൮. ചീവരക്ഖന്ധക

ജീവകവത്ഥു

പുച്ഛാ – ഗഹപതിചീവരം ആവുസോ സാദിയിതും ഭഗവതാ കത്ഥ അനുഞ്ഞാതം, കം ആരബ്ഭ കിസ്മിം വത്ഥുസ്മിം അനുഞ്ഞാതം.

വിസ്സജ്ജനാ – രാജഗഹേ ഭന്തേ ജീവകം കോമാരഭച്ചം ആരബ്ഭ അനുഞ്ഞാതം, ജീവകോ ഭന്തേ കോമാരഭച്ചോ ഭിക്ഖൂനം ഗഹപതിചീവരം അനുജാനിതും ഭഗവന്തം യാചി, തസ്മിം ഭന്തേ വത്ഥുസ്മിം അനുഞ്ഞാതം.

പുച്ഛാ – ഛ ആവുസോ രജനാനി ഭഗവതാ കത്ഥ അനുഞ്ഞാതാനി, കിസ്മിം വത്ഥുസ്മിം അനുഞ്ഞാതാനി.

വിസ്സജ്ജനാ – രാജഗഹേ ഭന്തേ സമ്ബഹുലേ ഭിക്ഖൂ ആരബ്ഭ അനുഞ്ഞാതാനി, സമ്ബഹുലാ ഭന്തേ ഭിക്ഖൂ ഛകണേനപി പണ്ഡുമത്തികായപി ചീവരം രജിംസു, ചീവരം ദുബ്ബണ്ണം ഹോതി, തസ്മിം ഭന്തേ വത്ഥുസ്മിം അനുഞ്ഞാതാനി.

പുച്ഛാ – അച്ഛിന്നകാനി ആവുസോ ചീവരാനി ധാരേന്തസ്സ ദുക്കടം ഭഗവതാ കത്ഥ പഞ്ഞത്തം, കം ആരബ്ഭ കിസ്മിം വത്ഥുസ്മിം പഞ്ഞത്തം.

വിസ്സജ്ജനാ – രാജഗഹേ ഭന്തേ സമ്ബഹുലേ ഭിക്ഖൂ ആരബ്ഭ പഞ്ഞത്തം, സമ്ബഹുലാ ഭന്തേ ഭിക്ഖൂ അച്ഛിന്നകാനി ചീവരാനി ധാരേസും ദന്തകസാവാനി, തസ്മിം ഭന്തേ വത്ഥുസ്മിം പഞ്ഞത്തം.

പുച്ഛാ – കദാ ആവുസോ ഭഗവാ അനുഞ്ഞാസി ഛിന്നകം സങ്ഘാടിം ഛിന്നകം ഉത്തരാസങ്ഗം ഛിന്നകം അന്തരവാസകം.

വിസ്സജ്ജനാ – ദക്ഖിണാഗിരിതോ ഭന്തേ പച്ഛാഗതകാലേ ഭഗവാ അനുഞ്ഞാസി ഛിന്നകം സങ്ഘാടിം ഛിന്നകം ഉത്തരാസങ്ഗം ഛിന്നകം അന്തരവാസകം.

പുച്ഛാ – അഗ്ഗളം ച ആവുസോ തുന്നഞ്ച ഓവട്ടികഞ്ച കണ്ഡുസകഞ്ച ദള്ഹീകമ്മഞ്ച ഭഗവതാ കത്ഥ അനുഞ്ഞാതം, കം ആരബ്ഭ കിസ്മിം വത്ഥുസ്മിം അനുഞ്ഞാതം.

വിസ്സജ്ജനാ – ബാരാണസിയം ഭന്തേ അഞ്ഞതരം ഭിക്ഖും ആരബ്ഭ അനുഞ്ഞാതം, അഞ്ഞതരോ ഭന്തേ ഭിക്ഖു അഗ്ഗളം അച്ഛുപേസി, തസ്മിം ഭന്തേ വത്ഥുസ്മിം അനുഞ്ഞാതം.

പുച്ഛാ – വസ്സികസാടികാ ച ആവുസോ ആഗന്തുകഭത്തഞ്ച ഗമികഭത്തഞ്ച ഗിലാനഭത്തഞ്ച ഗിലാനുപട്ഠാകഭത്തഞ്ച ഗിലാനഭേസജ്ജഞ്ച ധുവയാഗു ച ഭിക്ഖുനിസങ്ഘസ്സ ഉദകസാടികാചാതി ഇമാ അട്ഠ ഭഗവതാ കത്ഥ അനുഞ്ഞാതാ, കം ആരബ്ഭ കിസ്മിം വത്ഥുസ്മിം അനുഞ്ഞാതാ.

വിസ്സജ്ജനാ – സാവത്ഥിയം ഭന്തേ വിസാഖം മിഗാരമാതരം ആരബ്ഭ അനുഞ്ഞാതാ, വിസാഖാ ഭന്തേ മിഗാരമാതാ ഭഗവന്തം അട്ഠവരാനി യാചി, തസ്മിം ഭന്തേ വത്ഥുസ്മിം അനുഞ്ഞാതാ.

പുച്ഛാ – ഭഗവതാ ആവുസോ മാതാപിതൂനം ദാനം അനുജാനിത്വാ സദ്ധാദേയ്യം വിനിപാതേന്തസ്സ ദുക്കടം കത്ഥ പഞ്ഞത്തം, കം ആരബ്ഭ കിസ്മിം വത്ഥുസ്മിം പഞ്ഞത്തം.

വിസ്സജ്ജനാ – സാവത്ഥിയം ഭന്തേ അഞ്ഞതരം ഭിക്ഖും ആരബ്ഭ പഞ്ഞത്തം, അഞ്ഞതരസ്സ ഭന്തേ ഭിക്ഖുനോ ബഹും ചീവരം ഉപ്പന്നം അഹോസി, സോ ച തംചീവരം മാതാപിതൂനം ദാതുകാമോ അഹോസി, തസ്മിം ഭന്തേ വത്ഥുസ്മിം പഞ്ഞത്തം.

മാതാപിതരോതി ഖോ ഭിക്ഖവേ ദദമാനേ കിം വദേയ്യാമ, അനുജാനാമി ഭിക്ഖവേ മാതാപിതൂനം ദാതും, ന ച ഭിക്ഖവേ സദ്ധാദേയ്യം വിനിപാതേതബ്ബം, യോ വിനിപാതേയ്യ ആപത്തി ദുക്കടസ്സ –

പുച്ഛാ – അഞ്ഞത്ര വസ്സം വുട്ഠേന ആവുസോ അഞ്ഞത്ര ചീവരഭാഗം സാദിയന്തസ്സ ദുക്കടം ഭഗവതാ കത്ഥ പഞ്ഞത്തം, കം ആരബ്ഭ കിസ്മിം വത്ഥുസ്മിം പഞ്ഞത്തം.

വിസ്സജ്ജനാ – സാവത്ഥിയം ഭന്തേ ആയസ്മന്തം ഉപനന്ദം സക്യപുത്തം ആരബ്ഭ പഞ്ഞത്തം, ആയസ്മാ ഭന്തേ ഉപനന്ദോ സക്യപുത്തോ അഞ്ഞത്ര വസ്സം വുട്ഠോ അഞ്ഞത്ര ചീവരഭാഗം സാദിയി, തസ്മിം ഭന്തേ വത്ഥുസ്മിം പഞ്ഞത്തം.

പുച്ഛാ – അനാഥകം ആവുസോ ഭിക്ഖും ഗിലാനം ന ഉപട്ഠഹന്തസ്സ ദുക്കടം ഭഗവതാ കത്ഥ പഞ്ഞത്തം, കം ആരബ്ഭ കിസ്മിം വത്ഥുസ്മിം പഞ്ഞത്തം.

വിസ്സജ്ജനാ – സാവത്ഥിയം ഭന്തേ അഞ്ഞതരം ഭിക്ഖും ആരബ്ഭ പഞ്ഞത്തം, ഭഗവതി ഭന്തേ സാവത്ഥിയം വിഹരതി അഞ്ഞതരസ്സ ഭിക്ഖുനോ കുച്ഛിവികാരാബാധോ അഹോസി, സോ സകേ മുത്തകരീസേ പലിപന്നോ സയി, തസ്മിം ഭന്തേ വത്ഥുസ്മിം പഞ്ഞത്തം.

പുച്ഛാ – നഗ്ഗിയം ആവുസോ തിത്ഥിയസമാദാനം സമാദിയന്തസ്സ ഥുല്ലച്ചയം ഭഗവതാ കത്ഥ പഞ്ഞത്തം, കം ആരബ്ഭ കിസ്മിം വത്ഥുസ്മിം പഞ്ഞത്തം.

വിസ്സജ്ജനാ – സാവത്ഥിയം ഭന്തേ അഞ്ഞതരം ഭിക്ഖും ആരബ്ഭ പഞ്ഞത്തം, അഞ്ഞതരോ ഭന്തേ ഭിക്ഖു നഗ്ഗിയം തിത്ഥിയസമാദാനം സമാദിയി, തസ്മിം ഭന്തേ വത്ഥുസ്മിം പഞ്ഞത്തം.

പുച്ഛാ – സബ്ബനീലകാനി വാ ആവുസോ ചീവരാനി സബ്ബപീതകാനി വാ സബ്ബലോഹിതകാനി വാ സബ്ബമഞ്ജിട്ഠകാനി വാ സബ്ബകണ്ഹാനിവാതി ഏവരൂപാനി ചീവരാനി ധാരേന്തസ്സ ദുക്കടം ഭഗവതാ കത്ഥ പഞ്ഞത്തം, കം ആരബ്ഭ കിസ്മിം വത്ഥുസ്മിം പഞ്ഞത്തം.

വിസ്സജ്ജനാ – സാവത്ഥിയം ഭന്തേ ഛബ്ബഗ്ഗിയേ ഭിക്ഖൂ ആരബ്ഭ പഞ്ഞത്തം, ഛബ്ബഗ്ഗിയാ ഭന്തേ ഭിക്ഖൂ സബ്ബനീലകാദീനി ചീവരാനി ധാരേസും, തസ്മിം ഭന്തേ വത്ഥുസ്മിം പഞ്ഞത്തം.

പുച്ഛാ – കഞ്ചുകം വാ ആവുസോ വേഠനം വാ ധാരേന്തസ്സ ദുക്കടം ഭഗവതാ കത്ഥ പഞ്ഞത്തം, കം ആരബ്ഭ കിസ്മിം വത്ഥുസ്മിം പഞ്ഞത്തം.

വിസ്സജ്ജനാ – സാവത്ഥിയം ഭന്തേ ഛബ്ബഗ്ഗിയേവ ഭിക്ഖൂ ആരബ്ഭ പഞ്ഞത്തം, ഛബ്ബഗ്ഗിയാ ഭന്തേ ഭിക്ഖൂ കഞ്ചുകമ്പി ധാരേസും വേഠനമ്പി ധാരേസും, തസ്മിം ഭന്തേ വത്ഥുസ്മിം പഞ്ഞത്തം.

പുച്ഛാ – ചീവരസഞ്ഞുത്തം പുച്ഛിസ്സം, സനിദാനം സനിദ്ദേസം. സമുക്കട്ഠപദാനം ആവുസോ കതി ആപത്തിയോ.

വിസ്സജ്ജനാ – ചീവരസഞ്ഞുത്തം വിസ്സജ്ജിസ്സം, സനിദാനം സനിദ്ദേസം. സമുക്കട്ഠപദാനം ഭന്തേ തിസ്സോ ആപത്തിയോ.