൫. ചമ്മക്ഖന്ധക

സോണമഥേര വത്ഥു

പുച്ഛാ – ഉപാഹനം ആവുസോ ഭഗവതാ കത്ഥ അനുഞ്ഞാതം, കം ആരബ്ഭ കിസ്മിം വത്ഥുസ്മിം അനുഞ്ഞാതം.

വിസ്സജ്ജനാ – രാജഗഹേ ഭന്തേ ആയസ്മന്തം സോണം ആരബ്ഭ അനുഞ്ഞാതം, ആയസ്മതോ ഭന്തേ സോണസ്സ അച്ചാരദ്ധവീരിയസ്സ ചങ്കമതോ പാദാ ഭിജ്ജിംസു, ചങ്കമോ ലോഹിതേന ഫുടോ അഹോസി, തസ്മിം ഭന്തേ വത്ഥുസ്മിം അനുഞ്ഞാതം.

പുച്ഛാ – സബ്ബനീലികാ വാ ആവുസോ സബ്ബപീതികാ വാ സബ്ബലോഹിതികാ വാ സബ്ബമഞ്ജിട്ഠികാ വാ സബ്ബകണ്ഹാ വാ സബ്ബമഹാരങ്ഗരത്താ വാ സബ്ബമഹാനാമരത്താ വാ ഉപാഹനായോ ധാരേന്തസ്സ ദുക്കടം ഭഗവതാ കത്ഥ കം ആരബ്ഭ കിസ്മിം വത്ഥുസ്മിം പഞ്ഞത്തം.

വിസ്സജ്ജനാ – രാജഗഹേ ഭന്തേ ഛബ്ബഗ്ഗിയേ ഭിക്ഖൂ ആരബ്ഭ പഞ്ഞത്തം, ഛബ്ബഗ്ഗിയാ ഭന്തേ ഭിക്ഖൂ സബ്ബനീലികായോ ഉപാഹനായോ ധാരേസും, സബ്ബപീതികായോ സബ്ബലോഹിതികായോ സബ്ബമഞ്ജിട്ഠികായോ സബ്ബകണ്ഹായോ സബ്ബമഹാരങ്ഗരത്താ സബ്ബമഹാനാമരത്തായോപി ഉപാഹനായോ ധാരേസും, തസ്മിം ഭന്തേ വത്ഥുസ്മിം പഞ്ഞത്തം.

പുച്ഛാ – ഖല്ലകബന്ധാ വാ ആവുസോ പുടബന്ധാ വാ പാലിഗുണ്ഠിമാ വാ തൂലപുണ്ണികാ വാ തിത്തിരപത്തികാ വാ മേണ്ഡവിസാണവദ്ധികാ വാ അജവിസാണവദ്ധികാ വാ വിച്ഛികാളികാ വാ മോരപിഞ്ഛ പരിസിബ്ബികാ വാ ചിത്രാ വാ ഉപാഹനായോ ധാരേന്തസ്സ ദുക്കടം ഭഗവതാ കത്ഥ പഞ്ഞത്തം, കം ആരബ്ഭ കിസ്മിം വത്ഥുസ്മിം പഞ്ഞത്തം.

വിസ്സജ്ജനാ – രാജഗഹേ ഭന്തേ ഛബ്ബഗ്ഗിയേ ഭിക്ഖൂ ആരബ്ഭ പഞ്ഞത്തം, ഛബ്ബഗ്ഗിയാ ഭന്തേ ഭിക്ഖൂ ഖല്ലകബന്ധാ ഉപാഹനായോപി ധാരേസും, പുടബന്ധാ ഉപാഹനായോപി ധാരേസും, പാലിഗുണ്ഠിമാ ഉപാഹനായോപി ധാരേസും, തൂലപുണ്ണികാ ഉപാഹനായോപി ധാരേസും, തിത്തിരപത്തികാ ഉപാഹനായോപി ധാരേസും, മേണ്ഡവിസാണവദ്ധികാ ഉപാഹനായോപി ധാരേസും, അജവിസാണവദ്ധികാ ഉപാഹനായോപി ധാരേസും, വിച്ഛികാളികാ ഉപാഹനായോപി ധാരേസും, മോരപിഞ്ഛ പരിസിബ്ബിതാ ഉപാഹനായോ ധാരേസും, ചിത്രാ ഉപാഹനായോപി ധാരേസും, തസ്മിം ഭന്തേ വത്ഥുസ്മിം പഞ്ഞത്തം.

പുച്ഛാ – കട്ഠപാദുകായോ ആവുസോ ധാരേന്തസ്സ ദുക്കടം ഭഗവതാ കത്ഥ കം ആരബ്ഭ കിസ്മിം വത്ഥുസ്മിം പഞ്ഞത്തം.

വിസ്സജ്ജനാ – രാജഗഹേ ഭന്തേ ഛബ്ബഗ്ഗീയേവ ഭിക്ഖൂ ആരബ്ഭ പഞ്ഞത്തം, ഛബ്ബഗ്ഗിയാ ഭന്തേ ഭിക്ഖൂ രത്തിയാ പച്ചൂസസമയം പച്ചുട്ഠായ കട്ഠപാദുകായോ അഭിരുഹിത്വാ അജ്ഝോകാസേ ചങ്കമന്തി ഉച്ചാസദ്ദാ മഹാസദ്ദാ ഖടഖടസദ്ദാ അനേകവിഹിതം തിരച്ഛാനകഥം കഥേന്താ, തസ്മിം ഭന്തേ വത്ഥുസ്മിം പഞ്ഞത്തം.

പുച്ഛാ – യാനേന ആവുസോ യായന്തസ്സ ദുക്കടം ഭഗവതാ കത്ഥ പഞ്ഞത്തം, കം ആരബ്ഭ കിസ്മിം വത്ഥുസ്മിം പഞ്ഞത്തം.

വിസ്സജ്ജനാ – സാവത്ഥിയം ഭന്തേ ഛബ്ബഗ്ഗിയേ ഭിക്ഖൂ ആരബ്ഭ പഞ്ഞത്തം, ഛബ്ബഗ്ഗിയാ ഭന്തേ ഭിക്ഖൂ യാനേന യായിംസു, തസ്മിം ഭന്തേ വത്ഥുസ്മിം പഞ്ഞത്തം.

പുച്ഛാ – ഗിലാനസ്സ ആവുസോ യാനം ഭഗവതാ കത്ഥ അനുഞ്ഞാതം, കം ആരബ്ഭ കിസ്മിം വത്ഥുസ്മിം അനുഞ്ഞാതം.

വിസ്സജ്ജനാ – സാവത്ഥിയം ഭന്തേ അഞ്ഞതരം ഗിലാനം ഭിക്ഖും ആരബ്ഭ അനുഞ്ഞാതം, അഞ്ഞതരോ ഭന്തേ ഭിക്ഖു കോസലേസു ജനപദേ സാവത്ഥിം ഗച്ഛന്തോ ഭഗവന്തം ദസ്സനായ അന്തരാമഗ്ഗേ ഗിലാനോ കുക്കുച്ചായന്തോ യാനം നാഭിരുഹി, തസ്മിം ഭന്തേ വത്ഥുസ്മിം അനുഞ്ഞാതം.

പുച്ഛാ – ഉച്ചാസയനമഹാസയനാനി ആവുസോ ധാരേന്തസ്സ ദുക്കടം ഭഗവതാ കത്ഥ പഞ്ഞത്തം, കം ആരബ്ഭ കിസ്മിം വത്ഥുസ്മിം പഞ്ഞത്തം.

വിസ്സജ്ജനാ – സാവത്ഥിയം ഭന്തേ ഛബ്ബഗ്ഗിയേ ഭിക്ഖൂ ആരബ്ഭ പഞ്ഞത്തം, ഛബ്ബഗ്ഗിയാ ഭന്തേ ഭിക്ഖൂ ഉച്ചാസയനമഹാസയനാനി ധാരേസും, തസ്മിം ഭന്തേ വത്ഥുസ്മിം പഞ്ഞത്തം.

പുച്ഛാ – ഗോചമ്മാനി ആവുസോ ധാരേന്തസ്സ ദുക്കടം ഭഗവതാ കത്ഥ പഞ്ഞത്തം, കം ആരബ്ഭ കിസ്മിം വത്ഥുസ്മിം പഞ്ഞത്തം.

വിസ്സജ്ജനാ – സാവത്ഥിയം ഭന്തേ അഞ്ഞതരം പാപഭിക്ഖും ആരബ്ഭ പഞ്ഞത്തം, അഞ്ഞതരോ ഭന്തേ ഭിക്ഖു പാണാതിപാതേ സമാദപേസി, തസ്മിം ഭന്തേ വത്ഥുസ്മിം പഞ്ഞത്തം.

പുച്ഛാ – പച്ചന്തിമേസു ആവുസോ ജനപദേസു വിനയധരപഞ്ചമേന ഗണേന ഉപസമ്പദാ ച ഗുണങ്ഗുണൂപഹനഞ്ച ധുവനഹാനഞ്ച ചമ്മാനി അത്ഥരണാനി ച നിസ്സീമഗതാനം ചീവരദാനഞ്ചാതി ഇമാനി പഞ്ച ഭഗവതാ കത്ഥ അനുഞ്ഞാതാനി, കം ആരബ്ഭ കിസ്മിം വത്ഥുസ്മിം അനുഞ്ഞാതാനി.

വിസ്സജ്ജനാ – സാവത്ഥിയം ഭന്തേ ആയസ്മന്തം സോണം കുടികണ്ണം ആരബ്ഭ അനുഞ്ഞാതാ, ആയസ്മാ ഭന്തേ സോണോ കുടികണ്ണോ ഏതാനി പഞ്ചവത്ഥൂനി ആയസ്മതോ മഹാകച്ചാനസ്സ വചനേന ഭഗവന്തം യാചി, തസ്മിം ഭന്തേ വത്ഥുസ്മിം അനുഞ്ഞാതാ.

പുച്ഛാ – ചമ്മസഞ്ഞുത്തം പുച്ഛിസ്സം, സനിദാനം സനിദ്ദേസം. സമുക്കട്ഠപദാനം ആവുസോ കതി ആപത്തിയോ.

വിസ്സജ്ജനാ – ചമ്മസഞ്ഞുത്തം വിസ്സജ്ജിസ്സം, സനിദാനം സനിദ്ദേസം. സമുക്കട്ഠപദാനം ഭന്തേ തിസ്സോ ആപത്തിയോ.