ചുദ്ദസമ പരിച്ഛേദ

നഗരപ്പവേസനോ

൧. ദേവാനംപിയതിസ്സോ സോ, രാജാ സലിലകീളിതം;

ദത്വാ നഗരവാസീനം, മിഗവം കീളിതും അഗാ.

൨. ചത്താലീസസഹസ്സേഹി, നരേഹി പരിവാരിതോ;

ധാവന്തോ പദസായേവ, അഗമാ മിസ്സകം നഗം.

൩. ഥേരേ ദസ്സേതുമിച്ഛന്തോ, ദേവോ തസ്മിം മഹീധരേ;

ഗുമ്ഭംഭക്ഖയമാനോ’വ, അട്ഠാ ഗോകണ്ണരൂപവാ.

൪. രാജാ ദിസ്വാ ‘‘പമത്തം തം, ന യുത്തം വിജ്ഝിതും’’ ഇതി;

ജിയാ സദ്ദമകാധാപി, ഗോകണ്ണോ പബ്ബതന്തരം.

൫. രാജാ’നുധാവി സോധിം, ഥേരാനം സന്തികം ഗതോ;

ഥേരേ ദിട്ഠേ നരിന്ദേന, സയമന്തരധായിസോ.

൬. ഥേരോ ‘‘ബഹൂസു ദിട്ഠേസു, അതിഭായിസ്സതീ’’ തിസോ;

അത്താനമേവ ദസ്സേസി, പസ്സിത്വാ തം മഹീപതിം.

൭. ഭീതോ അട്ഠാസി തം ഥേരോ, ‘‘ഏഹി തിസ്സാതി അബ്രവി;

തിസ്സാ’തി വചനേനേവ, രാജാ യക്ഖോ’’തി ചിന്തയീ.

൮. സമണാ മയം മഹാരാജ, ധമ്മരാജസ്സ സാവകാ;

തമേവ അനുകമ്പായ, ജമ്ബുദീപാ ഇധാഗതാ.

൯. ഇച്ചാഹ ഥേരോ തം സുത്വാ, രാജാ വീതഭയോ അഹു;

സരിത്വാ സഖീസന്ദേസം, ‘‘സമാണാ’’ ഇതി നിച്ഛിതോ.

൧൦. ധനും സരഞ്ച നിക്ഖിപ്പ, ഉപസങ്കമ്മ തം ഇസിം;

സമ്മോദമാനോ ഥേരേന, സോ നിസീദി തദന്തികേ.

൧൧. തദാ തസ്സ മനുസ്സാ തേ, ആഗമ്മ പരിവാരയും;

തദാ സേസേ ഛ ദസ്സേസി, മഹാഥേരോ സഹാഗതേ.

൧൨. തേ ദിസ്വാ അബ്രവീ രാജാ, ‘‘കദാ’’ മേ ആഗതാ ഇതി;

‘‘മയാ സദ്ധിം’’തി ഥേരേന, വുത്തേ പുച്ഛി ഇദം പുന.

൧൩. ‘‘സന്തി ഈദിസകാ അഞ്ഞേ, ജമ്ബുദീപേ യതീ’’ ഇതി;

ആഹ ‘‘കാസാവപജ്ജോ തോ, ജമ്ബുദീപോ തഹിം പന.

൧൪. തേവിജ്ജാ ഇദ്ധിപ്പത്താ ച, ചേതോപരിയകോവിദാ;

‘‘ദിബ്ബസോതാ’രഹന്തോ ച, ബഹൂ ബുദ്ധസ്സ സാവകാ’’.

൧൫. പുച്ഛി ‘‘കേനാഗതത്ഥാ’’തി, ന ഥലേന ന വാരിനാ;

ആഗതമ്ഹാ’’തി വുത്തേ സോ, വിജാനി നഭസാഗമം.

൧൬. വീമംസംസോ മഹാപഞ്ഞോ, കണ്ഹം പഞ്ഹമപുച്ഛിതം;

പുട്ഠോ പുട്ഠോ വിയാകാസി, തംതം പഞ്ഹം മഹീപതി.

൧൭. രുക്ഖോയം രാജകിന്നാമോ, അഞ്ഞോ നാമ അയം തരു;

ഇമം മുഞ്ചിയ അത്ഥ’മ്ബോ, സന്തി അമ്ബതരൂ ബഹും.

൧൮. ഇമഞ്ച അമ്ബം തേച’മ്ബേ, മുഞ്ചിയത്ഥി മഹീരുഹാ;

സന്തി ഭന്തേ ബഹു രുക്ഖാ, അനമ്ബാപന തേ തരു.

൧൯. അഞ്ഞേ അമ്ബേ അനമ്ബേ ച, മുഞ്ചിയ’ത്ഥി മഹീരുഹാ;

അയം ഭന്തേ അമ്ബരുക്ഖോ, പണ്ഡിതോ’സി നരിസ്സര.

൨൦. സന്തി തേ ഞാതകാ രാജ, സന്തി ഭന്തേ ബഹുജ്ജനാ;

സന്തി അഞ്ഞാതകാ രാജ, സന്തി തേ ഞാതിതോ ബഹൂ.

൨൧. ഞാതകേ തേ ച അഞ്ഞേ ച, മുഞ്ചിയ’ഞ്ഞോപി അത്ഥി നു;

‘‘ഭന്തേ’’ ഹമേവ സാധു ത്വം, പണ്ഡിതോ’സി നരിസ്സര.

൨൨. പണ്ഡിതോ’തി വിദിത്വാന, ചൂളഹത്ഥിപദോപമം;

സുത്തന്തം ദേസയീ ഥേരോ, മഹീപസ്സ മഹാമതീ.

൨൩. ദേസനാപരിയോസാനേ, സദ്ധിം തേഹി നരേഹി സോ;

ചത്താലീസസഹസ്സേഹി, സരണേസു പതിട്ഠഹി.

൨൪. ഭത്താ’ഭീഹാരം സായന്ഹേ, രഞ്ഞോ അഭിഹരും തദാ;

‘‘ന ഭുഞ്ജിസ്സ’’ന്തി ദാനി മേ, ഇതി ജനമ്മി ഭൂപതി.

൨൫. പുച്ഛിതുംയേവ യുത്തന്തി, ഭത്തേനാ’പുച്ഛിതേ ഇസി;

ന ഭുഞ്ജാമ ഇദാനീ’തി, വുത്തേ കാലഞ്ച പുച്ഛിസോ.

൨൬. കാലം വുത്തേ’ബ്രവി ഏവം, ‘‘ഗച്ഛാമ നഗരം’’ഇതി;

തുവം ഗച്ഛ മഹാരാജ, വസിസ്സാമ മയം ഇധ.

൨൭. ഏവം സതി കുമാരോ’യം, അമ്ഹേഹി സഹ ഗച്ഛതു;

അയഞ്ഹി ആഗതഫലോ, രാജ വിഞ്ഞാതസാസനോ.

൨൮. അപേക്ഖമാനോ പബ്ബജ്ജം, വസത’മ്ഹാകമന്തികേ;

ഇദാനി പബ്ബജേസ്സാമ, ഇമം ത്വം ഗച്ഛ ഭൂമിപ.

൨൯. പാതോ രഥം പേസയിസ്സം, തുമ്ഹേ തത്ഥ ഠിതാ പുരം;

യാഥാ’തി ഥേരേ വന്ദിത്വാ, ഭണ്ഡുംനേത്വ’ക മന്തകം.

൩൦. പുച്ഛി ഥേരാധികാരംസോ, രഞ്ഞോ സബ്ബമഭാസി സോ;

ഥേരം ഞത്വാ’തി തുട്ഠോസോ, ‘‘ലാഭാ മേ’’ഇതി ചിന്തയി.

൩൧. ഭണ്ഡുസ്സ ഗീഹിഭാവേന, ഗതാസങ്കോ നരിസ്സരോ;

അഞ്ഞാസി നരഭാവം സോ, ‘‘പബ്ബാജേമ ഇമം’’ ഇതി.

൩൨. ഥേരോ തം ഗാമസീമായം, തസ്മിംയേവ ഖണേ അകാ;

ഭണ്ഡുകസ്സ കുമാരസ്സ, പബ്ബജ്ജമുപസമ്പദം.

൩൩. തസ്മിംയേവ ഖണേ സോ ച, അരഹത്തമപാപുണി;

സുമനം സാമണേരം തം, ഥേരോ ആമന്തയീ തതോ.

൩൪. ധമ്മസവനകാലം ത്വം, ഘോസേഹീ’’തി അപുച്ഛിസോ;

സാവേന്തോ കിത്തകം ഠാനം, ഭന്തേ ഘോസേമ’ഹം ഇതി.

൩൫. ‘‘സകലം തമ്ബപണ്ണീ’’തി, വുത്തേ ഥേരേന ഇദ്ധിയാ;

സാവേന്തോ സകലം ലംകം, ധമ്മകാലമഘോസയീ.

൩൬. രാജാ നാഗചതുത്തേസോ, സോണ്ണിപസ്സേ നിസീദിയ;

ഭുഞ്ജന്തോ തം രവം സുത്വാ, ഥേരന്തിക മപേസയി.

൩൭. ‘‘ഉപദ്ദവോ നു അത്ഥീ’’തി, ആഹ നത്ഥി ഉദ്ദവോ;

സോതും സമ്ബുദ്ധവചനം, കാലോ ഘോസാപിതോ ഇതി.

൩൮. സാമണേര രവം സുത്വാ, ഭുമ്മാദേവാ അഘോസയും;

അനുക്കമേന സോ സദ്ദോ, ബ്രഹ്മലോകം സമാരുഹി.

൩൯. തേന ഘോസേന ദേവാനം, സന്നിപാതോ മഹാ അഹു;

സമചിത്തസുത്തം ദേസേസി, ഥേരോ തസ്മിം സമാഗമേ.

൪൦. അസംഖിയാനം ദേവാനം, ധമ്മാഭിസമയോ അഹു;

ബഹൂ നാഗാ സുപണ്ണാ ച, സരണേസു പതിട്ഠയും.

൪൧. യഥേദം സാരിപുത്തസ്സ, സുത്തം ഥേരസ്സ ഭാസതോ;

തഥാ മഹിന്ദത്ഥേരസ്സ, അഹു ദേവസമാഗമോ.

൪൨. രാജാ പഭാ തേ പാഹേസി, രഥം സാരഥി സോ ഗതോ;

‘‘ആരോഹഥ രഥം യാമ, നഗരം’’ ഇതി തേ’ബ്രവി.

൪൩. നാ’രോഹാമ രഥം ഗച്ഛ, ഗച്ഛാമ തവ പച്ഛതോ;

ഇതി വത്വാന പേസേത്വാ, സാരഥിം സുമനോരഥം.

൪൪. വേഹാസമബ്ഭുഗന്ത്വാ, തേ നഗരസ്സ പുരത്ഥതോ;

പഠമത്ഥൂപട്ഠാനമ്ഹി, ഓതരിംസു മഹിദ്ധികാ.

൪൫. ഥേരേഹി പഠമോതിണ്ണ-ഠാനമ്ഹി കതചേതിയം;

അജ്ജാപി വുച്ചതേ തേന, ഏവം പഠമചേതിയം.

൪൬. രഞ്ഞാ ഥേരഗുണം സുത്വാ, സബ്ബാ അന്തേപുരിത്ഥിയോ;

ഥേരദസ്സനമിച്ഛിംസു, യസ്മാ തസ്മാമഹീപതി.

൪൭. അന്തോ’വ രാജവത്ഥുസ്സ, രമ്മം കാരേസി മണ്ഡപം;

സേതേഹി വത്ഥപുപ്ഫേഹി, ഛാദിതം സമലങ്കതം.

൪൮. ഉച്ചസേയ്യാവിരമണം, സുതത്താ ഥേരസന്തികേ;

കങ്ഖീ ‘‘ഉച്ചാസനേ ഥേരോ, നിസീദിദേയ്യനുനോതി ച.

൪൯. തദന്തരേ സാരഥി സോ, ഥേരേ ദിസ്വാ തഹിം ഠിതേ;

ചീവരം പാരുപന്തേ തേ, അതിവിമ്ഹിത മാനസോ.

൫൦. ഗന്ത്വാ രഞ്ഞോ നിവേദേസി, സുത്വാ സബ്ബം മഹീമതി;

‘‘നിസജ്ജം ന കരിസ്സന്തി, പീഠകേസൂ’’തി നിച്ഛിതോ.

൫൧. ‘‘സുസാധു ഭുമ്മത്ഥരണം, പഞ്ഞാപേഥാ’’തി ഭാസിയ;

ഗന്ത്വാ പടിപഥം ഥേരേ, സക്കച്ചം അഭിവാദിയ.

൫൨. മഹാമഹിന്ദത്ഥേരസ്സ, ഹത്ഥതോ പത്തമാദിയ;

സക്കാരപൂജാവിധിനാ, പുരം ഥേരം പവേസയി.

൫൩. ദിസ്വാ ആസനപഞ്ഞത്തിം, നേമിത്താ ബ്യാകരും ഇതി;

‘‘ഗഹിതാ പഥവീ’മേഹി, ദീപേ ഹേസ്സന്തി ഇസ്സരാ.

൫൪. നരിന്ദോ പൂജയന്തോ തേ, ഥേരേ അന്തേപുരം നയി;

തത്ഥ തേ ദുസ്സപീഠേസും, നിസീദിംസു യഥാരഹം.

൫൫. തേ യാഗുഖജ്ജഭോജ്ജേഹി, സയം രാജാ അതപ്പയി;

നിട്ഠിതേ ഭത്തകിച്ചമ്ഹി, സയം ഉപനിസീദിയ.

൫൬. കനിട്ഠസ്സോപരാജസ്സ, മഹാനാഗസ്സ ജായികം;

വസന്തിം രാജഗേഹേ’വ, പക്കോസാ പേസിചാ’നുലം.

൫൭. ആഗമ്മ അനുലാദേവീ, പഞ്ച ഇത്ഥിസതേഹി സാ;

ഥേരേവന്ദിയ പൂജേത്വാ, ഏകമന്തമുപാവിസി.

൫൮. പേതവത്ഥും വിമാനഞ്ച, സച്ചസംയുത്തമേവ ച;

ദേസേസി ഥേരോ താ ഇത്ഥീ, പഠമം ഫലമജ്ഝഗും.

൫൯. ഹിയ്യോ ദിട്ഠമനുസ്സേഹി, സുത്വാ ഥേരഗുണേ ബഹൂ;

ഥേരദസ്സനമിച്ഛന്താ, സമാഗന്ത്വാന നാഗരാ.

൬൦. രാജദ്വാരേ മഹാസദ്ദം, അകരും തം മഹീപതി;

സുത്വാ പുച്ഛിയ ജാനിത്വാ, ആഹ തേസം ഹിതത്ഥികോ.

൬൧. സബ്ബേസം ഇധ സമ്ബാധോ, സാലാമങ്ഗലഹത്ഥിനോ;

സോധേഥ തത്ഥ ദക്ഖന്തി, ഥേരേ’മേ നാഗരാ’ഇതി.

൬൨. സോധേത്വാ ഹത്ഥിസാലം തം, വിതാനാദീഹി സജ്ജുകം;

അലങ്കരിത്വാ സയനേ, പഞ്ഞപേസും യഥാരഹം.

൬൩. സഥേരോ തത്ഥ ഗന്ത്വാന, മഹാഥേരോ നിസീദിയ;

സോ ദേവദൂതസുത്തന്തം, കഥേസീ കഥികോ മഹാ.

൬൪. തം സുത്വാന പസീദിംസു, നഗരാ തേ സമാഗതാ;

തേസു പാണസഹസ്സംതു, പഠമം ഫലമജ്ഝഗാ.

൬൫. ലംകാദീപേ സോ സത്ഥുകപ്പോ അകപ്പോ;

ലംകാധിട്ഠാനേ ദ്വീസു ഠാനേസു ഥേരോ;

ധമ്മം ഭാസിത്വാ ദീപഭാസായ ഏവം;

സദ്ധമ്മോ താരം കാരയീ ദീപദീപോതി.

സുജനപ്പസാദസംവേഗത്ഥായ കതേ മഹാവംസേ

നഗരപ്പവേസനോ നാമ

ചുദ്ദസമോ പരിച്ഛേദോ.