൪. പവാരണാക്ഖന്ധക

പുച്ഛാ – വസ്സം വുട്ഠാനം ആവുസോ ഭിക്ഖൂനം തീഹി ഠാനേഹി പവാരിതും ഭഗവതാ കത്ഥ പഞ്ഞത്തം, കം ആരബ്ഭ കിസ്മിം വത്ഥുസ്മിം പഞ്ഞത്തം.

വിസ്സജ്ജനാ – സാവത്ഥിയം ഭന്തേ സമ്ബഹുലേ ഭിക്ഖൂ ആരബ്ഭ അനുഞ്ഞാതം, സമ്ബഹുലാ ഭന്തേ ഭിക്ഖൂ സന്ദിട്ഠാ സമ്ഭത്താ അന്തോവസ്സം നേവ ആലപിംസു ന സല്ലപിംസു, തസ്മിം ഭന്തേ വത്ഥുസ്മിം അനുഞ്ഞാതം.

അനുജാനാമി ഭിക്ഖവേ വസ്സം വുട്ഠാനം ഭിക്ഖൂനം തീഹി ഠാനേഹി പവാരേതും, ദിട്ഠേവ വാ സുതേന വാ പരിസങ്കായ വാ.

പുച്ഛാ – കതി ആവുസോ പവാരണാ ദിവസവസേന ച പുഗ്ഗലവസേന ച കാതബ്ബാകാരവസേന ച.

വിസ്സജ്ജനാ – ദിവസവസേന ഭന്തേ തിസ്സോ പവാരണാ, തഥാ പുഗ്ഗലവസേന കാതബ്ബാകാരവസേനച.

പുച്ഛാ – കതീനം ആവുസോ സങ്ഘേ പവാരേതും ഭഗവതാ അനുഞ്ഞാതം, കതീനം പനാവുസോ അഞ്ഞമഞ്ഞം പവാരേതും ഭഗവതാ അനുഞ്ഞാതം.

വിസ്സജ്ജനാ – പഞ്ചന്നം ഭന്തേ ഭിക്ഖൂനം സങ്ഘേ പവാരേതും ഭഗവതാ അനുഞ്ഞാതം, ചതുന്നം വാ ഭന്തേ തിണ്ണം വാ ദ്വിന്നം വാ അഞ്ഞമഞ്ഞം പവാരേതും അനുഞ്ഞാതം.

പുച്ഛാ – ഏകേന പനാവുസോ വസ്സംവുട്ഠേന ഭിക്ഖുനാ കഥം പടിപജ്ജിതബ്ബന്തി ഭഗവതാ അനുഞ്ഞാതം.

വിസ്സജ്ജനാ – ഏകേന പന ഭന്തേ ഭിക്ഖുനാ ‘‘അജ്ജ മേ പവാരണാ’’തി അധിട്ഠാതബ്ബന്തി ഭഗവതാ അനുഞ്ഞാതം.

പുച്ഛാ – പവാരണം പുച്ഛിസ്സം, സനിദാനം സനിദ്ദേസം. സമുക്കട്ഠപദാനം ആവുസോ കതി ആപത്തിയോ.

വിസ്സജ്ജനാ – പവാരണം വിസ്സജ്ജിസ്സം, സനിദാനം സനിദ്ദേസം. സമുക്കട്ഠപദാനം ഭന്തേ തിസ്സോ ആപത്തിയോ.