വങ്ഗീസസംയുത്ത

ആനന്ദസുത്ത

പുച്ഛാ – വങ്ഗീസസംയുത്തേ പനാവുസോ ചതുത്ഥം സംങ്ഗീതം ആനന്ദസുത്തം കത്ഥകം ആരബ്ഭ കിസ്മിം വത്ഥുസ്മിം കേന കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ ആയസ്മന്തം വങ്ഗീസത്ഥേരം ആരബ്ഭ ആയസ്മതാ ആനന്ദത്ഥേരേന ധമ്മഭണ്ഡാഗാരികേന ഭാസിതം. ആയസ്മതാ ഭന്തേ വങ്ഗീസോ ആയസ്മന്തം ആനന്ദം ഗാഥായ അജ്ഝഭാസി–

‘‘കാമരാഗേന ഡയ്ഹാമി, ചിത്തം മേ പരിഡയ്ഹതി;

സാധു നിബ്ബാപനം ബ്രൂഹി, അനുകമ്പായ ഗോതമാ’’തി.

തസ്മിം ഭന്തേ വത്ഥുസ്മിം–

‘‘സഞ്ഞായ വിപരിയേസാ, ചിത്തം തേ പരിഡയ്ഹതി;

നിമിത്തം പരിവജ്ജേഹി, സുഭം രാഗൂപസംഹിതം;

സങ്ഖാരേ പരതോ പസ്സ, ദുക്ഖതോ മാ ച അത്തതോ;

നിബ്ബാപേഹി മഹാരാഗം, മാ ഡയ്ഹിത്ഥോ പുനപ്പുനം;

അസുഭായ ചിത്തം ഭാവേഹി, ഏകഗ്ഗം സുസമാഹിതം;

സതി കായഗതാ ത്യത്ഥു, നിബ്ബിദാബഹുലോ ഭവ;

അനിമിത്തഞ്ച ഭാവേഹി, മാനാനുസയമുജ്ജഹ;

തതോ മാനാഭിസമയാ, ഉപസന്തോ ചരിസ്സസീ’’തി.

ഏവം ഖോ ഭന്തേ ആയസ്മതാ ആനന്ദത്ഥേരേന ധമ്മഭണ്ഡാഗാരികേന ഭാസിതം.

കാമരാഗേന ഡയ്ഹാമി, ചിത്തം മേ പരിഡയ്ഹതി;

സാധു നിബ്ബാപനം ബ്രൂഹി, അനുകമ്പായ ഗോതമ–

സഞ്ഞായ വിപരിയേസാ, ചിത്തം തേ പരിഡയ്ഹതി;

നിമിത്തം പരിവജ്ജേഹി, സുഭം രാഗൂപസംഹിതം.

സങ്ഖാരേ പരതോപസ്സ, ദുക്ഖതോ മാ ച അത്തതോ;

നിബ്ബാപേഹി മഹാരാഗം, മാ ഡയ്ഹിത്ഥോ പുനപ്പുനം.

അസുഭായ ചിത്തം ഭാവേഹി, ഏകഗ്ഗം സുസമാഹിതം;

സതി കായഗതാ ത്യത്ഥു, നിബ്ബിദാബഹുലോ ഭവ.

അനിമിത്തഞ്ച ഭാവേഹി, മാനാനുസയമുജ്ജഹ;

തതോ മാനാഭിസമയാ, ഉപസന്തോ ചരിസ്സസി.

വങ്ഗീസസുത്ത

പുച്ഛാ – തത്ഥ ആവുസോ ദ്വാദസമം വങ്ഗീസസുത്തം കത്ഥ കേന കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ ആയസ്മതാ വങ്ഗീസത്ഥേരേന അചിര അരഹത്തപ്പത്തേന വിമുത്തിസുഖപടിസംവേദിനാ–

‘‘കാവേയ്യമത്താ വിചരിമ്ഹ പുബ്ബേ, ഗാമാഗാമം പുരാപുരം,

അഥദ്ദസാമ സമ്ബുദ്ധം, സദ്ധാ നോ ഉപപജ്ജഥ;

സോ മേ ധമ്മ മദേസേസി, ഖന്ധായതന ധാതുയോ;

തസ്സാഹം ധമ്മം സുത്വാന, പബ്ബജിം അനഗാരിയം;

ബഹുന്നം വത അത്ഥായ, ബോധിം അജ്ഝഗമാ മുനി;

ഭിക്ഖൂനം ഭിക്ഖൂനീനഞ്ച, യേ നിയാമഗതദ്ദസാ;

സ്വാഗതം വത മേ ആസി, മമ ബുദ്ധസ്സ സന്തികേ;

തിസ്സോ വിജ്ജാ അനുപ്പത്താ, കതം ബുദ്ധസ്സ സാസനം;

പുബ്ബേ നിവാസം ജാനാമി, ദിബ്ബചക്ഖും വിസോധിതം;

തേവിജ്ജോ ഇദ്ധിപത്തോമ്ഹി, ചേതോപരിയായ കോവിദോ.

ഏവം ഖോ ഭന്തേ ഉദാനവസേന ഭാസിതം.

കാവേയ്യ മത്താ വിചരിമ്ഹ പുബ്ബേ; ഗാമാഗാമംപുരാപുരം,

അഥദ്ദസാമ സമ്ബുദ്ധം, സദ്ധാ നോ ഉപപജ്ജഥ.

സോ മേ ധമ്മമദേസേസി, ഖന്ധായതന ധാതുയോ;

തസ്സാഹം ധമ്മം സുത്വാന, പബ്ബജിം അനഗാരിയം.

ബഹുന്നം വത അത്ഥായ, ബോധിം അജ്ഝഗമാ മുനി;

ഭിക്ഖൂനം ഭിക്ഖുനീ നഞ്ച, യേ നിയാമഗതദ്ദസാ.

സ്വാഗതം വത മേ ആസി, മമ ബുദ്ധസ്സ സന്തികേ;

തസ്സോ വിജ്ജാ അനുപ്പത്താ, കതം ബുദ്ധസ്സ സാസനം.

പുബ്ബേനിവാസം ജാനാമി; ദിബ്ബചക്ഖു വിസോധിതം;

തേവിജ്ജോ ഇദ്ധിപത്തോമ്ഹി, ചേതോപരിയായകോവിദോ.