖീനാമ സമ്മാസമ്ബുദ്ധോ സമതിംസ പാരമിയോ പൂരേത്വാ പരമാതിസമ്ബോധിം പത്വാ സദേവകം ലോകം സംസാരകന്താരാ ഉത്താരേന്തോ ധമ്മരതനവസ്സം വസ്സാപേന്തോ ധമ്മഭേരിംപഹരന്തോ ധമ്മകേതും ഉസ്സാപേന്തോ ഏകസ്മിം സമയേ വിവേക മനുബ്രൂഹന്തോ അരഞ്ഞായതനം പാവിസി, പവിസിത്വാ ചപന സുപുപ്ഫിതനാഗപുന്നാഗാദിനാനാതരുസണ്ഡമണ്ഡിതേ സുഫുല്ലസുമനമാലതിപ്പഭുതിനാനാലതാകുലേ അനേകവിധദിപദചതുപ്പദസങ്ഘനിസേവിതേ രമണീയേ സീതലസിലാതലേ ചതുഗ്ഗുണം സങ്ഘാടിംപഞ്ഞപേത്വാ നിസീദി ഛബ്ബണ്ണരംസീഹി ദിസം പൂരയന്തോ, തദാ തത്ഥ ദേവബ്രഹ്മനാഗസുപണ്ണാദയോ സന്നിപതിത്വാ ദിബ്ബമയേഹി ഗന്ധമാലാദീഹി ഭഗവന്തം പൂജയമാനാ ഥോമയമാനാ നമസ്സമാനാ അട്ഠംസു, തസ്മിം പനസമാഗമേ ഭഗവാ മധുരസ്സരം നിച്ഛാരേന്തോ ബ്രഹ്മഘോസേന ചതുസച്ചപടിസംയുത്തം ധമ്മം ദേസേതി അമതവസ്സം വസ്സാപേന്തോവിയ. തദാ ഏകോ മിഗലുദ്ദകോ വനം പവിട്ഠോ മിഗസൂകരേ ഹന്ത്വാ മംസം ഖാദന്തോ തം ഠാനം പത്വാ അദ്ദസ ഭഗവന്തം ധമ്മം ദേസേന്തം. ദിസ്വാ ഏകമന്തം ഠിതോ ധമ്മം സുത്വാ ചിത്തം പസാദേത്വാ തതോ ചുതോ ദേവലോകേ നിബ്ബത്തിത്വാ ഛസു കാമസഗ്ഗേസു മനുസ്സേസുച അപരാപരം ഇസ്സരിയം അനുഭവന്തോ ഇമസ്മിം ബുദ്ധുപ്പാദേ സാവത്ഥിയം കുലഗേഹേ നിബ്ബത്തിത്വാ വിഞ്ഞുതം പത്തോ ഭഗവതോ സാസനേ പബ്ബജിത്വാ ഏകദിവസം ധമ്മം ദേസേന്തസ്സ ഭഗവതോ ചതുസച്ചപതി സംയുത്തം ധമ്മകഥം സുത്വാ ചതുപടിസമ്ഭിദാഹി അരഹത്തം പത്വാ ഏകദിവസം ഭിക്ഖുസങ്ഘമജ്ഝഗതോ അത്തനോ കതകമ്മപ്പകാസനേന പീതിവാചമുദാഹരി.

൧. ഏ ക തിം സേ ഇതോ കപ്പേ,

ലോകേ ഉപ്പജ്ജി നായകോ;

പത്തിംസ ലക്ഖണാതിണ്ണോ,

സമ്ബുദ്ധോ സ സിഖീവ്ഹയോ.

൨. ജലന്തോ ദീപരുക്ഖോവ, സൂരിയോവ നഭ മുഗ്ഗതോ;

മേരുരാജാവ സമ്ബുദ്ധോ, ജനേസഗ്ഗോ പതാപവാ.

൩. പൂരേത്വാ ധമ്മനാവായം, സ നാഥോ സകലം പജം;

പതിട്ഠപേന്തോ സംസാര, കന്താരാ സന്തിഭൂമിയം.

൪. ധമ്മകേതും സമുസ്സേന്തോ, ഹനന്തോ ധമ്മദുന്ദുഭിം;

സത്തേ ദുക്ഖാ പമോചേന്തോ, വസീ തത്ഥ ജിനോ വസീ.

൫. ഏകസ്മിം സമയേ നാഥോ,

ലോകപജ്ജോതകോ ജിനോ;

വിവേകകാമോ സമ്ബുദ്ധോ,

സുരമ്മം കാനനം ഗതോ.

൬. പുന്നാഗനാഗപൂഗാദി, നാനാപാദപസംകുലം;

ലതാ ലിങ്ഗിതസാഖാഹി, സാ മോദകുസുമായുതം.

൭. കുസുമാ മോദസമ്മത്ത, ഛപ്പദാലി നിസേവിതം;

നാനാമിഗ ഗണാകിണ്ണം, മയൂരഗണ നച്ചിതം.

൮. സീതലച്ഛോദികാസാധു, സുപതിത്ഥജലാസയം;

ആസാര സാരധാരാഹി, നിജ്ഝരാസത സംകുലം.

൯. ഗന്ത്വാന സോ മഹാരഞ്ഞം,

സീതലം സികതാതലം;

സിലാതലേ നിസിന്നോസി,

വിസ്സജ്ജേന്തോ ഛരംസിയോ.

൧൦. ദേവാ തത്ഥ സമാഗന്ത്വാ, പൂജേസും ദ്വിപദുത്തമം;

ദിബ്ബേഹി ഗന്ധമാലാഹി, നച്ചേഹി തുരിയേഹിച.

൧൧. ദേവദേവോ തദാ ദേവ, സങ്ഘമജ്ഝേ നിസീദിയ;

ചതുസച്ച മദേസേസി, നിച്ഛരം മധുരം ഗിരം.

൧൨. തദാഹം ലുദ്ദകോ ആസിം, മിഗസൂകരമാരകോ;

മിഗമംസേന ജിവാമി, തേന പോസേമി ദാരകേ [പോസേന്തോപുത്തദാരകേ ഇതികത്ഥചി].

൧൩. തദാഹം മിഗവം യാതോ,

സബാണോ സസരാസനോ;

അദ്ദസം വിരജം ബുദ്ധം,

ദേവസങ്ഘപുരക്ഖതം.

൧൪. ചന്ദംവ താരകാകിണ്ണം, മേരുംവണ്ണവമജ്ഝഗം;

വിരോചമാന മാസീനം, ചതുസച്ചപ്പകാസകം.

൧൫. ഏകപസ്സേ ഠിതോ തത്ഥ, അസ്സോസിം ധമ്മമുത്തമം;

തത്ഥ ചിത്തം പസാദേത്വാ, സോമനസ്സം പവേദയിം.

൧൬. ഏകതിംസേ ഇതോ കപ്പേ,

യം പുഞ്ഞം പസുതം മയാ;

തേനാഹം പുഞ്ഞകമ്മേന,

ജാതോസിം ദേവയോനിയം.

൧൭. സമ്പത്തിമനുഭുത്വാന, ഛകാമഗ്ഗേ പരാപരം;

ദേവസങ്ഘപരിബ്ബൂള്ഹോ, വിമാനേ രതനാമയേ.

൧൮. മനുസ്സേസുച യം അഗ്ഗം, തസ്സ ഭാഗീ ഭവാമഹം;

ഭോഗേ മേ ഊനതാ നത്ഥി, സദ്ധമ്മസവണേ ഫലം.

൧൯. ഇമസ്മിം ഭദ്ദകേ കപ്പേ,

സാവത്തിപുരമുത്തമേ;

അഡ്ഢേ മഹദ്ധനേ സാലേ,

ജാതോഹം ഉദിതേ കുലേ.

൨൦. മഹതാ പരിവാരേന, പത്തോ വുദ്ധിംച വിഞ്ഞുതം;

ചാരികം ചരമാനോഹം, പത്തോ ജേതവനം വരം.

൨൧. അദ്ദസം സഹ സിസ്സേഹി, നിസിന്നം സുഗതം തദാ;

അസ്സോസിം മധുരം ധമ്മം, ചതുസച്ചപ്പകാസകം.

൨൨. സുത്വാന മധുരം ധമ്മം, പബ്ബജിത്വാന സാസനേ;

അ ജരാ മരം സീതിഭൂതം, പത്തോ നിബ്ബാണമുത്തമം.

൨൩. സുതം ഏകമുഹുത്തം മേ, തദാ ധമ്മം സുദേസിതം;

തേനമ്ഹി ചതുരാപായേ, ന ജാതോ ന കുതോഭയം.

൨൪. കരമുക്ഖിപ്പ വക്ഖാമി, കരോഥേ കഗിരം മമ;

മമോ പമം കരിത്വാന, ധമ്മം സുണാഥ സാധുകന്തി.

ഏവഞ്ച പന വത്വാ സത്തേ ധമ്മസവണേ നിയോജേസീതി.

൨൫. ഇതി തനുതരകാലം സാധു ധമ്മം സുണിത്വാ,

അധിഗതവിഭവാനം ആനുഭാവം സുണിത്വാ;

ഭവവിഭവസുഖം ഭോ പത്ഥയന്താ കുസീതം,

ജഹഥ സുണഥ ധമ്മം ദുല്ലഭം ദുല്ലഭസ്സാതി.

മിഗലുദ്ദകസ്സ വത്ഥും ദുതിയം.