യക്ഖസംയുത്ത

ഇന്ദകസുത്ത

പുച്ഛാ – യക്ഖസംയുത്തേ പനാവുസോ പഠമം സംഗീതം ഇന്ദകസുത്തം ഭഗവതാ കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – രാജഗഹേ ഭന്തേ ഇന്ദകൂടേ പബ്ബതേ ഇന്ദകസ്സ യക്ഖസ്സ ഭവനേ ഇന്ദകം യക്ഖം ആരബ്ഭ ഭാസിതം. ഇന്ദകോ ഭന്തേ യക്ഖോ അത്തവാദോ ഭഗവന്തം ഉപസങ്കമിത്വാ ഗാഥായ അജ്ഝഭാസി–

‘‘രൂപം ന ജീവന്തി വദന്തി ബുദ്ധാ,

കഥം ന്വയം വിന്ദതിമം സരീരം;

കുതസ്സ അട്ഠീയകപിണ്ഡമേഭി,

കഥം ന്വയം സജ്ജതി ഗബ്ഭരസ്മി’’ന്തി.

തസ്മിം ഭന്തേ വത്ഥുസ്മിം–

‘‘പഠമം കലലം ഹോതി, കലലാ ഹോതി അബ്ബുദം,

അബ്ബുദാ ജായതേ പേസി, പേസി നിബ്ബത്തതീ ഘനോ;

ഘനാ പസാഖാ ജായന്തി, കേസാ ലോമാ നഖാപിച;

യഞ്ചസ്സ ഭുഞ്ജതീ മാതാ, അന്നം പാനഞ്ച ഭോജനം;

തേന സോ തത്ഥ യാപേതി, മാതുകുച്ഛിഗതോനരോ’’തി.

ഏവം ഖോ ഭന്തേ ഭഗവതാ ഭാസിതം.

ആളവകസുത്ത

പുച്ഛാ – തേനാവുസോ ഭഗവതാ…പേ… സമ്മാസമ്ബുദ്ധേന യക്ഖസംയുത്തേ ആളവകസുത്തം കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – ആളവിയം ഭന്തേ ആളവകസ്സ യക്ഖസ്സ ഭവനേ ആളവകം യക്ഖം ആരബ്ഭ ഭാസിതം. ആളവകോ ഭന്തേ യക്ഖോ ഭഗവന്തം ഗാഥായ അജ്ഝഭാസി–

കിം സൂധവിത്തം പുരിസസ്സ സേട്ഠം,

കിം സു സുചിണ്ണം സുഖമാവഹാതി;

കിം സു ഹവേ സാദുതരം രസാനം,

കഥം ജീവിം ജീവിതാമാഹു സേട്ഠന്തി.

തസ്മിം ഭന്തേ വത്ഥുസ്മിം–

സദ്ധീച വിത്തം പുരിസസ്സ സേട്ഠം,

ധമ്മോ സുചിണ്ണോ സുഖമാവഹാതി;

സച്ചം ഹവേ സാദുതരം രസാനം,

പഞ്ഞാജീവിം ജീവിതമാഹു സേട്ഠന്തി.

ഏവമാദിനാ ഭന്തേ ഭഗവതാ ഭാസിതം.

ന ഖ്വാഹം തം ആവുസോ നിക്ഖമിസ്സാമി, യം തേ കരണീയം, തം കരോഹി,

പഞ്ഹം തം സമണ പുച്ഛിസ്സാമി, സചേ മേ ന ബ്യാകരിസ്സസി, ചിത്തം വാ തേ ഖിപിസ്സാമി, ഹദയം വാ തേ ഫാലേസ്സാമി, പാദേസു വാ ഗഹേത്വാ പാരഗങ്ഗായ ഖിപിസ്സാമി–

കിം സൂഖ വിത്തം പുരിസസ്സ സേട്ഠം, കിം സു സുചിണ്ണം സുഖമാവഹാതി;

കിം സു ഹവേ സാദുഭരം രസാനം, കഥം ജീവിം ജീവിതമാഹു സേട്ഠം–

സദ്ധീധ വിത്തം പുരിസസ്സ സേട്ഠം, ധമ്മോ സുചിണ്ണോ സുഖമാവഹാതി;

സച്ചം ഹവേ സാദുതരം രസാനം, പഞ്ഞാജീവിം ജീവിതമാഹു സേട്ഠം;

കഥംസു തരതി ഓഘം, കഥംസു തരതി അണ്ണവം;

കഥംസു ദുക്ഖ മച്ചേതി, കഥംസു പരിസുജ്ഝതി.

സദ്ധായ തരതി ഓഘം, അപ്പമാദേന അണ്ണവം;

വീരിയേന ദുക്ഖ മച്ചേതി, പഞ്ഞായ പരിസുജ്ഝതി–

കഥംസു ലഭതേ പഞ്ഞം, കഥംസു വിന്ദതേ ധനം;

കഥംസു കിത്തിം പപ്പോതി, കഥം മിത്താനി ഗന്ഥതി;

അസ്മാ ലോകാ പരം ലോകം, കഥം പേച്ച ന സോചതി–

സദ്ദഹാനോ അരഹതം, ധമ്മം നിബ്ബാനപത്തിയാ;

സുസ്സൂസം ലഭതേ പഞ്ഞം, അപ്പമത്തോ വിചക്ഖണോ;

പതിരൂപകാരീ ധുരവാ, ഉട്ഠാതാ വിന്ദതേ ധനം;

സച്ചേന കിത്തിം പപ്പോതി, ദദം മിത്താനി ഗന്ഥതി;

അസ്മാ ലോകാ പരം ലോകം, ഏവം പേച്ച ന സോചതി;

യസ്സേതേ ചതുരോ ധമ്മാ, സദ്ധസ്സ ഘരമേസിനോ;

സച്ചം ധമ്മോ ധിതി ചാഗോ, സ വേ പേച്ചന സോചതി–