ഏകൂനതിംസതിമ പരിച്ഛേദ

ഥൂപാരമ്ഭോ

൧. ഏവം സമത്തേ സമ്ഭാരേ, വേസാഖപുണ്ണമാസീയം;

പത്തേ വിസാഖനക്ഖത്തേ, മഹാഥൂപത്ഥമാരഭി.

൨. ഹാരേത്വാന തഹിം ഥൂപം, ഥൂപഠാനമഖാണയി;

സത്ഥഹത്ഥോ മഹീപാലോ, ഥിരീ കാതും മനേകധാ.

൩. യോധേഹി ആഹരാപേത്വാ, ഗുളപാസാണകേ തഹിം;

കൂടേഹി ആഹനാപേത്വാ, പാസാണേ ചുണ്ണിതേ അഥ.

൪. ചമ്മവനദ്ധ പാദേഹി, മഹാഹത്ഥീഹി മദ്ദയി;

ഭൂമിയാ ഥിരീഭാവത്ഥം, അത്ഥാനത്ഥവിചക്ഖണോ.

൫. ആകാസ ഗങ്ഗാപതിത-ട്ഠാനേ സതതതിന്തകേ;

മത്തികാ സുഖുമാ തത്ഥ, സമന്താ തിം സയോജനേ.

൬. നവനീത മത്തികാ’തേസാ, സുഖുമത്താ പപുച്ചതി;

ഖീണാസവാ സാമണേരാ, മത്തികാ ആഹരും തതോ.

൭. മത്തികാ അത്ഥരാപേസി, തത്ഥ പാസാണകോട്ടിമേ;

ഇട്ഠകാ അത്ഥരാപേസി, മത്തികോ പരിഇസ്സരോ.

൮. തസ്സോ പരിഖരസുധം, കുരുവിന്ദം തതോപരി;

തസ്സോ പരിഅയോജാലം, മരുമ്ബന്തു തതോപരം.

൯. ആഹടം സാമണേരേഹി, ഹിമവന്താ സുഗന്ധകം;

സന്ഥരാപേസി ഭൂമിന്ദോ, ഫളികന്തു തതോപരി.

൧൦. സീലായോ സന്ഥരാപേസിച്ഛ ഫളികസന്ഥരോ പരി;

സബ്ബത്ഥ മത്തികാകിച്ചേ, നവനീതവ്ഹയാ അഹു.

൧൧. നിയ്യാസേന കപിട്ഠസ്സ, സന്നിതേന രസോദകേ;

അട്ഠങ്ഗുലം ബഹലഏതാ, ലോഹപട്ടം സീലോപരി.

൧൨. മനോസിലായതിലതേ-ലസന്നിതായ തതോ പരി;

സത്തങ്ഗുലം സജ്ജുപട്ടം, സന്ഥരേസി രഥേസഭോ.

൧൩. മഹാഥൂപ പതിട്ഠാന-ഠാനേ ഏവം മഹീപതി;

കാരേത്വാ പരികമ്മാനി, വിപ്പസന്നേന ചേതസാ.

൧൪. ആസള്ഹീ സുക്കപക്ഖസ്സ, ദിവസമ്ഹി ചതുദ്ദസേ;

കാരേത്വാ ഭിക്ഖുസങ്ഘസ്സ, സന്നിപാതമിദം വദി.

൧൫. മഹാചേതിയ മത്ഥായ, ഭദന്താമങ്ഗലിട്ഠകം;

പതിട്ഠാപേസ്സം സ്വേ ഏത്ഥ, സബ്ബോ സങ്ഘോ സമേതുനോ.

൧൬. ബുദ്ധ പൂജാ പയോഗേന, മഹാജനഹീതത്ഥികോ;

‘‘മഹാജനോ’ പോസഥികോ, ഗന്ധമാലാദിഗണ്ഹിയ.

൧൭. മഹാഥൂപ പതിട്ഠാന-ഠാനം യാതു സുവേ’’ഇതി;

ചേതിയ ഠാന ഭൂസായ, അമച്ചേ ച നിയോജയി.

൧൮. ആണാപിതാ നരിന്ദേന, മുനിനോ പിയഗാരവാ;

അനേകേഹി പകാരേഹി, തേ തം ഠാനമലങ്കരും.

൧൯. നഗരം സകലഞ്ചേവ, മഗ്ഗഞ്ചേവ ഇധാഗതം;

അനേകേഹി പകാരേഹി, അലങ്കാരയി ഭൂപതി.

൨൦. പഭാതേ ച ചതുദ്വാരേ, നഗരസ്സ ഠപാപയി;

നഹാപിതേ നഹാപകേ ച, അപ്പകേ ച ബഹൂതഥാ.

൨൧. വത്ഥാനി ഗന്ധമാലാ ച, അന്നാനി മധുരാനി ച;

മഹാജനത്ഥം ഭൂമിന്ദോ, മഹാജനഹിതേ രതോ.

൨൨. പടിയത്താനി ഏതാനി, സാദിയിത്വാ യഥാരുചി;

പോരാജാനപദാചേവ ഥൂപഠാനമുപാഗമും.

൨൩. സുമണ്ഡിതേഹി നേകേഹി, ഠാനന്തര വിധാനതോ;

ആരക്ഖിതോ അമച്ചേഹി, യഥാഠാനം മഹീപതി.

൨൪. സുമണ്ഡിതാഹി നേകാഹി, ദേവകഞ്ഞൂപമാഹി ച;

നാടകീഹി പരിബ്ബുള്ഹോ, സുമണ്ഡിത പസ്സാധിതോ.

൨൫. ചത്താലീസ സഹസ്സേഹി, നരേഹി പരിവാരിതോ;

നാനാ തൂരിയ സങ്ഘുട്ഠോ, ദേവരാജ വിലാസവാ.

൨൬. മഹാഥൂപ പതിട്ഠാനം, ഠാനാഠാന വിചക്ഖണോ;

അപരണ്ഹേ ഉപാഗഞ്ഛി, നന്ദയന്തോ മഹാജനം.

൨൭. അട്ഠുത്തരസഹസ്സം സോ, സാടകാനിട്ഠപാപിയ;

പുടബദ്ധാനി മജ്ഝമ്ഹി, ചതുപസ്സേ തതോ പന.

൨൮. വത്ഥാനി രാസീംകാരേസി, അനേകാനി മഹീപതി;

മധുസപ്പി ഗുളാദീഹി ച, മങ്ഗലത്ഥം ഠപാപയി.

൨൯. നാനാദേസേഹിപാ’ഗഞ്ഛും, ബഹവോ ഭിക്ഖവോ ഇധ;

ഇധ ദീപട്ഠസങ്ഘസ്സ, കാ കഥാവ ഇധാഗമേ.

൩൦. ഥേരോ’ സീതി സഹസ്സാനി, ഭിക്ഖൂ ആദായ ആഗമാ;

രാജഗഹസ്സ സാമന്താ, ഇന്ദഗുത്തോ മഹാഗണീ.

൩൧. സഹസ്സാനി’സിപതനാ, ഭിക്ഖൂനം ദ്വാദസാ’ദിയ;

ധമ്മസേനോ മഹാഥേരോ, ചേതിയഠാനമാഗമാ.

൩൨. സട്ഠിഭിക്ഖുസഹസ്സാനി, ആദായ ഇധമാഗമാ;

പീയദസ്സീ മഹാഥേരോ, ജേതാരാമ വിഹാരതോ.

൩൩. വേസാലീ മഹാവനതോ, ഥേരോരു ബുദ്ധരക്ഖിതോ;

അട്ഠാരസ സഹസ്സാനി, ഭിക്ഖൂ ആദായ ആഗമാ.

൩൪. കോസമ്ബീ ഘോസിതാരാമാ, ഥേരോരു ധമ്മരക്ഖിതോ;

തിംസഭിക്ഖുസഹസ്സാനി, ആദായ ഇധ ആഗമാ.

൩൫. ആദായുജ്ജേനീയം ഥേരോ, ദക്ഖിണ ഗിരിതോ യതി;

ചത്താരീസ സഹസ്സാനി, അഗോരു സങ്ഘരക്ഖിതോ.

൩൬. ഭിക്ഖൂനം സതസഹസ്സം, സട്ഠസഹസ്സാനി ചാ’ദിയ;

പുപ്ഫപുരേ’സോകരാമാ, ഥേരോ മിത്തിണ്ണ നാമകോ.

൩൭. ദുവേ സതസഹസ്സാനി, സഹസ്സാനി അസീതി ച;

ഭിക്ഖൂ ഗഹേത്വാനു’ത്തിണ്ണോ, ഥേരോ കസ്മിരമണ്ഡലാ.

൩൮. ചത്താരീസത സഹസ്സാനി, സഹസ്സാനി ച സട്ഠി ച;

ഭിക്ഖൂ പല്ലവഭോഗമ്ഹാ, മഹാദേവോ മഹാമതീ.

൩൯. യോനനഗരാ’ലസന്ദാസോ, യോന മഹാധമ്മരക്ഖിതോ;

ഥേരോ തിംസ സഹസ്സാനി, ഭിക്ഖൂ ആദായ ആഗമാ.

൪൦. വഞ്ഝാടവിവത്തനിയാ, സേനാസനാ തു ഉത്തരോ;

ഥേരോ സട്ഠിസഹസ്സാനി, ഭിക്ഖൂ ആദായ ആഗമാ.

൪൧. ചിത്തഗുത്തോ മഹാഥേരോ, ബോധിമണ്ഡവിഹാരതോ;

തിംസ ഭിക്ഖുസഹസ്സാനി, ആദിയിത്വാ ഇധാഗമാ.

൪൨. ചന്ദഗുത്തോ മഹാഥേരോ, വനവാസപദേസതോ;

ആഗാസീതി സഹസ്സാനി, ആദിയിത്വാ യതീ ഇധ.

൪൩. സൂരിയഗുത്തോമഹാഥേരോ, കേലാസമ്ഹാ വിഹാരതോ;

ഛന്നവുതി സഹസ്സാനി, ഭിക്ഖൂആദായ ആഗമാ.

൪൪. ഭിക്ഖൂനം ദീപവാസിനം, ആഗതാനഞ്ച സബ്ബസോ;

ഗണനായ പരിച്ഛേദോ, പോരാണേഹി ന ഭാസിതോ.

൪൫. സമാഗതാനം സബ്ബേസം, ഭിക്ഖുനം തം സമാഗമേ;

വുത്താ ഖീണാസവായേവ, തേ ഛന്നവുതികോടിയോ.

൪൬. തേ മഹാചേതിയഠാനം, പരിവാരേത്വാ യഥാരഹം;

മജ്ഝേ ഠപേത്വാ ഓകാസം, രഞ്ഞോ അട്ഠംസു ഭിക്ഖവോ.

൪൭. പവിസിത്വാ തഹിം രാജാ, ഭിക്ഖുസങ്ഘം തഥാ ഠിതം;

ദിസ്വാ പസന്നചിത്തേന, വന്ദിത്വാ ഹട്ഠമാനസോ.

൪൮. ഗന്ധമാലാഹി പൂജേത്വാ, കത്വാന തിപദക്ഖിണം;

മജ്ഝേ പുണ്ണഘടഠാനം, പവിസിത്വാ സമങ്ഗലം.

൪൯. സുവണ്ണഖീലേ പടിമുക്കം, പരിബ്ഭമനദണ്ഡകം;

രാജതേന കതം സുദ്ധം, സുദ്ധപീതി ബലോദയോ.

൫൦. ഗാഹയിത്വാ അമച്ചേന, മണ്ഡിതേന സുജാതിനാ;

അഭിമങ്ഗലഭൂതേന, ഭൂതഭൂതിപരായണോ.

൫൧. മഹന്തം ചേതിയാവട്ടം, കാരേതും കതനിച്ഛയോ;

ഭമാപയിതു മാരദ്ധോ, പരികമ്മിത ഭൂമിയം.

൫൨. സിദ്ധത്ഥോ നാമ നാമേന, മഹാഥേരോ മഹിദ്ധികോ;

തഥാകരോന്തം രാജാനം, ദീഘദസ്സീ നിവാരയി.

൫൩. ‘‘ഏവം മഹന്തം ഥൂപഞ്ച, അയം രാജാ’രഭിസ്സതി;

ഥൂപേ അനിട്ഠിതേയേവ, മരണം അസ്സ ഹേസ്സതി.

൫൪. ഭവിസ്സതി മഹന്തോ ച, ഥൂപോദുപ്പടിസങ്ഖരോ;

ഇതി സോ നാഗതം പസ്സം, മഹന്തത്തം നിവാരയി.

൫൫. സങ്ഘസ്സ ച അനുഞ്ഞായ, ഥേരോ സമ്ഭാവനായച;

മഹന്തം കത്തുകാമോ’പി, ഗണ്ഹിത്വാ ഥേരഭാസിതം.

൫൬. ഥേരസ്സ ഉപദേസേന, തസ്സ രാജാ അകാരയി;

മജ്ഝിമം ചേതിയാവട്ടം, പതിട്ഠാപേതുമിട്ഠികാ.

൫൭. സോവണ്ണരജതേ ചേവ, ഘടേ മജ്ഝേട്ഠപാപയി;

അട്ഠട്ഠ അട്ഠിതുസ്സാഹോ, പരിവാരിയ തേ പന.

൫൮. അട്ഠുത്തരസഹസ്സഞ്ച, ഠപാപേസി നവേ ഘടേ;

അട്ഠുത്തരേ അട്ഠുത്തരേ, വത്ഥാനം തു സതേ പന.

൫൯. ഇട്ഠികാപവരാ അട്ഠ, ഠപാപേസി വിസും വിസും;

സമ്മതേന അമച്ചേന, ഭൂസിതേന അനേകധാ.

൬൦. തതോ ഏകം ഗാഹയിത്വാ, നാനാമങ്ഗലസങ്ഖതേ;

പുരിത്ഥിമദിസാഭാഗേ, പഠമം മങ്ഗലിത്ഥികം.

൬൧. പതിട്ഠാപേസി സക്കച്ചം, മനുഞ്ഞേ ഗന്ധകദ്ദമേ;

ജാതിസുമന പുപ്ഫേസു, പൂജിതേസു തഹിം പന.

൬൨. അഹോസി പുഥവീകമ്പോ, സേസാ സത്താപി സത്തഹി;

പത്തിട്ഠാപേസ’ മച്ചേഹി, മങ്ഗലാനി ച കാരയി.

൬൩. ഏവം അസാള്ഹമാസസ്സ, സുക്കപക്ഖേ’ഭിസമ്മതേ;

ഉപോസഥേ പന്നരസേ, പതിട്ഠാപേസി ഇട്ഠികാ.

൬൪. ചതുദ്ദിസം ഠിതേ തത്ഥ, മഹാഥേരേ അനാസവേ;

വന്ദിത്വാ പൂജയിത്വാ ച, സുപ്പതിതോ കമേന സോ.

൬൫. പുബ്ബുത്തരം ദിസം ഗന്ത്വാ, പിയദസ്സിം അനാസവം;

വന്ദിത്വാന മഹാഥേരം, അട്ഠാസി തസ്സ സന്തികേ.

൬൬. മങ്ഗലം തത്ഥ വഡ്ഢേന്തോ, തസ്സ ധമ്മമഭാസിസോ;

ഥേരസ്സ ദേസനാ തസ്സ, ജനസ്സാ’ഹോസി സാത്ഥികാ.

൬൭. ചത്താലീസസഹസ്സാനം, ധമ്മാഭിസമയോ അഹു;

ചത്താലീസസഹസ്സാനം, സോതാപത്തിഫലം അഹു.

൬൮. സഹസ്സം സകദാഗാമി, അനാഗാമി ച തത്തകാ;

സഹസ്സംയേവ അരഹന്തോ, തത്ഥ’ഹേസും ഗിഹീജനാ.

൬൯. അട്ഠാരസസഹസ്സാനി, ഭിക്ഖൂഭിക്ഖുനിയോ പന;

ചുദ്ദസേവ സഹസ്സാനി, അരഹത്തേ പതിട്ഠയും.

൭൦. ഏവമ്പപസന്നമതിമാ രതനത്തയമ്ഹി,

ചാഗാമിമുത്തമനസാജനതാഹി തേന;

ലോകത്ഥസിദ്ധി പരമാ ഭവതീതി ഞത്വാ,

സദ്ധാദിനേകഗുണയോഗ രതിം കരേയ്യാതി.

സുജനപ്പസാദസം വേഗത്ഥായ കതേ മഹാവംസേ

ഥൂപാരമ്ഭോ നാമ

ഏകൂനതിംസതിമോ പരിച്ഛേദോ.