൫. ഇത്ഥികണ്ഡോ

൯൪. കോകിലാനം സദ്ദം രൂപം,

നാരീരൂപം പതിബ്ബതാ;

വിജ്ജാ രൂപം അ-രൂപാനം,

ഖമാ രൂപം തപസ്സിനം.

൯൫. ഇത്ഥീനഞ്ച ധനം രൂപം,

പുരിസാനം വിജ്ജാ ധനം;

ഭിക്ഖൂനഞ്ച ധനം സീലം,

രാജാനഞ്ച ധനം ബലം.

൯൬. തപസ്സിനോ കിസാ സോഭാ,

ഥൂലാ സോഭാ ചതുപ്പദാ;

പുരിസാ വിജ്ജവാ സോഭാ,

ഇത്ഥീ സോഭാസ സാമികാ.

൯൭. പഞ്ച രത്യാ സുഗന്ധബ്ബാ,

സത്ത രത്യാ ധനുഗ്ഗഹാ;

ഏക മാസാ സുഭരിയാ,

അഡ്ഢ മാസാ സിസ്സാ മലാ.

൯൮. ഹിം രമതി പങ,

ഹങ രമതി പോക.

ഥീ രമതി പു,

ഖു രമതി ധം.

൯൯. ജിണ്ണമന്നം പസംസേയ്യ,

ദാരഞ്ച ഗതയോബ്ബനം;

രണാ പുനാഗതാ സൂരം,

സസ്സഞ്ച ഗേഹമാഗതം.

൧൦൦. ദ്വത്തി-പതികാ നാരീ ച,

ഭിക്ഖു ദ്വത്തി-വിഹാരികോ;

ദ്വത്തി-പാസ-മുത്തോ പക്ഖീ,

കത-മായാ ബഹൂഥരം.

൧൦൧. ദുജ്ജനം പഹാരാദമേ,

മിത്തം ദമേ അ-ഭാണികാ;

ഇത്ഥിഞ്ച ബ്യസനാ ദമേ,

രാഗിനം അപ്പ ഭോജനാ.

൧൦൨. ന രത്തി വിനാ ചന്ദിമാ,

വീചിം വിനാ ച അണ്ണവോ;

ഹംസം വിനാ പോക്ഖരണീ,

പതിം കഞ്ഞാച സോഭതേ.

൧൦൩. പതിനാ ജനിതോ ഭോഗോ,

ഇത്ഥിയാവ സംഗോപ്പിതോ;

പുരിസോവ ഹി പധാനോ,

ഇത്ഥീ സുത്തംവ സൂചിയാ.

൧൦൪. സബ്ബാനദീ വങ്കനദീ,

സബ്ബേ കട്ഠമയാ വനാ;

സബ്ബിത്ഥിയോ കരേ പാപം,

ലഭമാനേ നിവാതകേ.

൧൦൫. വിവാദസീലിം ഉസൂയഭാണിനിം,

സമ്പസ്സതണ്ഹിം ബഹുപാകഭുത്തിനിം;

അഗ്ഗന്തഭുത്തിം പരഗേഹവാസിനിം,

നാരിം ചജേ പുത്തസതമ്പി പൂമാ.

൧൦൬. ഭുത്തേസു മണ്ഡേസു ജനീവ കന്തിനീ,

ഗുയ്ഹേച ഠാനേ ഭഗിനീവ ഹിരിണീ;

കമ്മേസു പത്തേസു കരോതി ദാസീവ,

ഭയേസു മന്തീ സയനേസു രാമയേ;

രൂപീസു സിക്ഖീ കുപനേസു ഖന്തിനീ,

സാ നാരീ സേട്ഠാതി വദന്തി പണ്ഡിതാ;

കായസ്സ ഭേദാച ദിവേഭവേയ്യ സാ.

൧൦൭. സാമാ മിഗക്ഖീ തനുമജ്ഝഗത്താ,

സൂരൂ സുകേസീ സമദന്തപന്തീ;

ഗമ്ഭീരനാഭീ യുവതീ സുസീലീ,

ഹീനേ കുലേ ജാതാപി വിവാഹ്യാ.

൧൦൮. സരദംരതു-കാലാനം,

ഭരിയാനം രൂപവതീ;

ജേട്ഠോ പധാനം പുത്താനം,

ദിസാനം ഉത്തരാദിസാ.

൧൦൯. യാ ഇച്ഛേ പുരിസോ ഹോതും,

ജാതി ജാതി പുനപ്പുനം;

സാമികം അപചായേയ്യ,

ഇന്ദംവ പാരിചാരികാ.

൧൧൦. യോ ഇച്ഛേ പുരിസോ ഹോതും,

ജാതി ജാതി പുനപ്പുനം;

പരദാനം വിവജ്ജേയ്യ,

ധോതപാദോവ കദ്ദമം.

൧൧൧. അതിക്കന്ത വയോ പോസോ,

ആനേതി തിമ്ബരുത്തനിം;

തസ്സാ ഇസ്സാ അസദ്ധാതി,

തം പരാഭവതോ മുഖം.

ഇത്ഥികണ്ഡോ നിട്ഠിതോ.