കായഖമനീയ-നിദ്ദേസ

൨൩൪. അഭിവാദന-സീലിസ്സ,

നിച്ചം വുഡ്ഢാപചായിനോ;

ചത്താരോ ധമ്മാ വഡ്ഢന്തി,

ആയു വണ്ണോ സുഖം ബലം.

൨൩൫. പഞ്ചിമേ ഭിക്ഖവേ ധമ്മാ ആയുസ്സാ, കതമേ പഞ്ച. സപ്പായ-കാരീ ഹോതി. സപ്പായേച മത്തം ജാനാതി. പരിണത്തഭോജീ ച ഹോതി. കാല-ചാരീ ച, ബ്രഹ്മ-ചാരീച. ഇമേ ഖോ ഭിക്ഖവേ പഞ്ച ധമ്മാ ആയുസ്സാതി.

൨൩൬. പഞ്ചിമേ ഭിക്ഖവേ ധമ്മാ ആയുസ്സാ, കതമേ പഞ്ച. സപ്പായ-കാരീ ഹോതി. സപ്പായേച മത്തം ജാനാതി. പരിണതഭോജീചഹോതി. സീലവാച, കല്യാണ മിത്തോച. ഇമേ ഖോ ഭിക്ഖവേ പഞ്ച ധമ്മാ ആയുസ്സാതി.

൨൩൭. പഞ്ച-സീലം സമാദായ,

സമം കത്വാ ദിനേ ദിനേ;

സതിമാ പഞ്ഞവാ ഹുത്വാ,

ചരേ സബ്ബിരിയാപഥേ.

൨൩൮. പഞ്ചിമേ ഭിക്ഖവേ ചങ്കമേ ആനിസംസാ, കതമേ പഞ്ച, അദ്ധാനക്ഖമോ ഹോതി. പധാനക്ഖമോ ഹോതി. അപ്പാബാധോ ഹോതി. അസിതംപീതംഖായിതംസായിതം സമ്മാ പരിണാമം ഗച്ഛതി. ചങ്കമാധിഗതോ സമാധി ചിരട്ഠിതികോ ഹോതി. ഇമേഖോ ഭിക്ഖവേ പഞ്ച ചങ്കമേ ആനി സംസാതി.

൨൩൯. പരിസ്സാവന-ദാനഞ്ച,

ആവാസ-ദാനമേവ ച;

ഗിലാന-വത്ഥു-ദാനഞ്ച,

ദാതബ്ബം മനുജാധിപ.

൨൪൦. കാതബ്ബം ജിണ്ണകാവാസം,

പടിസങ്ഖരണം തഥാ;

പഞ്ച-സീല-സമാദാനം,

കത്വാ തം സാധു-രക്ഖിതം;

ഉപോസഥോപവാസോ ച,

കാതബ്ബോപോസഥേ ഇതി.

൨൪൧. അതി-ഭോത്താ രോഗ-മൂലം,

ആയുക്ഖയം കരോതി വേ;

തസ്മാ തം അതി-ഭുത്തിംവ,

പരിഹരേയ്യ പണ്ഡിതോ.

൨൪൨. അ-ജിണ്ണേ ഭോജനം വിസം,

ദുല്ലദ്ധേ അ-വിചാരകേ;

ജിണ്ണേ സു-ലദ്ധേ വിചാരേ,

ന വജ്ജം സബ്ബ-ഭോജനം.

൨൪൩. ചത്താരോ പഞ്ച ആലോപേ,

ആഭുത്വാ ഉദകം പിവേ;

അലം ഫാസു-വിഹാരായ;

പഹിതത്തസ്സ ഭിക്ഖുനോ.

൨൪൪. മനുജസ്സ സദാ സതിമതോ,

മത്തം ജാനതോ ലദ്ധ-ഭോജനം;

തനുകസ്സ ഭവന്തി വേദനാ,

സനികം ജീരതി ആയു പാലയം.

൨൪൫. ഗരൂനം അഡ്ഢ-സോഹിച്ചം,

ലഹൂനം നാതി-കിത്തിയാ;

മത്താ-പമാണം നിദ്ദിട്ഠം,

സുഖം ജീരതി താവതാ.

൨൪൬. തോയാഭാവേ പിപാസത്താ,

ഖണാ പാണേഹി മുച്ചതേ;

തസ്മാ സബ്ബാസുവത്ഥാസു,

ദേയ്യം വാരിം പിപാസയേ.

൨൪൭. സീതോദകം പയോ ഖുദ്ദം,

ഘതമേകേകസോ ദ്വിസോ;

തിസ്സോ സമഗ്ഗമഥ വാ,

പഗേ പിതം യുവത്തദം.

൨൪൮. അന്നം ബ്രഹ്മാ രസേ വിണ്ഹു,

ഭുത്തേ ചേവ മഹേസരോ;

ഏവം ഞത്വാതു യോ ഭുഞ്ജേ,

അന്ന-ദോസം ന ലിമ്പതേ.

൨൪൯. കത്തികസ്സന്തിമോ ഭാഗോ,

യം ചാദോ മിഗ-മാസജോ;

താവുഭോ യമ-ദാഠാഖ്യോ,

ലഘ്വാഹാരോവ ജീവതി.

൨൫൦. സത്ഥാനുകുല-ചരിയാ,

ചിത്തഞ്ഞാവസവത്തിനാ;

ബുദ്ധി-രക്ഖിലിതത്ഥേന,

പരിപുണ്ണം രസായനം.

൨൫൦. അ-ജാതിയാ അ-ജാതാനം,

ജാതാനം വിനിവത്തിയാ;

രോഗാനം യോ വിധി ദിട്ഠോ,

തം സുഖത്ഥീ സമാചരേ.

൨൫൨. ആരോഗ്യം പരമാ ലാഭാ,

സന്തുട്ഠി പരമം ധനം;

വിസ്സാസാ പരമാ ഞാതി,

നിബ്ബാനം പരമം സുഖം.